الثلاثاء، 9 يونيو، 2009

جلسة ما قبل البلوغ للصبيان ..

مرحلة البلوغ عند الصبيان .. أهم و أصعب مرحله فى حياة الرجل .. فيها بتتفتح قدام عينيه أبواب كثيره منها ما هو معلوم لديه و منها ما هو مبهم و أكثرها بيظل مغلق و لا يقدر عقله الصغير على فهمها وحده ..
فى مرحلة البلوغ عند الصبيان كما يتشكل جسده و أعضاءه الظاهره و الغير ظاهره بشكل جديد قد يبدو مفزعا لديه بتتشكل أيضا نفسيته و وجدانه اللى بيظل ملازم له طول حياته .. فاٍما أن يكون رجل سليم جسديا و نفسيا قادر على اٍسعاد نفسه و الآخرين و اٍما أن يكون اٍنسان مشوه نفسيا و ربما جسديا يتعس نفسه و من حوله ..
فى البوست ده حأتكلم عن جلسة ما قبل البلوغ للصبيان و اللى ربما تكاد تكون متشابهه لحد كبير مع جلسة ما قبل البلوغ للبنات اللى كتبته ببراعه أختنا الفاضله بعبعه و لكن تختلف فى تفاصيلها و ربما تكون أكثر تعقيدا و الله المستعان ..
بداية كده سن البلوغ بيختلف من طفل لآخر تبعا لعوامل كثيره منها ما هو شخصى و منها ما هو بيئى .. يعنى بتتدخل هنا عوامل الوراثه و البيئه الطبيعيه .. يعنى مثلا الطفل الصعيدى اللى بيعيش فى بيئه حاره المفترض أنه بيبلغ قبل الطفل السويدى أو الدانمركى اللى عايشين فى تلاجه .. و المتفق عليه أن سن البلوغ عند الأطفال المصريين بيبدأ من 9 سنوات ل 11 سنه و فى حالات نادره قد يتأخر حتى سن 16 سنه ..
من الأفضل طبعا أن يقوم الأب نفسه بجلسة ما قبل البلوغ مع الأبن .. فاٍن لم يوجد فممكن الأخ الأكبر أو الأم عند الضروره .. و خدوا بالكم أنه الأصح أننا مانستناش الأبن لما يبلغ و نقوله تعالى بقى لما أفهمك .. لأ .. الأفضل طبعا أنه يتفهم و هو على وشك الدخول من بوابة البلوغ مباشرة حتى لا نتركه فريسه سهله لأفكاره المتخبطه و مخاوفه بل و لأصدقائه و رفاقه اللى أتوقع أنهم لا يقلوا جهلا عنه ..
طيب حنعرف اٍزاى أن الولد ده قارب أو شارف على أن يكون رجلا ؟؟
نلاحظ بعينينا التغيرات اللى بدأت تظهر عليه ..
نبدأ الملاحظه من سن 9 سنوات مثلا ..
حنلاحظ قبل البلوغ مباشرة أن أيديه و رجليه أبتدوا يكبروا شويه زياده عن المألوف .. و أن جسده بدأ يزداد طولا .. و أكتافه بدأت تزداد عرضا .. و أن وزنه بدأ فى الزياده .. و فى أحيان كثيره حنلاحظ أن واحدا من ثدييه بدأ فى أن يكون أكبر حجما من الآخر مع شىء من الألم و لكن بتزول هذه الأعراض بعد فتره ..
كمان العضلات بتنمو و بتتضخم و ناخد بالنا أننا ما نشجعش الطفل فى السن ده على حمل أشياء ثقيله ..
بنلاحظ كمان أن صوته بدأ بتغير و بيصبح أكثر عمقا و غلظه .. و أحيانا نلاقيه بيجحش بصوته من غير ما يقصد لأنه مش قادر يتحكم فى أحباله الصوتيه و ما طرأ عليها من تغير فلازم نتفهم ده ..
غير طبعا شعر الشارب و العانه اللى بيبدأ فى الظهور و كمان أعضاءه التناسليه اللى بتبدأ فى الكبر ..
هنا بقى بنتأكد أن الطفل أصبح على بداية الدخول لعالم الرجوله الذهبى بمخاوفه و غموضه و سطوته أيضا ..
أنصح الأهل بالتعامل مع الطفل بشكل جاد و أن لا تكون هذه الجلسه معاه جلسة هزار و تهريج بل الأفضل اٍشعاره بالجديه التامه بدون تجهم حتى يشعر الطفل بأهمية الموضوع و بأنه يكاد يكون رجلا بجد مش تمثيل عليه ..
أولا حنشرح له بشكل مبسط جدا أيه اللى بيحصل له من تغبرات جسديه و نفسيه .. و أن التغير فى الهرمونات بداخله هى المسئوله عن هذه التغيرات الشكليه و السلوكيه اللى بتنتابه ..
شويه شويه حنبتدى نشرح للولد أيه هو الجهاز التناسلى الذكرى بدون الدخول فى تفاصيل معقده و أسماء صعبه على فهمه .. و ممكن نستعين بالشكل المبسط ده للجهاز التناسلى الذكرى :


