السبت، 20 ديسمبر 2008

حد هايصدقنى؟؟ ..... مراته بتضربه

تحدييييييييث هام
عيب اوي اوي كده
احترموا بعض فى الردود
وما تتريقوش على بعض
واحترموا كلام بعض
واحترموا مشاعر ومشاكل الاخرين
واحترموا المدونه وصاحبتها الى مستضيفه مشاكلكم
قال الله تعالى:
لا يسخر قوم من قوم عسى ان يكونوا خيرا منهم..... صدق الله العظيم
اتقوا الله فى بعض
جننتووووووووووووووووووووووني
اقفلهااااااااا؟؟؟
ولا اقفل الردود ؟؟؟؟؟؟ وارد انا بس ؟؟؟؟؟؟؟؟؟؟
احكموا انتم اعمل فيكم ايه ؟؟؟؟؟؟
جالي رد فى موضوع الضرب ا لى فات يا جماعه
وحبيت انشره فى بوست عشان اعرف رايكم فيه
ده كان الرد الى جاني من الاخ.. حد هايصدقنى ؟
أنا بقى حالتي العكس خالص أنا الزوج المضروب بس مش عن ضعف و الله
الحكاية إني متجوز بنت خالتي و خالاتي دول أنا باعتبرهم زي امي بالظبط و جوز خالتي ده صاحب فضل علي في تشكيل طريقة تفكيري حتي قبل ما يموت وصى ليا بمكتبته
المهم مراتي عارفه كويس إني عمري ماهمد إيدي عليها أو حتى اشتمها ده أنا عمري ما شتمت حد الا في ثالتة ابتدائي و لحد دلوقت مش مسامح نفسي عليها
حتى الطلاق ما أقدرش عليه لانها حاتتبهدل بالعيال خصوصا هي بتشوط في عيلتها برده.
اوعوا تفتكروا ان مراتي شريرة هي بس عصبية و محبطة و اذا غلطت في أي حاجة يبقي اللي ادامها السبب
يعني اذا الواد بيسمع كلامي و هي لا يبقى أنا السبب و تضرب الواد للأسف و تغلط فيا وقدامة.
و كل اللي اقدر أعمله اني امسك ايديها او احضنها بقوة علشان ما يحصلش خساير.
موخرا بقيت اقلل من الهزار و اللعب مع الولاد عشان ماستفزهاش.
نسيت أقولكم ان احنا اطلقنا قبل كده مرة بعد اهانة ماقدرتش استحملها.
و خليتها تقعد في البيت زي الشرع ما بيقول لحد العدة ما تخلص. المهم اعتذرت و اتصالحنا و رجعنا لبعض لكن رجعت ريمة.
معلش أنا قلبت البوست لحلئة همسة عتاب
وده كان ردي عليه ده
لا لا ابدا انت شرفتنا
بس اعذرني انت غلطان
هى بتغلط فى عيلتها او بتنطح معاهم لكن ما بتضربهمش ليه ؟؟؟
انت لازم تكون شديد شويه معاها وكمان لازم تخليها تحبك زي ما انت بتحبها
انت طيب اوي وابن حلال وطامر فيك العشره بس برضه لازم تفهم مراتك ان الى بتعمله ده غلط ولازم تكون شديد معاها شويه مش انك تضربها لا طبع
الكن انت راجل افتكر بنيتك تسمحلك انك تمنعها انها تضربك وحلو انك تمتص غضبها وما تخليهاش تتهور
وكمان حكاية اهانتك قدام ابنك دي هاتعمل مشكله لابنك نفسه
الموضوع مش لازم يفضل كده
ابوها وعيلتك على عينا وراسن
احبك كمان علىالعين والراس
لكن لازم من الاصلاح
ونورتنا وياريت الناس اسمع رايهم على كلامك الى ما خدتش بالي منه الا دلوقتي اسفه اوي
ودلوقتي عايزه اعرف رايكم فى الكلام ده ايه
وكمان اوجه لكم سؤال مهم
هل لو ان الزوج بدأ بالضرب لو الزوج كمان ضربته !!! رايكم ايه فى الموقف ده يا ترى هما الاثنين غلطانين اد بعض ولا الزوج غلطان اكتر عشان هو الى بدأ ولا الست غلطانه اكتر عشان ردت على جوزها بالضرب ؟؟؟
وكذلك الحال طبعا فى الشتيمه يعنى لو واحده جوزها شتمها وهى ردتله الشتمه يبقى ايه الموقف ؟؟
منتظره اراءكم
تحديث تاااااااااني : تم غلق التعليقات على الموضوع بناءا على رغبة حد هايصدقنى فى غلب باب النقاش

هناك 16 تعليقًا:

عمرو يقول...

