السبت، 27 يونيو 2009

العاده السريه عند المراهقين : ألغاز و أسرار !!

صباح الخير أعزائى المدونات و المدونين ..
النهارده حنتكلم عن العاده السريه لدى المراهقين ..
أعترف أنى شعرت بالقلق لما بدأت فى كتابة هذا البوست ..
و أقر أن الموضوع أكبر و أخطر من أن يناقش بكامله فى بوست واحد و لا حتى فى عشر بوستات .. لما لهذا الموضوع من أهميه و مساحه هائله فى عقل و وجدان المراهقين و الشباب بل و الكبار أيضا ..
على كل الأحوال .. تعالوا أولا نتعرف على شىء أساسى يتعلق بالموضوع .. و أجد من المفيد أن نتعرف أولا على اٍجابة سؤال قد لا يجد اٍجابه لدى الكثيرين ألا و هو : كيف يحدث الاٍنتصاب عند الرجل ؟؟ و ما هى خطواته و آلياته ؟؟
العضو الذكرى للرجل بمختلف مراحله السنيه بيحتوى على حاويتين أو غرفتين بيتكونوا من نسيج اٍسفنجى و محاطين بغشاء رقيق .. و هذا النسيج الاٍسفنجى بيحتوى بدوره على فراغات كهفيه و ألياف عضليه و أورده و شرايين .. بالاٍضافه لقناة مجرى البول الموجوده أسفل القضيب ..
أولى خطوات الاٍنتصاب بتبدأ لما بتحدث للذكر اٍثاره جنسيه حسيه باللمس أو مخيه عن طريق التخيل أو التذكر أو الرؤيه أو حتى بالشم أو بالسمع .. هنا المخ بيرسل اٍشارات من خلال الحبل الشوكى للأعصاب الموجوده بالقضيب فبيحصل حاله من التمدد و الاٍنبساط للخلايا العضليه و العضلات الموجوده بالنسيج الاٍسفنجى علشان الدم يتدفق بقوه و بكميات هائله من خلال الشرايين فالعضو بيتمدد و بيتضخم و بيصبح صلبا بما فيه الكفايه لاٍتمام العمليه الجنسيه على الوجه الأكمل .. و فى نفس الوقت يقوم الغشاء الرقيق المحيط بالنسيج الاٍسفنجى على حبس الدماء داخل العضو و عدم رجوعها للجسم مره تانيه تماما زى فكرة السكس بلف بتاع سخانات الكهرباء اللى بتمنع رجوع الماء الساخن للمواسير !! و لما بيحدث القذف بيحدث اٍرتخاء و بتنقبض العضلات و الألياف العضليه فبيتوقف تدفق الدم فى الشرايين و بتنفتح الأورده لتصريف الدم و تهريبه من القضيب ..
يعنى عملية الاٍنتصاب لدى الذكور عمليه معقده للغايه و بتمر بمراحل كثيره و مؤثرات عديده منها ما هو عصبى و ما هو هرمونى بالاٍضافه طبعا لحالة الأوعيه الدمويه فى الجسم بصفه عامه .. و سبحان الله خالق كل شىء بقدر ..
العاده السريه أو الاٍستنماء كتعريف مجرد هى القيام بمداعبة العضو الذكرى باليد و هذا الشائع الأعم أو بواسطة أشياء أخرى حتى يصل الذكر لذروة النشوه و يحدث القذف .. و الملاحظ أن العاده السريه لا ترتبط لا بسن معينه و لا بحاله اٍجتماعيه معينه و لا حتى بوضع اٍجتماعى و ثقافى معين ..
فكل الذكور تقريبا مارسوها فى فترة ما من حياتهم بدرجات متفاوته ما بين الاٍعتدال و ما بين الاٍفراط .. بل اٍن بعض الأطفال يمارسونها على شكل مداعبه طفوليه لأعضائهم الذكريه بغير فهم و لا وعى منهم فقط للحصول على اٍحساس الراحه و يحدث لهم اٍنتصاب بغير قذف .. وبعض المتزوجين ذوى الخلل النفسجنسى يمارسونها على الرغم من وجود زوجاتهم بجوارهم و هذا الشكل من الخلل بدأ يزيد فى الآونه الأخيره مما دفع الكثير من الزوجات للشكوى لأسباب كثيره من أهمها عدم شعور الزوج بالرضا عن الزوجه و لا عن هيئتها و لا عن أدائها الجنسى بعد مشاهدة الأفلام الاٍباحيه التى صارت فى متناول الجميع ..
المراهق قد يبدأ فى ممارسة العاده السريه بالفطره .. أى بدون حتى ما يعرف أيه دى و لا بتتعمل اٍزاى و لا أيه الهدف منها ؟؟ .. و لكنه يشعر برغبه جنسيه عارمه ليلا و نهارا بسبب التغير الهرمونى الذى يحدث له فى هذه المرحله فيلجأ تحت هذا الضغط البيولوجى و النفسى الهائل لممارستها و يجد فيها ملاذا و متنفسا يريحه من عذاب الرغبه اللى بتلاحقه على الدوام ..
المراهق أثناء هذه الممارسه بتخطر على باله سلسله لا تنتهى من مخزون الذكريات للمثيرات الجنسيه التى أختزنها بداخل عقله الصغير .. و لا شك أن كل نساء الدنيا يخطرن على باله بدءا من عزيزه أمير بطلة أفلام توجو مزراحى مرورا ببنات ستار أكاديمى و مطربات الكليبات بالذات البنت دى اللى بتغنى أغنية باللغه العربيه الفصحى ..
و يطلق لخياله العنان و يتخيل ما لايمكن أن يخطر على باله و لا بال أحد فى العالم الحقيقى الواقعى .. و هذه التخيلات الجنسيه هى ما أتفق على تسميتها ب Fantsies و يعتبرها علماء النفس ترمومتر و مؤشر لحالة المراهق العقليه و الوجدانيه و منها يقيسون الحاله الصحيه للاوعى المراهق ..
جدير بالذكر أن الشاب الصغير أثناء اٍخراجه لمخزون تجاربه الجنسيه أثناء ممارسة العاده السريه بيستحضر بدون اٍراده منه صورا لاٍناث قد مررن عليه فى حياته اليوميه : المدرسه فى الفصل .. زميلته فى النادى .. بنت الجيران .. بياعة الجرايد اللى بترضع عيلها .. بل و ربما يستحضر فى ذهنه صورة محارمه الملاصقات له فى البيت و اللاتى طبعا لا يأخذن حذرهن و يظهرن بحسن نيه أمامه ما لا يجوز و هذه من الأمور الخطيره جدا لمردودها السىء على نفسية المراهق الآخذه فى التكوين .. و من خلال ما يأتينى من رسائل خاصه أدركت مدى دقة و خطورة و حساسية هذه النقطه بالذات ..
و كما يعتمد المراهق فى ممارسة العاده السريه على اٍستحضار صور و خيالات و أصوات بعضها حقيقى و بعضها من صنع خياله يعتمد أيضا على حاسة الرؤيه و السمع أثناء ممارسته لها كأن يشاهد فيلما اٍباحيا أو ينظر اٍلى صوره مثيره و هذا فى رأيى أشد خطرا من حالة الممارسه الأولى .. لأن الجنس هنا يرتبط فى ذهنه بصورة اٍناث و ذكور ذوى مواصفات خاصه جدا و ممارسات غالبا شاذه و غير طبيعيه فيصور له عقله الصغير أن ما يشاهده هو الجنس بصورته الحقيقيه أو التى يجب أن يكون عليها لقلة خبرته ..
هل للعادة السرية أضرار ؟؟
سؤال صعب الاٍجابه عنه .. و لا أحد قادر على الجزم فى هذا الشأن جزما نهائيا .. لكن تعالوا نعرض الآراء اللى قيلت فيها و اللى ممكن أن نطمئن لصحتها نوعا ما ..
طبعا أى شىء لما بيزيد عن حده بينقلب لضده .. و الاٍسراف فى ممارسة أى عاده حتى و لو كانت ممارسة الرياضه نفسها سوف تضر ممارسها بشكل أو بآخر .. و ده ينطبق برضو على العاده السريه لو مورست باٍسراف و جنون و لعدة مرات فى اليوم الواحد كما يحدث من بعض المراهقين لأن الجهاز العصبى و التناسلى بيتأثر من كثرة التشغيل فوق طاقته الطبيعيه تماما كأى موتور يعمل بشكل متواصل فوق طاقته الطبيعيه ..
الميل للنوم و التعب و الاٍعياء و أحيانا عدم القدره على التركيز بشكل متواصل و الاٍنطواء و العزله و الشعور بالذنب و القذاره و الاٍحساس باٍقتراف جرم ما مشاعر قد تصيب المراهق أثناء و بعد ممارسة العاده السريه .. و من المرجح أن تدفعه هذه المشاعر الصاخبه لرغبته الشديده فى اٍنهائها بأسرع وقت ليتخلص من وطأة المشاعر المتلاطمه بداخله فممكن يؤدى به ذلك لسرعة القذف بالتعود .. اٍضافة لأن الاٍكثار من ممارستها يؤدى أصلا لسرعة القذف بعد الزواج بسبب تعود المراهق على القذف بأسلوب و طريقه معينه و بكمية ضغط من يده على عضوه الذكرى لا تتقارب و لا تتشابه مع الضغط الطبيعى من المهبل الدافىء الرطب ذو الطبيعه المرنه و يكون لذلك مردودات سيئه كثيره يعانى منها الزوجان ..
كمان العاده السريه بتؤدى لأدمانها !! لأن ممارسة الجنس بشكل طبيعى بيتطلب زوج و زوجه و مكان مهيىء و ظروف خاصه بينما العاده السريه لا تتطلب أكثر من وجود المراهق فى مكان لوحده كلما شعر برغبته فى ممارسة الجنس فسهولة ممارستها بتدفعه للاٍكثار منها بدون اِحتياج حقيقى و من ثم اٍدمانها ..
المضاعفات الأخطر اللى بتنشأ من الاٍكثار من ممارستها زى ما قال بعض الأطباء هى اٍحتقان الحوض و غدة البروستاتا و تضخمها بسبب عدم اٍكتمال دورة الشبع الجنسى بالشكل الطبيعى .. و أيضا حساسية قناة مجرى البول اللى بيؤدى لسرعة القذف ..و بعضهم قالوا اٍنها بتسبب دوالى الخصيتين اللى بيؤدى للعقم و كمان الشعور بالحرقان عند التبول و وجود اٍفرازات مخاطيه عند الاٍستيقاظ صباحا من أعراض الاٍفراط فى ممارستها .. و من الشائع أن الاٍفراط فى الاٍستمناء بيؤدى لحدوث الفتاق ..
لا شك اٍن النسيج الاٍسفنجى بالقضيب بيتأثر بالمط و التطويل الغير طبيعى و الغير محسوب شدته على يد المراهق أثناء ممارسته للعاده السريه .. كما أن تكرار الاٍنتصاب بغير داعى حقيقى يؤثر سلبا على هذا النسيج و أيضا يؤثر على الجهازين البولى و التناسلى لو لم يتم القذف لأن كثير من المراهقين لا يتموا أحيانا الممارسه بالقذف و يكتفوا فقط بالمداعبه و الاٍستمتاع بشعور الاٍنتصاب و بتكون من أعراضه اٍحتقانات و اٍلتهابات بيعانى منها المراهق ..
أغلب المراهقين بيمارسوا العاده السريه فى الحمام بعيدا عن الأعين و حيث يسهل اٍدخال الموبايلات المحمله بالكليبات الاٍباحيه اللى أنتشرت بشكل مفزع .. و بيستعملوا الصابون أو الشامبو لاٍتمام ممارستها و دى المواد المتاحه أمامهم فى المكان ده .. و مع التدليك المنتظم للعضو و بالضغط الشديد أحيانا مع وجود مواد كاويه بهذه المستحضرات فبيصابوا باٍلتهابات فى القضيب ذى الجلد الرقيق الحساس اللى بيحتوى على عدد هائل من النهايات العصبيه شديدة الدقه و الحساسيه و قد تكون اٍلتهابات خطيره أحيانا و مسببه للألم الشديد لو أهمل علاجها بسبب خجل الشاب و خوفه من ذكرها للكبار .. و بالمناسبه مادام جينا للمنطقه دى بأعيد تانى التذكير بعدم ترك أى ملابس داخليه أنثويه بالحمام تخص أى أنثى بالبيت ..
من الأعراض النفسيه الخطيره و المزمنه اللى تحدث عنها علماء النفس الجنسى هو توثين العاده السريه .. و مصطلح توثين المقصود به وضع الموضوع الجنسى فى منزله أعلى من منزلته الحقيقيه و ربما يؤدى هذا الوضع لتوثين المراهق لنفسه و من أعراض ذلك أن يستمتع المراهق بمشاهدة نفسه و هو يمارس العاده السريه أمام مرآه حتى يصل للقذف مكتفيا بنفسه كموضوع و هدف جنسى و ده بيستدعى العلاج فيما بعد بجلسات نفسيه اٍستبصاريه و من الصعوبه جدا علاج مثل هذه الاٍنحرافات فى الكبر ..
من الطرق الخطيره للغايه المستحدثه لممارسة العاده السريه و التى وردت لنا من أمريكا تحديدا ما أتفق على تسميته بين المراهقين بالخنيقه !! و فيها يقوم المراهق بلف حبل أو حزام على رقبته لتقلبل وصول الهواء لرئتيه مما يدفع القلب لضخ كميات أكبر من الدماء لأعضاء الجسم لتعويض نقص الأكسوجين و بالتالى يزيد اٍنتصاب القضيب فتزيد النشوه بالتالى .. و من حوالى أسبوعين تم العثور على ممثل أمريكى كوميدى شهير و قد مات مختنقا أثناء هذه الممارسه الشاذه فى أحد الفنادق بتايلاند .. و من فتره حدثت حالة وفاه لمراهق مصرى من ميت عقبه على يد زميله اللى كان بيتولى مساعدته فى هذه العمليه المريضه البشعه ..
كمان بعض المراهقين بيستعملوا لممارسة العاده السريه أشياء غريبه لا تخطر على بال الكبار .. زى مثلا المكنسه الكهربائيه !! و بيستعملوا قوة شفطها فى هذا الغرض .. و طبعا غنى عن القول مدى الخطوره اللى ممكن يتعرض لها المراهق و اللى ممكن أن تصل لحد القطع و التمزق للقضيب بسبب محاولته تقليد واحد من أقرانه اللى حكى له عن تجربته المماثله .. أو بسبب ما شاهده على الاٍنترنت من كليبات مشابهه ..
المراهقون بيتناقلوا بينهم و بين بعضهم أسرار خاصه جدا لا تخطر على بال الكبار .. و بيتداولوا كليبات و لينكات لمواقع تحتوى على حاجات مستجده على بيئتنا و مجتمعنا .. يعنى برضو لا تحسنوا الظن أوى بالمراهق اٍستنادا على البيت و البيئه الصالحه اللى نشأ فيها .. و يجب تحذيرهم من الاٍنسياق وراء مثل هذه الممارسات غير الطبيعيه و ليس فقط تحذيرهم من ممارسة العاده السريه ككل ..
و ما أتعس حظ المراهق المسكين المتخبط اللى بتستعر بداخله رغبه جنسيه غير مهذبه و لا مقننه لو لم يجد لجواره أب أو أم ياخدوا بأيده و فاهمين و مدقدقين و مش بيتكسفوا من مواجهة صغيرهم بالحقائق و عارفين يعنى أيه مراهقه و مراهق و مطلعين على خفايا و أسرار و دهاليز و سراديب هذا العالم العجيب ..
العاده السريه لا تسبب العقم كما يظن بعض المراهقين كما سمعوا من أقرانهم أو من الكبار أو كما قال بعض الأطباء أن الاٍفراط فيها بيؤدى لدوالى الخصيتين .. و لا تؤدى لضعف الاٍنتصاب و القذف المبكر و البرود الجنسى لو مورست باٍعتدال و لا يوجد ضمان أكيد أن مراهقينا لن يجربوها أبدا لكن الاٍكثار منها يؤدى لكل هذه الأعراض المزمنه و اللى تقريبا أتفق المتخصصون عليها ..
العاده السريه بريئه من صغر حجم العضو الذكرى و ضمور الخصيتين كما يظن البعض .. و كمان لا تسبب الجنون و لا العمى و لا الهبل و لا النحنح كما كانوا يخوفونا منها و نحن على أبواب المراهقه و صدقناهم .. لكن نراعى و نحن نشرح مضارها لأولادنا المراهقين أن الزمن قد تغير و أن المعلومه صارت متاحه أمامهم بسهوله و يسر يعنى الزمن تغير و يجب أن نواكب هذا التغير علشان ميضحكوش علينا و ياخدوا كلامنا على أنه مجرد تخويف و تخاريف كبار ..
طبعا حيكون كلام مكرر لو أتكلمت عن طرق اٍغراء المراهق بعدم الاٍنغماس فى هذه العاده .. لكن باٍختصار أهم شىء هو أن نفهمه من الأول أيه العاده السريه دى ؟؟ و بنبث فى نفسه مبادىء التدين و الحفاظ على الصلوات فى مواعيدها لأنه بكده سيحافظ على طهارته والتمسك بقيم الخير و الجمال و بنشرح له آراء علماء الدين فيها حيث أختلفوا ما بين حرمانيتها حرمانيه مطلقه و ما بين كراهتها و ما بين اٍباحتها فى حال الضروره .. بنحاول نبعده عن المؤثرات الجنسيه بمختلف أنواعها و بنشغل وقت فراغه بالرياضه أو بهوايه مفيده و بنقنعه أنه مميز عن أقرانه الهبل الضعفاء اللى بينغمسوا فيها و بنشرح له باٍعتدال من غير تخويف مضارها الحقيقيه و بنتك شويتين على نقطة ضعف الاٍنتصاب و سرعة القذف بعد الزواج ..
بقدر الاٍمكان مش بنسيب المراهق يقضى فترات طويله لوحده .. و كمان بننصحه بتجنب الأماكن المزدحمه اللى بيكون فيها اٍحتكاك بالأجساد .. و بلاش الأكلات الحريفه و الحراقه اللى بتسبب له مزيدا من الاٍثاره الجنسيه اللى هو أصلا بيعانى منها و بنهتم بالطعام الغنى بالفيتامينات و الفواكه و الخضراوات الطازجه بس بلاش الجرجير و الحاجات دى .. و بننصحه أنه يتعود ينام على ضهره لأن ده بيساعده على الاٍحتلام و تفريغ طاقته بشكل طبيعى بدون التدخل منه بممارسة العاده السريه لتفريغ الطاقه الجباره اللى بداخله ..
كمان بعض الأهالى بيضيفوا لطعام أبنائهم المراهقين فى الخفاء القليل من زيت الكافور اللى هو طعمه ما يعلم بيه اٍلا ربنا لتهدئتهم جنسيا .. بلاش .. و يمكن الاٍستغناء عن زيت الكافور بفنجان يانسون أو نعناع على الريق و ليهم تأثير مش بطال أبدا للتهدئه و لا أنصح بيهم للمتزوجين .. كمان بلاش مشروبات زى القرفه و الجنزبيل اللى ليهم تأثير لا شك فيه لزيادة الرغبه الجنسيه بسبب مفعولهم فى توسيع الشرايين و بالتالى زيادة ضخ الدم لمختلف الأعضاء بالجسم .. و كمان نقلل للمراهق الشاى الساده و القهوه و كل ما يمكن أن يسبب الاٍمساك حتى لا يتسبب فى الضغط على البروستاتا و بالتالى يزيد اٍحساس المراهق بالنشوه و الرغبه الجنسيه ..
أرجو أن أكون قد فتحت باب معقول للمناقشه و الاٍستفسارات اللى حنستكملهم فى التعليقات .. و ربنا يحمى أولادنا من الاٍسراف فى كل شىء ..
و تقبلوا خالص تحياتى ..

