بسم الله الرحمن الرحيم
نفتتح جلسة البعبعه الجديده
هانتكلم النهارده عن الضرب .
لا مش ضرب الادمغه
لا لا
عن الضرب الضرب الى هو حد يضرب حد
انا عن نفسي شايفه ان اسلوب غير آدمي بالمره
وانه تصرف لازم يصدر من حد غبي وضعيف كمان
ضعيف الشخصيه يعنى
ممكن حد فينا يكون اتعرض للضرب من اي حد
من ابوه من امه من جوزها
من مرااااته ايوه ايوه بتحصل والله
عندنا فى دينا الضرب ده فعلا مش موجود
الا ما ندر
زي مثلا ضرب الزوج لزوجته والى الرسول فسره انه يضرب يعنى تهويش مش عجن وخبط وبونيات
اوبالنسبه للاولاد فوق العشر سنين برضه نفس الموضوع
وكان حتى رسول الله يأمر المسلمين انهم يتقوا الوجه فى الضرب حتى فى الحروب
تخيلوا الجمال بقى
عشان كده اكتر حاجه توجع بتهيئلي الضرب بالقلم على الوش
+++++++++++++++++++++++++
فاتفضلوا بعبعوا فى هذه الناحيه
وقولولنا مين ضربك؟؟
وليه ضربك؟؟
وانت كان رد فعلك ايه؟؟
وبتتمنى ايه بخصوص الموضوع ده؟؟
ويا ترى هاتسكت للي هايضربك بعد كده ولا هاتعمل ايه ؟؟
على فكره انا هاجاوب معاكم تحت فى الردود وهامضي باي اسم
ياريت الى يكتب بغير معرف يكتب بس اي اسم حركي عشان اعرف ارد عليهم
واي حد عايز يقول حاجه غير الى انا كاتباه يقول
شكرا لكم جميعا
هناك 36 تعليقًا:
اووووووووووول تعليق وباسمي مش بحب استخبي
الضرب
اولا انا مش بحب الضرب خالص
وبجد بنجرح اوي لو شفت حد بينضرب
وبتخنق اوي ويمكن بتقتل
من وانا صغيره المدرسين والمدرسات عارفين اني بخاف من الضرب
اول مس جربت تضربني كنت في تالته ابتدائي ولففتها المدرسه والله العظيم ومش ضربتني
كان في مس مشهوره اوي بالضرب جتلنا اسبوع وبقيت بترعب لتضرب زي مابسمع من العيال لكن بعد اسبوعاتنقلت من المدرسه وفي ثانوي في مدرس ضرب الكلاس كله المهم جه عندي واصر يضربني قلتله وديني للمدير ومش تضربني المهم اصريت مش اتضرب وهو اصر اتضرب
وضربني عصايه واحده ادي زي مااكون اخدت فيها بنج مبقتش حاسه باي شي حتي يمسها وبقيت مش بتكلم لدرجه انه اتخض لاجبله مصيبه المدير كان عارفني وكان ده اخر يوم للمدرس اولا لاني كنت بزاكر وقت اما لاقي الفصل دوشه
وببقي في اول دسك وثانيا لان المدير كان لسه مكرمني لاني كنت الاولي علي المدرسه في ماده الرياضه
وثالثا لان هو مش مدرس الفصل ورابعا لانها مدرسه خاصه والمدارس الخاصه الطلبه بتكون اهم عن المدرس
ده الحالتين في المدرسه اللي بكرهه بجد العنف في المدرسه واللي زاد دلوقتي
*************
العنف في البيت
بابا احن انسان عليا ويمكن عشان انا البنوته الاولي والدلوعه واقرب واحده ليه مش ايده عليا قبل كده
اما اللي بجد لايمكن انساه لحد الان
اخويا برغم اني بحبه وانا وهو نعتبر توائم لانه اصغر مني بسنه وعلطول كنا سوا
لكن في يوم لاقيته بيتخانق مع ماما عشان في بنت هو طلبها من اهلها بس من غير مايقولنا وماما بتتخانق معه عشان كده المهم ساعتها قالها هسيبلك البيت وهي بتحوشه لقيته هيمد ايده عليها ودي امي
فجريت اقف بينهم عشان مش في حاجه تيجي في ماما ويعدها يندم واخدت الضربه انا وساعتها اغمي عليا لانها كانت في بطني ومقدرتش اتحملها محمد ماشاء الله عريض المنكبين وطويل
وانا بالنسباله فار ثفروته
اينعم المشكله اتحلت لكن ماخبيش عليكي الموضوع مازال اثاره جوايا
