بعبعه بلوجاريه

رساله من حواء لآدم

2011-06-19T19:36:00.000-07:00

جالي رساله من اخت وصديقه عزيزه عليا اوي وعليكم برضه :) وبعتتلي موضوع جميل اوي زيها وطلبت مني انشره عندي لانها مش عايزه تنشره عندها لاسباب كتير منها التخلف الطافح للمجتمع :)

الموضوع انا اخترتله اسم انه رساله من حواء لآدم ..الحقيقه انا زودت عليه شويه باذنها

خلينا نقراه وبعدين نعلق عليه

قبل الجواز بشوية

--------------------

هاتى ايدك دى و خليها معايا

انتى عاوزاها فى حاجة ؟!!

لما بتفرج ع الحاجات دى

ف فيلم أو فترينة بتخيلك فيها

احنا هنبقى دايما صرحا

و مش عاوزك تنكسفى منى ابدا

الرجال مش بيدورا على مزاجهم بس

ويهمنى تكونى سعيدة قدى تمام

الواحد بيجيب معلوماته من رجالة اللى حواليه

اومال هسأل مين يعنى ؟

انا عمرى ما هزهق من حبك

و لا هشبع منك

انتى فى عنيه احلى واحده فى الدنيا

كل حاجه فيكى حلوه مش شايف حد غيرك

امته بقى اخدك فى حضنى

ونغمض عنينا وننام واحنا فى حضن بعض

امتى هنتجوز خلااااااص مش قادر

تبعدى عنى اكتر من كده

بعد الجواز بشوية

-------------------

انتى بتوحشينى حتى

و انتى ف حضنى

القميص ده يهوس

و لونه يجنن عليكى

لو اى حاجة نفسك فيها نعملها سوا

قوليلى ومتنكسفيش

انا اسف لو كنت فى وسط لهفتى

مسألتكيش انتى .. مبسوطة

أصل الرجالة لما بتتلم بيقعدوا

يتكلموا ف الحكاية دى و ينصحوا بعض

يا حبيبتى انتى حلالى

و عمرى ما هتبطر علي النعمة و الا تزول

حد يبقى معاه القمر ويبص للنجوم

ما باشعبش منك ابدا

لأ الحاجات دى بتتعمل بروقان

اوعى تقوليلى انك تعبتى

يلا تعالى فى حضنى عشان اعرف انام

الله .. انتى نمتى بسرعة كدا ليه ؟

اصحى عاوز اقولك على حاجة

بعد الجواز بشويتين

-----------------------

انتى مش شايفة اننا عدينا مرحلة

مسك الايدين و التسبيل دى خلاص ؟

لازمتها ايه الحاجات العجيبة

اللى انتى بتلبسيها .. ما كله هيتقلع !

انا ميت م التعب متنسيش الله يكرمك

تصحينى بكرة عشان عندى معاد ضرورى

لو تبطلى بس تسمعى كلام صاحباتك

اللى هيودوكى فى داهية

انا طول النهار شقيان و ضهرى مقسوم

و انتى قاعدة فى البيت رايقة و فاضية

شايفه الحريم الى تفتح النفس ؟؟

طب معلش المرة دى بسرعة كدا عشان الحق انام

والمرة الجاية هعوضهالك

يلا احضنى عشان ننام .... نامي يا وليه بقى

ما تطفى التلفزيون و تنامى

انتى ايه اللى مصحيكى لحد دلوقتى يا شيخة؟

************************************

لحد هنا خلصت الرساله

الكلام ده حقيقى يا جماعه وبيحصل

لا والله بيحصل ابشع منه وارخم منه

ساعات باحس ان الراجل من دول بعد كام سنه جواز يبقى ماسك مكرسكوب وحاطط مراته تحته يطلع منها الوحش كله ويفضل يعد فيه

وينسى اي ممزات او صفات تانيه هو حبها فيها زمان

وبيتحول الى آلة نقد فقط

وده صدقوني بيضره هو اولا قبل ما يكون بيزعج مراته او يضرها

اتمنى تكون رسالة صديقتنا العزيزه افادتكم ونورت لكم بعد الطريق

شكرا ليكى يا صديقتنا الجميله اوي ويارب دايما منورانا

الرعشه الجنسيه (orgasem)

2011-05-26T01:27:00.000-07:00

الرعشه الجنسيه (orgasem)

طبعا مش عايزه اقولكم انتم واحشينى والكتابه وحشاني اد ايه بس انتم عارفين ان احداث الثوره اخدت انتباه الدنيا كلها وعقولنا كلها

واتمنى انها تنتهي على خير وربنا يكرمنا ويعوضنا خير بما بذلناه من دماء شهدائنا الكريمه

موضوعنا النهارده موضوع محير ومعقد شويتين

طبعا باتسال اساله فى الموضوع ده تنم عن مصيبه سوده موجوده للاسف

فبلاقي واحده متجوزه مثلا بقالها عشر سنين ولا اكتر ولااقل وبتسالنى هى الرعشه دي الى هى بتبقى ازاي

او اصلا لما اقول فى وسط كلام الرعشه او الاورجازم تقولي يعنى ايه ولما اقولها يعنى ايه تقوم تستغرب كده وتفتح بؤها مترين وتقولي هاهه

كان فى دراسه بتقول ان عندنا فى مصر نسبة الفشل فى الاورجازم 80% نسبه كبيره اوي اوي

عارفين يعنى ايه الكلام ده ؟؟ يعنى من كل عشر ستات فى 8 ما بيوصلوش للاورجازم

يعنى العمليه الجنسيه معاهم ضاربه كلها ...مش عند الست بس لا وعند شريكها كمان الى هو الزوج الى طبعا بيتاثر بالوضع ده

لان العلاقه الجنسيه ماينفعش طرف واحد يحصل على المتعه كامله لواحده ممكن يستمتع لواحده اه انما ما بيكونش هو ده الوضع الطبيعى الكامل للعلاقه

بالظبط باشبهها بواحد بيسلم على التاني بحراره والتاني بيسلم تقضية واجب واحتمال وهو قرفنا كمان..لان غالبا لو فى فشل فى الاورجازم الى بيحصل ان ما بيكونش فى محفز للست على الدخول فى العلاقه اصلا بل بالعكس ممكن تهرب منها مثلا لانها بتشكل عبئ عليها او حتى بتسبب لها الام لان تكرارها ممكن يسبب احتقان والام فى الحوض وده كفيل انها ممكن تكره العلاقه

طيب السؤال المتداول من الناس كلها ستات وبنات ورجاله كمان ...هى الرعشه دي يعنى اعرفها ازاي ؟؟ وعباره عن ايه ؟؟ هاحس بايه ؟؟

فى بقى فى الموضوع ده كلام كتير اوي ووصف كتير اوي بيتفاوت من ست لست وخلينا نوصفها علميا ونسيب موضوع الاحساس ده لانه شايفه ان وصف الاحساس هايعمل لخبطه

احنا اتفقنا عن العمليه الجنسيه بتبدأ بالاثاره وتنتهي بالوصول للذروه يعنى عمليا الذروه هى نهاية العمليه الجنسيه

بتحصل الرعشه لما الاثاره توصل لاقصاها اولذروتها وهنا توصل للاورجازم او الرعشه

بيحصل فى اللحظه دي زي تشنج للعضلات فى منطقه المهبل والحوض والفخدين احيانا

وقد يحدث قذف

ايوه قد يحدث يعنى مش لازم يحصل ده ..عشان فى ستات ممكن يحصل عنده قذف فعلا لسائل داخل المهبل زي ما بيحصل عند الرجال بس الفرق ان الست بتقذف داخل المهبل انما الرجل بيقذف خارج القضيب

لكن فى ستات ما بيحصلش كده وممكن يحصل انزال لكميه قليله من السائل اثناء حدوث الرعشه

وكمان قد لا يحدث ده وتكون الرعشه الى حصلت عليها عباره عن تشنج عضلي فقط والموضوع مختلف عليه علميا هل فعلا الست بتقذف وبتقذف منين والسائل كمان مصدره ايه مافيش كلام محدد فى الموضوع ده

سبحان الله له فى خلقه شؤن

خلينا من النقطه دي مش هاتفيدنا بحاجه

لازم هنا كمان نفرق بين انواع السوائل الى ممكن تكون موجوده فى المهبل عادة

اولا طبعا الافرازات العاديه واليوميه والمفروض انها تكون مالهاش لون ولا ريحه وبتكون شبيهه باللعاب ودي الافرازات المهبليه العاديه والى مش لازم لوجودها اي اثاره او اي عمليه جنسيه

ثانيا : سائل الترطيب وده مفروض انه يحصل مع بداية الاثاره وهو بيكون مفروض كمية اكثر واكثر لزوجه

ثالثا : سائل الجماع .. والى قلنا انه ممكن ينزل مع الوصول للرعشه او الاورجازم

وللعلم هو عليه خلاف علمي حتى الان ..فى ناس بتقول اصلاااا مافيش سائل وفى ناس بتقول فيه والى بيقولوا فيه مختلفين هما كمان عن مصدر السائل ده بيجى منين

ولو اعتبرنا انه موجود فهو كميته بتختلف من ست للتانيه

ومصدر السوائل فى المهبل الاساسي بيكون ارتشاح من جدار المهبل لكن فى برضه غدد بالقرب من مجرى البول لها افراز برضه ولكن بيكون ضئيل جنب السائل الناتج عن ارتشاح من جدار المهبل

وكمان فى حاجه بنسميها بروستاتا ضامره او بروستاته انثويه (skene)

ودي برضه ممكن يكون لها افراز وممكن لا حتى انها اوقت ما بتكونش ظاهره اصلا

والحقيقه الى ما نقدرش ننكرها ان السوائل دي كلها اصلا بتكون وقت الجماع مختلطه وما تقدرش الست تفرق بينهم ولا تميزهم من بعض غالبا ..خصوصا الستات بتوعنا ولله الحمد حاجه فله يعنى

الرعشه هانقسمها نوعين حسب طريقة الحصول عليها

ــ رعشه مهبليه ودي الحصول عليها عن طريق الايلاج العادي فى المهبل وبتكون عميقه ومهمه لاتمام العمليه الجنسيه ككل

ــ ورعشه بظريه ودي بتحصل من المداعبه للبظر( ودي ـ المداعبه ـ شرحناها فى البوست الى فات )

والرعشه دي بتكون اعنف واسرع من الرعشه المهبليه ولكن قد لا تحقق وحدها اشباع تام للمراه والعمليه الجنسيه

ويمكن طبعا الجمع بين الاثنين على التوالي او على التوازي

حد يشرح السطر الى فات عشان مكسله

يعنى ممكن اثناء علاقه واحده مثلا يحصل الرعشه سواء من خلال الايلاج الى هى الرعشه المهبليه او مداعبة البظر الى هى البظريه ... يا اما على التوالي يعنى رعشتين ورا بعض بطرق مختلفه

او بالاثنين مع بعض فى نفس الوقت بمداعبة باليد للبظر مثلا وفى نفس الوقت الايلاج العادي او فى اوضاع معينه تحقق ده ... ودي حاجه ممكن نقول انها بتوصل لرعشه قويه وعميقه وسريعه وكامله

طبعا دي كلها خيارات وحاجات بتختلف تفضيلها وتفاصيلها وفعاليتها من ست للتانيه ومن زوجين لغيرهم

دي حاجات لازم الزوجين يكتشفوها بنفسهم

وطبعا حيث ان حضراتكم مش متعاونين خالص فى الاستطلاعات فانا اضطريت الجأ لاستطلاعات راي من ستات اجانب مع انى كنت افضل اسمعكم يعنى

لكن شوفت استطلاع راي ظريف كانت نتيجته

اغلب الستات فضلوا الرعشه البظريه لانها اقوى

وكان فى راي ان الرعشه الثنائيه هى اقوى واعمق واكثر اشباعا

معلش فى نقطه لازم نذكرها رغم حساسيتها وهى ان فى بعض الستات بتوصل للرعشه من مداعبة الشرج وطبعا احنا اتكلمنا على الموضوع ده قبل كده والمباح منه والمحظور وكل حاجه عنه فى موضوع مستقل اسمه الجماع فى الدبر ياريت نراجعه

كمان المعلومه الى ساقطه سهوا من ستات كتير ورجاله كمان ان الست ممكن توصل للرعشه اثناء العلاقه لمرات متعدده عادي بعكس الرجل مثلا الى فى الغالبيه العظمى بمجرد وصوله للذروه والقذف بتكون العمليه الجنسيه خلصت معاه

لكن الست لا لانها بعد وصولها للذروه بتعود تاني لمرحله اسمها الهضبه ودي بتكون قريبه من الوصول للذروه تاني بالتالي من السهل الوصول لذروه اخرى بل اكثر من ذروه فى العلاقه الواحده ( هانعمل بوست بقى تاني عن الدوره الجنسيه نشرح فيه تاني الكلام ده )

ودي عشان فى ستات بمجرد وصولها للرعشه الاولى تبقى عايزه تلطش جوزها بالقلم وتقوله خلاص فضناها يا بابا اخلص وده مش صح طبعا

ونفس الحكايه الرجل اول ما يلاقيها وصلت للذروه يبتدي يقلق ويحس انه عنده مشكله انه متاخر عنها ويتشتت مع انه عادي ممكن توصل زي ما قلنا اكتر من مره

اتمنى انى اكون قدرت انجز واوجز وتكونوا فهمتم حاجه مني او استفدتم من كلامي

وبعد اذنكم عايزه اطلب منكم طلب

وهو الاجابه على استطلاع راي صغنووون مش هياخد منكم دقيقتين

هو للستات بس( خلي عندكم دم بقى ما تخلوناش نتحوج للاجانب عايزه كتابتنا تعبر عننا بقى مش عنهم )

وانا كنت نشرته على الفيس بوك بس طبعا لحساسية الموقف صعب حد يجاوب بالاكونت بتاعه على الفيس

بالتالي انا قلت هانشره هنا ولو سمحتم عايزه الاجابات بغير معرف عشان مش عايزه اعرف مين الى جاوب

وطبعا لو فى حد من الرجاله عايز يخلي مراته تجاوب يبقى كتر خيره

وطبعا هانشر نتيجة الاستطلاع جايز تهم حد فيكم

والى مش فاهمه سؤال تسالنى قبل ما تجاوب من فضلكم وطبعا تجاوب بالحقيقه

وشكرا لكل الى هايساعدنى والى هايطنشنى كمان عادي عارفه انكم اندال بطبعكم

متزوجه ؟

**********

مختونه ؟

لو متزوجه :

تحصلين على رعشه جنسيه ؟

كل مره احيانا ولا مره

**************

سائل الترطيب ...الافرازات المرطبه للمهبل (لا تشمل الافرازات المرضيه ذات اللون والرائحه)

هى عندك ؟

كثيره مناسبه قليله

هل يمكن نزول سائل الترطيب دون اي اثاره جنسيه ؟؟

لو ان هناك ادويه منشطه للنساء ..هل تريدين تناولها او تجربتها ؟

البظر والقضيب

2010-12-25T13:24:00.000-08:00

البظر والقضيب

اولا : اشتقت اليكم كثيرا يا جماعه والله ووحشتنى الكتابه اوي والشغل معاكم اوي بس والله كان غصب عني

المهم ندخل على الموضوع بتاع النهارده والى حساس جدا ومهم جدا ومحوري

احنا كنا اتكلمنا قبل كده عن تركيب القضيب بالتفصيل الممل فى موضوع سابق الى هو آلية الانتصاب

ياريت الى ما قرهوش يتفضل يقراه هايفهم موضوع النهارده اكتر

لان انا فى الحقيقه عايزه اركز النهارده على البظر اكتر بما اننا اتكلمنا قبل كده على القضيب

بس لقيت انه اسهل اننا نفهم البظر من خلال فهمنا للقضيب

الصوره زي ما انتم شايفين بتقول ان القضيب بيتكون من 3 انابيب

اثنين منهم اسمهم الجسم الكهفي

وليه اسمهم كده..... لان جواهم امكان زي الكهوف (حجيرات) بالظبط والكهوف دي هى الى بتستوعب الدم الى بيتدفق للقضيب اثناء عملية الانتصاب

والى تحت ده جسم اسفنجي بداخله بيكون مجرى البول

مفهوم لحد كده الكلام

طبعا جلد القضيب ده مليان نهايات عصبيه جنسيه هو عضو حساس جدا

نروح بقى نفهم البظر

البظر هو العضو المناظر للقضيب

يعنى ايه المناظر له؟؟

فى الاساس ولسه الذكر والانثى اجنه بيكون الجهازين زي بعض تماما بعد كده ولتطورات معينه فى الجنين فى الاسبوع الرابع يبدأ الاختلاف وبيبدأ يكمل العضو الذكري للجنين نموه ويتكون على شكله المعروف

فى حين الانثى بتفضل على ما هو عليه

بعض الناس بتوصف البظر على انه قضيب ضامر لانه متشابه جدا معاه فى التركيب

هانعرف الاول مكان البظر ووصفه

الصوره دي احتمال توضح مكانه

المفروض وصف البظر انه جسم اسفنجي ( زي ما قلنا على جزء من القضيب )

وبالنسبه لحجم البظر فهو متفاوت طبعا من واحده للتانيه زي اي حاجه فى جسم البنى ادم لكن فى العموم هو بيكون فى حجم حبة الفول تقريبا بدون انتصاب ( مع الانتصاب بيتضاعف مره ونص تقريبا )

مكانه بيكون عند نقطة التقاء الشفرين الصغيرين من اعلى ... واحيانا بيكون غير ظاهر تماما بدون انتصاب

جلد البظر حساس جدا وبيحتوى على نهايات عصبيه قد تصل الى ضعف الموجوده بالقضيب (8000)

