السبت، 17 أبريل 2010

ليلة الدخلة




ليلة الدخله
فى صديق للمدونه مش عاجبه التسميه دي ليلة الدخله
بيعتبرها  قاسيه
عارفين ليه عشان احنا اصلا فاهمينها كده
انما فى الحقيقه هى اسمها كده
وجايه من فكرة الدخول
اه ايه المشكله ؟؟
مش هانحط السيخ المحمي فى صرصور ودنه ولا حاجه

المهم ايه بقى حكايتها الليله دي ؟؟

هى اجمل ليله ولا اوحش ليله ولا  ايه موقفها بالظبط

البنت تفضل طول عمرها تحلم بالفستان الابيض والفارس  الهمام

واول ما يقرب الفرح تلاقي وشها اصفر مقلم احمر من الرعب وعندها احساس انها راحه المسلخه مثلا

ليه ؟؟

لان احنا ولا فخر ما بنفهمش وما بنحاولش نفهم  وكل الشعب طبعا بيتحول فجأه لمفتيين ودكاتره  وعلماء ذره فى آن واحد

السؤال المطروح دايما دايما من قبل البنات  بالذات
هو بيبقى في الم جامد ؟؟
اصل انا سمعت كذا وكذا وكذا وفلانه يا لهوي  على الي حصلها وقعدت تصوووووووت تصووووووت وجالها نزيف وكانت هاتموت

اه لا بصي هو اول يوم ده طلوع روح كده تحسي ان روحك هاتطلع

او ان اول مره ده يا  اختي عارفه لو حد فقع عينك بصباعه ؟ اهو فضل البكاره كده !!!!!!!!(نفسي انا احط صباعي فى عين الى قالت الكلام ده على فكره )

  والى اخر الكلام الاهبل من الصنف ده

كل ده كلام فارغ هبل تخريف

طيب نجاوب الاول على سؤال البنات

الم جامد ايه وصويت وهبل ايه ؟؟
ليه حضرتك هو انتى هاتصوري فيلم المغتصبون ولا ايه ؟؟

لا طبعا مافيش أي حاجه من الكلام ده بس بشررررررررط

تكوني انتى وعريسك بتفهموا  مش هبل فى الجبل

ندخل على الوصايا بقى للبنات  عشان ما نرغيش كتير :

أولا : امسحي أي فكره بلهاء دخلت فى دماغك من قبل أي واحده هبله اتجوزت قبلك وما تخليهاش تديلك خبراتها السيئه

ثانيا : فكري بس انك فى اليوم ده هاتبقى فى حضن حبيبك مش ابو ركبه الجزار

ثالثا : اعملي حسابك كل ما تتوتري وكل ما تخافي كل ما هاتصعبي الامر على نفسك زياده وهو ده الى بيسبب الالم

عارفه منين بيجى الالم ؟؟   من التشنج المهبلي  روحي اقري البوست بتاع التشنج المهبلي وانتى تفهمى يعنى ايه

والتشنج المهبلي ده سببه التوتر والهبل الى انتى فيه

اعرفي اهو ان فض الغشاء لا يسبب الم اطلاقا لو اتعمل صح 

ولا المهبل بيكون ضيق على القضيب ( ازاي يعنى ده المهبل ده ممكن ينزل  منه طفل )


واي حد يقولك كلام غير ده يبقى ما بيفهمش حاجه وما تسمعيش منه ولا كلمه بعد كده

خلينا نقول ان أي توتر وهبل منك ده الى هايسببلك الالم

كمان فى حاجه مهمه اوي
انتم اكيد مؤمنين معايا ان  احنا كل حته فى جسمنا اتخلقت بميزان الخالق عشان تستخدم فى الحاجه الى خلقت عشانها
الدكتور عباس قالي كلمتين حلوين اوي اوي

