الخميس، 11 مارس 2010

آلية الانتصاب



موضوع مهم الى هانتكلم فيه النهارده


 كتير يمكن ما يعرفوش تحديدا ازاي بيحصل الانتصاب




وفى رايي ده من اكبر المشاكل الى الناس بتقع فيها


 


الواحد لما بيشتري تلاجه بيقرا الكتالوج بتاعها واحنا ما نعرفش جسمنا شغال ازاي معقوله كده يعنى



حتى لو كنتى ست او بنت فبرضه الموضوع يخصك من نواحي كتيره اوي مش بس عشان ممارسة الجنس عموما العلم بالشيء افضل كثيرا من الجهل به


 ندخل فى الموضوع




القضيب هو طبعا العضو العامل فى العمليه الجنسيه







بس عشان يبقى عضو عامل لازم يكون منتصب وده عشان يقدر يحقق الايلاج (الدخول) في المهبل







طيب نعرف الاول تركيب القضيب



عايزاكم تركزوا فى كلامي وفى نفس ذات الوقت فى الصوره عشان تفهموني






الصوره زي ما انتم شايفين بتقول ان القضيب بيتكون من 3 انابيب




اثنين منهم اسمهم الجسم الكهفي



وليه اسمهم كده لان جواهم امكان زي الكهوف (حجيرات) بالظبط والكهوف دي هى الى بتستوعب الدم الى بيتدفق للقضيب اثناء عملية الانتصاب

والى تحت ده جسم اسفنجي بداخله بيكون مجرى البول



تمام كده ؟

طيب ده تركيب القضيب الى مش فاهمه يطلع يقراه تاني عشان يفهم الى جاي




ازاي بقى بيحصل الانتصاب



حوالين الكهوف دي فى عضلات صغيره جدا العضلات دي بتكون ماسكه على كهوف دي بالظبط زي انت تمسك اسفنجه كده مثلا وتضغط عليها بايدك انت كده حتى لو حطيت ايدك وفيها الاسفنجه فى المايه الاسفنج مش هاتسحب المايه جواها

العضلات الصغيره دي بتعمل كده مع الكهوف الى فى القضيب بتمنع دخول الدم لها (ودي فى حالة ارتخاء القضيب )

يبقى عشان الانتصاب ده يحصل لازم العضلات دي تفك(تسترخي او تنبسط) وتسيب الكهوف دي ويبدأ الدم يتدفق لها تدريجيا يحصل الانتصاب





طيب ايه بيخلي اصلا العضلات دي تسترخي ويحصل كده ؟؟؟



حاجه محسوبه بالملي جسمنا ده سبحانه وتعالى






الى بيحصل بقى ان لما بتحصل اثاره جنسيه للرجل على طول المخ بيدي اشاره بافراز ماده اسمها (اكسيد النيترات )



اكسيد النيترات ده بيعمل ايه ؟؟

بيروح على ماده كميائيه فى الجسم ثلاثية الفوسفات ويحولها الى ماده احاديه الفوسفات



طب الماده الاحادية الفوسفات بتعمل ايه



هى دي الى بتعمل الشغل كله بتروح على العضلات الى حوالين الكهوف وتخليها تسترخي وبالتالي يبدأ الدم يتدفق للكهوف دي وتمتلئ بالدم زي الصور الى قدامكم دي . وبكده يصبح القضيب منتصب


طيب ازاي الدم ده بيرجع تاني يطلع من القضيب ويحصل ارتخاء تاني



الجسم بيفرز انزيم معين الانزيم ده بيروح على الماده احادية الفوسفات فيكسرها وتبقى ماده مالهاش فعاليه (وطبعا بانتهاء الاثاره الجنسيه بتختفى الماده الاحاديه ) بالتالي العضلات الصغيره حوالين القضيب بترجع تشد تاني على الكهوف وتطرد الدم الى دخل فيها




الى بالاحمر ده تحفظوه زي اسمكم عشان هاحتاجه البوست الجاي




بيروح فين الدم بقى الى امتلأت به الكهوف بعد انتهاء عملية الانتصاب ؟ بيطلع ازاي ؟






اطعلوا كده للصوره الى فوق دي هاتلاقوا فى على الشمال كده فى الصوره الى قبل الانتصاب فى أورده رفيعه اوي الى لونها ازرق دي