الأحد، 21 يونيو 2009

مرحلة ما بعد البلوغ للبنات (تحديث)



المره الى فاتت يا جماعه اتكلمنا عن ايه الى ممكن نقوله للبنت قبل ما توصل للبلوغ فعلا وزي ما قلتلكم ده كان مجرد تصور واكيد اكيد المسارات هاتتغير تبعا لسير الموقف واسألة البنت


ونعتبر الكلام الى فات ما هو الا فتح كلام بس وجسر تواصل بين البنت وامها

النهارده بقى نتكلم عن ايه الي المفروض البنت تعرفه لما تبلغ فعلا وايه الى ممكن نتكلم عنه فى اقرب فرصه ممكنه
طبعا بعد الى قلناه المره الى فاتت لازم برضه ننتهز اي فرصه ونتكلم عن الاحكام الشرعيه للحيض يعنى نفهمها انها لما تحيض فى ايام الحيض مش هاتصلي ومش هاتصوم

وهاتقضي الصوم الفرض ومش هاتقضي الصلاه .ومن فضلكم افتحوا كتاب فقه واقروا احكام الحيض والايات المتعلقه به وافهموها عشان تعرفوا تجاوبوا صح على البنت

والحجاب ... تكلميها عن الحجاب من قبل ما تحيض عشان تكون مستعده له ولو حسيتى ان حيضها قرب خليها تبدأ تلبس
الايشارب فى الشتاء فى البرد عشان ما تكرهوش على ما يجى الصيف تكون هى خدت عليه خلاص

اولا طبعا المفروض كل ام طبعا بمجرد ما تحيض البنت تطمنها وتفهمها ازاي تهتم بنفسها وتحاول تخفف عنها الالم ان وجد عشان البنت ما تخافش

وطبعا اكيد كل واحده عارفه هاتعمل كده ازاي

فى اول حيض نفضل متابعين البنت كويس ونكون قربين منها ونعلمها ازاي تعرف ان الحيض انتهى بانها تحط قماشه بيضاء على بداية فتحة المهبل بس اذا طلعت نضيفه تبقى هى كده خلاص طهرت والى لا يبقى لسه
ونعلمها الاغتسال يبقى ازاي وايه اركانه

وارجوكم كلفوا خاطركم شويه واقروا فى الموضوع قبل ما بناتكم يوصلوا للسن ده
وليه لبناتكم لنفسكم انتم لازم تكونوا فاهمين وعارفين الكلام ده كويس


المهم بعد كده بقى خليكى معاها على طول الخط هاتسألك كتير وهاتقولك كلام كتير جاوبي على كل اسألتها تقريبا بشكل مبسط وهادي

فى السن ده البنت بتبقى عايزه تحس بنفسها وبتبدأ تختبر شعور جديد فعلا ان الولاد بيتقربوا منها وجايز بيعاكسوها في الشارع

تكوني انتى بقى معاها فى الوقت ده وتفهميها الصح والغلط
اعرف ستات مخهم تعبان تقولك ما تمدحيش جمال البنت عشان ما تاخدش بالها من نفسها (تخلف عقلي رسمي )
لا طبعا خلي الموضوع عادي لا تبالغي اوي فى مدحها ولا تتجاهليها .

الاعتدال كويس

اهتمي بلبسها من فضلك وحسسيها انك مهتمه بها وحاولي تخليها تحس انها كبيره ومسؤله عن لبسها
وتلاقي بقى يا ستى البت بتبربش كتير وبتتفرج على افلام رومانسيه واغاني شغاله ليل نهار وبتهتم بنفسها اكتر

وما تقلقيش من حالة البربرشه اطلاقا ده عادي جدا اه يعنى ما يجلكيش هس هس وتقولي اخخخخخخخ يبقى المجرررررمه بتحب ان الجيران
لا لا مش شرط جايز معجبه به . وجايز لا
ولما تيجى فرصه كلميها عن الحب .
اه فيها حاجه دي ؟؟

بلاش تحسسيها انه جريمه ولا كمان انه مباح على طول الخط
ولا انه كائن هلامي مالوش معالم ومالوش ضوابط
لا لا كل ده غلط

عادي الحب ده حاجه جميله اوي اوي لكن فى وقته وللشخص المناسب وفى الوقت المناسب
الحب ده لازم يكون حاجه كبيره اوي ومحترمه اوي ومهيبه اوي مش عبيط واهبل وعيل
خليها تتعلم تكون ازاي رومانسيه عاقله

خليها تشاركك احلى لحظات حياتها وتبقى صاحبتك عشان تعرفي تنصحيها وتكوني واقفه جمبها وما تلجأش لصاحبتها
او تاخد قرارا من نفسها قد تكون مؤذيه لها على جميع الاصعده
ما تخوفيهاش من الاولاد زمايلها في المدرسه لا ابدا

لكن برضه حذريها منهم خصوصا لو كان معاها فى المدرسه اولاد فى اعمار اكبر منها
كانوا زمان يقلقوا اوي لو يلاقوا حد من ولادهم عموما بنات وصبيان مصاحب حد اكبر منه
ويمنعوا الصداقه دي . وانا شايفه انه تصرف له حكمته برضه فى السن الصغير

علميها تحافظ على نفسها من غير رعب . اتكلمي معاها كتير وانتهزي دايما الفرص انك تشرحي لها حاجه او تكلميها عن حاجه
خلي فى لنك قوي بينكم دايما

لما تغلط وتقول اكيد لازم تبينى انك مضايقه عنها غلطت
لكنننننن اكدي على انك مبسوطه انها قالتلك

واكدي على ان كل الناس بتغلط مش حاجه مريعه يعنى انما المريع هو ان الشخص يغلط وما يتعلمش من خطأه ده ويكرره او يكرر اخطاء شبهه. وطبعا مش كل خطأ ممكن يمر بسلام .

والتريقه ابوس اديكم والسخريه من احساس البنت فى الوقت ده حاجه فظيعه جدا . وكلمة بلاش لعب عيال . بالراحه يا جماعه
وارجوووووكم ما تقولوش واحنا ادها كنا بنعمل ونسوي . الشخص غير الشخص والزمن غير الزمن والظروف كلها مختلفه.

لكن ده ما يمنعش اننا نعلمهم المسؤليه.

والمفروض اننا الاولاد كلهم صبيان وبنات على ما يوصلوا لسن المراهقه اصلاااا يكونوا بيلعبوا رياضه فعلا ومتعودين عليها . واستقروا على لعبه معينه او اثنين .

ما نقولهاش خلاص بقى انتى كبرتي بلاش رياضه . لا ارجوكم غيروا نوع الرياضه لكن ما تمنعوهاش . دوروا على نوادي للبنات بس لو كان الموضوع تاعبكم اوي يعنى . المهم ماتحرموهاش من حاجه هاتبنى جسمها وعقلها كمان .
لو سمحتي علمي بنتك شغل البيت حتى لو كان عندك شغاله فى البيت علمي بنتك يعنى تتحمل مسؤلية بيت حتى وهى صغيره .

علميها واستحملي عدم اجادتها للشغل .

وشجعيها تشتغل فى البيت بداية من عمر خمس سنين قولي لها رتبي غرفتك وسريرك . وعلميها بعد كده تغسل كوبايتها وطبقها
وبعد شويه تغسل كوباية ماما وبابا حتى لو اضطريتى بعد كده تعيدى عليهم
البنت لو ما اتعودتش تتحمل مسؤلية البيت حتى في وجود شغاله بتفضل كده طول عمرها اعملي حسابك تأهليها تطلع ام .زي ما بتاهليها للمذاكره والله .

ده كمان بياثر على نفسية البنت فى فترة المراهقه وبيخليها تحس انها مهمه فى البيت وانها قريبه ليكى وبتعمل الى انتى بتعمليه فى البيت تقريبا وتحس انها كبرت فعلا .

وانا طولت عليكم اسفه بس مش مشكله ما انتم معذبينى من اول البلوج
واي حد عنده اي اضافه للموضوع يتفضل يقولها فى التعليقات .

تحديث مهم
نقطه اشار لها عمرو فى التعليقات وفعلا كنت عايزه اتكلم فيها لكن سقطت مني متوهنى اعمل فيكم ايه
النقطه هى مساعده البنت على تقبل التغيرات الجسديه الى هاتحصل لها فى فترة البلوغ
واهم واكبر تغير بيكون في حجم الثدي
اولا قبل ماتوصل للبلوغ والحيض لاول مره بتقعد فتره كبيره جدا عندها الم فى الثديين والمفروض انها تقولك
لو ما قالتش انتى هاتخدي بالك لو اتخبطت فيها مثلا هاتصرخ
وكمان قبل كل دوره فى الغالب هايحصل لها نفس الالم لازم تطمنيها ان ده عادي جدا ومن علامات البلوغ
وبالنسبه لحجم الثديين خدي بالك اوي انهم بمجرد ما يبدأوا يظهروا ويوجعوها تجيبلها برا (حمالة صدر) وتحسسيها ان ده عادي ومش حاجه تتكسف منها
بس البرا دي لازم تكون قطن ومش ضيقه
طبعا الملابس الداخليه عموما لازم تكون قطن ومش ضيقه عشان ما تضايقش البنت وكمان عشان متاثرش فى عملية النمو
وفايدها فى الوقت ده انها بتحمي الثدي شويه وبتقلل من الاحساس بالام فيه وكمان ما بتخليش البنت دايما طاويه كتافها عشان تداري صدرها وده طبعا غلطا جدا على عمودها الفقري بيشووه تماما
وعودي البنت تفضل لابسه البرا طول ما هى صاحيه عشان الثديين ما يسقطوش لو حبت تقلعها وهى نايمه اوك ويبقى احسن
انما تتعود تلبسها على طول
ويستحسن دايما للبنات تعوديهم يدهنوا الثديين من قبل البلوغ كمان بزيت زيتون ده مفيد اوي
وكفايه كده على النقطه دي
وشكرا ياعمرو

الجمعة، 19 يونيو 2009

نقطة نظام يا بشر



اييييييييييييه ده

نقطة نظام يا جودعان مش كده
فى ايه ؟؟ سمك لبن تمر هندي ؟؟!!

