الثلاثاء، 30 ديسمبر، 2008

الاسم حب والفعل امشيييييير

في البدايه ده اول بوست انزله هنا في المدونه وهو مشكله اتبعتت ليا
الكتكوت :بحبك اوي ياحياتي
الكتكوته :وانت قلبي وحب عمري
الكتكوت :مش باين
الكتكوته: ازاي ياحبي
الكتكوت :لو كنتي بتحبيني كنتي وافقتي تقابليني

الكتكوته: بحبك اد حبات الندي بس الظروف مش بعرف اقابلك

الكتكوت :منا حلتهالك

الكتكوته: طب حبيبي نسبها للظروف

الكتكوت : انا مشتقالك اوي ياحياتي

الكتكوته: وانا كمان ياعمري

الكتكوت :طب تعالي في حضني نفسي اضمك

الكتكوته: وانا نفسي اضمك

الكتكوت :لما نتجوز هنعمل والرقابه تقص

الكتكوته: سكوووووت

الكتكوت :انتي مش معايا

الكتكوته: معاك ياحبي بسمعك

الكتكوت :جتلي فكره ايه رايك نتقابل في شقتي مش فيها حد وهنبقي براحتنا ومش نخاف ان حد يشوفنا

الكتكوته: هي سكوووووووووووووت

الكتكوت :مش بتردي ليه ده انا احافظ عليكي برموشي انتي خايفه مني

الكتكوته: لا ياحبيبي انا اخاف من العالم الا انت

الكتكوت :خلاص نتقابل امتي

الكتكوته: وهي سكووووووووت برده

الحوار ده فحواه حصل بالفعل واتبعتلي علي اساس اني هقول رايي
هي خايفه تعمل اي تصرف تخسره وده حبيب عمرها زي مابتقول
ومش تقدر تعيش من غيره
رايي انا هقوله زي زيكم في التعليقات

