الأحد، 25 أبريل 2010

من فضلك احتوينى

ازيكم ازيكم

طبعا بعبعتي حبيبتي هتمووووووووت منى بس معلش بقي ياقمرة انتي عارفه الكرسي بحبه مووووت

ام هند

لو ماشيين في الشارع او في اي مكان ولقيتو طفلة كدا مفلوووووووووقة من العياط اول حاجه هتعملوا ايه

هتجرو عليها وتطبطبو عليها واول كلمة هتقولها في لحظتها ..


فين ماما ؟؟؟؟

صح ولا انا كدا غلط !!!!

يعني معروفة ان اول شخص بيحتوي الطفلة هو الام يليه الاب واي حد كبير في الاسرة ان مش كان في لقدر الله ام واب

طيب لو البيبي كبر سواء ذكر او انثي

مين اول شخص بيترمى في حضنه وبيحس معاه بالامان والاحتواء

بالنسبة للانثي ..... الزوج اللي هو حبيبها وابوها ودنيتها ( ماما دايما تقولي انا عشت مع باباكي اكتر ماعشت في بيت اهلي )

بالنسبة للرجل ...... الزوجه اللي هي حبيبته وامه وعشقته وكل حاجه ليها


طيب لو حسينا اننا مفلوقيييييييييييييين بالعياط والانسان اللي المفروض يحتوينا مش حاسس بينا

هندور فين علي الامان

فين

برا البيت

بقت كارثة عظمي

لان للاسف برا البيت دايما غابة مابتصدق الاسود والنمور تلاقي فريستها ضعيفة هشه هذيله وتهجم عليها وتضيعها في براثينها

هاتولي راجل اخلاقة مش كويسه مش مستني يلاقي واحده ومحتاجه شي فقداه في بيتها وبيدخلها من الباب دا لحد اما يوقعها في شبكته ويدخلها في دوامه هي نفسها مش ممكن تفكر انها تدخل فيها

هاتولي ست اخلاقها مش ولا بد يعني وشافت راجل عجبها بتحاول تغريه بكافه الطرق لحد اما يقع في شبكتها

هو الراجل اللي احتاج مراته دا الاولي بيه مراته ولا الست اللعوب طب يازوجه يااصيله احتوي زوجك بكافة الطرق اعتبريه ابنك واخوكي وحبيبك وزوجك شوفي هو محتاج منك ايه واعمليه والله ماعيب

هو الانثي اللي احتاجت زوجها دا الاولي بيها جوزها ولا الراجل الي مش كويس طيب يازوج يااصيل بدل اما تضيع مراتك من ايدك اللي بكلمه ممكن تديلك الكون كله بين ايديك خلي بالك منها وكون ليها الاب والاخ والصديق والزوج والحبيب وحسها

انا عارفه ان مشغلويات الدنيا كتير اوي لكن في لحظات بتمر علي الانسان بيكون محتاج فيها حضن حنين طبطه علي الكتف كلمة حلوه

يعني لما بحتاج دا انا وانا بنوته بروح لماما لكن لما اتجوز مش معقول ابقي بعيط واقوم انزل من بيتي واروح لماما

اكيد مش متجوزه خيال يعني اكيد هحتاج دا من جوزي ان شاء الله

الحياه ياجدعان مش شغل واكل ومعاشرة وبس الحياه فيها ود وتراحم ومحبه زي ماربنا سبحانه وتعالي قال

ولا ايه !!!!!!!!!!

بلاش نضيع ناس بتحبنا في وقت احتياجهم لينا لاننا مش هنخسرهم بس وهما كمان هيخسرونا وهيخسرو نفسهم

كانت معكم من ارض البعبه البلوجارية

اعترافات المستخبية :)

هناك 15 تعليقًا:

صيدلانيه طالعه نازله يقول...

الله عليكى يا ست اعترافات

لو كل زوج و زوجه فهموا بعض و احتوا بعض صح
مكناش حنلاقى خيانه و لا صمت زوجى و لا فتور
ياريت كل حد عنده مشكله مع نصه التانى يتعب نفسه و يدور على اصلها عشان يعرف يعالجها

بعبعه يقول...