قال القضيب بينتصب وبيكون صلب لكن راس ا لقضيب مش بتنتصب بتكون طريه وغير مؤلمه
اصل القضيب خلق عشان يدخل فى المهبل فبالتالي هو مهيئ لكده
وكمان المهبل هو كمان مهيء تماما لاستقابل القضيب والمفروض انه بيرفز سوائل ترطيب من شأنها انها تجعل انزلاق القضيب للداخل سهل

والبكاره  غشاء البكارة عبارة عن غشاء رقيق الغرض منه فى وجهة نظرنا المتواضعه إعطاء نوع من الاحتفاء المقدس  بمفهوم العفة
مش عشان نعذب بيه البنات
عمركم سمعتم عن واحده اخطأت بعلاقه جنسيه واشتكت من الم اول مره وانما بتقول الشيطان ضحك  علينا المتعه سرقتنا
اشمعن فى الجواز الحلال بقى والبنت العفيفه هى الى بتبقى موقعه حربيه ؟
الحكايه كلها نقطه دم خفيفه اوي ولو نفذتي الى هانقول عليه هاتبقى شكة الم لا تذكر ان شاء الله

ما تقلقيش من فكرة الدخول نفسها كل ميسر لما خلق له

عايزاكي دايما تركزي بس مع حبيبك حبوا بعض وبلاش الخوف والرعب والهبل ده الهي يستركم



العريس

تعالولي على جنب كده بقى عشان قاعدتنا هاتطول

بررررررررضه تشيل من دماغك كل الهطل بتاع لا لا ياعم اصل هى ما تجيش الا عافيه
يعنى تتمنع منك وانت تاخدها عافيه ما تجيش الا كده

لا يا بابا ده هبل وتخريف  اركنه على جنب  ما ينفعناش خالص دى بنى ادمه وانثى حساسه  جدا والليله دي هايتوقف عليها حياتك كلها بعد كده افهمواا لله يرضى  عليكم
وبعدين ما تسمعش كلام اي حد اهبل تاني يقولك خد فياجرا عشان تجيب من الاخر
او خدلك نفسين  من السجاره البنى دي ماركة جايين الدنيا ما نعرف ليه  وانت تفوت فى الحديد يا جرع
ولا لك دعوه خالص بافلام السبعينات الى يوم الدخله يجبولك العريس بيشرب ويقول لعروسته ده شمبانيا يا روحي خفيفه عشان تنعنشك
ما ينفعش خااااالص يا ريس والله
وابوس اديكم بلاش خزعبلات الربط والاعمال والسحر  دلوقتي

ما تسمعش كلام كمان الاهبل الى قالك خد حباية فياجرا يومها عشان بس التوتر ممكن يخليك  مش تمام

ليه اصلا نتوتر ؟؟ ليه اصلا ما نبقاش تمام ؟؟

يعنى انت طول عمرك بتعض اناملك نفسك فى مزه لحم ودم وبعدين لما ربنا يفتحها عليك وتيجى المزه تتوتر وتبقى مش تمام ؟؟!!!!!

هبل صح ؟؟

بالراحه يا ابنى على حبيبتك وعروستك بالهدوء بالحب  طمنها وهديها واصبر  عليها يوم واثنين وثلاثه مافيش مشكله
لو ما كانتش فاهمه فهمها اتكلم معاها الاول خليها تطمئن لجانبك انك مش هاتعمل أي حاجه تأذيها ولا توجعها

عايزاك تاخدلك شريطين تلاته حبوب الحنيه وانت داخل وحياة والديك

وسيبك من الهبل الى كل يوم هايسألوك  هااااااا رفعت راس الدهاشنه يا ولد ولا لااااع ؟

رد باي حاجه قولهم امال يا بوي دي ماااااتت

بالراحه كده على نفسك وعلى البنيه الى معاك هى شاربه من المجتمع لما قايله بس


طيب فاضل بعد كده اقترح عليكم سيناريو معقول جدا لليلة الدخله والاعداد لها وطبعا ده انا اعددته بالاشتراك مع الدكتور عباس الله يخليه لنا

اولا : اقترح عليكم عقد القران قبل الدخله ب3 شهور على الاقل    ليه ؟

مجرد تغير التعامل مع بعض من اثنين مخطوبين لاثنين متجوزين مع ايقاف التنفيذ ده فى حد ذاته يفرق

