الثلاثاء، 20 يناير 2009

موضوع شائك جدا

ايه ده يا اعترافات مش البلوج ده انا سبتهولك على ما افضاله ولا ايه كده بتنفضي للبلوج وتنفضيلى طيييييييب مخصوم منك يومين يا اعترافات ههههههههههههههههه
مش معقول كده نقفل باب البعبعه ونقعد بقى وبلاها بعبعه لا طبعا كلا البت
شوفوا بقى يا جماعه هاندخل فى الموضوع على طول لانه موضوع شائك جدا جدا جدا
واي حد هايقولي بم فى التعليقات هاقفل التعليقات واسيبكم كده من متغاظين ومش عارفه تبعبعوا
واقعد انا لوحدي بقى ابعبع براحتي .
المهم طبعا حيث ان احنا مدونة البعبعه الاولى فى التاريخ وحيث اننا شعب شرقي متحفظ جدا فى ناحيه ما حدش بيحب يتكلم فيها وحتى ولا احيانا ولا يفكر فيها
وهى الحياه الجنسيه
طبعا مش ه اكذب عليكم واقولكم جالي خمسين اميل ولا حاجه لا هما عشرين بس هههههههههههههههه
لا لا اصلا تقريبا ما حدش بيفتكر موضوع الاميل بتاع بعبعه الى فيما ندر وانا كمان بصراحه مشغوله بافتحه بالعافيه
ام هند يعنى جالي اميلين كده من فتره مش عارفه يضحكوا ولا يبكوا
على كمان كام شكوى كده بؤيؤي من الذاكره يعنى لها صله بالموضوع برضه يلا بقى عشان نسمع البعبعه
اولا صديق البرنامج نمبر وان بيقول
انا بقالي 4 سنين متجوز مش عارف دول كتير ولا قليل لكن بصراحه انا مش سعيد مراتي طيبه وحنيه وست بيت وام وانا حاسس انها بتحبني وانا كمان والله باحبها بسسسسسسسسسس
مش عارف ما باحسش معاها باي حاجه اثناء العلاقه الزوجيه الخاصه . انا نفسي تتفاعل معايا احس انها مستمتعه وعايزاني زي ما انا عايزها محتجالي زي ما انا محتاجها .
انا مره جربت ابعد عنها فتره طويله وقلت يمكن اوحشها لكن برضه ولا فرق يمكن هى مريضه وعايزه تتعالج ؟؟
يمكن مش بتحبني وانا الى مش فاهم ؟؟
وساعات لما اطلب منها حاجه او اعمل حاجه جديده باحس منها بنفور جامد او هروب مش عارف .
انا تعبان ومضايق وحاسس انى عجزت
مشاعري واحساسي عجزوا
بقيت حاسس انى باقضي واجب او باتخلص من حمل وبس
تفتكروا هى الحياه كده اصلا وان بعد اول سنه جواز خلاص المتعه بتخلص زي ما ناس قالولي قبل كده ؟؟
بس لا اكيد لا .
اعمل ايه انا مش عايز اسيبها ولا اظلمها ولا اسيب ولادي
ياريت حد يقدر يفيدنى .
الحكايه التانيه بقى من ذاكرتي بس عشان تعرفوا الجانب الاخر للموضوع :
صاحبة الشكوى الى هي صديقة البرنامج نمبر تو بتقول :
أنا متجوزه من 7 سنين . خلفت وحياتي مستقره بس انا حاسه ان جوزي بيبعد عني او انا بقيت حاجه مش مهم فى حياته زيي زي اي حاجه فى البيت ممكن يستغنى عنها .
مش عارفه ليه؟؟؟ انا باحبه اه بس كمان انا حاسه انى حياتي بقت ممله ومش عارفه اغير الاحساس ده ازاي .
يمكن الناس كلها عايشين كده لكن ساعات باحس انه هو كمان مش راضي عن حياته ولا عني
ومره قالي انتى بقيتى زي الطبيخ البايت مالكيش طعم . هو كان بيهزر بس انا حسيتها طالعه من قلبه
مش عارفه اعمل ايه
ساعات يتهيئلي نفسي اجري اجري اجري والعب زي العيال بس مش عارفه اعمل كده برضه
ولما سألتها عن العلاقه الزوجيه قالت :
عاديه . انا بصراحه كنت فاكره انها حاجه اجمل من كده . لكن انا تقريبا مش باحس بحاجه اوي خلال العلاقه نفسها يمكن الي قبلها بيعجبني اكتر . لكن حتى دي بقيت احس انه بيعملها من غير نفس .
تصوري انا ساعات باشك انه متجوز عليا ؟؟؟ والشيطان بقى يلعب بدماغي وفىالغالب باصطادله اي حاجه وتبقى خناقه ويترجمها هو انها غيره مجنونه .
بس تعرفي انا زمان كنت باتحرج اوي من العلاقه الخاصه دي وكنت كمان باهرب منها من كتر ا لاحراج ولحد الان انا ما باقدرش اتكلم معاه فى كل حاجه حتى ولا قادره اتكلم معاكي دلوقتي
بس هو كان له حاجات غريبه . عارفه اول الجواز كان هايموت عشان اقعد على رجله بس انا ما كنتش بارضى . كنت باتكسف
مش عارفه تفتكري انا السبب انه بعد عني ؟؟؟ اعمل ايه ؟؟ انا حاسه ان انا كبرت وعمري هايخلص مني وانا عايشه فى خنقه وكتمة نفس
نفسي اصرخ اضحك اجري اعمل اي حااااااااااااجه اعمل ايه ؟؟؟
طبعا انا هاسيب الموضوع من غير تعليق مني لكن هاعلق معاكم تحت فى الردود عشان يمكن استخبى وانا باتكلم هههههههههههههههههههههههههه
اي هبل وابتذال وسخافه ممنوع

