الأحد، 30 نوفمبر، 2008

الحـــــب ......... ومفجأه

الحب
وآآآآآآآآآآآآه من الحب
وسيرة الحب
وظلم الحب لكل اصحااااااااابه
كلام كتير
وعذاب كتير
وقصص وروايات يااااااما
منها بيطلع للنور ومنها بيفضل جوانا
منها حاجات بتعلمنا ومنها حاجات بتعلم فينا
منها حاجات بتقوينا والخايب بس تلاقي حاجات بتكسره
افتح قلبك وبعبع معانا
ويا ريت ما نعرفش انت مين عشان نبقى مرتاحين
قولنا الحب عمل فيك ايه
واتعلمت ايه
وعلم فيك بايه
قلنا سرك
وسرك فى بير عميييييييييييييييق
***************************
مفجأة الموسم يا بلوجاريه انى عملت بالفعل اميل جديد عشان تراسلوني عليه لانى بصراحه شايفه ان المدونه مش زي ما انا حبيتها
ولا زي ما انا كنت عايزاها تكون
انا مش باكتب موضوع البوست عشان نناقش موضوع البوست
ولا عايزه الموضوع يبقى انى اجي اعلق عندكم وتيجوا تعلقوا عندي
مستنيه اميلاتكم وكل الى عايزين تنشروه هنا وبالاسم الى تختاروه واسمحولي مش هاحتفظ باميلات اي حد واميلا ت بس مش اضافات ما سنجر لانى مش هافتحه اساسا
وده الاميل اهو
b3b3a2008@yahoo.com

هناك 26 تعليقًا:

الحب يقول...

الحب ده حاجه جميله جدا
انا سمعت وشوفت حب يخلي الواحد يضحي بنفسه في سبيل الانسان اللي بيحبه
نفسي احب كده
بس مش عارفه خالص
حتي جوزي كنت بحاول احبه ومش عارفه
هو عموما انا عندي مشكله في التضحيه
بس بعد ماشوفت صحابي وقاريبي البنات بنصح كل بنت متحولش تحب بغي طريقه غير لما تتجوز
يمكن تعرف تحب المصيبه اللي هتبقي معها في البيت

زوجه يقول...

السلام عليكم
الحب حلو أوي
انا حبيت زوجي جدا في الاول ولكن لاختلاف الطباع ومشاكل اول الجواز الحب ده قل جدا
ولما اتعرفت علي ناس جزاهم الله خيرا فهموني يعني ايه جواز
حسه دلوقتي ان الحب كل مادي بيعلي وبيزيد لحد مهيوصل بإذن الله الي قمة الحب
ربنا هب لنا من ازواجنا وذرياتنا قرة اعين واجعلنا للمتقين إماما

عمرو يقول...

الحب بيخلى الدنيا كلها حلوه
كل حاده بتبقى أحلى و أجمل بس لما يبقى حب ناضج من غير أهداف من وراه

بعبعه يقول...

الحب

طيب قولي لنا يا ريت ليه مش عارفه تحبيه

وليه شايفه انها ممكن لو ما كانتش حبت قبل الجواز ممكن تحب المصيبه الى هايبقى معاها فى البيت

وليه عندك مشكله فى التضحيه

وليه اصلا مطلوب مننا نضحي لمجرد اننا نحب

احنا ممكن نحب من غير ما نضحي

وايه فى جوزك وحش مخليكى مش عارفه تحبيه

ده لو كنتى حاولتي تحبيه

وقوليلنا بصراحه بتقارني بينه وبين حد تاني معين ؟؟؟

بعبعه يقول...

زوجه

خير ربنا يوفقك وبررررضه ممكن تقولي لحب فوق ازاي قدرتي ترجعي الحب تاني يمكن تستفيد هي

نورتي يا زوجه

بعبعه يقول...

عمرو

حب فى الله يا عمرو هو ده الحب من غير اهداف مش بس كونه حب ناضج

ماهو كمان الحب ده ممكن يكون فى الله والله

والحب حلاوته بالقنطار على راي الست

مولان يقول...

اااااااااااااااااه عندي كلام كتير فيه

ومبروك الميل

ليا عوده للبعبعه

العاشقه زوجها يقول...

