الأربعاء، 18 أغسطس 2010

أنا حلوه وعارفه ان انا حلوه :)

لا مش انا يعنى انا  لا يعنى استنوا هاتفهموا ...

ايه ده  ؟؟ لا  ماهو ده ما يمنعش برده ان انا حلوه وعارفه ان انا حلوه هههههههههههههههه


 ندخل فى الموضوع بقى 

تعالوا النهارده نتكلم عن عقده لاحظتها عند البنات


والله هى مش عقده واحده دى عقد كتير كتير وبشنيطه كمان

بس العقده الى هاتكلم عنها النهارده هى عقده هبله جدا جدا

وهى هيفا وهبي ونانسي عجرم

ايوه صدقوا بتحصل  فى اهبل المجتمعات

مش عارفه البنات مخهم تعب تقريبا ولا هو الشعب كله اصلا مخه تعبان مش عارفه والله

بيجيلى رسايل كتير من بنات الى تقولي انا متعقده من نفسي اصل انا رفيعه والى زعلانه  اصلها تخينه
والى بتقولي مش عارفه اصل طالعلي حبايه تحت حاجبي الشمال
والى بتسأل على عمليات النفخ والشفط

هبل فى هبل  من الاخر

وده كله لييييه

بسبب قاعدة البنات قدام التلفزيون يتفرجوا على الممثلات والمغنيات الى بيطلعوا على الشاشه قدامهم ملمعين اخر حاجه

والاهبل من كده ان الشباب كمان عايز واحده تكون زي الي بيشوفهم فى التلفزيون برضه ومش عاجبه أي حاجه

افهم فى دول ودول يا شوية هبل الممثلات دول عشان يطلعوا على الشاشه ياخدوهم سكينه معجون كامله  ده غير انهم بيشدوا وشهم على القالب اد اسبوع قبلها

وشغالين ولا العجلاتيه نفخ وشد وعمليات وبلاوي سوده

بكل بساطه يا بنات احنا مخلوقين كده مختلفين

مختلفين فى الشكل والتفكير وكل حاجه مافيش حد فينا زي التاني ابداااا

ما تبصيش للهبل بتوع التلفزيون الله يصلح حالك وتعقدى نفسك دول فى الاساس ما تحبيش تبصي فى خلتهم

انا كل من شوفتهم من الفنانين على الحقيقه  قلت يا لهوي ده احنا كنا بنتاكل على قفانا زمن بحاله

صور الفنانين قبل وبعد عمليات التجميل ماليه الدنيا ابقى دوروا عليهم وشوفوهم

ولاي راجل عبيط بيبص على الستات بتوع الهشك بشك وبيلعن ابو اليوم الى شاف فيه وش ام العيال

اصرف على مراتك  يا اخ توم كروز المتنكر ربع الى بتصرفه أي واحده من دول على مظهرها  وهى تبقى احلى منهم كلهم

والاقرع ياكل حلاوه بفلوسه  يا حليله   ايوووه وده تلقيح صريح على انك اقرع وبكرش اصلا فما تتكلمش منك له  له

البنات الهبل العبط الى معقدين نفسهم اصل والنبى عندي حبايه فى مناخيرى اصل عندي شعر كتير فى قفايا

اصل انا سمرا  شويه اصل انا رفيعه اصل انا هبله  كل ده عااااااادي كل الديفوهات دي وارده

ممكن لو عندك مشكله تروحي لدكتور مثلا ممكن تتعالج وممكن لا

حبي نفسك زي ما هى .. حسى بجمالك ا نتى اولا .... عمر ما حد هايبصلك ولا يحس بجمالك الا لما تحسي انتى اصلا بجمالك

عيشى فى الدنيا بمبدأ  انا حلوه وعارفه ان انا حلوه 


مش باقولك اتغري بنفسك انما حسى بقيمة نفسك... يا بنتى ان ما كانش يجى الشاب الطرب بتاعك بسلامته وانتى عاجباه زي ما انتى كده ويحبك زي ما انتى يبقى بلاش منه

ما تقلقيش كل فوله ولها كيال زي ما بيقولوا

مره واحده من البنات دول قالتلى بصراحه كده انا حاسه انى مش سكسي وانى لو اتجوزت مش هاعجب جوزي

اه طبعا لازم عشان تحس انها سكسي انها تكون نافخه وزارعه سيلكون ويا حبذا لو كانت بترقص بلدي

اه ماهى بتيجى كده فى الافلام

نرجع تاني للامثال مش عارفه طالبه معايا خالتي بمبه ليه

المثل بيقول يا وحشه كوني نغشه يا اختي

وانتى اصلا اصلا مش وحشه انتى حلوه وكل  حاجه بس مش واخده سكينة معجون لو يريحك تاخدي سكينة معجون اوك ناخدك سكينه