التعليقات عشان مناقشة البوست نفسه والاسأله بشأن موضوعه

واي حد من فضلكم عنده سؤال او عنده اقتراح او اي حاجه من هذا القبيل يتفضل ويتكرم ويبعتلي على الاميل بتاع المدونه
لان فى اسأله خطيره وما ينفعش الاجابه عليها ببساطه

وبتكون محتاجه لاستشاره طبيه اونفسيه
لونفسيه احنا ممكن نلطش ماااااااشي

انما لو طبيه هانكون محتاجين اجابه من طبيب
وجاري البحث حاليا عن مصدر طبي للاجابات عشان نحمله كامل المسؤليه (مافيش متبرعين يا اخوانا )

بس من فضلكم الاسأله تتبعت على اميل المدونه وانا وعمرو هاناقشها ونشوف ينفع احنا نجاوب ولا لا
ونشوف راي المستشارين الى هانستوردهم ان شاء الله

ونرد عليكم على اميلاتكم او على صفحات المدونه زي ما تقرروا انتم

بس مش عايزه غلاسه كل واحد يبعت يقولي ما تنشريش مشكلتي
ايه ده بقى ماليش دعوه امال انا انشر ايه انشاء الله
اقعد كده ارد فى الخفاء على الجميع ولا ايه

هاقترح عليكم اقتراح ان الى مش عايز ينشر مشكلته يسمحلي انا اغير في تفاصيلها وانشرها مع ردي عليها
عشان الناس تستفيد من فضكلم وده الهدف اساسا من مناقشتي مشاكل الناس هنا

فى حاجه كمان
اثنين من اصدقائي قالولي انتى قلبتيها طبيبك الخاص كده يا بعبوعتي ما ينفعش كده اقفليها احسن واقعدي على تلها
طبعا انا ما اعرفش الصراحه طبيبك الخاص دي كانت ايه

سألت بقى خبير فني فقالي انها كانت مجله بتصدر زمان وكان فيها باب للمشاكل الجنسيه وبتتكلم بشكل طبي
قلتله طب امال بيقولوها كانها تهمه ليه كده ؟؟ طب ما كانت تبقى كويسه وتمام وميه ميه .

قالي اصل المراهقين كانوا بيشتروها بقى كلهم وكده يعنى ؟؟

الله طب هو عشان المراهقين بيشتروها تبقى قلة ادب ؟؟ طب ما يشتروها اهم يفهموا مش احسن ما يشتروا مجلات سيكو سيكو ؟؟!!!

قالي يعنى اصل المجله كانوا بيستهبلوا وينزلوا بقى شوية شطه كده على المجله عشان تتباع بالطريقه دي صورتين بتاع كده يعنى .

انا بقى باقول حتى لو كانت كده طب واي يعنى ؟؟!!!

اتوقع انها كانتش صور جنسيه يعنى كانت صور توضيحيه جايز بس احنا كشعب متخلف وعبيط شوفنا انها قلة ادب يعنى .
وعليه حتى لو تحول الامر فى المدونه هنا لطبيبك الخاص بتاعتكم دي ما عنديش مانع بس لما نلاقي طبيب الاول .
وبعدين مش قافلاااااااااها ماشي بقى ؟؟؟

والبوست الجديد للبنات ان شاء الله بكره هاينزل بس قلت اقولكم الكلمتين دول جايز حد يفهم .
الى اللقاء يا اصدقاء

الأحد، 14 يونيو 2009

مراهقة الصبيان و اللحظات الحرجه ..

