السبت، 28 مارس 2009

أنا ما ليش جيرل فريند .. انا كده طبيعى ؟؟؟


ذهلت بصراحه يا جماعه لا لا صعقت لالا هو انا اذبهليت بالفعل لما واحد على خلق ومحترم وعاقل ده انطباعي عنه

ومتدين كمان ووجه ليا السؤال ده


وقال الكلام ده :


انا بابص حوالي الاقي كل الشباب وكل اصحابي الى مصاحب بنت والى بيحب واحده قريبته والى خاطب اصلا وانا الوحيد الى واقف لوحدي كده اسمع كل الحواديت دي !!!!!


طب يعنى انا فى يوم من الايام هاتجوز ولا انا مش نافع معايا حب ولا مش هاعرف احب ولا ايه ؟؟؟


فى منهم قالوا احنا دورنا الحب عشان يطري علينا الحياه اصلها ناشفه ومقندله


وفى منهم لبسولي وش عبد الحليم وقالولي ابدا هو الحب كده جه لواحده من غير مواعيد ولقينا نفسنا بنحب


طيب انا مش عارف ازاي الناس بتدور على الحب ولا فين


ولا الحب لطش فيا وانا ماشي فى خلال سنينى ال 25 الى فاتوا دول


لا انا مش قرد يعنى . لكن برضه مش حسين فهمي فى زمانه انا عادي يعنى شاب عادي .


انا مش قادر اتقبل بعقلي المحافظ ودينى انى اعرف بنت من غير خطوبه ولا جواز ولا اي حاجه لمجرد انى داخل احب واجرب هاتمشي الليله ولا لا .


وفى نفس الوقت انا كمان مش ساعات باحس انى متخلف او عندي عاهه او ناقصني حاجه


انا نفسي اتجوز بس حاليا ظروفي مش سامحه وكمان قبل النهارده انا كنت حاسس انى لسه صغير ومحتاج امشي فى الدنيا اكتر واتعلم عشان اقدر اثق فى اختياري لشريكة حياتي .


انا حاليا عندي استعداد اخطب واول ما ارجع مصر هادور على عروسه فعلا


ايوه انا مش بتاع لف فى الكافيهات ولا فى الشوارع ولا اكتر من كده ولا اقل حتى


انا صعيدى وعندي اخوات بنات ولما احب اتجوز هادخل دوغري واتجوز


بس برضه يبقى السؤال انا كده طبيعى ؟؟؟؟


انا ساعات باحس انى كائن فضائي يا رجاله ....



ولحد هنا وساعتها رديت عليه وقلتله عاش الرجال يا بوي انت زين الرجال وعين العقل وسلام شحط محط صعيدى لرجالة هواره يا جدعان


شوفتوا اد ايه الحقايق بقت مغلوطه ؟؟؟


واد ايه الى ماشي صح وعاقل وتمام بقى حاسس نفسه غريب ؟؟؟


طوبى للغربااااااااااااء



اظن ده النقيض من الشخص الى فات


والله يا بت يا بعبعه انى شوفتي خلايق ما لهمش وصف ولا زي


سمعوني احلى كلام للجدع ده والى زيه

هناك 18 تعليقًا:

الفراشة الصغيرة يقول...

مش هقولك اكتر

من انك اكيد انسان جميل وكطيب

وقال الله تعالى الطيبون للطيبات والجبيثون للخبيثات

ما شاء الله عليك

ربنا يحفظك

ماء تشرين يقول...

طب انا هضحكك
عارف انا مره كنت قاعده في احد المواصلات العامه وواحده بنت كويسه والله ومحجبه وعسوله قاعدت جنبى وكان معايا هديه عيد الام جبتهالى واحده من تلاميذى المهم قالتلى اي ده معندوش زوق ازاى يجبلك هدية عيد ام المهم بقولها هو مين ؟ قالتلى البوي فريند وانا بحاول عبثا انى افهمه انو دى تلميذه من تلاميذى وانى معنديش بوي فريند بس تقول لمين وتقولى انا جالىهديا في عيد الحب مش عارفه ايه الدخلو في الموضوع اربعه دبدوب ودبدوب وبرفان وبرفان وعلبه ميك اب مع انها قالت انو اربعه الجابولها عد معايا كده الهدايا وتقولى ولى جابلى الميك اب قولتله ياقليل الادب وانا فى عقل بالى اقول ياعنى قليل الادب انو جبلك ميك اب ومش قليله ادب انك ماشيه معاه
المهم ياعنى حسيت نافسي كأن فضائى
عادى ياعنى

انا طولت عليك بس حبيت احكيلك موقف من المواقف الغريبه والبقت عاديه عند شباب مصر ماعلينا

ربنا يرزقنا جميعا الزواج الصالح ويكفينا شر البوى فريند والجير فريند


تحياتى

بعبعه يقول...

الفراشه الصغيره

يارب منه مليون يا اختي عشان نعرف نلاقي جوازات عدله للبنات

تحياتي ونورتي

بعبعه يقول...