ناخد بالنا أن الطفل فى المرحله دى مش مطلوب منه أوى أنه يفهم و يستوعب آلية عمل الجهاز التناسلى و الأعضاء الأخرى المعاونه بالتفصيل الممل .. و لكن يكفى فى هذه المرحله تفهيمه أن جهازه التناسلى الظاهر قدام عينيه هو :
- القضيب : و ده عضو اٍسفنجى مش عضلى زى ما كتير فاهمين .. و وظيفته الاٍنتصاب لحدوث العمليه الجنسيه و نقل الحيوانات المنويه لداخل جسد المرأه و كمان لنقل البول خارج الجسم .. هنا بقى دى فرصه كويسه علشان نشرح للطفل أيه هو الاٍنتصاب ؟؟ و أنه بيتم نتيجة أوامر بتصدر من المخ لضخ كميات كبيره من الدم للقضيب ليحدث الاٍنتصاب تمهيدا لممارسة العلاقه الطبيعيه بين الرجل و المرأه .. بنفهم الشاب الصغير أن هذا الاٍنتصاب قد يكون اٍراديا بسبب الملامسه بيده لهذه المنطقه أو لااٍراديا غالبا عند الاٍستيقاظ من النوم .. أو ممكن بسبب رؤية أشياء مثيره جنسيا أو حتى من اٍهتزاز السياره أو ركوب الدراجه ..
ماننساش نطمئن الطفل أن الاٍنتصاب اللى هو بيكون مفاجئه له لما بيلاقى عضوه الذكرى قد تضخم و أصبح صلبا ليصبح شكله و حجمه مختلف عن ما عهده أمر طبيعى بل و صحى .. و مش لازم نلخم دماغه الصغيره بكيفية حدوث الاٍنتصاب تشريحيا لكن يكفى الشرح المبسط ..
أهم شىء فى رأيى أننا كمان نطمئن الطفل أنه ممكن يجد فى يوم عند الاٍستيقاظ صباحا سائل لزج له رائحه مميزه فى ملابسه الداخليه .. ما تتخضش و ما تنكسفش و ده برضو شىء طبيعى و ده اٍسمه السائل المنوى و اللى حصل لك ده اٍسمه الاٍحتلام و لازم بعدها تستحمى و تتطهر ..
ده بيكون مدخل لتفهيمه ما هو السائل المنوى و بييجى منين و بيروح فين و أيه فايدته ؟؟
- الخصيتين : زى ما أنت شايف فى الصوره جهازك التناسلى الذكورى الظاهر للعين بيتكون من 3 حاجات .. القضيب و شرحناه و الخصيتين ..
الخصيتين هم المسئولين عن اٍنتاج الحيوانات المنويه .. و أيضا هرمون الذكوره ( التيستسترون ) .. بنفهم الطفل أن الحيوان المنوى هو ما يضعه الرجل داخل جسد الأنثى ليتحد مع البويضه الأنثويه و يعملوا بيبى بتغذيه فى بطنها من دمها لمدة 9 شهور ثم يخرج للحياه ..
بنشرح للطفل شكل الحيوان المنوى و ممكن برضو نستعين بالصوره دى للحيوان المنوى الذكرى :
بنفهم الطفل أن عملية وضع الحيوان المنوى داخل الأنثى لابد أن يتم فى اٍطار شرعى اللى هو الزواج .. و أنه لا يجوز أبدا العمل بغير ذلك لأن ده بيخالف أوامر الله و تقاليدنا كشرقيين .. و أن من كل 100 ل 300 مليون حيوان منوى واحد فيهم فقط هو اللى بينجح فى الوصول للبويضه و بيكونوا الجنين ..
ممكن فى النقطه دى برضو نستعين بالصوره العبقريه دى لشرح فكرة توصيل الحيوان المنوى للبويضه :