هناك 10 تعليقات:

عمرو يقول...

صديق البرنامج نمبر وان (أكيد ماتقربش لهايبر وان)
يعنى يا صديقنا بقالك 4 سنين بس فى دنيا الزواج و بتشتكى !! أمال اللى بقاله ما يقارب التأبيده و بحسن سير و سلوك يعمل أيه
بص يا سيدى ..
أعتقد و الله أعلم أن مشكلتك ليست مشكله خاصه بالمره و لكنها مشكله عامه يعانى منها السواد الأعظم من الأزواج
لييييييه ؟؟
السيده المصريه بطبيعتها خجوله للغايه أمام العلاقه الحميمه و ده مرجعه للنشأه الاٍجتماعيه اللى فيها مصطلح قلة أدب يعنى و يساوى العمليه الجنسيه فيبقى ده ترسب فى ذهن الزوجه و لا فائده من محاولة تغيير هذا الاٍرتباط و المفهوم
كمان
قالوا اٍن ختان الاٍناث بيسبب نوع من البرود الجنسى للمرأه و فى رأيى المتواضع أن هذا الكلام غير صحيح بشكل تام يعنى يمكن الختان له تأثير و لكنه ليس بهذه القوه و السطوه لأن ثبت علميا أن المناطق المثيره فى جسد الأنثى تتوزع على العديد من الأماكن البعيده تماما عن منطقة الختان اللى لها علميا نصيب ضئيل للغايه فى اٍثارة المرأه و أيضا الاٍثاره تنبع أولا من العقل و من مراكز الحث الجنسى بالمخ و لا تبدأ من أى مكان آخر
هنا بقى تكمن الشطاره و المهاره بين الطرفين للتجاوب و الوصول لنقطة الرضا على ممارسة العمليه الجنسيه
بس برضو خد بالك أن الزوجه ممكن تكون بتشعر بتجاوب و لذه عميقه و لكنها برضو بتخجل من اٍظهار ده للزوج لحسن يقول عليها قليلة الأدب و لا حاجه بعكس مثلا بائعات الهوى اللى هى دى شغلتهم و اللى بيبرعوا فى اٍرضاء العميل ما وسعهم لذلك سبيلا و بيتفننوا فى اٍظهار تمتعهم و غالبا بتكون مشاعر مزيفه الغرض منها فقط اٍرضاء كيس الجوافه اللى هو العميل
حبيبى اٍرضى بزوجتك كما هى و حاول تخرج بها عن دايرة الروتين و خللى العمليه الجنسيه الميكانيكيه دى آخر حاجه بعد الملاطفه و اٍظهار الحب و الحنان و الدلع و شويه شويه حتلاقيها فكت و تجاوبت معاك
و لا تنسى قول الله عز و جل (( و قدموا لأنفسكم )) اٍفهم معنى هذه الآيه المعجزه و نفذها و حتدعيلى اٍن شاء الله
و كمان أوعى عينك تنظر للحرام و لا تبتغى وراء ما أحله لك الله علشان وقعتك ماتبقاش سوده و ترجع تقول يا ريت
أهو الخميس بعد بكره أهو أما نشوف :))

عمرو يقول...

