الجمعة، 31 يوليو 2009

التشنج المهبلي



الحقيقه يا جماعه بتجينى اسأله كتير جدا مضمونها احساس الزوجه بالالم العضوي عند الجماع
واغلب الحالات دي بتكون يا اما حديثة الزواج يا اما مش حديثه لكن الالم ده مستمر من بداية الزواج اصلا
وطبعا وجود الالم ده عند الست حاجه مش سهل ابدا لان المكان حساس وآلامه بتكون صعبه وفوق تعرضها للالم ده ممكن كمان يحصل عندها ارتباط شرطي بين الالم والعلاقه وهاتكره العلاقه من اصلها
وطبعا في وجود الالم بتنتفي اي متعه عنها ويمكن تاثر على متعة الزوج واداؤه الجنسي لو عارف انها بتتالم .
طبعا الالم عند الجماع بالنسبه للست له اسباب كتير النهارده هانتكلم عن سبب مهم اوي :



وهو التشنج المهبلي (Vaginismus)

ايه هو التشنج المهبلي ؟

هو ان العضله الدائريه المحيطه بفتحة المهبل بتتشنج وتقفل على بعضها تماما والتشنجات دي بتكون لا اراديه (عشان بس ما نلومش الست عليها ونقول دى بمزاجها )
زي ما الصوره الى قدامنا كده شرحاه بالاسهم العضله بتقفل على بعضها

وده سبحان الله زي وسيله دفاعيه للمرأه فى حالة الاعتداء عليها

وده يفسر ان كتير من حالات الاغتصاب بيلاقواا لغشاء موجود وما حصلش اقتحام
والتشنجات دي بتخلي فتحة المهبل تقريبا مقفوله بحيث لا يمكن للعضو الذكري انه يفوت فيها وبالتالي ما بيتمش الجماع
وطبعا بتتفاوت قوة التشنجات دي ومدى اغلاقها للفتحه بحيث ان ممكن اوي يحصل جماع لكن جماع مؤلم جدا للطرفين يمكن كمان وقد يسبب نزيف للمرأه كمان
وكمان احيانا بيكون التشنج المهبلي ده بيصحبه تشنج عضلي برضه فى عضلات الفخذين الداخليه

والتشنج المهبلي ده ممكن يحصل لواحده فى ليلة الدخله بالاخص من الخوف والتوتر الى ممكن تكون متعرضه له والخبرات السابقه الى سمعتها عن كونها هاتتألم نتيجة فض غشاء البكاره وصاحبتها الى صوتت والى اغمى عليها وكده يعنى .
وجايز البنت تتخض من فكرة اقتحام جسم غريب بالحجم ده لجسمها وما تقدرش تتقبل الفكره .

ونسمع بقى افتاءات كتير الى يقولك اصله باين عليه مربوط او هى مربوطه ايوه يا اختي الستات بيتربطوا انتى ما تعرفيش ؟؟؟؟؟!!!!!. والمثقف بقى ممكن يطلع ويقولك تقريبا الغشاء بتاعها مطاطي
او حد يفتكس ويقولك ان حجم القضيب كبير على المهبل
مع ان نفس المهبل ده ممكن ينزل منه طفل
وهكذا افتاءات ما لهاش اي اصل

وكمان التشنج المهبلي ده ممكن يحصل بسبب وجود التهابات شديده فى المهبل فيحصل تشنج فى العضلات المحيطه كويسيله دفاعيه من الجسم لتقليل الالم
طبعا فى الحالتين المفروض بدون معافره جامده عشان ما تأذوش بعض تروحوا لدكتور متخصص وهو يفتيكم ويقول الحاله ايه بالظبط
ولو كان التشنج المهبلي ده بسبب نفسي زي ما قلنا من الخوف والتوتر يبقى الحل انها لازم تعرف الاول حالتها عباره عن ايه
والمفروض ان الطبيب المعالج يهيئها نفسيا لتقبل الامر
وانا شايفه ان ممكن الزوج لو هو واعي وبيفهم يقوم هو بالمهمه دي تحت ارشاد طبي ويطمنها ويفهمها وياخدها بالراحه كده والهداوه