وهو اكثر عضو جنسي حساس عند المراه

بالتالي هو مهم جدا فى العمليه الجنسيه للمرأه

حجم البظر مالوش علاقه بقوة الرغبه الجنسيه عن المرأه او ضعفها او على الاقل مافيش حاجه تثبت ده لحد دلوقتي

لأن حتى فى حال كبر حجم البظر فهو محاط بطبقه من الجلد بتغطيه وتحفظه فى مكمنه من الاحتكاك الخارجي بالتالي مش هو ده المعيار

التعامل مع البظر لازم يكون بحرص شديد نتيجه لحساسيته الشديد ما ينفعش تتعامل مع البظر بدون استخدام ملينات سواء طبيعيه او صناعيه لأن الاحتكاك المباشر باليد او بالقضيب ممكن يسبب انزعاج للمراه مش اثاره

مش معنى كده برضه اننا هانشاور للبظر من بعيد لا طبعا هو المفروض ان مداعبة البظر بتبتدى بالراحه جدا وبشكل دائري الاول حوله بعد كده مداعبه مباشره للبظر بتعلى تدرجيا بالاحتكاك والضغط برضه بالعقل يا حسب الله

تركيب البظر :

قلنا متشابه تركيبه مع تركيب القضيب ( بيتكون من رأس وحشفة وجسم)

و بيشبه القضيب كمان من حيث الانسجه الاسفنجيه و الكهفيه (المسؤله عن الانتصاب) لكن القضيب يحتوى على مجرى البول .. فى البظر طبعا مافيش مجرى بول

لان مجرى البول فى الست موجود في مكان تاني بفتحه مستقله ومجرى مستقل

كنظيره القضيب مع الاثاره الجنسيه بتمتليئ حجيراته بالدم وبينتصب وبتضاعف حجمه وبيخرج من مكمنه وبيكون مستعد للمشاركه فى العمليه الجنسيه

الغدد حول البظر بتفرز ماده دهنيه بتطلع من خلال الجلد المحيط به ولها وظيفه مهمه فى ترطيب وتزييت البظر كعامل حمايه له كعضو حساس .. كما انها تحمل فرمونات انثويه قويه

لكن تراكم الماده الدهنيه دي بسبب اهمال النضافه مثلا قد يكون سبب فى رائحه غير مرغوب فيها او التهابات

بالتالي ا لاهتمام بالنضافه مهم (بالعقل يعنى مش نموته من النضافه بقى مش عايزه هبل اصل انا عارفاكم يا بنات )

كمان ممكن نوصف البظر انه العضو الوحيد فى جسم الانسان الى مالوش اي وظيفه تانيه غير الاثاره فقط

فاضل نقطه واحده بس وما كانش ممكن ما نتكلمش عنها واحنا بنتكلم عن البظر

الى هي الختان .. لان فى الاساس عملية الختان المفروض انها استئصال جزء من البظر .. والمفروض ان الهدف منها الحد من الشهوه او الاثاره عند البنت

وطبعا احنا اتكلمنا عن الختان قبل كده بشكل مفصل اكتر هنـــــــــــا للي يحب يقرا اكتر عنه

وطبعا زي ما قلنا قبل كده ان الختان لو كان ختان عادي مش جائر قد يكون مش مؤثر اوي زي ما بعض الناس متخيله .. الا انه فى بعض الحالات بيكون له تاثير طبعا

اي استفسار او سؤال هاكون سعيده بيه سواء على صفحة التعليقات او على الاميل الى فوق على الشمال بالاحمر

وطبعا شكرا للدكتور عباس مرجعنا الطبي ... ربنا يخليك لينا يارب بالغيظه فى الواد المتغاظ من وجودك نيهاهاهاهاهاها

أنا حلوه وعارفه ان انا حلوه :)

2010-08-18T20:45:00.000-07:00

لا مش انا يعنى انا لا يعنى استنوا هاتفهموا ...

ايه ده ؟؟ لا ماهو ده ما يمنعش برده ان انا حلوه وعارفه ان انا حلوه هههههههههههههههه

ندخل فى الموضوع بقى

تعالوا النهارده نتكلم عن عقده لاحظتها عند البنات

والله هى مش عقده واحده دى عقد كتير كتير وبشنيطه كمان

بس العقده الى هاتكلم عنها النهارده هى عقده هبله جدا جدا

وهى هيفا وهبي ونانسي عجرم

ايوه صدقوا بتحصل فى اهبل المجتمعات

مش عارفه البنات مخهم تعب تقريبا ولا هو الشعب كله اصلا مخه تعبان مش عارفه والله

بيجيلى رسايل كتير من بنات الى تقولي انا متعقده من نفسي اصل انا رفيعه والى زعلانه اصلها تخينه
والى بتقولي مش عارفه اصل طالعلي حبايه تحت حاجبي الشمال
والى بتسأل على عمليات النفخ والشفط

هبل فى هبل من الاخر

وده كله لييييه

بسبب قاعدة البنات قدام التلفزيون يتفرجوا على الممثلات والمغنيات الى بيطلعوا على الشاشه قدامهم ملمعين اخر حاجه

والاهبل من كده ان الشباب كمان عايز واحده تكون زي الي بيشوفهم فى التلفزيون برضه ومش عاجبه أي حاجه

افهم فى دول ودول يا شوية هبل الممثلات دول عشان يطلعوا على الشاشه ياخدوهم سكينه معجون كامله ده غير انهم بيشدوا وشهم على القالب اد اسبوع قبلها

وشغالين ولا العجلاتيه نفخ وشد وعمليات وبلاوي سوده

بكل بساطه يا بنات احنا مخلوقين كده مختلفين

مختلفين فى الشكل والتفكير وكل حاجه مافيش حد فينا زي التاني ابداااا

ما تبصيش للهبل بتوع التلفزيون الله يصلح حالك وتعقدى نفسك دول فى الاساس ما تحبيش تبصي فى خلتهم

انا كل من شوفتهم من الفنانين على الحقيقه قلت يا لهوي ده احنا كنا بنتاكل على قفانا زمن بحاله

صور الفنانين قبل وبعد عمليات التجميل ماليه الدنيا ابقى دوروا عليهم وشوفوهم

ولاي راجل عبيط بيبص على الستات بتوع الهشك بشك وبيلعن ابو اليوم الى شاف فيه وش ام العيال

اصرف على مراتك يا اخ توم كروز المتنكر ربع الى بتصرفه أي واحده من دول على مظهرها وهى تبقى احلى منهم كلهم

والاقرع ياكل حلاوه بفلوسه يا حليله ايوووه وده تلقيح صريح على انك اقرع وبكرش اصلا فما تتكلمش منك له له

البنات الهبل العبط الى معقدين نفسهم اصل والنبى عندي حبايه فى مناخيرى اصل عندي شعر كتير فى قفايا

اصل انا سمرا شويه اصل انا رفيعه اصل انا هبله كل ده عااااااادي كل الديفوهات دي وارده

ممكن لو عندك مشكله تروحي لدكتور مثلا ممكن تتعالج وممكن لا

حبي نفسك زي ما هى .. حسى بجمالك ا نتى اولا .... عمر ما حد هايبصلك ولا يحس بجمالك الا لما تحسي انتى اصلا بجمالك

عيشى فى الدنيا بمبدأ انا حلوه وعارفه ان انا حلوه

مش باقولك اتغري بنفسك انما حسى بقيمة نفسك... يا بنتى ان ما كانش يجى الشاب الطرب بتاعك بسلامته وانتى عاجباه زي ما انتى كده ويحبك زي ما انتى يبقى بلاش منه

ما تقلقيش كل فوله ولها كيال زي ما بيقولوا

مره واحده من البنات دول قالتلى بصراحه كده انا حاسه انى مش سكسي وانى لو اتجوزت مش هاعجب جوزي

اه طبعا لازم عشان تحس انها سكسي انها تكون نافخه وزارعه سيلكون ويا حبذا لو كانت بترقص بلدي

اه ماهى بتيجى كده فى الافلام

نرجع تاني للامثال مش عارفه طالبه معايا خالتي بمبه ليه

المثل بيقول يا وحشه كوني نغشه يا اختي

وانتى اصلا اصلا مش وحشه انتى حلوه وكل حاجه بس مش واخده سكينة معجون لو يريحك تاخدي سكينة معجون اوك ناخدك سكينه

القصد من المثل ان مش الجمال الى حسب المقاييس العالميه هو الى يعتبر مؤثر بس

بس يعنى حكاية سكسي دي يعنى مش عايزه اقولك انها تكاد تكون مالهاش علاقه بالشكل

قد تكون واحده مثيره فى نظر واحد لكن فى نظر حد تاني يشوفها شبه ام السيد الشغاله
واكم من ناس تبصيلهم وتقولي عاجبه فيها ايه الاهبل الى هايموت عليها ده
ده حتى سوده وبضب وعرقوبها يدبحوا به الفرخه

عادي انتوا مالكوا الراجل عاجبه كده

المهم فهمتوا يعنى ولا ايه ... عندي احساس انكم مش فاهمين حاجه

الهي يخليكوا يارب بلاش تفكروا فى الفنانات خالص

ولا الفنانين برضه عشان ترضوا تجوزوا الرجاله الى متوفرين دلوقتي

ويا بابا انت وهو قبل ما تبصوا على نانسي وهايفا واخواتهم فى الرضاعه ابقى كل واحد فيكم يهز نفسه كده لحد المرايه اولا ويشوف احلى يمامه هاتتجوز الغراب على ايه

وكمان يضرب ايده فى جيبه كده ويشوف معاه كام من حق نيو لوك واحده بس للمودام لو كانت شبه نانسي

انتهى ... الى بعده

فضفة صديقاتي

2010-08-03T18:14:00.001-07:00

اولا وقبل ما نبدأ كلام

عايزه اقولكم حقيقى انكم وحشتوني اوي اوي وحقيقى كان نفسي ارجع اكتر من زمان

وصدقوني نويت اكتر من مره لكن كل مره ما كنتش باقدر مش عارفه ليه

لاسباب كتيره اوي

اولا كان عندي شوية ظروف وثانيا لانى بعد فتره من الكلام مع الناس على الفيس بوك الى خلانى احتك بالناس مباشرة مش مراسلات على عكس ما انا متعوده معاكم وحسيت نفسي انى دايما فى وضع المدافعه عن نفسي وافكاري ومبدأي ومدونتي وحقيقى زعلت اوي من الناس

لكن عموما انا نفسي ارجع اكتب تاني وياريت اي حد عايز يعرف اي حاجه عن اي حاجه او عايز يتكلم فى اي موضوع او عنده اي مشكله يبعتهالي

بجد يا جماعه نفسي احس انكم معايا تاني افتقدتكم

نبدأ فى موضوع النهارده

والى جايز مالوش علاقه مباشره بالبوستات الى فاتت والى كانت عن الثقافه الجنسيه

لكن فى الاساس ا لمدونه هنا كانت معموله للفضفضه او البعبعه زي ما انا سميتها

المهم يا اخواني احدى صديقاتي المدونات ونسميها الصديقه (ص) قالتلى مره عايزاكي تكتبي عن موضوع على مدونتك وتناقشيه

الى هو ايه

قالتلى ليه على الفيس بوك او على النت عموما بمجرد ما حد يعرف انى متجوزه يبدأ كلامه معايا عادي بعدين يفضل يلف ويدور شمال ويمين عشان يوصل فى الاخر انه يتكلم عن الناحيه الجنسيه ولا سيما انها شغلها له علاقه شويه بالطب !!!!

وسؤال مباشر هو يعنى عشان انا متجوزه يبقى لازم ابقى قليلة الادب واتكلم فى العلاقه الجنسيه مع اي حد كده ؟؟؟؟!!!

طبعا لا يا حبيبتى بس هما عقلهم مقضيهم على كده

صديقه ليا تانيه ونسميها (ش) لما كلمتها عن موضوع البوست قالتلى لااااااا تعالى بقى وانا احكيلى الى اكتر واكتر

واسمعوا بقى قصتها

هى متجوزه وعندها اطفال وهى ست محترمه لا شك وبقالها سنين بتدخل النت ويبدو انها شافت بلاوي سوده

تقولي بصي بمجرد ما اقول لاي حد فى اي مكان انى متجوزه يبقى انا كده وقفت فى قفص اتهام على طول

وسبعين فى الميه منهم بيعتقد الآتي

انا ست احتمال اكون بطاله وقليلة الادب

والاحتمال التاني انى اكون غلبانه ومنكسره ووحيده وغلبانه وجوزها بيضربها كل يوم علقه

والاحتمال الثالث ان جوزها مسافر وسايبها تعاني من الحرمان

لا شك ان فى ناس بتحترمها طبعا وتقدرها بس السؤال هو ليه كده ؟؟

اشمعن لما يكون واحد متجوز وعلى النت مش بتعملوا معاه كده يا جماعه

وهل الى اخلاقها مش كويس تفرق معاها متجوزه ولا مش متجوزه ؟؟

قالتلى كمان حاجه برضه تتفق تماما مع رواية الصديقه (ص)

وهى ان السبعين فى الميه برضه الى بيعتبروها بطاله او غلبانه او محرومه

بيفضلوا يلفوا ويدوروا ويجسوا النبض هل هى عندها استعداد تتكلم معاهم عن السيكو سيكو ولا لا

حتى قالتلى ان فى واحد تكبد مشاقة انه يعمل نفسه بنت لمده سنه وشويه وعمل معاها كل الحيل عشان يوصل فى الاخر انها تتكلم معاه عن خصوصياتها خاصة على الجانب الجنسي

بس الحمد لله هى كانت حريصه فى الكلام حتى مع البنات

السؤال الموجه من الصديقتين (ص) و (ش) ومني انا كمان والله

ليييييييه يا بشر ؟؟

لييييييييييه يا مجتمع سيء النيه ؟

ليييييييه يا رجاله كده ؟؟

وعلى فكره الحاجات دي تخلينى اتاكد ان المجتمع ده عنده كبت ومشاكل فى الناحيه الجنسيه فعلااااا محتاجه علاج

من غير ما ندفن راسنا فى الرمل

ارجوكم يا جماعه عيب كده

انا عارفه ان فى بلاوي سوده على النت وعارفه ان البطاله والوحيده والغلبانه والمحرومه كلهم على النت برضه

بس برضه نتقى الله

ما نرميش الناس بالباطل

وكمان ما تتصيدش المحرومه والغلبانه والوحيده وتستغل النقطه دي فيها

يارب اكون وصلت الرساله صح يا صديقتي العزيزتان

وشكرا لكل الى سأل عني وانا غايبه هنا وعلى الميل وعلى الفيس بوك

استغاثه ..عاجل جداااااااا

2010-06-16T04:47:00.003-07:00

مدونه زميله يا جماعه بتستغيث بينا

محتاجه مساعده

مامتها فى مستشفى الدمرداش التفاصيل هنا فى البوست ده
الرابط اهو
http://nonoymm.blogspot.com/2010/06/blog-post_16.html
وده تليفون المقيم معاها عشان الى يحب يروح يتبرع
0161620023

ومحتاجين فصيلة دم اوه موجب

الوقت بييفرق يا جماعه فى الحالات دي ارجوكم الى فى ايده مساعده يسرع الله يكرمكم

ربنا يكرمكم ويشفيها ومرضى المسلمين جميعا

ختان الاناث

2010-06-07T23:20:00.000-07:00

النهارده يا جماعه انا اخترت موضوع مهم للكلام عنه

وهو ختان الاناث

انا عارفه ان الموضوع ده قتل بحثا والناس اتكلموا فيه لما شبعوا

بس انا النهارده هاتكلم فيه من ناحيه مختلفه بعد طبعا ما اقول ملخص عنه عموما

طبعا هو ختان الاناث الى فيه خلاف جامد وفيه كلام كتير

يعنى يمكن ختان الذكور يكاد يكون محسوم

بالنسبه لختان الاناث

نعرفه الاول وهانعرف الختان العادي او الصحيح : هو ازالة جزء صغير جدا من البظر

شرعا انا اعتقد - وده رايي شخصي بحت لكم مطلق الحريه فى البحث عن اراء اخرى -

هو مباح يعنى هو اصلا كان موجود فى ارض الجزيره العربيه والرسول يعنى كان معنى حديثه من وجهة نظري انه يعنى وافق عليه بشروط خاصه جدا (وافق عليه مش فرصه ولا اسنه وفى فرق )

وطبعا الحديث الشهير : اشمي ولا تنهكي فذلك انضر للوجه واحظى عند الزوج

من وجهة نظري الحديث ده لوحده مدرسه

هو ده الختان الى احنا هانتكلم عنه الى هو بشرط ايه اشمي ولا تنهكي

طبعا فى ختان بقى جائر

وبيكون بازالة البظر بشكل كامل

وفى ختان ابشع وابشع وموجود فى افريقيا والى مسمينه ختان فرعوني مش عارفه ليه (مافيش أي حاجه تثبت او تقول ان الفراعنه كانوا بيعملوا كده ولا حتى فى الجواري كما يقال )

انهم بيشيلوا كل حاجه اصلا

بيشيل البظر والاشفار الداخليه واي حاجه تقابلهم فى سكتهم

حتى انهم فى بعض القبائل بيعملوا ده للبنت بمجرد بلوغها او حتى قبل بلوغها ويفضوا الغشاء كمان ويجوزوها دوغري

من الاخر هما بيخلوها جثه تحتوى على فتحه تناسليه

طبعا ده ختان جائر وحرام شرعا وكل حاجه مؤدي لها زفت الزفت

خلينا بقى فى الختان العادي ونرجع للنقطه الى انا عايزه اتكلم فيها

واحب اقول رايي الشخصي فى الموضوع انا مش مع ختان البنات الا لو حصلت مشكله صحيه مثلا او فى حالات خاصه جدا فى المناطق الحاره وسبب عدم الختان مشكله فعلا
انما فى العموم انا مش مع الختان ابدا خصوصا انك بتاخد قرار بشأن الطفله مش من حقك تاخده
واعتقد الراي الطبي المنصف معايا فى الكلام ده