معلش يا حبيبى و ماله فيها أيه يعنى لما تنضرب من مراتك حبيبتك أم عيالك ؟
عادى يعنى ده حتى ضرب الحبيب زى أكل الزبيب
و باين من أسلوبك أنك مؤدب و مهذب و طيب و أمير فكمل مشوارك بقى و أنت مبسوط و بلاش تشتكى
يا حبيبى أنت يا حبيبى
ده أنت حبيبى
حلو كده ؟ ههههههه

بعبعه يقول...

هههههههههههههههههههههههه

كده يا عمرو ماشي

بس انا معاك فى حاجه

انى عايزه اسأله انت راضي كده ومبسوط ولا بتشتكي ؟؟؟

ماااااااااااااشي يا عمرو

غير معرف يقول...

هوا فيه ايه
ده كلام برضه
بدل ماتنصحوا الراجل يعمل اي حاجه
انصحك تعلمها دينها و تعرفها ان زوجها جنتها او نارها

بعبعه يقول...

والله يا بيبرس انا قلتله ما فيه الشفا

عمرو الى بيهزر اهو ماليش دعوه

غير معرف يقول...

أنا مش باشتكي و لا حاجة يا أستاذ عمرو، أنا بس حبيت أبعبع معاكم و حابب تعرفوا إن المشكلة مش ستاتي بس هي الحئيئة مشكلة أخلاء في المئام الأول. و نصيحة الأستاذ بيبرس في محلها بس لازم أبدأ بنفسى الأول يعني أنا مش متدين أوي. على أي حال أنا مبسوط اذا كان الحكاية دي دحكتكوا.

مرسي ليكو كلكو

غير معرف يقول...

انت الدغ ف القاف ولا ايه يا استاذ هايصدقنى
بص عاملها زى ما الملخص الوافى للازواج بيقول اصدى بيئول علشان تفهم
عاملها زى ما تعمل ف بوش انت فاهمنى طبعا
واشرب بيريل كتير شوفت الاعلان ده

غير معرف يقول...

واضح انكو واخدين الموضوع تهريج ماهو لو المضروبة ست كنت اتعاطفتوا معاها و أعدتو تشتموا في المجتمع الذكوري و السقافة البدوية (بالقاف أهو) و لو كان المضروب راجل يبأي يستاهل عشان ما دبحش الؤتة. عموما مرسي ليكو كتير مرة تانية على المنائشة الموضوعية.

بعبعه يقول...

عيب أوي اوي اوي الكلام الى بيحصل ده

ويظهر انكم لسه شويه على ما تعرفوا يعنى ايه نقاش واحترام الراي الاخر

كمجتع يعني

استاذ حد هايصدقنى

انا عن نفسي تعاملت مع الموضوع بكل جديه ونصحتك بما يرضى الله وبكل ادب اوووووووك

ومش ناشره البوست ده عشان الناس تهرج ولا تضحك ولا انا قصدي كده من المدونه كلها

وانا ضحكت فى الردود عشان حوار دار بينى وبين عمرو مش عشان كلامك
اووووووووك

انا كلام قريته من زمان وما ضحكنيش لكن زعلني

وانت عندك حق لو كانت المضروبه ست كنت هاتلاقي الف حد يرد عليها بجد وتعاطف

لكن انت ما حدش متعاطف معاك عشان حاجه واحده فى رايي انك انت راجل بنيتك الجسديه اقصد تخليك تقدر تدافع عن نفسك وانك تمنعها اساسا من انها تضربك

خصوصا انت عندك ولاد يعنى عيب اوي لما يكون الدنيا كده بينكم

بعبعه يقول...