ما يبقاش همه وتركيزه الاول والاخير انه يثبت انه راجل وطاخ طاخ يا بوي وكده يعنى
كانت فى واحده سألتنى فى الردود على الام الجماع فى بداية الجواز
وان كانت عاديه ولا ايه ياريت يكون البوست ده جاوب عليكى

هو ممكن يكون اول كام يوم فى الم خفيف انما مش طبيعى الالم الشديد اثناء العلاقه
ومافيش حاجه اسمها هاتتعودي على الالم

العلاقه الجنسيه ما لهاش صله بالام شوفي انتى واي حد زيك شوفي جايم يكون عندك التهابات مثلا او تشنج مهبلي او مافيش سائل ترطيب و قد تكون كلها مجتمعه وشورتكم تبقى جاز



بس كده ارجو انى اكون أفدتكم فعلا

ملحوظه على جنب
الاخت الى كانت فى ردود الموضوع الى فات الى عمرها 28 سنه ومتجوزه من خمس سنين وعندها طفلين كانت لها مشكله يا ريت تتفضل وتراسلنى على اميل المدونه
هاتلاقيه عندك على اليمين فوق اهو
عندي كلمتين عايزه اقولهم ليكى على جنب نصيحه من صديقنا العزيز والمستشار الطبي للمدونه


الجمعة، 24 يوليو 2009

مشكله كبيره و لها حل

من أكبر المشاكل اللى بتواجه المتزوجين و بتؤثر على مجريات حياتهم الأسريه فقدان الشعور بالرضا التام عن العلاقه الحميمه مع الطرف الآخر .. و الأكثر شيوعا هو تجاهل أو عدم قدرة الزوج على اٍيصال زوجته لذروة النشوه أو ما يعرف بال Orgasm مكتفيا هو بالوصول لقمة نشوته المتمثله فى القذف و شكرا على كده و تصبحى على خير ..
أغلب الزوجات بيشتكوا من هذا الوضع المؤلم .. و لا أبالغ اٍذا قلت اٍن الكثيرات منهن و رغم قضائهن لسنوات طوال يمارسن حياتهن الزوجيه على الوجه الأكمل اٍلا أنهن مجربوش الوصول للأورجازم أبدا و لا يعرفن عنه أى حاجه !!
و لما يتسألوا طيب ليه يا ستات مش بتصارحوا أجوازكن بهذه الحقيقه المره أو على الأقل تفكروهن بيها و لو بصنعة لطافه كده بيتعللن بالخجل و بأن مادام هو مبسوط و راضى و وصل لقمة النشوه يبقى كده خلاص و فضل و عدل و أهى ماشيه ..
أكيد ده خلل جسيم فى العلاقه بين الاٍثنين و بيزيد على مر الأيام و السنين .. خلل بيؤثر سلبا بشكل خطير على سير العلاقه بين الطرفين .. العلاقه اللى أراد بها الخالق ليس فقط التكاثر و خلفة العيال و لكن أيضا أرادها أن تكون عمليه ممتعه للطرفين و اٍلا كان ممكن أن تتم عملية التكاثر بأى شكل آخر ينتقل به الحيوان المنوى للرجل و يتحد مع بويضة الأنثى بدون علاقه جنسيه ممتعه و مبهجه حبب بها الله البشر فى التناسل و زيادة عباده على الأرض ..
شايف أنه قبل ما أبدأ الكلام عن أسرار الوصول لقمة النشوه لدى الأنثى كما فسرها بعض العلماء أن أتكلم أولا عن الجهاز التناسلى للأنثى و خواصه و وظائفه فى العمليه الجنسيه لتسهيل فكرة البوست ده ..