السبت، 20 ديسمبر، 2008

حد هايصدقنى؟؟ ..... مراته بتضربه

تحدييييييييث هام
عيب اوي اوي كده
احترموا بعض فى الردود
وما تتريقوش على بعض
واحترموا كلام بعض
واحترموا مشاعر ومشاكل الاخرين
واحترموا المدونه وصاحبتها الى مستضيفه مشاكلكم
قال الله تعالى:
لا يسخر قوم من قوم عسى ان يكونوا خيرا منهم..... صدق الله العظيم
اتقوا الله فى بعض
جننتووووووووووووووووووووووني
اقفلهااااااااا؟؟؟
ولا اقفل الردود ؟؟؟؟؟؟ وارد انا بس ؟؟؟؟؟؟؟؟؟؟
احكموا انتم اعمل فيكم ايه ؟؟؟؟؟؟
جالي رد فى موضوع الضرب ا لى فات يا جماعه
وحبيت انشره فى بوست عشان اعرف رايكم فيه
ده كان الرد الى جاني من الاخ.. حد هايصدقنى ؟
أنا بقى حالتي العكس خالص أنا الزوج المضروب بس مش عن ضعف و الله
الحكاية إني متجوز بنت خالتي و خالاتي دول أنا باعتبرهم زي امي بالظبط و جوز خالتي ده صاحب فضل علي في تشكيل طريقة تفكيري حتي قبل ما يموت وصى ليا بمكتبته
المهم مراتي عارفه كويس إني عمري ماهمد إيدي عليها أو حتى اشتمها ده أنا عمري ما شتمت حد الا في ثالتة ابتدائي و لحد دلوقت مش مسامح نفسي عليها
حتى الطلاق ما أقدرش عليه لانها حاتتبهدل بالعيال خصوصا هي بتشوط في عيلتها برده.
اوعوا تفتكروا ان مراتي شريرة هي بس عصبية و محبطة و اذا غلطت في أي حاجة يبقي اللي ادامها السبب
يعني اذا الواد بيسمع كلامي و هي لا يبقى أنا السبب و تضرب الواد للأسف و تغلط فيا وقدامة.
و كل اللي اقدر أعمله اني امسك ايديها او احضنها بقوة علشان ما يحصلش خساير.
موخرا بقيت اقلل من الهزار و اللعب مع الولاد عشان ماستفزهاش.
نسيت أقولكم ان احنا اطلقنا قبل كده مرة بعد اهانة ماقدرتش استحملها.
و خليتها تقعد في البيت زي الشرع ما بيقول لحد العدة ما تخلص. المهم اعتذرت و اتصالحنا و رجعنا لبعض لكن رجعت ريمة.
معلش أنا قلبت البوست لحلئة همسة عتاب
وده كان ردي عليه ده
لا لا ابدا انت شرفتنا
بس اعذرني انت غلطان
هى بتغلط فى عيلتها او بتنطح معاهم لكن ما بتضربهمش ليه ؟؟؟
انت لازم تكون شديد شويه معاها وكمان لازم تخليها تحبك زي ما انت بتحبها
انت طيب اوي وابن حلال وطامر فيك العشره بس برضه لازم تفهم مراتك ان الى بتعمله ده غلط ولازم تكون شديد معاها شويه مش انك تضربها لا طبع
الكن انت راجل افتكر بنيتك تسمحلك انك تمنعها انها تضربك وحلو انك تمتص غضبها وما تخليهاش تتهور
وكمان حكاية اهانتك قدام ابنك دي هاتعمل مشكله لابنك نفسه
الموضوع مش لازم يفضل كده
ابوها وعيلتك على عينا وراسن
احبك كمان علىالعين والراس
لكن لازم من الاصلاح
ونورتنا وياريت الناس اسمع رايهم على كلامك الى ما خدتش بالي منه الا دلوقتي اسفه اوي
ودلوقتي عايزه اعرف رايكم فى الكلام ده ايه
وكمان اوجه لكم سؤال مهم
هل لو ان الزوج بدأ بالضرب لو الزوج كمان ضربته !!! رايكم ايه فى الموقف ده يا ترى هما الاثنين غلطانين اد بعض ولا الزوج غلطان اكتر عشان هو الى بدأ ولا الست غلطانه اكتر عشان ردت على جوزها بالضرب ؟؟؟
وكذلك الحال طبعا فى الشتيمه يعنى لو واحده جوزها شتمها وهى ردتله الشتمه يبقى ايه الموقف ؟؟
منتظره اراءكم
تحديث تاااااااااني : تم غلق التعليقات على الموضوع بناءا على رغبة حد هايصدقنى فى غلب باب النقاش

السبت، 13 ديسمبر، 2008

ترحيب باعترافات هانم .....وطالب تحكيم

باديء ذي بدء نحب نرحب بالاخت اعترفات هانم والى انضمت ليا فى المدونه دي وشرفتني واعترافات الله يسترها وافقت تنضم ليا وتساعدني فى المدونه شويه عشان انا مش فاضيه ومش عاطياها حقها بصراحه المدونه بس غصب عني
ويااااااااارب تفضل معانا اعترفات هانم بكل خير وحب
ونفضل نبعبع ونعرفت لحد لما نرتاح تماما من العقد والشراشيب الى عملها الزمن

أما الان سيداتي آنساتي سادتي اعضاء البولجر العظماء معانا اول مشكله وصلت لبعبعه من قنوات خاصه جدا ولنا الاحتفاظ طبعا بسرية مصادرنا وهاسيبكم تقروا كلام الاخ طالب تحكيم (كما اطلق على نفسه)

السلام عليكم
اكتب لكم موقف حدث بينى وبين زوجتى وارجو منكم الحكم الواضح فى الموقف ده

فى احدى الليالى بعد نوم الاولاد تمت محادثه بسيطه بيننا وكنا نجلس معا اما م التليفزيون وبيننا مسافة مترين تقريبا
وبصراحه الكلام كان مش على هوايا وعلشان كده غيرت اتجاه نظرى للتليفزيون محاول الطناش وقفل الموضوع فتم الاتى :