مساء الخير أعزائى المدونات و المدونين ..
البوست اللى فات أتكلمت فيه عن جلسة ما قبل البلوغ للصبيان .. و على فكره الجلسات اللى بأتكلم عنها لتوعية الشاب الصغير و تفهيمه ما هو مقبل عليه مش شرط أبدا تكون كلها فى جلسه واحده و لكن ممكن هذه المعلومات توصله على مدى عدد من الجلسات و ممكن أيضا أن تأتى بشكل طبيعى أو تظهر له أنها جلسات عفويه غير مخطط لها من قبل و ده حيفيد كتير فى مدى اٍستيعاب المراهق لها ..
النهارده بقى عاوز أتكلم عن مرحلة ما بعد بلوغ المراهق .. يعنى خلاص تأكدنا اٍن الولد قد بلغ و أصبح رجلا بحق و حقيقى .. قادر على الاٍنجاب و ده شرط أساسى ليحصل على لقب رجل من الناحيه البيولوجيه ..
هنا بقى حنلاحظ تغيرات شكليه و نفسيه على المراهق تضاف للتغيرات اللى لاحظناها عليه و اللى أتكلمت عنها فى البوست اللى قبل ده ..
حنلاحظ عند بعض المراهقين بداية ظهور حب الشباب .. و هى علامه قد تكون مزعجه جدا للبعض و يشترك فيها الصبيان و البنات على السواء و تزول بعد فتره حين تنتظم الهرمونات داخل الجسد و لا تترك أثرا لو تعاملنا معها بالشكل الصحى السليم تحت اٍشراف طبى لأن لكل حاله علاجها الخاص على حده .. و للأسف قد يستمر اٍزعاج حب الشباب مدى الحياه لو تعاملنا معه بالفهلوه و الحداقه و تفقيع الحبايه و النكش فيها بالأظافر الملوثه لتترك فى النهايه أثرا واضحا و حفر تظل علامات على الوجه و الجسد مدى الحياه ..
أنصح الآباء و الأمهات بالتوجه فورا مع صغارهم لطبيب أمراض جلديه متخصص و مباشرة العلاج فور ظهور حب الشباب على عيالهم و اٍشعارهم بمدى اٍهتمامهم بمظهرهم و خوفهم و قلقهم عليهم ..
لييييييييه ؟؟؟
و ليه أنا بأتكلم فى النقطه دى بالذات باٍستفاضه شويه ؟؟
لأن ده حيكون مدخل مناسب و عفوى للثقه المطلوب أن تنشأ بين المراهق و بين الكبار .. و ده حيكون ربما أول تطبيق عملى لمدى الثقه بينهم .. بخلاف طبعا أهمية الحفاظ على صحة الأبناء ..
مرحلة المراهقه عند الصبيان ..
و يالها من مرحله ..
و يا طول عذاب البابا و الماما و الجيران و المدرسين و المجتمع و الناس و جميع الأهل و الأحباب يبلغونكم السلام لو ماعرفناش نسيطر على الولد و ناخد بأيده صح و نعدى به تلك المرحله المليئه بالألغام و الشراك الخداعيه التى بيتبادل نصبها المراهق مره و الكبار مره ..
بادىء ذى بدء اٍعلم عزيزى الأب و عزيزتى الأم أنكم بتتعاملوا فى هذه المرحله مع اٍنسان من لحم و دم يملك قلبا شديد الحساسيه و عقلا يتأرجح فى حيره ما بين الأفكار الطفوليه و الأفكار الرجوليه التى تحارب جاهده لتزيح الأولى و تستقر مكانها .. و فى نفس ذات الوقت يوجد بداخل جسده وحش .. وحش بمعنى كلمة وحش .. وحش خرافى رهيب يتمثل فى رغبته و غريزته الجنسيه الجديده عليه و الغير مهذبه و لا مستأنسه بكل قوتها و عنفوانها و اللى هو أصلا مش عارف و لا قادر يسيطر عليها ..
طيب .. واحده واحده كده تعالوا الأول نبص من بره على خريطة حياة المراهق و نحاول نفهمها ..
فى المرحله دى حنلاقى المراهق قد بدأ فى الاٍنفصال وجدانيا نوعا ما عن الأبوين و يمكن عن اٍخوته كمان .. حيبتدى يبقى له العالم الخاص به اللى غالبا مش بيختاره و لكن بيفرض عليه من المدرسه أو النادى أو حتى الشارع ..
حنلاقى المراهق بيبدأ فى أن يكون ولاءه للجماعه .. للشله يعنى بمعنى أصح .. حيغضب و يثور لو ذكرنا قدامه أحد أعضاء شلته بسوء .. حنستغرب من عصبيته الشديده لما الزمالك يتغلب كالعاده مع أن الوله أصلا ماكنش له فى الكوره !! لكن اٍحتياجه الوجدانى للشعور بأنه بينتمى لجماعة ما خلته زملكاوى فجأه و ياللعجب !!
أصبح للمراهق عالمه الخاص .. ربما عالم سرى لا يطلع عليه أحد من الكبار و ربما عالم معلن يتمثل فى ميول و اٍهتمامات مفاجئه قد ظهرت عليه زى الرسم و الموسيقى و الرياضه و الصيد و النجاره و تربية الحيوانات الأليفه و حاجات كتير كتير بيتنقل بينها بسرعه شديده و بعدم تركيز فى أى واحده منهم .. و أيضا حنلاحظ سرعة ملله من كل الحاجات اللى بيعملها ..
المراهق بيحاول لا اٍراديا يثبت رجولته المبكره .. يثبتها بشتى الطرق .. ممكن عن طريق القيام بحركات اٍستعراضيه متهوره .. و ممكن عن طريق الملابطه مع الكبير و الصغير .. و حتى ممكن تصل الحكايه لاٍقامة علاقات مشبوهه مع المنحرفين و الخطرين ..
باٍختصار .. المراهق يا جماعه بيكون فى حالة تخبط وجدانى عاطفى نفسى يشعر بأن كل المحيطين به من الكبار مش فاهمينه و مش قادرين و لا عارفين يتعاملوا معاه .. و هنا تكمن الخطوره كلها ..
طبعا تنشئة الطفل من صغره على التدين و معرفة الحلال و الحرام من أهم الأسلحه اللى حيواجه بيها هو شخصيا بنفسه فترة مراهقته .. يعنى على الأقل حيكون عنده الأساس السليم و المتين اللى حيحميه من الوقوع فى الخطأ نوعا ما .. و لكن ناخد فى الاٍعتبار أنه رغم تدين المراهق فأنه لايزال لسه عرضه لمخاطر جمه ..
المطلوب من الآباء فى هذه المرحله التعامل مع نفسية المراهق اللى بتتغير و بتتطور خصائصها يوم بعد يوم .. و فى نفس الوقت مع جسده الرجولى اللى بينمو و بتزداد مطالبه الغريزيه ساعه بعد ساعه ..
المراهق فى هذه المرحله بيحتاج قدوه رجوليه .. يعنى رجل فى حياته بيتخذه قدوه و مثال يحتذى به فى سلوكه و تصرفاته .. و هل أفضل من الأب قدوه ؟؟ لا طبعا لكن لو كان فعلا الأب قدوه حسنه ..
مثال بسيط جدا : ماينفعش يكون فيه أب مدخن و ينصح أبنه بعدم التدخين بل و يغضب و يثور عليه و يعاقبه لما يقفشه بيشرب سيجاره فى الخفاء ..
و قيسوا على كده .. ده أبسط مثال يعنى ..
كمان ما ينفعش مهما حاولنا أنه نقنع المراهق بأن أمه هى قدوته بسبب غياب الأب لأمر ما .. لأن مهما كانت الأم قدوه جيده للبنات لكن من الأصلح و الأصح أن يكون فى حياة الشاب الصغير قدوه رجوليه .. أكيد مش شرط يكون الأب اللى تغيب عن الساحه لأى سبب لكن ممكن يكون زوج الأم مثلا أو الأخ الأكبر أو العم أو الخال .. كده يعنى .. لكن من البديهى أن يكون القدوه رجلا يستحق أن يكون قدوه و قادر و فاهم و على درجه من الوعى و النضج تؤهله للتعامل مع الشاب الصغير ليأخذ بيده لبر الأمان ..
المراهق تتنازعه فى هذه المرحله الكثير من التغيرات الوجدانيه اللى هو نفسه لا يجد لها تفسير .. و اٍن وجد فبتكون هذه التفسيرات مغلوطه و مخلوطه بتفسيرات أقرانه اللى هم أصلا أشد جهلا منه .. و علشان كده فمن واجبنا أن ننقى فكره و نهيئه قبل أن تترسخ فى ذهنه مفاهيم قد تؤدى به للوقوع فى مستنقع الهباله المحكم اللى سيظل ملازم له مدى حياته .. و مثال على ذلك ما سوف يسمعه من أصدقائه عن فحولتهم و حجم أعضائهم الذكوريه المخيف و المرعب !! و لعلمكم أبصم بالعشره أن هذه النقطه الكوميديه بالذات تسيطر على فكر المراهقين ليلا و نهارا و أزعم أنها من أوائل المواضيع اللى بيلتوا و يعجنوا فيها كل ما يشوفوا خلق بعض ..
نيجى اٍحنا بقى كآباء واعيين نفهم المراهق و نقوله : يا وله ماتديش ودنك للعيال الهبله دى و ما تصدقش لو حد قالك أن بيتمتع بحجم عضو ذكرى قد اللى عندك عشرميت مره لأن ده مش حقيقى .. و العضو الذكرى الطبيعى للى فى سنكم كده بيبقى حوالى من 9 ل 11 سم و بيفضل ينمو و يزداد طولا و غلظه كل ما تكبر لحد ما أقصاه بيوصل لحوالى 15 سم و ده بيختلف من راجل للتانى .. و خد بالك يا أبنى من حاجتين مهمين أوى تحطهم حلقه فى ودنك : الرجوله مالهاش دعوه خالص بحجم العضو و ماتحاولش أبدا تعمل مقارنه بين اللى عندك و بين ما يمكن أن تقع عليه عيناك صدفه فى أفلام اٍباحيه ضاره بكل المقاييس .. لأن يا وله الرجاله اللى بيمثلوا فى الأفلام دى مش طبيعيين لا فى حجم أعضائهم الضخمه و ده السبب فى اٍختيارهم للعمل بمثل هذه الأفلام و مش طبيعيين برضو فى أخلاقهم بدليل موافقتهم على الظهور عرايا على الشاشه .. فيعنى ماتعملش مقارنه أبدا بينك و بين ما تراه صدفه ..
