الثلاثاء، 3 أغسطس، 2010

فضفة صديقاتي


اولا وقبل ما نبدأ كلام
عايزه اقولكم حقيقى انكم وحشتوني اوي  اوي وحقيقى كان نفسي ارجع اكتر من زمان
وصدقوني نويت اكتر من مره لكن كل مره ما كنتش باقدر مش عارفه ليه
لاسباب كتيره اوي
اولا كان عندي شوية ظروف  وثانيا لانى بعد فتره من الكلام مع الناس على الفيس بوك الى خلانى احتك بالناس مباشرة مش مراسلات على عكس ما انا متعوده معاكم وحسيت نفسي انى دايما فى وضع المدافعه عن نفسي وافكاري ومبدأي ومدونتي وحقيقى زعلت اوي من الناس

لكن عموما انا نفسي ارجع اكتب تاني وياريت اي حد عايز يعرف اي حاجه عن اي حاجه او عايز يتكلم فى اي موضوع او عنده اي مشكله يبعتهالي
بجد يا جماعه نفسي احس انكم معايا تاني  افتقدتكم

نبدأ فى موضوع النهارده

والى جايز مالوش علاقه مباشره بالبوستات الى  فاتت والى كانت عن الثقافه الجنسيه
لكن فى الاساس ا لمدونه هنا كانت معموله للفضفضه  او البعبعه زي ما انا سميتها

المهم يا اخواني احدى صديقاتي المدونات ونسميها الصديقه   (ص)   قالتلى مره عايزاكي تكتبي عن موضوع على مدونتك وتناقشيه
الى هو ايه

قالتلى ليه على  الفيس بوك او على النت عموما بمجرد ما حد يعرف انى متجوزه يبدأ كلامه معايا عادي بعدين يفضل يلف ويدور شمال ويمين عشان يوصل فى الاخر  انه يتكلم عن الناحيه الجنسيه ولا سيما انها شغلها له علاقه شويه بالطب !!!!
وسؤال مباشر هو يعنى عشان انا متجوزه يبقى لازم ابقى قليلة  الادب واتكلم فى العلاقه الجنسيه مع اي حد كده ؟؟؟؟!!!

طبعا لا يا حبيبتى بس هما عقلهم مقضيهم على كده

صديقه ليا تانيه ونسميها (ش) لما كلمتها عن موضوع البوست قالتلى لااااااا تعالى بقى وانا احكيلى الى اكتر واكتر
واسمعوا بقى قصتها
هى متجوزه وعندها اطفال وهى ست محترمه  لا شك  وبقالها سنين بتدخل النت ويبدو انها شافت بلاوي سوده
تقولي بصي بمجرد ما اقول لاي حد فى  اي مكان انى متجوزه يبقى انا كده وقفت فى قفص اتهام على طول
وسبعين  فى الميه منهم بيعتقد الآتي
انا ست احتمال اكون بطاله وقليلة الادب
والاحتمال التاني  انى اكون غلبانه ومنكسره ووحيده وغلبانه وجوزها بيضربها كل يوم علقه
والاحتمال الثالث ان جوزها مسافر وسايبها تعاني من الحرمان

لا شك ان فى ناس بتحترمها  طبعا وتقدرها بس السؤال هو ليه كده ؟؟
اشمعن لما يكون واحد متجوز وعلى النت مش بتعملوا معاه كده يا جماعه
وهل الى اخلاقها مش كويس تفرق معاها متجوزه ولا مش متجوزه ؟؟

قالتلى كمان حاجه برضه تتفق تماما مع رواية الصديقه (ص)
وهى ان السبعين فى الميه برضه الى بيعتبروها بطاله او غلبانه او محرومه
بيفضلوا يلفوا ويدوروا ويجسوا النبض هل هى عندها استعداد تتكلم معاهم عن السيكو سيكو ولا لا
حتى قالتلى ان فى واحد تكبد مشاقة انه يعمل نفسه بنت لمده سنه وشويه وعمل معاها كل الحيل عشان يوصل فى الاخر انها تتكلم معاه عن خصوصياتها خاصة على الجانب الجنسي
بس الحمد لله هى كانت حريصه فى الكلام حتى مع البنات

السؤال الموجه من الصديقتين (ص) و (ش)   ومني انا كمان والله

ليييييييه يا بشر ؟؟
لييييييييييه يا مجتمع سيء النيه ؟
ليييييييه يا رجاله كده ؟؟

وعلى فكره الحاجات دي تخلينى اتاكد ان المجتمع ده  عنده كبت ومشاكل فى  الناحيه الجنسيه فعلااااا محتاجه علاج
من غير ما ندفن راسنا فى  الرمل

ارجوكم يا جماعه عيب كده
انا عارفه ان فى بلاوي سوده على النت وعارفه ان البطاله والوحيده والغلبانه والمحرومه كلهم على النت برضه
بس برضه نتقى  الله
ما نرميش الناس بالباطل
وكمان ما تتصيدش المحرومه والغلبانه والوحيده  وتستغل النقطه دي فيها

يارب اكون وصلت الرساله صح يا صديقتي  العزيزتان

وشكرا لكل  الى سأل عني وانا غايبه  هنا وعلى الميل وعلى  الفيس بوك






هناك 47 تعليقًا:

ندى الياسمين يقول...

شوفي يا بعبعه

الاول حمد الله على السلامه

ثانيا انا هاقولك رايي هنا مع اني قولتهولك قبل كده على الميل

ما تعبريش حد ما دام انتى مؤمنه بفكر فعلا ورايك وحاسه انك بتعملي حاجه مفيده ومحترمه وغايتك منها واضحه ونبيله فعلا

ما تعبريش اي حد وما تيأسيش وما تخليش المجتمع ينول منك بامراضه

احنا بنحاول نعيش نفسنا مش نعيش امراضنا الاجتماعيه

انا واحده من الناس يا بعبعه لو كنت امشي على هوا مجتمعنا
كنت زمان دماغي عباره عن حلة محشي كبيره فقط لا غير

حتى انا عايزه اكتب عن الموضوع ده

وعموما ايا يكن انا شايفه انك تستمرى وتكملي
وزي ما قلتلك والله الناس من وراكي بيقولوا عنك كلام كويس
تحياتي يا جميل وربنا يوفقك

ندى الياسمين يقول...

اما بالنسبه بموضوع البوست
فانا باضم صوتي لصوتكم عشان بجد دي حاجه سخيفه جدا جدا جدا وده حقيقى بيحصل طبعا

مش قلتلكم امراض اجتماعيه ؟؟

ستيتة حسب الله الحمش يقول...

طيب يا بعبعة العزيزة
وبعد ما نبعبع
إلما نخلص في الليلة اللي زي الفل دي؟

اننا نعمل اللي على مزاجنا
وبرضه نربط الجحش مطرح ما يعوز الحمار
وإكفي القدرة على فومها الواد طالع لأبوه

يعني نعمل زي مودموازيل ندى ما بتقول الصح لأن أساسا اللي نفوخها مركب استقلالية محدش يعرف يغيرها

ونستفيد من اي تجربة لأننا متولدناش وفي بؤنا كيبورد

بس برضه نراعي اننا نعيش في وكر امراض نفسية متحرك على اربع عجلات
وكمان ما نسوقش عكس التيار لأن الرخص بتتسحب
والقلب بيتقرف
والعقل بيشوف بلاوي
والنفسية بتقفل

حالة وسطية
بين عرض الأفكار ومحاولة الإستفادة والإفادة والعلاقات الإجتماعية المتوازنة قدر الإمكان
والمحافظة على الربع اللي باقي في نفسيتنا قبل ما يحمض

وحشتيني يا بعبعة جدا
فين ايام ما كنتي بتكتبي كل اسبوع
مش كلام الكسل ده يا اوختشي

فاتيما يقول...

ياللهوووووول
مين يستجرى يزعل بعابيعو
بربع كلمة
و احنا على قيد الحياة


الله
انا هقولك الكلام اللى قولتيهولى زمان و لا إيه ؟؟؟؟؟

مش انتى اللى قاليلى بعضمة كيبوردك سيبك منهم و مهيمكيش حد
و الدنيا مليانة ناس مرضى ؟!!