الاورده دي لما بيحصل انتصاب والكهوف تتملى دم الكهوف بتضغط عليها فتقفلها ما تخليش الدم يتسرب من القضيب زي الصوره الى على اليمين عند الاسهم السوده



فلما تنتهى عملية الاثارة الجنسية بترجع العضلات تنقبض تانى وبتقلل الضغط على الاوردة فتفتح وتبدأ الاورده دي تسحب الدم لخارج القضيب فيحصل ارتخاء تاني للقضيب




عشان كده لو كان فى خلل فى الاورده دي والكهوف ما بتقفلهاش كويس ساعة الانتصاب ممكن يبدأ الدم يتسرب من خلالها خارج القضيب ويبقى الانتصاب ضعيف

هااااااااه حد فهم حاجه ؟؟




شكلك مش فاهم يا نصه


الى ما فهمش يرجع يقرا تاني والنبى ولو فى نقطه معينه مش فاهمينها اسالونى فيها




عشان المره الجايه هانتكلم ان شاء الله عن الفياجرا فلازم تبقوا فاهمين ده


وطبعا الف شكر للدكتور عباس(لا خلهوهم الفين تلاته بقى ) اصل بقالي كام يوم جايباله كل انواع الصداع على ما اداني موضوعات قريتها وشرحلي وكتبت انا وراجع هو عذبته اخر حاجه الحقيقه
( والنبى من غير ما تقولوا قلتله يكتب هو ما رضيش وقالي مش فاضي نفسي ادبسه فى اي بوست مش نافع معاه خالص )
ما نتحرمش منك يا باشا ومنورنا دايما
وكمان شكرا يا هاتجنن يا الى رافع من معنوياتي وبتسأل عني  
واسفه على تاخير البوستات غصب عني والله 

هناك 25 تعليقًا:

Mr.V يقول...

لا بوست جايب من الآخر وشديييييييد بجد
بجد ربنا يكرمك يابعبوعة ويكرم دكتور عباس

ومستنين البوست الجاى بتاع الفياااااااجرا

Cute Kitty **sookra يقول...

بصراحه بصراحه
افادنى جدا البوست دا زى كل بوستاتك

ربنا يكرمك يابعبعه

انا هابقى عروسه فى شهر 5


ادعيلى بقى

Wanda يقول...

فكرتينى بامتحان الفارما و الاستاذ الى غششنا بالشعر المكتوب عن الفياجرا :-)))

اه حتكتبوا عن الفياجرا بس و لا كل انواعها الاخرى ؟؟ اعشاب و عطارة وبدائل :-)؟؟ ولا العثارات المسجلة فاعلياتها فقط و متنسوش احدثم و مدة عمله فىالجسم ؟؟ و الحريمى و الرجالى ؟؟

بعبعه يقول...

mr.V

الف شكر يا باشا وان شاء الله هابدأ اجمع فيه من دلوقتي البوست الجديد
يا مسهل

نورت

بعبعه يقول...

سكره

الف الف مبروك

بصي انا جاتلي كذا رساله بيسألوا عن ليلة الدخله واغلبهم قربوا يتجوزوا زيك

انا كده هافكر اعملكم بوست مخصوص بقى

وعموما يا سكره اي حاجه تحبى تسألي عنها انا عنيه ليكى ابعتيلي رساله على الميل

ومتشكره جدا ليكى وانتى نورتي
وربنا يتملك على خير

بعبعه يقول...

وندا

يا هلا

يعنى انتى بتقري فى الخباثه وبعدين لما دوسنالك على طرف وقولنا الفياجرا بقى تقوليلى الانواع وكده

ماشي يا ستى احدفلك الكوره فى ملعبك بقى واقولك اكتبي انتى ؟

:)

بصي يا جميل هو انا بحاول قدر الامكان ما يكونش الكلام متخصص اوي عشان يكون قريب من الناس ولانى كمان مش مدونه علميه بقدر ما هى بتراعي الجوانب الانسانيه

موضوع الانواع انا هاتعرضله لكن مش باسهاب
هو فى فكره معينه عايزه اتكلم فيها مع الناس قلقاني من ناحية الفياجر

بس عشان اتكلم فيها الناس تفهم الفياجرا بتشتغل ازاي
وعشان يفهموا بتشتغل ازاي لازم يفهموا الانتصاب اصلا بيحصل ا زاي

انتى نورتي يا وندا

Wanda يقول...