النقطه دى مهمه و الله يا جماعه رغم ما قد يبدو للبعض أنها سخيفه و مالهاش لازمه .. بس بجد مهمه .. لأننا لو بثينا روح الثقه فى المراهق من صغره تجاه هذه النقطه حيفضل عمره يتمتع بهذه الثقه حتى فى علاقته المستقبليه مع بنت الحلال اللى حتتجوزه .. و كمان أدينا نبهناه بالمره لمدى كذب و خطورة هذه الأفلام الاٍباحيه و ننبهه طبعا أن مشاهداتها أصلا حرام و عيب لأنه بيطلع على عورات الغير ..
المراهق البائس فى المرحله دى كمان بيجد نفسه منساق لااٍراديا للوقوع فى هوة ممارسة العاده السريه .. زى ما قلت فى البوست اللى قبل ده مش حنرعبه منها زياده عن اللزوم .. و مش حنقوله حاجات غير حقيقيه .. لكن حنستعمل أقصى درجات الصدق و الواقعيه معه .. حنفهمه مدى أضرارها على صحته الجنسيه فى المستقبل لو أفرط فيها .. و حنوعيه من اٍمكانية أن يحدث له برود جنسى بسببها و مش غلط أننا نشرح له معنى البرود و الضعف الجنسى لدى الرجل .. و أيضا سرعة القذف اللى ممكن فعلا تحدث للرجل بسبب مداومته على ممارسة العاده السريه منذ صغره .. و نأخذ فى الاٍعتبار أنه سوف يمارسها شئنا أم أبينا و لو من باب الفضول و التقليد بل و الرغبه المستعره بداخله خاصة مع كل المغريات اللى بتحيط به من جميع الجهات ..
الأخطر من وقوعه فى اٍدمان العاده السريه هو وقوعه فى براثن الزنا و العياذ بالله خاصة مع تسارع رتم التدهور الأخلاقى فى هذا العصر .. حنفهم الوله أيه هو الزنا .. و حنفهمه أن حدوث العلاقه الجنسيه بغير اٍطار شرعى اللى هو الزواج من الكبائر اللى لا يرضى عنها الله .. و مانسيبوش كده و خلاص .. لأ .. نفهمه أيه الحكمه فى حرمانية الزنا .. و أيه الفرق بين هذه العلاقه المحرمه و بين العلاقه الحلال بين الرجل و زوجته علشان ما يتعقدش من الجنس أصلا كموضوع ..
اٍعلموا يا جماعه اٍن المراهق حين تنهشه الرغبه الجنسيه بأسنانها المتوحشه بيبقى زى المجنون و بيفقد العقل تماما فى لحظه .. و لسه النهارد الصبح قرأت خبرا مؤلما بجد و هو أن صبى مراهق عنده 15 سنه كان بصحبة زوجة عمه و أبنها الطفل اللى عنده 9 سنوات فالأم تركتهم فى السياره فى شارع قصر النيل بوسط القاهره و هو من أشد شوارع القاهره اٍزدحاما و ذهبت تشترى حاجه و لما رجعت رقعت بالصوت لما لاقيت المراهق ماسك اٍبنها الصغير فى السياره و بيعتدى عليه جنسيا !!!
حبيت أسوق لكم هذا الخبر العجيب للدلاله على ما يمكن أن يصل اٍليه جنون المراهق الجنسى بغض النظر عن كونه منحرفا أو لا .. بنكون حريصين جدا فى تعاملنا معه بدون أن نشعره .. بنكون حريصين على عدم اٍعطاءه الفرصه ليخلو بالبنات أو الأولاد الصغار مهما كانت درجة ثقتنا فى أخلاقه لكن مش بنصارحه بده .. أيضا بنحرص على أن لا ينام فى غرفه واحده مع اٍخواته البنات أو مع أشقاءه الصبيان الصغار .. بنحاول على قد ما نقدر نوفر له غرفه لوحده لأن ده كمان حيديله اٍستقلاليه فى شخصيته ..
بننبه على كل الاٍناث فى البيت - بمعنى كل الاٍناث - عدم اٍظهار ما يمكن أن يثير المراهق جنسيا لا بالنظر و لا بالسمع و لا بالشم و لا غيره .. و لا تستغربوا من هذه النقطه لأن المراهق فى هذا السن لا يكون قادرا على التمييز تماما بين ما هو صح و بين ما هو محرم و بيكون طبق الاٍستقبال الجنسى لديه شديد الحساسيه و التأثر و من المرفوض طبعا أن يرتبط فى ذهنه فعل الاٍثاره الجنسيه بأى أنثى من محارمه ..
بنفهمه أن مشاعره تجاه البنوتات من العائله اللى كان بيلعب معاهم سوف تتغير و تتحول لمشاعر تانيه فيها اٍنجذاب عاطفى لم يشعر به من قبل .. ماتخفش يا وله و برضو ما تتخضش لأن ده طبيعى حيث أنك بقيت راجل و أصبحت عندك مشاعر رجوليه فمش مطلوب أن تشعر بالذنب لو حسيت بمثل هذه المشاعر تجاه بنات عمك و لا خالك لكن اٍفهم كيف تسيطر و توجه المشاعر دى وجهتها الصح مع الأخذ فى الاٍعتبار اٍنهم من دمك يعنى عرضك .. و مثل هذه الملحوظه ستبث فى نفس الصبى قيما عليا تتصل مباشرة بقيم الشهامه و الرجوله ..
من المفيد جدا .. أنا طولت عليكم ؟؟ معلش هانت خلاص قربنا أهو ..
كنت بأقول أنه من المفيد جدا أننا نلاحظ ميول المراهق الجنسيه و نسجلها فى عقلنا و نتابع تطورها .. ناخد بالنا الواد ده بيميل لأيه ؟؟ أيه هى مثلا شكل الاٍناث اللى بيبدى اٍعجابه بيهم عفويا من غير ما يقصد ؟؟ أيه هى الحاجات اللى بتجذب عينيه فى الأنثى ؟؟ و أى المناطق ؟؟ ليه بقى ؟؟
لأنه أحيانا الولد يكون بداخله اٍنجذاب لشىء ما غير طبيعى شويه اٍما بسبب جينات الوراثه اللى أخدها من أبوه أو جدوده و اٍما بسبب ميول شخصيه تولدت عنده نتيجة تجارب مرت عليه و أرتبطت فى ذهنه بالفعل الجنسى ..
مثلا ..
لو لاحظنا اٍن اٍهتمام المراهق بأصابع أو قدم الأنثى اٍهتماما زائدا عن المعقول يبقى ده اٍتجاه فى شخصيته مش صح فبنعمل جاهدين على ترجيع اٍهتمامه للاٍتجاه الصحيح و لعلمكم دى مهمه مش سهله أبدا و فى غاية الصعوبه لأن تقويم الميول لدى الذكور فى الكبر تقريبا مهمه شبه مستحيله و فاشله فالأصح تقويمها فى الصغر .. ده مثال لما يمكن أن يكون عليه الاٍهتمام غير الطبيعى بأجزاء معينه من جسد الأنثى لدى الذكر و قد يتطور هذا الاٍهتمام ليكون هو فى النهايه هدف الموضوع الجنسى بالكامل ..
خليكوا حريصين أن عيالكم المراهقين ما يلبسوش بنطلونات ضيقه و خاصة الجينز حفاظا على صحة الخصيتين و اٍفرازاتهم المنويه و لترك الفرصه للقضيب لينمو و يتمدد بغير ضغط عليه .. أيضا بننصح العيال صبيان و بنات بعدم اٍرتداء ملابس داخليه مصنوعه من ألياف صناعيه تسبب اٍلتهابات جلديه خاصة مع قدوم فصل الصيف بحره و عرقه ..
بلاش تخنقوا المراهقين بالأوامر و النواهى الكتيره .. و بالمحظورات العديده .. و بالسماح و المنع على حسب حالتكم المزاجيه .. لو هددتوا المراهق مره بعقاب معين لو أتى فعل ممنوع منه يبقى لازم تنفذوا هذا التهديد مافيش هزار لأنكم لو تراجعتم مره واحده عن تنفيذ تهديد ما يبقى خلاص فلتت منكم كده ..
و لو وعدتوه بشىء فيبقى لازم و حتما توفوا وعدكم له و لو على رقبتكم لأنكم لو خلفتم وعدكم له فى حاجه عمره ما حيثق فيكم تانى أبدا فالمطلوب التروى و الحكمه الشديده فى التهديد و الوعد ..
ساعدوا أبنائكم بكل ما أوتيتم من اٍمكانيات على ممارسة هوايه معينه .. و طبعا الرياضه تأتى فى مقدمة الهوايات و يا حبذا لو رياضه جماعيه .. لأنها من ناحيه ستحافظ على صحة الصغير و تحميه من العادات السيئه كالتدخين و من ناحيه تانيه ستحافظ على شكله و هيئته الرجوليه و تنمى له عضلات سليمه و فى أماكن صحيحه ..
سيبوا المراهق يستكشف العالم من حواليه بنفسه بعد ما نوعيه و نفهمه كويس أوى الصح و الغلط .. سيبوه يجرب ينزل للحياه لوحده و لكن يفضل تحت عنينا الخبيره الأروبه من غير ما يشعر علشان نلحقه فى الوقت المناسب و مش لازم برضو نسيبه يتلسع من النار علشان يعرف أنها بتلسع ..
حذارى ثم حذارى من هنا لبكره من ضرب المراهق على وشه .. حذارى .. القلم اللى حينزل على وش المراهق حيقتل جواه حاجات كتيره أوى .. بل حذارى أصلا من العقاب الجسدى للمراهق لا لما يكون لوحده و لا قدام حد .. كمان بأحذر من التريقه عليه أو على عيب شكلى موجود فيه كأن يكون سمين مثلا أو أن يستخف برأيه لأنه شويه شويه سيشعر بالاٍحباط و سينزوى بداخل نفسه و بعدين يترمى فى أحضان أقرانه بعد ما أبتعد عنك يا حلو على الأقل هم لو أتريقوا عليه هو كمان حيقدر يتريق عليهم بدون قهر ..
متهيألى كده كفايه و أنى غطيت جوانب أساسيه فى التعامل مع المراهق و لو اٍن الأفكار مش مرتبه أوى لكنها مفهومه .. و لو فيه جوانب أو نقاط تانيه ممكن بقى نتناقش فيها فى التعليقات ..
تقبلوا تحياتى و أدعو المولى أن يحفظ عيالنا من كل الشرور و يجعلهم لنا خير راع فى كبرنا و عجزنا خاصة لما نقوم فى نص الليل نطلب قلقاس و رز بلبن :))