الزوجه : قذفت قذيفه موجهه الى راس الزوج بمخده صغيره بتاعت الانتريه ( هزار )
الزوج : (ماسك راسه وهوه دايخ من الخبطه وعينه مزغلله) غبيه
الزوجه : انت بتشتمنى ...... وقامت القيامه
الزوج : (بعد ما هدى من الخبطه ) قام بالاسف الشديد محاولا امتصاص الخطأ وتداركه فى نفس الليله حتى لا يكبر الموضوع ويكون فيه زعل يبات لليوم التالى ( حسب اتفاق الزوجين طول فترة الزواج تصفية اى خلاف فى نفس اليوم ولانوم قبل الصفاء الكامل) .... تم القسم والحلف للزوجه بان الخبطه كانت جامده جدا وان راسى لفت وعينى زغللت والشتمه خطأ غير مقصود نتيجة رد الفعل للخبطه مع الاسف الشديد و الوعد بعدم العود مرة اخرى ..... ولكن هيهات البكاء والزعل وعدم قبول الاسف.....

والان بعد يومين من الزعل ( على فكره الزعل فى الخفاء لايخرج ولا يعرف عنه اى شخص حسب اتفاق الزواج الاساسيه)يعنى بنتكلم عادى والزعل مدفون بالقلب

تم الصلح ولكن...
الزوج يطالب بحقه من الاسف هوه الاخر والزوجه ترى انه لا اساس لطلب الزوج
الزوج يبلع طلبه ولكن على اساس اخذ حقه بيده( ضربه مماثله لضربة زوجته بنفس المخده الصغيره) او الاسف من الزوجه

رجاء مناقشة الموضوع وابداء الراى بموضوعيه وهل للزوج الحق او للزوجه الحق فى فعله

ملاحظه : لاتحسبوا الموضوع هزار ولا انه هيافه فيه بيوت بتتقفل لاسباب اقل من ذلك مع تصغير عقل الازواج
فترة زواج قاربت عدد اصابع اليدين ويوجد اطفال منورين البيت

ولكم جزيل الشكر
أخوكم طالب تحكيم

وطبعا احنا هنا كبلوجاريه شكلنا فاضي ومش لاقيين حاجه نعملها عشان كده هناقش مخدة الانتريه بس زي بعضه الاخ طالب تحكيم بيقول انها عملت مشكله كام يوم وان ممكن البيوت تتقفل عشان مخدة الانتريه الصغيره الى اتزقلت

وطبعا هاقول رايي بعد ما اسمع رأيكم

يلا بسرعه الصبح الاقي هنا كل واحد فيكم قايل رايه

واعترافات هانم منورنا فى القاعده تملي

الأحد، 30 نوفمبر، 2008

الحـــــب ......... ومفجأه

الحب
وآآآآآآآآآآآآه من الحب
وسيرة الحب
وظلم الحب لكل اصحااااااااابه
كلام كتير
وعذاب كتير
وقصص وروايات يااااااما
منها بيطلع للنور ومنها بيفضل جوانا
منها حاجات بتعلمنا ومنها حاجات بتعلم فينا
منها حاجات بتقوينا والخايب بس تلاقي حاجات بتكسره
افتح قلبك وبعبع معانا
ويا ريت ما نعرفش انت مين عشان نبقى مرتاحين
قولنا الحب عمل فيك ايه
واتعلمت ايه
وعلم فيك بايه
قلنا سرك
وسرك فى بير عميييييييييييييييق
***************************
مفجأة الموسم يا بلوجاريه انى عملت بالفعل اميل جديد عشان تراسلوني عليه لانى بصراحه شايفه ان المدونه مش زي ما انا حبيتها
ولا زي ما انا كنت عايزاها تكون
انا مش باكتب موضوع البوست عشان نناقش موضوع البوست
ولا عايزه الموضوع يبقى انى اجي اعلق عندكم وتيجوا تعلقوا عندي
مستنيه اميلاتكم وكل الى عايزين تنشروه هنا وبالاسم الى تختاروه واسمحولي مش هاحتفظ باميلات اي حد واميلا ت بس مش اضافات ما سنجر لانى مش هافتحه اساسا
وده الاميل اهو
b3b3a2008@yahoo.com

