الثلاثاء، 17 نوفمبر، 2009

احترام الاخر

ازيك يابعبعه ياحبيبتي طبعا هتتضربيني انا عارفه بس يلا انتي الكبيرة

بصراحه احترت في العنوان واختياره لان الموضوع انا شيفاه انه من البديهيات

يعني  امر مسلم بيه لكن بصراحه من فتره بيحصل حاجات غريبه قدامى

بتننننننننننح منها

فكتب بشكل عفوي اللي جوايا

- اتربيت اني مدام انا مع راجل اداني اسمه  اني اصونه وحتي مسمحش لنفسي ان يجي في خيالي حد غيره  هعتبر دي خيانه 

- ادام ارتبطت بانسان حتي لو كلام او قراية فاتحه او اي درجه من درجات الارتباط اللي قلتها قبل كدا في بوست الخطوبة  يبقي هو دا وبس  لا حتي اقول  شوفت فلان وعجبني ولا  كان نفسي ومش نفسي والكلام اللي الاغلب عارفه

- مش عاجبني تصرف اقوله انت عملت كذا وكذا ودا مش عجبني وطبعا مش بشخيط ولا كانه عمل جريمة لا الاسلوب بيفرق

- اتربيت علي ان حتي لو كنا متخانقين وشبه منفصلين اني برده اصونه ومحدش يدخل حتي بالي لاني لسه مرتبطه بيه

- اتربيت علي ان لو فشلت في خطوبة اني مدخلش حد حياتي الا لما اكون تيقنت ان الماضي اتمحي عشان اللي هيديني اسمه دا  من حقه عليا اصونه ومش اخونه حتي لو بذكري

انا كل دا مش بتكلم لا في دين ولا اي حاجه بتكلم في  حدود متعارف  عليها من زمااااااااااااااااااان او كنت فاكره انها متعارف عليها

^^^^^

طيب بعد الرغي الطووووووووووووويل العريييييييييض دا هتضربوني وتقولولي لخصي هاتي من الاخر هقول حاجه شفتها قدامي وهي اللي لغبطتلي الدنيا لانها مش حاله فردية لا شفتها مع كذا حد

^^^^^^

واحد متزوج ومعاه طفلين مش مرتاح مع زوجته وبيفكر يتجوز من واحده تانيه  مهما حصل هقول حقه لانه بيفكر في حلال ماعلينا من النقطه دي

اللي حبها وعاوز يتجوزها

كانت واحده متزوجه ومعاها طفلين ولسه مش اتطلقت

والاتنين ارتبطو وتليفونات ومقابلات

تيجي تقول دا غلط

يتقال ماهي في مشاكل مع جوزها ويعتبر منفصلين  لكن لسه مش طلقها

هنا

هو مين الصح

انا بتفكيري واللي اتربيت عليه

ولا الحاله دي اللي كل مبررهم انهم شبه منفصلين وفي مشاكل بينهم

مع العلم

اني سالت الشخص دا

لو مراتك حبت واحد تاني واهو في بينكم مشاكل هتقبل انها تخرج معاه و ووو

ولقيته قالي كفايه  مش مكن اسمحلها بكدا

طيب ليييييييييييييييييييه سمحته لغيرك ؟؟

ليه ؟؟

سؤال يطرح نفسه وبما اني صغننه ولسه  بالشكل اللي بشوفه مش عرفت حاجه يبقي هستني  كلامكم انتو ياتاكدولي اللي متربيه عليه ياتقولولي هو في ايه

ايه بئا هه ؟

بس برده المتربيه عليه مش هيطلع من جوايا لانه اساس

 

هناك 12 تعليقًا:

blackshwak يقول...

سلااااموا عليكواااا
اللي تربيتي عليه زي أي حد فينا هو الصح
وهو المفروض بشرط إنه يتوافق طبعا مع الدين
وبما إن اللي إنتي بتقوليه يمشي علي التوازي مع الدين يبقي كلااااامك صحيح
100%
بس الناس اللي أنتي بتتكلمي عليهم دول
المجتمع خرب عقولهم وخلطوا ما بين اللي هما عاوزينوا في مجتمع بيوافق الواحد علي اللي هو عوزه وخلاص
ومابين الشئ الصحيح والمفروض دينيا وأخلاقيا

ربنا يهدي
تقبلي مروري

بعبعه يقول...