هتغيرى رأيك
ف المجال التانى ؟!!!


طب حيث ان عنوان البوست معبر جدا
و كمان التعليقات اللى قبلى
لأغلى الناس عندى المودموزيل ندى على رأى ستوتى حبيبتى
ست السوتيتات ...


فنا كمان هفضفض معاكى و اقولك
انى بصفتى من الوحيدات الغلبانات
دول اللى اتكلمتى عليهم
ف التدوينة
فعادى كان بيجيلى دعوات لطيفة كتيييير من هذوها النوعية
اول ما دخلت التدوين
و ظروفى اتعرفت ع الملأ


اومال سيادتك انا ليه
جبت م الآخر من اولها
و قولت مفيش ماسنجر
و لا موبالات و لا فيس بوك ؟!!
اصل اول ما ابتديت
جالى ع الايميل كمية
اضافات للماسنجر من شوباب
و رجال لا حصر لهم
لما قولت ف قرارة نفسى
اهيه !!!
دنا لو بوزع فلوس الزكاة مش هيوقفوا عليا طوابير بالمنظر دا ...
و طبعاااا كنت فاهمة
و مزعلتش


بس بينى و بينك
اوقات كنت ببقى ف لحظة ضعف
و بحس بالزعل قوى على روحى
زى الحالة اللى انتى كنتى فيها انتى
و اسأل نفسى ليه هوه انا خضعت لحد بالقول و لا الفعل عشان يحصل كدا ؟!!


بس زى ما قالتلك ندى الياسمين
انتى ليكى وضعك
و معروفة اتجاهاتك
و انك شخصية محترمة بتكتبى
عشان تفيدى الناس و تنفعيهم و بس
يبقى خلاص لا تلتفتى لأحد
خصوصا المرضى اياهم


وزى برضو ما قالت ستوتة ..
المجتمع مليان عورات


ورأيى المتواضع
ان تجاهل المرضى دول مش صح ..
بس تجاهل أرائهم هوه اللى صح


لأن المفروض الأرقى فكراً
هوه اللى يشد الأدنى لفوق
مش العكس



خليكى ف مكانك العالى دايما
يا بعبوعتى


و كلنا بنحبك
يا زعيييييم


رمضان كريم عليكى يا حبيبتى
و خالص حبى ليكى
و الف مليون حمدلله ع السلامة

حفيدة عرابى يقول...
أزال المؤلف هذا التعليق.
ايه رايك يقول...

ازيك يابعبعه
اولا مش عايزاكي تزعلي من حد
انا عن نفسي عارفه ان قصدك نبيل واي حد يفتكر فيكي غير كده يبقي انسان مجنون ومريض
وماأكثرهم


اما عن موضوع البوست الاساسي
انا متزوجه ومبحبش الرجاله اساسا علشان كده مش بتكلم مع حد من الاصل وعلشان كده يمكن متعرضتش لهذه السخافات من قبل



ويمكن علشان كده مش عارفه ارد عليكي
بس من خبرتي في الحياه اعرف ان الرجاله بتقولك اريح دماغي مع المتجوزه اسهل لحسن بنت البنوت هيبقي في قضايا وجواوز وهم كبير لو اهلها عرفوا اني انا اللي عملت فيها كده
فالاسهل الست المتجوزه هي كده كده متجوزه مش هيبان فيها حاجه



بس يمكن انا عايزه اسئل الشوباب اللي بيدورا علي عروسه
تضمن منين يأخينا ان اللي انت هتتجوزها كمان يومين او هتخطبها بنوته شريفه لم يمسسها قبلك انس ولا جان
مهو دلوقتي مفيش اسهل ولا ارخص من عمليات الترقيع
ولا ايه يابعبعه ؟؟


عارف ايه اسلم طريقه
اني امشي عدل
صدقوني لو الراجل مشي عدل هياخد واحده غصب عنه ماشيه عدل


سمعت موضوع الترقيع ده والندم علي مافات علي القنوات الفضائيه من ستات متجوزين بالهبل
ومن يتقي الله يجعل له مخرجا

اسفه علي الاطاله
بس احنا بنحبك يابعبعه وكفايه ان في ناس كتير فاهماكي صح
كان معكم ايه رأيك من القاهره

فاتيما يقول...

لمؤاخذة يا بعبعة ارد على فدافيدوووو حبيبتى


بصى يا فيدو آخر جملة كتبتيها هى مربط الفرس

هقطع نفسى انا يعنى ؟؟

اصل انا ما شاء الله حبايبى كتير قوى و فى ازدياد و معرفش امنع حد جديد يدخل دايرتى و لو تلاحظى دا ف مدونتى حاصل بإسترمار و الحمدلله
الفيس بوك المفروض مش هيختلف عن المدونة و يمكن هيكون اكتر كمان و مش هعرف اغربل زى منتى متصورة

انا مخلوقة كلاسيكية جداااا
و بحب ارتبط بالمكان و افضل فيه
و عشان كدا متمسكة بمدونتى و مش عايزة ابارحها البتة
حلوة البتة دى ؟!!

بحبك جدا يا فدفوتى يا جميلة

و ميرسى يا بعبعة ع المساحة دى

سلااااام

حفيدة عرابى يقول...

بعد اذنك بعبة هانم أكلم فاتيما حبيبتى

فى الاول والاخر ياجميل ده اختيارك وانت حرة فيه
كل الحكاية انى جربت حاجة كنت مخنوقة منها وخايفة منها كمان ولما لاقيتها لذيذة ومش زى ماكنت متصورة حبيت انقل خبرتى الكبيرة فى الشهر والنص للجماهير العريضة اللى هتاخد برأيى:)

لكن ده الفيس هو اللى حظه وحش انك مش عايزاه ياحبيبتى
ربنا يبارك فى احبابك ويزيدهم ومايحرمكيش منهم ابدا
ويخلى كلاسيكيتك ومدونتك العسولة اللى مجمعة الكل
وانابحبك ياحبيبتى من قبل ماتعرفى بوجودى اصلا:)

اعترافات هانم يقول...

ازيك يابعبه يااختي

اولا وحشاني بشكل بشع بشع

ثانيا :

الفكرة مش في مسالة متجوزة او لا

واااااااحد

انا اهو مش متجوزة وبردو لو صادف ودخلت شات ودا بيبقي كل كام شهر مرة

الاقي بردو نفس الحكايه بيحوم ويلف بس انا بقي مش بدي الفرصة اني اشوف اخر بخرج واقصر الطريق

حتي لو بكلم ناس بحترم فكرها جدا بردو تلاقي نفس النظام بس علي مين امال البلوك معمول لمين

وعشان كدا جبت من الاخر ومش بفتح ميل ومش بدخل شات :)

اعترافات هانم يقول...

عارفه يافاتيما ساعات بتضايق اوي من تحفظك دا لاني ببقي نفسي اكلمك لكن اوقات اكتر بقول عندك حق اوي لان في ناس بتستغل دا بشكل وحش اوي :)

حرروف يقول...

انا لامسه ده بالرغم عدم الجواز اذا كان بيعملوا كدة مع الغير متزوجات

عشان كدة تلاقي كتير من المتزوجات كاتبين اسماء ازواجهم بجانب كلمة married
وضايفنهم ع الفيس اعتقد نوع من انواع الحماية

سيبك منهم
وعلي راي الاعلان القديم ادي ضهرك للترعة :)

واللي ميعجبكيش بلوك وديليت

мαησηα يقول...

لووووووووووووولووووووووووووى اخيرا جيتى يا اوختى وحشتينى والله

والحمد لله كالعادة حبايبى سبقونى وقالولك

ولا يهمك من كله ولا يهمك

وانا عن نفسى قولتهالك ف الفيسبوك انا بستفيد منك جدااااااااااااااااااااااا
وبدعيلك والله لانى مؤمنة جدا بفكرة المدونة
ربنا يجازيكى عننا خير

نيجى بقه لموضوع البوست
ردى كان هيبقى كوبى وبست من رد حفيدة عرابى

احنا بنعااااااااااااااااانى
والابشع لما تيجى تقولى للشباب لا سورى انا مابحبش كلام الماسنجر ولا التليفون
تبقى حكاية وتبقى انتى حاجة كده عجيبة مش المفروض تكونى كده

ربنا يسترها علينا وع كل الحريم ف كل مكان يارب

ومش تغيبى عننا تانى لو سمحتى لانك بتوحشينا شوفتى حبايبك كتير ازاى
متهيألى اكتر من الناس اللى ضايقوكى صح ؟

اى لف يو يا قمر

بعبعه يقول...