أرجوكم بلاش نخوف الطفل فى المرحله المبكره دى و نفزعه و نحط قدام عينيه محظورات كتيره و بلاوى هو لسه عقله مش قدها ..
بلاش نرعبه من العاده السريه و نفهمه حاجات مش صح زى أنها حتلحس عينيه و حتعميه و حتبهدله و حتجننه و حاجات من دى أو زى ما قال أرسطو اٍن السائل المنوى بيحمل معه عصارة المخ :) و ده طبعا كلام مش صح.. لكن ممكن نفهمه أضرارها المستقبليه فى حالة الاٍفراط فيها .. و نفهمه كمان أنها مش ضروريه بالمره و أنه لو أستغنى عنها كلما شعر بحاجته ليها حيحتلم بشكل طبيعى و لن يشعر بحاجته الملحه للقذف لما حيبلغ أو اٍذا كان فعلا بلغ ..
بنحذر الطفل و بنأكد التحذير ده شويتين تلاته من أنه يستجيب لحد من رفاقه أنهم يستكشفوا أجساد بعض .. أو أنهم يحاولوا أن يتلامسوا أو تكون بينهم ممارسات جنسيه و لو كانت سطحيه و ساذجه و طفوليه و بنشرح له الأسباب من الوازع الدينى و الاٍجتماعى و الصحى .. و بلاش حكاية أن البوبو بتاعتك حتولع و تطلع نار لو حد لمسك فيها لأن الطفل مش ساذج و مش متخلف و حيستهزأ بكلامنا لو قلنا له كده.. بنفهمه كويس أوى أن منطقة الشرج خارج نطاق الأعضاء الجنسيه تماما .. بل أن لها وظيفه واحده محدده و هى الاٍخراج .. و أنه ما يحاولش أبدا يستكشفها بدافع الفضول باٍدخال أى أجسام صلبه و لا حتى أصبعه لأن ده ممكن يسبب له شىء من اللذه فى حالة وصوله لغدة البروستاتا فبترتبط عنده بالحصول على اللذه عن طريق هذه المنطقه ..
بنوصى الطفل يكون حريص على منطقة أعضاءه الذكوريه أثناء لعب الكره و أن يبتعد عن الشجار مع الأولاد و أن يحرص بشده على أن لا تصطدم هذه المنطقه بأشياء صلبه أو أن تتعرض لخبطات أو صدمات ..
بنوعى الرجل الصغير أنه يتجنب الاٍلتصاق بأجساد البنات فى الأماكن المزدحمه متعمد أو غير متعمد لأنه ده بيتنافى مع الدين و القيم و الأخلاق بخلاف أنه بيسبب له اٍنتصاب بيكون مؤلم لو لم يتم القذف ..
و طبعا النظافه الشخصيه أمر مفروغ منه و تعليمه كيفية الاٍستبراء و التطهر بدون خجل ..
و كل ده لا يمنع برضو من أن الرجل الصغير لازال يحتاج لعشرميت عين عليه حتى نقدر على الأخذ بيده و مساعدته على عبور هذه المرحله الرهيبه الخطيره و الخروج منها سليم اٍن شاء الله .. سليم نفسيا و جسديا و وجدانيا ..
نتابعه مع مجتمعه الصغير .. نتابع أصحابه و نتفحص أشكالهم و اللى نشك فيه و لو مجرد شك نبعده عنه فورا و لكن بالسياسه و بصنعة لطافه مش بالعنف و الاٍذلال .. نتابع جهاز الكمبيوتر بتاعه و موبايله و ده مش تجسس و مش عيب لأن عيالنا حته مننا و من لحمنا و حنتسأل عنهم يوم القيامه ..
نعمل حملات تفتيش مفاجئه على دواليبهم و مكتبهم و كتبهم فى غير وجودهم و من غير ما يحسوا و نشوف لو فيه ممنوعات مخبينها و مش لازم نواجههم بكشفنا لممنوعاتهم علشان مايفقدوش الثقه اللى بينا لكن ممكن جدا نعالج أخطائهم الصغيره و نوجههم للصح من غير ما نشعرهم ..
نوصى الأم أنها تلاحظ الملابس الداخليه للصغير قبل وضعها فى الغساله و لو تكرر ظهور اٍفرازات منويه عليها يبقى كويس و علامه جيده لأنه بيفرغ طاقته فى الاٍحتلام و لكن لو أختفت هذه العلامه حنعرف أن الوله بيفرط فى ممارسة العاده السريه فنلحقه قبل ما ينغمس فيها ..
بجد لو المراهق أطمأن للأب أو الأم حيبقى سره معاهم مش مع أصحابه الجهله .. و مش حيستقى معلوماته غير منهم مش عن طريق النت بمواقعه الفاضحه و لا الفضائيات بكليباتها الأفضح ..
الثقه هى عماد العلاقه بين الأبن و الأب لو تعامل معه أنه رجل بس يراعى أن مداركه لسه لم تتفتح تماما ..
دى جلسة قبل البلوغ و كيفيتها على حسب فهمى و على حسب خبرتى مع ولدين عديت بيهم و لله الحمد فترة البلوغ و المراهقه بدون خسائر تذكر .. و أزعم أنه فيه جلسه تانيه مع المراهق بس لما يكبر شويتين و تبدأ شخصيته الحقيقيه فى التكون .. و يبدأ يتنح لبنت الجيران ..
متشكر لكم و تقبلوا تحياتى ..

هناك 28 تعليقًا:

غير معرف يقول...

طبعا الدراسه قيمه واهم حاجه انها مكتوبه بطريقه علميه مهذبه ومؤدبه

بس احب اضيف ان بعد شويه مع وجود النت والديفي دي والحاجات الخطيره دي
ومع غياب الاب والام في شغلهم وجلوس الابناء علي السواء صبيان وبنات لوحدهم في المنزل دون رقيب وخصوصا في الاجازات

يجب ان يكون هناك قاعده تانيه نعرف فيها البنت والولد ان مشاهدت الحاجات دي بيعمل تبلد واشباع نفسي لما يجي وقت الممارسه الطبيعيه الشرعيه بالزواج بتكون غير سليمه من ناحيه بيتم مقارنة بين ما شاهده في تلك الافلام بالواقع اللي بيكون مخالف طبعانتيجة الخدع التصويريه

وكذلك بيكون الاحساس مختلف نتيجة الممارسه الغير طبيعيه

وانه كده بيحرم نفسه من المتعه الحقيقيه اللي مستنياه في وقتها

وتحميل الولد او البنت المسؤليه بدون تخويف طبعا اهبل

من الناحيه الاجتماعيه والدينيه والنفسيه

سيف الدين اليزل يقول...

الاخت ستيتة
انا كمان حاولت اسكت مقدرتش
مع اني تعبان قوي
احنا بنتكلم علي الانحراف الجنسي عند الاطفال مش بتكلم عن العلاقات الاسرية في البيت في فرق كبير قوي بين زوج بيغازل زوجتة واولادة موجودين وزوج تاني بيمسكها من اماكن حساسة في جزء من الثانية في غفلة الاولاد وانتي فهمة قصدي وزوج تاني اتغدي ودخل يريح شويةالضهر والهانم لازم تدخل تريح جنبة
وتديلو حقة الشرعي كل دة والاولاد
موجودين في البيت انا مش هتكلم من الناحية الدينية علشان دة مش موضوعنا اناهتكلم علي بداية الانحراف الجنسي الاطفال بتسال بعض هو بابا بيعمل اية مع ماما جوة علشان لو مسالش مش هيكون طفل طبيعي علشان كدة
الانحراف الجنسي بيبدا من البيت لو الاب والام قدرو يحافظوا علي العلاقة الاسرية داخل البيت وعلموا اولادهم العيب واللي مش عيب وكانو قدوة مع العلم بان لكل قاعدة شواز زي المثال اللي انتي قلتية واساس القاعدة بيقول
ان لم تستحي فا افعل ما شئت
والسلام علي من اتبع الهدي

ستيته حسب الله الحمش يقول...