مهبل الأنثى و هو المكان الطبيعى المخصص للممارسه الجنسيه و تلقى الحيوانات المنويه الذكريه عباره عن أنبوب عضلى مبطن من الداخل بأغشيه مخاطيه و بيربط بين عنق الرحم و الفرج .. فتحته الخارجيه بتقع بين فتحة مجرى البول و بين فتحة الشرج .. و منه يخرج دم الحيض و منه بيتولدوا الأطفال ..
مع الاٍختلافات الشخصيه من أنثى لأخرى فطول المهبل فى المتوسط بيبلغ حوالى 10 سم .. و هو قابل للتمدد بنسب ليست كبيره على حسب طول و حجم العضو الذكرى للزوج .. فى الجزء العلوى من المهبل توجد نصف كره نسيجها أشد صلابه من نسيج المهبل و ده عنق الرحم اللى بيوجد فى منتصفه فتحة الرحم و اللى بتتدفق منها دماء الحيض و اللى بتظل تتسع شويه بشويه أثناء الولاده لكى يعبر منه الجنين ..
المهبل بيحافظ على رطوبته بواسطة اٍرتشاحات خاصه من طبقة الغشاء المخاطي بالإضافه لإفرازات عنق الرحم .. و في فترة الخصوبة بيتميز المهبل ببيئته الحمضيه نوعا ما وبيساعد هذا الوسط الحمضي على تعقيم المهبل وجعله بيئة غير صالحه لأي نمو بكتيري مضر ..
البظر هو أيضا عضو جنسي في الأنثى و موجود في المنطقة أعلى الشفرين الصغيرين وبيتطور من نفس النسيج المكون للقضيب الذكرى للجنين ..
البظر دوره الأساسي و الوحيد فى رأى أغلب العلماء هو الاٍستمتاع الجنسي .. وهو العضو الوحيد في علم التشريح البشرى اللى له دور فريد فى توصيل المتعه لمراكز الاٍحساس بالمتعه فى مخ الأنثى ..
بيحتوي البظر في المتوسط على 8000 نهايه عصبيه تقريبا .. وبتتفاوت آراء العلماء حول أهمية و دور البظر في الوصول للشبق ..
بيتكون البظر من رأس و حشفه وجسم .. ولا يظهر عادة جسم البظر خارجيا إنما بيقع تحت الجلد و بيتكون من نسيج اٍسفنجي قابل و مجهز للاٍمتلاء بالدم ومن ثم الاٍنتصاب ..
و لما بتثار الأنثى جنسيا بيزداد تدفق الدم للبظر بدرجه كبيره مما يزيد في حساسيته وظهوره بشكل أوضح و أضخم و مع الاٍقتراب من الأورجازم بيبدأ البظر في الانتصاب تحت الجلد وقد يصبح تحديد مكانه أصعب.. بيختلف حجم البظر و بيتنوع شكله بين أنثى وأخرى وشعب وآخر و
ختان الإناث
حيث تتم اٍزالة كل البظر أو جزء منه أكيد بيؤثر سلباً على قدرة المرأة الجنسية و قد يعرضها للإصابة بالضعف الجنسي أو البرود ..
جي سبوت : بعض العلماء بيسموها نقطة جرافنبرج نسبة لمكتشفها الدكتور الألمانى أرنست جرافنبرج ..
وهي نقطه معينه بتقع بالجدار الأمامي
للمهبل
في حجم العمله المعدنيه وهي حساسه جدا للإثاره بواسطة الضغط عليها بشكل منتظم بالعضو الذكري و تكرار اٍثارتها و تنبيهها كفيل بتحقيق الذروه الجنسيه لدى غالبية النساء المهيئات نفسيا لذلك ..
بعض العلماء الاٍيطاليين قالوا إنه من الممكن تحديد ما يعرف بالجي سبوت من خلال الموجات الصوتيه لأن الأطباء مقدروش يحددوا بدقه موضع هذه المنطقه الغامضه المفترض وجودها بالفعل ..