صديقة البرنامج نمبر وان
يعنى فيها أيه لما تقعدى على رجله ؟؟
دى فيها أيه دى ؟؟
عارفه أنتى الحاجات الصغيره دى بتفرق مع الزوج جدا
يعنى فيها أيه عاوز أفهم أنا لما تقعدى على رجل جوزك شويه ؟؟ ما هو أنتى ما قعدتيش على رجله حيلاقى بره البيت كتير أوى مستعدين يقعدوا على رجله و يقعدوا كمان على ... رجله برضو
و بعدين يا وزجه عدم تمتعك بالعلاقه الحميمه مع زوجك أكيد له أسباب ليه مش بتحاولى تدورى عليها ؟؟
و باٍعترافك أنك بتستمعى أكتر بالملاطفه اللى بتسبق العمليه الجنسيه يعنى الراجل عداه العيب أهو و قزح و بيقدم لنفسه و بيحاول يسعدك يعنى مش أنانى و باين عليه حريف زواج يعنى
بس يمكن الملاطفه دى بتزيد شويه عن حدها فبتوصلى لل orgasm بدون اٍستكمال الحمله و بالتالى بتشعرى بالاٍشباع و لكنه اٍشباع غير مكتمل و ناقص و غير ممتع ليكى
حاولوا تعملوا كنترول شويه على الملاطفات علشان الحمله تتم بسلامه و قالك زمان سلامه فى خير و خير فى سلامه :)
فيه حاجه المثل ده يا بعبعه ؟؟

غير معرف يقول...

بالنسبه لصديق البرنامج نبر وان

زي ما قالك عمرو كده الست المصريه فعلا خجوله اوي فى الناحيه دي لكن انا اختلف مع عمرو فى جزئية انت ترضى بها كما هى ولا فائده من محاولة ا لتغير

اطلااااقا يا عمرو ما حدش قال ابدا نسيب الجرح ياكل فى جسد المجتمع ونقول ما كل الناس كده لازم من علاج ولو جزئي اهو جزء على جزء فى الاخر يساوي الكل او السواد الاعظم الى اتكلمت عنه

اقترح عليك يا نبر وان انك تتكلم مع مراتك تحاول تكسر الحاجز الى بينكم صدقنى الحكايه محتاجه طولة بال شويه لكن مش محتاجه منك غير دماغ حلوه بس

اولا خليك رومانسي نتفه صغيره على راي الشوام .مش باقولك اقف غني تحت البلكونه انما مافيهاش حاجه لما تشيلا يدها تبوسها بحنيه من غير ما تكون عايز تجامعها

وكمان حاول تتكلم معاها انت خبراتك متخلفه عنها خااااالص حاول ت نقلها خبراتك من فضلك

مش معنى كده انك تفرجها على افلام ثقافيه لكن احكي لها اي حكايه هزر معاها كأنها واحد صاحبك بس خلي بالك بينك وبينها حاجز من ناحيتك عمره 4 سنين ومن ناحيتها عمرها كله والله

والختان ممكن يكون عامل بس مش مؤثر للدرجه دي خصوصا عندنا فى مصر

من فضلك خلي مراتك صديقتك اولا

غير معرف يقول...

بالنسبه لصديقة البرنامج نبر تووو

يا ست الكل لما تكوني عامله تورته والتورته مش عاجباكي لو ما عرفتيش طلعت وحشه ليه يبقى عمرك ما هاطلعيها وحشه

دى حياتك بقت ممله وجافه ومتعبه ليه ؟؟؟

شوفي انتى عملتي ايه غلط

ولاحظي جديا ان العلاقه الجنسيه نجاحها هى نجاح العلاقه الزوجيه عموما

ودي حكمة ربنا والله لان التلاحم الجسدي الكائن فى العمليه الجنسيه من شأنه تذويب ا لجليد بين الطرفين وصهرهم فعلا مع بعض

حاول تتكلمي مع جوزك اتكلمي كتير كتير اوي
الكلام بيشيل الحواجز والله وما تصديهوش

وما تقعدي على رجله يا اختي على راي عمرو ايه الغتاته دي حد يلاقي مرجيحه ولا يتمرجحش هههههههههههههههه

يا بنتى الرجاله مخها فى الحاجات دي صغير اوووووووي

الستات مش كلهم طبعا انما الاغلبيه اخرهم شافوا فاتن حمامه بتبوس عمر الشريف فى فيلم صراع فى المينا هههههههههههههههههههه
انما الرجاله بالصلاه على النبي دايسين كل افلام السيكو سيكو على جميع صنوفها واشكالها وجنسياتها وامراضها

ومطلوب من الست بقى الى عمرها ما شافت غير قط بيجري ورا قطه انها تعمل زي الستات الي هو شافهم فى الافلام دي كلها