لكن المفروض خلال ال 3 شهور دي  يكون فى تقدم فى العلاقه كل واحد حسب عرفه وتقاليده
مافيش موانع شرعيه بعد عقد القران الا ان دينا كمان احترم العرف والمفروض اننا نحترم كمان العرف والتقاليد لو كانت غير متعارضه مع الدين

   وده عشان تتعودوا على بعض وتقدروا تحسوا بعض كويس

وكمان خلال الفتره دي لازم تكونوا اتكلمتوا كتير عن العلاقه وعلومها ويا حبذا لو  تقروا انتم الاثنين كل ملفات بعبعه هاتنفعكم والله  ويا سلام  لو تقروها سوا  ويا حبذا لو تناقشوها وتسألوني كمان يبقى برافوا عليكم

طيب مافيش بعبعه لاي سبب  اطبعوها  بلاش بعبعه أي كتاب محترم علمي اقروا عن العلاقه واتكلموا واشرحوا لبعض وتبادلوا الخبرات واكسروا حاجز الخجل فى الكلام

ماشوها كلام علمي بحت ودينى واحكام وما الى ذلك كبدايه وهى تمشي معاكم بدون خجل ولا هبل

كده تمام ؟؟

 ثانيا طيب مافيش 3 شهور كتب كتاب وابوكي قال كلا الفته كتب الكتاب قبل الفرح بيومين

مافيش مشكله هانعمل ايه يعنى ابوها نرميه لا طبعا

يبقى حضراتكم ما ينفعش العلاقه الكامله من اول يوم فى الغالب

اعطوا لنفسكم فرصه انتقاليه يوم اثنين تلاته  زي ما تاخد معاكم تدريجيا انتقالا من فترة التسبيل والتعطيف الشفوي الى مرحلة  المداعبات الخارجيه والتعرف على بعض جسديا  وبعد كده تيجى مرحلة العلاقه الكامله بالايلاج وفض الغشاء طبعا

المداعبات دي  لازم تنتهي بلمسات خفيفه للمنطقة  الفخدين من الخارج والداخل وانتهاءا بالفرج وده تهيئة لعملة الدخول
والمداعبات من شأنها انها تعمل انبساط  للعضلات ( الفخدين والفرج والمهبل بالتبعيه ) وده طبعا مهم اوي اثناء  عملية ا لدخول

 ثالثا: المفروض تكونوا مستعدين بوجود مرطبات طبيه فى حال انه كان فى نقص فى المرطبات  الطبيعيه عن الزوجه بسبب التوتر الخفيف مثلا ولان الترطيب مهم جدا فنكون مستعدين نعوض عنه بالمرطب الصناعي
التوتر الخفيف عشان لو فى توتر جامد ما ينفعش ياعريس تدخل النهارده اديها فرصتها طمنها وكلمها وفهمها بالرااااااحه قدامكم العمر كله ان شاء الله  بلاش نستعجل

ياريت بلاش عبارات من نوع هاتمووووتي يا سوسو  عشان البنت ما تتخضش  وتفتكر نفسها هاتموت بصحيح


دكتور عباس قال كمان مثال حلو اوي اوي
هانقله لكم بس بعد البهارات بتاعتي يا دوك انا عارفه انها هاتعجبك

السيناريوا الاول :
 هو بسهوكه  :ممكن يا حبيبتى تدينى الورده الجميله الحلوه الى فى ايدك دي
هي وهى بتبربش وبتدلع : لا دي بتاعتي
هو بحنيه وشرف الفرسان: لا قولي بتاعتنا .. بصي احنا نمسكها سوها ونشمها سوا
هي وهى مكسوفه من ذوقه  : اه يا حبيبى ما تغلاش عليك اتفضل