الثلاثاء، 9 يونيو 2009

جلسة ما قبل البلوغ للصبيان ..

مرحلة البلوغ عند الصبيان .. أهم و أصعب مرحله فى حياة الرجل .. فيها بتتفتح قدام عينيه أبواب كثيره منها ما هو معلوم لديه و منها ما هو مبهم و أكثرها بيظل مغلق و لا يقدر عقله الصغير على فهمها وحده ..
فى مرحلة البلوغ عند الصبيان كما يتشكل جسده و أعضاءه الظاهره و الغير ظاهره بشكل جديد قد يبدو مفزعا لديه بتتشكل أيضا نفسيته و وجدانه اللى بيظل ملازم له طول حياته .. فاٍما أن يكون رجل سليم جسديا و نفسيا قادر على اٍسعاد نفسه و الآخرين و اٍما أن يكون اٍنسان مشوه نفسيا و ربما جسديا يتعس نفسه و من حوله ..
فى البوست ده حأتكلم عن جلسة ما قبل البلوغ للصبيان و اللى ربما تكاد تكون متشابهه لحد كبير مع جلسة ما قبل البلوغ للبنات اللى كتبته ببراعه أختنا الفاضله بعبعه و لكن تختلف فى تفاصيلها و ربما تكون أكثر تعقيدا و الله المستعان ..
بداية كده سن البلوغ بيختلف من طفل لآخر تبعا لعوامل كثيره منها ما هو شخصى و منها ما هو بيئى .. يعنى بتتدخل هنا عوامل الوراثه و البيئه الطبيعيه .. يعنى مثلا الطفل الصعيدى اللى بيعيش فى بيئه حاره المفترض أنه بيبلغ قبل الطفل السويدى أو الدانمركى اللى عايشين فى تلاجه .. و المتفق عليه أن سن البلوغ عند الأطفال المصريين بيبدأ من 9 سنوات ل 11 سنه و فى حالات نادره قد يتأخر حتى سن 16 سنه ..
من الأفضل طبعا أن يقوم الأب نفسه بجلسة ما قبل البلوغ مع الأبن .. فاٍن لم يوجد فممكن الأخ الأكبر أو الأم عند الضروره .. و خدوا بالكم أنه الأصح أننا مانستناش الأبن لما يبلغ و نقوله تعالى بقى لما أفهمك .. لأ .. الأفضل طبعا أنه يتفهم و هو على وشك الدخول من بوابة البلوغ مباشرة حتى لا نتركه فريسه سهله لأفكاره المتخبطه و مخاوفه بل و لأصدقائه و رفاقه اللى أتوقع أنهم لا يقلوا جهلا عنه ..
طيب حنعرف اٍزاى أن الولد ده قارب أو شارف على أن يكون رجلا ؟؟
نلاحظ بعينينا التغيرات اللى بدأت تظهر عليه ..
نبدأ الملاحظه من سن 9 سنوات مثلا ..
حنلاحظ قبل البلوغ مباشرة أن أيديه و رجليه أبتدوا يكبروا شويه زياده عن المألوف .. و أن جسده بدأ يزداد طولا .. و أكتافه بدأت تزداد عرضا .. و أن وزنه بدأ فى الزياده .. و فى أحيان كثيره حنلاحظ أن واحدا من ثدييه بدأ فى أن يكون أكبر حجما من الآخر مع شىء من الألم و لكن بتزول هذه الأعراض بعد فتره ..
كمان العضلات بتنمو و بتتضخم و ناخد بالنا أننا ما نشجعش الطفل فى السن ده على حمل أشياء ثقيله ..
بنلاحظ كمان أن صوته بدأ بتغير و بيصبح أكثر عمقا و غلظه .. و أحيانا نلاقيه بيجحش بصوته من غير ما يقصد لأنه مش قادر يتحكم فى أحباله الصوتيه و ما طرأ عليها من تغير فلازم نتفهم ده ..
غير طبعا شعر الشارب و العانه اللى بيبدأ فى الظهور و كمان أعضاءه التناسليه اللى بتبدأ فى الكبر ..
هنا بقى بنتأكد أن الطفل أصبح على بداية الدخول لعالم الرجوله الذهبى بمخاوفه و غموضه و سطوته أيضا ..
أنصح الأهل بالتعامل مع الطفل بشكل جاد و أن لا تكون هذه الجلسه معاه جلسة هزار و تهريج بل الأفضل اٍشعاره بالجديه التامه بدون تجهم حتى يشعر الطفل بأهمية الموضوع و بأنه يكاد يكون رجلا بجد مش تمثيل عليه ..
أولا حنشرح له بشكل مبسط جدا أيه اللى بيحصل له من تغبرات جسديه و نفسيه .. و أن التغير فى الهرمونات بداخله هى المسئوله عن هذه التغيرات الشكليه و السلوكيه اللى بتنتابه ..
شويه شويه حنبتدى نشرح للولد أيه هو الجهاز التناسلى الذكرى بدون الدخول فى تفاصيل معقده و أسماء صعبه على فهمه .. و ممكن نستعين بالشكل المبسط ده للجهاز التناسلى الذكرى :