نيجى بقى للنقطه الى انا عايزه اتكلم فيها تحديدا

دلوقتي انا ملاحظه وجود هسهس فى عقول الناس ولا سيما الرجاله

بخصوص موضوع الختان ده من حيث ايه بقى

بالاقي واحد يقولي والله انا مراتي عندها برود اصلها مختونه

طبعا اعتقدا منه ان الختان هو سبب جوهري للبرود الجنسي

وده شعور غذاه التوجه الاعلامي بتاعنا الى مش فاهم حاجه اصلا

او واحد تاني يسأل خطيبته انتى مختونه تقول لا بس يقولك لا ممكن ابدا انا عايزه مختونه روحي اعملي ختان الاول وانا اكمل معاكي

الحقيقه مش عارفه ده ايه مخاوفه

هل خايف انها تكون متطلبه جنسيا وهو مش واثق فى نفسه جنسيا فمعتقد انه مش هايقدر يوفيها حقها ؟

هل معتقد ان الى مش مختونه بتكون معرضه اكتر لارتكاب الخيانه او الزنا اعاذنا الله واياكم ؟

مش عارفه الحقيقه لكن ايا يكن هو الكل غلطان فى معتقده

لان الختان العادي الصحيح مش مؤثر للدرجه دي

يعنى لا هايحولها الى ست بارده جنسيا ولا عدمه هايحولها لوحش كاسر

البظر عضو مهم فى الاثاره الجنسيه ايوه ما قلناش حاجه بس اولا احنا فى الختان مش بنشيل العضو كله المفروض

ياما ستات مش مختونين وعندهم مشاكل زي البرود او فشل الاورجازم

وياما فى ستات مختونين وما عندهمش أي مشاكل وتمام التمام

بالتالي الختان مش مقياس ابدا وزي ما فى رجل رغباته الجنسيه قليله وفى رجل رغباته فى المستوى العادي وفى رجل اكثر من العادي

فى كمان ستات من كل نوع من ده هى العمليه فروق فرديه

وعشان فى فروق فرديه احنا المفروض دايما ندور على ارض مشتركه عشان يحصل توافق جنسي بين الزوجين

مشكلة الست الاكبر من وجهة نظري فى مجتمعنا وفى الجيل الحالي من الستات بالذات هو التربيه الغلط والكبت النفسي من المجتمع والاسره والى بينعكس عليها

ده بقى انا باسميه ختان نفسي واحيانا بيكون ختان نفسي جائر فعلا وبيسبب فعلا خلل فى المنظومه الجنسيه عندها

انا هاقولكم على تفسير للاعتقاد ده معقول جدا

هو بالنسبه للاخ الى خايف يتجوز واحده مش مختونه ده تفسيره الوحيد انه واخد خبرات سيئه ومعلومات خاطئه ودماغه بايظه خالص من الناحيه دي

اما النوع التاني وهو الاكثر انتشارا الى بيعتقد ان الختان هو سبب برود مراته

فى الحقيقه انا عاذراه لانه فى الغالب بيكون عمل حاوي عشان يحس منها بتجاوب مافيش فايده فبيحاول يلاقي لها أي مبررات لانها مش متجاوبه معاه خالص وبتحاول بشتى الطرق تثبتله انها مش عايزه العلاقه وما تفرقش معاها ومش فى دماغها ولو قعد شهرين ما يقربلهاش هاتعمل مش واخده بالها ولسان حالها بيقول ولاااا تفرق معايا

بالتالي هو بيقولك بس يبقى هى بارده طب بارده ليه ؟

الى يقولك عشان مختونه

والى يخترع اسباب تانيه كتير لا رفيعه لا تخينه لا اصل العيال شغلوها عني دي اهملت نفسها

ده اصل انا مش باحبها اوي ما عرفتش تملا حياتي اصل احنا متجوزين جواز صالونات

أي بتنجان بقى وخلاص

طبعا باقول انا عذراهم هما مش عارفين ان المشكله الاساسيه فى الغالب مش عضويه اصلا والمشكله فى الدماغ الى هو من وجهة نظري اهم عضو جنسي عند المرأه

ارجو اكون ما طولتش عليكم وافدتكم فعلا والادمغه او جزء منها اتعدل

والف شكر للدكتور عباس ما نتحرمش من بصماتك يا فندم

الجنس فى الاسلام

2010-05-10T12:18:00.000-07:00

دلوقتي انا باسمع كلام غريب جدا يا جماعه منكم

حقيقى انا باستغرب

باشوف ناس بتبص للجنس والشهوه الجنسيه على انها حاجه قميئه وعار احتمال ما لهاش لازمه واحتمال تشتغل معاهم ويقولك ده تصرف حيواني وكتير كتير كلام باسمعه

ليه بقى حضراتكم

انا طبعا بصرف النظر عن الاوجه الكتيره للموضوع النهارده بعد اذنكم هاتكلم عن موقف الاسلام من الجنس ازاي وليه اصلا الموقف ده كده

طبعا ميت مره قلت انا مش جهة افتاء انما مش معنى كده اطلاقا ان انا مش عارفه انا باقول ايه ولا مش متاكده من كلامي وعموما انا هاجيب لكم كام حديث بس ونتكلم عنهم

اولا : احب اوضح ان الدين الاسلامي بيحترم الرغبه الجنسيه ومش بيحقرها ابدا والدليل على كده الاقرار بها والاشاره لها فى القرءان طبعا بشكل طبعا لائق

وكمان القوانين الموضوعه لممارسة الجنس من الزواج واحكامه وقوانينه تقول ان الاسلام بيقر العلاقه ولا يحقر منها ابدا

ثانيا : ليه بنتكسف او بنحقر من حاجه ذكرت فى القرءان بكل احترام وجمال ونلاقي بيقول

· ازواجا لتسكنوا اليها

· هن لباس لكم

· قدموا لانفسكم

· آتوا حرثكم انى شئتم

ودول الى جم على بالي وبيتكلموا عن العلاقه الجنسيه بشكل محترم جدا وجميل جدا

ثالثا : السنه

اول حاجه لازم نذكرها فى السنه ان الرسول عليه الصلاة والسلام نفسه كان بيمارس الجنس ومش هو لوحده لا طبعا اغلب الانبياء تزوجوا وانجبوا عادي جدا

طيب يعنى هل يعقل ان الانبياء يأتون شيئا نكرا ولا حاجه مش تمام

طيب الرسول عليه الصلاة والسلام كان بيتكلم ازاي فى الامور دي

انا هاديلكم امثله بس عشان تعرفوا ان احنا الى عندنا عقد نفسيه مركبه

فى جماعه راحوا للرسول عليه الصلاة والسلام وقالوله ان ذهب اهل الدثور بالاجور ... بمعنى الاغنياء بيتصدقوا فياخدوا اجر والفقرا محرومين منه فرد عليهم الرسول عليه الصلاة والسلام بالحديث ده

أوليس قد جعل الله لكم ما تصدقون به ؟ إن بكل تسبيحة صدقة ، وبكل تكبيرة صدقة ، وبكل تحميدة صدقة ، وبكل تهليلة صدقة ، وأمر بالمعروف صدقة ، ونهي عن المنكر صدقة ، وفي بضع أحدكم صدقة . قالوا : يا رسول الله أيأتي أحدنا شهوته ويكون له فيها أجر ؟ قال : أرأيتم لو وضعها في الحرام أليس كان يكون عليه وزر ؟ فكذلك إذا وضعها في الحلال يكون له أجر

الراوي: أبو ذر الغفاري المحدث: الألباني - المصدر: صحيح الجامع - الصفحة أو الرقم: 2588
خلاصة حكم المحدث: صحيح

والبضع هو الجماع

اظن الحديث مفهوم جدا والى مش فاهم يشاور بس من بعيد وانا اقول

طيب تعالوا كمان شوفوا الحديث ده كده والموقف كله

الحديث ده مناسبته ان كانت رفاعه القرظي طلق مراته ثالث طلقه بالتالي ما عادتش تجوز له فهى وافقت تتجوز عبد الرحمن بن الزبير على امل انها تطلق منه وترجع لرفاعه القرظي

واتجوزت رفاعه فعلا بس امتنعت عن العلاقه الجنسيه وراحت شكت للرسول انه رفاعه ضربها وانه ما بيعرفش (ايوه والله قالتله كده وانا مالي)

طب تعالوا الحديث اهو انا مش هالف ده انا جايبه اثنين خبرا عشان اطلع الاحاديث دي اصلا

أن رفاعة طلق امرأته ، فتزوجها عبد الرحمن بن الزبير القرظي ، قالت عائشة : وعليها خمار أخضر ، فشكت إليها وأرتها خضرة بجلدها ، فلما جاء رسول الله صلى الله عليه وسلم ، والنساء ينصر بعضهن بعضا ،

قالت عائشة : ما رأيت مثل ما يلقى المؤمنات ؟ لجلدها أشد خضرة من ثوبها .

قال (عبد الرحمن بن الزبير ) : وسمع أنها قد أتت رسول الله صلى الله عليه وسلم ، فجاء ومعه ابنان له من غيرها ،

قالت : والله ما لي إليه من ذنب ، إلا أن ما معه ليس بأغنى عني من هذه ، وأخذت هدبة من ثوبها ،

فقال : كذبت والله يا رسول الله ، إني لأنفضها نفض الأديم ، ولكنها ناشز ، تريد رفاعة .

فقال رسول الله صلى الله عليه وسلم : ( فإن كان ذلك لم تحلي له ، أو : لم تصلحي له ، حتى يذوق من عسيلتك ) .

قال : وأبصر معه ابنين له ،

فقال : ( بنوك هؤلاء ) .

قال : نعم ،

قال : ( هذا الذي تزعمين ما تزعمين ، فوالله ، لهم أشبه به من الغراب بالغراب ) .

الراوي: عكرمة المحدث: البخاري - المصدر: صحيح البخاري - الصفحة أو الرقم: 5825
خلاصة حكم المحدث: [صحيح]

اكملكم الحكايه جايز ما فهمتوش الكلام انا عارفه انه تقيل

فراحت قدام الرسول وقالتله رفاعه ما بيعرفش ما عندوش الى حاجه كده اد كده ومسكت جزء صغير من هدومها ( وانا مالي والله قالت كدهJ )

كان رفاعه جه بقى : فرد عليها وقال كذااااابه ده انا ممكن اقطعا ترنشات دلوقتي بس هى الى ممتنعه وعايزه ترجع لرفاعه

فالرسوله عليه الصلاة والسلام تبسم (فى ورايه تانيه غير دي قالوا انه تبسم ) وقالها لا يجوز حتى تذوقين عسيلته ويذوق عسيلتك ( يعنى يقيم علاقه جنسيه )

وبعدين عبد الرحمن كان جايب معاه ولاده ( اه ما الست بتقول ما بيعرفش بقى )

فالرسول بص لهم وقاله هو ده الى بتقولي عليه كده ده ولاده شبه زي ما الغراب شبه الغراب

طبعا فى رويايه تانيه ان ابو بكر والصحابه بره سامعين الكلام بيقولوا الحقوا الست دي بتقول ايه عند رسول الله

بس الرسول لا نهاها ولا قالها يا اهلكي يا فاجره ولا حاجه بالعكس تبسم ورد عليها عادي جدا

وبعدين فى فى الحديث ده حته حلوه اوي

لما الرسول بيقولا حتى يذوق عسيلتك وتذوقي عسيلته

عسيله فى اللغه تصغير عسل

يعنى شوف بيكنى عن العلاقه بحاجه جميله ازاي ؟؟؟

مش كلام منفر ولا محقر ولا أي حاجه

( مش عايزه من فضلكم اي حد يقولي انتى بتهزري فى حديث والكلام التعبان ده الهزار مش معناه انى باقلل من قيمة الناس بس يعنى اشرح لكم ازاي اللغه دي ؟؟ لازم اشرح بلغه سهله عشان الكل يفهم انا باهزر مش باتريق )

كمان الحديث الى جاي ده ده مهم اوي

جاءت أم سليم إلى رسول الله صلى الله عليه وسلم فقالت : يا رسول الله ، المرأة ترى ما يرى الرجل في المنام ؟ فقالت أم سلمة : فضحت النساء يا أم سليم ، فقال : إذا رأت ذلك فلتغتسل فقالت أم سلمة : وهل للنساء من ماء ؟ قال : نعم ، إنما هن شقائق الرجال

الراوي: أنس بن مالك المحدث: ابن القطان - المصدر: الوهم والإيهام - الصفحة أو الرقم: 5/271
خلاصة حكم المحدث: صحيح

هن ايه ؟؟؟ شقائق الرجال اه خلي بالكم الموضوع ده عايزله قاعده لواحده اصل فى ناس قالت كلام على الفيس بوك ينقط اش حد بعبوعي اصيل زيي كده

اه على فكره فى روايه تانيه للحديث

لما سألت ام سليم السؤال ده

فقالت أم سلمة رضي الله عنها : تربت يداك يا أم سليم فضحت النساء : فقال النبي صلى الله عليه وسلم منتصرا لأم سليم : بل أنت تربت يداك ، إن خيركن لمن تسأل عما يعنيها

ايه بس دخل فى عقولنا ان العلاقه حاجه حقيره حاجه دونيه حيوانيه

ابص الاقي واحده بتقولي انا مش متخيله انى ممكن اعمل كده مع حد يععععععع ده قرف اوي ؟؟؟ ليه ؟؟؟

الاقي واحد شاب والله وفى عمر الزهور بيقولي هو احنا يعنى خلاصنا مشاكلنا عشان نناقش ا لمشاكل الجنسيه ؟؟ ما نشوف المصايب الى عندنا الاول والمتعه دي بقى يا اما جت ماشي خير وبركه ولو ما جاتش مش مهم نبقى نستمتع فى الجنه بقى !!!!!!!!!!!! (ايوه هو انت يا فارسني) ده ايه ده ؟؟؟

والست تقولي انا باحس انى حيوانه واحنا بنعمل كده بافتكر شكل الحمار الى شوفته فى بلدنا زمان ( الله انتى هبله ولا ايه ؟؟ اه هبله رسمي )

الله طب وهو الحمار وحش ده جميل والنبى طب ياريت نعرف احنا فى العلاقه نكون زي الحيونات بنقائهم واحترامهم لشركائهم

طب روحوا دوروا كده على اليو تيوب على كليبات لمعاشرة قرود واحصنه مدرسه تتعلموا منها الادب والاخلاق وقت العلاقه بس الى يفهم

والكوم الكبير كبير بقى

الى بتقولك اصل انا مؤمنه بالحب الافلطوني ( منهم لله بتوع الرويات ) واصل حب الجسد فاني

كل يا جماعه والله اعقد نفسيه

الحاجه الى الجنس زي الحاجه الى الاكل والشرب من حاجات البقاء

حاجه جبلنا عليها خلقنا بها كده

ومش حاجه مقززه ولا مقرفه ولا حقيره بالعكس

ده الاتصال الجسدي ده لو تم صح بيكون رابط وصله قويه وجميله جدا جدا بين الزوجين

متخيلين يعنى ايه اختلاط دم بدم

ايوه ماهو السائل المنوي ده من دم الرجل وبيدوب فى دم الست من خلال الرحم

شوفوا موضوع الفرمون الجنسي هنا على المدونه تفهموا الموضوع ده

حاجه محسوبه متخططه من خالق الكون سبحانه

ارجوكم احترموا انفسكم احترموا اجسامكم احترموا حاجاتكم

واحترموا القواعد والقوانين كمان الى وضعها ربنا سبحانه وتعالى لتقنين العلاقه دي

وطبعا طولت عليكم بس ان كان عاجبكم

من فضلك احتوينى

2010-04-25T03:25:00.000-07:00

ازيكم ازيكم

طبعا بعبعتي حبيبتي هتمووووووووت منى بس معلش بقي ياقمرة انتي عارفه الكرسي بحبه مووووت

ام هند

لو ماشيين في الشارع او في اي مكان ولقيتو طفلة كدا مفلوووووووووقة من العياط اول حاجه هتعملوا ايه

هتجرو عليها وتطبطبو عليها واول كلمة هتقولها في لحظتها ..

فين ماما ؟؟؟؟

صح ولا انا كدا غلط !!!!