السيناريوا لتاني :
هو : ممكن اخد الورده الى معاكي دي ؟
هي : ليه تاخدها بس دي بتاعتي
هو: كده عشان انا عايزها واصلا انا دافع تمنها
هي: طيب بالراحه الله بقى
 هو: مافيهاش بالراحه هى ده حقي
هي: لا بقى هاه
هو: لا يا ماما انت ما تعرفنيش ده انا اسسسسد  وهاتموتي يا سوسو
 هاتي الورده.... لا مش دلوقتي .... لا دلووووووقتي ... باقولك هاتي

وطاخ طيخ طوخ
اتبهدلت الورده واحمتال اتقطعت وايديهم اتعورت من شوك الورده
وتعبوا وارهقوا واتعذبوا
وما شموش الورده
وجايز ما يعرفوش يشموها تاني خلاص
اه كل واحد واخد بوكس فى مناخيره هايشم ازاي ؟

عليكم ان تخاتروا بقى  بين الاثنين يا حلوين

يعنى عايزه بس اضيف كلمه بسيطه
الاجانب بيقولوا كلمه حلوه عن العلاقه  والى هى  making love  او ترجمتها بالعربي ممارسة  الحب

عارفين الكلمه دي حلوه ليه من وجهة نظري   لانها بتعبر عن العلاقه انها صوره من صور الحب وهى اصلا كده فعلا
فارجوكم تتعاملوا مع العلاقه بانها فعلا كده ممارسة للحب  . حبوا بعض  وانتم فى العلاقه  مش معركه هى

صدقنى يا ريس شنباتك  طويله ويقف عليها الصقر من غير ما تجهز على عروستك وتشيبها بدري
حتى القرآن والسنه  عندنا بتقول: وقدموا لانفسكم

صدقينى يا عروسه هو مش قصده يخضك بس هو عليه ضغوطات خارجيه ونفسيه هو كمان ما يغركيش انه عامل شجيع السيما  . وكمان هو بس ملهوف  عليكى  فما تتخضيش وما تعتبريهوش بيغتصبك وخليكى هاديه

وياريت  بجد باي شكل يكون ان الاخت العروسه المخضوضه الى كلمتنى على البوست الى فات تتفضل تاخد البوست ده وتبعته لعريسها

واي واحد او واحده مقبلين على الزواج بجد خلي شريكم يقرا البوست بتاعنا ده وغيره كمان من البوستات الموجوده على  المدونه

والى متحرج انه يعمل كده يتفضل يجينى على الميل الى محطوط على  اليمين فوق ده  ويسيبلي أي اميل هو يحب يبعتله الموضوع ده وانا ابعتهوله ولا من شاف ولا من دري
وطبعا اميلاتكم فى بير مالوش قرار انتم  عارفينى


هناك 18 تعليقًا:

غير معرف يقول...

والله تسلم الايادى يا جميلة والله كفيتى ووفيتى

انا عايزة اقول حاجة بسيطة اوى للبنات

انا عارفة انه وضع محرج وبتبقى حالة البنت حالة بس خلى كل واحدة تفكر ف انها هى كمان عامل اساسى ف انها بتوتره

خليكى انتى كمان ريلاكس خالص لو لقيتى هاجم عليكى انتى هديه وتأكدى انه هيكون ف مصلحتك انتى لانه باى حال من الاحوال اعتقد انه هيشبع رغبته انتى اللى بعد كده لو ما عودتيهوش ان كل حاجة تيجى براحة وبشويش مش هتستمتعى وهيبقى الجواز نكبة عليكى وهتكرهى حياتك بجد فيه

مش عارفة يارب اكون اضفت مش زودت من غير فايدة

تسلم الايادى والله بجد انا بستفاد منكم جدااااااا

للعلم انا انسة ومش مخطوبة بس بجد كلامكم بيطمنى

جزاكم الله كل خير

بعبعه يقول...

بصي تاكدي لو حد دخل المدونه كح ومشي يبقى اضاف يا حبيبتى
هههههههههههههه

بجد وجودكم لوحده له معنى

وطبعا كلامك جميل اوي ربنا يكرمك ونشوفك عروسه قريب

الفارس يقول...

