الأربعاء، 25 فبراير، 2009

خايف اتجوز

ازيكم ايها البلوجاريه الكرام
كده يعنى اغيب اغيييييييب ما حدش يقولي يا بعبعه يا حبيبتنا يا سامعه اوجاعنا ا لى خايفين نتكلم فيها تعالى روحتي فين وسبتينا
مااااااااشي
هانتكلم النهارده عن مشكله وصلت لبريد المدونه بؤيئي مش فى اميل
وصاحب المشكله بيقول ان عمره 32 سنه
وانه ماديا مرتاح . شغله كويس واهله بيساعدوه
ومامته نفسها تفرح بجماله وهو عريس
بس هو عنده مشكله فى نفسوياته الداخليه
وهو اكتشف المشكله دي
بعد ما بقاله سنتين كل ما ماماته تجيبله عروسه يطلع فيها القطط الفاطسه ويرجع فى كلامه على اخر لحظه احيانا
وحتى لما قلت اتجوز عن حب كل ما ادخل فى  علاقه مش باكملها 
اكتشفت انى خايف
اه انا خايف اتجوز
انا بصراحه كده عكيت كتير وانا شاب صغير
وما زلت باعك بصراحه اكتر
وشوفت بلاوي كتير
الى بستغفل ابوها 
والى بتستغفل اخوها
وكله كوووووم والى بتستغفل جوزها كووووووم تاني
ياااااااما ستات كلموني واجوازتهم قاعدين جنبهم زي شوال الرز الفلبينى
وياما دخلت بيوت رجالتها مش فيها
وكنت ساعات اقابل الواحده فيهم صدفه مع جوزها وهى بكل بجاحه تبصلي واحيانا تقف تكلمنى وكنت ابقى حاسس ان جوزها زي ما يكون عارف الى بينا وساكت
ماهو مش معقول مغفل اوي  كده
وكل الستات دول موجودين بين الناس ما تعرفش تفرق بينهم وبين الناس
ومنهم منقبات ومحجبات ومش محجبات
يعنى ما تعرفش تفرق على اساس الشكل ابدا
وعلى كل المستويات الاجتماعيه فى قرف
اضمن منين انا انى اتجوز واحده وبعدين تستغفلني زي ما انا استغفلت رجاله كتير
ده غير طبعا ان شكلها ما عادش في حاجه على الزيرو بعد ما شرف البنت بقى زي عمود النور مش زي عود الكبريت
يعنى ممكن اخد واحده وتطلع فى الاخر عاكه لما قايله بس قبل الجواز
وجايز كانت ضاربه ورقه عرفي كمان 
 مش عاااارف انا بقيت ساعات اقعد ابص للناس فى الشارع واقول  يا ترى الى ماشيه دي شكلها عامل زي الحمل الوديع ووشها بريء ولابسه حجاب ولا اسدال
يا ترى هى فعلا كده ولا زيها زي اي واحده من الى عرفتهم
لانهم كانوا بيبقوا كده فى الاول
انا بقيت لما اقابل واحده تتمنع مني ولا ترفض علاقه غلط
اقول على راي عمرو دياب
كلهم بيقولوا كده فى الاوووووول
مش عارف اثق فى واحده
وخااااااااااايف اتجوز
تفتكروا انا ممكن ابقى زي شوال الرز الفلبينى ؟
...............................
كما عودناكم انا هانزل فى صفوف الجماهير تحت معاكم وارد عليه
انا مش عارفه هو بيدخل المدونه هنا ولا لا صاحب الكلام
بس مش ممممممهم انا باعرض المشكله
عشان ننقاشها ونستفيد منها احنا
مش مهم هو يستفيد بقى
انا مخنوقه منه اصلا  

هناك 29 تعليقًا:

شمس النهار يقول...
أزال المؤلف هذا التعليق.
عمرو يقول...
أزال المؤلف هذا التعليق.
عمرو يقول...

