الجمعة، 2 أبريل 2010

الفياجرا واخواتها


استعجلوني بقى لحد ما الموضوع يطلع ناقص سوى
معلش يا جماعه اعذروني  اكيد عايزه اكتب واشوفكم والله بس غصب عني

المهم

النهارده  يا جماعه هانتكلم عن موضوع الفياجرا زي ما اتفقنا المره الى فاتت

طبعا مش الفياجرا بس ولكن هى اشهر انواع الادويه المسببة لمنع إنقباض العضلات الناعمة المحيطة بالحجيرات الدموية بالقضيب مما يسبب فى تدفق الدم والحفاظ على الانتصاب

يعنى تقدروا تقولوا هانتكلم  عن الفياجرا واخواتها 

الحقيقه انا عايزه اركز على نقط معينه فى الموضوع ده 

ليه بقى لان انا شايفه ان فى هبل متقع دلوقتي فى تناول الادويه من النوع ده  بشكل عشوائي وعبط على الاخر

حاجه كده زي البونبون فى ادين الناس الايام دي  لما الواحد بدأ يشك فى الناس انهم بيعملوا دماغ بيها مش بياخدوها كعلاج

ايوه الفياجرا دي علاج والله ادويه مش بونبون لازم يكون عندنا وعي كافي اننا نفهم ايه الموضوع

طيب تعالوا نعرف الفياجرا دي بتعمل ايه عشان نعرف هى اصلا المفروض نستخدمها امته

كمان علشان نفهم عمل الفياجرا لازم نفهم  ازاي بيحصل الانتصاب  طبعا الى ما قراش البوست الى فات  آلية الانتصاب يروح يقراه

طيب احنا قلنا المره الى فاتت  ان لما بيحصل الانتصاب  عشان ينتهى الانتصاب لازم يحصل الاتى


الجسم بيفرز انزيم معين الانزيم ده بيروح على الماده احادية الفوسفات (الى بتسبب الانتصاب )
فيكسرها وتبقى ماده مالهاش فعاليه (وطبعا بانتهاء الاثاره الجنسيه بتختفى الماده الاحاديه )
 بالتالي العضلات الصغيره حوالين القضيب بترجع تشد تاني على الكهوف وتطرد الدم الى دخل فيها

طيب الفياجرا واخواتها بيعملوا ايه بقى  ؟؟

الفياجرا  بتروح على الانزيم ده (الى بينهى الانتصاب) وتروح تتحد معاه وبالتالي تغيره فما يكسرش الماده الاحادية الفوسفات  فيستمر الانتصاب لمده اطول وبشكل اقوى

طيب نفهم ايه من الكلام ده ؟؟

ان الفياجرا بتعمل ايه ؟؟

بتقوي الانتصاب  وتزود مدة  الانتصاب

لا لها علاقه بسرعة القذف ولا بتخلي كوكو الضعيف يتحول الى توتو عضلات
وكمان مالهاش علاقه مباشره بالرغبه يعنى مش تبقى انت مش جايلك نفس فتقول والله الواحد ياخد حبايه يبقى فى التمام

يعنى لو حضرتك  عندك الانتصاب كويس يبقى الفياجرا ما لهاش لازمه معاك اطلاقا
والفياجرا واخواتها مش بيشتغلوا من نفسهم لازم يكون فى عندك رغبه ولازم تتعرض لاثاره كمان عشان يحصل انتصاب

شوفتوا انا قلت ايه ؟؟ لازم يكون فى رغبه واثاره وعليه وكلامي هنا موجه للستات

هو مش بياخد فياجرا عشان انتى مش عاجباه ولا انتى مش مثيره كفايه لا يا ستو هانم والله ده علاج والله مالوش علاقه بالموضوع ان كنتى عاجباه ولا مش عاجباه

المفروض انها اكتشاف علمي فعلا خطير جدا وعالج مشاكل كتير عند ناس كتير

الدكتور عباس علق عليها تعليق جميل جدا
قال انها عملت ثوره فى المجتمع من ناحية انها حسنت الاداء الجنسي عند الرجال بعد سن الكهوله ( اربعين سنه وانت طالع )

وده قلب موازين المجتمع

اتاري يا اختي الرجاله شايفين نفسهم وتلاقي الواحد خلاص فى سن الضياع ويقولك انا هاتجوز انا زي الفل حديد يا باشا .  قلبهم قوي علينا يا اختى  .