ناخد بالنا أن الطفل فى المرحله دى مش مطلوب منه أوى أنه يفهم و يستوعب آلية عمل الجهاز التناسلى و الأعضاء الأخرى المعاونه بالتفصيل الممل .. و لكن يكفى فى هذه المرحله تفهيمه أن جهازه التناسلى الظاهر قدام عينيه هو :
- القضيب : و ده عضو اٍسفنجى مش عضلى زى ما كتير فاهمين .. و وظيفته الاٍنتصاب لحدوث العمليه الجنسيه و نقل الحيوانات المنويه لداخل جسد المرأه و كمان لنقل البول خارج الجسم .. هنا بقى دى فرصه كويسه علشان نشرح للطفل أيه هو الاٍنتصاب ؟؟ و أنه بيتم نتيجة أوامر بتصدر من المخ لضخ كميات كبيره من الدم للقضيب ليحدث الاٍنتصاب تمهيدا لممارسة العلاقه الطبيعيه بين الرجل و المرأه .. بنفهم الشاب الصغير أن هذا الاٍنتصاب قد يكون اٍراديا بسبب الملامسه بيده لهذه المنطقه أو لااٍراديا غالبا عند الاٍستيقاظ من النوم .. أو ممكن بسبب رؤية أشياء مثيره جنسيا أو حتى من اٍهتزاز السياره أو ركوب الدراجه ..
ماننساش نطمئن الطفل أن الاٍنتصاب اللى هو بيكون مفاجئه له لما بيلاقى عضوه الذكرى قد تضخم و أصبح صلبا ليصبح شكله و حجمه مختلف عن ما عهده أمر طبيعى بل و صحى .. و مش لازم نلخم دماغه الصغيره بكيفية حدوث الاٍنتصاب تشريحيا لكن يكفى الشرح المبسط ..
أهم شىء فى رأيى أننا كمان نطمئن الطفل أنه ممكن يجد فى يوم عند الاٍستيقاظ صباحا سائل لزج له رائحه مميزه فى ملابسه الداخليه .. ما تتخضش و ما تنكسفش و ده برضو شىء طبيعى و ده اٍسمه السائل المنوى و اللى حصل لك ده اٍسمه الاٍحتلام و لازم بعدها تستحمى و تتطهر ..
ده بيكون مدخل لتفهيمه ما هو السائل المنوى و بييجى منين و بيروح فين و أيه فايدته ؟؟
- الخصيتين : زى ما أنت شايف فى الصوره جهازك التناسلى الذكورى الظاهر للعين بيتكون من 3 حاجات .. القضيب و شرحناه و الخصيتين ..
الخصيتين هم المسئولين عن اٍنتاج الحيوانات المنويه .. و أيضا هرمون الذكوره ( التيستسترون ) .. بنفهم الطفل أن الحيوان المنوى هو ما يضعه الرجل داخل جسد الأنثى ليتحد مع البويضه الأنثويه و يعملوا بيبى بتغذيه فى بطنها من دمها لمدة 9 شهور ثم يخرج للحياه ..
بنشرح للطفل شكل الحيوان المنوى و ممكن برضو نستعين بالصوره دى للحيوان المنوى الذكرى :
بنفهم الطفل أن عملية وضع الحيوان المنوى داخل الأنثى لابد أن يتم فى اٍطار شرعى اللى هو الزواج .. و أنه لا يجوز أبدا العمل بغير ذلك لأن ده بيخالف أوامر الله و تقاليدنا كشرقيين .. و أن من كل 100 ل 300 مليون حيوان منوى واحد فيهم فقط هو اللى بينجح فى الوصول للبويضه و بيكونوا الجنين ..
ممكن فى النقطه دى برضو نستعين بالصوره العبقريه دى لشرح فكرة توصيل الحيوان المنوى للبويضه :

أرجوكم بلاش نخوف الطفل فى المرحله المبكره دى و نفزعه و نحط قدام عينيه محظورات كتيره و بلاوى هو لسه عقله مش قدها ..
بلاش نرعبه من العاده السريه و نفهمه حاجات مش صح زى أنها حتلحس عينيه و حتعميه و حتبهدله و حتجننه و حاجات من دى أو زى ما قال أرسطو اٍن السائل المنوى بيحمل معه عصارة المخ :) و ده طبعا كلام مش صح.. لكن ممكن نفهمه أضرارها المستقبليه فى حالة الاٍفراط فيها .. و نفهمه كمان أنها مش ضروريه بالمره و أنه لو أستغنى عنها كلما شعر بحاجته ليها حيحتلم بشكل طبيعى و لن يشعر بحاجته الملحه للقذف لما حيبلغ أو اٍذا كان فعلا بلغ ..
بنحذر الطفل و بنأكد التحذير ده شويتين تلاته من أنه يستجيب لحد من رفاقه أنهم يستكشفوا أجساد بعض .. أو أنهم يحاولوا أن يتلامسوا أو تكون بينهم ممارسات جنسيه و لو كانت سطحيه و ساذجه و طفوليه و بنشرح له الأسباب من الوازع الدينى و الاٍجتماعى و الصحى .. و بلاش حكاية أن البوبو بتاعتك حتولع و تطلع نار لو حد لمسك فيها لأن الطفل مش ساذج و مش متخلف و حيستهزأ بكلامنا لو قلنا له كده.. بنفهمه كويس أوى أن منطقة الشرج خارج نطاق الأعضاء الجنسيه تماما .. بل أن لها وظيفه واحده محدده و هى الاٍخراج .. و أنه ما يحاولش أبدا يستكشفها بدافع الفضول باٍدخال أى أجسام صلبه و لا حتى أصبعه لأن ده ممكن يسبب له شىء من اللذه فى حالة وصوله لغدة البروستاتا فبترتبط عنده بالحصول على اللذه عن طريق هذه المنطقه ..
بنوصى الطفل يكون حريص على منطقة أعضاءه الذكوريه أثناء لعب الكره و أن يبتعد عن الشجار مع الأولاد و أن يحرص بشده على أن لا تصطدم هذه المنطقه بأشياء صلبه أو أن تتعرض لخبطات أو صدمات ..
بنوعى الرجل الصغير أنه يتجنب الاٍلتصاق بأجساد البنات فى الأماكن المزدحمه متعمد أو غير متعمد لأنه ده بيتنافى مع الدين و القيم و الأخلاق بخلاف أنه بيسبب له اٍنتصاب بيكون مؤلم لو لم يتم القذف ..
و طبعا النظافه الشخصيه أمر مفروغ منه و تعليمه كيفية الاٍستبراء و التطهر بدون خجل ..
و كل ده لا يمنع برضو من أن الرجل الصغير لازال يحتاج لعشرميت عين عليه حتى نقدر على الأخذ بيده و مساعدته على عبور هذه المرحله الرهيبه الخطيره و الخروج منها سليم اٍن شاء الله .. سليم نفسيا و جسديا و وجدانيا ..
نتابعه مع مجتمعه الصغير .. نتابع أصحابه و نتفحص أشكالهم و اللى نشك فيه و لو مجرد شك نبعده عنه فورا و لكن بالسياسه و بصنعة لطافه مش بالعنف و الاٍذلال .. نتابع جهاز الكمبيوتر بتاعه و موبايله و ده مش تجسس و مش عيب لأن عيالنا حته مننا و من لحمنا و حنتسأل عنهم يوم القيامه ..
نعمل حملات تفتيش مفاجئه على دواليبهم و مكتبهم و كتبهم فى غير وجودهم و من غير ما يحسوا و نشوف لو فيه ممنوعات مخبينها و مش لازم نواجههم بكشفنا لممنوعاتهم علشان مايفقدوش الثقه اللى بينا لكن ممكن جدا نعالج أخطائهم الصغيره و نوجههم للصح من غير ما نشعرهم ..
نوصى الأم أنها تلاحظ الملابس الداخليه للصغير قبل وضعها فى الغساله و لو تكرر ظهور اٍفرازات منويه عليها يبقى كويس و علامه جيده لأنه بيفرغ طاقته فى الاٍحتلام و لكن لو أختفت هذه العلامه حنعرف أن الوله بيفرط فى ممارسة العاده السريه فنلحقه قبل ما ينغمس فيها ..
بجد لو المراهق أطمأن للأب أو الأم حيبقى سره معاهم مش مع أصحابه الجهله .. و مش حيستقى معلوماته غير منهم مش عن طريق النت بمواقعه الفاضحه و لا الفضائيات بكليباتها الأفضح ..
الثقه هى عماد العلاقه بين الأبن و الأب لو تعامل معه أنه رجل بس يراعى أن مداركه لسه لم تتفتح تماما ..
دى جلسة قبل البلوغ و كيفيتها على حسب فهمى و على حسب خبرتى مع ولدين عديت بيهم و لله الحمد فترة البلوغ و المراهقه بدون خسائر تذكر .. و أزعم أنه فيه جلسه تانيه مع المراهق بس لما يكبر شويتين و تبدأ شخصيته الحقيقيه فى التكون .. و يبدأ يتنح لبنت الجيران ..
متشكر لكم و تقبلوا تحياتى ..

الاثنين، 8 يونيو 2009

عمرو .... نورتنا


ازف اليكم يا ايها البلوجاريه المحترمين


خبر عظيم الشأن


الا و هو :


انضم الى فريق المدونه الاشم


الاخ عمرو وزي ما انتم شايفين اسمه منور اهو


وحقيقى اعتقد ده شرف لنا يا عمرو انك تشارك معانا فى مدونتنا المتواضعه


والبت اعترافات شكلها كده خافت وهربت من يوم ما بدأنا البوستات الجديد

ههههههههههههههههههه


نورتنا يا عمرو ومتشكره لك اوي

السبت، 6 يونيو 2009

انحراف الاطفال



دلوقتي يا جماعه اختكم ما زالت مزنوقه ومحتاسه فى الجزء بتاع الولاد من جلسة ما قبل البلوغ


فانا قلت عشان يعنى ما نضيعش وقت ومش تزهقوا مني اعرض عليكم رساله جاتنى بتعرض مشكله مهمه جدا


وهى انحراف الاطفال جنسيا


هما اساسا ما بيبقاش عندهم لسه متطلبات جنسيه حقيقيه الا انهم بيقلدوا حاجات بيشفوها بالصدفه او بالغباوه من الكبار


لان الاطفال بطبعهم فضوليين وبيقلدوا الكبار فى الوحش والحلو


المهم هى صديقتنا هنا هاتعرض موقف وعليكم بقى يا حلوين تقولوا من وجهة نظركم هى تتصرف ازاي وانا طبعا هاقول رايي



الى الرساله



بصي يا بعبعة
بما اننا لسة فى المشاكل او معلومات الصغيرين
ولسة ان شاء الله بوست الولاد قادم


الولاد بقى بيبقوا حتى قبل البلوغ بيبقى عندهم فضول رهيييييييييييييييب
ومننساش الولاد الصغيرين اللي ماشاء الله عليهم بيقفوا قدام مدارس البنات يتحرشوا بيهم وببنات الجامعة كمان

انا عايزة أقولك ان الولاد من أول سن المدرسة 6 و7 سنين بيتعرضوا لانهم يشوفوا أفلام أباحية سواء مع اصحاب واخوات أو بالصدفة


وبالمناسبة انا عايزة اذكرلك موقف كان هيجيبلي حالة شلل الأطفال وانا شحطة كدة


من كام سنة كدة اتنين من ولاد خلاني الكتير لقيتهم في البلكونة في وضع غير لائق وبيبوسوا بعض