يعني معروفة ان اول شخص بيحتوي الطفلة هو الام يليه الاب واي حد كبير في الاسرة ان مش كان في لقدر الله ام واب

طيب لو البيبي كبر سواء ذكر او انثي

مين اول شخص بيترمى في حضنه وبيحس معاه بالامان والاحتواء

بالنسبة للانثي ..... الزوج اللي هو حبيبها وابوها ودنيتها ( ماما دايما تقولي انا عشت مع باباكي اكتر ماعشت في بيت اهلي )

بالنسبة للرجل ...... الزوجه اللي هي حبيبته وامه وعشقته وكل حاجه ليها

طيب لو حسينا اننا مفلوقيييييييييييييين بالعياط والانسان اللي المفروض يحتوينا مش حاسس بينا

هندور فين علي الامان

فين

برا البيت

بقت كارثة عظمي

لان للاسف برا البيت دايما غابة مابتصدق الاسود والنمور تلاقي فريستها ضعيفة هشه هذيله وتهجم عليها وتضيعها في براثينها

هاتولي راجل اخلاقة مش كويسه مش مستني يلاقي واحده ومحتاجه شي فقداه في بيتها وبيدخلها من الباب دا لحد اما يوقعها في شبكته ويدخلها في دوامه هي نفسها مش ممكن تفكر انها تدخل فيها

هاتولي ست اخلاقها مش ولا بد يعني وشافت راجل عجبها بتحاول تغريه بكافه الطرق لحد اما يقع في شبكتها

هو الراجل اللي احتاج مراته دا الاولي بيه مراته ولا الست اللعوب طب يازوجه يااصيله احتوي زوجك بكافة الطرق اعتبريه ابنك واخوكي وحبيبك وزوجك شوفي هو محتاج منك ايه واعمليه والله ماعيب

هو الانثي اللي احتاجت زوجها دا الاولي بيها جوزها ولا الراجل الي مش كويس طيب يازوج يااصيل بدل اما تضيع مراتك من ايدك اللي بكلمه ممكن تديلك الكون كله بين ايديك خلي بالك منها وكون ليها الاب والاخ والصديق والزوج والحبيب وحسها

انا عارفه ان مشغلويات الدنيا كتير اوي لكن في لحظات بتمر علي الانسان بيكون محتاج فيها حضن حنين طبطه علي الكتف كلمة حلوه

يعني لما بحتاج دا انا وانا بنوته بروح لماما لكن لما اتجوز مش معقول ابقي بعيط واقوم انزل من بيتي واروح لماما

اكيد مش متجوزه خيال يعني اكيد هحتاج دا من جوزي ان شاء الله

الحياه ياجدعان مش شغل واكل ومعاشرة وبس الحياه فيها ود وتراحم ومحبه زي ماربنا سبحانه وتعالي قال

ولا ايه !!!!!!!!!!

بلاش نضيع ناس بتحبنا في وقت احتياجهم لينا لاننا مش هنخسرهم بس وهما كمان هيخسرونا وهيخسرو نفسهم

كانت معكم من ارض البعبه البلوجارية

اعترافات المستخبية :)

ليلة الدخلة

2010-04-17T10:42:00.000-07:00

ليلة الدخله

فى صديق للمدونه مش عاجبه التسميه دي ليلة الدخله

بيعتبرها قاسيه

عارفين ليه عشان احنا اصلا فاهمينها كده

انما فى الحقيقه هى اسمها كده

وجايه من فكرة الدخول

اه ايه المشكله ؟؟

مش هانحط السيخ المحمي فى صرصور ودنه ولا حاجه

المهم ايه بقى حكايتها الليله دي ؟؟

هى اجمل ليله ولا اوحش ليله ولا ايه موقفها بالظبط

البنت تفضل طول عمرها تحلم بالفستان الابيض والفارس الهمام

واول ما يقرب الفرح تلاقي وشها اصفر مقلم احمر من الرعب وعندها احساس انها راحه المسلخه مثلا

ليه ؟؟

لان احنا ولا فخر ما بنفهمش وما بنحاولش نفهم وكل الشعب طبعا بيتحول فجأه لمفتيين ودكاتره وعلماء ذره فى آن واحد

السؤال المطروح دايما دايما من قبل البنات بالذات

هو بيبقى في الم جامد ؟؟

اصل انا سمعت كذا وكذا وكذا وفلانه يا لهوي على الي حصلها وقعدت تصوووووووت تصووووووت وجالها نزيف وكانت هاتموت

اه لا بصي هو اول يوم ده طلوع روح كده تحسي ان روحك هاتطلع

او ان اول مره ده يا اختي عارفه لو حد فقع عينك بصباعه ؟ اهو فضل البكاره كده !!!!!!!!(نفسي انا احط صباعي فى عين الى قالت الكلام ده على فكره )

والى اخر الكلام الاهبل من الصنف ده

كل ده كلام فارغ هبل تخريف

طيب نجاوب الاول على سؤال البنات

الم جامد ايه وصويت وهبل ايه ؟؟

ليه حضرتك هو انتى هاتصوري فيلم المغتصبون ولا ايه ؟؟

لا طبعا مافيش أي حاجه من الكلام ده بس بشررررررررط

تكوني انتى وعريسك بتفهموا مش هبل فى الجبل

ندخل على الوصايا بقى للبنات عشان ما نرغيش كتير :

أولا : امسحي أي فكره بلهاء دخلت فى دماغك من قبل أي واحده هبله اتجوزت قبلك وما تخليهاش تديلك خبراتها السيئه

ثانيا : فكري بس انك فى اليوم ده هاتبقى فى حضن حبيبك مش ابو ركبه الجزار

ثالثا : اعملي حسابك كل ما تتوتري وكل ما تخافي كل ما هاتصعبي الامر على نفسك زياده وهو ده الى بيسبب الالم

عارفه منين بيجى الالم ؟؟ من التشنج المهبلي روحي اقري البوست بتاع التشنج المهبلي وانتى تفهمى يعنى ايه

والتشنج المهبلي ده سببه التوتر والهبل الى انتى فيه

اعرفي اهو ان فض الغشاء لا يسبب الم اطلاقا لو اتعمل صح

ولا المهبل بيكون ضيق على القضيب ( ازاي يعنى ده المهبل ده ممكن ينزل منه طفل )

واي حد يقولك كلام غير ده يبقى ما بيفهمش حاجه وما تسمعيش منه ولا كلمه بعد كده

خلينا نقول ان أي توتر وهبل منك ده الى هايسببلك الالم

كمان فى حاجه مهمه اوي

انتم اكيد مؤمنين معايا ان احنا كل حته فى جسمنا اتخلقت بميزان الخالق عشان تستخدم فى الحاجه الى خلقت عشانها

الدكتور عباس قالي كلمتين حلوين اوي اوي

قال القضيب بينتصب وبيكون صلب لكن راس ا لقضيب مش بتنتصب بتكون طريه وغير مؤلمه

اصل القضيب خلق عشان يدخل فى المهبل فبالتالي هو مهيئ لكده

وكمان المهبل هو كمان مهيء تماما لاستقابل القضيب والمفروض انه بيرفز سوائل ترطيب من شأنها انها تجعل انزلاق القضيب للداخل سهل

والبكاره غشاء البكارة عبارة عن غشاء رقيق الغرض منه فى وجهة نظرنا المتواضعه إعطاء نوع من الاحتفاء المقدس بمفهوم العفة

مش عشان نعذب بيه البنات

عمركم سمعتم عن واحده اخطأت بعلاقه جنسيه واشتكت من الم اول مره وانما بتقول الشيطان ضحك علينا المتعه سرقتنا

اشمعن فى الجواز الحلال بقى والبنت العفيفه هى الى بتبقى موقعه حربيه ؟

الحكايه كلها نقطه دم خفيفه اوي ولو نفذتي الى هانقول عليه هاتبقى شكة الم لا تذكر ان شاء الله

ما تقلقيش من فكرة الدخول نفسها كل ميسر لما خلق له

عايزاكي دايما تركزي بس مع حبيبك حبوا بعض وبلاش الخوف والرعب والهبل ده الهي يستركم

العريس

تعالولي على جنب كده بقى عشان قاعدتنا هاتطول

بررررررررضه تشيل من دماغك كل الهطل بتاع لا لا ياعم اصل هى ما تجيش الا عافيه

يعنى تتمنع منك وانت تاخدها عافيه ما تجيش الا كده

لا يا بابا ده هبل وتخريف اركنه على جنب ما ينفعناش خالص دى بنى ادمه وانثى حساسه جدا والليله دي هايتوقف عليها حياتك كلها بعد كده افهمواا لله يرضى عليكم

وبعدين ما تسمعش كلام اي حد اهبل تاني يقولك خد فياجرا عشان تجيب من الاخر
او خدلك نفسين من السجاره البنى دي ماركة جايين الدنيا ما نعرف ليه وانت تفوت فى الحديد يا جرع
ولا لك دعوه خالص بافلام السبعينات الى يوم الدخله يجبولك العريس بيشرب ويقول لعروسته ده شمبانيا يا روحي خفيفه عشان تنعنشك
ما ينفعش خااااالص يا ريس والله

وابوس اديكم بلاش خزعبلات الربط والاعمال والسحر دلوقتي

ما تسمعش كلام كمان الاهبل الى قالك خد حباية فياجرا يومها عشان بس التوتر ممكن يخليك مش تمام

ليه اصلا نتوتر ؟؟ ليه اصلا ما نبقاش تمام ؟؟

يعنى انت طول عمرك بتعض اناملك نفسك فى مزه لحم ودم وبعدين لما ربنا يفتحها عليك وتيجى المزه تتوتر وتبقى مش تمام ؟؟!!!!!

هبل صح ؟؟

بالراحه يا ابنى على حبيبتك وعروستك بالهدوء بالحب طمنها وهديها واصبر عليها يوم واثنين وثلاثه مافيش مشكله

لو ما كانتش فاهمه فهمها اتكلم معاها الاول خليها تطمئن لجانبك انك مش هاتعمل أي حاجه تأذيها ولا توجعها

عايزاك تاخدلك شريطين تلاته حبوب الحنيه وانت داخل وحياة والديك

وسيبك من الهبل الى كل يوم هايسألوك هااااااا رفعت راس الدهاشنه يا ولد ولا لااااع ؟

رد باي حاجه قولهم امال يا بوي دي ماااااتت

بالراحه كده على نفسك وعلى البنيه الى معاك هى شاربه من المجتمع لما قايله بس

طيب فاضل بعد كده اقترح عليكم سيناريو معقول جدا لليلة الدخله والاعداد لها وطبعا ده انا اعددته بالاشتراك مع الدكتور عباس الله يخليه لنا

اولا : اقترح عليكم عقد القران قبل الدخله ب3 شهور على الاقل ليه ؟

مجرد تغير التعامل مع بعض من اثنين مخطوبين لاثنين متجوزين مع ايقاف التنفيذ ده فى حد ذاته يفرق

لكن المفروض خلال ال 3 شهور دي يكون فى تقدم فى العلاقه كل واحد حسب عرفه وتقاليده

مافيش موانع شرعيه بعد عقد القران الا ان دينا كمان احترم العرف والمفروض اننا نحترم كمان العرف والتقاليد لو كانت غير متعارضه مع الدين

وده عشان تتعودوا على بعض وتقدروا تحسوا بعض كويس

وكمان خلال الفتره دي لازم تكونوا اتكلمتوا كتير عن العلاقه وعلومها ويا حبذا لو تقروا انتم الاثنين كل ملفات بعبعه هاتنفعكم والله ويا سلام لو تقروها سوا ويا حبذا لو تناقشوها وتسألوني كمان يبقى برافوا عليكم

طيب مافيش بعبعه لاي سبب اطبعوها بلاش بعبعه أي كتاب محترم علمي اقروا عن العلاقه واتكلموا واشرحوا لبعض وتبادلوا الخبرات واكسروا حاجز الخجل فى الكلام

ماشوها كلام علمي بحت ودينى واحكام وما الى ذلك كبدايه وهى تمشي معاكم بدون خجل ولا هبل

كده تمام ؟؟

ثانيا طيب مافيش 3 شهور كتب كتاب وابوكي قال كلا الفته كتب الكتاب قبل الفرح بيومين

مافيش مشكله هانعمل ايه يعنى ابوها نرميه لا طبعا

يبقى حضراتكم ما ينفعش العلاقه الكامله من اول يوم فى الغالب

اعطوا لنفسكم فرصه انتقاليه يوم اثنين تلاته زي ما تاخد معاكم تدريجيا انتقالا من فترة التسبيل والتعطيف الشفوي الى مرحلة المداعبات الخارجيه والتعرف على بعض جسديا وبعد كده تيجى مرحلة العلاقه الكامله بالايلاج وفض الغشاء طبعا

المداعبات دي لازم تنتهي بلمسات خفيفه للمنطقة الفخدين من الخارج والداخل وانتهاءا بالفرج وده تهيئة لعملة الدخول

والمداعبات من شأنها انها تعمل انبساط للعضلات ( الفخدين والفرج والمهبل بالتبعيه ) وده طبعا مهم اوي اثناء عملية ا لدخول

ثالثا: المفروض تكونوا مستعدين بوجود مرطبات طبيه فى حال انه كان فى نقص فى المرطبات الطبيعيه عن الزوجه بسبب التوتر الخفيف مثلا ولان الترطيب مهم جدا فنكون مستعدين نعوض عنه بالمرطب الصناعي

التوتر الخفيف عشان لو فى توتر جامد ما ينفعش ياعريس تدخل النهارده اديها فرصتها طمنها وكلمها وفهمها بالرااااااحه قدامكم العمر كله ان شاء الله بلاش نستعجل

ياريت بلاش عبارات من نوع هاتمووووتي يا سوسو عشان البنت ما تتخضش وتفتكر نفسها هاتموت بصحيح

دكتور عباس قال كمان مثال حلو اوي اوي

هانقله لكم بس بعد البهارات بتاعتي يا دوك انا عارفه انها هاتعجبك

السيناريوا الاول :

هو بسهوكه :ممكن يا حبيبتى تدينى الورده الجميله الحلوه الى فى ايدك دي

هي وهى بتبربش وبتدلع : لا دي بتاعتي

هو بحنيه وشرف الفرسان: لا قولي بتاعتنا .. بصي احنا نمسكها سوها ونشمها سوا

هي وهى مكسوفه من ذوقه : اه يا حبيبى ما تغلاش عليك اتفضل

السيناريوا لتاني :

هو : ممكن اخد الورده الى معاكي دي ؟

هي : ليه تاخدها بس دي بتاعتي

هو: كده عشان انا عايزها واصلا انا دافع تمنها

هي: طيب بالراحه الله بقى

هو: مافيهاش بالراحه هى ده حقي

هي: لا بقى هاه

هو: لا يا ماما انت ما تعرفنيش ده انا اسسسسد وهاتموتي يا سوسو

هاتي الورده.... لا مش دلوقتي .... لا دلووووووقتي ... باقولك هاتي

وطاخ طيخ طوخ

اتبهدلت الورده واحمتال اتقطعت وايديهم اتعورت من شوك الورده

وتعبوا وارهقوا واتعذبوا

وما شموش الورده

وجايز ما يعرفوش يشموها تاني خلاص

اه كل واحد واخد بوكس فى مناخيره هايشم ازاي ؟

عليكم ان تخاتروا بقى بين الاثنين يا حلوين

يعنى عايزه بس اضيف كلمه بسيطه

الاجانب بيقولوا كلمه حلوه عن العلاقه والى هى making love او ترجمتها بالعربي ممارسة الحب

عارفين الكلمه دي حلوه ليه من وجهة نظري لانها بتعبر عن العلاقه انها صوره من صور الحب وهى اصلا كده فعلا

فارجوكم تتعاملوا مع العلاقه بانها فعلا كده ممارسة للحب . حبوا بعض وانتم فى العلاقه مش معركه هى

صدقنى يا ريس شنباتك طويله ويقف عليها الصقر من غير ما تجهز على عروستك وتشيبها بدري

حتى القرآن والسنه عندنا بتقول: وقدموا لانفسكم

صدقينى يا عروسه هو مش قصده يخضك بس هو عليه ضغوطات خارجيه ونفسيه هو كمان ما يغركيش انه عامل شجيع السيما . وكمان هو بس ملهوف عليكى فما تتخضيش وما تعتبريهوش بيغتصبك وخليكى هاديه

وياريت بجد باي شكل يكون ان الاخت العروسه المخضوضه الى كلمتنى على البوست الى فات تتفضل تاخد البوست ده وتبعته لعريسها

واي واحد او واحده مقبلين على الزواج بجد خلي شريكم يقرا البوست بتاعنا ده وغيره كمان من البوستات الموجوده على المدونه

والى متحرج انه يعمل كده يتفضل يجينى على الميل الى محطوط على اليمين فوق ده ويسيبلي أي اميل هو يحب يبعتله الموضوع ده وانا ابعتهوله ولا من شاف ولا من دري

وطبعا اميلاتكم فى بير مالوش قرار انتم عارفينى

الفياجرا واخواتها

2010-04-02T21:54:00.000-07:00

استعجلوني بقى لحد ما الموضوع يطلع ناقص سوى

معلش يا جماعه اعذروني اكيد عايزه اكتب واشوفكم والله بس غصب عني

المهم

النهارده يا جماعه هانتكلم عن موضوع الفياجرا زي ما اتفقنا المره الى فاتت

طبعا مش الفياجرا بس ولكن هى اشهر انواع الادويه المسببة لمنع إنقباض العضلات الناعمة المحيطة بالحجيرات الدموية بالقضيب مما يسبب فى تدفق الدم والحفاظ على الانتصاب

يعنى تقدروا تقولوا هانتكلم عن الفياجرا واخواتها

الحقيقه انا عايزه اركز على نقط معينه فى الموضوع ده

ليه بقى لان انا شايفه ان فى هبل متقع دلوقتي فى تناول الادويه من النوع ده بشكل عشوائي وعبط على الاخر

حاجه كده زي البونبون فى ادين الناس الايام دي لما الواحد بدأ يشك فى الناس انهم بيعملوا دماغ بيها مش بياخدوها كعلاج

ايوه الفياجرا دي علاج والله ادويه مش بونبون لازم يكون عندنا وعي كافي اننا نفهم ايه الموضوع

طيب تعالوا نعرف الفياجرا دي بتعمل ايه عشان نعرف هى اصلا المفروض نستخدمها امته

كمان علشان نفهم عمل الفياجرا لازم نفهم ازاي بيحصل الانتصاب طبعا الى ما قراش البوست الى فات آلية الانتصاب يروح يقراه

طيب احنا قلنا المره الى فاتت ان لما بيحصل الانتصاب عشان ينتهى الانتصاب لازم يحصل الاتى

الجسم بيفرز انزيم معين الانزيم ده بيروح على الماده احادية الفوسفات (الى بتسبب الانتصاب )

فيكسرها وتبقى ماده مالهاش فعاليه (وطبعا بانتهاء الاثاره الجنسيه بتختفى الماده الاحاديه )

بالتالي العضلات الصغيره حوالين القضيب بترجع تشد تاني على الكهوف وتطرد الدم الى دخل فيها

طيب الفياجرا واخواتها بيعملوا ايه بقى ؟؟

الفياجرا بتروح على الانزيم ده (الى بينهى الانتصاب) وتروح تتحد معاه وبالتالي تغيره فما يكسرش الماده الاحادية الفوسفات فيستمر الانتصاب لمده اطول وبشكل اقوى

طيب نفهم ايه من الكلام ده ؟؟

ان الفياجرا بتعمل ايه ؟؟

بتقوي الانتصاب وتزود مدة الانتصاب

لا لها علاقه بسرعة القذف ولا بتخلي كوكو الضعيف يتحول الى توتو عضلات

وكمان مالهاش علاقه مباشره بالرغبه يعنى مش تبقى انت مش جايلك نفس فتقول والله الواحد ياخد حبايه يبقى فى التمام

يعنى لو حضرتك عندك الانتصاب كويس يبقى الفياجرا ما لهاش لازمه معاك اطلاقا

والفياجرا واخواتها مش بيشتغلوا من نفسهم لازم يكون فى عندك رغبه ولازم تتعرض لاثاره كمان عشان يحصل انتصاب

شوفتوا انا قلت ايه ؟؟ لازم يكون فى رغبه واثاره وعليه وكلامي هنا موجه للستات

هو مش بياخد فياجرا عشان انتى مش عاجباه ولا انتى مش مثيره كفايه لا يا ستو هانم والله ده علاج والله مالوش علاقه بالموضوع ان كنتى عاجباه ولا مش عاجباه

المفروض انها اكتشاف علمي فعلا خطير جدا وعالج مشاكل كتير عند ناس كتير

الدكتور عباس علق عليها تعليق جميل جدا

قال انها عملت ثوره فى المجتمع من ناحية انها حسنت الاداء الجنسي عند الرجال بعد سن الكهوله ( اربعين سنه وانت طالع )

وده قلب موازين المجتمع

اتاري يا اختي الرجاله شايفين نفسهم وتلاقي الواحد خلاص فى سن الضياع ويقولك انا هاتجوز انا زي الفل حديد يا باشا . قلبهم قوي علينا يا اختى .