القصد من المثل ان مش الجمال الى حسب المقاييس العالميه هو الى يعتبر مؤثر بس

بس يعنى حكاية سكسي دي يعنى مش عايزه اقولك انها تكاد تكون مالهاش علاقه بالشكل

قد تكون واحده مثيره فى نظر واحد لكن فى نظر حد تاني يشوفها شبه ام السيد الشغاله
واكم من ناس تبصيلهم وتقولي عاجبه فيها ايه الاهبل الى هايموت عليها ده
ده حتى سوده وبضب وعرقوبها يدبحوا به الفرخه

عادي انتوا مالكوا الراجل عاجبه كده

المهم فهمتوا يعنى ولا ايه  ... عندي احساس انكم مش فاهمين حاجه

الهي يخليكوا يارب بلاش تفكروا فى الفنانات خالص

ولا الفنانين برضه عشان ترضوا تجوزوا الرجاله الى متوفرين دلوقتي

ويا بابا انت وهو قبل ما تبصوا على نانسي وهايفا واخواتهم فى الرضاعه ابقى كل واحد فيكم يهز نفسه كده لحد المرايه اولا ويشوف احلى يمامه هاتتجوز الغراب  على ايه

وكمان يضرب ايده فى جيبه كده ويشوف معاه كام من حق نيو لوك واحده بس للمودام لو كانت شبه نانسي

انتهى  ... الى بعده

هناك 40 تعليقًا:

إنـســـانـة يقول...

ازيك يا بعبعة كل سنة وانتى طيبة

كلامك صح فعلا بس انا اصلا مش موافقة على مقايس الجمال العالمية الواهية دي ، اللى بتقول إن الرفيعة أحلى من التخينة وان البيضا احلى من السمرا وان اللى شعرها طويل احلى من القصير و و و

أساساً مافيش واحدة ست وحشة .. مجرد إمكانية كونها ام بيخليها حلوة على الأقل فى نظر أولادها

الكلام ده عايز قناعة وحب وثقة بالنفس ورضا عن ربنا ورضا عن كياني نفسه .. حوار طويل بس لابد منه

الحلاوة كمان مش حلاوة شكل بس ، الروح مهمة جداً خصوصا فى الزواج ماهو مش هيتجوز منيكان فى فاترينة دي إنسانة لحم ودم وروح وقلب ومواقف و حاجات كتيرة أوي

دور البنت فى القصة دي إنها ما تبقاش فاضية من جوا ومعتمدة على شكلها وبس .. لازم تبقى حلوة من جوا فاهمة نفسية الراجل بتحاول تفهمه ، بتحاول تسعده .. وهو كمان نفس الحوار ، فى ستات كتير حلوة ومتجوزين رجالة عادين جداً ولو سألتيهم تقولك بيحتويني وبيفهمنى وبيقدرني

الإنسان روح بيرتبط بروح تانية .. لازم الروح دي كمان تبقى حلوة عشان الحياة تبقى حلوة ، وصدقوني مافيش حاجة بتحلي الحياة قد الروح الحلوة الطيبة الراضية .. الجمال مع الوقت الزوج بيتعود عليه ويبتدي ياخد باله مما وراء هذا الشكل

اعرف واحد عن بيدور على عروسة بروحها الحلوة مش بس الشكل ولو سألتيه ليه مش بتدور على واحدة حلوة يقولك الحلوة بتبقى عارفة انها حلوة فبتتغر وتبقى طالعة فيها

وكمان اعرف واحدة ياما قالولها انتى مش حلوة .. وكانت تقاوح فيهم وتعند معاهم وتحاول تحس بجمالها حتى لو هما مش حاسين على أمل يجيلها راجل بيفهم ويشوفها حلوة زي ماهي حاسة بنفسها .. طبعا هما كانوا بيقولولها كدة من باب الهزار بس الهزار فى الحاجات دي غلط خصوصا من الأهل لانه ممكن يفقد البنت دي الثقة فى نفسها مدى الحياة ، حظ البنت دي إنها مقاوحة شوية ولجأت لربنا والحمد لله ربنا كرمها بواحد شافها حلوة
:)

اعترافات هانم يقول...

ليه ركزتى علي الشكل يابعبعتي

في جمال الروح بيطغي علي الشكل الخارجي

لما تلاقي وش مريح ومنور

هتقولي الله الله ايه الجمال دا

رغم انها ممكن تكون مش حلوة بالنسبة لمقاييس الجمال المتعارف عليها

طب عارفه

انا شكلي هو هو مش بيتغير

بس في يوم انا نازلة في وشي ابتسامة رضا وحاسه اني اميرة بجد

كل اللي بيشوفني يحس دا فيا

لدرجه اني سمعت تعليق من واحد في الشارع بيقول ليدي ليدي انتي مش ينفع تكوني غير اميرة :)

والشغل بيقولولي ساعتها اني متألقة دائما

تعالي بئا وانا نازلة وحاسه اني عادية اوي في الشغل بيقولولي مالك النهارده انتي تعبانه انتي فيكي ايه شكلك عادي النهارده

الجمال

ثقه بالذات الاول لكن مش غرور الفرق بين الاتنين خط رفيع لازم مش نتخطاه لان لو وصل للغرور احنا اللي هنتضر :)

غير معرف يقول...