المهم  نرجع لموضوعنا
ايه بقى الهبل المتقع الى شغال فى الدنيا والى له والى مالوش بياخد فياجرا شباب وكبار حتى الى لسه عريس جديد ومن غير دكاتره طبعا

دكاترة مين ما شعب مصر كله دكاتره دلوقتي والرجاله بيفرقوا على بعضهم الفياجرا زي ما تكون لبان سماره يا سلطان
لا وبقى اكل عيش فله دلوقتي يقولك فلان ده بيشتغل فى الفياجرا الحبايب  عليه لابس جزمه جديده وضارب جل وعايش

الدكتور عباس قالي ان فى بعض الحالات الدكاتره بيدوها للمرضى كدعم نفسي يعنى من منطلق قوي قلبك يا معلم انت معاك المتين كله

يعنى الى ما عندوش سبب عضوى فعلا انه ياخد فياجرا بياخدها عشان تبقى زي الى بيعمل دماغ بهججه عشان يقوي قلبه

نيجى بقى للمهم التحذيرات

حضراتكم المفروض ان الفياجرا تتاخد بروشته من دكتور ما تقلقش مش لازم كل ما تيجى تاخدها تروح للدكتور ا كيد انما هو  هايحددلك الكميه ويكشف عليك ويقولك تاخدها امته وكده

طبعا هى ليها اعراض جانبيه  معروفه زي : (الصداع – احمرار الوجه – إحساس يإنسداد الانف – اضطراب فى النظر – دوخة  )
وده راجع لان الماده الى الفياجرا بتاثر عليها فى جسمنا موجوده فى امكان تانيه فى الجسم مش فى القضيب بس

وطبعا ممكن تحصل مشاكل كبيره بسبب الفياجرا لو اتاخدت كده فى  الاوانطه وبالهبولي ومن غير ضوابط طبيه

 

اهم هذه الظوابط ان الفياجرا كما تحدثنا هى دواء للقلب فأخذ اى دواء للقلب مع الفياجرا يعتبر كجرعه مضاعفة للدواء مما قد يسبب هبوط ذائد و إنخفاض فى ضغط الدم وقد يتسبب فى هبوط حاد للدورة الدموية ولا قدر الله الوفاه


الظابط التانى الفياجرا لها تاثير سلبى على شبكية العين فى بعض الاشخاص الذين يعانون اصلا من مشاكل الشبكية واخذ الدواء فى هذه الحالة قد يسبب مشاكل فى النظر قد تؤدى فى حالات نادرة لفقد البصر

يبقى بالبلدى إلى بياخد دواء للقلب أو عنده مشاكل فى شبكية العين ميقربش للفياجرا غير بعد استشارة مكثفة من طبيب متخصص فى القلب او الرمد

نكتة على الماشى

بيوقلك واحد بيشترى فياجرا فصاحبه بيقوله خد بالك دى ممكن تخليك متشفش قاله مش مهم انا اشوف المهم هى تشوف


ونختم الموضوع بكلام الدكتور عباس الجميل ده والى جايب من الاخر الف شكر يا دوك


وان شاء الله المره الى جايه يكون موضوعنا عن ليلة  الدخله
وده بناءا على طلب الجماهير الغفيره الى فرحهم قرب
ويارب  كتر افراحنا
ومتشكره لكل الناس الى بتسأل عليا فى الغياب هنا او على الميل وما اتحرمش منكم ابدا
والى مش بيسألواعارفه مستخبيين تحت الكرسي بس شايفااااااكم واحد واحد

هناك 31 تعليقًا:

فاتيما يقول...

إيه دا!!!!

انا م الناس اللى تحت الكرسى دول

شوفتينى برضو يا بعبوعتى ؟!!

اروح فين منك بس ؟؟

الموضوع جميل كالعادة

تحياتى ليكى و لكل المشاركين ف المدونة

بارقة نور يقول...

حلو كتير الموضوع
موضوع متميز ومنسق وغير ممل
تسلمي يا ست بعبعة

محدثتك من تحت الكرسي
بارقة نور :)

VÖltaa يقول...