ندى الياسمين

انا عارفه رايك اه بس اعمل ايه

الاحباط وحش وموقف المدافع دي كأنى مجرمة حرب رخمه اوي بشعه

عموما سنعود ان شاء الله

وعندك حق فعلا امراض اجتماعيه وما حدش لامسس الحقيقه دي ادي

بعبعه يقول...

ستيته حسب الله الحمش

والله ما كسل يا قمري بس كان شوية ظروف بعدها جالي اكتئاب واحباط من الكتابه

وعموما حاضر هارجع اكتب

وفهمت وجهة نظرك انا كمان شايفه ان ده صح

اه نعمل علاقات بس تكون علاقات متحفظه عشان مرضى النفوس

وانتى كمان وحشتينى يا قمري

بعبعه يقول...

فاتيما

حبيبة قلبي انشاله ما اتحرمش منك

لعلمك انا مقدره موقفك ده جدا جدا

عارفه لما قريت الكلام الى انتى كاتباه على السايد بار عندك فكرت وحطيت نفسي مكانك قلت يا خرابي كنت هاعمل اكتر منك لعلمك

فانتى عندك حق

وعجبنى اوي ده
ورأيى المتواضع
ان تجاهل المرضى دول مش صح ..
بس تجاهل أرائهم هوه اللى صح


ولعلمك انا زيك باقول مش هاخلي حد يملاني امراض ولا هاخلي حد يشدنى لتحت

بس غصب عني سئمت دور المدافع وكأنى متهمه دايما

وعموما كفايه وجودكم معايا بجد ربنا يخليكوا ليه

بعبعه يقول...

حفيدة عرابي

بصي هو لو انتى مش متجوزه بتدوري على عريس
انما لو متجوزه يبقى انتي سكه تانيه بس اسوأ من سكة العريس بكتير

وبعدين هو وش الغباوه موجود بس تضيق النفس بهم فعلا

وبالنسبه لكلامك عن الفيس بوك
انا من موقعي هذا باقول لفاتيما هو حلو ودلع وتعرفي اخبار الحبايب

بس صدااااااع انا ست دقه قديمه زيك يا فاتيما ولما روحت هنا ما استحملتش دوشته بصراحه
فضلا عن عن الناس الى بيكلموني عليه هما الى جابولي اكتئاب
:)))

واتكلموا براحتكم يا بنات ده انا فرحانه بكم خالص

بعبعه يقول...

ايه رايك

متجوزه وما بتحبيش الرجاله ليه طيب

تعالى هاعمل عليكى دارسه ويمكن نعمل عليكى بوست بحاله
هههههههههههههه

مش فكره الاسهل لعلمك انا ساعات باحس انهم بيعتبروا مجرد دخول الست المتجوزه النت دى فىحد ذاتها جريمه واثبات انها ست بطاله مثلا

ومتفقه معاكي ان الى ماشي عدل ربنا بيكرمه

بعبعه يقول...

اعترفات

كفايه نورك عليا يا جميل انت

وبعدين لما تيجى تدخلي شات خدينى معاكي اتفرج بيعملوا ايه هناك :)

بعبعه يقول...

حروف

تعرفي فكره ؟؟ حكاية الزوج دي وكده ولو ان ماااافيش فايده ديل الكلب عمره ما ينعدل يا فؤاده
هههههههههههههههههه

بعبعه يقول...

منونه

تسلمى يا حبيبة قلبي

طبعا انا فرحانه بكم اوي على فكره والله

متشكره اوي يا جماعه

بس لعلمك الخاص انا عارفه ان المعارضين اكتر من المؤيدين بس اناولا بيهمنى هارجع اكتب تاني
انا مقتنعه انى صح

اي لف يوو توووووووووو يا جميل انت

Dr. Kafy يقول...

سلام عليكم
أولا كل عام وانت بالف خير
بمناسبت حلول شهر رمضان

ثانيا المفروض إن الناس تفكر من منطلق جمع الحسنات لا السيئات فإذا وجد المحرومة أو الغلبانة فليعينها على ما هى فيه أو ياحبذا لو دلها على حل مشكلتها بدلا من أن يستغل المشكلة لصالح جمع السيئات له و لها، ألا يعلمون أن الدال على الخير كفاعله و العكس صحيح، و الله أمرنا أن نتعاون على البر و التقوى و ألا نتعاون على الإثم و العدوان.

اللهم أعد الأخلاق الحميدة لأمة محمد صلى الله عليه و سلم

فارس عبدالفتاح يقول...

بصي يا أستاذتنا الفاضلة

أنا أتابع من أكثر من سنة تقريباً ،، وهنا رافض للأسلوب وللنقاش في هذا الموضوع من امرأة سواء حتى ولو كانت متخصصة ،، مع العلم أن حضرتك مش متخصصة والدليل الدكتور عباس الذي يذكر عمال على بطال .


لماذا أن اعترض ولماذا لم أناقش هذا الأمر ..!!

لم أريد أن أناقش لان مقتنع انه سوف يتم مهاجمتي ونعتي باني إنسان متخلف ورجعي ولا أريد التقدم الحضاري المنشود في الأوضاع والأعضاء الجنسية .


ولماذا أن اعترض ...!

لأنه هذا الموضوع إذا أردنا أن نناقشه ،، فلابد من مناقشته حسب ضوابط متعددة .

أولا: ضوابط خاصة بثقافة المجتمع ( التراث - العرف السائد في المجتمع ) .

ثانيا : الدين وأحكام التشريع .


طبعاً لدي الكثير مثل حضرتك لديهم حساسية من ناحية الدين وضوابطه ،، فلن ندخل في ضوابط الدين والتشريع الإسلامي في عدم الاختلاط سواء أكان في حيز مادي بين الزمان والمكان ،، وبين التواجد والنقاش في مواضيع مثل هذه على الانترنت وغيرها بين النساء والرجال فهذا أيضا اختلاط لا تحكمه أي ضوابط .


لكن سوف نتكلم عن العرف والتقاليد السارية في المجتمع ،، فنحن كمجتمع عربي إذا حدث هذا الكلام بين رجل وامرأة سواء أكن بوجودهم بصفتيهما وشخصيهما ،، خط احمر ،، حتى ولو كان على الانترنت أو من وراء حجاب ( أي ستر ) ..


فحضرتك وكل من ينتهج نفس نهجك خالفوا جميع الضوابط سواء الثقافية أو الدينية ،، ولهذا يتم رفض واستنكار الكثير لما تقومين به من النقاش في هذا الموضوع


لكن إذا كان النقاش بين رجل متخصص ورجل مريض أو ليس لديه قاعدة معرفية سليمة بهذا الموضوع فالأمر يختلف وتكون الطريقة مهذبه وغير جارحة حتى لمشاعر الرجال ،، لأنه هناك رجال يتمتعون بخلق دمث وحياء رفيع .. فليس هناك أي مشكلة .


أو امرأة وامرأة أخرى واحدة متخصصة وأخرى مريضه أو ليس لديه قاعدة معرفيه لهذه الأمور .. فلن توجد أي مشكلة على الإطلاق .