الأربعاء، 19 نوفمبر، 2008

الاساءه الجنسيه

اولا اسفه على تأخيري بس ما كنتش فاضيه اليومين الى فاتوا شويه
وثانيا بصرف النظر عن انكم ما حدش عبرني ولا رد عليا ههههههههههه الا انى هاكمل المدونه شويه لحد ما نشوف ايه الموضوع
احنا المره الى فاتت اتكلمنا عن الضرب كاساءه بدنيه طبعا بتلحقها اساءه نفسيه تبقى
المره دي هانتكلم عن اساءه تانيه لها نفس الاثر ويمكن اكتر وهى الاساءه الجنسيه او التحرش الجنسي
والى فعلا بيكون مؤلم جدا نفسيا فضلا عن مضاره ومخاطره الجسديه والاجتماعيه كمان
ويمكن الى بيخلي الاعتداء الجنسي اخطر واقسى من الاعتداء بالضرب مثلا انه الجنس عموما من المناطق المحرمه تقريبا فى الكلام عنها او حتى الاشاره لها داخل مجتمعنا الشرقي عموما
وده بيخلي فى مشكلتين فى رايي هما الى بيكونوا بيئه خصبه لتفشي ظاهره زي التحرش الجنسي
اولا قلة الوعي والثقافه الجنسيه المطلوبه من سن الطفوله والى ما بعد ذلك
وثانيا ان المعتدى عليه لجهله او خجله المبالغ فيه والنابع من نظرة المجتمع للجنس بيخليه انه يكتم فى نفسه وما يقولش
عليه النهارده عايزين البعبعه تكون بخصوص التحرش الجنسي او الاساءه الجنسيه عموما سواء بالفعل او حتى مجرد الارهاب والتلويح بها
اي حد يكون اتعرض لحاجه زي كده ياريت يحكى لنا يمكن نساعده على تخطيها وكمان نستفيد من خبرته السيئه دي ونقدر نتجنبها
او حتى يكون يعرف حد شخصيا يا ريت مش سماعي فقط اتعرض لحاجه زي كده برضه ياريت يشاركنا
واحب افكركم ان البوست ده خاص بالتحرش والاساءه الجنسيه مش الكلام عن مشاكل الجنس عموما
عشان انا عارفه فى ناس مابتصدق
مش عشان ما ينفعش نتكلم عن الجنس لا .. لكن بس تحديدا لموضوع البوست
واحب اسمع مشاركاتكم الى اتمنى تكون مشاركات بدون حواجز نفسيه
شكرا يا شعب البلوجر

الأحد، 16 نوفمبر، 2008

اييييييييه يا بلوجريه

ايه يا جماعه مش معقول كده يعنى كل ما اغيب ارجع الاقي شتيمه في الردود
اقفل الردود المفتوحه ولا اعمل رقابه عليا
انا عامله المدونه عشان اتكلم معاكم براحتي وتتكلموا براحتكم بصرف النظر عن كوني مين
وفى حد غبي عمال يشتم فى الناس الى ما لهاش ذنب ولا يمكن حتى لها علم بالمدونه اساسا
وحقيقى غبي مش عارفه ماله ده وايه يهمه اصلا انا مين
وعملتلك ايه الست الى انت شغال شتيمه فيها دي
والله انا بتهيئلي انك واخد منها قلم جامد اوي ولسه معلم فيك يعنى
بس واضح جدا انك تستاهل القلم ده
ايه يا بلوجريه رايكم ايه اقفل المدونه ولا ايه ؟؟؟؟؟؟؟؟؟؟
ولو انا شايفه ان كلنا محتاجين نتكلم ونتكلم كتير اوي
ومش عشان انا باقول اننا ندخل من غير اسامي يبقى اقصد نستخبي
ولا انا مش عايزه اقول انا مين منكم عشان برضه استخبى
ده بس عشان واحنا بنتكلم نشيل اي اعتبارات ممكن تكون حاجز نفسي للصراحه مع نفسنا حتى
مستنيه اسمع رايكم اكمل ولاارجع في كلامي
مش عشان الشيء ابو لسان بينضح زباله ده لا
عشان عايزه اعرف رايكم انتم فى فكرة المدونه بجد