هالو بعبعه
هاو آر يو ؟
نايس تو سى يو آجين هيير
طيب أنا بأكتب بالاٍنجليزى ليه ؟؟!!
ما علينا يمكن شوية تهييس و يروحوا لحالهم
الشاب صاحب المشكله دى يبدو عليه كده أنه عاوز يخلق عقده من لا شىء
يا أبنى ما أغلب الشباب هلس قبل الجواز بس طبعا ما عدا أنا ( أيام ما كنت شاب يعنى من أيام السادات كده )
و أكيد يا حبيبى مش كل البنات و السيدات هلسوا هم كمان و خاضوا تجربة محمود أيه ده يا محمود ؟؟!!
بس طبعا خوفك من عقاب الله عز و جل لشخصك الكريم على ما أقترفته من آثام فى حق الفضيله و العفاف يا اٍنسان الغاب يا طويل الناب بيدفعك دفعا لمثل هذا التفكير الأزعر اللى حيخليك تقضى بقية عمرك حبيس مثل هذه الوساوس اللى حتقودك فى النهايه لعدم الزواج الحلال و الاٍكتفاء بممارسة الحرام أو على الأقل ممارسة الحاجه اللى بينك و بين نفسك و اللى حتسبب لك ضعف النظر و تلحس عقلك زى ما كانوا بيخوفونا منها زمان
نصيحتى لك أيها الذئب السحلاوى أن تتوب للمولى عز و جل توبة نصوح لا تقصد بها اٍلا وجهه سبحانه و تندم على ما فعلت و تسأله أن يرزقك ببنت الحلال اللى ما أتلعبش فى عدادها و اللى ستكون اٍن شاء الله زوجه طيبه تصون عرضك و مالك و أم صالحه تتقى الله فى عيالك
بس لازم الأول تتوب بجد و تنوى أن تباعد بينك و بين الحرام كبعد المشرق و المغرب و أكيد ربنا سيعينك على الحلال حبا فى عبده التائب الراجع لسواء السبيل
خللى أملك فى الله كبير و أستبشر خير و اٍن شاء الله مش حيخذلك أبدا
و ربنا يسامحك بقى على البلاوى اللى زى خلقتك اللى عملتها اٍنه وحده غفار الذنوب

بعبعه يقول...

هو ده الى انا دايما اقوله

الى يقعد فى جنينه يشوف النور ويشم الورد ويسمع العصافير

والى يقعد فى مقلب زباله يشوف زباله ويشم يع ويسمع صوت الكلاب والقطط


اهو انت بقى يا اخينا عايش فى مقلب زباله

عشان كده شايف كل الناس حوالي زباله ووحشين والبنات مش على الزيرو
والستات خاينين والرجاله اشوالة رز


انما لو انت بتعرف ناس نضيفه كنت غيرت رايك

وطبعا لو قابلت الناس النضيفه مش هاتشوفهم ولا هاتعرفهم

لا ده انت يمكن تحاول تخليهم زيك يا اما عشان تثبت لنفسك ان كلا لناس زيك
يا اما عشان انت فعلا مش مصدق انه نضاف وهما بيمثلوا عليك


ده غير ان كل ينال غايته

انت يا حبيبى عكاك زي قلت ماشي ترمرم من الزباله وتعك

يعنى بتدور اصلااااا علىحاجات مش نضيفه
والى بيدور على حاجه بيلاقيها

عشان كده انت دايما بتلاقي ناس مش كويسين


الحل انك تنضف انت الاول

ايووووووه تنضففففففف مش تستحمى

لا تنضف عموما تبطل عك وقرف ورمرمه

واهم حاجه تصلي الصلاه تنهي عن الفحشاء والمنكر

وتتووووووب توبه نصوح وتندم على مافات وتستغفر لك ولكل الناس الى غلطت معاهم وفى حقهم سواء الستات والبنات ولا اهاليهم

وتستغفر لهم وتدعيلهم بالهدايه

ولما تنضف خاااااالص مالص بالص
وتحس نفسك نضيف
ساعتها بقى ابدا دور على عروسه

وثق انك لو كنت نضيف ساعتها ربنا هايوقعك فى حد نضيف

بس اوعىىىىىىى تفاخر بذنبك بعد كده وتقول انا كنت مقطع السمكه وديلها وتحكى عن مغامرات القذره وانت سعيد بها

اندم على ما فعلللللللللت

انضضضضضضضضضف الاول وبعدها هاتعرف وتتاكد ان فى لسه ناس نضيفه

يا ابن الحلال الرسول عليه الصلاةوالسلام قال

الخير فى امتي الى يوم الدين

بس انت دور عليه

كل ينال غايته

زوجه يقول...

بصراحه مفيش كلام يتقال بعد كلام بعبه
والاستاذ عمرو
فعلا ووفيتم وكفيتم
انضفففففففففففففففف الاول وانت هتشوف كل الناس نضيفه

EmY يقول...

انا موافقه جدآ علي رأي استاذ عمرو

بس عندي سؤال بسيط لصاحب المشكله

انت خايف تتجوز واحده عكت علي اساس ان هي كده مش محترمه

طيب انت بتحترم نفسك ؟

كيــــــــــــارا يقول...