كالعادة موضوع جميل وكلام سليم


تسلم الأيادى

بعبعه يقول...

فاتيما

اصل يا جميل انت نورك مشع بتبقى خلي تحت الكرسي نهار عز الظهر
هههههههههههه

متشكره ليكى يا حبيبتى وتشرفينا دايما

بعبعه يقول...

بارقة نور

ربنا يخليكى يا بارقه متشكره اوي

وتعيشي انتى والكرسي

بعبعه يقول...

محمد

متشكره اوي ربنا يخليك

صيدلانيه طالعه نازله يقول...

انا للاسف باحس ان الفياجرا دى بقت منتشره قوى و استعمالها كتر و للاسف اللى بيستعملها مش محتاجها اصلا
بس لمجرد المنظره و اثبات حاجه بالزياده
انا فى الصيدليه بالاقى عرسان لسه الفرح مثلا بكره و عمال يشترى و يسألنى ايه احسن نوع
طب انت جربت الاول و شوفت نفسك حتحتاج و لا لا

و طبعا مقدرش اقوله كده بافضل ساكته بس ساعات بتخنق و بتكلم
الموضوع حلو بجد
ربنا معاكم

بعبعه يقول...

اهلا بيكى يا صيدلانيه

متشكره اوي لكى

الجهل وحش بجد يا صيدلانيه واحنا الجهل بقى عندنا كتير

مش الجهل الاميه

لا الجهل بحقيقة الامور الجنسيه فعلا
افتكاسات وخلاص فى الدنيا

نورتي يا صيدلانيه والى يجيلك يطلب فياجرا وهو عريس عضيه يا ماما
هههههههههههه

قيس بن الملووووح يقول...

انا سعيد جدا بزيارتك لمدونتي ولتحليلك السليم للموضوع وان احنا كمجتمع شرقي في حاجه الي تربيه جنسيه صحيحه منها لنزع ما هو موروث من افكار خاطئه وإنشاالله ممكن نستفيد بخبراتك في موضوع جمعية الأسرة السعيده التي اتمني أن تري النور ( يمكن مراجعة فكرتها في مدونتي في بوست قديم)
تحياتي

فشكووول يقول...

السلام عليكم

بعبعه مرتبطه بعمر بك

طبعا انا من تحت البلاط .. مش الكرسى ومستخبى ورا الباب

المشكله ان الشباب هما كمان بياخدوها ومش عارف ليه .. اذا كان محتاج ليها تبقى حوسه ودوسه وعليك العوض ومنك العوض يا رب .. ويمكن هما مش فاهمين لكن المشكله ان ما حدش بيقدر يتكلم ويقول يا شباب انتم ما دمتم بخير مش محتاجين الفياجرا ولا مشتقاتها .. واللى محتاجها العواجيز اللى الحبوب دى رجعت لهم الشاب وقشطه وميت فل واربعتاش .. مش عارف اشمعنى اربعتاشر .. يعنى الواحد كل يوم يقول لام العيال .. خدى بالك انا شمشوم الجبار .. بعد ما كان شمشوم العيان ..

اكتشاف هذه الحبوب كان معجزه عجزت البشريه عن علاجها حتى وقت قريب .. ربنا يخلى اللى اكتشف الحبوب دى

تحياتى للاستاذ عمرو

فشكووول يقول...

هو عمرو بك فين من زمان غايب والموضوع الاخرانى عنده من اكتوبر 2009 .. ولله توصلى له السلام

بعبعه يقول...

قيس بن الملوح

الف شكر لحضرتك وانا معاكم طبعا

اي حاجه تحتاجوها انا تحت امركم والدكتور عباس مش هايتاخر اكيد

وحقيقى انا والدكتور عباس دايما نقول اننا محتاجين فعلا مستشار العلاقه الزوجيه وندوات ودروس ما قبل الزواج

وانا عارفه موضوع الجمعيه والمدونه ككل ومتبعاها من زمان لا تقلق واتشرفت بزيارتك ياقيس

بعبعه يقول...

