الأربعاء، 18 أغسطس، 2010

أنا حلوه وعارفه ان انا حلوه :)

لا مش انا يعنى انا  لا يعنى استنوا هاتفهموا ...

ايه ده  ؟؟ لا  ماهو ده ما يمنعش برده ان انا حلوه وعارفه ان انا حلوه هههههههههههههههه


 ندخل فى الموضوع بقى 

تعالوا النهارده نتكلم عن عقده لاحظتها عند البنات


والله هى مش عقده واحده دى عقد كتير كتير وبشنيطه كمان

بس العقده الى هاتكلم عنها النهارده هى عقده هبله جدا جدا

وهى هيفا وهبي ونانسي عجرم

ايوه صدقوا بتحصل  فى اهبل المجتمعات

مش عارفه البنات مخهم تعب تقريبا ولا هو الشعب كله اصلا مخه تعبان مش عارفه والله

بيجيلى رسايل كتير من بنات الى تقولي انا متعقده من نفسي اصل انا رفيعه والى زعلانه  اصلها تخينه
والى بتقولي مش عارفه اصل طالعلي حبايه تحت حاجبي الشمال
والى بتسأل على عمليات النفخ والشفط

هبل فى هبل  من الاخر

وده كله لييييه

بسبب قاعدة البنات قدام التلفزيون يتفرجوا على الممثلات والمغنيات الى بيطلعوا على الشاشه قدامهم ملمعين اخر حاجه

والاهبل من كده ان الشباب كمان عايز واحده تكون زي الي بيشوفهم فى التلفزيون برضه ومش عاجبه أي حاجه

افهم فى دول ودول يا شوية هبل الممثلات دول عشان يطلعوا على الشاشه ياخدوهم سكينه معجون كامله  ده غير انهم بيشدوا وشهم على القالب اد اسبوع قبلها

وشغالين ولا العجلاتيه نفخ وشد وعمليات وبلاوي سوده

بكل بساطه يا بنات احنا مخلوقين كده مختلفين

مختلفين فى الشكل والتفكير وكل حاجه مافيش حد فينا زي التاني ابداااا

ما تبصيش للهبل بتوع التلفزيون الله يصلح حالك وتعقدى نفسك دول فى الاساس ما تحبيش تبصي فى خلتهم

انا كل من شوفتهم من الفنانين على الحقيقه  قلت يا لهوي ده احنا كنا بنتاكل على قفانا زمن بحاله

صور الفنانين قبل وبعد عمليات التجميل ماليه الدنيا ابقى دوروا عليهم وشوفوهم

ولاي راجل عبيط بيبص على الستات بتوع الهشك بشك وبيلعن ابو اليوم الى شاف فيه وش ام العيال

اصرف على مراتك  يا اخ توم كروز المتنكر ربع الى بتصرفه أي واحده من دول على مظهرها  وهى تبقى احلى منهم كلهم

والاقرع ياكل حلاوه بفلوسه  يا حليله   ايوووه وده تلقيح صريح على انك اقرع وبكرش اصلا فما تتكلمش منك له  له

البنات الهبل العبط الى معقدين نفسهم اصل والنبى عندي حبايه فى مناخيرى اصل عندي شعر كتير فى قفايا

اصل انا سمرا  شويه اصل انا رفيعه اصل انا هبله  كل ده عااااااادي كل الديفوهات دي وارده

ممكن لو عندك مشكله تروحي لدكتور مثلا ممكن تتعالج وممكن لا

حبي نفسك زي ما هى .. حسى بجمالك ا نتى اولا .... عمر ما حد هايبصلك ولا يحس بجمالك الا لما تحسي انتى اصلا بجمالك

عيشى فى الدنيا بمبدأ  انا حلوه وعارفه ان انا حلوه 


مش باقولك اتغري بنفسك انما حسى بقيمة نفسك... يا بنتى ان ما كانش يجى الشاب الطرب بتاعك بسلامته وانتى عاجباه زي ما انتى كده ويحبك زي ما انتى يبقى بلاش منه

ما تقلقيش كل فوله ولها كيال زي ما بيقولوا

مره واحده من البنات دول قالتلى بصراحه كده انا حاسه انى مش سكسي وانى لو اتجوزت مش هاعجب جوزي

اه طبعا لازم عشان تحس انها سكسي انها تكون نافخه وزارعه سيلكون ويا حبذا لو كانت بترقص بلدي

اه ماهى بتيجى كده فى الافلام

نرجع تاني للامثال مش عارفه طالبه معايا خالتي بمبه ليه

المثل بيقول يا وحشه كوني نغشه يا اختي

وانتى اصلا اصلا مش وحشه انتى حلوه وكل  حاجه بس مش واخده سكينة معجون لو يريحك تاخدي سكينة معجون اوك ناخدك سكينه

القصد من المثل ان مش الجمال الى حسب المقاييس العالميه هو الى يعتبر مؤثر بس

بس يعنى حكاية سكسي دي يعنى مش عايزه اقولك انها تكاد تكون مالهاش علاقه بالشكل

قد تكون واحده مثيره فى نظر واحد لكن فى نظر حد تاني يشوفها شبه ام السيد الشغاله
واكم من ناس تبصيلهم وتقولي عاجبه فيها ايه الاهبل الى هايموت عليها ده
ده حتى سوده وبضب وعرقوبها يدبحوا به الفرخه

عادي انتوا مالكوا الراجل عاجبه كده

المهم فهمتوا يعنى ولا ايه  ... عندي احساس انكم مش فاهمين حاجه

الهي يخليكوا يارب بلاش تفكروا فى الفنانات خالص

ولا الفنانين برضه عشان ترضوا تجوزوا الرجاله الى متوفرين دلوقتي

ويا بابا انت وهو قبل ما تبصوا على نانسي وهايفا واخواتهم فى الرضاعه ابقى كل واحد فيكم يهز نفسه كده لحد المرايه اولا ويشوف احلى يمامه هاتتجوز الغراب  على ايه