والله يابعبه هو كان في بيئه كلها ملوثه واللي اتلسع من الشوربه ينفخ في الزبادي بس فعلا في بنات كتيييييييييييييييييير عمرها ماتبيع نفسها ولا بكنوز الدنيا ولا بمليون كلمه حب

الفراشة الصغيرة يقول...

افتكر انه مشترك فى كل الغلط ده مع البنات فربنا حب يدوقه من الكاس

علشان لو هو قلبه كويس مع البنات ربنا كان كرمه بالاحسن

الطيبون للطيبات والخيثون للخيثات

بعبعه يقول...

زوجه

شكرا لك ونورتي

بعبعه يقول...

ايمى

بالظببببببببط دي نقطه مهمه اوي وانا حبيت ابرزها فعلا فى الكلام

هى انه عايز واحده على الزيرو باماااااااارة ايه ؟؟؟


وشايف نفسك كويس برضه بامااااااااره ايه عشان تطلب لنفسك واحده محترمه ؟


تحياتي ليكى ونورتي

بعبعه يقول...

كيارا

هو عايز يتلسع فى دماغه يمكن يفوق يا بنتى

نورتي وهاتضربي هههههههههههههههههههههههههه

بعبعه يقول...

الفراشه الصغيره

ماهو يا بنتى ربنا بيقول ايه ؟

وما ربك بظلام للعبيد

لازم يفضل شبح اثامه يطارده

غفر الله له وللمسلمين جميعا وتاب عليه هو والى زيه

mahasen saber يقول...

بعبعه ازيك يا حبيبتى

فينك اتبسطت قوى ببعبعتك عندى يا جميله نورتينى بس انا فاكه عن الواد خالص

امه اليى شكلها هتقلب معقده ربنا يستر

بعبعه يقول...

لا ربنا يسترها معاكي يارب

نورتي يا قمر ايه النور ده يا ولاد

بنت الغربة يقول...

السلام عليكم يابعبعه
انا اول مرة ازورك وبصراحه عجبنى البلوج بتاعك قوى ..شكلى هابعبع كتييير هنا ...
اولا شكرا لزيارتك لى قوى ..وربنا يخليك..
بالنسبه لرأى فى الموضوع ..فغير انه راااجل مققققققققققققققرف...وسورى فى اللفظ بس مايتقالش عليه غير كده
انت عارفه لما الواحد ياكل مطرح واحد تانى ..او يروح يدور مخصوص على بواقى الاكل او فضلات الطعام علشان ياكلها....بدل مايشترى اكل نظيييييف...ده يتقال عليه ايه غير كده...؟؟؟؟وحسبى الله ونعم الوكيل فى الستات المتجوزين اللى غلطوا معاه ...اعتقد انه مش عايز يتجوز علشان خاااايف من انتقام ربنا منه لان (كما تدين ...تدااان )
انا راى انه يستغفر ربنا الاول ويتوب عن البلاوى اللى عملها...سواء كانت مع بنااات او متزوجااات...
لان الاتنين انيل من بعض...ويرضى بنصيبه فى الجواز لانه مهما عمل عمره ماهيتأكد من اللى هايتجوزها...حتى لو حبسها فى البيت واخد المفناح...
اللى عايزة تعمل حاجه بتعملها...
وهو ونصيبه ...وربنا يهديه...
تحياتى ليك

Sweet Violet يقول...
أزال المؤلف هذا التعليق.
بعبعه يقول...

بنت الغربه

نورتي ومقرف دي قليله عليه قولي يا اختي الى نفسك ما تكتميش

بعبعييييييي

وتمام رايك ربنا يكرمك

بعبعه يقول...

فيوليت

عندك حق فعلا قابلت ناس ربنا تاب عليهم كتير

لكن فعلا بيفضل الشك حليفهم لفتره مش قليله ان ما كانتش العمر كله


تحياتي لكى

ستيته حسب الله الحمش يقول...

لقيتك بعبعتي عندي
قلت اجي ابعبع عندك
صدمتيني بالموضوع المتبعبع

مسكين صعبان عليا قوي

لأن ده أحد عذابات امثاله في الدنيا

من كتر الحرام
حتى لو تزوج حلالا لا ترضيه امرأته ابدا .. احد تبعات تذوق المتعة الحرام

الغريبة انا شفت زيه كتير قوي
اولا بيتزوجوا واحدة اول انطباع ليكي عنها .......... ليه .. علشان ايه

ثم بعد ذلك يعذبها
لابسة كده ليه
مبتلبسيش كده ليه
انتي طول النهار بتطبخي وسيباني
انتي مش ها تاكلينا ابدا
انتي مهملة في نفسك
انتي مهملة في ولادك


كما قلت لك تبعات تذوق فاكهة الحرام .. الحرمان من طعم فاكهة الجنان

اعاذنا الله واياه وتاب عليه وهدانا جميعا

تحياتي

زوجة عنيدة يقول...