الحب ده حاجه جميله اوي ورقيقه اوي عامله زي الورده او زي البيبى الصغير لو ما لقاش رعايه ممكن يموت او يطلع فيه حاجه غلط تخليه يعيش طول عمره تعيس

الحب لو مفضلش يكبر هايقل ويموت عشان مافيش حاجه بتفضل على حالها

أنا عمري ما حبيت الا جوزي والحمد لله
ودايما احمد ربنا على كده وعلى وجودي فى حياتي

وساعات باحس ان ما حدش وصل ابدا للدرجه الى وصلنا لها من الحب وبنحمد ربنا كتير على اننا لقينا بعض

ولا انا ولا هو حبينا حد قبل كده ولا كان لنا علاقات من قبل الجواز من اي نوع

ولا حتى احنا نفسنا قبل الخطوبه كان في بينا حاجه

الحب حلو اوي سهل اوي بس احنا الى مش شايفينه صح ومصعبينه

وحاسينه دايما انه بعيد وصعب المنال مع انه ممكن يكون قدام عنينا واحنا مش شايفينه

نسأل ربنا دايما يديم الحب علينا نعمه

وينور قلبنا بنوره عشان نشوف الحب ونعرفه

ياما ناس توهمت الحب واعتقد انهم هايعيشوا ويموتوا ما يعرفوش الحب

وساعات احس ان الى بيجري ورا الحب بجنون عمره ما بيلاقيه

وفي مقوله باحب اقولها

الحب هدى من الله فياطالبي الحب فى كل مكان وزمان اسألوا الله الحب تجدوه ان شاء الله

شكرا لك يا بعبعه

بعبعه يقول...

مولان

طيب ياله بسرعه مستنيين

بعبعه يقول...

العاشقه زوجها

طيب يعنى خمسه وخميسه عليكم والله اكبر وحصوه فى عين الى ما يذكرش ربنا

الحمد لله وعجبتنى المقوله بتاعتك

وشايفه ان البعبعه بدأت تظهر يا بلوجاريه

مولان يقول...

عارفه يابعبه

لاول مره مقدرش ابعبع

حسه اني لو اتكلمت هعيط

وهفتكر ايام قاسيه اوي

هفتكر حبيب خاين كداب

مقدرش يصون حبيبته اللي هتكون مراته بعد شهور

مقدرش يحافظ عليها وخانها وجرحها رغم ان كان الدنيا لها

الحمد لله انها ايام وعدت من زماااااااااان

وربنا كان معايا وكشفهولي في الوقت المناسب

بعبعه يقول...

مولان يا قلبي وجعتي قلبي

قوليلي طريقه وانا اروح ابعبعهولك واخليهولك اكبر حته فيه اد الفسفوسه

لا بس انا كنت عايزاكي تبعبي وتحكي من غير عياط ولا زعل عشان فى ناس ما يستحقوش تزعلي عليهم بالعكس

تحمدي ربنا فعلا ان ربنا بعدك عنهم

وما تخافيش هو الايام هاتبعبعه كفايه

Ahmed Al-Sabbagh يقول...

كل سنة وانتم والاسرة بخير

جنّي يقول...

السلام عليكم ورحمة الله وبركاته

تعالي شوفي حكايات جني مع الحب ها تلاقي بوستات جميلة في الارشيف ..

وكل عام وانتم بخير بحلول عيد الأضحى المبارك

كل عام وانتم على صعيد عرفات
كل عام وانتم من الحجيج
كل عام وانتم من الملبين
كل عام وانتم من المكبرين
كل عام وانتم من المهللين
كل عام وانتم مغفور لكم
كل عام وأنتي حرة يا أمتي

أخوكم سعيد

بعبعه يقول...

احمد الصباغ

كل سنه وانت طيب وبخير

بعبعه يقول...

جني

كل سنه وانت طيب يا جني

انا قريت مدونتك كلهااااااااااا من اولها لاخرها ما تقلقش

Mahmoud farag يقول...

ما اجمل الحب الحقيقي

كل سنة و انتي طيبة

و تقبلي مروري

habiba يقول...

مش هخمن علشان عرفت انك مش عايزة حد يخمن انتى مين وكمان لانى مش بعرف اخمن اصلا انما حكايه عسل طول عمرك دى بتقول انك تعرفينى بقالك كتير

عموما ياللى انا مش عارفاكى كل نه وانتى طيبه ومبروك بلوجك الجديد :)

اعترافات هانم يقول...

نورتي بعبه بلوجريه

الفكره مش اني اتعرف او لا بس البلوج معمول للفضفضه من غير مانقول ده فلان يعرف معمول اننا نقول اللي جوانا زي ماانا كمان هقول اللي جوايا

تقدري تبعبعي حتي لو باسم مجهول الاهم اننا نكون وصلنا لهدف البلوج

اعترافات هانم يقول...

نبعبع بقي يبعبعه

ال اما بيتقال كلمه ح بحس بحزن كبير اوي اوي جوابا حزن محدش ممكن يقدره او يحسه
طول عمري قويه اوي اوي اوي وواخده الدنيا بسيطـــــــه وسهله اوي ولله الحمد في حياتي مش في حاجه فشلت فيها


دراسه بقدر اثبت نفسي كويس جدا وانا اللي كنت بدي الملخصات ولحد الان في ملخصات ليا الطلبه بيزاكرو منها

في الشغل بقدر اثبت نفسي في اي مجال حتي لو مش تخصصي اشتغلت كتير اوي وفي حاجات بعيده عني تماما وقدرت اثبت نفسي بالتوفيق من ربنا سبحانه عز وجل