اه طبعا هاقطعك قطيع يا بوي

ايه دددددده سايباني لوحدي ولا بتعملي حااااااااجه

هو انا وقعتلكم هنا


نيجى للموضوع بقى

لا طبعا انتى صح الصح يا باشا

وانا دايما باقول الكلمه دي

خلص الاول علاقتك الاولى وخد قرار فيها نهائي
وبعدين دور على غيرها

للست او للراجل


وخصوووووووووصا الست

اقول دايما احترمي نفسك واحترمي ابو عيالك ولما تخلصي من قصتك الاولى دوري على غيرها
لان الراجل معاه الرخصه
الى ممكن يقول انا هاتجوز اثنين

انما الست لا

تحياتي يا اعترافات ومنووووووورانا يا اختي

Dr. Kafy يقول...

و الله انت كلامك صح
و كمان متربية صح

و همه اللى غلط و ربنا يهدى الناس و المجتمع و يرحمنا من اللى إحنا بنشوفه.

فشكووول يقول...

مظبوط يا بعبعه والله انت بتتكلمى صح

شفت فيلم زمان اظن بتاع عمر الشريف والوليه الحلوه دى فاتن حمامه وكانت متزوجه وبعدين بقت تحب عمر الشريف وياسلام والمخرج عمال يعمل لهم مقابلات وفسحات فى الجنينات وللاسف الناس كانت متعاطفه معاهم .. مع ان ده غلط وستين غلط كمان وزى ما قلت مش صح ولا كويس ان الواحد مجرد يفكر فى آخر غير زوجته او زوجه طالما هو مرتبط.

تحياتى

غير معرف يقول...

السلام عليكم

حبه بس اسأل سؤال ملوش علاقه بالموضوع
بس محتاجه اجابه تريحنى
متقدملى شاب 25 سنه ومصاب بضغط الدم المرتفع هل اصابته بالضغط العالى تعوق العمليه الجنسيه او تؤثر فيها بالسلب
وياترى ممكن الامور تتطور للاسوء مع الوقت
انا محتارة جدا ياريت تساعدونى

قوس قزح يقول...

تربيتك صح اكيد
و الكل هيقول كده
و انا مش باعارض ده
بس عايزة اقول حاجة مهمة
هنا الست غلط اه
بس فى نفس الوقت جوزها غلطان
لان ست او رجل ما هم اللى انسان بتحركه المشاعر
مينفعش اتعامل مع الطرف اللى قدامى على انه زيه زى اى كرسى فى البيت و فى نفس الوقت اطلبه انه ميحسش
لازم نعرف ان كل انسان عايش بسبب المشاعر ..و مش شرط حب بين ست و رجل
بس اى مشاعر فى الدنيا حتى لو مشاعر كره و غضب
احنا مش ماكينات .. لازم نراعى بعض
لازم نعرف ان اللى بيفتقد المشاعر فى حياته هيدور عليها ..ده الست اللى مش بتخلف بتروح تجيب قطة تربيها ..ليه احنا نمنع نفسنا عن اعطاء المشاعر و نطلب من غيرنا ميدورش عليها مع حد تانى .. لازم لما نمنع المشاعر نبعد ..علشان لو مبعدناش اكيد هنتخان او ننكره
انا مش الوم بس على طرف انه دور على الحب
لازم اسال الطرف التانى ليه مقصر مع الشخص المرتبط به ..ليه تخليه يدور على مشاعر محتاجها ؟؟
لازم نتعلم ندى مشاعرنا لبعض علشان محدش يخون
لو وقتها حد خان يبقى هو من الاصل خاين

الدرس هنا لازم يكون كالاتى
- متسيبش شريكك بدون مشاعر علشان ميدورش عليها بره
- محتاج مشاعر يبقى لازم تنهى علاقتك الاول مش بس علشان متكونش خاين .. لكن علشان ميجيش يوم و تسمع ان انت كنت خاين مرة و ايه يمنع تخون تانى و تالت
- قبل ما تقرب من حاجة مش ملكك تعرف ان داين تدان ..و ممكن فى يوم حد تانى ياخد اللى ملكك


تحياتى
كل سنة وانتم طيبين

صبرني يارب يقول...