لووووووووووووووولي

اعترفات ظهرت يا ولاد

ايوه كده يا اختي اشتغلوا بقى تعبتوووووووني

عارفه يااعترافات

احيانا باستغرب كتير اوي من واحده جايه تفضفضلي مثلا او واحد جاي يشكي من مراته

واقول فى نفسي ياترى لو حصل وهو راح قال الكلام ده لمراته او لجوزها كده فيس تو فيس
يقوله فيه انا عايز منك كده
انا زعلانه منك عشان كذا

كانت خلصت المشكله

موضوع جميل يا اعترافات سلميلى على رجل الكرسي امامي يمين من فضلك

اعترافات هانم يقول...

صيدلانية

:::::::

بالضبط وياريت يكون فيه مساحه للصداقة بينهم

عشان يتفهمو بعض ويقدرو يحلو مشاكل بعض لان من المفترض انهم اصبحو شخص واحد

اعترافات هانم يقول...

بعبعتي حبيبتي

::::::::::::::::::

ههههههههههههههه ايوان اهو ظهرت

بصي هما ممكن يكون نفسهم يفضفضو لازواجهم او زوجاتهم لكن هما مش مدينهم فرصة

تلاقي الراجل من دول بيقول واحده

تعالي ياحبيبتي

هتلاقي رد فعلها خير الله مااجعله خير

يقولها خير خيرر مش تقلقي

تقوله طالما هو خير بتندهلي ليه اما اروح اشوف العيال اصل انا عندي وعندي وعندي

ولو العكس ست وبتحكي لزوجها تلاقي بقي والله انتي دماغك فاضيه ايه اللي بتفكري فيه دا ياختي روحي شوفي العيال


غير الصمت الرهيب اللي بيوصل البيت

مع انهم برا لبلب لكن جوا البيت عيب

طب والله بقول لزميل ليا انت بتكون كدات في البيت

يقولي

ناااااااعم لا طبعا جو البيت لازم يكون ليا برستيجي الكلام بحساب

وحد تاني يقولي كل اما اكلم مراتي الاقيها عامله وش متنح زي اما سمير غانم بيعلم محو الامية

فبقصر وبسكت

كتير كتير

مع ان ممكن مراته تكون ماسكة امها وهاتك يارغي

وحااااااااااااضر هسلملك علي رجل الكرسي

Unknown يقول...

هيا دي مشكلة كل واحد...عشان كده اخترت اسهل طريق ، حياة الوحدة أجمل ماتكون...
و بجد أنا شايف ان الانسان في الوحدة بيكون في احسن حالاته...
تحياتي...

نفسى اكون يقول...

بصراحة يا جماعة اعترافات هانم سابقة سنها بكثير

وبتتكلم فى موضوعات غاية فى الحساسية

انا طبعا موافقها تماما

يعنى انا مثلا فكرت فى يوم من الايام قلت اللة ما انا لما بشوف واحدة وبتعجبنى ممكن ابقى معاها ملاك طيب لية مكنش كدة مع مراتى مش هى اولى

وبدل ما اتشيك واغير فى اسلوبى علشان واحدة عجبانى طيب لو عملت كدة مع مراتى الى عايشة معايا على الحلوة والمرة

وفعلا انا شخصيا عملت كدة

وبصراحة وبقلها للكل واللة مراتك اولى طبعا انا كلامى للمتزوجين واللة بيتك اولى وجرب وانت هتحس بالفرق

طبعا مفيش بيت بيخلى من المشاكل بس ياريت منرميش كل حاجة على الطرف التانى سيان الزوج او الزوجة

كل مشاكلنا تقريبا بتندرج تحت معنى الاحتواء الى اثارتة الصغيرة الكبيرة اعترافات هانم

انا حكيت عن تجربتى الشخصية واللة وبكل صراحة ياريت حد يشاركنا برضة تجاربة علشان تكون الاستفادة اكبر





و

اعترافات هانم يقول...

ELMOSTAFZ

::::::::::::

بالعكس الوحدة بتخلي الانسان من جحواه هش ومش في ثقة في نفسه وانطوائي

اكيد هتكون في احسن حالاتك مع انسانة تحتويك صح ولا مش صح

انت دلوقت شايف انك احسن لكن هل نظرتك دي هتكون هي هي نفس النظرة في الفتره الجاية ؟؟؟؟

اعتقد دي في علم الغيب لا انا ولا انت حتي تقدر تعرفها

لكن انا ضد الوحدة لان الطبيعه البشرية حتي الدين بيحس علي المعاملة الحسنة والابتسامة واننا نكون متحابين في الله

اعترافات هانم يقول...