انك تتكلمي في موضوع مثل هذا وتتكلمين عن استخدام الفم في الإثارة الجنسية سواء للرجل أو الست وان هذا ليس حرام ولا يوجد نص يحرم ذلك فان الحياء وان العفة تمنع من ذلك .. كذلك يقولون علماء النفس أن الأشخاص الذين يستخدمون هذه الأساليب والآليات في الجنس للتلذذ هم أشخاص شاذين وغير أسوياء

وهكذا تقول الفطرة السليمة التي تمتزج بالعفة والحياء .. فأنت تعارضين كل شيء الثقافة الاجتماعية والدين ،، وهذا يأتي بردود أفاعل عكسية ،، سواء تجاه المجتمع ،، أو تجاهك أنت شخصياً

ومن الطبيعي ومن البديهي ومن المسلم به أن الرجل والمرأة والشاب والفتاة حتى الطفل والطفلة اجتماعهم وتأهلهم وحب اقتراب كل طرف من الآخر وقضاء حاجته منه أمر مسلم به ،، فكيف تستنكرين على رجل يتكلم معه امرأة أو امرأة تتكلم مع رجل أن تفكر به ،، أو يدور في مخيلته أي شيء تجاه الطرف الآخر .


فهذا أمر بديهي وطبيعي لهذا منع الاختلاط ولهذا اقر العرف والتقاليد والفطرة السليمة الدخول في مثل هذه المواضيع علانية وبدون ضوابط ثقافية ودينية .

بعبعه يقول...

د كافي

لا دي محتاجه ملايكه يا فندم مش محتاجين بنى ادمين من الى في الدنيا

تحياتي وحضرتك شرفت وكل سنه وحضرتك بخير

بعبعه يقول...

فارس عبد الفتاح

يااااه ده انت شايل فى قلبك كتير وساكت يا راجل ليه كده طيب

سنه بحالها ؟؟
طب لما انا قليلة الادب وابيحه كده واخترقت كل المعايير الشرعيه والعرفيه ليه حضرتك اصلا متابعنى سنه ؟؟

طب ليه ما حاولت تغير المنكر بلسانك يا مؤمن
ولا انت بقالك سنه مختار اضعف الايمان

عموما مش موضوعنا

اولا ايه الى مش عاجبك فى تواجد الدكتور عباس عمال على بطال ؟؟!!!
وايه اصلا عمال على بطال دي ؟؟؟

من فضلك وانت على مدونتى تحترم كل شخص قال اي كلمه عليها
وخصوصا الدكتور عباس ده راجل محترم وذو علم واتطوع انه يكون مرجعي الطبي على المدونه لله ورسوله مع انه مش ناقصنا

وايه المشكله انى استعين بحد هو فى حد يعرف يشتغل لواحده فى اي حاجه فى الدنيا ؟؟

انا قلت قبل كده مليون مره انى بالجأ لناس كتير استشيرهم واسألهم سواء لتخصصهم او لثقتى فى رايهم

نيجى بقى للتخصص وتقسيم العمل الى انت عملته والستات تعالج الستات والرجاله تعالج الرجاله خصوصا فى المجال ده

طيب حضرتك العلماء الى قالولك ان اصحاب الممارسات الجنسيه الى مش عاجباك دول شواذ ومنحرفين
ما قالوش لك ان علاج المشاكل الجنسيه بين الزوجين لازم يكون ثنائي يعنى الطرفين مع بعض خصوصا فى حالات معينه ؟؟

طيب هانعمل عياده فيها دكتور راجل يكلم الرجاله ودكتوره ست تكلم الستات

طيب ماهو لازم الدكتور الراجل والدكتوره الست فى النهايه يناقشوا الحاله مع بعض ؟!!! ولا هايعالجوها ازاي ؟؟

طيب انت اصلا معترض على ان واحده ست تكون دكتوره عموما وتعالج الرجاله ؟؟
طب امال رفيده اول طبيبه فى الاسلام دي كانت بتعالج مين فى الحروب الى كانت بتطلعها مع المسلمين ؟؟ الستات ؟؟

والشفاء بنت عبد الله الى كانت بتعالج الرسول عليه الصلاة والسلام نفسه وكان له فرش مخصوص عندها
؟؟؟؟؟

وايه امثالك وحساسيه من الدين ايه طريقة الكلام م الغريبه دي

بعبعه يقول...

هاكمل هنا عشان التعليق الى فات طول اوي

ايه بقى يا سيدى الى قالك ان عندي حساسيه من الدين وطوابطه

وايه بقى دليلك على ان الممارسه الجنسيه بالفم حرام ؟؟
العرف ؟؟
العرف يختلف من مكان الى مكان ومن زمان لزمان ومن مجتمع للتاني
وانت مش فاهم اساسا انا كتبت ايه فى الموضوع ده
انا مش باقول لحد روح اعمل اورال سكس
انما انا جاني اسأله كتير عليه
حبيت اجاوب على الناس
الى بتسأل
الى يا سيدى عرفهم غير عرفك وعفتهم وحيائهم على اد حاله وراغبين ده ما دام مش فيه نص بتحريمه انا احرمه ليه ؟؟
ما كل واحد حر ؟!!

العفه والحياء ؟؟ طيب ماهو اذا كان على الفه والحياء يا ريس بلاش منها العلاقه الجنسيه كلها ماهى قلة ادب برضه ومافيش فيها اي حياء ؟؟!!

المهم مش موضوعنا

والاختلاط
هات يا سيدى دلايلك على الاختلاط وتعالى براحتك خالص
وانا ليا فى الاختلاط راي برضه مش عايشه انا فى الهبل والله
الحمد لله اعلم دينى جيدا وباحاول اتعلمه اكتر
اتفضل حضرتك هاتلي دلايلك بقال الله وقال الرسول فقطططط

نص صريح يحرم الاختلاط مش اي افتكاسات من فضلك

عندى لك مليون موقف من ايام الرسول عليه الصلاة والسلام وصحابته من بعده يقول ان الناس كانوا بيتعاملوا مع بعض عادي جدا دون انفاصل تام بين الرجال والنساء
ولكن بضوابط شرعيه
حتى انهم فى المسجد كانوا النساء بيصلوا ورا الرجال بدون حاجز بينهم

عموما برررضه ده مش موضوعي الاساسي

ومن فضلك عايزه اجابه
ساكت على نفسك ليه سنه بحالها ومتابعنى فيها كمان ؟؟؟؟

لما انت شايف ان انا طريقى ضلال مبين كده متابعنى ليه ؟؟؟

Ali Baba يقول...

السلام عليكم و رحمة الله

أنا بتابع مدونتك من كام يوم و عجبتني جدا جدا جدا لدرجة اني قريت كل مواضيعها تقريبا و بعد ما خلصتها رجعت اقراها من تاني :)
ولا يهمك من أي حد بيضايقك طالما في ولو حتي معجب واحد بتنفعه كتاباتك وبتفيده يبقي واجب عليكي انك تكتبيله و بالنسبة للأخ صاحب الأعراف الأخراني كويس جدا انه علي الأقل عبر عن رأيه الي أنا مختلف معاه تمامااا بدل ما يشتم في سره و يمشي خليه يفضفض و يطلع الي جواه ودا احسن كتير علشان تقدري توضحي ليه و لغيره موقفك الي اصلا مش محتاج توضيح بس الي يفهم و أنا كان نفسي ارد عليه بنفسي بس دا حقك انتي

ندى الياسمين يقول...

شوفي يا بعبعه

انا رايي تعملي لنا هنا بابين فى المدونه

بابا تمسكيه انتى وتكتبي فيه للستات بسس ولو راجل دخل قسم النساء نقيم عليه الحد

وباب تاني يمسكه الدكتور عباس ولو ست دخلت هناك نقيم عليها الحد برضه

وبكده نكون رضينا الاخ فارس وكل من يعتنق فكره
وما وقناش فى خطيئة الاختلاط


انا كتبت موضوع قبل كده عن الاختلاط على مدونة الاسلام كما اراه

وكان بعنوان العلاقه بين الرجل والمرأه وانا عارفه انك عارفاه بس انا هاديه للاخ فارس يشوفه
وعارفه كمان انه مش هايعجبه

http://islam-as-i-see.blogspot.com/2008/11/blog-post.html

Ali Baba يقول...

بعبعة أنا عامل بلوج اسمها كراكيبك اتمني حضرتك و كل معشر المبعبعين تشرفوني هناك و تقولولي رأيكم

ودا رابط لقصة قصيرة بقلمي
karakeebak.blogspot.com/2010/04/blog-post_20.html
بعتبرها اجمل حاجة كتبتها

و بعتذر لإن البلوج عطلانة دلوقتي حتي اشعار آخر بسبب ظروف الدراسة علما بأن كل كتابات المدونة كتابات شخصية مني و من شريكي في البلوج
dr.Treo
تحياتي

Blue يقول...