وكمان يضرب ايده فى جيبه كده ويشوف معاه كام من حق نيو لوك واحده بس للمودام لو كانت شبه نانسي

انتهى  ... الى بعده

الثلاثاء، 3 أغسطس، 2010

فضفة صديقاتي


اولا وقبل ما نبدأ كلام
عايزه اقولكم حقيقى انكم وحشتوني اوي  اوي وحقيقى كان نفسي ارجع اكتر من زمان
وصدقوني نويت اكتر من مره لكن كل مره ما كنتش باقدر مش عارفه ليه
لاسباب كتيره اوي
اولا كان عندي شوية ظروف  وثانيا لانى بعد فتره من الكلام مع الناس على الفيس بوك الى خلانى احتك بالناس مباشرة مش مراسلات على عكس ما انا متعوده معاكم وحسيت نفسي انى دايما فى وضع المدافعه عن نفسي وافكاري ومبدأي ومدونتي وحقيقى زعلت اوي من الناس

لكن عموما انا نفسي ارجع اكتب تاني وياريت اي حد عايز يعرف اي حاجه عن اي حاجه او عايز يتكلم فى اي موضوع او عنده اي مشكله يبعتهالي
بجد يا جماعه نفسي احس انكم معايا تاني  افتقدتكم

نبدأ فى موضوع النهارده

والى جايز مالوش علاقه مباشره بالبوستات الى  فاتت والى كانت عن الثقافه الجنسيه
لكن فى الاساس ا لمدونه هنا كانت معموله للفضفضه  او البعبعه زي ما انا سميتها

المهم يا اخواني احدى صديقاتي المدونات ونسميها الصديقه   (ص)   قالتلى مره عايزاكي تكتبي عن موضوع على مدونتك وتناقشيه
الى هو ايه

قالتلى ليه على  الفيس بوك او على النت عموما بمجرد ما حد يعرف انى متجوزه يبدأ كلامه معايا عادي بعدين يفضل يلف ويدور شمال ويمين عشان يوصل فى الاخر  انه يتكلم عن الناحيه الجنسيه ولا سيما انها شغلها له علاقه شويه بالطب !!!!
وسؤال مباشر هو يعنى عشان انا متجوزه يبقى لازم ابقى قليلة  الادب واتكلم فى العلاقه الجنسيه مع اي حد كده ؟؟؟؟!!!

طبعا لا يا حبيبتى بس هما عقلهم مقضيهم على كده

صديقه ليا تانيه ونسميها (ش) لما كلمتها عن موضوع البوست قالتلى لااااااا تعالى بقى وانا احكيلى الى اكتر واكتر
واسمعوا بقى قصتها
هى متجوزه وعندها اطفال وهى ست محترمه  لا شك  وبقالها سنين بتدخل النت ويبدو انها شافت بلاوي سوده
تقولي بصي بمجرد ما اقول لاي حد فى  اي مكان انى متجوزه يبقى انا كده وقفت فى قفص اتهام على طول
وسبعين  فى الميه منهم بيعتقد الآتي
انا ست احتمال اكون بطاله وقليلة الادب
والاحتمال التاني  انى اكون غلبانه ومنكسره ووحيده وغلبانه وجوزها بيضربها كل يوم علقه
والاحتمال الثالث ان جوزها مسافر وسايبها تعاني من الحرمان

لا شك ان فى ناس بتحترمها  طبعا وتقدرها بس السؤال هو ليه كده ؟؟
اشمعن لما يكون واحد متجوز وعلى النت مش بتعملوا معاه كده يا جماعه
وهل الى اخلاقها مش كويس تفرق معاها متجوزه ولا مش متجوزه ؟؟

قالتلى كمان حاجه برضه تتفق تماما مع رواية الصديقه (ص)
وهى ان السبعين فى الميه برضه الى بيعتبروها بطاله او غلبانه او محرومه
بيفضلوا يلفوا ويدوروا ويجسوا النبض هل هى عندها استعداد تتكلم معاهم عن السيكو سيكو ولا لا
حتى قالتلى ان فى واحد تكبد مشاقة انه يعمل نفسه بنت لمده سنه وشويه وعمل معاها كل الحيل عشان يوصل فى الاخر انها تتكلم معاه عن خصوصياتها خاصة على الجانب الجنسي
بس الحمد لله هى كانت حريصه فى الكلام حتى مع البنات

السؤال الموجه من الصديقتين (ص) و (ش)   ومني انا كمان والله

ليييييييه يا بشر ؟؟
لييييييييييه يا مجتمع سيء النيه ؟
ليييييييه يا رجاله كده ؟؟

وعلى فكره الحاجات دي تخلينى اتاكد ان المجتمع ده  عنده كبت ومشاكل فى  الناحيه الجنسيه فعلااااا محتاجه علاج
من غير ما ندفن راسنا فى  الرمل

ارجوكم يا جماعه عيب كده
انا عارفه ان فى بلاوي سوده على النت وعارفه ان البطاله والوحيده والغلبانه والمحرومه كلهم على النت برضه
بس برضه نتقى  الله
ما نرميش الناس بالباطل
وكمان ما تتصيدش المحرومه والغلبانه والوحيده  وتستغل النقطه دي فيها

يارب اكون وصلت الرساله صح يا صديقتي  العزيزتان

وشكرا لكل  الى سأل عني وانا غايبه  هنا وعلى الميل وعلى  الفيس بوك