فعلا ليلة الدخله بيحاك حاليها كتير من الساطير والتخريف اللي ملوش داعي
فالرجل والمرأه فيها زوج وزوجه
حياتهم حتستمر مع بعضهم البعض
فلازم يترك كل طرف فيها ذكرى جميله للطرف الآخر
لنها الليلة الوحيده في حياة كل الأزواج اللي لا تنسى

غير معرف يقول...

كلام كويس و جميل بارك الله فيكى
بس تصحيح صغير لو تسمحى اٍن مقولة و قدموا لأنفسكم وردت فى القرآن الكريم يعنى ليست من أقوال النبى صلى الله عليه و سلم
(نساؤكم حرث لكم فأتوا حرثكم أني شئتم و قدموا لانفسكم)

بعبعه يقول...

الفارس
اهلا بك وتمام كلامك

بعبعه يقول...

الغير معرف الكريم

متشكره اوي اوي على اهتمامك بجد وسعيده ان فى حد بيراجع ورايا بالذات الجانب الدينى

وحضرتك عندك حق فعلا
القرآن بيقول كده

لكن كمان فىحديث بيقول
قدموا لانفسكم ولو بقبله

جايز وانا باكتب الى جه على بالي الحديث

وعموما انا هازودها على الموضوع
انها فى القرآن والسنه

ومتشكره لك جدا ويارب دايما معانا

صيدلانيه طالعه نازله يقول...

بجد الكلام جميل و سهل و سلس و مفهوم
و اللى يقول غير كده نطخه يا فندم

الموضوع بيبقى شركه بين طرفى العلاقه و كل ما يكون بينهم حب و تفاهم و انسجام
كل ما الليله دى خرجت اجمل ما يكون و تكون ذكرى جميله بين الاتنين
بدل ما تكون ليله سودا عليهم و على اللى جابوهم

تحياتى

ابراهيم يقول...

كلامك صحيح تماما
للأسف في الوطن العربي ومصر تحديدا لدينا خرافات لا حصر لها
أنا لي تجربة في هذا الأمر
فأنا عقدت قراني منذ عدة شهور وفي انتظار الفرح ان شاء الله
وبدأت أنا وزوجتي في مناقشة مثل هذه الأمور فوجدت العجب العجاب
تقريبا إما انها لا تعلم شئ أو أن ما تعلمه مغلوط تماما وبعيدا عن الواقع لدرجة انني كنت لا اتمالك نفسي من الضحك
والحمد لله بالنقاش والتوضيح بدأت تتفهم خصوصا ان مجال دراستي العلمية يتعلق كثيرا بعلم البيولوجي والسيكولوجي فكلامي كان موثق الحمد لله بالدليل العلمي
واشتريت لها كتاب رائع يناقش كل هذه الأمور ببساطةوموضوعية
وأصبحت هي تسألني بثقة وأجيبها والحمد لله " نضفت لها دماغها " ههههههههه
المرحلة الجاية ان شاء الله انها تشوف المدونة و" تذاكرها " ههههههههه

بعبعه يقول...

صيدلانيه

تمام نطخه طبعا

نورتي يا جميل

بعبعه يقول...

ابراهيم

طيب تمام الف مبروك وربنا يتم عليك الخير

طيب تمام لازم تذاكر كويس طبعا

ربنا يوفقكم ان شاء الله
ومتشكره اوي

غير معرف يقول...

عارفه يابعبعه دى كانت اجمل ليله مش هنساها عمرى بجد كانت ليله حب مش كدب وانا اعتقد انه الراجل عليه عامل كبير اوى في الليله دى لما يكون حد متعاون ومحترم يعامل زوجته على انها انسانه بجد بيفضل في نظارها طول العمر احسن راجل في الدنيا كلها

ادعيلى ربنا يرزقنى بالذريه الصالحه

غير معرف يقول...