خلاصة الكلام لمعاتيه الفيس بوك
طفي دماغك
و الكلاب تعوي و القافله تسير
********************************
عودا حميدا بعبعة
********************************
الاخ فارس عبد الفتاح مع احترامي الشديد لشخصك
عادةً لا اعلق على تعليقات زوار المدونة ولكن اسمح لي بتجاوز هذه القاعدة:
بعض كلامك للاسف عاري من الصحه و الدقة إن لم اقل عار من العقلانية

و إلا فأين الحياء و العفة من العملية الجنسية نفسها !!!!!!!!!!!

والأصل في الأشياء الإباحة حتى يدل الدليل على التحريم

و إلا فما قولك فى الآيات الكريمة

هن لباس لكم و انتم لباس لهن
والآية
نسائكم حرث لكم فأتوا حرثكم انى شئتم

و قول الرسول
{ ما أحل الله فهو حلال وما حرم فهو حرام وما سكت عنه فهو عفو ، فاقبلوا من الله عافيته فإن الله لم يكن لينسى شيئا } أخرجه البزار والطبراني من حديث أبي الدرداء بسند حسن


و قد ذكرت صاحبة المدونة في اكثر من مرة انها لا تتحدث إلا بما يطرح عليها من اسئله و استفسارات
ولا تختلق القصص او المواضيع
و انما هى اجابات لاسئلة مننا و إلينا
فلا تلومها على ذلك
وبدلا من ان نلعن الظلام .. فلنساعد بعضنا البعض على ان نشعل شمعة تنير لنا و لمن خلفنا الطريق

كل الاحترام و التحيات لشخصك الكريم

تحياتى للجميع

فارس عبدالفتاح يقول...

الأخت الفاضلة

عفواً ..

بادئ ذي بدء أنا لم اقل أن حضرتك سيئة الخلق ،، وأظن أني شرحت لحضرتك سبب عدم نقاشي وحواري لك بهذا الصدد ولكن سوف أكرره مره أخرى وهو لأني اعرف رده الفعل من الأشخاص الذين ينتهجون نفس نهج حضرتك ،، وهو الرد العنيف والغير موضوعي ،، وهذا أمر طبيعي بسبب الاعتقادات الشخصية لما تعتنقين هذا النهج .

متابع من اجل العلم بالشيء ولأعرف إلى أي مدى سوف يؤول الحوار ،، ولست مريض بأي مرض بداء التلصص .

وأنا لم أهين أي إنسان داخل المدونة ولم اذكر الدكتور الفاضل عباس بأي سوء وان قد كنت قد أشرت إلى استعانتك بالدكتور الفاضل عباس للبرهنة على انك غير متخصصة ، وليس عيبا أن يطلب الإنسان المساعدة ولكن الاستنكار والاستهجان كان هو طرح هذه المواضيع الحساسة مع عدم مراعاة ثقافة المجتمع وخصوصيته الاجتماعية والدينية .

ليس هناك حرج شرعي ولا مانع ثقافي اجتماعي في معالجة أي حالة مرضية باجتماع الزوج والزوجة معاً ،، وهذا إذا توفر الدواعي والأسباب لذلك يا اختنا الفاضلة ..لا هو عيب ولا حرام إذا كان الإنسان مريض وكان الواجب عليه أن يذهب المريض إلى دكتور متخصص ويكون هذا الدكتور المتخصص يتمتع بقيم وأخلاقيات خاصة بالمهنة ويتمتع بالسرية لحماية مرضاه وخصوصياتهم ،، وليس يناقش الموضوع على الملأ .. كما تفعلين يا اختنا الفاضلة وبهذه الجرأة .

لست معترض على وجود مهنة الطبيبة أو الممرضة ولكن أيضاً بضوابط .. وذكرك للصحابة رفيدة الأنصارية والشفاء بنت عبد الله رضي الله عنها وأرضاها كنت تداوي الجرحى في ميدان المعركة وكانت هذه ضرورة ،، ولم تكن تعالج الضعف الجنسي أو تقيم ندوات وحلقات نقاشية وورش عمل والدعوة عامة لمناقشة الثقافة الجنسية .

وكذلك الشفاء رضي الله عنهم أجمعين ..

وأنا لم اقل أن الجنس الفموي حرام أو حلال ولكن قلت أن هذا أمر ترفضه العفة والحياء وأضيف أيضا الكرامة البشرية .. ولقد قرأت في مجلة طبية عن هذه الممارسة وكانت الإجابة أن في لعاب الفم يوجد فطريات ( الهريس ) وهي تتسبب في بعض الإمراض الفطرية بالأعضاء التناسلية للمرأة والرجل على حد سواء ، لذلك ينصح باستخدام واقي فموي للوقاية من الأمراض ،، وان هذه الممارسة تفقد الإنسان القدرة على ممارسة الجماع بالشكل الطبيعي فيما بعد ،، نهايك أن هذه الممارسة دخيلة على ثقافتنا العربية الإسلامية .

وهذا لا يعني التحريم الشرعي ولكن الاستنكار الثقافي على تلك الممارسة التي فيها تدني في آليات التلذذ والاستمتاع بالرغبة الجنسية ، وقد نهانا نبينا ورسولنا الكريم صلى الله عليه وسلم عن التشبه بهؤلاء وقد قال رسول الله صلى الله عليه وسلم في حديث ما معناه : " لتتبعن سنن من كان قبلكم حذو القذة بالقذة، حتى لو دخلو جحر ضب لدخلتموه " ..

وقال أيضاً : " لا تقوم الساعة حتى تأخذ أمتي مأخذ القرون، شبراً بشبر، وذراعاً بذراع ". .

وان الرسول صلى الله عليه وسلم وصحابته وتابعيه لم يفعلوا ذلك ، وقد قال الله في كتابه العزيز : " قُلْ إِن كُنتُمْ تُحِبُّونَ اللّهَ فَاتَّبِعُونِي يُحْبِبْكُمُ اللّهُ وَيَغْفِرْ لَكُمْ ذُنُوبَكُمْ وَاللّهُ غَفُورٌ رَّحِيمٌ . صدق الله العظيم

فهذا الأمر يعتبره أساتذة علم النفس نوع من أنواع الشذوذ الجنسي المرضي الذي يصفونه على انه انتكاسة في الفطرة الإنسانية .

فارس عبدالفتاح يقول...

أما العلاقة الجنسية بين الرجل والمرأة ليست حرام ولا هي شيء يستنكره العرف والثقافة بل هذه سنة كونية من الله وقد حس عليها الدين والعرف وأيضا بضوابط العرف والدين بالزواج وشروطه وليس هي أمر منكر اجتماعياً أو محرم شرعاً .

وأرجوك لا تحملي كلامي فوق ما يحتمل أو توجهيه في اتجاه يتماشى مع هوا نفسك ومنهجك الشخصي



أما بخصوص الاختلاط فهذا ليس رأيي ولكنه إجماع أئمة الأمة وعلى رأسهم ابن عباس وبن عمر والصحابة الكرام والتابعين الأبرار والأئمة الأربعة مالك وابوحنيفة والشافعي واحمد ، قالوا بتحريم الاختلاط إلا بشروط وضوابط شرعية .. فياريت تقولنا براهين حضرتك واستدلالاتك من أي كتاب ومن أي سنة ومن أي أئمة من أئمة المسلمين أرقى وأعلى وارفع درجة من ابن عباس وابن عمر والصحابة والتابعين والأئمة الأربعة .