ويمكن من اللي بسمعه عن امتجوزين ان في رجاله بتضرب مراتتهم عاوزه اختار انسان يكون فاهم يعني ايه كلمه "رفقا بالقوارير"
انا من النوع ان نظره العين تقتلني مابالك ان حد يحاول يضربني اكيد اكبر اهانه ليا
كيارا نورتي يا حبيبتى وشكرا لكى على البعبعه الحلوه
ده نورك انتي ياقمر ;)
كيارا ممنوع التخمين
سوري انا شلت التعليق
وبعدييييييييييين
ههههههههههههههه
خلاص خلاص انا اسفه اني خمنت
ههههههههههههههه
بس من غير وبعديييييييييييين كيكيكييكييكيك
بعبعة
في الاول لازم علشان اعرف اتكلم لازم اعرف اللي بكلمه ده ولد ولا بنت
علشان لو بنت اقولك يا اختشي و كده
يعني اعرف اوجه كلامي لبنت بصيغة المؤنث
و لو ولد اتلم شوي في الكلام
و اتكلم معاك بصيغة المذكر
انا معاك او معاكي في الحق في اخفاء الهوية
طبعا موضوع ان الكاتب ولد ولا بنت مش هيغير من مصداقية المدونة
لانها باين عليها مدونة دمها خفيف
لكن ده ضروري
و حتي لو حصل كدب في موضوع النوع(ولد او بنت) ده فيكون الكداب هو اللي عليه الغلط
اظن ده اقل حق لينا هنا
انا اسفة يا بعبعة
بس انا علشان اعرف اتكلم مع مدون معرفوش لاول مرة لازم اول حاجة اعملها اروح عند الوضع الخاص بيه علشان اعرف اذا كان كبير احترمة و اقدرة زي الكبار ولا من سني ممكن اتباسط بعاه بالكلام
و بعبعة تمشي راجل و ست
و انا ماحبش اللخبطة
انا مش بحب حكايه الضرب دى نهائى
تقريبا كده معقده
بابا الله يرحمه كان من النوع الشديد وكان اسهل حاجه عنده الضرب
علشان كده اما كبرت شويه خصوصا انى اتجوزت صغننه نوعا ما قررت انى امنع حكايه الضرب دى نهائى بينى وبين جوزى
طبعا المدونه وصاحبتها دمهم عسل
تقبلى مرورى
بعبعه حبيبتى
قبل ما اعلق على الموضوع سوري يا جميل انا امبارح لبخت الحياه خالص وكنت فاتحه مدونتك وفتحتها اعلق وفى نفس ذات الوقت كنت فاتحه مدونتي وكيارا معلقه عندي وعندك فى نفس الوقت سريعه اوي البت هاوريها
مش عارفه ايه الى حصل بس انا لقيتنى راده على كيارا عندك
انا جيت اشيل تعليقى لقيتك شلتيه
المهم ايقنت ساعتها انى خلاص هيست وهنجت وقفلت ونمت
نعلق بقى على الضرب
انا معاكي تماما فى حكاية انه غيرآدمي ودي كلمتي على طول
وبالنسبه ليا انا ما حدش يقدر يضربني حاليا اعوره على طول انتم عارفين انى باشيل موس فى بؤي ههههههههههههههههههه
اما زمان فى المدرسه برضه ماكانش فى ضرب الي هو يذكر يعنى عشان اناكنت فى مدرسه خاصه زي البت كيارا الى بيغمن عليها دي
بسكوته انتى يا كيارا ههههههههههههه
لكن كان عندنا مدرسه مرعبه بتاعة انجلش ههههههههههههههه
كانت بتضرب بجد بفظاعه بص ما حصلتنيش عشان انا كنت شاطره بس طبعا كنت باترعب منها
وكفايه كده بقى
الموضوع فعلا جميل
فلازم ادخل بإسم زي مقولتي
والصراحه الصراحه يعني والصراحه راحه
انتي جيتي علي الوتر الحساس للاسف
لا وايه دوستي بكل قوه
أنا من الزوجات اللي بتعاني من الضرب
ودخلت كل اهلي وكل اهله علشان ينصحوه لدرجة اني دخلت أهل ناس صحابي
حتي امه ( عنت من الضرب كتير برده )والله قالتله يابني مفيش حاجه بتكره الست في جوزها قد الضرب
ولكن لاحياة لمن تنادي
وطلبت الطلاق وصممت عليه وللعلم انا اطلقت بالفعل مره بعد مضربني ضرب مبرح
وكل مره اشتكي اقول عايزه جوزي يحترمني
ويبطل الهزار بالايد والضرب والشتيمه بالالفاظ اللي انا اتربيت عليها قذره
