الأربعاء، 19 نوفمبر، 2008

الاساءه الجنسيه

اولا اسفه على تأخيري بس ما كنتش فاضيه اليومين الى فاتوا شويه
وثانيا بصرف النظر عن انكم ما حدش عبرني ولا رد عليا ههههههههههه الا انى هاكمل المدونه شويه لحد ما نشوف ايه الموضوع
احنا المره الى فاتت اتكلمنا عن الضرب كاساءه بدنيه طبعا بتلحقها اساءه نفسيه تبقى
المره دي هانتكلم عن اساءه تانيه لها نفس الاثر ويمكن اكتر وهى الاساءه الجنسيه او التحرش الجنسي
والى فعلا بيكون مؤلم جدا نفسيا فضلا عن مضاره ومخاطره الجسديه والاجتماعيه كمان
ويمكن الى بيخلي الاعتداء الجنسي اخطر واقسى من الاعتداء بالضرب مثلا انه الجنس عموما من المناطق المحرمه تقريبا فى الكلام عنها او حتى الاشاره لها داخل مجتمعنا الشرقي عموما
وده بيخلي فى مشكلتين فى رايي هما الى بيكونوا بيئه خصبه لتفشي ظاهره زي التحرش الجنسي
اولا قلة الوعي والثقافه الجنسيه المطلوبه من سن الطفوله والى ما بعد ذلك
وثانيا ان المعتدى عليه لجهله او خجله المبالغ فيه والنابع من نظرة المجتمع للجنس بيخليه انه يكتم فى نفسه وما يقولش
عليه النهارده عايزين البعبعه تكون بخصوص التحرش الجنسي او الاساءه الجنسيه عموما سواء بالفعل او حتى مجرد الارهاب والتلويح بها
اي حد يكون اتعرض لحاجه زي كده ياريت يحكى لنا يمكن نساعده على تخطيها وكمان نستفيد من خبرته السيئه دي ونقدر نتجنبها
او حتى يكون يعرف حد شخصيا يا ريت مش سماعي فقط اتعرض لحاجه زي كده برضه ياريت يشاركنا
واحب افكركم ان البوست ده خاص بالتحرش والاساءه الجنسيه مش الكلام عن مشاكل الجنس عموما
عشان انا عارفه فى ناس مابتصدق
مش عشان ما ينفعش نتكلم عن الجنس لا .. لكن بس تحديدا لموضوع البوست
واحب اسمع مشاركاتكم الى اتمنى تكون مشاركات بدون حواجز نفسيه
شكرا يا شعب البلوجر

هناك 17 تعليقًا:

عمرو يقول...

التحرش الجنسى مش شرط أنه يكون ناتج عن كبت جنسى بدليل أن أغلب حريفة التحرش الجنسى فى وسائل المواصلات من الرجال المتزوجين يعنى مش محرومين جنسيا
أغلبالظن أن التحرش هو تنفيس عن كبت و قمع ناتج عن أوضاع اٍجتماعيه و سياسيه و اٍقتصاديه لا يرضى عنها المتحرش فبيسقط عدوانيته على البنت اللى بيتحرش بيها اٍرضاءا لمركبات النقص بداخله اللى تولدت من ظروف هو داخليا فير راضى عنها فبيعوض ده بفرض سيطرته الذكوريه على الاٍناث
خدى بالك يا بعبعه أنه فيه فرق كبير فى التركيبه النفسيه بين المنحرف جنسيا اللى بيتحرش أو بيعتدى على الأطفال الصغار صبيان أو بنات و بين المتحرش بالفتيات و السيدات الكبار لأن غالبا المنحرف جنسيا و اللى بيتخذ من الأطفال موضوع جنسى بيكون هو نفسه تعرض فى طفولته لاٍعتداء أو تحرش ترك جرح عميق بداخله و ممكن برضو هذا الأعتداء يكون ترك بداخله ذكرى مبهجه غبيستمر فى تقبل الاٍعتداء من الآخرين بل و يسعى ورائه و ده موضوع تانى
أغرب ما سمعت فى حياتى كان موضوع المدرسه اللى أعتادت على اٍغتصاب طفله فى الحضانه لا يتعدى سنها 4 سنوات مما تسبب فى اٍيذاء شديد لجسد الطفله
يعنى مدرسه أنثى تعتصب طفله أنثى اٍزاى يعنى ؟؟
علشان مشكلة التحرش تتحل لابد من حل أصل المشاكل لأن حبس شخص أو أتنين ده لن يحل المشكله اللى بدأت فىالتغافم و الاٍنتشار
و لكلامنا بقيه

EmY يقول...

هي دي اول زياره ليا يعني المفروض اخد كادو و انا ماشيه

نيجي بقي لموضوع البوست التحرش الجنسي فعلآ مشكله كبيره و من اهم اسبابها التربيه الغلط اننا نربي ولادنا علي ان الجنس تابو عيب و حرام الكلام فيه فلما حد يتحرش بيهم و هما اطفال يخافوا يحكوا علشان بيحسوا ان هما الي غلط و لو حصل و هما كبار بيتكسفوا و يحسوا بالعار

بوست جميل اوي

تحياتي

بعبعه يقول...