ومنذ الثمانينيات وتعبير جي سبوت بيعتبر موضوع مثير للجدل و الخلاف لأن البعض اٍعتبره طريقه و حجه لتفسير ليه بعض النساء بيصلوا للنشوه الجنسيه من خلال الاٍستثارات المهبليه بينما الأخريات مش بيقدروا مهما حاول الزوج حتى يصل لمرحلة التعب و اليأس و بيصلوا للشبق من خلال الاٍٍستثارات الجنسيه البظريه اٍن صح التعبير عن طريق المداعبه باليد أو اللعق باللسان .. بل و وصل الأمر فى الخلاف بين العلماء أن بعضهم أنكر أصلا وجود مثل هذه النقطه و أن الحكايه كلها لا تعدو أن تكون مسأله نفسيه لدى الاٍناث مع اٍختلافات طفيفه فى سمك و غلظة جدار المهبل من أنثى لأخرى ..
بعض النساء بيقدروا يحددوا بالظبط موضع هذه النقطه داخل المهبل و بيقولوا أن فيه أوضاع جنسيه معينه بتشعرهم بالنشوه و بتسهل وصولهم للشبق و الغريب أن كلهم تقريبا أجمعوا أن وضع الفارسه حيث تمتطى الزوجه زوجها و الوضع الحيوانى الخلفى بيتيح لهم التحكم فى قوة الملامسه و دقة التصويب و الضغط بالعضو الذكرى على نقطة الجى سبوت داخل المهبل و بالتالى بيصلوا للحظة الذروه و بيحصلوا على الرضا الجنسى من الزوج و بتكون مقدمات ذلك زيادة نشاط
غدد بارتولين اللى بتفرز ماده لزجه ذات رائحه طيبه شبيهه برائحة الأناناس الطازج لتسهيل الإيلاج
و حركة القضيب المنتظمه داخل المهبل .. و المفترض فى الزوج الأروب أنه بيشعر بهذه الظواهر و بيحفظ مكان هذه النقطه جيدا و بيزيد من ملامستها عندما يقترب هو من القذف حتى يصل مع زوجته لقمة النشوه سويا و ده ممكن جدا يكون سبب لاٍستقرار الحياه الزوجيه اللى بينبع أساسا من شعور الرضا لدى الطرفين خاصة شعور الرضا عن العلاقه الحميمه لدى الزوجه ..
أنصح بشىء و لا أنصح بآخر اٍن جاز ليا النصح ..
أنصح الزوجه بالتخلى و لو بقدر ضئيل عن الخجل و مصارحة زوجها بما يرضيها جنسيا و بما لا يرضيها لكن طبعا مش من ليلة الدخله .. و أنصحها برضو بالتخلى عن قناعتها أن وظيفتها فى العلاقه الجنسيه تقتصر و تقف عند محطة اٍسعاد زوجها فقط لكن عليها أن تعى حقها هى أيضا فى التمتع بزوجها جنسيا سواءا بسواء و للعلم فده شىء سيسعد الزوج أكثر و أكثر ..
و كمان أنصح الزوج بالتخلى قدر ما أستطاع عن أنانيته الجنسيه و مساعدتها للتخلص من الخجل المفرط و حثها على المصارحه بهدف محاولة اٍشباعها جنسيا و الوصول بها للشبق و ده بيتطلب قدر كبير من الصبر و الحب و الموده مع الأخذ فى الاٍعتبار أن وصول المرأه للشبق يستغرق وقتا و جهدا أكبر بكثير مما يتطلبه الرجل للقذف .. و لا ضير أبدا أن يلجأ الزوج لكل الطرق اللى بتوصل الزوجه لقمة النشوه طالما أن ليس فيها ما حرم الله ..
و لا أنصح ابدا غير المتزوجات بمحاولة تلمس أو اٍستكشاف الجى سبوت حفاظا على غشاء البكاره و كل حاجه حتيجى فى وقتها اٍن شاء الله ..
لكن و لكم خالص تحياتى ..