انا بقى عايزة افهم لما كل واحد يمشى ويلعب ويعمل حاجات كتير مع بنات كتييير

هيبقى بقى فين البنات الكوبية الخام اللى سيادتة عايز يتجوزها

قوليلة الطيبون للطيبات والخبيثون للخبيتات

واللى عملة فى حياتة هيأخد اد بالظبط
والدليل على كدة ان ربنا عادل اوى

اوعى يفتكر انه عايز يغلط ويأخد بنت محصلتش

اما الراجل المتدين اللى عمره ما غلط ولا عمل حاجة حرام

يتجوز مين؟!!


قوليلة بلاش يتجوز احسنله

سامحينى انى كنت متعصبة بس الصراحة الكلام ضايقنى اوى

تحياتى:)

عروسة يقول...

مش حقول غير ربنا يهدية طب انت جاي دلوقتي تفتكر الحلال وتتجوز كنت من الاول فكر في الحلال وانك تملي حياتك بيه بدل الحرام

بلنسبة للحل اتجه لربنا وادعي انه يغفرللك وحتعرف بانه سامحك وغفرللك وقت لما تتجوز من بنت حلال توب توبة ناصوحة لانك بتقول انك لسة لغاية دلوقتي بتعك
ربنا يهديك
دمتي بالف خير
مدونتك جميلة زي صحابها

بعبعه يقول...

ستيته

معاكي حق يا حبيبتى

فعلا هو بيعذب نفسه بنفسه

وربنا يهديه ويهدي امثاله

بعبعه يقول...

زوجه عنيده

انا كمان مبقوقه منه مافيش حاجه عادي

بس كمان ما نقدرش نقفل باب التوبه فى وشه

احنا قلناله ينضف ويجي يتجوز بقى

سعدنا بكي يا قمر

بعبعه يقول...

عروسه

يارب يتوب عليه وعلى الناس كلها


ويارب كل عكاك يعرف ان اخرته سوده لو ما تابش الى الله تعالى

نورتي

انت تسال والكمبيوتر يجيب يقول...

دعوه
الأخ العزيز/او الأخت العزيزه
تحيه طيبه
برنامجنا الأذاعى عن النت والمدونات من الأذاعه الرئيسيه لمصر اى اذاعة البرنامج العام يذاع يوميا التاسعه وعشر دقائق صباحا عدا الجمعه
ندعوك لزيارة مدونتنا والتعليق على ما نطرحه من موضوعات وهذه التعليقات تذاع باسماء اصحابها فى حلقات برنامجنا

وبموقعنا رابط بالضغط عليه والأتنتظار قليلا وقت أذاعة البرنامج يمكنك الأستماع الينا
المدونه
http://netonradio.blogspot.com
الموقع
http://dear.to/cairo

koukawy يقول...

علي فكره المشكله ديه بتواجه الطرفين
سواء البنت او الولد
و هي مشكله كبيره جدا
لأن الراجل المقفل بيعك بعد الجواز و العكاك بيبقي اتعود علي العك
و حقيقي ان البنات بقوا حاجه عجيبه غير زمان
ربنا يكون في عونك يا ابني
بس انا من رأي استخير قبل التقدم للجواز
و لو لقيت نفسك الموضوع تحول لعقده بلاش تتجوز عشان انت ممكن تظلم واحده بريئه بعقدتك

بعبعه يقول...

koukawy

منين جبتي ان الرجل المعقفل بيعك بعد الجواز دي ؟؟؟

مش شرط طبعا فى ناس محترمين كتير يا فندم ويعرفوا ربنا كويس ولا عكوا قبل ولا بعد ولا لهم فى العك اصلا

غير معرف يقول...

هو ايميلك اللى على المدونه
انا ضفته على الماسنجر اتمنى انك تقبلى الاضافه لانى محتاجه اتكلم معاكى

مصري جدا يقول...

شوف من الاخر انت صح


بالمناسبة انا كمان ما عنديش جيرل فريند
يلا بينا ننزل ندور على تلاتة




ليا
لو عاوز نخليهم اربعة

ما تحسش انك غريب بالعكس انت الصح وغيرك اللي غلطان
الحب جاي جاي
وساعتها
ولا بلاش انت خايف طبيعي