المهم نرجع لموضوعنا

ايه بقى الهبل المتقع الى شغال فى الدنيا والى له والى مالوش بياخد فياجرا شباب وكبار حتى الى لسه عريس جديد ومن غير دكاتره طبعا

دكاترة مين ما شعب مصر كله دكاتره دلوقتي والرجاله بيفرقوا على بعضهم الفياجرا زي ما تكون لبان سماره يا سلطان

لا وبقى اكل عيش فله دلوقتي يقولك فلان ده بيشتغل فى الفياجرا الحبايب عليه لابس جزمه جديده وضارب جل وعايش

الدكتور عباس قالي ان فى بعض الحالات الدكاتره بيدوها للمرضى كدعم نفسي يعنى من منطلق قوي قلبك يا معلم انت معاك المتين كله

يعنى الى ما عندوش سبب عضوى فعلا انه ياخد فياجرا بياخدها عشان تبقى زي الى بيعمل دماغ بهججه عشان يقوي قلبه

نيجى بقى للمهم التحذيرات

حضراتكم المفروض ان الفياجرا تتاخد بروشته من دكتور ما تقلقش مش لازم كل ما تيجى تاخدها تروح للدكتور ا كيد انما هو هايحددلك الكميه ويكشف عليك ويقولك تاخدها امته وكده

طبعا هى ليها اعراض جانبيه معروفه زي : (الصداع – احمرار الوجه – إحساس يإنسداد الانف – اضطراب فى النظر – دوخة )

وده راجع لان الماده الى الفياجرا بتاثر عليها فى جسمنا موجوده فى امكان تانيه فى الجسم مش فى القضيب بس

وطبعا ممكن تحصل مشاكل كبيره بسبب الفياجرا لو اتاخدت كده فى الاوانطه وبالهبولي ومن غير ضوابط طبيه

اهم هذه الظوابط ان الفياجرا كما تحدثنا هى دواء للقلب فأخذ اى دواء للقلب مع الفياجرا يعتبر كجرعه مضاعفة للدواء مما قد يسبب هبوط ذائد و إنخفاض فى ضغط الدم وقد يتسبب فى هبوط حاد للدورة الدموية ولا قدر الله الوفاه

الظابط التانى الفياجرا لها تاثير سلبى على شبكية العين فى بعض الاشخاص الذين يعانون اصلا من مشاكل الشبكية واخذ الدواء فى هذه الحالة قد يسبب مشاكل فى النظر قد تؤدى فى حالات نادرة لفقد البصر

يبقى بالبلدى إلى بياخد دواء للقلب أو عنده مشاكل فى شبكية العين ميقربش للفياجرا غير بعد استشارة مكثفة من طبيب متخصص فى القلب او الرمد

نكتة على الماشى

بيوقلك واحد بيشترى فياجرا فصاحبه بيقوله خد بالك دى ممكن تخليك متشفش قاله مش مهم انا اشوف المهم هى تشوف

ونختم الموضوع بكلام الدكتور عباس الجميل ده والى جايب من الاخر الف شكر يا دوك

وان شاء الله المره الى جايه يكون موضوعنا عن ليلة الدخله
وده بناءا على طلب الجماهير الغفيره الى فرحهم قرب
ويارب كتر افراحنا
ومتشكره لكل الناس الى بتسأل عليا فى الغياب هنا او على الميل وما اتحرمش منكم ابدا
والى مش بيسألواعارفه مستخبيين تحت الكرسي بس شايفااااااكم واحد واحد

آلية الانتصاب

2010-03-11T20:37:00.000-08:00

موضوع مهم الى هانتكلم فيه النهارده

كتير يمكن ما يعرفوش تحديدا ازاي بيحصل الانتصاب

وفى رايي ده من اكبر المشاكل الى الناس بتقع فيها

الواحد لما بيشتري تلاجه بيقرا الكتالوج بتاعها واحنا ما نعرفش جسمنا شغال ازاي معقوله كده يعنى

حتى لو كنتى ست او بنت فبرضه الموضوع يخصك من نواحي كتيره اوي مش بس عشان ممارسة الجنس عموما العلم بالشيء افضل كثيرا من الجهل به

ندخل فى الموضوع

القضيب هو طبعا العضو العامل فى العمليه الجنسيه

بس عشان يبقى عضو عامل لازم يكون منتصب وده عشان يقدر يحقق الايلاج (الدخول) في المهبل

طيب نعرف الاول تركيب القضيب

عايزاكم تركزوا فى كلامي وفى نفس ذات الوقت فى الصوره عشان تفهموني

الصوره زي ما انتم شايفين بتقول ان القضيب بيتكون من 3 انابيب

اثنين منهم اسمهم الجسم الكهفي

وليه اسمهم كده لان جواهم امكان زي الكهوف (حجيرات) بالظبط والكهوف دي هى الى بتستوعب الدم الى بيتدفق للقضيب اثناء عملية الانتصاب

والى تحت ده جسم اسفنجي بداخله بيكون مجرى البول

تمام كده ؟

طيب ده تركيب القضيب الى مش فاهمه يطلع يقراه تاني عشان يفهم الى جاي

ازاي بقى بيحصل الانتصاب

حوالين الكهوف دي فى عضلات صغيره جدا العضلات دي بتكون ماسكه على كهوف دي بالظبط زي انت تمسك اسفنجه كده مثلا وتضغط عليها بايدك انت كده حتى لو حطيت ايدك وفيها الاسفنجه فى المايه الاسفنج مش هاتسحب المايه جواها

العضلات الصغيره دي بتعمل كده مع الكهوف الى فى القضيب بتمنع دخول الدم لها (ودي فى حالة ارتخاء القضيب )

يبقى عشان الانتصاب ده يحصل لازم العضلات دي تفك(تسترخي او تنبسط) وتسيب الكهوف دي ويبدأ الدم يتدفق لها تدريجيا يحصل الانتصاب

طيب ايه بيخلي اصلا العضلات دي تسترخي ويحصل كده ؟؟؟

حاجه محسوبه بالملي جسمنا ده سبحانه وتعالى

الى بيحصل بقى ان لما بتحصل اثاره جنسيه للرجل على طول المخ بيدي اشاره بافراز ماده اسمها (اكسيد النيترات )

اكسيد النيترات ده بيعمل ايه ؟؟

بيروح على ماده كميائيه فى الجسم ثلاثية الفوسفات ويحولها الى ماده احاديه الفوسفات

طب الماده الاحادية الفوسفات بتعمل ايه

هى دي الى بتعمل الشغل كله بتروح على العضلات الى حوالين الكهوف وتخليها تسترخي وبالتالي يبدأ الدم يتدفق للكهوف دي وتمتلئ بالدم زي الصور الى قدامكم دي . وبكده يصبح القضيب منتصب

طيب ازاي الدم ده بيرجع تاني يطلع من القضيب ويحصل ارتخاء تاني

الجسم بيفرز انزيم معين الانزيم ده بيروح على الماده احادية الفوسفات فيكسرها وتبقى ماده مالهاش فعاليه (وطبعا بانتهاء الاثاره الجنسيه بتختفى الماده الاحاديه ) بالتالي العضلات الصغيره حوالين القضيب بترجع تشد تاني على الكهوف وتطرد الدم الى دخل فيها

الى بالاحمر ده تحفظوه زي اسمكم عشان هاحتاجه البوست الجاي

بيروح فين الدم بقى الى امتلأت به الكهوف بعد انتهاء عملية الانتصاب ؟ بيطلع ازاي ؟

اطعلوا كده للصوره الى فوق دي هاتلاقوا فى على الشمال كده فى الصوره الى قبل الانتصاب فى أورده رفيعه اوي الى لونها ازرق دي

الاورده دي لما بيحصل انتصاب والكهوف تتملى دم الكهوف بتضغط عليها فتقفلها ما تخليش الدم يتسرب من القضيب زي الصوره الى على اليمين عند الاسهم السوده

فلما تنتهى عملية الاثارة الجنسية بترجع العضلات تنقبض تانى وبتقلل الضغط على الاوردة فتفتح وتبدأ الاورده دي تسحب الدم لخارج القضيب فيحصل ارتخاء تاني للقضيب

عشان كده لو كان فى خلل فى الاورده دي والكهوف ما بتقفلهاش كويس ساعة الانتصاب ممكن يبدأ الدم يتسرب من خلالها خارج القضيب ويبقى الانتصاب ضعيف

هااااااااه حد فهم حاجه ؟؟

شكلك مش فاهم يا نصه

الى ما فهمش يرجع يقرا تاني والنبى ولو فى نقطه معينه مش فاهمينها اسالونى فيها

عشان المره الجايه هانتكلم ان شاء الله عن الفياجرا فلازم تبقوا فاهمين ده

وطبعا الف شكر للدكتور عباس(لا خلهوهم الفين تلاته بقى ) اصل بقالي كام يوم جايباله كل انواع الصداع على ما اداني موضوعات قريتها وشرحلي وكتبت انا وراجع هو عذبته اخر حاجه الحقيقه

( والنبى من غير ما تقولوا قلتله يكتب هو ما رضيش وقالي مش فاضي نفسي ادبسه فى اي بوست مش نافع معاه خالص )

ما نتحرمش منك يا باشا ومنورنا دايما

وكمان شكرا يا هاتجنن يا الى رافع من معنوياتي وبتسأل عني

واسفه على تاخير البوستات غصب عني والله

Oral sex الجنس الفموي

2010-02-19T17:43:00.000-08:00

شايفه فى ناس بتصوت وناس بتصرخ ناس بتقول اه يا بعبعه يا قليلة الادب وناس هناك كدهون بتقول اه يا بعبعه يا مقرفه

وفى ناس تانين واقفين فاتحين بؤهم كما نفق شبرا وبيقول هه يعنى ايه ؟؟؟ يعنى الى هو ازاي

اما انا فمش فى دماغي كل هؤلاء وهاكمل كلام عادي

ما هو الجنس الفموي الاول( عشان الناس الى بتقول هه )

الجنس الفموي هو عباره عن مداعبات للاعضاء الجنسيه بالفم (اكيد من قبل الطرف التاني يعنى )
وهو بيتم فى الاتجاهين

بمعنى
مداعبة المرأه لقضيب الرجل بالفم

مداعبة الرجل لفرج المرأه بالفم

احب بس اقولكم ان انا اخدت قرار بالكتابه عن الموضوع ده واهتميت به عشان الاساله الكتيييييييره جدا الى بتجينى عنه على الاميل وفى الردود والى تقريبا كلها بتدور فى اتجاه واحد

خلينا نبدأ باول سؤال بيجينى وهو هل الجنس بالفم آمن صحيا ؟؟

والاجابه على السؤال ده : هو نعم ولكن بشروط

اولا : الصحه والخلو من الامراض للطرفين

ثانيا : النضافه الشخصيه عموما وخصوصا طبعا الاعضاء الجنسيه

لو حققنا الشرطين دول مافيش أي مخاطر صحيه ان شاء الله

ونقدر نقول ان القضيب اقل عرضه للامراض من المهبل الا ان المهبل الصحيح بيكون فيه بيكتريا نافعه مطهره فعلا وافرازات خاصه به بتخلي الوسط غير صالح لنمو كائنات مضره

السؤال برضه الى بيتكرر دايما
هل الممارسه الجنسيه بالفم حرام ؟؟
طبعا انا هنا مش دار افتاء انما اختكم الفقيره الى الله عملت الى عليها ودورت كتير فى الموضوع ده وبامانة الله بانقلكم ما توصلت له ان مافيش أي ذكر للمارسه الجنسه بالفم بتحريمها فى الدين الاسلامي

وزي ما باقول دااااائما ما قابلنيش حاجه حرام فى العلاقه الجنسيه وفيها نص قرآنى او حديث صحيح الا الجماع فى الدبر وجماع الحائض

وعليه الجنس الفموي مش حرام .
(وده بدون ما ندخل فى مهاترات من نوع تقليد الغرب والبدعه والضلاله والجدال العقيم ده )

الحاجه التالته هو القرف من فكرة الجنس الفموي

كتير بتجينى رسائل من زوجات بيقولوا ان ازواجهم بيطلبوا منهم الجنس الفموي لكن هما بيرفضوا او بيعملوا ده على مضد وانهم قرفانين من ده جدا وحتى انهم كمان بيقرفوا من الزوج فى حال هو الى عمل لها ممارسه بالفم

(ما جاليش لسه رسائل من رجال بالمعنى ده او انهم قرفانين من ده او مضايقين منه )

المهم الناس دي بقى انا اتكلمت عنهم فى البوست الى فات والى هما الناس الى قرفانين من الاعضاء الجنسيه سواء الى تخصهم او الى تخص الطرف التاني ياريت نرجع للموضوع الى فات لو ناسينه
موضوع تقبل النفس والاعضاء الجنسيه

ومن هنا باقول للستات بالذات عشان هما الى لحد الان وصلنى منهم رسائل القرف يا ستى ابقى خدي جوزك فومين غسيل قبلها عشان تضمنى انه نضيف فله. وزي ما قلتلكم فى البوست الى فات العضو الجنسي جزء من الجسم عادي جدا . زي ايدك مثلا يعنى لو ايدك جه عليها حاجه مش نضيفه هاتقطعيها ؟؟؟ ابسلوتلى نوت

وارجوكي ما تقرفيش منه كمان لما هو يعملك لان انتى مش مقرفه ولا حاجه هو مش شايفك كده بالعكس تماما فارجوكي ما تنقليش قرفك له

السؤال برضه الى باسمعه من الستات وبعض الرجاله : ولييييييييييه اصلا ما احنا بنمارس علاقه عاديه لازمته ايه ؟؟!!!

ده بقى الى فيه كلام كتير

الجنس الفموي شأنه شأن العلاقه الجنسيه بكل اشكالها وفصولها لازم يكون بيتم برضا الطرفين
وكذلك برضه شأن كل حاجه فى العلاقه الجنسيه المفروض انه يحقق متعه للطرفين معا

لكن طبعا فى حال رضا الطرفين برضه ممكن يحقق متعه لطرف واحد دائما او للطرفين لكن بالتناوب يعنى مش مع بعض فى نفس الوقت وده ممكن طبعا بتبادل الجنس الفموي بينهم

وفرضا ان احد الطرفين عايز الجنس الفموي والتاني مش عنده اعتراض لكن مش مستمتعه به

عشان أي علاقه تنجح وخصوصا العلاقه الجنسيه لازم يكون فى ايثار (يعنى تفضيل مصلحة الطرف الاخر ) وفى العلاقه الجنسيه تحديدا بيكون فى استمتاع بمتعة الطرف الاخر

يعنى مثلا فرضا انتى ما بتحبيش الباميا لكن بتطبخيها عشان جوزك بيحبها صح ؟؟

طب فرضا انت ما بتحبش السبانخ بس تشتريها عشان مراتك بتحبها وهكذاااااااا

فى برضه كلام بيتقال فى الموضوع ده

الى هو واحنا برضه نعمل كده حاجات من الى بتحصل فى افلام البورنو وقلة الادب وقلة الحيا دي نعملها فى بيوتنا مع ستاتنا المحترمين (ده الرجاله يعنى )

السؤال مني انا لهم : يعنى امال عايز تعمله فين ولا مؤخذه يعنى حضرتك ؟؟ يعنى تفضل تعمله فى احدى بيوت الدعاره ولا ايه ؟؟ ده حتى يبقى هو ده القرف بعينه بتهيئلي تعمله مع مراتك احسن حتى من انك تتفرج عليه في افلام بورنو (اباحيه ) مش بس احسن من انك تعمله مع حد تاني

الاخوه الستات :

انا لا يمكن اعمل القرف ده يعععععع ايه ده . وبعدين ده حتى بتهيئلي يبقى حرام دى بدعه وتقليد للاجانب الكفار ولاد ا لتيييييت ( اه بتتفرج على قنوات تاخذك الى الجنه مش أي حاجه )

يا ستى أي حاجه مش حرام ما نزلش فيها تحريم يعنى تبقى حلال والله ومافيش قرف ولا بتاع بقى احنا اتكلمنا فى الموضوع ده البوست الى فات

كمان فى سؤال يعنى مش هاقول هو كتير انما اتكرر كذا مره : وهو عن القذف فى الفم وهل ده غير مضر صحيا وهل ده حلال

طبعا مافيش منه أي خطر صحي عادي جدا . وطبعا مافيش فيه برضه تحريم (طبعا فى حال رضاه الطرفين برضه ) .
وبرضه السائل المنوي باحس برضه انه الستات احيانا بيعتبروه قرف ويع وكده واعتقد ده محتاج لواحده بوست عشان نتكلم عنه ان شاء ا لله . لكن هو مش حاجه مقرفه ولا مضره صحيا ولا أي حاجه طبعا .