الجمعة، 17 يوليو 2009

خلاصة القول فى العاده السريه

بصوا بقى انتم طلعتم مجانين فى اليومين الى فاتوا والواحد بجد احتار فيكم


واسألتكم صعبه بجد ومتعبه بجد ونسأله الاجر والثواب


والواحد ساعات يتخبط المشكله من دول يفضل كام يوم يفكر فيها


والحقيقه انا كنت مجهزه بوست من فتره عن العاده السريه للبنات


لكن بعد نقاش مرير وخناق ومطاوي مع صديقنا الطبيب


وكمان متابعة الحالات الى ظهرت فى التعليقات والاميل عندي الحقيقه رايي اتغير شويه وقررت ما انزلش الموضوع ده


وكمان لقيت اننا غطينا اغلب وجهات النقاش فى التعليقات اصلا


المهم بالنسبه للعاده السريه هاقول كلمه اخيره بعد النقاش الطوييييييييييييييل الى حصل فيها


العاده السريه المشكله الوحيده المتعلقه بها ان البنى ادم يعتبرها هدف فى حد ذاتها ويستبدلها بالزواج او الزوجه او الزوج طبعا


العاده السريه قد تكون باب الهروب من الوقوع فى جرائم اكبر وافظع


العاده السريه ما نقدرش نمنعها بتاتا انما نقدر نحد منها بالطرق الى قلنا عليها
(نشغل وقتنا واعلاء مبدأ نفسك ان لم تشغلها بالحق شغلتك بالباطل
نبطل نستهبل ونتفرج على افلام سكس وبعد كده نقول هو احنا مثارين ليه ؟؟!!1
نستعين بالصبر والصلاه والصوووووووووووووووووم )


ولما نقول بدون اسراف الى يحدد الاسراف ده الشخص نفسه وهو وضميره مع ربنا بقى


لان الحاجه الجنسيه متفاوته بين الاشخاص وبعضها


لا مش بس بين شخص والتاني


الرجل بيختلف عن المرأه


والرجل بيختلف عن الرجل

وكذلك المرأه طبعا


وكمان ايه الشخص نفسه سواء ـ الست او الرجل ـ هو نفسه ممكن حاجاته تتفاوت من وقت للتاني ومن مره للتانيه


والى سبق له الجواز غير الى ما سبقش والى عمره 15 سنه غير الى عمره 25 سنه



انا كن ليا راي فى العاده السريه بالنسبه للبنات وانها تعتبر مش ملحه زي الشباب


لكن الحقيقه زي ما قلتلك رايي اتغير وببساطه فكرت


ما دام فى رجل ممكن يحتاج لممارسه الجنس اكتر من مره فى اليوم وراجل ما يقدرش يمارسه غير مره واحده فى الاسبوع ولهم نفس العمر طبعا


يبقى كمان انا ما اقدرش احكم على الستات ككل


لكن لظروف اجتماعيه ونفسيه وبرضه جسديه الرجل فى رايي بيتحوج للعاده السريه اكتر


لكن هى حكمها ومضارها ونوافعها ودوافعها واحد للجنسين


الحقيقه اتغاظت اوي اوي من البنات الى خايفين انهم لما يتجوزوا اجوازهم يعرفوا انهم كانوا بيمارسوا العاده السريه


فى حين الراجل بكل بساطه بيقول اه مارست العاده السريه ده لو ما قالش اكتر من كده


واتغاظت اكتر من الرجاله الى بيدوروا فى حاجه زي كده


يعنى اشمعن هو تسعين فى الميه مارس العاده السريه وطول عمره وجاي يحاكمها عليها ؟؟


الحقيقه كمان اقريت ان الاثنين زي بعض بالاكثر لما اعترف الرسول عليه الصلاة والسلام بالاحتلام لست


ودي حاجه مساويه للحاجه للعاده السريه من وجهة نظري (حيث انها تفرغ طبيعى للشحنات الجنسيه )


المهم عشان ما نقولش كلام معاد


احنا كده ناقشنا موضوع العاده السريه من كل الجوانب


واعرفوا ان العاده السريه فى حد ذاتها مش مشكله كبيره


المشكله بقى فى مصايب تانيه

زي الى بقت عنده العاده مرض نفسي وبيمارسها 8 مرات فى اليوم


وزي الى بتمارس العاده بعد اعتداء جنسي


وزي الى بيعترفوا بتحرشات ومصاايب كتير اوي اوي سوده
وزي الى بيمارسوا العاده السريه رغم انهم متزوجين فى حالة عزوف تقريبا عن ممارسة الجنس بشكل طبيعى مع زوجاتهم وازواجهم


اعتقد العاده السريه لو اخدناها باخف الضررين تبقى اووووووك



خلاااااااص نقفل بقى الموضوع ده ارجوكم وخلونا نتكلم فى حاجه تانيه



بس ليا رجاء من فضلكم اتنيلوا اتجوزوا بقى عشان قرفتوني بصراحه


اتنازلوا شويه عن احلامكم الماديه الورديه واتجوزوا


القرآن بيقول كده الى ما يقدرش على العالي يتجوز على اد ايده


ومن لم يستطع منكم طولا ان ينكح المحصنات المؤمنات فمن ما ملكت ايمانكم من فتياتكم المؤمنات والله اعلم بايمانكم بعضكم من بعض



وانتى كمان الرحمه حلوه يا جدعان ارضوا ببعض وعيشوا واسعدوا بعض واتنازلوا مش كده حرام عليكم نفسكم وغيركم


يعنى مش معقول ابدا كم المشاكل الى سببها ان كل واحد مستنى لما يعمل شقه تتكلف بس فرش وتوضيب 100 الف جنيه غير تمن الشقه نفسها