اللى عاملة توصف فى نفسها وشكلها ناقص تنزل اعلان علشان نشوفهاههههههههههه

ستيتة حسب الله الحمش يقول...

كلام مية مية والله
بس مين يسمع
وارجع واقول فيه مشكلة في البيوت
البنت اللي زعلانة انها سمرا
مش مامتها هي السبب؟
ها تقولي مش الأم بس
اه موافقة
العائلة كلها
ها تقولي الإعلام
اقول لك مفروض يكون البيت وشخصيته اقوى من الإعلام يا إما يكون فيه خلل

البنت اللي شايفة نفسها وحشة وكلها ديفوهات
غيرها يشوفها جميلة بأمارة ايه؟

والبنت اللي عقلها يوزن بلد
تتجوز واحد هايف وبتاع هيفا تعمل بيه ايه
ما بيت بابا احسن وكله طراوة ومفيهوش حرقة دم
ولا إيه

تحياتي

richardCatheart يقول...

هههههههههههههه والله حاجه تضحك

ماطول عمر الحلوين فى التلفزيونات والسيما بالعكس كانو زمان احلى بكتير

ياعنى انا بعتبر هيفا من اجمل الستات بس حطيها جنب نورا المعتزله مثلا او المرحومه مديحه كامل مين يكسب بالعقل

المشكله هى القلع اللى بقى بالهبل
زمان كان لازم تشوفى فيلم سينما او فيديو
وتطلع الغلبانه بقميص ولا ميوا
دلوقتى لاءالعرى هبلهم طيب خلى وحده فيهم تلبس جلبيه كده وشوفى هاتسوى كام
ادى هيفا مثلا فى دكان شحاته اقل من اقل وحده مش عارفه ليه البنات بيعملو بروماجندا ليهم هما اللى بيرفعو سعرهم

حتى دول مش مش اساس ان كانو حلوين فادول شواذ لقعده اساسها نشوى مصطفى وعبله كامل وغيرهم شكلهم زى الشعب المصرى دى القعده

يا بنات احترمو نفسكم وادوها حقها

غير معرف يقول...

ومن يبدل نعمة الله من بعد ما جاءته فان الله شديد العقاب

العبرة بالفهم مش بالشكل وإللى بيغيروا خلقة ربنا .. ربنا بيتوعدهم بعقاب شديد لإنة بيعتبر التغيير فى الشكل عدم رضا بالخلقة إللى هيا فى الأصل خلقة ربنا

الستات المصريات خايبيين فالحين بس و هما خارجين يتزينوا للى فى الشارع و فى البيت مش مشكلة بقة ماحنا مع بعتينا ..؟؟؟؟ !!!!!!!!!
و تتعجب هوا جوزها بيبص لية
المصريات مابيعرفوش يرضوا أزواجهم جنسيا ولما الراجل يفكر يتجوز تانى يحثاً عن ماهو مفقود و فى الحلال يبقى ابن ستين فى سبعين و غدار و و و
على الرغم من انة حلال ربنا محللة
أكتر الستات هما إلللى بيخلوا رجالتهم يبصوا برة بيدفعوهم دفع
و أعرف واحد مراتة تحل من على حبل المشنقة بس داير على حل شعرة لسببين
الغبية مراتة بتساومة و ساعات بتحرمة من الجنس من مبدأ حاجة تسيطر بيها أو على الأقل تتحكم بيها
فالراجل لو كان طيب و إبن ناس و خايف على العيال فمبيرضاش يهد البيت على دماغ إللى خلفوها
إللى بيعمل كدة الجميلات و إللى 90 فى المية منهم أغبى من ( رمزى بتاع راجل وست ستات )
المرأة المصرية بشكل عام محتاجة تفهم
تفهم تفهم
دة مابينفيش إن الرجالة كمان مليانين عيوب
يعنى ملخص الحدوتة الفهم يا عاااااااااااااالم
مش الجمال أو الوحاشة


خالد

بعبعه يقول...