وحتي لو انا وحشه فانا عايزه جوزي يعملني كويس وعايزه انا اكون احسن
ولكن برده لاحياة لمن تنادي
ودخلت في المشكله شيخ علامه يلقطن بالمحدث
ربنا يكرمه
وفعلا مع مشاغله في الدعوه الكبيره كلم زوجي وفهمه
وبصراحه الشيخ برده كلمني وفهمني حاجات كتير كنت فهمها غلط
والحمد الله دلوقتي مفيش الكلام دده
بس يارب يكون فيه استمرار
لحسن جوزي ده كل لما اجي اعمل مشكله علشان حاجه غلط بيعملها وغالبا بتكون طريقته والفاظه وضربه بيتصلح لمدة شهر او شهرين وترجع ريمه لعادتها القديمه
ولسه الشهرين معدوش
بس وربنا وربنا لو فضلش كده بعد اللي بعمله ده
مهرجع عن الطلاق لو كان مين هيدخل
وقد اعذر من أنظر
موني
على فكره انا مش مخبيه شخصيتى اوي وعموما يا ستى انا مؤنث
وانا هابقى اعمل البروفايل بتاعي بس نسيت والله
بس انا عايزاكي تدوسي فى الكلام ولا يهمك ولا سن ولا نوع
بعبعييييييييي
حنين
معاكي حق احيانا الابهات بينسوا نفسهم
وبيطلعوا عصبيتهم على ولادهم ويمكن ده حصل معايا برضه
وعندي علامات فى الذاكره لا تمحي ومؤلمه للان لكن ما زلت باحب بابا واحترمه ونفسي انسى
وتحياتي ليكى
صبرني يارب
ولا يهمك انا كنت هنا وخدت بالي
حصل خير
وبالنسبه للمدارس نتمنى ده ينتهي منها
مش عايزين العيال تترعب عايزينهم يحبوا المدرسه والتعليم حقيقى مش كلام بس
توته
اهلا وسهلا
ايوه عايزه انا الاسامي المبهمه عشان بجد تتكلموا براحتكم
المهم
طبعا الضرب مالوش مكان ابدا بين الازواج ومش طريقه للتفاهم او الردع تماما
وعندك حق اه انك تقولي اطلق لو ما اتعدلش
لكن انتى بتقولي انك انتى كمان عندك اخطاء وبتحاولي تصلحيها
انصحك تصلحيها قبل ما تخدي اي قرار
لانك لو صلحتيها ممكن هو نفسه يتصلح
وعمرك ما تقدري يكون بيتك وجوزك وولادك كويسين من غير ما تكوني انتى الاول كويسه
وحاولي المشاكل بتاعتكم ما عادش حد يدخل فيها بينكم احسن
المهم يكون فى لغه حوار بينكم ومعادله صحيح تتعاملوا بها مع بعض
وربنا يوفقك ويهدي الاحوال ويصلح ما بين اديكم
أنا أنضربت مره واحده فى حياتى و أنا صغير من مدرس العلوم بالقلم
و كل ما بأفتكر الموقف ده لحد النهارده بأشعر بنفس الألم و الاٍهانه علشان كده عمرى ما ضربت أولادى و لا أولاد أى حد و لا حتى ضربت حيوان أو زرع أو أى شىء فيه روح ما عدا الناموس لأنى بأكرهه أكتر من العمى
الضرب عمره لا بيربى و لا بيأدب بالعكس
الضرب بيعمل اٍنسان مهان و معقد و ظالم كمان
توته
مهما أوصف لك مدى الألم و الغضب اللى شعرت به بعد ما قريت حكايتك مش حتتصوريه
يا سيدتى أنتى من الأول غلطانه
و فى الآخر برضو غلطانه
غلطانه أنك تزوجتى بشخص واضح أنه غير مهذب و معقد و مش متربى أصلا لأن مافيش راجل متربى و أبن ناس يشتم زوجته بألفاظ قذره أو يمد أيده عليها و المفترض فيه أنه بعد أبوها يحافظ على كرامتها و يصونها من أكبر لأصغر شر
ما تقوليش يا سيدتى أنه ماكناش باين عليه قبل الزواج أنه أخلاقه بهذا الاٍنحطاط
يعنى مش كان فيه فترة تعارف أو خطوبه أو شبكه أو كتب كتاب ؟ بلاش كل ده يعنى مش كنتى بتشوفى أهله بيتعاملوا ازاى مع بعض ؟ مش كنتى بتشوفيه هو نفسه بيعامل أهله ازاى
يلعن أبو الحب اللى يخللى البنت تتغاضى عن عيوب بالشكل ده فى زوج المستقبل
و غلطانه كمان يا سيدتى أنك رجعتى له بعد الطلاق
يعنى ربنا رحمك منه و أتطلقتى تروحى راجعه له تانى ؟؟!!