نفسي اكون

:::::::::

يالهوووووووي احرجتني جامد والله

كلام حضرتك بجد شهادة تقدير ليا ميرسي ليك كتير

ومبسوطة انك كتبت تجربتك واكيد معاك حق في كل كلامك

وياريت نسمع تجارب الناس كلها عشان كلنا نستفيد

بس انا عارفة محدش بيبعبر مواضيعي عشان مش فيها كلام ..... مع ان المعامله الحسنة برده مهمه جدا في التعامل


ميرسي لحضرتك مره تانية

نفسى اكون يقول...

هبدا انا من حيث انتهيتى

(بس انا عارفة محدش بيبعبر مواضيعي عشان مش فيها كلام ..... مع ان المعامله الحسنة برده مهمه جدا في التعامل )

لا هو مش بيعبروا علشان مفهوش كلام سكس لا اصلا انا هقولك الموضوع دة معنى بة اكثر الستات يعنى قولى بداية من 30 والرجالة تقريبا الى فوق 35

ولان زى ما انتى فاهمة الستات الى بيزورا المدونة يدوب 17 18 سنة بالكثير

والرجالة تقريبا معدوش 30سنة علشان كدة محدش بيعلق

ههههههههههههههههههههههههه

اولا لو جيتى شوفتى المشاكل والطلاق الحاصل هتلاقى 75 % على الاقل سببة مشاكل متعلقة بالجنس وان تنوعت بقة الاسباب

خدى عندك من يومين واحدة رافعة على جوزها قضية طلاق لقتة مع واحدة على سريرها

فى المحكمة جوزها قدم الاب توب الخاص بيها شات من رجالة ودخول على مواقع جنسية

كان ردة ان جاب لها واحدة على سريرها

تعالى بقة لموضوع الاحتواء هو لو فىية احتواء ممكن يكون فى كدة

لو هو بيحتويها وقريب منها وحاسة معاة بالامان كان ممكن تعمل كدة

طبعا دة مش مبرر ليها بس احنا بنتكلم على الاحتواء اصلة معنى كبير بيشمل كل حاجة

انا مش هطول بس انا عندى مصايب بسبب غياب الاحتواء هكتفى بس النهاردة بدة

اعترافات هانم يقول...

اولا لو جيتى شوفتى المشاكل والطلاق الحاصل هتلاقى 75 % على الاقل سببة مشاكل متعلقة بالجنس وان تنوعت بقة الاسباب

*************

معلش رغم اني محرجه موت اصلا اني اتكلمت في نقطة زي كدا لكن تفتكر ان لو مش في احتواء وود وتراحم ومحبة والفه المعاشرة هتنجح ؟؟؟؟


*********


انت فسرت اللي عاوزه اقوله في المثل اللي ذكرته

وانا هقولك مثل من عندي ويمكن كمان المثل دا اثر عليا فترة اني رافضه اتجوز بسببها

اتنين كانو بيموتووو في بعض وقرايب وحب دام من وهما في اعدادي لحد الجامعه وبعدها اتجوزو

تخيل يسافر ويسيبها ويبعتلها مثلا ان افتكر 200 جنيه كل 6شهور رغم انه بيقبض كويس

لدرجه انها بتقعد بالايام مش تاكل لانها بتتحرج تاكل عند مامتها او عند اي حد

وقبل اما يسافر كانت والده قيصرية

وتاني يوم من الولاده وقدامي بيضربها عشان تقوم تروق مع اخواته حتي في اصعب لحظه ممكن الست تكون فيها محتاجه لضمة هو مش احتواها فيها

وصلها لدرجه انها كانت عاوزه تموت العيال وتموت نفسها عشان تخلص من الحياه معاه رغم انه لو عاملها معامله طيبة كان في كتير فرق ومش اشتكت ليا او لغيري عن زهقها ومرها وتعبها

مش كانت هتقول ياريتني مااخدته وكنت خدت فلان الفلاني دا بيحبني ولحد الان يتمناني

لما تتكلم معاه يقوم يقولها بطلي رغي بئاانتي مبتزهقيش ولما تسكت يسيبها ويمشي وهي في الاخر كام سنة وهو كام سنة لسه سفاريت

اعتقد ان مش الحب والود بس كفايه للزواج

التفاهم ولغة الحوار مهمين جدا

اني اسمع اللي قدامي باهتمام وارد بنفس درجه الاهتمام سيان اللي بيسمع دا الزوج او الزوجه

لكن لغة الحوار السليمه فقدنها

الموضوع متشعب بشكل كبير وعشان كدا

لحد الان انا مش شايفه الجواز زفه وفرح وفستان ابيض

انا شيفاه مسئولية كبيرة اوي اوي

نفسيى اكون يقول...