واحنا اساسا شعب مش لاقي ياكل


يارب يفهموااااااااااا بقى يارب




اه وطلب اخير للجميع من فضلكم الى عايز يكتب بغير الحساب بتاعه بلاش غير معرف دي عشان اللخبطه فى الردود من فضلكم


كل واحد يخترع لنفسه اسم حلو كده فتكات عباس اي حاجه ويكتبه عشان اعرف اميزكم من بعض


ومتشكره للجميع واغلق باب النقاش فى العاده السريه خلااااااااص بعد الموضوع ده ومش عايزه صداع



شكرا يا عمرو وشكرا يا دكتور


وشكرا لكل الى شاركوا بالمناقشه والكلام معانا على التعليقات


ودي الموضوعات الخاص بالعاده السريه هاحطهالكم على تبويب واحد ان شاء الله





















الجمعة، 10 يوليو 2009

بوست من صبرنى يا رب

البوست ده مرسل بواسطة أختنا الفاضله صبرنى يا رب مشاركة منها فى موضوع طرح بالمدونه و أثار الكثير من الجدل .. الحقيقه هو موضوع أختلفت فيه الآراء و تضاربت بشده و من الضرورى أن نعرض برضو رأى الفقهاء فيه .. شكرا يا أم خالد على مجهودك و بارك الله فيكى ..
****************************************

الحقيقه انا طلب مني الاخ عمرو بدر انى اكتب بوست عن العاده السريه من منظور دينى
لانه يرتبط بالبوست الي الاستاذ عمرو كتبه فى مدونة بعبعه
فانا الحقيقه بقالي كام يوم باشتغل فى الموضوع ده وده الى وصلت له
الحقيقه العاده السريه عموما سواءا للجنسين
عشان نناقش حكم العاده السريه شرعا
انا لازم اكون امينه واقولكم الاحكام الى قابلتنى فى بحثى عن الموضوع وهما ثلاث اراء

الاول هو ان العاده السريه حرام تماما
استنادا للايه دي
وَالَّذِينَ هُمْ لِفُرُوجِهِمْ حَافِظُونَ
إِلاَّ عَلَى أَزْوَاجِهِمْ أَوْ مَا مَلَكَتْ أَيْمَانُهُمْ فَإِنَّهُمْ غَيْرُ مَلُومِينَ
فَمَنِ ابْتَغَى وَرَاء ذَلِكَ فَأُولَئِكَ هُمُ الْعَادُونَ


حد بيقولي ايه الى جاب دي للعاده السريه ؟؟
اقولكم هما استندوا هنا الى عبارة

فمن ابتغى وراء ذلك فأولئك هم العادون

يعنى اعتبار ان العاده السريه هنا تبع ما وراء ذلك

وعليه اي حاجه غير الازواج وما ملكت فان ده يعتبر ما وراء ذلك ويبقى حرام



الرأي التاني :
بيقول ا بدا هى مش حرام دي مسكوت عنها
بمعنى ان الرسول عليه الصلاة والسلام لما ابو هريره سأله عن الاستمناء(الى هو العاده السريه ) فلم ينهيه عنها ولكن قاله الحديث الآتي :

يا معشر الشباب ! من استطاع منكم الباءة فليتزوج . فإنه أغض للبصر ، وأحصن للفرج . ومن لم يستطع فعليه بالصوم . فإنه له وجاء
الراوي: عبدالله بن مسعود المحدث: مسلم - المصدر: المسند الصحيح - الصفحة أو الرقم: 1400خلاصة الدرجة: صحيح


وبالنسبه للايه السابقه فقالوا لا المقصود بها مش العاده السريه طبعا ولكن المقصود بها اي نساء اخريات غير الزوجات وما ملكت لان الكلام هنا على حفظ الفرج

وبكده مافيش نص تحريمى ومافيش معنى لتحريم العاده السريه



انا بقى الحقيقه قريت أراء كتير وسطيه والحقيقه وصلت لراي وسطي محترم جدا وعاقل جدا ومن وجهة نظري مظبوط

الراي الثالث :
بيقول ان العاده السريه مش حرام وانها مسكوت عنها وان الرسول تعمد انه ما يحرمهاش ولكن نفس الوقت ما حللهاش ودى حكمة منه ومن ربنا عز وجل

ليه لان العاده السريه تحريمها صعب خصوصا للشباب لان قد لا يستطيع الباءه (امكانيات الزواج يعنى ) وقد يكون اللجوء للعاده السريه من مبدأ درأ الضرر وفى نفس الوقت تحريمها قد يجعل فيها اسراف وهنا تكون المشكله.