ارفع لكي القبعه يا بعبعه
انا كان جوزي حد محترم جدا في الحته ديه وحنين جدا
ولاننا كنا عقدين قبل الدخله بشهور
فلله الحمد تمت العمليه بسلام
فعلا الراجل عليه عامل جبار
بصراحه انا جوزي استحملني كتير جدا جدا جدا
وكبر في نظري جدا بسبب هذا اليوم
وخصوصا ان كان المهبل عندي غير طبيعي من عمليه الختان وكان لازم عمليه بس انا اللي مردتش وخفت
ومن هبلي فضلت اعاني لحد ما ربنا كرم وجبت اول اولادي
بجد الرجاله مش عارفه قد ايه الراجل بيكبر في عين مراته او بيصغر في عنيها في الليله ديه

تحياتي للجميع

بعبعه يقول...

الغير معرف الي قبل الاخير

(الهي يتركم اكتبوا اي اسم اكلمكم به )

ربنا يارب يخلف عليك بالذريه الصالحه ويكرمك فى مراتك وبيتك

ومتشكره ليك

بعبعه يقول...

الغير معرفه الاخير

(برضه الهي يسترك ابقى امضي باي اسم او رقم حتى)

حلو اوي الكلام الى قلتيه ومتشكره على الكلام الجميل منك

لكن فى حاجه بس مش فاهماها

هو ايه الى جاب المهبل للختان؟؟؟

ايه الى جاب القلعه جمب البحر ؟؟

معلش والنبى فهمينى الموضوع انشاله على الميل
يعنى يا انا الى فهمت كلامك غلط يا انتى الى عبرتي غلط يا انتى اصلا فاهمه غلط


المهم انى متشكره على زيارتك وربنا يخليلك جوزك الصبور ويكرمكم ويسعدكم يار ب

غير معرف يقول...

بصي ياستي
انتي اللي فاهمه غلط
طبعا انتي عارفه ان فيه شفرتين صغيرين وشفرتين كبار
فلما بيجوا يختنوا بيشلوا جزء من الشفرتين الصغيرين
والشفرتين الصغيرين دول بيبقوا حولين فتحت المهبل
فلما اتشال اللي حولين فتحت المهبل وجه يخف
انا بقي مريحتش نفسي وزهقت من قاعدت البيت وكنت بمشي كتير
فالجزء التحتاني من فاتحة المهبل لحم في بعضه من ضمة الرجل
فصغرة فاتحتة المهبل كتير
لدرجة ان اي دكتوره كانت بتكشف عليا نساء في الشهر التاسع في الطفل الاول فكانت بتقولي انتي ساكته علي نفسك ليه وكانت بتجزم اني اكيد بتألم في كل جماع وده اللي كان بيحصل بالفعل
فياريت اي واحده كشفت عن دكتوره نساء قبل الجواز وشافت ان عندها مشكله ياريت تحلها قبل الدخله علشان متشوفش اللي انا شوفته وعنيته علي مدار 9 شهور من الجواز حتي ولادة طفلي الاول

ياريت كده اكون قدرت افهمك انا قصدت ايه
امضاء 1

علي يقول...

كلام جميل
وتسلم ايديكي على المعلومات الرهيبة دي

نفسي اعرف الناس اللي كانت هتموت والبوست ده ينزل راحت فين

يا إما مصدومين
أو مكسوفين
أو مبحلقين

بس نفسي يكونوا من المعلقين

نشوف يمكن في حد عنده اضافة جديدة او تجربة شخصية او معلومة عارفها والكل يستفيد ان شاء الله

بعبعه يقول...

غير معرفه واحد

ايه ده يا بنتى

ده مش ختان ده دبح

المفروض الختان بيكون بجزء صغير جدا من البظر مش الاشفار كمان

ده ختان جائر طبعا وربنا معاكي


والحمد لله اعتقد فى مصر بدأت حكاية الختان دي تقل جدا خصوصا فى المدن وكده

بعبعه يقول...

علي

لا عادي انا واخده على كده خليهم مستخبيين مش مشكله بس هما يقروا ويفهموا مش مهم التعليقات خالص

وطبعا اهل باي حد عايز يقول تجربته