الظاهر يا اعترافات البوست دة هيصفصف علينا والباقى هيكتفى بالمشاهدة

المثل الى ذكرتية صعب جدا لانهم واخدين بعض عن حب

وبيحصل كدة امال لو مكنش عن حب كان عمل فيها اية

بس هرجع واقولك هو لو تخيلها اختة ولا بنتة عمرة ما كان عمل كدة


علشسان كدة اعطيها لصاحب الدين ان احبها اكرمها وان لم يحبها لم يهنها

معتقدش ان فى راجل عندة دين ونخوة يسيب مراتة من غير مصروف او يطاول عليها وهى فى اشد الحاجة الية وجسمها كلة مفتح من الولادة

على العموم دة بيجسد برضة معنى الاحتواء

تحياتى وفية قصة برضة واقعية بس المرة الجاية بقة علشان وجعنا دماغ الناس الى بتخش تقرا وتطلع

هههههههههههههه

اعترافات هانم يقول...

الظاهر كدا فعلااااااا هههههههه

اهم نقطه في اختيار الانسان بيخاف ربنا وبيتقيه ولا لا

بس للاسف في ناس كتير مش بيهمها النقطة دي دلوقت


وماشي نخلي المثل المره الجايه باذن الله

بعبعه يقول...

حلو اوي اوي ايه الهيصه دي
ههههههههههه

منورين يا رجاله


بت يا اعترافات خدي بالك من عمك الحاج نفسي اكون (حلوه عمك الحاج دي ملعوبه صح ؟)

اصله صديقى اللدود وانا عارفاه

لا واخدلي بالك انت من جسمها مفتح من الولاده
ههههههههههههههههههه

حاسس بيها انت يااخويا

قلب الام اليمين اشتغل معاك

انا متابعه الامثله اهو

معاكم للاخر يعنى جو اون

الفارس يقول...

والله معاكي حق
لو كل زوج أحتوى مراته وكل ست إحتوت جوزها مكناش سمعنا عن الخيانه الزوجيه وكمية حوادث الطلاق اللي كترت الأيام دي
وأكيد ده حيعود بالنفع على الأولاد في تربيتهم وفي سلوكهم النفسي

نفسى اكون يقول...

بعبعة اخيرا نورت المدونة الظاهر المرة دى هى الى كانت تحت الكرسى مش اعترافات

وبعدين اية التقطيع الجامد فية دة ماشى ماشى

مش انتى عملتى المدونة علشان الناس تبعبع كلامى انا الى وقف فى زورك

ههههههههههههههههههههههه

شوفى بقة يا اعترفات تواصلا لمعنى الاحتواء

عندها 3 اولاد زوجها عمرها ماسالها بتجيبى فلوس بتصرف فى البيت بتجيب لبس عمرها ما كلف نفسة وسالها

واخد بالة من نفسة على افصل ما يكون وبيدخل مفيش حتى كلمة حلوة

امنيتها يدخل زى اى زوج يبوسها يضمها لصدرة كلمة طيبة تقرب بدل ما مليون تصرف بيبعد

النتيجة عدم وفاق شجار دايم كل واحد فى اتجاة حتى العلاقة الحميمة الى المفروض بتقرب بقت عقاب بالنسبة لها

كرهتة اتمنت لو رجع بها الزمن واختارت غيرة من الاف الى كان يتمنوها

هو عايش حياتة شغل ونادى وجم وصداقات هى حبيسة بيتها والمامها

لو فية احتواء مش هقول من طرف اكيد البعد لة اسبابهة من الطرفين

بس لو فية احتواء كان ممكن يوصلوا للحالة دى انا شخصيا مظنش

اقسم باللة ان دى حالة واقعية مش تاليف

بس علشان نجسم معنى الاحتواء