عمرو

معاك تمام فى كل الى قلته على فكره

وانا برضه استغرب من حكاية المدرسه دي جداااااا

وفضلت اقول طب يعنى ازاي مش فاهمه
بس ما رضيوش يقولوا فى البرنامج

ربنا يسترها معانا يارب

بعبعه يقول...

ايمى

تحياتي ليكى صديقه جديده لبعبعاتي

واتفق معاكي تماما فى كلامك

وانتى الى جميله

زوجه يقول...

موضوع التحرش ده بقي كارثه بالنسبالي
بقيت خلاص بخاف انزل حتي مع جوزي ايام العيد والوقفه والمناسبات
مع اني منتقبه وبلبس ملحفه لكن مهو قبل كده اتحرشوا ببنات محجبه ومنتقبه في وسط البلد
بجد بقت مصيبه مصيبه كبيره علينا معشر النساء
الرجوله خلاص والشهامه برده خلاص راحت
كام واحد اتحرش بالنساء وعنده اخت
بس عاجبني اوي موضوع المحكمه والقضايا ده
اكيد هيعمل فرق
واللي قالي مش هيعمل اي حاجه موضوع الاقسام
احب اوضحله نقطه صغيره وهي ان البنات بدأت تخاف من اي حد يتحرش بيها تتكلم لانه في نظرها هيكون عيب
لكن لو اتكلمت واخد علقه محترمه عمره مهيفكر يعمل كده تاني مع واحده تانيه
وزي مالمثل بيقول اضرب المربوط يخاف السايب
لما مجموعه من الشباب المتحرش يتقبض عليهم ويضيع مستقبلهم هيتعظ الغير
وربنا ياخدهم المتحرشين دول ويهدي بنات الامه في لبسهم
مع ان اللبس مش مبرر ابدا للتحرش

عمرو يقول...

زوجه
أتفق معاكى أن اللبس مش مبرر للتحرش و لكنه برضو عامل مساعد للتحرش
شرطة القاهره قفشت أول أمس يعنى فى يوم واحد 550 مراهق و رجل متحرش فلو اٍفترضنا أن النطع الواحد من دول تحرش ببنتين فقط على الأقل يبقى فيه عندنا 110 فتاه و سيده و أم و أخت تعرضن للتحرش
طيب كام حاله من دول أشتكت فيها المتحرش بها للشرطه ؟
و لا حاله ..
يعنى لو ماكنوش رجال الشرطه واقفين فى الشوارع المحيطه بمدارس البنات و بالجامعات و بأماكن تجمع الموظفات ماكنش الأنطتع دول أتقفشوا
يعنى برضو يا زوجه وجود رجال الشرطه المكثف فى أماكن التحرش ضرورى و هام و يبقى الحقيقه بيغالط نفسه اللى بيقول أن الشرطه لا دخل و لا أهميه لها
الواقع أن جهاز الشرطه جهاز هام جدا جدا لحفاظ على الأمن

بعبعه يقول...

زوجه
بصي المتحرش ده بيبقى ما عندوش من الاخلاق ولا الموانع الى تخليه يفرق بين محجبه وغير محجبه منقبه ولا غير منقبه

ده اساسا مجرد من المخ والاخلاق

بس هو ايه يا بت ملحفه ده ؟؟؟

دى جايه من لحاف كده ولا ايه ؟؟

بعبعه يقول...

عمرو

شرطه ؟؟؟؟

بتحلم انت على فكره

احنا حاليا عندنا امن اهااااااااا
عندنا امن ولا مؤاخذه ما يخرش الميه

أمن سياسي

بنحمي البشوات

طززززززززز فى الشعب

يا سيدى الفاضل الحكومه اساسا متحرشه بالشعب كله وزياده شويه

احنا بلد الامن والاماااااااان

ايه ده افهموها بقى

Ahmed Al-Sabbagh يقول...

والله الموضوعات بتطرح بطريقة جميلة اوى
انا بستفيد من الكلام اللى بيتكتب فى البوست والتعليقات
بجد رائع

بعبعه يقول...

شكرا يا صباغ

طيب ابقى تعالى متخفي وبعبع معانا يا سيدى قول اي بعبعه

زوجه يقول...

انا هقولك الملحفه ديه ايه
بس مش كل مره هعرفك ببلاش ماشي
الملحفه ديه اللي هي زي الاسدال بس اوسع منه كمان
علي الله متجيش تقوليلي ايه هو الاسدال كمان

صبرني يارب يقول...
أزال المؤلف هذا التعليق.
mony يقول...