فشكول

يا مرحبا يا مرحبا

عمرو قاطع بينا كلنا والنبى

وانا والله كلمته واتحايلت عليه يرجع للتدوين ووعدنى انه هايرجع لما يفضى

لكن برضه لا حس ولا خبر

وسوقت عليه كل عزيز وغالي برضه مافيش فايده

وان شاء الله اوصله سلامك

وبالنسبه للموضوع اه هما اغلبهم فعلا ما بقوش فاهمين بياخدوا وخلاص
عشان كده انا كتبت الموضوع عشان الناس تفهم هى بتعمل ايه مش سحر هو

نورت يااستاذ فشكول وانت دايما منور تحت الكرسي تحت الشجره دايما منورنا

غير معرف يقول...

اولا انا بحترم جدااا المدونه دى .

ثانيا:انتى كنتى وعدتى انك هتعملى بوست للفتيات عن يوم الزفاف,,
ياريت تنزليه فى اسرع وقت..

انا فرحى ان شاء الله كمان شهر .
وكل ما الوقت بيقرب كل ميكون عندى حالة قلق غير عاديه واوقات بيجيلى حالة رعب من التعليقات اللى بسمعها حواليا,,
واللى تتبرع وتحكى تجربتها وللاسف تكون تجربه سيئه جدااااا,,
كل ده مخلى نفسيتى وحشه جدااا وكل ميوم يعدى والفرح يقرب نفسيتى تتعب اكتر.


ياريت تنزلى البوست ده فى اسرع وقت لو سمحتى...انا نفسيا شبه منهاره.

بعبعه يقول...

يا خرابي عليكم يا بنات هاتجنوني

منهاره ليه بس يا ماما

ما تقلقيش خالص حاضر والله هاحاول اجهز البوست الاسبوع الجاي

بس مؤقتا رسلينى على الاميل

بصي عايزاك تنفضي لكل البشر بقى وتدينى ودنك ودماغك ومالكيش دعوه انا هاسلمهوملك سوبر لوكس على المفتاح

ايه منهاره ومرعوبه دي هو احنا هانضحي بيكى في العيد الكبير ولا ايه


هاستنى اميلك

Blue يقول...

ههههههههههههههههههههه

مش على البوست

على التعليقات

micheal يقول...

شكرا بجد على طرح المعلومات دي بالشكل اللذيذ ده
:)
تحياتي

بعبعه يقول...

بلو

ماشي ياعم افتكر الجمايل ضحكناك اهو
ههههههههههه

نورت

بعبعه يقول...

مايكل

متشكره اوي ربنا يكرمك

Blue يقول...

يعنى يا بلوجرية
عشان مفيش تدوينات
محدش يسال على صحاب المحل
عالم بتوع مصالحها صحيح D:

اخبارك ايه يا بعبعة ؟
يارب تكونى بخير
والطبيب عباس دايما كدا منورنا
و يا سيد عمرو ياريت تظهر
اما بالنسبة لاعترافات .. فانا خلاص رميت طوبتها :)
( ربنا يطمنا عليها )

صباحكم زى الفل يا بلوجرية

اعترافات هانم يقول...

هههههههههههههههههه

انا الكل رمى طوبتي اشاسا نعمل ايه بقي مستخبيه تحت الكرسي وهفضل كدا لحد اما....... ولا بلاش لحسن بعبعبتي حبيبتي تحدفني بحاجه انا مش اضمنها كل اما تشوفني تقولي سايباني ومستخبيه تحت الكرسي هههههههههههههههههههههههههههه

بعبعه يقول...

بلو

انشاله يخليك يا رافع من معنوياتي دايما

يعنى بذمتك يا بلو لما بيكون فى بوستات بيعبروني

ده انت تلاقي المشاهدات مقربه على ميه فى اليوم والتعليقات على البوست 3
شوف الغتاته يا جدع

وعلى الفيس بوك برضه مستخبين لعلمك

مافيش حد شجاع الا انا يعنى
ماشي يا بني ادمين

واعترافات اهوا قالتلك ملازمه الكرسي يا خويا مع باقي الشعب

منورين يا جودعان

والبوست الجديد اتكتب
اي والله كده وبعته للدكتور عباس وفى انتظار مراجعته الطبيه بقى

Unknown يقول...