وعلميا ان الشاب بيكون نتيجة لانه بيتعرض لاثاره من اي نوع فبيكون عنده انتاج للسائل المنوي لازم يتخلص منه وده بيحصل طبيعى بالاحتلام لو ما حصلش بالاحتلام

ولو حصل اثاره متعدده دون اشباع بتسبب الم جامد جدا للرجل وتسبب فى التهابات ومشاكل صحيه كتير مش مجالها هنا دلوقتي

وعليه يكون اللجوء للعاده السريه هنا لدرأ الضرر

اذن باقول ان العاده السريه فى حال ان الشخص يلجأ لها بدون اسراف دى مش حرام ولا حاجه

لكن الاسراف طبيا غلط زي ما الاسراف عموما فى كل حاجه غلط واي حاجه تضر الشخص وصحته فهي طبعا حرام


قريت مره حديث بيقول ناكح يده كانه نكح امه او حاجه كده !!!!

الحقيقه انا دورت عليه ما لقيتش عنه اي حاجه تماما ولا حديث ابدا بالمعنى ده

وفى حاجات كتير بتتقال فى موضوع العاده السريه كخرافات الحقيقه


خلاصة القول عشان لو حد تاه مني

العاده السريه الراي الوسطي لها هى انها مش حرام دون اسراف فى الامر خصوصا لدرأ الضرر

اتمنى اكون افدتكم

السبت، 4 يوليو 2009

اجابات على الاسأله الطبيه



ادي البوست الى انا وعدتكم اعمله بتاع الاسأله الطبيه الى سألتوها فى الردود على المواضيع الى فاتت

وانا كنت بادور على طبيب متطوع يجاوب على اسألتكم


والحقيقه فى اخ اتكرم وعرض مساعدته وهو طبيب وكلامنا فى صميم تخصصه

لكن هو الحقيقه رفض الافصاح عن شخصه ولا حتى ليا

وعليه فانا هانشر رايه الطبيه على مسؤليته هو


لكن احب اسجل انه من خلال كلامي معاه انه شخص محترم جدا وامين فعلا وصادق فى نيته لمساعدتنا فى المدونه

وده راي وحدس شخصي فقط


ودلوقتي اتفضلوا بقى نشوف الاسأله :



هل لحس البظر من الناحيه الطبيه له مضار ؟


لو كان مهبل طبيعى مافيش فيه امراض يبقى مافيش منه مضار
مع الاخذ فى الاعتبار ان المهبل احتمالية اصابته بالامراض اكتر من القضيب مثلا
(المهبل الطبيعى تكون افرازاته لونها شفاف ومالوش رائحه كريهه .. لو الافرازات دي لونها ابيض او اصفر وفى رائحه كريهه يبقى المهبل مصاب بالتهاب )
والامراض التناسليه يمكن ان تنتقل من خلال الفم ايضا مش من خلال الاعضاء التناسليه فقط اثناء المعاشره


والاسأله الى وردت عن تاثير العاده السريه على سرعة القذف وطول القضيب


فعلا العاده السريه ممكن تسبب سرعة القذف عند الرجل لكن فى الغالب بترجع الحاله لطبيعتها بعد الجواز بفتره وليكن شهر
وفى حالة استمرار حالة سرعة القذف بعد الزواج فلازم الشخص يعرض نفسه على طبيب امراض ذكوره
اما بالنسبه لطول القضيب فهو مالوش دعوه خالص بالعاده السريه سلبا او ايجابا


وكانت فى اخت سألت الاسأله دي


1- قرأت في كثير من الكتب أن العادة السرية ممكن توسع غشاء البكارة عند البنت، وبالتالي مش بينزل دم عند اللقاء الجنسي الأول مع الزوج، هل الكلام ده صحيح فعلاً؟