ازاي وهى اصلا منذ نعومة اظافرها عيب تفكر تحب وعيب تفكر فى الجنس وعيب تتكلم وعيب تفهم وعيب تعيش باين فى الاخر

لما يطلب منك حاجه تعمليها اعرفي انها حاجه هبله نفسه يعملها طول عمره ويمكن لما يعملها يلاقيها مش حلوه اوي زي ما تخيل

ما تحريمهوش من احلامه من فضلك عشان الاحلام لما بتموت بتموت حاجات كتير

اتكلموا اتكلموا اتكلموا ارغوا احكوا عن احلامكم زمان عن مراهقتكم عن مخاوفكم

قولي بتخافي من ايه وقولي بتحبي ايه وقولي بتضايقى من ايه فى العلاقه

قوس قزح يقول...

الموضوع ده من المواضيع اللى مجرد الكلام فيها الناس بتشوفه جراءة زايدة و يمكن قلة ادب
مع انه جزء مهم جدا من الحياة الزوجية
و فى اعتقادى ان الجزء ده بيكون من اهم الاسباب لفشل الزواج او نجاحه

بالنسبة للمشكلتين هنا
انا شايفة ان الطرفين غلطانين .. يعنى اللى بيشكى من الطرف التانى انه غير متجاوب معاه او انه مش عارف يسعده.. ليه مفكرش يحاول يتكلم مع الطرف التانى
هنا بيظهر ان المشكلة مزدوجة .. يعنى صاحب المشكلة نفسه عنده مشكلة فى انه يعبر عن نفسه مع شريكه و يقوله هو بيحب ايه و بيضايق من ايه
فبالتالى مينفعش يلوم على الشريك لانه ممكن اوى يكون مش فاهم ولا عارف ان التانى مضايق و يكون فاهم انه راضى

الامور دى لازم تتحل بالحوار بين الطرفين و بدون كسوف و بدون قيود
و مفيهاش حاجة ابدا ان الواحد يكون مش عارف و شريكه يعلمه و يفهمه

و فى نفس الوقت مينفعش يكون فى اطراف تانية هى اللى تحل بينهم

المجتمع دلوقتى بقى غير زمان و بقى فى وسائل كتير يقدر اى حد من خلالها يعرف ازاى يتمتع بالجانب الجنسى فى حياته الزوجية بدون ما يستشير حد من اصحابه اللى فى الغالب بيعملوا انهم اكتر ناس فاهمة فى الدنيا و يترسموا عليه و هم فى الاخر زيه و يمكن انيل منه

لو كل طرف جرب يحاول بجد يصلح الامور هتكون النتيجة فى صالحه حتى لو الطرف التانى بين ان رد فعله عكس كده
بس اكيد هيفكر فى الكلام لما يكون لوحده و يحاول يتغير

و ربنا يسعد الجميع
تحياتى

بعبعه يقول...

انا جيت يا قوم

شوفوا بقى الكلام الى انتم قولته تمام التمام وانا من موقعي هذا هابصملكم عليه بالعشره

بس انا هاعمل عداد من الى بيطلع اسم الي يدخل يا وحشيييييين

عشان كل حد فيكم يدخل هنا اشوفه

عشان فى ناس كتير كتير دخلت هنا وما علقتش ولا عبرتني وشايفااااااكم وعارفاكم

يا خوافين يا جبنا يا ........ بلاش بقى زي بعضه المهم تكونوا قريتوا واستفدتوا

بعبعه يقول...

عمرو

دايما كلامك فى الجون

وعادي سلامه مافيهوش حاجه المثل هههههههههههههههه

بعبعه يقول...

خيال موافقاكي على كل الى قلتيه تقريبا

حتى بالنسبه لردك على عمرو ابدا مافيش حاجه اسمها ما خلاص طول ما فينا نفس لسه فى حاجات كتير ممكن نعملها

واتفق وبشده مع مبدأ الكلام والنقاش

بعبعه يقول...

قوس قزح

عجبتني اوي حته انه بعد شويه وبينه وبين نفسه هايفكر ويتغير دي لانها فعلا بتحصل

قد يكون الظاهر انه ما قبلش كلام الطرف التاني الا انه فعلا بيجيب نتيجه الكلام لا تياسوا

وكمان طبعا اتفق معاكي اننا مجتمع خايب وبنستخبى ونردم على المشاكل عشان ما نتكلمش فيها خصوصا المشاكل المتعلقه بالحياه الجنسيه

مع ان القرآن والسنه اتكلموا فيها احسن مننا

تحياتي لكم ونورتوا

ستيتة يقول...
أزال المؤلف هذا التعليق.