أيه كلام المجانين ده ؟؟
و صدقينى صدقينى عمره ما حيتغير و عمره طبعه ده ما حيطلع منه اٍلا بطلوع روحه
بصراحه مش قادر أفهم اٍزاى شحط بشنبات يضرب مراته و بعدين يصالحها و يرجه ياكلوا من طبق واحد و يناموا على مخده واحده ؟ اٍزاى يعنى حد يفهمها لى دى
تصور يا استاذ عمرو
انا كمان دايما اسأل نفسي السؤال ده
باقول ازاي بعد الضرب والشتيمه وقلة الادب وقلة القيمه دي
بيعيشوا مع بعض تاني عادي ولا كأن فى حاجه
بتهيئلي ما يقدرش يعمل كده سوري يعنى الي يستاااااهل كده اصلا
ولا زلت دايما اقول ان كل فشل فى العلاقه سببها الطرفين حتى لو كانت بسلبية طرف واحد منهم فى مواجهة اخطاء الطرف التاني
وباقول لتوته الى يمكن يكون رجعتله عشان ولادها مثلا او عشان بتحبه ولو انى مش عارفه اي حب الى ممكن يكون
الا انها رجعت بالفعل
لازم تكوني تقدري تمسحيى الى فات عشان تقدري تبدأي من جديد
ولو ما اتغيرتيش انتى لو سبتي جوزك ده واتجوزتي غيره برضه هايضرب
وكذلك هو لو ماا تغيرش لما يتجوز واحده تانيه هايضربها
يارب يسعد كل الناس
بعبعه هاتعمل قلق فى البلوجر باين
هههههههههههههههههههههه
هقولك ايه انتى بتضربى علينا المواجع ليه
موضوع الضرب انا كنت كاتبه عليه بوست قديم فى مدونتى اسمه
فلسفة الضرب والطرح والقسمه والنصيب
بس هو بس عن ضرب الزوجات
وانا همشى بئه عشان مش حابه ااقلب فى المواجع دلوقت
بس شكرا على زيارتك الجميله اهى عرفتنى بيكى يا بعبعه نورتى البلوج يا جميله
ويا رب دايما
انا طبعا هرد علي الاستاذ عمرو والاستاذه صبرني يارب
انا مرجعتلوش علشان بحبه خالص والله
بس انا كنت حامل
وكل الناس بلا استثناء قالتلي جربي تاني اكيد هيتغير
وخصوصا انيانا واهلي طلعنا محترمين جدا معه وماتخذناش اي اجرأ معه
لاوحش ولا حلو
وهو اللي رجع ودخل كل اللي اعرفهم من قريبي علشان ارجع
ورجعت
اما بخصوص انه كان باين عليه او لا
هو كان باين علي ابوه وعليه مع اخته
بس امي قالتلي يابنتي ده متدين وعارف ربنا ولحيته في وشه قد كده
ومبيفوتش فرض في المسجد وبار بامه وابوه جدا
اكيد عمره مهيمد ايده عليكي
واكيد اخته ديه حاله خاصه
وفعلا فتحت معه الموضوع بعد كتب الكتاب
وكنا ساعتها علي ضفاف النيل
وطلبت منه انه اني هتفق معه اتفاق قدام اخوه الكبير اللي ساكن معانا في البيت
فلما سئلني اشمعني اخويا قولتله علشان هو اللي هتحامي فيه منك لما تمد ايدك عليا
والله والله والله
بكي بالدموع
ويقولي تتحامي في اخويا مني
وسعتها قولت مستحييييييييييييييييييل اللي بالمنظر ده ممكن يمد ايده عليا في يوم