الخميس، 13 نوفمبر، 2008

الضرب

بسم الله الرحمن الرحيم
نفتتح جلسة البعبعه الجديده
هانتكلم النهارده عن الضرب .
لا مش ضرب الادمغه
لا لا
عن الضرب الضرب الى هو حد يضرب حد
انا عن نفسي شايفه ان اسلوب غير آدمي بالمره
وانه تصرف لازم يصدر من حد غبي وضعيف كمان
ضعيف الشخصيه يعنى
ممكن حد فينا يكون اتعرض للضرب من اي حد
من ابوه من امه من جوزها
من مرااااته ايوه ايوه بتحصل والله
عندنا فى دينا الضرب ده فعلا مش موجود
الا ما ندر
زي مثلا ضرب الزوج لزوجته والى الرسول فسره انه يضرب يعنى تهويش مش عجن وخبط وبونيات
اوبالنسبه للاولاد فوق العشر سنين برضه نفس الموضوع
وكان حتى رسول الله يأمر المسلمين انهم يتقوا الوجه فى الضرب حتى فى الحروب
تخيلوا الجمال بقى
عشان كده اكتر حاجه توجع بتهيئلي الضرب بالقلم على الوش
+++++++++++++++++++++++++
فاتفضلوا بعبعوا فى هذه الناحيه
وقولولنا مين ضربك؟؟
وليه ضربك؟؟
وانت كان رد فعلك ايه؟؟
وبتتمنى ايه بخصوص الموضوع ده؟؟
ويا ترى هاتسكت للي هايضربك بعد كده ولا هاتعمل ايه ؟؟
على فكره انا هاجاوب معاكم تحت فى الردود وهامضي باي اسم
ياريت الى يكتب بغير معرف يكتب بس اي اسم حركي عشان اعرف ارد عليهم
واي حد عايز يقول حاجه غير الى انا كاتباه يقول
شكرا لكم جميعا

افتتاحية بعبعه بلوجاريه

بسم الله الرحمن الرحيم
اخواني واخواتي المدونين
عملت المدونه دي عشان لاحظت ان الكل مخنوق والكل عايز يتكلم .
عايز حد يسمعه
فى الكلام علينا الف قيد وقيد
خصوصا ان فى ناس مننا بقوا معروفين لبعض شخصيا
ومره قريت فى احدى المدونات بتقول كان نفسي ما كنتش ابقى معروفه انا مين عشان ابعبع براحتي
قلت طيب نعملكم هنا مدونه مخصوووووص للبعبعه
كل الى نفسه حاجه يقولها
انا كنت هاسيبها مفتوحه للجميع لكن ترددت في الموضوع
طبعا هاحاول اطرح موضوعات نتناقش بشأنه
ولو حبيتوا اسيبلكم اميل تراسلوني عليه تبعتولي الى عايزين تقوله انشره
ومش عايزه اسامي
الى عايز يدخل يعلق بغير معروف اوك
او عايز يدخل باسم تاني غير اسمه الى كلنا عارفينه به برضه اوك
والى عايز بقى يدخل باسمه الى نعرفه به بررررررضه اوك
المهم
نبعبع براحتنا ونقول كل الى فى نفسنا من غير قيود
الا قيد واحد يا جماعه
نخاف ربنا سبحانه وتعالى
ده قيد لا يمكن نتحلل منه
فياريت نقول الى فى نفسنا من غير ما نغلط فى حد ومن غير ما يكون كلامنا مبتذل وسخيف
واهم حاجه من غير ما ننسى نفسنا
عايزه اعرف رايكم جميعا