استاذ عمرو

تسلم ايدك ويسلم عقلك
الطبيعي ان العاقل لما يعلم الناس مؤكد بتكون تجربته قمة الفائدة للبشرية
والله انا استفدت من البوست جدا جدا ورغم ان ده اسلوبنا ولله الحمد في التعامل مع الجنسين لكن اتخيل ان عفريت العلبة ها يعذب اللي يحاول يفهمه حاجة لأن فضوله لا يقف عند حد معين
وده طبيعي في الصبيان

الحاجة اللي في بيتنا مش بنعرف نعملها ومش تخصصنا خالص حكاية التفتيش في حاجة العيال
اما البنت فربنا الحمد لله جابر خاطرنا فيها جدا لكن سي الأستاذ عفرتو مش عارفة ها نعرف نغير جينتنا ونعمل رقابة والا ها نعتمد نفس اسلوبنا مع اخته
ربنا يهديه من غير ما نغير اسلوبنا لأن صعب فعلا نغير طبعنا في السن ده

برضه عاوزة حضرتك ومن واقع تجربتك الشخصية مع ولادك ربنا يبارك لك فيهم تكمل مراحل النضوج اللي على ما بتخلص بيكون الأهل شابوا

وربنا يبارك لنا في عيالنا اللي ربيناهم بالحلال وطلع عينا عليهم

ربنا يكرمك وشكرا
تحياتي

ستيته حسب الله الحمش يقول...

الأخ سيف الدين

معلش وحياة طنط ظاظا انا مفهمتش اصل ذكائي محدود

مفهمتش انت بتكرر التعليق ليه علشان مصمم على رد حاضر ده انت تؤمر

مفهمتش يعني ايه بابا وماما دخلوا يريحوا وتديه حقه الشرعي
حاضر نبقى ندي بابا زيت خروع وماما كمان علشان بلاش قلة حياء
او ننزل العيال في الشارع علشان العيال تبقى متربية صح والبابا والماما يمارسوا حياتهم الطبيعية

مفهمتش لو ولادك سألوك يعني انت وماما خلفتونا إزاي ها تبعتهم جوانتانموا وتعمل عزاء على اخلاقيات الزمن الفاسد والا ها تشرح لهم بهدوء

اهم شيء مفهمتوش
لو الاب والام قدرو يحافظوا علي العلاقة الاسرية داخل البيت وعلموا اولادهم العيب
--------------------------
هو ده التوخولوف العقلي اللي كنت اقصده
بابا وماما مش بيعملوا اي شيء عيب خاااااااااااالص
بابا وماما بيحبوا بعض لأن اي اتنين متجوزين بيحبوا بعض وساعات بيختلفوا ويتخانقوا لكن هم بيحبوا بعض

اللي بين بابا وماما مش عيب يا حبيبي ربنا يهديك ده صح الصح

كونك "ده لو كنت متجوز" شايف أن حب الأب والأم عورة فالله يرحمها جدتي كان ده وجهة نظرها برضه لو جدي جه يبوسها قدامنا

ان لم تستحي فا افعل ما شئت
والسلام علي من اتبع الهدي
------------------------------

ولو كان حياءك مرضيا برضه ندعي ونقول ربنا يشفي


بالمناسبة في أكثر المجتمعات انغلاقا وتنطع بأقوال الدين معروف احصائيا الآتي
عندهم اكتر نسبة شذوذ جنسي
عندهم اعلة نسبة زنا محارم
هم اكثر شعب بيستخدم المواقع الإباحية على النت وقنوات التلفزيون لأباحية مدفوعة الأجر

مش كل ما تقفل تبقى سوي
ممكن تقفل كل المنافذ الطبيعية وتخلي البيت زي الحلة البرستو
فينفجر في وجهك بكل من فيه

تحياتي

غير معرف يقول...

سيف الدين وخالتي ستيته

يعني هي حبكت والعيال صاحيه الظهر

وعلي فكره طول عمر الناس عايشه في اسره واحده وماسمعناش عن الشذوذ ده غير بعد ماالعيال فتح عينهم النت والكليبات
الهباب دي

في الاسر الفقيره جدا الاسره كلها عايشه في غرفه واحده

مش فاهمه يعني جت علي اللي بيدخلوا ويقفلوا عليهم الغرفه
واحب اقول للأخ سيف الولد مش محتاج يسأل لاليل والاضهر عشان هو ماشاء الله عارف كل حاجه
ريح نفسك

سيف الدين اليزل يقول...