لكن كان للأسف لابسط حاجه ممكن تتحل باي طريقه تانيه كان بيستسهل مد ايده
( لانها الطريقه الاسهل والاسرع واللي يعرفها
ده كان توضيح بسيط علشان اللي شتمني بإسم اني رجعتله علشان الحب
عمرو
طبعا زي ما انت قلت كده الضرب مش بيعلم ابدا
بالعكس الضرب بالشكل ده يعمل انسان جبان
ده حقيقى
والضرب الى ذكر في القرآن والاحاديث
ابدا مش هو الضرب الى على الوش ولا الضرب المبرح ولا الموجع بالشكل ده
شكرا لك
عمرو
انا معاك في كل الى قلته الا فى حاجه واحده انك شتمت على جوزها
الضرب مالوش اي مبرر يخليه صح الا اننا برضه نحاول ما نغلطتش فى الناس احنا سمعنا منها لواحدها
لكن باكرر الضرب مش ممكن يكون كده ولا بين الازواج ولا يمكن يكون له اي مبرر حتى لو كانت عملت فيه ايه
ما يكونش الضرب كده ابدا
صبرني يارب
معاكي فى كلامك كله تقريبا
بس مش هانعمل قلق ولا حاجه يا ستي
ولا ينعمل ولاااااا يهمنا
محاسن
انا اسفه يا جميل معلش مين فينا ما عندوش مواجع
معلش
ربنا معاكي
توته
طيب لما أنتى جاوبتى على سؤالى أهو و بتقولى أنه كان شرس مع أخته قبل ما تتجوزيه يعنى يا ست توته لما يبقى شخص شرس و بيضرب أخته اللى هى حته منه و الأتنين من بطن واحده يبقى اٍزاى فكرتة أنه يمكن حيبقى كويس معاكى أنتى يا غريبه عنه ؟؟
و بعدين لحية أيه و مساجد أيه ؟ ده مالوش دعوه اٍذا كان الشخص حقير أو لأ راجل بجد و شهم و لا نطع و بيضرب ست ضعيفه و بعدين منين بتقولى لحيته قد كده و فى نفس الوقت بيشتمك شتائم قذره ؟ هو ما سمعش فى المسجد اللى بيروحه اٍن الصلاه بتنهى عن الفحشاء و المنكر و البغى ؟ و أهو عمل التلاته
و بعدين كمان أنتى غلطانه أنك أصلا تحملى من مثل هذا النطع اللى بيشتمك شتائم قذره و بيمد أيده عليكى و بيضربك لأتفه الأسباب ضرب مبرح زى ما بتقولى يعنى كان لازم تحطى فى ذهنك أن مثله لابد و سيأتى يوم و تطلقى منه و أهو حصل فعلا و بعدين رجعتى له علشان حامل !! يا حلاوه
كده اٍبنك و لا بنتك حيطلعوا معقدين و قساه و عالبا أبنك حيعمل فى مراته نفس اللى شاف أبوه بيعمله فيكى علشان ينتقم لك فى شكل مراته بصوره لا شعوريه و لو بنت فحتستعذب الضرب من جوزها و يمكن تطلب ده منه علشان تشاركك الأوجاع برضو بطريقه لا شعوريه يعنى جنيتى عليهم برضاكى عن مماراساته الغبيه نحوك
بصراحه أنا متغاظ منك يا توته و باين عليكى كده تستاهلى كل يوم علقه
بعبعه
ما أعتقدش أبدا بصراحعه اٍطلاقا أن الضرب فرض لأنه ورد ذكره فى القرآن !!
غريبه .. اٍذا كان الرسول عليه الصلاة و السلام قال رفقا بالقوارير و هو طبعا لا ينطق عن الهوى يبقى اٍزاى نقول اٍن الضرب للزوجات أمر اٍلهى ؟؟!!