انسانه

هاختلف معاكي واتفق معاكي

اولا انا كمان مش مع المقاييس وفرضها على الناس

انما موضوع حلوه لكونها ام دي قلقاني شويه حضرتك
انا باحب افصل دايما بين دور الست كام وكزوجه وكست اصلااااا
هو الى انا عايزاه بقى انها تحس بنفسها كست اولا مستقله ملهاش علاقه بحد خالص ولا ام ولا زوجه

حاجه كمان هاقولهالك بجد اول لما قلتي روح بيرتبط بروح افتكرت احمد رزق فى مافيا وهو بيقول روح ايه يا ابونا هو انا هاتجوز فلم رعب
هههههههههههههههه
باهزر مش قصدي والله حاجه

بس انتى عندك حق فعلا الارواح جنود مجنده زي ما قال الرسول عليه الصلاة والسلام

والاخ الى تعرفيه بيدور على عروسه مش حلوه عشان ما تتغرش عليه ياريت يحاول يتكلم مع نفسه عن الثقه بالنفس شويه

وهى مش محتاجه تعاند هى محتاجه بس تحس انها عندها مواطن الجمال الخاص زي ما انتى قلتي

شكرا يا انسانه ونورتي وكل سنه وانتى طيبه

بعبعه يقول...

اعترافات

لا يا حبيبتى مش انا الى ركزت على الشكل والله

هو انا لازم كل مره اقول يا ناس دي رسايلكم ؟؟

انا جتلي حوالي 3 رسايل تقريبا نفس المعنى ده

اصحابهم رفضوا النشر بصغيتهم لكن ما مانعوش مناقشة الامر

فانا قلت اناقش عموما من خلال الرسايل دي

انا مش مختلفه معاكم خالص فى جمال الروح
بس قولي من هنا للصبح
الست تحب برضه تشوف نفسها جميله شكلاا

وتحس ان الناس شايفينها جميله شكلا بصرف النظر عن الارواح بقى وافلام الرعب
هههههههههههههههه

والثقه بالنفس والاعتداد بالنفس هو ده الى انا عايزه اقوله للبنات اصلا

بعبعه يقول...

غير معرف

تقصد مين الى عماله توصف فى شكلها ؟؟؟؟!!!!!

بعبعه يقول...

ستيته

ايوه معاكي جدا فى كلامك ده

بيت بابا طرااااااوه على رايك فعلا

وبعدين انا قصدي كده تشوف نفسها جميله هى اولا

بعبعه يقول...

بتعتبري هيفا من اجمل الستات طب تعالى اوريكى صورتها قبل العمليات والنفخ والبلاوي

بس عموما مش موضوعنا والله بس طول عمر يا قطه نجمات السينما حلوين بس طبيعين

مش مسطره زمان كان عادي واحده تلبس مايو وتلاقي طالع لها حبايه فى رجلها عادي ولا عندها علامه فى رجلها برضه عادي

دلوقتي يا ضنايا الليزر والعمليات وسكينة المعجون الى بياخدوها
بتطلعهم تماثيل شمع مافيش حاجه باينه

ودى المشكله بقى

الرجاله عايزه من ده
والستات عايزين يبقوا ده
مسخره

بعبعه يقول...

خالد

والنبى لانا مسقفالك

بالظببببببببببط

الى انا عايزه اوصله لهؤلاء الهبل ان الرضا الجنسي مش اصله الجمال

وان الجمال لوحده ما ينفعش يبقى مثير على طول الخط

وانا الجمال اصلا نسبي

وان الى مش شايفه نفسها جميله هى الى حماره نعملها احنا ايه

بس برضه الىداير على حل شعره عشان مراته بتحرمه ده ابن ستين فى سبعين ليييييييييه
لانه بيرتكب حرام
يتجوز يطلقها مش مشكله انما يزني عشان يحافظ على البيت والعيال دى مسخره وقلة دين وقلة فهم

والاخت الى بتساومه دي طيب كانت بتاخد كام فى الليله عشان بس نبقى عارفين التسعيره
هههههههههههههههههههه

شكرا لك

Ali Baba يقول...

السلام عليكم

وجهة نظري في الجمال الحسي هي ان مفيش بنت خلقها ربنا غير جميلة أبدااااااا
كل بنت ربنا اداها مقومات الجمال الأولية.
ممكن يكون عندها نقص أو غير جذابة بس دا بيكون بسببها هي أولا و أخيرا زي اهمالها للأكل فتجيلها نحافة مرضية أو انها تكون مفجوعة فتتخن بشكل غير مقبول بس هنا هي الي بإيدها تصلح نفسها.
صحيح في انسانة فاتنة الملامح و دي بتبقي مميزة علشان عندها حاجة مش عند غيرها
لكن الي مش فاتنة عندها ميت سبب وسبب في صفاتها و شكلها يخلوها جميلة و مقبولة
و كل شكل مهما كان يعتبر جمال له طعم.
يعني كل فولة و لها كيال
في الي بيحب التخينة و بيقول عليها مليانة و عفية في الي بيحب الرفيعة جدا و بيعتبرها رشاقة
و في الي بيحب السودا جدا و معتبرها سحر افريقي و في الي بيحب السمرا و بيقول عليها جمال هندي
في الي بيحب جمال الجسم و القوام و غيره بيدور علي الملامح و بس
و في الي بيفضل انها تكون عادية جدا و حاسس انها هي الي هتقدره اكتر من غيرها و مش هتتنمرد عليه
و في الي بتعجبه واحدة خالية من أي سبب للجمال بس بتفكره بحنان الأم.