فاضل نقطه واحده بس عايزه اوضحها فى الجنس بالفم

وهى انى باعتبر دائما ان الجنس بالفم هو نوع من المداعبه يعنى مش وضع جنسي او طريقه جنسيه منفصله انما هى نوع من المداعبات المفروض انها غالبا تؤدي الى اثاره اكتر ومن ثم استكمال العمليه الجنسيه بشكل طبيعى بايلاج و قذف عادي فى المهبل .

ولكن لو حصل قذف فى الفم او حتى خارج المهبل عموما واحتمال يكون ده حاجه بيحبها احد الطرفين مثلا أو لاي اسباب تانيه قد تكون اضطراريه مثلا

مفيش مشكله بشرط ان ده ما يتحولش لاساس العلاقه بدون سبب صحي مثلا او ظروف معينه بمعنى ما تكونش دايما كده ( الى هو الاستعاضه عن العلاقه الكامله بالجنس الفموي فقط)

بتظل العلاقه الطبيعيه لها اهميتها طبعا وتكون هى الاساس فى العلاقه الجنسيه

وفى النهايه برضه من وجهة نظري ان الجنس بالفم بيتطلب علاقه خاصه جدا بين الاثنين وحب بينهم فعلا عشان يكون ايجابي فى العلاقه ومحتاج كمان توافق نفسي وتقبل الشخص لنفسه اولا .

أتمنى اكون افدتكم فعلا
وشكرا يا بلو عشان سالت عليا لما غبت
طب اسألوا عليا يا اندال افرضوا بعبعه اتقلبت ماتت مش تيجوا تعزوا
اندال اندال يعنى .. اخس عليكم ده انا مهنياكم ... ده انا شمعه تحترق من اجل الاندال
يلا مش مهم
شكرا جداااااااا للدكتور عباس على مراجعته وتوجيهاته ومساعدتي فى الرد على اميلاتك ما نتحرمش من افضالك يا دوك

تقبل النفس والاعضاء الجنسية

2010-01-20T15:02:00.000-08:00

طبعا قبل ما ابدأ كلام باعتذر عن التاخير فى البوستات

والله غصب عني

على ما فضيت وكتبت الموضوع

وبعته للدكتور عباس يراجعه كان مشغول مش عايزه اقولكم على السرعه بقى اسبوعين على ما رجعلي الموضوع

الف شكر يا دوك احنا نقدر نقول حاجه يا باشا

(هانضرب كده صح؟ )

نيجى لموضوعنا النهارده الى هو

تقبل النفس والاعضاء الجنسية

يعنى ايه؟؟ ايه العنوان الغريب ده يا بعبعه عماله تخترعى لنا مش كفايه البوست الى فات ما فهمناش فيه ولا كلمه

طيب ماهو انا باحاول اخليكم تفهموا

بس تقريبا سعد زغلول عنده حق

مافيش فايده

المهم

دلوقتي انا من خلال كلامي مع الناس وخصوصا الستات لاحظت ان نظرة الست لنفسها ولاعضائها الجنسيه مختلفه عن الرجل ونظرته لنفسه واعضاؤه الجنسيه

ازاي

احنا بنربي الاثنين عكس بعض خالص فى حاجات كتير والاخر بنطلب منهم يعيشوا مع بعض طب ازاااااااي ؟؟

بداية من دور الام الى هو اهم دور فى تشكيل الطفل .

الام ما بتبصش للولد واعضاؤه الجنسيه بقرف وخزي وعار وعيب لا بالعكس ده بتبقى فخوره به اوي ولو حصله انتصاب تفرق شربات على المنطقه
الولد حتى لو صغير ممكن يلاحظ ده فى نظره عنيها
بالتالي هو من الوهله الاولى شايف اعضاؤه الجنسيه حاجه مفخره يعنى مش بس متقبلها وبعد كده بقى يبدا المجتمع ككل يرسخ الفكره عنده ويربط الفحوله والرجوله بالعمليه الجنسيه ويربط العمليه الجنسيه بالاعضاء الجنسيه

وهنا تيجى بقى المشكله

لانه بيحمل العضو الجنسي اكتر مما يحتمل والاهتمام به بيكون زياده من الولد وممكن تتربى عنده مشاكل تانيه بقى متعلقه بحجم القضيب وقوة الانتصاب مثلا وممكن يكون هو طبيعى جدا بس متوهم مثلا ان حجم القضيب عنده صغير فيبدأ يحس بالخزي والعار بقى من نفسه

عشان كده لازم نكون عارفين ايه هي المعدلات الطبيعيه عموما عشان ما تعملش عقده عند الرجال وما يبقاش المقياس ابدا الافلام الاباحيه الى شافها وهو مراهق

بالنسبه للبنات بقى موالهم ملخبط اوي

البنت من اول يوم فى حياتها بتتعامل مع نفسها ومع اعضائها الجنسيه بخوف ورعب مصدره الاهل طبعا

الام بتورثها القلق من الاعضاء الجنسيه ممكن اوي يبان على الام علامات القرف وهى بتكلمها عن الفرج مثلا لاي سبب

او تلاقي الام امتعضت وقلبت وشها وخلاص هاترجع فى وشنا عشان لقت البنت حطت ايدها على اعضائها مثلا .
وفى امهات بتاخد القرف ده وسيله لانها تبعد تفكير البنت عن العبث بالمنطقه عشان تحافظ على الغشاء وعشان فى هاجس مش عارفه ايه مصدره ان البنت لو اتنبهت لاعضائها الجنسيه هاتبدأ تحس واحتمال تنحرف وتجيب العار بقى لاهلها وهنادي خدها الوبا وكده يعنى

فالحل بقى اننا نقرفها من نفسها او نخوفها خوف فظيع زي مثلا عارفه لو اتخبطي بس البوسي هاتتعوري وتخري دم وتموتي ... ودي قسما بالله انا شوفت البنت كانت روحها بتطلع من الرعب عشان كانت مامتها قايلالها كده وبعدين وهى بتعلب اتخبط فعلا . الخبطه بسيطه جدا وما وجعتهاش اوي لكن الخوف بقى

الرعب الى ربته امها جواها من الموت لو اتخبطت بس رعب فظيع كان على وش البنت وسألت امها فى ايه هى مالها فقالتلى اصل انا قلت لها كذا وكذا

بتهيئلي ده وضع كفيل جدا ان البنات تكون مشاعرها تجاه اعضائها الجنسيه سيئه جدا ما بين خوف وقرف واحتقار كمان

بالتبعيه بقى بما ان العضو الجنسي ده مرعب كده ومقرف وحقير يبقى العلاقه الجنسيه كذلك زيه تمام وممكن كمان نعتبر ان الرجل نفسه اعضاؤه مقرفه وحقيره ماهو بيروح هناك بقى ناحية القرف وبالتالي ممكن تقرف من الزوج نفسه ومن العلاقه ومن نفسها والكل كليله

وبرضه طبعا الى بيقرفوا من الاعضاء الجنسيه مبررهم الظاهر ان الاعضاء الجنسيه مرتبطه بالبول فى الطرفين وبالنسبه كمان للستات فى بقى افرازات وحاجات يع وكده

حتى الستات الى بيتكلموا بالقرف برضه عن العضو الذكري قالوا الله مش فيه بيبيه وحاجات بتنزل اثناء العلاقه (مذي ومني ) دول كمان اعتبروهم قرف برضه

معلش يا رجاله على جنب عشان عايزه اقول كلمتين للستات

دلوقتي بالنسبه للبول حضرتك هو مش في عندكم مايه ولا ايه ؟؟
هو لو ايدك جه عليها بول ولو مش منك ولا من ابنك حتى هاتعملي ايه فى ايدك ؟؟
هاتقطعيها ؟؟ لا اكيد هاتنضفيها
طيب يبقى فين المشكله بقى ما الاعضاء الجنسيه ممكن تبقى نضيفه عادي سواء للرجل او للست

الافرازات المهبليه : ماشي مالها ؟ مين خلاها مقرفه وهاترجعي فى وش وانتى بتتكلمي عنها ؟؟ عادي اعتبريها زي اللعاب فى الفم كده حاجه طبيعيه جدا يعنى

لو الست ما عندهاش مشاكل صحيه ولا عدوى ولا حاجه يبقى المكان عادي والله
نعرف منين انها ما عندهاش

ان الافرازات تفضل شفافه وما لهاش ريحه وحشه

لو ا لافرازات المهبليه لها لون او ريحه وحشه يبقى كده فى مشكله نعالجها بقى

بالنسبه للمذي والمني برضه

مش قادره افهم والله ليه قرفانه منه القرف ده كله ؟؟

عشان خارج من الاعضاء الجنسيه ؟

هما فى حد ذاتهم لا مقرفين ولا فيهم سم قاتل ولا حاجه تستاهل الترجيع الى طالع على وشكم ده

ها ااااااااااااااا

عايزه اسمعكم بجد

فكوا الجبس من فضلكم وسمعوني رايكم

واقنعوني حتى ليه قرفانين لو قرفانين

بس اتكلموا

وجهة نظر فى الوضع الخلفي

2010-01-02T07:01:00.000-08:00

طبعا كالعاده مقصرين رقابتي على الاخر وما حدش عبرني ولا حد قال حاجه

ومش عارفه انتم ليه بتعملوا في نفسكم كده ما علينا

طبعا انا عماله اهري فى نفسيتى واكلم نفسي واخمن شويه واعتمد على معارفي الشخصيين فى تكوين راي فى الموضوع

وطبعا اول واحد يا عينى اتهرى مناقشات وتقطيع هو الدكتور عباس والى طبعا خبرته اكتر مني بكتير وشاف حالات كتير ووجهة النظر دي تقريبا مبنيه على رايه بصياغه مني

وبعد التقطيع ده كله وصلت لوجهة نظر انا والدكتور عباس الاول وهاعرضها عليكم عل وعسى الاقي حد بيشاور ويقولي ايوووووووووه هو ده والنبى

او حتى يقولي لا مش هوده بالنسبه لي والحقيقه هى كذا وكذا

مشكلة الاختلاف من الرجل والمرأه حول الوضع الخلفي

التفسير من وجهة نظرنا قد يكون اقرب حاجه للحقيقه وده لاغلب الناس مش كلهم طبعا
ودى برضه وجهة نظر خاصه

هاقولكم الاول حسب وجهة النظر دي ليه الوضع الخلفي مهم للرجل

أولا : الوضع الخلفي هو اكتر الاوضاع الى بيكون فيه استسلام من المرأه للرجل بكامل ارادته
وده فى حد ذاته بتكون فكره مثيره للرجل الى بطبيعته بيحب يحس بالسيطره( بعكس مثلا الوضع التقليدى الى بيكون فيه الرجل كأنه هو الى خاضعها له او ضع الفارسه الى بتكون فى هي الى تبدو مانحه للمتعه )

ثانيا : الوضع الخلفي بيمثل متعه خاصه للرجل بالاليا والى بتعتبر عامل جنسي مثير مهم جدا

ثالثا : فى اغلب الاوضاع الخلفيه بيكون الرجل حر اكتر وبيتحرك اسهل وده بيعمله توفير جهد وتركيز اكتر مع الاثاره . وكمان بتكون اديه فاضيه وبيستخدمها فى التواصل الجسدي اكتر

ليه الست مش عاجبها الوضع ده او اكترهم

اولا : فكرة السيطره من الرجل والاستسلام له أو الخضوع مرفوضه عندها مع انها تعتبر هى الفطره طبعا ليه بقى ؟

لسببين من وجهة نظري :

الاول هو انها متربيه تربيه خطأ على استهجان الجنس والشهوه وعليه فهي عشان ما تحس بتانيب الضمير على ممارسة الجنس عايزه تحس إنها مش بتعمل ده بمزاجها لا ده هو الى بيعمل وهى ما لهاش دعوه .

الثاني هو ان الست فى العصر الحديث سمعت كتير عن حرية المرأه ورفض سيطرة الرجل عليها وفهمت حرية المرأه غلط وآنفت انها تكون فى أي وقت من الاوقات مستسلمه بكامل ارادتها للرجل
وعليه فضلت طريقين ياتبدو مرغمه يا تبدو هى المانحه او ا لمسيطره

ثانيا : عدم الثقه فى الشريك سواء عامة او اثناء العلاقه مافيش تفاهم ما بينهم كفايه مافيش تواصل كفايه يخليها تعرف ا يه ممكن يحصل ومافيش عندها حتى ترجمات صح لاحساسها وجايز يكون هو اصلا مش بيهتم بده والفكره الغبيه الى بتقول ان الالم فى العلاقه مطلوب وحلو زي ما شافوه الرجاله الهبل فى الافلام بيخليهم احيانا ما يهتموش لو حست بالم حتى لو اعلنت عنه وده اكيد يخليها ما عندهاش أي احساس بالامان وخايفه من الالم مثلا

ثالثا : الخوف من التحريم . اكتشفت ان فى بعض الناس مرتبط معاها الوضع الخلفي بالجماع فى الدبر ويا اما برضه لجهلها بالدين بتعتقد ان ده ممكن حرام يا اما معتقده ان الوضع الخلفي اسهل فى وصول الرجل للدبر مثلا (مع ان بالعكس خالص ) وعليه هى خايفه احسن يعمل حاجه حرام وهى تحت سيطره كامله منه .

على فكره ما باحبش احس انى بانفخ فى اربه مقطوعه باصاب باحباط شديد وما باعرفش اكتب حد كده يرفع من معنوياتي ويقولي حتى على الاميل انه متابع فى الخباثه

واتفاعلوا معايا ارجوكم انا محتاجه اسمعكم عشان اعرف اكتب عنكم فكوا الجبس الى على قلوبكم شويه

نتيجة الاستطلاع

2009-12-13T16:58:00.000-08:00

بصراحه يا جماعه أنا زعلانه منكم جدا كنت متوقعه ان الاعداد تكون اكتر من كده

والمهم الى يغيظ بقى ان المشاهدات اعلى من الطبيعى طيب اتكسفوا ونفعوا القاعده وجاوبوا

زعلانه اوي من الى دافنين مشاكلهم لان الى عندهم مشاكل فعلا ما اتكلموش ا تفرجوا من بعيد ومشيوا

وده الى خلى نتيجة الاستطلاع مش عاجباني

مش معبره عن المجتمع الجميل الى انا عارفاه وعاجناه وخبزاه ومربياه على اديا دول

خلينا نقول ان نتيجة الاستطلاع دي معبره عن شريحه ونوع معين من الناس المنفتحين شويه والمثقفين

وبمعنى اخر المثقفات والشاربات من نبع البنت زي الولد ماهيش كمالة عدد

دلوقتي هاقولكم اهم المؤشرات الى اديتهاني النتيجه

لحوالي 30 حاله جاوبوا على الاستطلاع (العدد بالنص تقريبا بين الستات والرجاله )

الاغلبيه العظمى بتفضل التغيير

لكن فى 3 حالات تقريبا ما بيغروش والحقيقه ال3 حالات دول محتاجين واقفه عشان هما مختلفين الرأي وانا شايفه ان كل واحد منهم بيمثل طبور طويل بس صاااااامت ورافض الظهور

الاول والى قال انه يتوووووق للتغير لكن الزوجه رافضه رفضا تاما ..... ليه يا ماما ؟؟؟ ليه رافضه ؟؟؟ نفسي واحده بس منهم تجاوبنى ليه بترفضي تغيير الاوضاع ؟؟ حد ضحك عليكى وقالك انها حرام ولا حاجه ارجوكي قوليلى بس وجهة نظرك .