طبعا الاتنين ولاد وفى نفس السن وهم ولاد عم
انا بصراحة معرفتش اعمل معاهم ايه ولا عرفت اخد رد فعل
ونفسي اعرف رد الفعل الصحيح المفروش يبقى ايه؟؟؟

انا عارفة ان اللي بيعملوة دة نوع من أنواع الفضول والتقليد.. بس لما هم بيعملوا كدة وهم 7 سنين.. امال هيعملوا ايه لما يبلغوا بقى


ربنا يعينا ده احنا هانشوف ايام سوده



لحد هنا وخلص الاميل


انا هاقول رايي فى الموقف وكان ممكن تعمل ايه


اولا لاول وهله لازم كان كل واحد فيهم ياخد قرصه من ودنه جامده وتحذير رهيب كده بعنين قويه بتبرق


وفى اقرب فرصه تزنقيهم ويستحسن كل واحد لواحده وتكلميه عن اللواط والفعله الشنعاء دي والفرق بينها وبين الوضع الطبيعى بين ست وراجل من خلال الجواز طبعا

بشكل مبسط من غير الدخول فى تفاصيل العلاقه لان سنهم صغير


وكمان توضيع الجانب الدينى ومافيش مانع من قصة قوم لوط


وكمان فى الجلسه دي يبقى فى قرصة ودن بان لو حصل ده تاني هاتقولي باهاليهم وكده يعنى




وارجوكم ارجوكم ارجوكم الولاد هما كمان صغيرين فى السن مش عشان هو ولد يبقى مش مهم يتفرج على اي حاجه وتقولوا قدامه اي حاجه وتعملوا قدامه اي حاجه


لا نفسيه بتتاثر زي البنت بالظبط


وكمان خدوا بالكم العيال اذكى منكم وعندهم فضول فظيع


عايزه اسمع رايكم فى الموقف وفى التصرف فيه والى شايف اي تصرف تاني ينفع يتفضل يقول


تحياتي لكم ولصاحبة الرساله

الثلاثاء، 2 يونيو 2009

جلسة ما قبل البلوغ للبنات(تحديث)



كل واحد يجيب كراسته وقلمه وورايا


احنا وقفنا المره الى فاتت لحد عمر التسع سنين ويارب تكونوا فهمتوا
ياااااارب


المهم النهارده بقى هانتكلم عن موضوع مهم جدا جدا جدا


وهو جلسة ما قبل البلوغ


اسمها ايه ؟؟ ما قبل البلوغ


يعنى حضراتكم ما ينفعش تستنوا لما يحصل البلوغ اصلا عشان تكلموا ولادكم عنه
لا ده بيعمل صدمه نفسيه خصوصا عن البنات


فارجوكم لازم الجلسه دي تكون قبل البلوغ



طبعا البلوغ ده ممكن يحصل عن الولاد من سن 12 سنين لحد 14 سنه
وعند البنات من سن 11 سنه لحد 16 سنه

ودى حاجه تقريبيه جدا وفرديه وبتتاثر بحاجات كتير زي البنيه الجسديه للشخص مثلا

او الطبيعه المناخيه للمكان الى عايش فيه الطفل
فمثلا فى المناطق الحاره ممكن يبدأ البلوغ مبكر عن كده اعتقد فى حالات بلوغ سجلت عند 7 سنين للبنات وتسع سنين للولاد
فعلى كل واحد بقى انه يراعي الظروف المحيطه به وبابنه او بنته محل النقاش .



طبعا انا النهارده عشان ما اطولش عليكم هانعم الجلسه الخاص بالبنات


جايبالكم معايا رسمه مبسطه جدا للجهاز التناسلي الانثوي من فضلكم تطبعوها او تحفظوها عندكم عشان تشرحوا عليها للبنت


وهى مبسطه جدا للاجزاء الداخليه ومش هانحتاج اكتر منها عشان نفهم البنت الموضوع ايه وازاي وفين وامته


طبعا مش محتاجه اقولكم انكم زي الشطار كده تكونوا قاريين عن الموضوع ياريت علميا كويس قبل ماتتكلموا فيه عشان تقدروا تجاوبوا على اي سؤال يدور فى خاطر البنت


ويفضل طبعا ان الى تقوم بالجلسه دي هى الام لكن لو الام مش موجوده ومافيش غير الاب نو برووبليم

هاعمل محاكاه بقى عشان فى ناس فكيكه شويه وتقولي يعنى نقول ايه يعنى



من اول السطر وعداكي العيب يا بت يا بعبعه



تعالى يا سوسو انا عاوزاكي فى موضوع مهم هانتكلم شويه


وفى اوضه لواحدكم تقعدوا كده فى هدوء مش فى الفسحه قدام الشعب المصري كله لا طبعا


وتخلي الموضوع ودي كده وظريف ونضحك ونهزر عشان البنت ما تتكسفش


بصي يا سوسو انتى ما شاء الله كبرتي وفى حاجه مهمه عايزه اشرحهالك
بصي يا جميل البنت لما بتكبر وتبقى حلوه كده زي القمر ويبقى عمرها مثلا 11 سنه وجايز اكتر وجاي اقل بيحصلها حاجه اسمها الدوره الشهريه


شور هى هاتسأل يعنى ايه ماما


بصي يا جميل شايفه الصوره دي . دي صوره للجهاز التناسلي وده موجود فى بطن كل بنت وكل ست وهو ده الى بيعيش
جواه البيبى الصغير فى بطن مامته
وده بيبقى موجود هنا كده وتشاوري على بطن البنت نفسها من تحت الى هو مكان وجود الجهاز فعلا
فاكره البيضه الصغيره الى اد بيضة السمكه اهى بتكون هنا
شوفي يا ستى ده الرحم والرحم وده الى الجزء الى بيعيش جواه البيبى طب منين بتيجى البيضه الصغيره ؟؟
شايفه ده ؟ ده حاجه اسمها المبيض بيبقى فيه بيض صغير اوي اوي وكتييييييير فى اول كل شهر كل ما بيضه فيهم تكبر وتكون جاهزه
تطلع من الكيس الى متشاله فيه وبعدين تنزل من المبيض هنا كده والحته دي الى زي الزماره دي اسمها قناة فالوب
البيضه الصغيره بتنزل فى القناه دي والقناه دي بتنقلها لحد ما توصلها للرحم عشان تعيش فيه
فاكره الحاجه الصغيره الى قلتلك لازم تيجى من عند الرجل عشان تدخل جوه البويضه ويبدأ يتكون البيبى
اهى الحاجه دي اسمها الحيوان المنوي وبتكون صغييييييييره جدا مش بنشوفها الا بالمكرسكوب
لو الحيوان المنوي ده جه ودخل جوه البويضه بيتكون البيبى

(اذا سألت البنت واكيد هاتسال هو ازاي الحيوان المنوي بيجى عن البيضه ؟)


ان شاء الله مره تانيه هابقى اقولك ازاي عشان ده موضوع طويل .


عادي جدا ما دام فى صدق فى الكلام هى هاترضى بتاجيل بعض المعلومات نو بروبليم


اما لو ما جاش البويضه دي بتنفجر ومش بيحصل الحمل ولا بيكون فى بيبى


بس البويضه دي بتقعد فى قناة فالوب وفى الرحم شويه ايام كده خلال الايام دي الرحم بيكون بيستعد
عارفه ازاي ؟
فى الرحم فى حاجه اسمها شعيرات دمويه الرحم بيحوش الدم فى الشعيرات دي عشان لو بقى في بيبى البيبى يتغذى ويكبر من دم ماماته
مش بياكل الدم لا يا عبيطه
بيبقى فيه حبل بينه وبين مامته هى بتديله الاكل من خلال الدم
مش احنا قبل كده قلنا ان الجسم بيهضم الاكل وياخد الحاجات المفيده الى فيه يديها للدم والدم ينقله للجسم ؟


(على اعتبار انك تكوني شرحتي لها قبل كده عملية الهضم بتتم ازاي )


اهو كمان مامته بتديله دم فيه كل الحاجات المفيده عشان يكبر جوه بطنها .


فلما البويضه بتنفجر كمان الشعيرات الدمويه الى جوه الرحم الى محوشه دم دي هى كمان بعضها بينفجر والدم ده هايروح فين بقى ؟؟؟؟
بينزل من الرحم ده (واحنا بنشاور على الصوره ) للقناه دي عارفه القناه دي بتنتهي فين ؟؟
اخرها جنب الفتحه الى بينزل منها البيبيه

(وطبعا نلفت نظرها لانها ما تحاولش تستكشفها بايدها لان ده يعملها جرح ومشكله ) بس بدون رعععععب ما تعربيش البنت اتكلمي ببساطه من فضلك .


فاكره مش انا قلتلك ان البيبى بينزل من الفتحه دي


الصغيره دي يا ماما ؟؟!!!


ايوه يا حبيبتى سبحان الله ساعة الولاده بتكبر شويه عشان البيبى يعرف ينزل منها
الدم بقى الى احنا اتكلمنا عنه بينزل من الفتحه دي للبنت
والموضوع ده بيتكرر كل شهر
فالبنت كل شهر بيجيلها الدوره الشهريه الى هى شوية دم صغيرين كده البنت بتقعد 3 ايام مثلا ينزل كل يوم شوية دم صغيرين كده


وبتوجع يا ماما ؟؟؟


يعنى ساعات تعمل مغص كده حبه صغيرين


وطبعا تردي على استفسارتها كلها ببساطه وصدددددددددددق


زي مثلا طب هى هاتعمل ايه مع الدم ده وهاتمشي ازاي ما هى هيبوظ الدنيا كده
وزي طب هما الرجاله مش بيحصلهم كده ؟


واي سؤال يخطر على بالها حاولي تلاقيه له اجابه مبسطه


انا مش فاكره حاجه تانيه
ياريت الى عنده حاجه يقولها


وان شاء الله المره الجايه البوست هايكون خاص بجلسه ما قبل البلوغ للولاد


وجاااااايز استعين بصديق يكتبها
اعتقد هايكون اقدر مني
ولو ما رضيش ليا ربنا بقى


يا مفترييييييييين
طب ادعولي طيب ولا ايه حاجه
الى يجى منكم فايده