دى حاجه
الحاجه التانيه أنا ماشتمش جوزها .. لأن الشتم هو أنك توصفى شخص ما بألفاظ ليست من صفاته .. و أنا قلت أنه عديم المرؤه و مش متربى و قليل الأدب و نطع يس كده
و كل الصفات دى موجوده فيه فعلا يعنى أنا ما قلتش عليه شىء زياده و لو أنه يستحق كده فعلا ..
عارفه .. أتمنى من كل قلبى أنه يقع فى واحد أقوى منه جسديا و يرنه علقه يعرف بعدها معنى الاٍحساس بالمهانه لما واحد قوى يضرب واحد أضعف منه
كله اْلا الضرب و اٍهانة الزوجه لأنها ضعيفه و لا حول لها و لا قوه
اممممممممممممم
موضوع لا يسعدني اني اتكلم فيه
لاني يذكرني بذكريات تعيسه!
مرت ابوي كانت وايد تضربني
على اقل مشكله وعلى اتفه الامور
طاااااااااااااااخ
لا يا ليت بس كانت تكتفي بهالشي
امممممممممم
وما خفي كان اعظيم
ما قتلج هالموضوع ما احب اتكلم فيه!
يلا ما عليه
المهم اني شاركت
سي يو فتدوينه يديده
تكون تتكلم عن شي حلو
مثلا,,الايس كريم :)
عمرو
هدي اللعب بليز على توته
توته حبيبتى وانا عايزالها كل خير
وعفوا انا شايفه ان كل قصه لها جوانب كتير ومش باحب التسرع فى الرد وده انا قلت عند كريم وغيره
امابالنسبه للضرب
فأنا اقصد قول الله تعالى فاضربوهن
سامحني مش فاكره رقم الايه
لكن طبعا هى مش معناها ضرب علقه ولا كده
وفى حديث صحيح للرسول فى تفسير الايه برضه مش فاكره نصه لكن هادورلكم لو حبيتوا
بيقول ان الضرب هنا كضرب بالمسواك يعنى تهويشه يعنى مش ضرب ضرب
وكمان حديث رسول الله صلى الله عليه وسلم
علموهم فى السابعه واضربوهم فى العاشره
الضرب برضه مش معناه عشان تعلم ابنك الصلاه ولا الصيام انك تديه علقة موت
زي الرسول عليه الصلاةو السلام لما كان معلق العصايه بس للحسن والحسين
معلقها بس
لكن مش يضرب
ولو ضرب ما يبقاش الضرب المبرح
وما يكونش الضرب على الوجه
حتى فى الحرب الرسول كان بأمر المسلمين انهم يتقوا الوجه فى ضربهم
احنا ناس بنكرم البنى ادم ونحترم جسمه
اما بقى بخصوص الشتيمه
فأنا معاك تمامااااا
ان الراجل الى يستقوى على واحده ست يبقى بجد ندل وجبان ومريض
وزي ما انت قلت برضه
بس انا قصدي ان احنا ما نشتمش حد معين معلش
عشان ما نجرحش حد
خلي بالك
انا ضد ان واحد يشتم على مراته وضد كمان ان واحده تشتم على جوزها
مهماااااا حصل
فى حاجه اسمها طلاق
قلة ادب بين الزوجين لا
اذا خسرنا الحب وخسرنا الجواز مش لازم كمان نخسر احترامنا لنفسنا واخلاقنا
شكرا على متابعتك الجميله ياعمرو
وبالمناسبه
انا كمان نفسي حد يستفرد بجوزهاده ويرنه علقه من التمام يعنى
اقصوصه
يا حبيبتى معلش الله لا يعيد الوحش عليكي ابدا
ويجعل ايامك كلها خير يا رب
ويمكن لو اتكلمتي وبعبعتي يكون احسن لكى
انصحك بجد تدخلي من غير اسمك وتتكلمي براحتك اكتر
اهلا بيكى فى كل وقت
والايس كريم عنيه هابقى اجيبلكم هنا
ألم الضرب بيروح بعدها بشوية بس بيسيب جوه النفس جرح غائر لا تداويه السنين مهما مرت بعده حاجات حلوة بتفضل ذكري الألم تعلو كل ذكري مهما حاولتي تتناسي هتفضلي فاكراها
مرة زمان وانا في ابتدائي و كان كرهي لمادة ال math بيترسب يوم بعد يوم و كانت اللي بتدرسها وقتها واحدةالله يسامحها باه ..غلطت مرة في جدول الضرب مش فاكرة الحادثة بس فاكرة العقاب كان ايه .. مكانش ضرب انما خلتني اقف في مكاني طول الحصة و اكتب جدول الضرب كله 100 مرة .. اللي قهرني في كل دا انه عقاب غبي جدا علشان انا بردة مش هحفظه حسيت بالاستفزاز و عندت وبردة محفظتهوش و كمان اتضايقت علشان الاحراج قدام زمايلي بنات وولاد. مكانش غباء مني .. انا مش عايزة اعرفه ولحد النهاردة انا بكره الارقام وشكلها حتي وان كانت ظروفي و عملي بيضطرني اتعامل معاها بشكل يومي دا مخلانيش احبها في يوم