موضوع جميل يا بعبعة

خصوصا انه جاية علي وجع الهوجة بتاعة اليومين اللي فاتوا و اللي جايين كمان بمناسبة الاعياد


انا بأه مش هتكلم عن التحرش اللي بيصدر من الرجال للبنات ولا السيدات

انا هتكلم عن التحرش اللي من البنات و الستات للرجالة


هتقولي علي منحازة للرجال

هقولك والله ابدا

بس مستغرباه شوي

لان لا عاداتنا ولا تقاليدنا و لا الاجيال السابقة فيها كده

دايما بيقولوا لما الراجل يتحرش بالبنات ان لبس البنات هو اللي يعيني خلاه يفصل و ينسي هو كان نازل الشارع ليه و يجري يتحرش بالبنت ديه


لا انا بأه سمعت من ناس مقربين ليا جدا رجالة طبعا
واحد قاللي انه كان راكب اتوبيس و مرة واحده لقي واحده بتعمل حركات غريبة جنبه و هو عامل انه مش واخد باله لحد ما وصل الامر انها حطت ايديها

هوبااا


لحسن حظها مش عارفة ولا لسوء حظها ان الراجل ده محترم و بيتكسف

اول ما حس بأديها راح جاري و نازل في اول محطة و حرم ما يركب اتوبيس تاني ابدا
طبعا انا ماكنتش عارف ليه و كنت بقوله انه يوفر فلوس التاكسيات و هو مرتبه صغير
قاللي بصراحة انا المرات اللي ركبت فيها الاتوبيس كان بيتخدش حيائي فيه


و واحد تاني قاللي انه ركن العربية بتاعته بعيد عن العمارة اللي ساكن فيها علشان ماكنش فيه ركنة و الساعة 12 بالليل و شاف بنتين واقفين عمالين يبسبسوله و يشوروله
فهو قال دول شكلهم مش محترم و ماردش عليهم و راح للعمارة بتاعته

لقاهم ماشين وراه
و الدنيا كانت ضلمة فخاف و جري
فجريوا وراه
من خوفه كان بينده بيقول يا احماااااااااد علشان البنتين يخافوا و يبعدوا
و اول ما شافوه دخل العمارة وقفوا و سابوه


و طلع يقول لامه
ابنك كان هيغتصب يامه
كان في بنتين بيجروا ورايا في الشارع


الدنيا ما بقتش امان يا بعبعة ياختي
هييييييه
دنيا

جنّي يقول...

السلام عليكم

التحرش الجنسي ليس له علاقة بالمجتمع شرقي كان او غربي ..

وظاهرة لا تقتصر على المجتمع الشرقي فقط .. فمن سافر اوروبا او امريكا سيعرف الفرق الكبير وان التحرش والاعتداء الجنسن هناك اكثر بكثير حتى في المجتمع المثقف او ذو المكانة الاجتماعية العالية وما امر كلينتون عنا ببعيد ..

كذلك ربط التحرش او الاعتداء الجنسي بالكبت او المجتمعات المحافظة فأمر تجافيه الحقيقة وتؤكده مواليد القمامة في المجتمعات الغربية وكذلك الامهات المراهقات ..

والاسلام امرنا بالتنزه عن هذه الانحطاطات الاخلاقية حتى بالاقتراب منها قال تعالى " {وَلاَ تَقْرَبُواْ الزِّنَى إِنَّهُ كَانَ فَاحِشَةً وَسَاء سَبِيلاً }الإسراء32
والتحرش ما هو الا مقدمات للزنى امرنا الله تعالى بالابتعاد عنها ..

أما الوعي والثقافة الجنسية فالامور تقدر بقدرها بمعنى ان لكل مرحلة سنية ما يناسبها وبطرق تبعد عن اثارة الغرائز فتزيد من التحرش الجنسي ..

وعلينا ان نعلم فتياتنا كيف يتغلبن على مقاومة التحرش بهن بدا من التزام الأدب والحشمة وعدم الخضوع في القول حتى لا يطمع فيهن من كان في قلبه مرض ..
وكذلك تدريبهن على الدفاع عن انفسهن بطرق قتالية بسيطة قد تحميهن من الذئاب البشرية ..

كفاية عليكي كدا النهاردة وخلينا نبعبع في بوست تاني ان شاء الله

سلام

بعبعه يقول...

اسفه يا جماعه على انى اتأخرت فى الردود



زوجه

طيب افادكم الله يا حلوه اوسع من الاسدال ؟؟

ودي بتجبيها تلبسيها لوحدك ولا انتى والعيله كلها ؟؟؟
ههههههههههههههههههه

بعبعه يقول...

موني

هههههههههههههههههه بجد ضحكتينى


ابنك كان هايغتصب ياامه
هههههههههههههههه

على فكره انا عارفه ان الكلام ده موجود وانا ما قلتش ان التحرشات دي من الرجاله بس طبعا لا

بس قولي لبتاع الاتوبيس انه فى الغالب كان هايتقلب فى الفلوس يا حلو

ولو ان قلة الادب عادي فى حريم لا مؤخذه عايزين الحرق

انتى عارفه يا بنتى فايزه لماتبقى عايزه بقى بتبقى مصيبه

ما علينا ربنا يستر على ولايانا يا اختي ورجالتنا كمان ههههههههههههههههههه

نورتي يا موني

بعبعه يقول...

جني

اها معاك حق طبعا عمري ما الصقت تهمة التحرش بنا كعرب او شرقيين او متحفظين

بل بالعكس طبعا المفروض احنا عندنا اقل

انا ما عشتش بره لكن اعتبرني عارفاهم برضه

مستنيين بعبعة حضرتك معانا دايما