ماء تشرين

طب يعنى برضه هما كام واحد

هى بتبدل فيهم زي الجزم كده ولا ايه

طيب وهو المكياج برضه قلة ادب ؟؟؟
عاااااااتي مش البوي فرند

طيب على الله يجيب لها المره الجايه اندر وير

نورتي يا ماء تشرين

وانا هاروح اجيبه من تلابيبه يرد عليكم

Kiara يقول...

دا عكس اللي فات خالص

هو صح وخليه علي كدا وربنا هيوقفله ناس زيه الطيبون للطيبات

عمرو يقول...

فرق كبير يا ولد عمى يا بوى أنك تتعرف على بنوته و تمشى معاها تحت أى مسمى و بين أنك فعلا قلبك يميل لواحده معينه تسرق النوم من عينيك و تخليك تقول طول ما أنت ماشى : على حسب وداد جلبى يا بوى راح أجول للزين سلامات !!
بمعنى تانى يا أبو خالو أن لو قلبك ماملش لأنثى و أنت فى هذه السن فيبقى فيك حاجه لامؤاخذه مش صح بغض النظر عن اٍذا كانت ظروفك تسمح بالاٍرتباط بيها و لا لأ لأن الطبيعى أن يميل الذكر و الأنثى لبعضهما البعض شعوريا فى البدايه اٍلى أن يأذن المولى و يفضى بعضهما اٍلى بعض لو سنحت ظروف الزواج الشبه مستحيله هذه الأيام ..
يا وله ده الحب جميل يا وله .. يا واد أنت يا وله ده الحب حلو و يخليك تحس أنك بنى آدم يا وله بس أنت اٍخلص النيه لله العزيز القدير بأنك تنوى تتجوز فى حلال ربنا و هو أكيد حيوفقك يا أبنى و ييسر لك الأمور ..
ربنا معاك يا أبنى أنت و اللى زيك ..

غير معرف يقول...

بعبه ممكن من فضلك تضييفى ايميلى محتاجه ابعبع معاكى شوييه
دة ايميلى
rahmaa222@hotmail.com

بعبعه يقول...

كيارا

ااااه طبعا هو صح يا جميل

بعبعه يقول...

عمرو

كلاالبت ايه ده يا بوي

كده هاتخلي الراجل يمسك فى خناقي

لا لا هو فله بعون الله

هههههههههههههههههههه
ايه ده هايجتلوني يا بوي كده

هو بس حقيقى مالوش فى حب الشوارع

مش عيب ده يا عمرو

وان شاء الله يحب ويعد النجوم وكل حاجه
لكن في حلال وعلانيه مش يسرقها

بعبعه يقول...

غير معرف


يا حياتي الاميل عندك على صفحة المدونه بره

بس اميلات بس مش بافتح الماسنجر بتاعه

تحياتي ليكى

Remas يقول...

بجد المدونة جميلة جدا وفكرتها عسولة اوي

انا بالنسبة للشاب دا فهو من كتر ما شاف الغلط حس ان اللى هو فيه مش صح

وانه مختلف مع انه هو اللى هايعرف يتجوز وهو اللى هايكون سعيد بجوازه ومراته ولا هاشك فيها ولا هايقارنها بواحده تانية لانها اصلا هاتكون اول امرأة في حياته وللمرأة الاولى وهج خاص

مدونة رائعة أََحييكى عليها

فشكووول يقول...

السلام عليكم يا صاحبة البعبه
تحياتى
قصه والله جميله سواء حدثت او كانت من وحى الخيال .. لو نحاول مره نجرب الحياه باحاسيس ووجدان نلاقيها اجمل من كل شيئ
آهى الست كانت زهقانه من حياتها ويادوب ورده وقميس نوم احمر .... اللهم صلى على النبى
تحياتى

بعبعه يقول...

ريم

تمام كلام الله يفتح عليكى

شرفتينا

بعبعه يقول...

فشكول

عليه افضل الصلاة والسلام

بس مين يفهم ومين يقرا


بس التعليق اعلى البوست يا اخ فشكول

ياريت تبقى تشرفنا بالتعليق تاني على الموضوع التاني

Unknown يقول...

مهما كان طول البوست
بس طريقة سردة تحفة
وهايل جداً تسلم ايديكى

ذو الوجه المبتسم يقول...

اعتقد الى يعيش اللحظه دي يبقى هو السبب الاول فى انه عاشها
ويستاهل كل الى يجراله
ههههههههههههههههههههه
ده بجد مش هزار والله

ملقتش احسن من ردك علشان ارد به
بس تفتكرى ايه الحل

تقبلى تحياتى

بعبعه يقول...

اصحي يا مصر


متشكره لك

بس اعترافات الله يصلح حالها عامله التعليق اعلى البوست ان شاء الله اغير التمبلت ده وابطح اعترافات قريب

بعبعه يقول...

ذو الوجه المبتسم


اااااااه طبعا يستاهل

انت عاوز الحل فى ايه فى البوست بتاعك ولا البوست بتاعي هنا


والتعليق اعلىىىىى البوست الى ان يحن عليا حد ويدينى موقع فيه تمبلت حلوه