يمكن حضرتك اعلم منهم جميعاً .. فرأي حضرتك رخصة شرعية للأمة من أقصاها إلى أقصاها ونبراس يهتدي به الضالون وقبس يصطلي به الخائفون .. ولا حول ولا قوة إلا بالله . . وأنا لله وأنا إليه راجعون

مع إني مش عارف يعني إيه – افتكاسات – دي لكن من الواضح انه أيضاً من ضمن الثقافة الشخصية التي يغرق في بحرها العلماء والباحثون .. ومنهجك الراسخ وأصولك اللغوية البليغة التي تنم عن إحاطة باللغة العربية بحيث انك تأتي بجواهر اللغة من قاع المعرفة الواسع المحيط بكون وكينونة البيان .. لكن على كلاً

أعوذ بالله من الشيطان الرجيم بسم الله الرحمن الرحيم


وَإِذَا سَأَلْتُمُوهُنَّ مَتَاعًا فَاسْأَلُوهُنَّ مِن وَرَاء حِجَابٍ ذَلِكُمْ أَطْهَرُ لِقُلُوبِكُمْ وَقُلُوبِهِنَّ " (الأحزاب : 53 )

وَقَرْنَ فِي بُيُوتِكُنَّ وَلا تَبَرَّجْنَ تَبَرُّجَ الْجَاهِلِيَّةِ الْأُولَى وَأَقِمْنَ الصَّلاةَ وَآتِينَ الزَّكَاةَ وَأَطِعْنَ اللَّهَ وَرَسُولَهُ إِنَّمَا يُرِيدُ اللَّهُ لِيُذْهِبَ عَنْكُمُ الرِّجْسَ أَهْلَ الْبَيْتِ وَيُطَهِّرَكُمْ تَطْهِيراً ( الأحزاب : 33)

أَيُّهَا النَّبِيُّ قُل لِّأَزْوَاجِكَ وَبَنَاتِكَ وَنِسَاء الْمُؤْمِنِينَ يُدْنِينَ عَلَيْهِنَّ مِن جَلَابِيبِهِنَّ ذَلِكَ أَدْنَى أَن يُعْرَفْنَ فَلَا يُؤْذَيْنَ وَكَانَ اللَّهُ غَفُورًا رَّحِيمًا ( الأحزاب : 59 )

وَلا يَضْرِبْنَ بِأَرْجُلِهِنَّ لِيُعْلَمَ مَا يُخْفِينَ مِن زِينَتِهِنَّ وَتُوبُوا إِلَى اللَّهِ جَمِيعًا أَيُّهَا الْمُؤْمِنُونَ لَعَلَّكُمْ تُفْلِحُون ( النور : 31 (

والأحاديث الشريف في الكتب التسع – كتب السنة التسعة : ( صحيح البخاري – صحيح مسلم – سنن الترمذي – سنن النسائي – سنن أبي داوود – سنن ابن ماجه – مسند أحمد – موطأ مالك – سنن الدارمي ) تزيد وتفيض بها الأحاديث التي تنهى المرأة عن الخروج والاختلاط والخضوع بالقول .. الخ



يرجى العلم والإحاطة :


http://www.youtube.com/watch?v=CFXloWfY1Nk



وتفضلوا بقبول فائق الاحترام والتقدير



فارس عبد الفتاح .. قومي عربي

ستيتة حسب الله الحمش يقول...

انا داخلة اقول لك كل عام وانتي بخير
وجدت مناقشة محتدمة عن امور تخص هذه المدونة المحترمة والمهمة جدا

ولأنك أهل للرد على ضيوفك فأنا لن أرد بالنيابة عنك
ولكن لي بعض الأفكار الخاصة بأهمية هذه المدونة

1- العلم أيا كان نوعه لا يخجل طالما يطرح بأسلوب صحيح ومفهوم للمهتمين بمجال البحث
المهتمين بمجال البحث "الثقافة الجنسية هنا" من الجنسين وفي كل الأعمار
فالجنس غريزة طبيعية تحتاج إلى إشباع ويسأل عنها الإنسان نفسه من سن مبكرة جدا

2- المدونة "كما أعلم" لم تتجاوز الحدود المعرفية العامة
فالقائمين عليها لم يبحروا في التخصص الدقيق وحتى في حال الموضوعات العامة استعانوا بمتخصص اقتطع من وقته للإجابة عن أسئلة الحائرين
مدونة بعبعة من أثمن مدونات بلوج سبوت المصرية
سواء علق المعلقون او لم يعلقوا
وسواء تكاسلت الست بعبعة شوية أو أحبطت

3- في مجتمع ممنوعاته أكثر من مسموحاته
وأغلب هذه الممنوعات عرف عقيم وليس صحيح
في هذا المجتمع
يقرأ السادة القراء سرا ويستحوا ان يناقشوا
اما للحياء
واما للصورة الإجتماعية
واما لأن مرضى النفوس سوف يتتبعوهم "ماهم قراء بيحبوا قلة الأدب موووووت"

في مجتمع غير متوازن نفسيا
يستنزف المصريين 8 مليار في الفياجرا وأخواتها
ويعتبر العرب الأكثر دخولا على المواقع الإباحية وشراء حق عرض قنوات الجنس

ليه؟
علشان ده مش أدب
ده أدب مصطنع
لو كان فيه أدب حقيقي كان الكل سعى خلف معلومة صحيحة تعرض بشكل علمي قح وناقش في هذا الإطار فقط واللي حاسس إن حياءه يمنعه من العلم او حاسس انه خبير ومثمن جنسي كان ترك الساحة للجاهلين راغبي العلم علشان في يوم ما يكونوا في بيوتهم صح

بعبعة
مدونتك مفيدة جدا ولا يخفى عليكي ان قبل النت كنا نسعى للمعلومة فنأخذها من فم من لا يفقه شيء
ومن قبل معرفة الحق ومحاولة اتباعه بلا اي محظورات الا أوامر الله ونواهيه كانت البنات ربما اجهل من دابة واكاد اجزم كذلك الشباب رغم الفشخرة الكدابة اللي عادة ما تصاحب جنسهم

بعضا منا درس قليلا من العلوم الحيوية فاستطاع ان يدخل باب الثقافة لهذه العلوم بطريقة صحيحة وعلمية وشدته بالطبع رغباته في حياة جنسية سوية حتى يكمل ثقافته
وبعضنا لم يستطيع هذا

كم من الصديقات نعرف معرفة يقينية أن بيوتهن هدمت أو على وشك الهدم نظرا لمشكلة زوجية قائمة على اساس الجنس
وكم من داخل للمحطة دي شكرك لأنه أو لأنها لحقت نفسها وبدأت تفهم صح

ياريت حد يجيب الإحصائيات اللي بتثبت إن نسبة عظيمة من تحطم العلاقات الزوجية ناتج عن مشكلة جنسية وعادة بسيطة ومبنية فقط على جهل بالمواضيع الأساسية
انا قرأت هذه الإحصائية بس ناسية تماما فين

مش كل جاهل او جاهلة بأمور اساسية بسيطة بيروح في بلدنا لطبيب متخصص
ده احنا من الشعوب اللي تكره الذهاب للأطباء في الأمور العادية
وكثير جدا بيكون السبب الفقر والخوف من شبح الأدوية
فما بالنا بأمور لا يخطر لنا ببال أنها مرضية وتحتاج استشارة متخصص؟

أنا مع هذه المدونة منذ البدأ وحتى الأن واجد انها مفيدة جدا جدا جدا
وارجو ان تكملي ما بدأتي بحماس مماثل للبدايات
ماهو معلوم بالفطرة والفتاكة عند البعض "ومش اغلبية رغم كثرة النعر" مجهول عند أغلبية عظمى والعلم لا ينافي اطلاقا الحياء ولا ينفصل عنه

وبالمناسبة ان شاء الله في الكليات العملية ها نحط تجربة الرائدة مرات عوض أبو شأفة إننا نفصل البنات عن الولاد في المورفولوجي والأناتومي وغيرها من العلوم اللي بتشرح الأمور العضوية بكل بساطة ووضوح ومحدش بيضحك ولا بيحط على وشه منخول
لأن فعلا العلم الحقيقي مفيهوش ابدا اي خدش للحياء

تحياتي

فارس عبدالفتاح يقول...