انا بصراحة مع عمرو في رأيه و عندي اكرم للزوجة تواجه الناس بانها مطلقة احسن ما تقعد مع واحد لا يراعي الله فيها .. و الجديد باه الايام دي انك تخافي للاسف من اللي متشدد في مظهره و يبان عليه انه بيتقي الله في افعاله اكتر ما تخافي علي نفسك من اللي لابس سلسلة و انسيال .. مع الاسف الشديد
هما بيمشوا علي سطر و يسيبوا سطر و زيهم زي اللي بيشرب و يعصي الله و يرتكب المعاصي .. لا دول بيتقوا الله في صحتهم و لا هو بيتقي الله في اهله ولحمه
ربنا يكون في عونهاو يصبرها علي الابتلاء
معذرة علي الاطالة
اليس فى بلاد العجائب
مالها بس الارقام مزعلاكي ليه
طب احنا بنتكلم عن الضرب مش جدول الضرب
بس حد يكتب جدول الضرب 100 مره وجبتى طباشير منين طيب
ومين الى عد المرات
اهلا بيكى زائره جديده للبعبعه
ص ياعمرو
انا طبعا عتغاضي علي شتمتك ليهو لجوزي وانه نطع واني استاهل العلق ديه
وهبتدي من الاول وكأنك مكتبتش حاجه وحشه وربنا يسمحك
بسم الله
كلنا طبعا نعرف ان كتير من الناس وخصوصا الشباب كان بيشرب ويزني وبيسكر وبيعمل وبلاوي سوده
وبعد فتره ربنا تاب عليه وبقي انسان تاني مختلف تماما ده لازم هيكون ليه سبب
طبعا
وطبعا كلنا عارفين ان ربنا لما يكون عاوز حاجه يقول كن فيكون
فيمكن يتصلح ويكون انسان كويس جدا
ده حتي الشيخ محمد حسين يعقوب بيقول في درسه عن المهدي المتظر انه هيكون انسان عاصي لدرجه وحشه جدا وبعدين ربنا هيهديه
فانا علشان كده صابره يمكن الهدي يكون قريب ليه وليه
وبعدين كل مشكله تحصل اهلي يقولولي انتي كنتي غلطانه في كذا
يعني ببقي غلطانه مهو انا مش ملاك برده
فبقول يمكن لو انا بطلت اعمل غلطة
المره اللي فاتت يمكن متوصلش انه يضربني
وبعدين انا كل مره بستخير وربنا بيقدرلي ارجع ولو علي ذمته مطلقش
يعني هو ده الخير ليه
اما موضوع الرجوله والقوامه والشهامه
فربنا يهديه هو واللي زيه
أن بأي حالتي العكس خالص أنا الزوج المضروب بس مش عن ضعف و الله الحكاية إني متجوز بنت خالتي و خالاتي دول أنا باعتبرهم زي امي بالظبط و جوز خالتي ده صاحب فضل علي في تشكيل طريقة تفكيري حتي أبل ما يموت وصى ليا بمكتبته المهم مراتي عارفه كويس إني عمري مامد إيدي عليها أو حتى اشتمها دنا عمري ما شتمت حد الا في ثالتة ابتدائي و لحد دلوئت مش مسامح نفسي عليها
حتى الطلائ مائدرش عليه لانها حاتتبهدل بالعيال خصوصا هي بتشوت في عيلتها برده. اوعوا تفتكروا ان مراتي شريرة هي بس عصبية و محبطة و ازا غلتت في أي حاجة يبئي اللي ادامها السبب يعني اذا الواد بيسمع كلامي و هي لا يبئا أنا السبب و تضرب الواد للأسف و تغلت فيا و أدامة. و كل اللي أدر أعمله اني امسك ايديها او احضنها بقوة علشان ما يحسلش خساير. موخرا بأيت اقلل من الهزار و اللعب مع الولاد عشان ماستفزهاش. نسيت أئولكم ان احنا اتلئنا أبل كده مرة بعد اهانة مائدرتش استحملها. و خليتها تؤعد في البيت زي الشرع ما بيئول لحد العدة ما تخلص. المهم اعتذرت و اتصالحنا و رجعنا لبعض لكن رجعت ريمة.