الثاني قال : ما فكرتش اطلب منها ده ومش متخيل ايه ممكن يكون رد فعلها ومش عارفه هو احنا اصلا نقدر نعمل كده ولا لا
(شايفه انها حالة نقص فى المعرفه جامد جداااا وسماع خرفات شعبيه كتير جدا وخجل وقلة جرأه منه قبل ما يكون منها )

وبرضه للحاله دي باقول ليه ما تقدروش ؟؟؟ وليه ما سألتهاش واهم من كل ده انت حاسس انك كده مرتاح ؟ طيب لو مرتاح انت وهى خلاص .
لكن مؤكد انت حاسس ان حاجه ناقصاك ومش قادر تحدد هى ايه
فحاول تجرب جديد جايز تلاقي الى ناقصك

ثالثا : ودي الزغلوله الكبيره بقى بتقول لااااا تغيير اوضاع لا جربنا وما عرفناش بلاش قرف
زيها زي كل الشعب المصري بيكسل يخرج يتفسح ومالها المسلسلات بس وانا على السرير

يا ناس جربوا حاولوا مش لازم الوضع الجديد تاخدوه من اول العلاقه لاخرها جربوه وبعدين كملوا فى الوضع التقليدى او أي وضع متعودين عليه وشويه شويه هاتلاقوا نفسكم بتتمكنوا من الوضع

يا رجاله ما تتكسفوش انكم مش عارفين الوضع ومش متعودين عليه ده لا يقلل منكم ده عادي جدا اغلبكم ولله الحمد محترمين ما جربتوش الا ما زوجاتكم ودي حاجه تحسب لكم مش عليكم
يا ستات بلاش غباوه مطلقه وردود افعال نافره ومنفره من مجرد انها حاجه جديده

ونظام خلينا فى التقليدى واخلص ياعم وخلصنا فى ليلتك

ونكمل مؤشرات الاستطلاع

تفضيل الاوضاع :

الوضع الفرنسي يحتل الصداره عند الرجال
ويجى بعده على طول الفارسه

وبالنسبه للستات الفارسه يحتل الصداره وبعده التقليدى

وفى كره دفين وعميق للخلفي من اغلبهم ومن وجهة نظري اغلبه رفض عقلي او فكري يعنى

(اظن النتيجه دي صادمه وبتظهر اد ايه فى فجوه فعلا ما بين تفضيلاتهم وعقولهم )

فى ملاحظه كمان كل الحالات الى مش متجوزين الى جاوبوا بيفضلوا التغيير والتفاهم مع الطرف التاني ما اعرفش دي احلام الشباب ولا ده بيعبر عن ان الامل فى المستقبل ولا ايه

احب كمان فى النهاية أنبه لنقطه مهمة جدا وهى إن رأي الستات بالذات بيعبر عن رأي الست المتفتحه شويه والى عندها الجرأه تقرا المدونه بتاعتنا وقدره اصلا انها توصلها وتجاوب على الاستطلاع
يعنى شريحه خاصه من الستات
ويااااااااريت اقدر اوصل للشريحه فعلا عاديه معبره عن المجتمع ككل لكن منين أجيب أنا

اذا كان انتم اكتركم بيبص عليا من بعيد ويمشي مش عارفه اعملكم ايه اجيب لكل واحد حبايتين شجاعه وطاقية الاخفاء عشان تتكلموا وتبعبعوا بحريه

المهم دلوقتي عايزين نفض الخناقه الى ماشيه دي

خناقة الأوضاع الخلفيه

الى الستات مش طايقنها والرجاله هايموتوا عليها

طيب انا عايزه معلومات اكتر من فضلكم عشان اعرف ايه المشكله ونحاول نحلها وفرصه اننا نصدع الدكتور عباس شويه

بس اعملوا حسابكم الى هايدخل او تدخل المدونه من غير ما يجاوب على السؤال هاعلقه على باب المدونه بره

الستات : عايزه من فضلكم شويه صفو نفس كده وتركزي وتقوليلى بالظبط ايه الى بتكرهيه فى الوضع الخلفي وبتحسي بايه بالظبط بس تكوني صادقه ارجوكي مع نفسك اولا وركزي كده ودعبسي فى نفسوياتك وهاتلنا الحقيقه

وطبعا لو بتحبي الوضع برضه تقوليلنا برضه ليه وايه احساسك

الرجاله : برضه ركز مع نفسك اوي من فضلك وقولنا ليه بتفضله او ليه بتتوق اليه وايه الاحساس الفريد الى بيدهولك الوضع ده ركز كده ودعبس يا باشا برضه فى نفسوياتك وقولنا الموضوع ايه

على الله تدوخوني زي الاستطلاع الى فات

والناس الى مسحوا تعليقاتهم من التعليقات عندي زعلانه منهم موت موت موت(عارفين نفسكم طبعا)

وارجوكم بعد كده مش عايزه حد يعلق باسمه الحقيقى عشان ما تعملوش كده تاني
علقوا بغير معرف بس امضوا باي اسم عشان اوجه لكم الكلام

وشكرا للجميع

وزعلانه من عمرو عشان منفضلنا

الأوضاع الجنسية (تحديث)

2009-11-29T20:17:00.000-08:00

تحدييييييييييييييييييث

ايه يا جماعه مش كده الاصوات عددها لسه قليل برضه مع ان المشاهدات معقوله يعنى كل يوم اختر من خمسين شخص بيدخل المدونه

والاخر مافيش حد جاوب على الاستطلاع غير يمكن 30 ما ينفعش شويه كمان من فضلكم الى ما جاوبش يجاوب

عايزه نتيجة الاستطلاع تبقى حقيقيه من فضلكم وده عشانكم انتم والله

يلا بسرعه قدامي على الاجابات

النهارده هانتكلم عن موضوع مهم جدا فى العلاقه الجنسية وهو الاوضاع الجنسيه

الأوضاع الجنسية المختلفة منين جت اهميتها

عشان ما نرغيش كتير اختصر عليكم وأقولكم إن الأوضاع الجنسية دي زيها زي أنواع الأكل مثلا

بمعنى إن انك لو ما نوعتش الاكل مش هاتموت من الجوع لكن مش هاتكون مبسوط وجايز تمرض كمان لان التنوع ده رحمه من ربنا بنا وجسمنا محتاجه فعلا والا ما كانش يبقى موجود

اكتر الناس خصوصا الستات بتفضل تمارس الجنس بالطريقه التقليدية

هى صحيح اسهل طريقه لكن مش الطريقه الوحيده ولا احسن طريقه

طيب منين نعرف احسن طريقه ؟

مافيش حاجه اسمها احسن على الاطلاق كل وضع وكل طريقه لها مميزاتها ولها عيوبها يمكن والى بتختلف من شخص للتاني وحتى من وقت للتاني بالنسبه لنفس الشخص

يبقى مافيش حاجه تثبت لنا الا اننا نجرب

نجرب كل الاوضاع وكل الحركات الى تنفع والى ما تنفعش

لان طبعا حسب تركيبة جسم كل واحد ولياقته ونفسه بتختلف امكانية الاوضاع وسهولتها وصعوبتها

وكمان مش نجرب مره ونقول والله فشلنا فى الوضع ده ومش هانعمله تاني

لا طبعا خلينا نقول الوضع الجديد ده زي رقصه محتاجه تدريب لاكتر من مره عشان تجيدوا السير على النغمات مع بعض .

ما تتوقعوش ان اول مره تجربوا وضع جديد هاتوصلوا من خلاله للذروه لا طبعا مش لازم ابدا

عادي تجربوا وضع وبعدين تكملوا على العادي شويه شويه توصلوا لنغمه واحده تمشوا عليها

المهم تجربوا

السؤال الى بنسمعه كتير وخصوصا من الستات الى انا عايزه اعضهم

هو ليه نغير اصلا ما دام احنا على الوضع التقليدى ماشيين كويس ؟

ردي عليها دايما طب وانتى ايه عرفك ان كده كويس ما يمكن فى احسن من كده ؟؟

واقولها الاكل مش ملو بطن بس والا ما كناش نصنف ونعمل صواني ومحاشي وما الى ذلك

فاهميني يا ستات ؟

شكلهم مش فاهمين حاجه برضه

هاستعرض معاكم بعض الاوضاع الرئيسيه والى كل واحد فيهم بيندرج تحته اوضاع تانيه

اولا : اوضاع يكون فيها الرجل يعلوا المرأه

والى منها طبعا :الوضع التقليدى والى هو بتكون فيه الست نايمه على ظهرها وده الوضع المنتشر او التقليدى وهو عادي لانه يعتبر اسهل وايسر وضع فى اغلب الحالات . وهو الوضع المفضل لليلة الدخلة للأسباب السابقة

ثانيا : اوضاع تكون المرأه فيها تعلوا الرجل

واقرب مثال له وضع الفارسه والى فين بيكون الرجل هو الى مستلقى على ظهره والمرأه بتكون فوقه وواخده وضع بالظبط الفارسه على الحصان .
وده وضع له طبيعه خاصه ومميزات مهمه زي مثلا ان يعتبر باشتراكه مع اوضاع تانيه فى نفس العلاقه بيكون توزيع للجهد على الطرفين فى حال طول وقت الممارسه
او يكون الجهد اكثر على المراة ويفيد فى حالة وجود اسباب صحية تتطلب قلة مجهود الزوج او فى حالة وجود نوع من الخوف او التوتر من الجنس لدى الزوجة لأن هذا الوضع يعطيها سيطرة واطمئنان أكثر كما يفيد فى تقليل سرعة القذف لدى الزوج

وكمان فى الوضع ده ممكن يكون ممتع للرجل اكتر حيث انه مش مركز فى حركه وانما مركز فى تفاعلات العلاقه معاه وكمان شايف جسم المراه بالكامل قدامه

وبالنسبه للست بيعطيها مساحه اكتر انها تعمل الى هى عايزاه وكمان الوضع ده فى اغلب صوره بيوفر مداعبه لاعضاء المرأه الخارجيه اثناء الايلاج وده بيعطى اثاره اكتر

ثالثا : الوضع الفرنسي او الخلفي : وهو بيكون فيه الايلاج من الخلف ولكن فى المهبل مش حاجه تانيه

بمعنى ان الرجل بيكون خلف المرأه وله اشكال كتير برضه مش شكل واحد

وده احب اسجل هنا انى لاحظت ان معظم الرجاله بتحب الوضع ده وعلى العكس معظم الستات مش بتحبه مش عارفه ليه

النقطه دي بالذات عايزه اكون فيها راي فلو سمحتم الى يقدر يبعتلي على الميل او فى الردود يقولي حاجه عن الموضوع ده يتفضل

الوضع ده كمان فى سهوله خصوصا ما يكونش فى امتلاء زياده فى الارداف للست وفى كمان متعه خاصه للرجل لشعوره السيطره اكتر والاستسلام منها بارادتها له وكمان منطقة الارداف منطقه مثيره بالتالي بتاثر ايجابا على اثارة الرجل

رابعا : الوضع الجانبي

وبرضه له اشكال منها الى بيكونوا فيها متقابلين( وجه لوجه) وهو مناسب اكتر للحوامل لانه ما بيكونش فيه ادخال كامل او يمكن ان يكون ايضا ظهرها له
ولكن هو وضع يتطلب يكون الطرفين وزن خفيف عشان يقدروا يقوموا به

وفى طبعا اوضاع كتير وهما واقفين سواء متقابلين او هى ظهرها له

وفى رايي ان كل اثنين ممكن يبتكروا الاوضاع الى تناسبهم وممكن يكتشفوا ده بالصدفه وممكن يحاولوا يتعملوا سواوممكن يلجأوا لكتاب طبى أو موقع طبى متخصص يعلمهم

المهم يكون عندهم الاثنين روح التجربه فعلا والرغبه فيها وفى التغيير والاقتناع باهمية دة

من فضلكم انا عندي فكره عايزه اعملها

لايمانى دايما زي ما انتم عارفين ان فى فجوه بين الرجل والمرأه فى مجتمعنا العربي والمصري على وجه الخصوص

والفجوة دي سببها انهم مش فاهمين بعض ومش عارفين الطرف التاني بيفكر ازاي

وانا دايما باحب ادور على مساحه فى النص يتقابلوا فيها

وعليه بالنسبه لموضوع الاوضاع ده

اتمنى تجاوبوا على الاسأله دي وتبعتوهالي سواء على اميل المدون الى فوق على اليمين ده
او على الردود
الردود من غير اسامي حقيقيه

الأسئلة هي

متزوج - مطلق - أرمل

النوع :

السن : سن الشريك :

عدد سنوات الزواج : عدد الابناء إن وجد :

هل تفضل تغيير الاوضاع ؟

هل شريكك يوافقك على اختيارك ؟

ماهو اكثر الوضعيات توافقا معك ؟

ماهو اكثر وضع تتوق اليه وما الذي منعك منه؟هل تجد مشكله في مصارحة الطرف الاخر تجاه ما تتمنى تغييره فى العلاقه الجنسية ؟

وطبعا لو فى حد مش متجوز وعايز يجاوب باعتبار ما سيكون او باعتبار توقعاته الشخصيه مثلا لحياته

يتفضل يجاوب لكن من فضلكم يوضح انه مش متجوز

وطبعا مش هاوصيكم مش عايزه قلة ادب

يلا بسرعه يا حلوين وهاطلعلكم نتيجة كلامكم ده او هاحاول اعمل كده

يمكن ده يفيدكم فعلا

وطبعا باشكر دكتور عباس الاول على مراجعته للموضوع وتنقيحه ما نتحرمش من مجهوداتك يا باشا

احترام الاخر

2009-11-17T02:52:00.001-08:00

ازيك يابعبعه ياحبيبتي طبعا هتتضربيني انا عارفه بس يلا انتي الكبيرة

بصراحه احترت في العنوان واختياره لان الموضوع انا شيفاه انه من البديهيات

يعني امر مسلم بيه لكن بصراحه من فتره بيحصل حاجات غريبه قدامى

بتننننننننننح منها

فكتب بشكل عفوي اللي جوايا

- اتربيت اني مدام انا مع راجل اداني اسمه اني اصونه وحتي مسمحش لنفسي ان يجي في خيالي حد غيره هعتبر دي خيانه

- ادام ارتبطت بانسان حتي لو كلام او قراية فاتحه او اي درجه من درجات الارتباط اللي قلتها قبل كدا في بوست الخطوبة يبقي هو دا وبس لا حتي اقول شوفت فلان وعجبني ولا كان نفسي ومش نفسي والكلام اللي الاغلب عارفه

- مش عاجبني تصرف اقوله انت عملت كذا وكذا ودا مش عجبني وطبعا مش بشخيط ولا كانه عمل جريمة لا الاسلوب بيفرق

- اتربيت علي ان حتي لو كنا متخانقين وشبه منفصلين اني برده اصونه ومحدش يدخل حتي بالي لاني لسه مرتبطه بيه

- اتربيت علي ان لو فشلت في خطوبة اني مدخلش حد حياتي الا لما اكون تيقنت ان الماضي اتمحي عشان اللي هيديني اسمه دا من حقه عليا اصونه ومش اخونه حتي لو بذكري

انا كل دا مش بتكلم لا في دين ولا اي حاجه بتكلم في حدود متعارف عليها من زمااااااااااااااااااان او كنت فاكره انها متعارف عليها

^^^^^

طيب بعد الرغي الطووووووووووووويل العريييييييييض دا هتضربوني وتقولولي لخصي هاتي من الاخر هقول حاجه شفتها قدامي وهي اللي لغبطتلي الدنيا لانها مش حاله فردية لا شفتها مع كذا حد

^^^^^^

واحد متزوج ومعاه طفلين مش مرتاح مع زوجته وبيفكر يتجوز من واحده تانيه مهما حصل هقول حقه لانه بيفكر في حلال ماعلينا من النقطه دي

اللي حبها وعاوز يتجوزها

كانت واحده متزوجه ومعاها طفلين ولسه مش اتطلقت

والاتنين ارتبطو وتليفونات ومقابلات

تيجي تقول دا غلط

يتقال ماهي في مشاكل مع جوزها ويعتبر منفصلين لكن لسه مش طلقها

هنا

هو مين الصح

انا بتفكيري واللي اتربيت عليه

ولا الحاله دي اللي كل مبررهم انهم شبه منفصلين وفي مشاكل بينهم

مع العلم

اني سالت الشخص دا

لو مراتك حبت واحد تاني واهو في بينكم مشاكل هتقبل انها تخرج معاه و ووو

ولقيته قالي كفايه مش مكن اسمحلها بكدا

طيب ليييييييييييييييييييه سمحته لغيرك ؟؟

ليه ؟؟

سؤال يطرح نفسه وبما اني صغننه ولسه بالشكل اللي بشوفه مش عرفت حاجه يبقي هستني كلامكم انتو ياتاكدولي اللي متربيه عليه ياتقولولي هو في ايه

ايه بئا هه ؟

بس برده المتربيه عليه مش هيطلع من جوايا لانه اساس

Frigidity البرود الجنسي

2009-11-08T17:09:00.000-08:00

طبعا زي ما احنا دايما متعودين بنحاول نختار الموضوعات الى بيوصلنى اميلات عنها او حتى في الردود

وكان فى اكتر من موضوع واخترنا نتكم النهارده عن البرود الجنسي للمراه عن الرجل اسمه حاجه تانيه نبقى نتكلم فيه بعدين

نعرف الاول ما هو البرود الجنسي للمرأه

هو عدم اقبال المرأه على الجنس ولا احساسها به والتمتع به .

والموضوع مش بالبساطه الى تخلي كل واحد يقول لمراته انتى بارده جنسيا لا طبعا

الوحيد الى ممكن يقرر الموضوع هو طبيب مختص لان مش كل واحده عندها مشكله باظهار تمتعها بالجنس تبقى بارده .

المفروض ان فى اسباب عضويه للبرود الجنسي فى حالات قليله ونسيب علاجها للاطباء طبعا المختصين

خلينا نتكلم عن الاسباب النفسيه والى هى فى رايي شائعه اكتر خصوصا فى مجتمعنا العربي والمصري على وجه الخصوص

مع تسجيل ايماني الشديد بان احنا عندنا المرأه مشوهه العقل جنسيا ( يعنى دماغها بايظه من ناحية الجنس )

وبدون أي ذنب منها سوى انها من مجتمع بيفكر غلط

تعالوا الاول نحدد ايه الى يخلي المرأه ما عندهاش رغبه فى الجنس ؟؟

اولا : تعرض البنت فى الطفوله مثلا لتحرشات او اغتصاب او حاجه تسبب لها عقده من الرجال مثلا او من الجنس او من الحياه كلها اصلا .