بجد يا اعترافات .. عندى اقتراح حلو

مش لازم تستخبي .. و تتكسفي
يا ستى اشتغلوا على كذا محور

يعنى مثلا بعبعة على المحور اللى انتى مستخبية منه تحت الكرسي

والطبيب عباس استشارات طبية

و انتى خليكى فى الجوانب الرومانسية و المشاكل الاسرية ... اللى كنتى شغاله فيها كويس
مفهاش حاجه
فكري عشان المدونة دى حلوة و مش عاوزين شعبيتها تنخفض

ولا إيه يا بلوجرية ؟

Unknown يقول...

و اقتراح ليكى كمان يا بعبعة
بما ان الاقبال ماشاء الله كدا العدد فى اللمون

يبقى تحطى شرط بعبوعي كدا

التدوينة الجديده مش حتنازل غير لما التدوينة الحالية .. تحقق ( X ) تعليقات ( العدد راجعلك بقا )

و بالتالى اللي بيبخل يقول شكرا حيدخل و يتكلم عشان البوست الجديد

اعترافات هانم يقول...

هو اقتراح حلو اكييد يابلو وانا موش عندي اي موانع اطلاقا :)

بعبعه تنزل البوست اللي بتجهزه وانا هجهز بعدها بوست عن الجوانب الاجتماعية :)

بعبعه يقول...

اوك يا اعترفات

هو انا كنت قلتلك لاع يا ابوي

اخر مره شوفتك فيها مش مسكتك من ودانك وقلتلك ما تستعبطوش بقى سايبنى لوحدي
وقمتي كاتبه بوست بعديها وبعدين رجعتي تستخبي تاني

هانزل بوس العرايس بس يا اختي اصل هايضربوني
بس لما يجى من عند الدكتور عباس

وشدي انتى معانا بقى

بعبعه يقول...

بلو

مين ده؟؟
يا ابنى ده انا كان ناقص يوم الاستطلاع الى عملته انى اروح لكل واحد فى بيتهم واديله هديه طقم معالق صينى عشان يتكرم ويتعطف ويرد عليا

اه والله روحتلهم مدوناتهم نفر نفر اقولهم تعالوا يا قوم

وفى النهايه الاصوات بالعافيه يعنى

دول غجر اناعارفاهم كويس

ياعم الله الغني عن تعليقاتهم
لما حد فيهم هايتزنق هايجى يجري ويقولك فينك يا بعبعه

وبعدين انا مش عايزه ردود شبعانين منها يا سيدى

انا عايزه بس الناس تفهم
انا هاعمل المدونه واسيبها كده سبيل وبس

نورت يا بلو والله

ahmed_k يقول...
أزال المؤلف هذا التعليق.
ahmed_k يقول...

قد تكون الفياجرا أعطت بعض الأمل لمن لدية مشكلة ما في العلاقه الحميميه
ولكن الإقبال الزائد عليها يجعلنا ندق ناقوس الخطر حول الأغذيه التي نتناولها والمبيدات الكيماويه والأسمده الكيماويه التي تستخدم بكثافه في الأراضي الزراعيه والتي نأكل جميعا من منتجاتها
فمنذ زمن ليس بالبعيد لم نكن نسمع عن الضعف الجنسي أو البرود الجنسي والذي اعتقد ان السبب الأساسي فيه هو نوعية الغذاء الملوث الذي يتناوله الناس في الوقت الحالي
فالعلاج الأمثل لهذه الحاله التي تفشت يوجد في المراقبه الصارمه على نوعية الأسمده والمبيدات المستخدمه في أراضينا الزراعيه بالإضافه للرقابه الصحيه الصارمه على المنتجات الغذائيه التي يتم إستيرادها لكي تكون خاليه من تلك المسممات
وخلاف ذلك من ادويه أو مقويات ما هي إلا حلول وقتيه وربما تترك آثارها المدمره على الجسم بأكثر من فوائدها الإستمتاعيه الوقتيه المحدوده

ونسأل الله العفو والعافيه

غير معرف يقول...

عيد الراجحي
انا كنت من الناس ال تحت الكرسي
وقررت اظهر واقعد علي الكرسي عادي يعني
موضوع رائع كالعاده ورصد لما يحدث وما يقال فعلاااااااااااااااااااا

غير معرف يقول...

لم أقرأ المدونة منذ عام أو أكثر .
موضوع جيد ولكن مش هيفدني لأانني مريض يالقلب هههه
عبد الجليل