بيبرس

من فضلك حضرتك احنا هنا على بعبعه بنحترم بعض

مش بنسخر من بعض

لا يسخر قوم من قوم عسى ان يكونوا خيرا منهم
صدق الله العظيم

ولو كنت شايف اخطاء للاستاذ حد هايصدقنى كان ممكن تلفت نظره لها بالذوق والادب كما بتنصح اخوك مش تتريق عليه

وانا فعلا الكلام الى نشرته ورا صدقنى كله صححت اخطاؤه الاملائيه لانه كاتب بالعاميه ومش معدل القاف لكن احنا بنتكب عاميه بالقاف عشان الكلام يتقري يا استاذ صدقنى

ولما تنصح حد يصدقنى انه يضرب مراته بالجزمه

يبقى حضرتك كده عايز الناس يبقوا مش بنى ادمين
اها حرب فى البيت وضرب بالجزم

سوري يعنى الى يضرب مراته بالجزمه وهى تضربه بالشبشب بعد كده يبقى بينهم ايه
يناموا جنب بعض ازاي بلاش حاجه تانيه

يااخي لتقل خيرا او لتصمت

ضرب الزوجه الرسول عليه الصلاة والسلام قال بالسواك وده بعد ما يحاول معاها بشتى الطرق وبتدرجها كما ذكرت فى القرآن الكريم والى كلكم نسيتوها وافتكرتم بس الضرب

الضرب بالسواك مش بالجزم ؟؟؟؟؟؟؟

اعترافات هانم يقول...

الاول ياجماعه بعتذر عن تاخري في الرد بس والله الشغل مخليني مش شايفه قصادي ده حتي مدونتي بقالي كام يوم مش دخلتها

ثانيا قبل اما ارد علي المشكله

حابه بس اقول حاجه ان الاسلوب اللي كانت فيه الردود اكيد جارح لصاحب المشكله

ياريت بس نراعي مشاعر بعض

اما بالنسبه لصاحب المشكله طبعا انا فرحانه انك بعبعت معانا

انا طبعا عاجبني فيك اوي انك حافظ جميل والد زوجتك لانه طبعا اثر فيك فكريا
مش سهل اننا نقابل النوعيه دي من الناس خاصه المهتمين بالكتب والثقافه

من اللي قريته لاقيت ان زوجتك بتاعامل اهلها بنفس الاسلوب

وانك طلقتها مره ورجعت طبعا عشان البيت والاطفال

انا طبعا ضد ان الزوج يعامل زوجته بقسوه وعنف

بس دي لازم تعرف كويس انها زوجه وام وانك زوج وواجب عليها تحترمك وده مش هيجي غير لما تحس بقوه شخصيتك

لازم تعرف امتي تعاملها بحنيه وادب وزوق وامتي تعاملها بالاسلوب اللي تستحقه

والله ممكن تكون عندها مرض نفسي بيقولها انها لو مش عملت كدا هتيجي عليها

لازم توديها لطبيب نفسي

واهجرها واعمل اللي ربنا قال عليه

لحد اما تياس خالص خااااااااالص وتستحيل الحياه

يبقي ساعتها ....... مش هقدر اقولها بس فعلا لو مش وقفتها عند حدها هتفضل قليل في نظرها

خليك ناشف وقوي معاها وحنين وقت اللزوم

صبرني يارب يقول...

ايه ده؟؟

انتم عاملين فى بعض كده ليه ياجاله اخس عليكم

على راي الراجل صحيح لو كانت ست كنتم اتعاطفتم معاها وقلتم مجتمع ذكوري

عيب كده بتعضوا في بعض ليه

المهم

الاخ الفاضل حد هايصدقنى

الصراحه انا اتعصبت اوي لما قريت الرد بتاعك من قبل ما بعبعه تنشره اصلا عشان حاجه تانيه غير ضرب مراتك
عشان اخطاءك الاملائيه