الأخت المحترمة / ندى الياسمين

أشكرك على الاهتمام ،، وأنا قرأت الموضوع وهو عبارة عن وجهة نظر كما قلتي وليس هو إفتاء شرعي حتى نكون موضوعيين في النقاش ... وهذا بناء على كلام بالنص

بخصوص وجهت نظرك أنا احترمها واعتبرها اقرب إلى الصواب ولكن ينقصها شيء واحد حتى تكتمل وتتماشى وتتوافق مع الحق ( الشرع ) وهو الضرورة التي اقرها الشرع لخروج المرأة من بيتها والاختلاط بالناس وعليه يكون الالتزام بالزى الشرعي ثم انخفاض الصوت وغض البصر وعدم الخلوة برجل في مكان وعدم ضرب الأرض بالأرجل ( الكعب العالي ) عدم الإخضاع بالقول أو في القول .. الخ


فالضرورة هي الرخصة الشرعية لخروج المرأة والاختلاط من الأساس ، والضرورة تقدر بقدرها من قبل العلماء .


وعلى فكرة أنا احترم وجهات النظر التي يكون فيها منطق حقيقي سواء أكان يستند إلى منطق ديني أو منطق أخلاقي أو منطق قيمي أنساني .


أما الصراخ في الهواء والتبجح بالترهات والتضليل وخلط الأخلاق بعدمها والدين باللأدين والعرف بالهمجية والقيم بالانحلال.. هذه أمور أسس لها فلاسفة العبث والفلسفة العبثية وهي مستنكره حتى من قبل جميع القيم الأخلاقية الإنسانية والقيم الدينية في جميع العالم سواء أكانت ديانات سماوية أو ديانات بشرية .


وأخيراً تقبلي كل التقدير والاحترام


فارس عبد الفتاح .. قومي عربي

Ali Baba يقول...

اسألك سؤال بسيط جدا أخ فارس
تفضل و تعطف علي و قلي مين خرجت من بيتها ؟
و مين قالت كلام مثير أو خادش أو به الفاظ خارجة هنا بالبلوج ؟؟
و مين الي خضعت بالقول او رققت صوتها أو ضربت بحوافرها الأرض ؟؟؟
واضح جدا انك معتبر تصفح البنت للانترنت من أساسه تبرج و سفور و خروج عن حدود الله ....
من فضلك عرف معني خروج و سفور وتبرج و خضوع بالقول و أيضا خلوة التي ذكرتها و قلي ما علاقة كل هذا ببلوجات الانترنت
رغم ان كل من علي البلوج جالسون خلف شاشاتهم لا صوتهم يسمع و لا صورتهم تري حتي برامج الاتصال الي بتجعل رجل و امرأة في خلوة شاتية زي الياهو عليه اللعنة و ام اس ان و هوتميل بريد القوم الكافرين لا نستخدمها هنا
و بعد ما تجاوب علي سؤالي احب أن اسألك سؤال ثاني ابسط من سابقه و إن لم تكن له علاقة مباشرة لكنه في غاية الأهمية
هل تنكر أن شيخ الإسلام بن عثيمين رحمه الله رحمة واسعة هو مجدد القرن العشرين ؟

Ali Baba يقول...

السلام عليكم ورحمة الله وبركاته

كل سنة و كل امتنا و كلكم بخير ورمضان كريم يا بعبعة ويارب البلوج وكل أعضاءها و داخليها يصومو١٠٠ رمضان و يصلو تراويحهم و ينالو ليالي قدرهم و إن شاء الله نأدي رمضان حقه و نكرمه بما يستحقه

احب اصحح خطأي في المشاركة السابقة انا مكنتش اقصد مدونات بلوج عامة بس كنت اقصد مدونتنا دي و كل المدونات المحترمة تحديدا
و كل سنة و انتم طيبين و الدكتور عباس و عمرو و اعترافات هانم بخير انت طيب يا فارس
تحياتي

فارس عبدالفتاح يقول...

الاخ الفاضل / Ali Baba


تحية واحترام


انا لم افهم ماذا تقصد ولكن ان اكنت تقصد اجابتي على الاخت الفاضلة / ندى الياسمين .. فهذا خاص بموضوع قد قامت بكتابته وهو عن الاختلاط ورايها فيه وطلب مني ان اقرئه واقول رايي فيه .

اما عن ابن عثمين او ابن باز او غيره فلا يحق لي ان اقييم انسان وانا لا اعرف عنه اي معلومات ذات شأن تمكني من تقييم هذا الشخص .

اما عن انه حركة او فكر مجدد ، او انه حركه او فكر رجعي ،، فوالله لا اعلم عن هذا شيء .

تقبل كل التحية والتقدير ،،


فارس عبدالفتاح .. قومي عربي

بعبعه يقول...

ايه ده مسافة ما الواحد يجيب اليامشي وياكل دكر البط بتاع اول يوم اجي الاقيكم عاملين هوليله هنا ولا ايه

هاروح اركز وارد على الكل بقى

بعبعه يقول...

الاخ فارس

بالنسبه لردك الموجه ليا

انا ردي عنيف وغير منطقي ؟؟
ازاي يعنى ؟؟

مش مشكله حتى لو كان فهو عاجبنى

بالنسبه للاحاديث الى انت جايبها اتفضل هاتلي تخريجها عشان اعرف ادور عليها لانى اول مره فى حياتي يقابلوني
رغم انهم بعيد عن موضوعنا بس برضه عايزه تخريجهم عشان ادور فيهم
واي حد يحطلي احاديث هنا يجيب تخريجهم من فضلكم


بالنسبه حضرتك للعلاج للزوجين ما بيكونش العلاج مجتمعين طبعا على طول بيكون فى جلسات مع الزوج وجلسات مع الزوجه كل واحد منفرد وبعدين الاثنين مع بعض
بس برضه مش موضوعنا


النسبه للممارسه الفمويه اظن انا جبت دكتور متخصص والكلام الى قلته هو مراجعه وهنا تنتهي مسؤليتى عن المعلومات الطبيه

انا مش عارفه انت قريت فى مجلة ايه الكلام ده وايه مدى صحته الرد للدكتور عباس بقى

وكون ان انا مش متخصصه ده ما يخلنيش ما ينفعش اتكلم مع الناس

انا الى كل الى باعلمه باسمع الناس واحاول اساعدهم يحلوا مشاكلهم

وكنت فى البدايه بارد على الناس بشكل ودي وفى حدود معلوماتي لكن لما لقيت الحكايه محتاجه راي طبي اعلنت الحاجه للمساعده وعرض مشكورا الدكتور عباس المساعده


واذا كنت انت شايف الممارسات بالفم حاجه مقرفه فانت حر لكن فى ناس تانيه مش شايفاها كده

ولو على هانقل الكفار ولازم نحذوا حذو القدامى بالحرف وبالكلمه يبقى فيم وجودك على الانترنت والكمبيوتر ؟؟

تبطل نت وكمبيوتر بقى عشان السابقين ما كانوش بيعملوا كده

الاسلام لا يدحض الحضارات فيما لا يتعارض مع الشرع

لو كان الجنس الفموي منتشر عند الغرب الكفار الوحشين الشريرين وحد منهم اسلم
وسألنا كمسلمين اعمل ايه حلال ولا حرام هاتقوله ايه ؟؟

هانقوله مش حرام مسكوت عنه

لو كان حرام ومفزع اوي كده اظن ربنا سبحانه وتعالى كان يقدر يحسم الموضوع ده فى كلمه واحده فى الكتاب والسنه

مافيش حاجه بتيجى اعتباطا ولا سهوا جل من لا يسهو يا اخ فارس


ولو سمحت تعرفنى على علماء النفس الى قالولي ان الممارسه بالفم شذوذ جنسي جايز يكون لهم راي انا مش عارفاه

شكرا يا اخ فارس

بعبعه يقول...