الاخت ستيتة
مدام هي دية طريقتك في الرد علي المواضيع اللي بنقيشها والتباهي بذكائك والاستخفاف بالراي الاخر
ومهما ماوصلتي من اعلي الدرجات في التعليم كان يجب عليكي الرد دون الاستخفاف من الراي الاخر وانا اسف اني حاولت اتكلم في الموضوع بحكم اني من بيئة شعبية اتربيت وكبرت فيها وعمري ماسمعت عن انحراف جنسي للاطفال فيها علشان كان البيت هوة اللي بيربي
وعلشان ذكرت كلمة عيب في وسط الكلام
اتهمتيني اني متخلف عقليا وانا اضم صوتي لصوتك الله يرحمها جدتك ويجعل ماسواها الجنة
علي فكرة انا كمان كنت بشوف جديتي وهوة جدي بيبوسها وبعد كدة برضوا دة كان راي والدتي عل فكرة انا ولدتي دكتورة وسعتها ادركت معني المثل اللي بيقول
اكفي القدرة علي فوماها تطلع البنت اية ياريت تعرفي تكملي المثل
علي فكرة حيائي دة مش مرض
انا مرضي اخطر واكبر من كدة بكتير
عل فكرة انا كنت عند طنط ظاظا
وبتقلك متحليفيش تاني بحياتي
والسلام علي من اتبع الهدي

MaNoOoSh يقول...

كلام سلس وجميل يا استاذ عمرو

وانا معاك جدا فى ان الام والاب لازم يكونوا هم مصدر ثقة لولادهم ومصدر ثقافتهم الجنسية.. ولو مش عارفين يكلموه يتعلموا

لان الولاد دماغهم بتبقى مليانة تخاريف وكلام غلط جدا من المصادر الغلط اللي بياخدوا منها معلوماتهم بدافع الفضول


وبالنسبة للنقطة اللي ستوتة كانت بتقول عليها
فبيتهيئلي يا ستوتة تربية البنت غير تربية الولد خااااااااااالص

الولد بيحتاج رقابة أكتر من البنت لا فضوله بيبقى جامح قوي.. وكمان دماغة صعب الواحد يستكشف اللي جواها لو هو عايز يخبي حاجة صعب جدااا ان الواحد يعرفها
يعني محتاج شوية رقابة في المواقع اللي بيتصفحها أو في المخابىء السرية مثلا في حجرته.. طبعا بدون ما يشعر وبدون مواجهة
الاهل بيعملوا رقابة علشان يلحقوا اي غلطة قبل ما تتفاقم

Emad_Harrisburg يقول...

Alsalam to all
Very good Mr. Amr all topic is very good, because you already try it by yourself make it real and good advice.
I want here to thank you that is you are a good father bring to community 2 NORMAL men.
Salam to all

بعبعه يقول...

ايه ده فى ايه

اينعم البوست ده بتاع عمرو وانا مستنياه يرد عليكم

بس واحد يعنى


سيف اليزل وستيت عاملين قلق فى الاجواء ليه كده

شوف يا اخ سيف انا اتفق مع ستيته فى الجمله دي

بابا وماما مش بيعملوا اي شيء عيب خاااااااااااالص
بابا وماما بيحبوا بعض لأن اي اتنين متجوزين بيحبوا بعض وساعات بيختلفوا ويتخانقوا لكن هم بيحبوا بعض


اتفق معاها تماماااا


بس احب اقولك يا سيف هى ما تقصدكش انت بكلمة التخلف العقلي معلش دي بتناقش الفكره نفسه والله انا فاهمه ستيته

لكن يا سيف مختلفه معاك فى الجمله دي

وزوج تاني اتغدي ودخل يريح شويةالضهر والهانم لازم تدخل تريح جنبة
وتديلو حقة الشرعي كل دة والاولاد
موجودين في البيت

ايه بقى ؟؟ ايه الغريب فى كده

وكلامك ده ؟

الاطفال بتسال بعض هو بابا بيعمل اية مع ماما جوة


الصغيرين اوي بيقولوا ماما وبابا نايمين ولما يكبروا شويه وحتى عارفين فى ايه جوه مش مشكله ما يعرفوا

لكن برضه مش كل اب وام يتقفل عليهم باب يبقى بيعملوا سيكو سيكو
لا طبعاااااااااااااا

وليه مش عايزنا نناقش الجانب الدينى ؟؟

احنا عندنا فى القرآن بيقول

يا ايها الذين امنوا ليستاذنكم الذين ملكت ايمانكم والذين لم يبلغوا الحلم منكم ثلاث مرات من قبل صلاة الفجر وحين تضعون ثيابكم من الظهيرة ومن بعد صلاة العشاء ثلاث عورات لكم ليس عليكم ولا عليهم جناح بعدهن طوافون عليكم بعضكم على بعض كذلك يبين الله لكم الايات والله عليم حكيم



احب بس احط خط تحت كلمتين فى الايه دي

والذين لم يبلغوا الحلم منكم

وحين تضعون ثيابكم من الظهيرة


ايه رايك كده ؟؟؟

بعد القرآن مافيش ادله عندي من وجهة نظري




اتفق معاك فى حاجه مهمه

في فرق كبير قوي بين زوج بيغازل زوجتة واولادة موجودين وزوج تاني بيمسكها من اماكن حساسة في جزء من الثانية في غفلة الاولاد

معاك حق فى دي كل حاجه لها حدود طبعا قدام الولاد


اختلف معاك تاني
فى الكلام ده :

بحكم اني من بيئة شعبية اتربيت وكبرت فيها وعمري ماسمعت عن انحراف جنسي للاطفال

مافيش اي بيئه على اختلاف المستويات تخلوا من الوضع الى احنا بنتكلم عنه

لانه اساسا مش انحراف بالمعنى المفهوم للانحراف وانما هو مقدمات انحراف

او فكر منحرف وصل لدماغ الطفل بيحاول يعبر عنه

ودورنا احنا بقى اننا نغير الفكر المنحرف ده ونعدله قبل ما يتحول لسلوك منحرف والتبعيه لشخص منحرف كليا

يامحسن بينى وبينى كده عشان خاطري ماتزعلش من ستيته هى برضه اختنا الكبيره حقك عليا انا يا باشا وربنا يتم شفاك على خير ان شاء الله

ولما تنزل مصر هانروح لستيته المكتب ونخليها تعزمنا على كباب وكفته حق عرب


وبس بقى بطلوا خناق

ذو الوجه المبتسم يقول...