معلش أنا قلبت البوست لحلئة همسة عتاب
سامحوني
لا لا ابدا يا استاذنا
انت شرفتنا
بس اعذرني انت غلطان
هى بتغلط فى عيلتها او بتنطح معاهم لكن ما بتضربهمش ليه ؟؟؟
انت لازم تكون شديد شويه معاها وكمان لازم تخليها تحبك زي ما انت بتحبها
انت طيب اوي وابن حلال وطامر فيك العشره
بس برضه لازم تفهم مراتك ان الى بتعمله ده غلط
ولازم تكون شديد معاها شويه مش انك تضربها لا طبعا
لكن انت راجل افتكر بنيتك تسمحلك انك تمنعها انها تضربك
وحلو انك تمتص غضبها وما تخليهاش تتهور
وكمان حكاية اهانتك قدام ابنك دي
هاتعمل مشكله لابنك نفسه
الموضوع مش لازم يفضل كده
ابوها وعيلتك على عينا وراسنا
حبك كمان علىالعين والراس
لكن لازم من الاصلاح
ونورتنا وياريت الناس اسمع رايهم على كلامك الى ما خدتش بالي منه الا دلوقتي
اسفه اوي
طيب ما يمكن الزوجه اللى بتتعرض للضرب دي هى اللى وصلت جوزها لهذه المرحله لو كان جوزها سوى و طبيعى مش منحرف اخلاقيا و لا حتى مدعى التدين...ايه يعنى هايضربها من غير اسباب فجأتن اكيد جرحت كرامته غلطت فيه قدام حد,هيا نفسها ضربته الاول اى كانت الاسباب اكيد هى تطاولت عليه الاول وو صلته لهذه المرحله الا بقي لو كان هوا مريض نفسي و لا يستحق العيش معه ف هذه الحاله..
بس الهجر ف الفراش حلال المشاكل بيجيب نتيجه افضل من الضرب
انا مش بوجه كلامى لحد من المدونات لحد يزعل انا بكلم عن الموضوع عموما
بيبرس
بص حضرتك
اي كان الاستفزاز الى ممكن زوج يتعرضله فوقوعه فى الضرب اساسا غلط
مهما كانت اعذاره مالوش اي عذر عندي خلاص هو غلط لما ضرب مراته عموما لا مش مراته بس
اي بنى ادم فى الدنيا تتعامل معاه وتضربه يبقى انت غلطان على طول
فما بالك بمراتك وام عيالك مثلا ؟؟؟
والسؤال تفتكر لو والدتك عصبتك ونرفذتك وهانتك اهانه ما بعدها اهانه ممكن برضه تتعصب وتضربها ؟؟؟
فى الغالب هاتكون الاجابه لا
عارف لا ليه ؟؟
لان فى مجتمعنا من المشين جدا ضرب ا لام انما الزوجه مستباحه مالها وجسمها من غير ما تتكلم
لكن طبعا هى بتكون كمان غلطانه لانها تبقى غبيه اوي لما تستفزه عشان يضربها لانه ببساطه هياخد على كده
وبعدين مين قالك ان الى بيضرب مراته واعتاد الامر مش مريض نفسي اصلا ؟؟
ماهو كده فعلا
وعموما الناس كلها عندها امراض نفسيه ده عادي
وبالنسبه للهجر فى الفراش اها هو حلال
بس خلي بالك لازم تستخدم بحكمه
ببساطه فى ناس كرامتها اهم من كل حاجه فعلا مش كلام
إرسال تعليق