موضوع جميع يا اعترافات

وفعلا انا معاكي ان بقى فى هبل كتير فى الدنيا

واسهبال اكتر وعك وحاجه تقرف

احيانا فى ناس بيصعبوا عليا فعلا لافتقارهم للمشاعر فى حياتهم

بس مش معنى كده ابدا انهم يخونوا او يغلطوا باي شكل كان



اسمحيلى كمان بس ارد على داليا


بصرف النظر عن كون هايتقال ايه عنه او عنها لو دور على مشاعر وهو لسه فى كنف العلاقه الاولى

اولا خلينا معلش نقول ان الراجل الشرع خلى له الحق انه يكون متعدد الزوجات
لكن برضه من حق الزوجه انها تعرف ان كان ناوي على زواج تاني مش يبقى استهبال ويعد يحب طول عمره على مراته بحجة انه ناوي يتجوز



كده يبقى خلينا نركز اكتر فى الكلام عن الست الى بتحب وهى لسه متجوزه بمبرر اصل انا مش سعيده ومفتقده المشاعر


التصرف ده يا دولي غلط اصلا
فى حد ذاته غلط شرعا وخلقا واجتماعيا


بصرف النظر عن ايه هايقلوه الناس

وعن عواقب التصرف ده على حياتها بعد كده
خلينا نحيد النظره ونخلي كلامنا قاطع

ده اصلاااااا تصرف غلط بجميع المقاييس

عشان معلش انا بارفض وضع راي المجتمع فى حد ذاته كمقياس لصحة او خطأ ا لفعل


لان اصلا المجتمع كله عنده امراض كتير محتاجه علاج


تحياتي ليكى يا اعترافات على الموضوع المهم


وكانت فرصه سعيده امسك فى رقبة البت داليا
هههههههههههههههه

غير معرف يقول...

الاحترام اهم جاحة الاحترام هو احنا عارفين نعمل حاجة غيروه

غير معرف يقول...

ياريت الرد على سؤال مريض الضغط

بسرعه محتاجه الاجابه اوى

واسفه على الازعاج

بعبعه يقول...

الاخت الى بتسأل

معلش يا حبيبتى انا انشغلت شويه

وحاضر بس اول لما اشوف الدكتور عباس هاسأله وارد عليكى


اقطع نفسي ؟؟؟


اعترافات سايبه بوستها مش متبعاه

د عباس منفض للحالات الى فى المدونه

وعمرو مطنشنا كلنا على بعضنا


هو انا هاعمل كل حاااااجه ولا ايه

بعبعه يقول...

الاخت صاحبة السؤال عن ضغط الدم

انا سألت الدكتور عباس

وده رايه


ضغط الدم مرض سهل السيطرة عليه

عن طريق المحافظة الغذائية وتناول ادوية بانتظام
لكن يحتاج إلى عمل ابحاث مبدئية عشان نعرف سببه ايه فى السن الصغير ده
لأن بعض الحالات تحتاج إلى تدخل جراحى مثلا

فى حالة لو كان فى اسباب معينه لارتفاع الضغط
فيه ساعات غدة فوق كلويه نشطة
ممكن ضيق فى شريان
ممكن غدة درقية
المهم لو طلع عنده ضغط دم اساسي او العادي يعنى مهم انه يظبطه
علشان على المدى البعيد المرض ده بيعمل ضيق فى الشرايين لو مش متظبط
ضيق الشرايين ده بياثر على الناحية الجنسيه

النقطة المهمة ان بعض ادوية الضغط بتعمل ضعف جنسى

لازم مع الرجوع للدكتور المعالج يبعد عنها
ضيق الشرايين طبعا ياثر لوحصل على الجنس
يعنى تاثير غير مباشر
لكن المرض نفسه ملوش تاثير مباشر


خدي انتى قرارك بقى على حسب المعلومات الى دكتور عباس اتفضل وقالها لك

قوس قزح يقول...

معلش هارد على صبرنى يارب

يا بنتى انتى
هو انا قلت حد يخون ؟؟
انا باتكلم عن واحد من الاسباب اللى بتخلى حد يعمل كده
و اعتقد ان خيانة الست نادرة و بتكون بسبب فتور المشاعر او الخيانة من الزوج

علشان كده قلت الدروس اللى نتعلمها من البوست ده
اقرى و النبى يا صبرنى تانى درس قبل ما اعضك :)