لا العاده السريه مش ممكن توسع غشاء البكاره لكن ممكن تجرحه لو كانت العاده بتمارس بغباوه وهبل وقلة علم
ولو جرح الغشاء هاينزل دم وممكن وقتها ليلة الدخله ما يبقاش في دم
طبعا دم فى غير وقت الدوره الشهريه

2- وهل ممكن أن يكتشف الطبيب إن البنت كانت تمارس العادة السرية قبل الزواج؟


صعب وقد يكون مستحيل اكتشاف ممارسة العاده السريه سابقا لو لم يجرح الغشاء
خصوصا ان العلامات الى ممكن تظهر من العاده ممكن تظهر من غير ممارسة العاده برضه
حتى الاحتقان الى ممكن تسببه العاده السريه ممكن برضه يسببه الالتهابات وعليه مش علامه برضه
بعكس الجماع له علامات معروفه ويمكن اكتشافه



3- وهل السبب الرئيسي للإفرازات المهبلية والالتهابات هو العادة السرية، علماً بأن عمري 23 سنة و أمارس العادة السرية من 7 سنوات، وباعاني من التهابات مهبلية...


لا مش ممكن تكون السبب فى التهابات الا لو استخدمتي حاجه ملوثه بميكروب يسبب الالتهابات دي

والالتهابات ممكن تحصل للبنات عموما بدون ممارسة العاده السريه وممكن الالتهابات دي تسبب حكه للبنت وتخليها تهرش وممكن فى الوقت ده تكتشف نفسها والعاده السريه وتبدأ ممارستها


ودي مشكله برضه وردت فى الردود


المشكلة التي أعاني منها هي العادة السرية وتسبب لي شعور بالذنب كبير فانا مطلقة وكانت لدي مشكلة كبيرة في زواجي لدي ولد واحد عمره الان 4 سنوات مع العلم اني كنت أمارسها قبل الزواج ولكن بصورة متقطعه جدا فربما كل شهرين اما الان فكل يوم ولا اعرف هل هناك ادوية لتخفيف الطاقة الجنسية وهل لها اعراض جانبية لهذا الدواء مستقبلا، مع ان علاقتي بربي طيبة جدا ولكني دائما اجد نفسي لا استطيع ان امنعها وهل هناك امراض تنتج عن هذه العادة فكرت في الذهاب لطبيب نفسي واعرض عليه مشكلتي ولكنني لا استطيع اخاف ان يفضح امري و شكرا
يفضح امري ؟


انتى بتكلمى عن الموضوع بحساسه زياده اوي والمشكله عندك ان كحاسه بالذنب الكبير فى حين ان مش دي الحقيقه . طبيعى انك تمارسي العاده السريه بعد ما اتعودتي على وجود العلاقه الجنسيه اثناء الجواز . وما تخديش ادويه ولا حاجه
واتجوزي ما تسمعيش كلام حد يقولي اقعدي ربي ابنك وخلاص


ودي كمان حاله تانيه


عندما أكون جالسة بجوار خطيبي أو عندما أسمع منه كلاماً لطيفاً في التليفون، ويعلم الله أنه ليس كلاماً خارجاً ، ينزل مني سائل؛ فما طبيعة هذا السائل وهل هو صحي أم لا ، وهل سيؤثر على في الإنجاب في المستقبل


ابدا مالوش دعوه بالانجاب . ودي حاجه طبيعيه جدا وصحيه كمان . المهم ما تكونش الافرازات دي لها رائحه سيئه او ملونه
هى المفروض تكون شفافه
لو ملونه او ل ها رائحه سيئه يبقى ممكن يكون عندك التهابات



واخيرا يا حلوين احب ابلغ رساله من الدكتور للاخ الى كان العاده السريه دبحاه وعمره 17 سنه تقريبا والى بيقول انه بيمارسها من 6 الى 8 مرات


هو بينصحه انه يروح لدكتور مختص لان كده الموضوع قلب معاه بمشكله نفسيه

ده طبعا بالاضافه للكلام الى احنا قلناه له فى الردود


واتمنى اكون فعلا افدتكم وباشكر من قلبي الدكتور المتطوع الى ربنا يكرمه انا عذبته مش عايزه اقولكم اد ايه

لانه مشغول يا حرام وانا باخد من وقته كتير عشان باناقشه كتير ومصدعاه

فى ميزان حسناته ان شاء الله