اكذب عليك يابعبعة
انا مش متابعاكى
بس لاحظتك فى مدونات الناس الى بدخل اعلق عندهم و عليه دخلت اقراء
بس بصراحة مستغربة الجراءة

انما اتكلم عن الفياجرا :-)
ميبفعش حتكلم كلام علمى كمياء دمه ثقيل :-))

و بعدين الحبة فيفى ديه عملتلى عقدة اول ما اتخرجت و اشتغلت :-)
تلاقى العيال قبل العواجيز بيجوا يشتروها و محدش بيتكسف يطلبها منى :-(
و تسمعى عن العرسان الى بتموت فى ليلة الدخلة منها

خذى عندك اخر صيحات الاقراص ديه من كتاب بقرأه :-) كتاب اجتماعى مش علمى :-))
Cialis (weekender) - levitra - vigra

كملى كلامك بس و النبى حذرى الناس من السكتة القلبية و خصوصا اغلب البشر بقى اوعيتهم الدموية من الدهون الفاستفوود بقت مسدودة :-)

بعبعه يقول...

وندا

مالها الجرأه

ما شوفتيش الاعلان بتاع لا تعاني فى صمت
هههههههههههههه

يا وندا انا كنت عامله المدونه دي للفضفضه واستقبال الرسايل واي حاجه واي حد يحب ينشر حاجه مش عايز ينشرها فى مدونته لاي سبب

بعدين الى خلاني اكتب فى الاتجاه ده كمية الرسائل المتعلقه بالناحيه الجنسيه عموما

وللاسف الكل بيقولي مش عايز انشر المشكله حتى لو من غير اسامي

واغلب الاساله والمشاكل سببهم حاجتين

الجهل
والتشوهات النفسيه الاجتماعيه للطرفين


عموما لازم يبقى فى حد فينا جريء ويتكلم مش معقول هانفضل نستخبى من المشكله لان فعلا من خلال احتكاكي بالموضوع ده فى مشكله فى المجتمع ده كبيره وما حدش بيتكلم عنها صح الا فيما ندر

وبالنسبه لموضوع الفياجرا انا اصلا عايزه اتكلم فى النقطه دي تحديدا

الاستخدام الخاطيء للفياجرا

واهلا بيكى يا وندا المدونه نورت

غير معرف يقول...

جزاكم الله خيرا على جهدكم
بس بعد اذنكم استاذ عمرو بدر فين
بقاله فترة مش بيكتب هنا ولا فى مدونته
يارب يكون بخير

Blue يقول...

بتقولي لسكرة حفكر انزل بوست ؟؟؟؟!!!!
انتى لسه حتفكري يا بعبعة!!!

طبعا لازم ينزل البوست دا

بإنتظارك

الف شكر للجندي المجهول ...
الطبيب عباس الأول

مجهود رائع مشكور يا بعبوعة

بعبعه يقول...

الغير معرف

شكرا لك

والاستاذ عمرو والله الحيت عليه فى الرجوع للمدونه هنا ولمدونته ووعدني انه يرجع لما يفضى

اتمنى له التوفيق طبعا فى شغله بس حقيقى باتمنى انه يرجع يكتب تاني طبعا

بعبعه يقول...

بلو

الف شكر ربنا يخليك

وحاضر البوست هاحاول اعمله بعد الفياجرا على طول

هاتجنن يقول...

لما يكون في حد بيكتب في المواضيع الحساسة دي وبيكتب بمنتهى الرقي والاحترافية دي
ويكون بعيد عن الاثارة يبقى هو اللي يتقلوا شكراً ومش شكرا بس مليون شكر مش كفاية حقيقي مافيش حد بيخش مدونتك يابعبة الا وغصب عنة لازم يطلع مستفيد بحاجة جديدة الى الامام دايماً وربنا يوفقك ومستنيين الجديد باذن الله

بعبعه يقول...