السلام عليكم
اولا احب اشكر الاستاذ عمرو على اسلوبه السلس والمبسط للشرح
وان شاء الله تكون الاستفادة من المكتوب اكتر من مجرد قراءة

كمان فيه نقطة
بس مش عاوز حد يزعل
اتمنى ان يكون الرد او التعليق بشكل لبق ولا يحتاج للتصادم او للزعل

سبف وستيتة
خدو الموضوع بصدر رحب شوية
الموضوعات دى بالرغم اننا بنناقشها بشكل اوضح واوسع
لكن اعتقد ان كل واحد فينا فاهم الحاجات دى كويس
ومش محتاج الطرف التانى يوجهه

فعلشان خاطر الست بعبعة والراجل الطيب عمرو
هدو اللامور شوية
يلا بقي ابتسامة حلوة من الطرفين

باكرر شكرى للاستاذ عمرو على البوست
وشكرا لبعبعة على اتاحة الفرصة

تقبلو تحياتى

صبرني يارب يقول...

ما هذا يا قوم

سيف وستيته ؟؟

ايه الى جابك هنا يا سيف

كل ده بيحصل من ورايا فى البلوج ؟؟

يا للهول

ستيته وحياتي يا خالتي بالراحه على سيف ده سيف زي اخويا تمام بالراحه يا خالتي بلاش المطوه معاه والنبى هو مش ناقص

سيف ما تقفش قدام خلتى والنبى يا اخويا احسن دى حبيبتى والله



استاذ عمرو نورت المدونه والبوست بتاعك هاااايل افادكم الله

ولا سيما انى عندي شاب خطير عنده 3 سنين ونص يعنى هانتزنق الزنقه دي يوما

الموضوع جميل والمناقشه جميله ربنا يكرمكم

عمرو يقول...

صباح الخير
أشكر كل المعلقين اللى أبدوا رضاهم عن البوست .. و أعتذر بشده للتأخر فى الرد و المناقشه لظروف اٍنشغالى .. و أعدكم باٍستكمال الحوار بكره اٍن شاء الله ..
تقبلوا خالص تحياتى و تقديرى ..

عمرو يقول...

غير معرف 1
شكرا لاٍطرائك على البوست ..
طبعل القياس لا يجوز على الشواذ .. و الشواذ هنا المقصود بيهم الأهل اللى بيهملوا فى عيالهم و يسيبوهم فريسه لكل المغريات المحيطه بعالم اليوم بدون توعيه و لا تفهيم ..
و المقصود بيهم كمان اللى بيتركوا عيالهم كم مهمل فى البيت بدون رقابه و لا حساب ..
فدول فئتين من الأهالى لا يجوز القياس عليهم ..
لكن الصح هو أن يكون الاٍهتمام الأول للأهل هم عيالهم و مصلحتهم و صحتهم النفسيه و الجسديه ..
و طبعا ملاحظتك عن مشاهدة الأفلام الاٍباحيه و ما تجر وراها من بلاوى مسيحه جديره بكل تقدير و اٍهتمام و ده حنتكلم عنه اٍن شاء الله فى البوستات القادمه ..
أشكرك للزياره و التعليق و تقبل تحياتى ..

عمرو يقول...

ستيته حسب الله الحمش
أشكرك جدا يا دكتوره على اٍعجابك و رضائك عن البوست و ده شرف ليا خاصة أن حضرتك على درجه عاليه من الثقافه و العلم ..
الحقيقه يا دكتوره أنا لا أجد غضاضه فى مراقبة الصبيان و البنات على السواء و التدخل فى عالمهم الخفى و اٍستعمال كل الوسائل و الخيارات لكشف مستورهم و تصحيح أخطاءهم بالرفق و العقل لأنهم أمانه بين أيدينا و تقويمهم سيوفر عليهم و علينا الكثير من المشاق ..
طبعا البنات غير الصبيان و لو أن فى هذا الزمن العجيب ممكن أن تتساوى أخطاء الجنسين لأنهم واقعين تحت ظروف و ضغوط تقريبا متشابهه لكن لا تقيسى نجاح تجربتم مع اٍبنتك - ربنا يبارك لك فيها و يحفظها من كل سوء - مع ما أنتى مقبله عليه مع اٍبنك الشاب الصغير ..
أؤكد لك اٍن الموضوع حيكون مختلف تماما و حتلاقى فى تربية الصبيان أشياء مختلفه تماما عن تربية البنات خاصة لو كان هو أصلا شقى و ذكى شويه :)
بس الحقيقه أنها حتكون مباراه ممتعه للغايه ما بين ذكاء الشاب الصغير و اٍطلاعه و اٍحتكاكه بأحدث وسائل الشقاوه الصبيانيه و ما بين عقلك و حكمتك و سلطتك كأم ..
أشكرك و نورتى حضرتك المدونه و ترقبى البوستات القادمه اٍن شاء الله تكون مفيده ..