ثانيا : احنا كمجتمع بنربي فى البنت خزعبلات فى الدماغ عن الجنس (بنكرهها فيه ونخوفها منه) اه امال تجيب لنا العار ولا ايه ؟؟
بيكون عندها رفض داخلي للعلاقه الجنسيه وبالتالي

يا اما تحتقر العلاقه الجنسيه وتحسها مهانه للمرأه وحيوانيه من الرجل والى اخره من كلام الناس الى عاملين نفسهم مثقفين وبالتالي ده بيمنعها من الاستمتاع بالجنس

يا اما لا شعوريا تقرر انها مش عايزه جنس مش بتحتاجه ما عندهاش رغبه ( الله انا مؤدبه بزياده ياعالم ) وبرضه فى الحاله دي لا شعوريا بتمنع نفسها وجسمها من الاستمتاع بالجنس

والنقطه دي معاناها ان المرأه عندها مشكله اصلا مع العلاقه الجنسيه نفسها (ودي كتير اوي اوي اكتر مما تتخيلوا )

ثالثا : ان احنا برضه كمجتمع مستنيل على عينه برضه امعانا فى تخريب دماغ البنات بنكرههم فى نفسهم .

ونحسسهم ان الاعضاء الجنسيه دي حاجه وحشه ويع ومقرفه ومافيش مانع جالبه للعار . وبالتالي البنت بتكره الفرج وبتعتبره مصدر للقرف والعار وقلة الادب وكل حاجه زفته فى الدنيا

وطبعا بما ان العلاقه الجنسيه بتتم من خلال العضو ده يبقى العلاقه الجنسيه هى كمان زيه بالظبط .

النقطه دي بقى معناها ايه ؟ معناها ان المرأه دي عندها مشكله ناحية جسمها .مش متقبلاه اصلا .

رابعا : الختان . بصوا هو الختان ممكن يكون مؤثر لكن فى حالات الختان الجائر

يعنى لو كان الختان عباره عن خفض فقط ( ازاله جزء صغير من البظر ) ده مش ممكن يكون هو المتهم الاول فى البرود الجنسي خصوصا لو ما كانش معاه خبرات سيئه بالم وخوف وما الى ذلك

لكن طبعا فى انواع ختان جائر زي الى موجوده فى وسط افريقيا مثلا الي اصلا بيشيلوا كل حاجه ( البظر بالكامل والاشفار الداخليه والكل كليله . فى الحاله دي طبعا نقدر نقول الختان متهم اول

قبل ما نقول ايه الى ممكن نعمله

فى نقطه احب اوضحها هو ان فى فرق بين

واحده بيحصلها متعه اثناء العلاقه الجنسيه مصحوبة بإحتقان للمنطقة التناسلية لكن لا تستطبع الوصول للرعشة الجنسية

ودي ما بيكونش عندها برود ولكن بيكون عندها فشل فى الوصول للذروه او الرعشه الجنسيه

اما لاسباب نفسيه عندها زي الى احنا قلناها فوق او ختان او غيره او لسبب متعلق بزوجها عضويا (زي سرعة القذف او ضعف الانتصاب )

والتانيه الى ما بيحصلهاش اى احساس بالرغبة او اللذة الجنسية هى دي بقى الى احنا بنتكلم عنها الى ما بتعرفش اصلا تبدأ العلاقه الجنسيه ولا بتتاثر بها ودي الى بنقول عليها عندها برود

ايه بقى الى ممكن نعمله

اولا: ارجوووووووكم يا ناس عملوا بناتكم صح ادرسوا تربيه جنسيه صح وبطلوا تبوظوا دماغ البنات ارجوكم
فى النهايه بيتجوزوا برضه من رجاله انتم الى ربتوهم على احترام الشهوه وحب الاعضاء الجنسيه والتفاخر بها . ازاي يعيشوا مع بعض كده ؟؟!!!

احنا حتى عندنا فى دينا احترام للشهوه والعلاقه الجنسيه والقرآن نفسه اتكلم عن العلاقه الجنسيه والسنه النبويه بتحض عليها فى الحلال طبعا

ثانيا : كل بنت او ست قرت كلامنا ده النهارده تحاول تعرف مشكلتها ايه فيهم وتحلها مع نفسها ومع جوزها ولو ما قدرتش ما تترددش ابدا تروح لدكتور وان شاء الله ربنا بايده الشفا

ثالثا : الازواج : خماشر خط هنا يا رجاله تحت كلمة الازواج
ارجوكم بلاش اول ما تتجوز تلاقي البنت مش متجاوبه معاك يقوم يخطر على بالك على طول البرود من الكلام الى سمعته من اصحابك الى مالهمش لازمه هنا خالص
وتلزقها الكلمه فى وشها وتقنعها انها انسان انوي احادي وغريبه وبارده وكده يعنى

اقرا كده كمية العقد الى فوق الى هى اتساقتها من المجتمع ده واشفق عليها وحاول انك تخليها تعدي المشاكل دي
ولو ما قدرتوش ارجوكم تروحوا لدكتور هو الى يقرر هى عندها ايه ويعالجها ما تصدرش عليها الاحكام من قبل ما تروح للدكتور

وارجوكم ده يكون من الاول كل ما الحكايه بتقدم بتكبر المشكله

التراكمااااااات

اها هى كارهه العلاقه وانت بتصر على العلاقه ومش مدياك الى انت عايزه ماهو مش على مزاجها بالتالي بالتالي بتبدأ سلسلة من التصرفات الغبيه المتلاحقه والمتلاطمه بين الزوجين ويقرفوا فى بعض على جميع الاصعده وتبوظ الليله كلها

ارجوكم الى عنده مشكله يحاول يحلها

الوضع الطبيعى هو ان العلاقه الجنسيه دي متعه مشتركه بين الزوجين الاثنين بيرغبوها ويستمتعوا بها من غير الم يذكر ولا استنكار منهم
فى حال اختلال الوضع ده لازم يجروا يحلوا المشكله لو ما قدروش لواحدهم يبقى الاطباء المتخصصين موجودين

ارجو ما اكونش طولت عليكم

ونداء عاجل لسنترال اكتوبر والنبى صلحوا النت لعمرو اصل انا لوحدي هنا محتاسه وباخر البوستات

والف شكر لدكتور عباس على مساعده فى البوست ده

و الى هو كمااااااان مش فاضي وهايسبنى احتاس لوحدي بوستين على الاقل

الفرمونات الجنسيه (Pheromone)

2009-10-31T18:06:00.001-07:00

فى الاول باعتذر عن تاخير البوست غصب عني والله

وكمان باعتذر عن غياب عمرو بدر بالنيابه عنه لان عندهم عطل فى النت فى السنترال بتاعهم كله

واتمنى على الله ان النت بتاعه يرجع وهو فى اتم الصحه والعافيه ان شاء الله

ونشوف الموضوع بتاع النهارده بقى

هانتكلم النهارده عن الفرمونات الجنسيه

انا باحاول بقدر الامكان موضوعاتنا تكون مرتبطه بتعليقاتكم السابقه واميلاتكم الى بتجينى

بحيث تكون معبره عن مشاكل اكتر الناس

فى الموضوع الى فات كان فى سؤال سألته لنا على الردود وحده من قراء المدونه وقالت ان جوزها بيفضل يقذف خارج المهبل وده بيضايقها

وسألت سؤال جميل جدا هل الاشباع عن المرأه مرتبط بالسائل المنوي ولا هى بتتوهم ذلك؟؟

الحقيقه انا شايفه ان اه طبعا مرتبط

هاقولكم نظريه حلوه أوي هى لسة حتى الان مش مثبته بشكل علمى نهائى

بس بصراحه هى نظرية تبان منطقية جدا ورمانسية جدا فى نفس الوقت

النظريه دي بتقول إن في حاجه عند البنى ادمين اسمها الفرمون الجنسى او الروائح الجنسية

الفرمون (Pheromone) هي عبارة عن مادة كيميائية تفرزها الكائنات الحية ـ مش بس البنى ادمين ـ في النوع الواحد بهدف ارسال رسائل خاصة بين الجنسين

والفرمون ده بيكون ريحه مميزه للشخص سواء ست او راجل

وهو مرتبط بالعمليه الجنسيه وبيفرز فى حال الاحتياج للجنس او حتى اثناء العمليه الجنسيه نفسها و بيبقى ليه تاثير مباشر فى الانجذاب الجنسى بين الرجل والمراة

بالنسبه للست بيظهر الفرمون فى جسمها عموما من خلال العرق وكمان من خلال المهبل
وبالنسبه للرجل بيكون متركز اكتر فى السائل المنوي والذى يعطيه جزء كبير من رائحته المميزة

ايه بقى بيحصل للسائل المنوي بعد ما يقذف به الرجل الى مهبل المرأه ؟

ده بناءا على النظريه الى احنا بنتكلم عنها

الرجل بمجرد القذف بيكون انفصل عنه السائل المنوي خلاص وبتكون انتهت بالنسبه له العمليه الجنسيه

الست بقى لا موضوع تاني بتكون فى الوقت ده بتبدأ مرحله جديده من العلاقه

وهى استقبال المهبل او الجسم ككل للسائل المنوي

النظريه بتاعتنا بتقول ان المهبل بيستقبل السائل المنوي ده ياخد منه الحيوانات المنويه عشان عملية التلقيح

اما السائل المنوى فتخرج الكمية الزائدة منه و الباقي الى بيمتصه جدار المهبل وينقله لدم المرأه

ومن دم المرأه بقى ياثر على كامل جسمها حتى ان ريحة نفسها بتتغير ويكون فيها ريحة تشبه مني الرجل فى خلال ربع ساعه من القذف تخيلوا ؟؟؟

لا وايه كمان ده فى شويه كده حلوين يطلعوا على المخ ياثروا فى كمياء المخ كمان

ايه رايكم فى التفاعلات الخطيرة وتاثيرها الكبير جدا على المرأه فى الوقت القصير ده بعد العلاقه

بس خلوا بالكم النظريه دي مبنيه على اساس وجود علاقة متكاملة بين رجل وامراة بيحبوا بعض وبيتواصلوا مع بعض يعنى عن علاقه جنسيه ناجحه بالفعل الطرفين فيها مستمتعين فعلا .

والنظريه دي بتفسرلنا ليه كتير من الزوجات بيشتكوا انهم بيضايقوا من ان الرجل بعد العلاقه مباشرة بيبتعد عنها بتكون هى جواها حرب شغاله من جميع النواحي ولسه العمليه الجنسيه فى مرحله مهمه جدا عندها

وهو يديها ظهره واووووووخخخخخخ او يتفرج على التلفزيون مثلا وهكذا

من المهم اوي بعد العلاقه تفضلوا سوا وتفضل هي فى حضنك كمان

المرحله دي من العلاقه مهمه جدا

اعتقد كده احنا عرفنا اجابة السؤال هل مهم ان يقذف الرجل داخل المهبل ؟

اكيد طبعا مهم وبمنعه بتكون العمليه الجنسيه تعتبر مبتوره وناقصه مرحله مهمه اوي

فى هذا الوقت مطلوب منه يحتوى الزوجه فى وقت مهم اوي بعد العلاقه وبتتم فيه تفاعلات مهمه جدا داخل الجهاز التناسلى للمراة وجسمها عموما من شأن التفاعلات دي انجاح العلاقه بينهم بصوره عامه

ارجو اكون افدتكم فعلا

والف شكر يا د. عباس على مساعدتك ليا فى البوست

(كتبتها تاني عشان تبقى تمسحها بقى ) نيهاهاهاهاها

واي حد يحب يضيف حاجه ياريت تتفضلوا

نصائح للرجال

2009-10-24T14:41:00.000-07:00

بداية احب اقول لدكتور عباس الاول نووووورت البلوجر ونورت المدونه

عشان احنا بقى لقيناه رجله مش عايزه تيجى ابدا فى البلوج ويعمل مدونه اضطرينا ناخده عنوووووه ونضمه لفريق المدونه عشان يفضل منورنا ان شاء الله طول
ومتشكره اوي لك يا دكتور عباس يا منورنا

نيجى بقى لموضوع النهارده

كنا اتكلمنا قبل كده عن نصائح للستات تقدر تحاول بها انها توصل لتوافق

الحقيقه هو الطرفين تقريبا مطالبين بنفس الحاجات بس انا فى النصائح دي باتناول النقط الاكثر اولويه والى كمان الطرف المقصود بالنصيحه بيكون غافل عنها احيانا

بمعنى ان النصائح الى انا هاقولها النهارده للرجاله هى كمان برضه للستات بس تاتي فى الاولويه بعد النصائح الى انا قلتها للستات المره ا لى فاتت

وكمان العكس
الى قولناه للستات ينفع برضه يكون للرجاله بس بعد الى هانقوله النهارده

اهم تاهو مني ومش فاهمين حاجه

طيب خلاص ركزوا بقى نقول للرجاله كلمتين يحطوهم حلقه فى ودانهم

اولا : اعرف ان الست اهم عضو جنسي عندها هو دماغها . ايووووووه اثر انت على دماغها يبقى كله تمام بعد كده

بمعنى لازم تكلمها تعرف افكارها من ناحية الجنس (ما تكونش عندها عقد نفسيه مركبه من الى عند تسعين فى الميه من بنات الشعب بسبب تربيه خطأ او غيره)

وبمعنى انك تقول كلمه حلوه وتحسسها بانوثتها قبل ما حضرتك تحس بفحولتك اثناء العلاقه

ثانيا : ما تستعجلش بالراحه من فضلك
سواء ان كنت عريس جديد ولسه مكسوفين ومش عارفين السما من العما (مهما كنتم فتكين برضه مش عارفين مش عايزه فزلكه ) وطبعا حاول تفهم ان العروسه ما ينفعش تنفذ عليها ال 500 فيلم الى انت شوفتهم يا بطل . ما ينفعش اصبر وواحده واحده قدامك 30 سنه وجايز 50 انت وظروفك بقى
جرب فيهم كل حاجه بالراااااااحه يا معلم

ولو كنت مش عريس جديد ومتجوز بقالك خماشر سنه بس طلعت فى دماغك تغير حياتك
انت بقى مش بالراحه لااااا انت سلحفاه ماشيه على الارض
خد بالك انت هاتهد جبل من الجليد اتبنى بينك وبين مراتك لو سيحته مره واحده هاتغرقوا فيه
وجوه الجبل ده بقى فى كل سيخ حديد واخوه ( اه غباوات من الطرفين متراكمه ومرشوقه فى حياتكم )
يبقى برضه واااااااااحده واحده ما تتخيلش الى بنتوه فى عشر سنين مثلا تهدوه فى يوم ولا شهر حتى

ثالثا : نقطة اشتكت منها ستات كتير ان لما كون زعلان مع مراتك من فضلك بلاش تجامعها الا لما تتصافوا لان ده بيجرحها جدا . وتبدأ كتاكيت بقى تلعب فى دماغها ( ده كل الى يهمه السيكو سيكو ده بيعاملنى كانى جاريته ده مش معبر احساساتي .... والخ الخ الخ )

وطبعا هذه الكتاكيت ينتج عنها تصرفات غبيه منها يقابلها تصرفات اغبى منك ونبدأ فى سلسلة غباوات بقى تبوظ الدنيا كلها
انا عارفه ان فى رجاله احيانا بيعتبروا ان العلاقه نفسها هى الصلح ودي حاجه ما قابلنيش ولا واحده ست بتقبلها
جايز فى وانا ما اعرفهومش

رابعا : الخجل خلينا نقول ان اكتر الرجاله بيكون عندهم استعداد اكتر لكسر الخجل وساعات بيبقى ما عندهمش منه خالص مش مشكله
انما مواجهه بقى خجل الزوجه يا افاضل بالرااااااحه بالهدوء وبالصبر

قبل ما تفكر انت ازاي تتجرأ علمها هي تتجرأ عليك بس وهى فى حضنك مش بالعصايه
ما تبقاش فظ
تجرأها على ايه ؟
جرأها على التعامل معاك جسديا بالراااااحه وواحده واحده جرأها تتكلم وتحكيلك عن خبراتها وما كانت تعتقده وعن احساسها
وابدا انت واتكلم عن نفسك وهى هاتعمل زيك شجعها دايما تقول وتقول وتقول

اتكلموااااااااااا

خامسا : خليك واثق فى نفسك وبلاش الهسهسات المختلفه الى بتكون عند الرجاله من يوم ما يتولدوا بسبب نخع الرجاله على بعض والفرجه على الافلام الاباحيه المبتذله

خلينا لما يبقى يقابلنا مشكله نبقى ندور على حلها مش نتوقعها اوانطه ونخسر ثقتنا فى نفسنا
وفى نفس الوقت لو عندك مشكله روح عادي اتعالج مش عيب ولا حاجه والله

وحاول تتعلم وتقرا واعتبر نفسك انت مايسترو الموقف كله على الاقل مؤقتا

سادسا : اعمل حسابك انك متجوز كتله من العقد النفسيه تابعه للعمليه الجنسيه ( ده غالبا ) فى مجتمعنا كمصريين بالذااااات البنت دماغها بايظه خالص من ناحية الجنس سواء التربيه من الاهل
او الافكار الى اتساقتها من الاعلام وحرية المرأه والحب الافلطوني والماديه البشعه وهذا الهبل الي ملوا بيه دماغ الخلايق
فبراحه كده وحاول الاقناع بالدين والعلم والعقل وقبل ده كله بالحب

سابعا : الحب
الرجاله ممكن يعملوا علاقه جنسيه من غير حب من غير ما ياثر ده على نفسيتهم
الستات غالبا (مش دايما ) الوضع ده ما ينفعش معاهم حط ده فى اعتبارك لو سمحت
والحب ما ينفعش يبقى افعال بس يا اخينا والكلام بتاع مش محتاج اقول عشان تعرفي

لا بقى محتااااااااااج

وكفايه كده اوي عليكم انا طولت عليكم اوي

والى يحب يزود حاجه يتفضل يزود

يا ستات قولوا الى فى نفسكم عشان الرجاله يسمعوكم