هاتجنن

متشكره اوي ربنا يخليك

على فكره مش معقول كده رفع المعنويات ده

بعد كده هاعمل المدون برسوم دخول بقى
ههههههههههههههه

متشكره لك ولكل الناس حتى الى بيقروا فى صمت

وكل الى بيساعدني انى اكتب كلام يفيد الناس بجد

غير معرف يقول...

طيب هل هناك ارتباط بين ضعف عضلة القلب وضعف الانتصاب
أرجو التوضيح وهل هناك علاج؟؟؟؟

غير معرف يقول...

عندي الانتصاب يستمر لفترة وبعد كدة يقل فما السبب؟
جميل مطر

بعبعه يقول...

الغير معرفين الاثنين

دى طبعا اسأله طبيه باحته فمعلش اعذروني ادوني فرصه اسأل الدكتور عباس او هو لو فاضي هايرد عليكم بنفسه

متشكره لكم

هاتجنن يقول...

يعني اروح اعمل محضر في القسم !!!!!!
واتبلى عليكي يا بعبعة وفين الدكتور عباس

بعبعه يقول...

ههههههههههههههههههههههههههههههههه

حصلت للقسم يا هاتجنن

والله غصب عني معلش هحاول اكتب جديد حاضر والدكتور عباس انا بلغته ان فى ردود محتجاه
اعمل ايه طييييييب

استحملوني شويه معلش

غير معرف يقول...

بعبعه انا متجوزه قريب بقالى حوالى اسبوعين وبحس بالم شديد جدا اثناء العلاقه هل ده طبيعى ولا لازم اروح لدكتور ياريت تساعدينى وشكرا بجدا ليكى
زوجه جديده

بعبعه يقول...

المتجوزه جديد

اولا مبروك الف مبروك وان شاء الله بكل توفيق

بالنسبه لموضوع الالم

كنت محتاجه اعرف هو حصل ايلاج كامل ولا لا وحصل فضل ولا لا

بصي انا هاقولك رد سريع كده وان شاء الله برضه على ما الدكتور عباس يحن علينا

اولا لو عندك افرازات صفراء او لها ريحه وحشه او عندك حكه اوي حاجه مش مظبوطه ممكن يكون عندك التهابات وده ممكن يعمل الم ويبقى تروحي لدكتور

لو مافيش كل ده

يبى ممكن يكون عندك حاجه زي تشنج عضلي فى المهبل
فبصي افري البوست ده عن التشنج المهبلي عشان تفهمي
http://b3b3a.blogspot.com/2009/07/blog-post_31.html

وخلي بالك انتى لو هديتى اعصابك وما كانش عندك التهابات ولا مشاكل صحيه
ويكون فى مداعبة كويسه ومقدمات كفايه قبل العلاقه المفروض انه ما يبقاش فى الم

وحاولي تراسلينى على الميل عشان اقولك شويه حاجات

نورتي يا عروستنا

د.عباس الاول يقول...

عزيزى غير المعرف

صاحب سؤال هل هناك علاقة بين ضعف عضلة القلب وضعف الانتصاب

هناك علاقة من خلال اكثر من محور

اولا :فى حال كون ضعف عضلة القلب مؤثر على كمية ضخ الدم فى الشرايين يصبح هناك علاقة

و كذلك فى حالة انخفاض الكفاءة العامة للجسم وانخفاض لياقته البدنية

ثانيا : ان الشرايين المغذية القلب بنفس حجم شرايين القضيب وفى حالة وجود امراض فى شرايين القلب يمكن ان نتشكك فى مشكلة فى شرايين القضيب

مع الشكر

د.عباس الاول يقول...

الاستاذ جميل مطر

اسف المشكلة غير واضحة برجاء اعادة صياغتها او ارسالها على ميل المدونة

تحياتى

نـــوارة يقول...

وحشتيني ياقمر وقلت اجي اسلم

البوست جامد طبعا كالعادة

بيني وبينك انا معنديش خلفيات خالص عن الرجالة والحاجات بتاعتهم جهلة تماما اهو منك نستفيد ياجميل ^ـ^

ومنتظرة بوست الفياجرا لاني دايما بسمع عنها كلام وحش ونفسي افهم هي كويسة ولا مووش

تحياتي

Blue يقول...

انتى فين يا حجّة ؟؟

بلاش الغطسان دا كله