باختصار لو استوت الاذواق لبارت السلع
مهما كانت صفاتك لازم تتأكدي ان في الي هيعجب بيكي و يقدرك و هيحبك زي منتي كدا و مش هتملي عينه غيرك ابدا.
و صدقوني الغير جميلة بيكون حظها احسن في الزواج لأن كدا ربنا رحمها من التافهين الي بيدورو علي الشكل و بس و الي ربنا هيرزقها بيه هيكون بيفكر فيها كانسانة و اختارها علشان صفات تانية غير جمالها الحسي.
أما البنت الصاروخ الي في منتهي الجمال بتكون معرضة اكتر للنموذج التافه من الشباب الي هيتعامل معاها كجسد أولا و أخيرا و لما تحمل و تولد وشكلها يبوظ هتفقد في عينيه السبب الي ارتبط بيها علشانه و تبدأ رحلة عذابها معاه.
مفيش انسان حظه من الدنيا كامل بالعكس كل البشر اتخلقو و حظهم متساوي بمعني ان في الي حظها من المال و في الي حظها من الجمال و في الي ربنا حرمها من المال و الجمال بس اداها حظها في زوج رائع و ابناء يفرحو القلب و في الي اداها المال و الجمال بس ابتلاها بزوج مفتري أو حرمها من الخلفة مثلا
و في الي عندها كل اسباب سعادة الدنيا بس محرومة من نعمة الرضا و لذة طاعة الله و القرب منه و رغم كل دا عمرها ما هتكون سعيدة أبدا وديما هتحس ان حجات ناقصاها.
و هي دي زيتونة الموضوع :
الرضا
ارضي بنفسك و احمدي ربنا عليها مهما كانت من اسباب تعاستك ساعتها بس ربنا هيكافئك و يعوضك بنصيب اكبر من حظوظ السعادة
و تذكري دائما :لا ينال ما عند الله إلا بطاعته.
تحياتي

Ali Baba يقول...
أزال المؤلف هذا التعليق.
Ali Baba يقول...
أزال المؤلف هذا التعليق.
Ali Baba يقول...
أزال المؤلف هذا التعليق.
Ali Baba يقول...

أنا آسف علشان حصلت عندي مشكلة خلت التعليق الي فات يتكرر ٤ مرات فاضطريت احذف ٣ منهم.
عايزك يا بعبة تعتبريني صاحب مطرح هنا مش واحد معدي و خلاص لا أعرفك و لا أعرفه زي ما قلتي في المعركة بتاعت فارس الموضوع الي فات :)
انا تقريبا قريت كل مواضيع البلوج دي و عجبتني جداا و إن كنت عاتب علي قلة الموضوعات نسبيا يعني شدي حيلك كدا و عايزين نشوف كل اسبوع موضوعين علي الأقل وربنا يعينك و يطرح البركة في البلوج و في مواضيعك
و بكرر رجائي انك تزوري مدونتي كراكيبك انتي و كل معشر المبعبعين ‏
Karakeebak.blogspot.com
انا بكتب فيها انا و صديقي
Dr.treo
رغم ان المواضيع الجديدة متوقفة من فترة و حتي اشعار آخر بسبب ظروف الدراسة ابقي قوليلي رأيك في مواضيعي
تحياتي

غير معرف يقول...

الجمال مهم جدا اما البنت او الست اللى بتشوف نفسها مش حلوة او سمرة اوقبيحة الشكل عمرها ما هتشوف نفسها حلوة لان دية بتبقا ثقة بالنفس

بعبعه يقول...

علي بابا

اتفق معاك بشده ان كل فوله ولها كيال

لكن لا اتفق معاك ان لازم المشكله تكون هى السبب فيها
فى ناس بتاكل كويس جدا وعندهم نحافه زياده
وفى ناس اكلهم عادي جدا وهارين نفسهم رجيمات بس بيتخنوا برضه

لكن زي ما انت قلت كل واحده تتقبل نفسها زي ما هى وتحاول انها تكون جميله اه مافيش مشكله

مافيش مانع ان التخينه تعمل دايت والرفيعه اوي تحاول تتخن
والي عندها مشكله تحاول تصلحها بس من غير ما تكون دى عقدة حياتها تاخد الموضوع عادي

وباكره فكرة ان واحد ياخد واحده مش من وجهة نظره مش جميله عشان ما تتمردش عليه

اصله كده هو عنده احساس اصلا انها مش جميله بس كونها مش جميله ومن وجهة نظره ناقصه حته بتعوض المشكله الى عنده بالاحساس بالنقص او عدم الثقه فى النفس

لكن عموما اتفق معاك فى المبدأ بتاع اختلاف الاذواق

وطبعا طبعا مدونتك وبيتك ومطرحك

وعنيه حاضر هازورك حالا

بعبعه يقول...