فارس

ربنا يعصمنا واياكم من هوى النفس المتعارض مع الحق

لكن لو مش متعارض مع الحق مافيش مشكله نشوف هوى نفسنا عادي جدا


انا مش باحمل كلامك ولا كلام من ده صدقنى الموضوع بالنسبه لي ابسط مما تتخيل

شوف يا اخ فارس انا لحد الان باكلمك بكل احترام لرايك وراي اي حد يدخل مدونتي

وحظك حلو انى قريت تعليقك ده وانا صايمه عشان انا باحاول اكون هاديه وانا صايمه اقصى ما يمكن

طول ما كلامك بالتريقه والاستخفاف ده يبقى كده انت ما ينفعش يترد عليك

انا مش باناقشك عشان انت ند ليا
لا اطلاقا

ولا اساسا انا اعرفك

والأئمه الى انت ذكرتهم على عينى وعلى راسي
بس كمان انا لو اختلفت معاهم فى الراي ده عادي جدا مافيش اي شرع يمنعنى من ده

وبعدين بصرف النظر عن سخريتك الماسخه

لما ان شاء الله فى يوم الايام ابقى نبراس وهدى والله اعلم يرزق من يشاء بغير حساب

وابقى اتريق ساعتها براحتك

بالنسبه لدلائل الاختلاط انا قلتلك هنا مش باب فتوى اصلا انا لما بتقابلنى مسأله شرعيه باروح لناس تعرف تدورلي وانا اثق فى رايهم وباستعين بيهم

وانا قريت الموضوع الى حطته ندى الياسمين وشايفه انه تمام جدا وانا مقتنعه به جدا

والاايات الى انت قلتها ميه ميه طبعا بس المهم نفهمه يا فارس

وافتكاسات يعنى اختراعات بس اختراعات هبله

وبلاش تدخلي فى سكة اللغه دي انا اعرف اكتب عربي كويس اوي بس زي ما تقول كده باكتبلكم على اد علامكم :)

بعبعه يقول...

ستيته

ازاي بس تقولي كده يا حبيبتى اولا حق الرد على اي حد مكفول للجميع طبعا فى حدود احترام الاخرين

وانتى الاحترام كله يا جميل اولا وثانيا انتى صاحبة بيت يا جميل وانتى عارفه

وابصم بالعشره على كلامك عن المجتمع والناس وما حدش عارف الحقيقه دي كتير ولعلمك انا ما كنتش اتخيل الوضع كده برضه
الا لما فتحت باب الرسائل والمشاكل لقيت بلاوي والله

عموما شرفتينى يا جميل

بعبعه يقول...

فارس

والله انت بتلعب فى عداد عمرك

دى انا ؟؟

ا الصراخ في الهواء والتبجح بالترهات والتضليل وخلط الأخلاق بعدمها والدين باللأدين والعرف بالهمجية والقيم بالانحلال.


طيب ماشي الله يسامحك واحتمال اغير رايي واجي ارد عليك بعد الفطار

وعلى فكره الكلام الى انت قايله لندى ده معناه انك اصلا اصلا مش فاهم الايات والاحاديث الى انت قلتها معلش يعنى هي دي الحقيقه

بعبعه يقول...

علي بابا

قوووووووووله والنبى

انت اهو واحد معدي لا تعرفنى ولا تعرفه

مين اختلطت ومين خرجت ومين قالت كلام مثير والنبى

قولي انت فين الخلوه وفين الخضوع بالقول وفين السفور والتبرج وفين الضرب بالرجلين وابداء الزينه

احتمال عشان انا حاطه على المدونه بره عصفورتين ومزوقه القاعده ولاايه


بس انا ما فهمتش سؤالك يا علي بابا عن بن عثيمين وكده تقصد ايه
؟؟

بعبعه يقول...

علي بابا وانت طيب وبخير ورمضان كريم

غير معرف يقول...

أية يا جماعة دة ... رمضان كريم

براحة شوية الموضوع مش مستاهل الشد دة كلة ...!!!!!

و بصرف النظر عن المناقشات الدايرة أنا حابب اتكلم عن موضوع البوست
( المرأة بصفة خاصة على النت )

الأساسى و إللى ناس كتير مش فاهماة .. هوا مين أصلاً إللى فاضى يقعد على النت و يكتب فى مدونات و يتابع الفيس بوك و فاتح الماسنجر و هاتك يا شات ...

واحد عندة وقت فاضى وحابب يعمل كومينيكشن مع الناس بشكل محترم و يناقش جميع القضايا و يكون لة حياة على النت يقضى فيها وقت فراغة
و دة بيشمل إللى حاسيين بالوحدة و إللى حاسيين بالفراغ و إللى مش فاضيين برضة زى حالاتى بس بييجى عليهم وقت بيلاقوا فية وقت يقضوة عالنت

و مش لازم أبداً إن إللى داخلة عالنت تبقى نفسها تصطاد رجالة و لا أبداً إللى داخل على النت يصطاد ستات
المشكلة فى أية بقة ....
إن المأتتين عالنت معظمهم سطحيين و تافهيين و بيكونا عادة من الشباب إللى مش لاقى شغلة ولا مشغلة و مستنى بابا يدورلة عل شغل .. و دول كتير جداً
و طبعاً بيكونوا عزاب و تعبانيين ياعينى مللة ( مللة سرير )
فبيكون الأساسى فى تفكيرهم إن أى واحدة داخلة عالنت سواء متجوزة أو عازبة و يالهوى لو كانت مطلقة تبقى مصيبة
إنها داخلة النت تدور عالرجالة
و طبعاً دة كلام أهبل و دليل كبير على سطحية تفكيرهم زى ماقلت
لكن ماننساش برضة إن فى من النوع التانى إن فى ستات فعلاً بتكون بتدور على علاقات من خلال النت و إن كانت محترمة و تغلفها الشرعية ...
فبيختلط الحابل بالنابل و تتوه الحقايق عن كون الشخص إللى على الطرف الأخر من السلك ( سوى ولا ... )
و دى مسؤلية الستات و البنات إنها تتأكد من شخصية إللى بيتكلموا معاة أو بيتشاركوا فى حوار ... إزاى فى طرق كتير
أهمهاإن أول مالشخص إللى بيتكلم يبتدى يسألك .. إنتى لابسة أية ..؟؟؟؟
يبقى دة من إياهم و بس خلاص

بسيطة مش كدة
و منحرمش نفسنا من التكنولجيا و مانخلهاش تجيبلنا وجع القلب

و رمضان مبارك عليكم كلكم

خالد

فارس عبدالفتاح يقول...

الفاضلة / بعبعه

الاخوة والاخوات


اعتذر عن اي خطأ تعتقدون انه صدر مني خصوصاً مع الفاضلة بعبعه .


واعتذر مرة اخرى ان استكمال هذا الحوار واتمنى لكم التوفيق فيما تنشدوه من التقدم الحضاري المنشود في الثقافة الجنسية

مع اطيب التمنيات ،،


فارس عبدالفتاح .. قومي عربي

بعبعه يقول...

خالد انا معاك

فى كلامك ده جدا على فكره خصوصا ان الناس السيئين او اياهم الى انت بتقول عليهم مش موجودين على النت بس دول فى كل مكان
فى الشارع فى الشغل فى مدرسة الاولاد فى سواقين التاكسي فى كل مكان فعلا

المهم نتعلم ازاي نتعامل فى المواقف الى زي دي

وزي ما في ستات محترمين فى مش محترمين
وزي ما فى رجاله محترمين فى كذلك رجاله زفت وطين

عادي

الفكره هنا من البوست انى باكد على الكلام ده فى ناس محترمين يا جماعه بس على كده

وبالنسبه للحديث مع فارس انا مش باتخانق خالص والله بالعكس ده انا هاديه اوي مش عارفه ليه

بعبعه يقول...

فارس

بص يا سي فارس يا قومي يا عربي

انا ممكن اقعد اتناقش معاك من هنا للسنه الجايه بس تكون انت على مستوى النقاش وتكلمنى باحترام ليا ولفكري زي ما باحترمك وباحترم فكرك

وفى النهايه كل واحد حر فى فكره ومعتقداته


بس انا ليا طلب عندك


بالله عليك لو يوما ما استعملت اي معلومه قريتها عندي على المدونه او رجعت للمدونه عندي عشان تشوف عليها معلومه او تتاكد منها

بالله عليك يا شيخ لا تبقى تقول فى سرك الله يصلح حالك يا بعبعه يا اختي


بس خليك امين مع نفسك بقى وادي امانه انا حملتهالك