عمرو يقول...

مانوش
متشكر ليكى جدا ..
عارفه المشكله الرئيسيه فى تربية الصبيان أيه ؟؟
هى العنف .. اٍستعمال العنف مع الصغير لتقويمه بسبب و بدون سبب .. و تلطيشه و تعنيفه عمال على بطال خوفا عليه من الاٍنحراف ..
مقولة : لا تكن لينا فتعصر و لا يابسا فتكسر مقوله صح جدا و بأحترمها جدا لأنها حقيقى من أفضل الطرق للتعامل مع الصبى فى المرحله دى ..
حنعلمه العيب و الحلال و الحرام و الصح و الغلط و بعدين نشوف هو رد فعله حيكون اٍزاى على مساحة الحريه اللى حندهاله ؟؟ هل حيكون قدها و لا حيستعملها بشكل خاطىء ؟؟
و كده نلحق نصحح له أخطاءه قبل تفاقمها ,,
أشكرك و لك التحيه ..

عمرو يقول...

Emad
أشكرك جدا و الله جزاك الله كل خير ..
و الحمد لله و أرجو فعلا أنى أكون قدرت أخرج للمجتمع رجلين صالحين و لو ده حقيقى يبقى فضل من المولى سبحانه و تعالى ..
أشكرك يا عزيزى و أهلا بيك ..

عمرو يقول...

ذو الوجه المبتسم
أشكرك جدا لأن البوست عجبك و اٍن شاء الله البوستات القادمه تنال رضاك أيضا ..
أشكرك للزياره و التعليق و تقبل خالص تحياتى و تقديرى ..

عمرو يقول...

صبرنى يا رب
متشكر ليكى جدا و اٍن شاء الله البوستات القادمه حتلاقى فيها ما يفيدك مع الشاب الصغير اللى عندك ربنا يقويكى على تربيته و تنشئته تنشئه صالحه ..
شرفتى و أهلا بيكى ..

ঔღঔ نـــوارة ঔღঔ يقول...

بوووست جامد جدا

شرحت نقاط مهمة جدا ولازم نعرفها للتعامل مع الابناء

معظم الاهالي بتتكسف ومش بتشرح اي حاجة للصبي او للبنت ودا غلط طبعا

لانهم بالفترة دي محتاجين اهلهم يقفوا معهم ويشرحوا ليهم كل حاجة باسلوب سلسل ومبسط

ربي يعطيك الف عافيي

وربنا يباركلك عالبوست القيم

بالتوفيق

غير معرف يقول...

انا بحب زوجى جدا جدا وهو وحشنى اوى وكنت متعودة معاة اثناء العلاقة بنقول الفاظ خارجة جدا عشان انا كنت باردة فاضطرينا نجرب كل شىء والحمد لله دلوقتى بقيت انا الى عوزاه على طول مع انه كان فى الاول معدوم الخبرة فبقيت اسال اصحابى المتجوزين واعمل زيهم
ودلوقتى هو مسافر ومش هينزل قبل سنة ومش قادرة على بعده وبفكر امارس العادة السريه فهل دة حلال ولا حرام

بعبعه يقول...

غير معرف

يا حبيبتى ربنا يردهولك بالسلامه


لكن انا ما اقدرش افتيكى هنا ما اقدرش اتحمل مسؤلية فتوى

والعاده السريه اصلا موضوع فيه خلاف فقهي

فى ناس حللتها وناس حرمتها انصحك تقري كتير فى الدين

لكن انصحك لله تعالى حاولي باي شكل تلحقى بجوزك
وان لم يكن فعليك بالصيام فانه لك وجاء ان شاء الله

صومي وصلى واذكري ربنا واستعينى به على حالك

عمرو يقول...

غير معرف
أولا بنشكرك على ثقتك فى أعضاء فريق المدونه و عرضك مشكلتك عليهم ..
ثانيا طبعا رد الأخت الفاضله بعبعه على سؤالك فيه ما يكفى و يزيد و لكن بعد اٍذنها أود أن أدلو بدلوى فى هذا الموضوع الشائك من وجهة نظر تانيه و ده حيفيد الموضوع .. أرجو هذا يعنى ..
بالنسبه للشق الخاص بتبادل الكلام الخارج جدا بين الأزواج : الحقيقه مش شايف أنه فيه غضاضه فى ده بشرط أن يكون بحساب و بأن لا يتمادى الأثنان فيه حتى يصلا لدرجه غير محترمه و قد يقعا فيما يمكن أن يسبب لهما مشاكل كثيره بعد الاٍنتهاء من العمليه الجنسيه حيث يتذكر كل طرف على حده ما قاله الطرف الآخر بهدوء و رويه و يحلله ربما تحليلا خاطئا فتحدث مشاكل لا قبل لأحد بمواجهتها ..
دى حاجه .. الحاجه التانيه أنه برضو يجب الحرص على الحفاظ على حد الاٍحترام المتبادل بينهما بحيث لا يتعدى أحدهما الخط ده فيعتاد اللسان عليه و يصبح أمرا طبيعيا بينهما فتسوء العلاقه و تنحدر لمستوى هابط بينهما ..
بالنسبه للشق الخاص بممارسة العاده السريه ..
أولا لا يصح أن تطلبى الفتوى اٍلا من أهل الفتوى المرخص لهم بذلك كما أعلمتك أختنا بعبعه ..
لكن ممكن أن تطلبى المشوره و تختارى أنسبها لحالك ..
ليييييييه ؟؟
لأنى أقتنع تماما أن موضوع العاده السريه موضوع خاص جدا بصاحبه يعنى هو الوحيد القادر على تحديد مدى شدة اٍحتياجه له ..
و الفقهاء فعلا اٍختلفوا كثيرا حوله و لكن هناك قاعده فقهيه يمكن القياس عليها و هى أن درء الضرر مقدم على جنب المنفعه ..
يعنى لو عملتى زى ما الأخت بعبعه نصحتك بالتمسك بأهداب الدين و الصلاه و الصوم بل و ممارسة الرياضه كمان و الاٍنشغال بأمور الحياه حتى تصرفى ذهنك عن رغبتك الجنسيه بغض النظر عن ديانتك و لكن فى الآخر برضو لاقيتى نفسك مش قادره تصبرى على غياب زوجك بل أن الحكايه قاربت على الاٍفلات منك فهنا البديهى و الأسلم أن تلجأى لممارسة العاده السريه باٍعتدال حتى لا تقعى فى الخطأ و الحرام و العياذ بالله ..
خدى بالك ده رأيى الشخصى و ليست فتوى دينيه .. و أنا أتحمل مسئولية هذا الرأى لأنه أهون الضررين لأنى أعلم تماما ما يمكن أن يؤدى اٍليه جموح الرغبات المكبوته بداخل النفس ..
ربنا يرد لك زوجك بالسلامه و يبعد عننا و عنك كل سوء ..