غير معرف

ليه بس كده عمرا ما هاتعرف

ان شاء الله لما تقرا موضوعنا هاتغير رايها

غير معرف يقول...

انا غير معرف 3

انا اقصد انا الجمال بيبقا ثقة فى النفس فأى واحدة لازم تثق فى نفسها وترضى بشكلها

hasona يقول...

كل عام وأنتم من عواده
وكل سنة وانت بخير
وأسعدكم الله في عيد الفطر

غير معرف يقول...

بعبعه انا فى موضوع مضايقنى ومش قادره احكيه لحد ونفسي احكى لاى حد لانى مضايقه اوى الموضوع بااختصار حصل مع صديق لزوجى رجل مطلق وعايش لوحده وفى العيد زوجى قالى انو هو عزمه وعزمنى معاه وانامكنتش عايزه اروح والله بس طبعا لاننا فى غربه ومفيش حد نعرفه وزوجى كان مصر انو يروح وقاعد يتحايل عليه قلت نروح وحصلت حاجه هناك مش لطيفه انو الراجل ده مسك ايدى واتحايل عليه نقعد يوم كمان انا خفت اوى وحستو مش طبيعىواصريت انى امشي المضايقنى انو اتصل بزوجى واصر يكلمنى وطبعا لانو زوجى طيب اوى ادانى التلفون انا دمى محروق اوى ومش عارفه اول لزوجى ولا دى حاجه متستهلش ياريت تردى عليه لانى حاسه انى بعامل زوجى وحش من يوم الحصل على فكره انا كنت متبنيه انى ادور لراجل ده لى عروسهوكنت بدورلو فعلا وكلمتلو بنات بس انا مضايقه اوى ياريت تقوليلى اعمل ايه

زوجه حيرانه

بعبعه يقول...

الزوجه الحيرانه

معلش يا حبيبتى ما شوفتش تعليقك الاالنهارده

والله انا ليا راي فى الموضوع ده انى باصدق حدس الست دايما

عشان الست تقدر تمير كويس بين النظره البريئه والنظره الى مش بريئه

واللمسه التلقائيه (والى مش صح برضه) وبين اللمسه الى وراها حاجه مش تمام

جوزك ممكن يكون مخدوع فى الراجل مش ناوي يبيعك له ولا حاجه
ما انا مش قادره افسر انتى ليه بتعاملي جوزك وحش ؟؟
انتى شايفه انه مفرط فيكى ؟؟
عموما معلش جايز يكون مش واخد باله

انا رايي الشخصي انك تقطعي علاقتك مع الراجل ده نهائيا بلطف اولا لو ما نفعش اللطف يبقى بالزجر له والشده شويه مع جوزك

وفهمى جوزك انك مش مستريحه للتعامل معاه
ومش لازم تقوليله مسك ايدى ولا كده لانه فى احتمال انه يصدقك واحتمال لا

واحتمال الراجل ده يكون سيء لدرجه انه ممكن يطلعك انتى الى مش كويسه ويملا دماغ جوزك عليكى لان واضح ان جوزك واقع تحت تاثيره بشكل او باخر

اهربي منه قدر المستطاع ولا عروسه ولا زفت ما تحاوليش تعملي معاه اي كوبري يسبب اي علاقات
وكفى الله المؤمنين شر القتال
واي حاجه تضايقك تعالى يا حبيبتى وانا عنيه ليكى

بعبعه يقول...

حسونه متشكره اوي اوي وكل سنه وانت بالف خير

غير معرف يقول...

انا متشكره اوى يابعبعهانت متعرفيش انا كنت مستنيه ردك بفارغ الصبر يمكن الحكايه ماثره فيه لانها حصلت زمان من صاحب باباوعمو كنت بقولو عمو والله انا كنت فى اولى اعدادى احلفلك بالله انى مكنت عارفه انا بنت ولا ولد ياعنى مكنتش بتشيك ولا بحط حاجه فى وشي ولا كنت اعرف المياصه ولا الدلع فهمانى وانا اصلا بنت عاديه مش ملكة جمال لما حصل الموضوع ده من صاحب بابا بقيت بعامل بابا وحش ولوقت طويل كانى كنت بحسبه مش عارفه ليه حاسه انوكل حاجه بتعيد نفسها تانى المضايقنى انى مش بكلم واقول لحد وحاسه انهم بكده يكونو انتصروا مش عارفه اتخلص من الاحساس ده انا اسفه انى طولت ومره تانيه بشكرك اوى ومن كل قلبي
الزوجه الحيرانه

بعبعه يقول...