علاقاتي بالناس محبوبه جدااااااااا والحمد لله دي نعمه من ربنا

اي مكان بكون فيه بقدر اكتسب صدقات ومحبوبهاوي بينهم

الثانوي والكليه والشغل وعالم النت

احساس انك تبقي محبوب دي احساسها حلو اوي

الاهل مش قادرره اقول انا بالنسباهم ايه النور والقلب

انا صديقه ماما وحبيبه قلب بابا الحمد لله ربنا ايحرمني منهم

اللي بيكهرني يتعدوا علي الصوابع

علاقتي بربنا بحاول اني اقربله بحبه اوي وماليش غيره اشيكل واحكيله هو الرحمن الرحيم وبذكره بيطمئن قلبي واول اما احس بحزن ولا خوف بجري عليه واسجلده بحس براحه ربنا كبيييييييييييييييير اوي

الحاجه اللي فشلت فيها هي حياتي الشخصيه هي انا مع نفسي

اول انسان قلبي دق له مكنش فعلا يستحق الدقه دي بس كان قلبي في ايدي مش في ايد حد اول اما حسيت انه ش ينفعنيقلت لبابا انا مش عاوزاه وخلاص كان قراري ملكي بعدها بقي يتقدملي ناس وانا من الخوف اللي ساكن جوايا من التجربه الالي بقيت ارفض واطلع القطط الفطسانه وكمان كان هيحصل زعله في العيله بسبب اني مش كنت عاوزه واحد قريبي بس الحمد لله حصل خير ومش في اي حاجه حصلت لحد الان الخوف ساكن فيا لحد اما حبيت بس حبي كان محبوس جوايا مش طلعته ولا قلته لحد وفضلت احبس واكتم جوايا مشاعري واكتم المي ومحدش يحس بيه لان مش اتعودت ان حزني يظهر عليا لاي حد حزني يكون جوايا محدش يشوف دمعتي لحد اما حلاص البركان انفجر منا بشر مش جماد بحس وبشعر مش قدرت اكتم

خاصه ان كل واحده من صحباتي بقت تحكيلي عن تجربتهاالعاطفيةكلهم قلبهم مليلان بالاه والانين كنت مشتاقه اسمع ان واحده سعيده عشان احس ان لسه في امل وانا من النوع اللي اي تجربه لحد من اللي حواليا بتاثر اوي وباخدها جوايا ويمكن اكون بتعايشها كمان تخيلي بقي كل التجارب ومع تجربتي خلاص بيت مش قارده اتنفس حتي النهارده وانا في الشارع دموعي نزلت ومش حسيت غير واحده بتمسح دموعي وبتقولي مالك قولتلها مفيش ياطنط قالتلي ربنا معاكي ودعتلي يااااااااااااااااه احساس مؤلم اوي بعد اما كان دموعي مش في حد بيشوفها الا انا

بعد اما كاان قلبي في ايدي ومحدش قدر يحل عليه ابقي بالحال ده

مش هقول غير ياااااااااااااارب انا محتجالك

بعبعه يقول...

اعترفات ايه الجو ده ينفع كده ؟؟؟

عياط وبتاع

طيب يا ستى انا هاجيبلك مليون واحده هنا تقولك انها حبت والحب عجبها وما جرحهاش

يمكن زعلت يمكن اتألمت يمكن تعبت لكن ما ندمتش وما انجرحتش

ولا عمرها قالت يا ميت ندامه على الى حب ولا طالش

وانا اول واحده فى الصف ده اوووووووك

يلا ياعم روحي حبي بقى ولو عايزه قصة حياتي انا موافقه اقولهالك بالتفصيل الممل

اعترافات هانم يقول...

خلاص يابعبه مبقاش ينفع احب

ربنا يوفقك يارب وياريت يبقي في كتير اتوفقوا في حبهم

بس صدقيني اللي جوايا كتير

هقوم بقي انام

بعبعه يقول...

محمد فراج

كل سنه وحضرتك طيب ونورت

بعبعه يقول...

حبيبه اعترافات عارفه البلوج كله ما تحطيش فى بالك وانتى تنورينا دايما

فارس القمر يقول...

ابعبع براحتى

بحب وبكيفى

بحبك وبراحتى

بحب وهوايتى

احلى حاجه فى الدنيا انك تحب واحدة

تقدرك وتحترمك فى غيابك وحضورك

الحب افعال لاكلمات

خطيبتى نورتلى حاجات كتير كانت غايبه

عنى وانا اكن ليها كل احترام وتقدير

والحمد لله ارتباط وثائقى زى مابيقولوا

قدامنا فترة على جوازنا قليله

والكل معزوم فى البعبعه

بعبعه يقول...

فارس القمر

ربنا يهنيكم ببعض يارب ويكرمك وندر عليا يا اخويا نعملكم هنا فرح ما شافوش البلوجر قبل كده

بس هاجي اتعشى معاكم

ربنا يتملكم على خير ان شاء الله