غاده فاروق يقول...

عندما أكون جالسة بجوار خطيبي أو عندما أسمع منه كلاماً لطيفاً في التليفون، ويعلم الله أنه ليس كلاماً خارجاً ، ينزل مني سائل؛ فما طبيعة هذا السائل وهل هو صحي أم لا ، وهل سيؤثر على في الإنجاب في المستقبل

بعبعه يقول...

غاده فاروق

حبيبتى السائل ده اسمه المذي وهو يوجب التطهر والوضوء فقط لو هاتصلي يعنى لا يوجب الاغتسال

وده عادي جدا وطبيعى جدا وصحي جدا

والسائل مهم جدا وجوده ان شاء الله بعد كده لما تتجوزي

لانه سائل الترطيب وعدم وجوده بيعمل مشاكل ولو حصل جماع فى غياب السائل المرطب بيكون مؤلم وبيسبب التهابات

والمذي موجود عند الرجل ايضا ولكن بكميه اقل ولزوجه اكتر

ما تقلقيش ابدا

بس زي ما قلتلك ده بينقض الوضوء
يعنى لازم تطهري منه وتتوضي

وربنا يتملك على خير يا جميل

Emad يقول...

Al salaam all

To anonymous I’ll say my opinion and it’s not fatwa in Islam. if you feel you need your husband so much tell him what you feel maybe that will make him find way you go to him or he come to visit and don’t be shy he is your husband, if there is no way that will happen and you decided you will go with masturbation tell your husband about that and try to do that while he with you on phone or internet chatting(that will make your mind doesn’t imagine another man and that will make him feel how hard that situation on you and he will BE SURE YOU DON”T GET YOUR NEED FROM another man you won’t and that why you ask for solution.

To ghada farouk (excuse me b3b3a) b3b3a could be right and also could be wrong why? Because you could have medical issue so always always alwaaaaaaaaays see doctor when you find anything about your body need explanation any thing pleaseeeeeeeeeeee.


Salam all

بعبعه يقول...

عماد

بالنسبه لكلامك مع الغير معرفه

يعنى انت ما تعرفش دماغ جوزها

لذلك ا نا لا احبذ نصحيتك

انا معاك فىانها تقوله انها محتاجه له وتلح فى طلب انها تسافر او يرجع لها مش عيب ابدا ولا تتكسف من كده

الا انى ما اضمنش رد فعله لو هى عملت بنصحيتك لان انا شوفت عقول كتير ما تستحملش التفكير ده
ويمكن ده يخليه مش يثق فيها وانما يشك فيها اصلا



وبالنسبه لغاده

انا برضه متفقه معاك فى حكاية دكتور دي

لكككككن انا برضه برضه مش باتكلم من فراغ والله

هى بتقول ان السائل تحديدا لما بتكون مع خطيبها يعنى نتيجة استجابه عاطفيه

عشان كده انا قلت ان ده مذي

انما هاجيب الدكتوره شرين ترد عليها ان شاء الله

تحياتي ليك يا عماد

Emad يقول...

Salaam to all

Thanks b3b3a, about the first advice I mean she need to put pressure on him, yes I mean that pressure on him and I understand he almost left for money and his work BUT if that over her need which she can’t ignore he has to do his duty as man and keep her safe from Satan and if anyone still remember Allah promise us none will take our belongs which all will give to us, if she want to try to use my advice she can tell him things like I need you and love you so much and I dream about our last night together or even talk to him in phone every single time she feel she needs him( that is your right as woman in ISLAM).
About ghada I meant as general way we don’t ask OTHERS to diagnose our symptoms even if they are doctors they need to see the patient and do all lab work and x- rays to know what is that.

I know you have experience but she asked about symptoms not general information (what if she has very rare type of cancer)?? It’s general way we have to learn and taught our kids see doctor if you are sick, ask Muslim secular about halal and haram, ask engineer about engineering and so on.

Thank b3b3a on your patient on me

Salaam

سبهللة يقول...

جزاكم الله خيرا
افدتونا افادكم الله