زوجه حيرانه

ايه ده ايه ده الموضوع معاكي بقى له اصول واجذور

طيب فى نقط انا مش فاهماها برضه

يعنى مثلا صاحب باباكي عمل ايه

وهل باباكي عرف اصلا بالموضوع ولا لا


والحاجه التانيه
لازم ااكد هنا على نقطه مميته

انتى مالكيش اي ذنب كون ان صاحب والدك اتحرش بيكى على شكل ان كان

انتى ليه بتحاولي تدافعي عن نفسك وانك لا كنتى بتتدلعي ولا كنتى اصلا حاسه بنفسك بنت انتى اصلا حتى لو كنتى حاسه بنفسك فانتى مش مذنبه فى كون هو راجل قليل الادب ما عندوش ضمير وعلى الاغلب مريض نفسي

النقطه الاهم بقى
ليه اسقطى العقاب على بابا ؟؟ هو بابا كان يعرف ان صاحبه هايعمل معاكي كده ؟؟

الاكثر اهميه
موقفك من صاحب جوزك طبعا انا مقدره انه تكرار الماساه مره لان الخبره الى فاتت كانت سيئه ومرعبه بالنسبه لك وعليه انتى ربطيها بالاتي

بس خلي بالك الوضع هنا مختلف

انتى هنا كبيره وقويه وتقدري تدفعي على نفسك فمتخافيش ولا تقلقي اوي كده

وركزي كويس فى تصرفات الشخص ده عشان ما تخليش يوما العقده القديمه تنغص عليكى حياتك
وعموما انا هاعرض مشكلتك على الدكتور عباس ونشوف رايه ايه
وسعيده بكلامك معايا وانا تحت امرك فى اي وقت افتحي قلبك واتكلمي ده هايريحك

غير معرف يقول...

بكرر شكرى واحترامى ليكى يابعبعه بصى ياجميل هو بابا معرفش حاجه طبعا لانى خفت لمااقول محدش يصدقنى وخفت هو يقول حاجه غير الحصل لانو كبير وهما هيصدقو نوع التحرش هى كانت مره على مااتذكر وانا مكنتش ضعيفه انا لمالقتو مد ايدو عليه وحاول يبوسنى ياه فكرتنى بمرحله حولت امحيها المهم زقتو جامد قلتلو اطلع بره هو قالى اصل انت اموره وبحبك مع انو كان مجوز ست جميله اوى جمال الوجه والطباع وعندو بنتين ماعلينا بس متكررتش الحكايه لانى مسمحتش بعد كده انى افتحلو الباب لما حاول مره بعده انا فاكره لما شوفتو من العين السحريه خوفت اوى ومردتش افتح ومرت الايام وهو مازال بيتصل بابا لغيه دلوقتى وزوجتو بتكلم ماما على فترات احيانا كنت ببقه متغاظه ونفسي اقولهم المشكله انى كنت بتصرف لما اسمع حاجه عنه او عن عيلته بشكل غريب كان اهلى بيستغربو بس محدش طبعا متخيل انو عمل كده اما صاحب زوجى فاانا عملت زاى مقولتيلى وزوجى مستغرب طبعا من انقلابى على الشخص بس بردوا ميعرفش او يمكن مش متخيل انا خايفه بس دلوقت اكتر لأنى مجوزه البس نقاب طيب يمكن محدش يقرب منى انا مش عارفه
انا بعتذر بجد انى طولت عليكى وانى ازعجتك بس كنت عايزهحد عاقل احكيلى مشكلتى لانى مقدرش احكيها لحد

مره تانيه اتقبلى شكرى واحترامى

زوجه حيرانه

بعبعه يقول...

بصي يا جميل
انا هاقولك على حاجه انتى شايفه ان ردود افعالك قويه اوي

يعنى المفروض تكوني اهدى من كده

ما كانش فى داعي ابدا ان جوزك ياخد باله اوي كده بالراحه الانسحاب يبقى بالراحه
وخدي بالك برضه الموقف الى حصلك وانتى صغيره دي مش سهل ولازم تاخدي بالك ما تخليهوش ياثر على تفكير

وموضوع النقاب ده مش حل اطلاقا مطلقا

المتحرش مش بيهمه خالص فكرة انتى لابسه ايه
ده هو الى مريض نفسي اصلا
كانت فى واحده صاحبتي
تقولي انا من يوم ما اتنقبت بتعاكس اكتر

غير معرف يقول...

عندك حق والله يابعبعه انا عارفه انو ده مش حل بس اقولك ايه الغايظنى انو المتحرش بيفضل موجود في حياتى يمكن تلقيلى بس طريقه لتعايش مع وجوده غصب عنى في حياتى وازاى اخد بالى ومش اتحط في المواقف دى تانى مرسي اوى ليكى ربنا يباركلك

بعبعه يقول...