ايه ده امال الكتب الى سابهالك حماك عملت بها ايه يا راجل

المهم
بالنسبه لمراتك الضرب ابدا مش حل معاها

هاتتحول الامر معاها لمعركه

والاذى الجسدي مش بيربي ولا بيعلم الا البهايم

لو حضرتك والمدام ناويين تعيشوا كده سوري يعنى انتم حرين

انما دي لازم تحس بقوة شخصيتك

قوة الشخصيه مش قوة الايد
ما شاء الله تلاقي راجل كده طول وعرض وزي الباب والكف منه بموته انما شخصيته ضعيفه

فاكر اخو نشوى مصطفى فى الرجل الابيض المتوسط الى كان قزم بس كانت البت بتترعب منه هههههههه

انا مش باتريق وربنا انا باهزر بس عشان انتم مشحونين وبعبعه مبعبعه فيكم

لكن المهم انك لازم تقف معاها واقفه جامده وتهجرها

وتحكم اهلها

ده لو انت مش عاجبك حياتك
انما لو عاجباك ومجرد بترغي هنا وتوجع قلبنا نووووووو بروبلم اتفضل كلنا اذان صاغيه

اه وما تسمعش كلام بيبرس

بيبرس عايز يخربها ويقعد على تلها

وله روووووووقه الاستاذ بيبرس فى موضوع الجزم ده

مااااااااااشي يا بيبرس الصبح نشووووووووف

على راي بعبعه احترمواااااااا بعض

وطبعا اتفق مع بعبعه فى كل التنفيض الى نفضته لكم ده

غير معرف يقول...

راجل بيكلم راجل
ايه التكاتف الحريمى عليا ده
بعدين بصلح له اخطائه مش هوا طالب النصيحه و لا هوا عارض المشكله لسبب اخر
و صغتها ف صيغه خفيفه مش سخريه منه نهائيا كأنى بكلم واحد صحبى و بقوله اشرب بيريل بدل ماقول استرجل
بعدين واضح ان السيدات هنا مش واخده على تهريج الرجاله بينهم و بين بعضهم
و بعدين جزمه بوش ماجتش فيه اصلا ليه فهمتوها على انها ضرب بالبلغه !!!!
ده كان منتظر باعت قبله الوداع لبوش !!!!
عموما انا غلطان .......
تقبلوا اعتذارى

جنّي يقول...

كان الله مع اهل غزة وليغفرالله لنا تقصيرنا معهم ..

كل من له عينان يرى التواطؤ الكريه من حكومة فاسدة وحزب فاسد .. اما وانه قد خدع رئيس اكبر دولة اسلامية .. فهو غير كفيل بحكمنا .. نتحدث عن تواطؤ رئيس جاهل وحزب فاسد وحكومة اقرب الى الصهيونية ..ان لم تكن كذلك ..
اما حماس فيكفيها فخرا انها لم تستسلم كما استسلم غيرها .. لم تسرق اموال الشعب الفلسطيني كما فعل غيرها ..
حماس التي قدمت فخر شبابها شهداء في ساحة الجهاد والزود عن شرف الامة العربية والاسلامية ..
حماس العزة والكرامة والشرف ..
ولكن ماذا نحن فاعلون ؟
اقول لا للوقفات والاستنكارات ولكن اجمعوا المال والمؤن والسلاح وليفعل كل منا ما يستطيع لايصال المال والمؤن والسلاح لاهل غزة ..
ويارجال سيناء الشرفاء قوموا بايصال المال والمؤن والسلاح لاخوانكم في غزة الصامدة..
ولعنة الله على الكلب الذي استقبل العاهرة اليهودية للتواطؤ لضرب غزة ..
وحسبنا الله ونعم الوكيل

غير معرف يقول...

لم تعد بي رغبة لاستكمال هذا النقاش خاصة بعد تعليق الأستاذ جني. فمصاب الإنسان في غزة أكبر من أي مشكلة شخصية. أشكر كل من أبدى رأيا أو أسدى لي نصحا.

بعبعه يقول...

ماشي يا بيبرس

انصح يااخويا انصح وديه ورا الشمس

بعبعه يقول...

حد هايصدقنى

يعنى انا نزولا على رغبتك هاقفل باب النقاش فىالموضوع

واسفه لو كنت ضايقتك يوما