زوجه حيرانه

الطريقه الوحيده انك تعتبريه انسان مريض نفسي
وتحاولي تتحاشيه وما تشعريش ناحية الموقف ده باي ذنب شخصي

انتى لا قليلة الادب ولا شجعتيه على انه يتحرش بيكى ولا جوزك او ابوكي سبب مباشر فى مرض المتحرش النفسي


من الاخر يعنى نفضيله وصدقينى اصبح للاسف فى حياة كل منا متحرش حتى لو مافيش تحرش فعلى ممكن اوي تقابلي شخص غبي يتحرش بيكى لفظيا او حتى بعنيه حاجه بقت تقرف

وما عادوش بيفرقوا بين واحده لابسه محترم ولا مش لابسه ولا ماشيه لواحدها ولا ماشيه مع جوزها

تلاقيه زي الحمار كده بيبحلق فى اي ست وخلاص

المهم يعنى اهم نقطه عايزاكي تحطيها حلقه فى ودنك

ان المتحرش هو شخص مريض نفسي ولا اخلاقي من الناحيه دي

والذنب مش ذنبك ولا ذنب اي حد تاني

لان فى منهم بيكون حريص وذكي وممكن يخدعك او يخدع جوزك او باباكي

بالطريقه دي هايمر عليكى المتحرش كنباح كلب وخلصت

وربنا يبعدهم عنك انتى مبخته ليه كده :)

جايدا العزيزي يقول...

كلامجميل وكلام معقول ما اقدرش اقول

حاجه عنه

ايه الموضوع الجميل ده

تسلمى يارب

تحياتى

معتز شاهين - باحث تربوي يقول...

تحياتي على تلك المدونة الرائعة والأفكار الجهنمية
والبوستات اللي 100 100

ويبقى التواصل

جايدا العزيزي يقول...

كل عام وانت بخير

كل عام وانت الى الله اقرب وعلى طاعته ادوم

عيد اضحى مبارك

اعاده الله عليك بالخير واليمن والبركات

ويارب العام القادم تكون عند الحبيب المصطفى

عيد سعيد

تحياتى

ادم المصري يقول...

جمييييييل
.
بس المشكلة ان الزن ع الودان دايما بيكون امر م السخر

ما انا كمان لازم اقول امثال برده .. ولا ايه ؟؟؟
.
.
ياعني انهارده تلاقي الواحد من دول مش لاقي ياكل وشايل موبايل وكل شوية يشترك في عروض الرسايل ويوجع بيها دماغ امي انا
.
.
ولا اللي كل مرتبه في الشهر لا يتعدي الربعميت جنيه .. وصارف نصهم علي القهاوي
.
.
دا غير بقي ان المجتمع فعلا انهارده مقايسه للادب والاخلاف والزوق كل القيم المحترمة اللي كانت بتشكل الشخصية المصرية اتغيرت
.
.
ابن الناس انهاردة
هو اشاب الشيك التنك اللي مصاحب بنات كتير اللي فاتح صدرة ومركب فيهم شعرتين
.
بنت الباشا انهارده
اللي لابسة بادي وشعرها سايح وكل هدومها محصورة في المنطقة اللي فوق الصدر بشوية صغيرة الي ما فوق الركبة بشوية غيرة برده
.
.
.
الرجوع الي الاصل دائما هو الحل الامثل .. انا مش بنادي اننا نرجع لعصور تخلف ولكن التمسك بالمبادئ والتقاليد عمره ابدا ما كان تخلف او جعية .. انما اسمه حفاظ علي الهوية .... لحد انهاردة الهوة الهندية او الهوية الصينية قادرة تصمد قدام الوحش الامريكي رغم التطور والتقدم اللي هما فيه
.
.
تحياتي والسلام

ahmedmystery يقول...

بجد بجد انا اول مره اشوف كلام جرئ اوي كده بس كلو صح جداااااا و تقريبابردو انا بعاني من الناس بيبب حكايه الجمال ده انا بحب واحده الناس بتقول عليها انا احلا منها بس هي مالبه عينيا و ماليا عليا حياتي ربنا يخليهالي يا رب

بعبعه يقول...

جايدا العزيزى

متشكره اوي ليكى

بعبعه يقول...

معتز شاهين متشكره اوي

ويشرفنى التواصل يا فندم وتنورنا دايما

بعبعه يقول...

ادم المصري

انا مش فاهمه ايه علاقة الكلام الى انت قولته بموضوع البوست معلش فهمنى

بعبعه يقول...

احمد

كل فوله ولها كيال وما دام شايفها فعلا حلوه وماليه عنيك ما تسالش فى الناس