السبت، 30 مايو، 2009

التربيه الجنسيه للاطفال حتى عمر 9 سنوات




بسم الله يا جماعه هانبدأ الكلام عن التربيه الجنسيه

وفى الاول احب افهمكم يعنى ايه تربيه جنسيه


لان زي ماانتم عارفين ان احنا اول ما نسمع اي عباره فيها كلمة جنس على طول نتكهرب ونقول اااااااااه قلة ادب بقى
التربيه الجنسيه مسمى مش ملحوق على الجنس الى هو العمليه الجنسيه نفسها

ابسلوووووووتلي لاء

انما التربيه الجنسيه نسبه للجنس من حيث الذكر والانثى يعنى
من اول الطريق الى هنبدأه النهارده ان شاء الله لحد لمااااااااااا نوصل لاخر فصل من فصول التربيه الجنسه وهو العلاقه الجنسيه


اه صدقوا هو ده اخر فصل


ودلوقتي بقى نبدأ فى الموضوع


وهو نقول ايه للاطفال عشان نبقى بنربيهم جنسيا


فى البدايه هانتكلم عن العمر من


سنتين او حتى اقل لحد سن الست سنوات


فى الفتره دي بقى تعملي ايه


اولا لازم دايما توجهي الطفل لجنسه


بمعنى يا حبيبى انت ولد ما تلبسش توكه زي البنات

انت رااااجل خليك نااااااشف اخشوشن ياااااض كده يعنى

وللبنت برضه انتى بنوته حلوه فى بنوته تلبس كرفته بابا انتى هبله يا قطه

لازم الطفل يعرف جنسه وانه يفترق عن التاني

ولما يوصل لسن 3 سنين لازم يعرف ان يحافظ على نفسه وجسمه خصوصا لو هايروح الحضانه

تقولي له يا حبيبى ده البوتي ولا التوتي ولا اي اسم بقى انتى حره عيب اي حد يشوفه غير ماما او بابا حد غريب لا

والى يقولك غير كده اديله بالبوكس فى وشه

ونفس الكلام للبنت طبعا

فى السن ده كمان لازم تعلميه يستأذن قبل الدخول عليكى او على اي حد قافل الباب ويخطب على الباب ويفهم معنى
الخصوصيه ولما تيجى تغيري هدومك تقوليله اطلع بره عشان اغير هدومي

وهايقولك طب اشمعن بابا عادي قوليله عشان هو جوزي

ونفس الحكايه للبنت نفس الاجابه
وطبعا هنا يبدا الاب يدخل فى الموضوع ويتكلم هو كمان ويقول عشان هى مراتي

لازم يعرف ان الزوج والزوجه لهم خصوصيه ووضع خاص

(ناخد بالنا ان دي اساسا من التعاليم الاسلاميه الايه دي :
يا ايها الذين امنوا ليستاذنكم الذين ملكت ايمانكم والذين لم يبلغوا الحلم منكم)

لازم كمان من سن خمس اربع وخمس تبدأي تعليمه يهتم بنضافته ذاتيا وبنضافة اعضاؤه التناسليه بعد الحمام خصوصا

لان ده بيسبب مشكله طبعا مره دكتور مسالك بوليه قالي انه للاسف نادرا ما تجدي طفله فى عمر الخمس سنين مثلا وما عندهاش التهابات حاده مجرة البول والاعضاء التناسليه الخارجيه

وده بسبب ان الامهات بيهملوا نضافتهم ومش بيعلموها تنضف نفسها كويس وكمان بتصل الموضوع انهم بيخافوا ينضفوا البنت كويس عشان غشاء البكاره

وطبعا ده هبل وتخريف هو يعنى غشاء البكاره مرمي فى الشارع كده
لا طبعا
(ده هانعمله بوست لواحده غشاء البكاره )

ونفس الحكايه الولد برضه بيكون موجود ثنيات على العضو الذكري وبيتكون حواليها فطريات نتيجه لانه مكان رطب دايما ودافي والفطريات تعمل التهابات ومشاكل تانيه فيما بعد

كمان ناخد بالنا ان دي من احكام الطهاره عندنا فى الاسلام :التطهر بعد الحدث الاصغر (بعد الحمام)


بعد كده نيجى لسن الست سنين او سبع سنين هايبدا بقى الطفل ينتبه لحقائق الحياه زي مثلا انه لازم لازم لما مامته
هاتكون حامل او حد قريب لهم هايسأل مامته ويقولها

ماما هو ازاي البيبى جه جوه بطنك ؟؟؟

طبعا مش عايزه اسمع اجابات غبيه بقى وجبناك من جنب الجامع واشتريناك من سوق المعيز والحركات دي المفروض تشرحي العمليه كما يلي :

شوف يا حبيبى انت عارف بيضة السمكه شوف صغننه ازاي اهو الست بيكون عندها فى بطنها بيضه صغنونه كده زي بيضة السمكه وبعدين عند الراجل فى كمان حاجه صغيره كده لازم الحاجه دي تيجى تدخل جوه البيضه الى عند الست وبعدين بامر الله ربنا ينفخ فيها من روحه وتبقى بيبى صغنن اد صباع ماما كده وبعدين تفضل تكبر

فى الغاااااالب خصوصا لو كانت بنت هاتسألك وازاي بيطلع البيبى من بطن ماما ؟؟
بكل بسااااطه قوليلها الستات بيبقى عندهم فتحه كده تحت بطنهم بيطلع منها البيبى

طب هو انا هايطلعلي الفتحه دي امته

لا يا حبيبى الفتحه دي عندك فعلا بس لسه صغنووونه اوي وهى مكانها جمب الفتحه الى بينزل منها البيبى بس ايه خدي بالك اوووووووعى تدوري عليها ولا كلام من ده احسن تتعوري يا حبيبتى احنا بس ننضف نفسنا بعد البيبى بالراحه .

بهدووووء وبساطه من غير ما تجرأيها على المكان ولا تخوفيها خوف مرعب منه

ولو الولد الى بيسأل برضه عااااادي قولي نفس الكلام

ولو اتزنقتي اوي بقى فى سؤال مش عارفاه وخلاص بقى هاتموتي يعنى ما تالفيش هبل بقى لا قوليله طب بعدين اقولك السؤال ده واعملي حسابك انك تدوري فيه فعلا وتلاقي اجابه مقنعه وتاجبي عليه لو سألك تاني او جت مناسبه للكلام
واي سؤال فى الدنيا له اجابه مبسطه

جاوبي ما تتكسفيش من ابنك ولا بنتك بالعكس جرأيه انه يكلمك ويحكيلك
ده من مصلحته ومصلحتك
تعالى على نفسك شويه

ده الى ممكن تعلميه لابنك او بنتك وهو فى السن ده
اه واوعى تفكري انك هاتقولي الكلام ده مره وخلصت
لا طبعاااااا
ده انتى هاتفضلي تعيدى وتزيدى فيه بدل المره مليون مره
خصوصا تحذيرات السلامه
والنضافه كذلك
الطفل بينسى احيانا وبيستهبل احيانا اخرى

مش عشان انتى مكسوفه وقلتي الكلمتين بالعافيه تقوليه مره وتقولي خلصت ضميري

وخلي دمك خفيف وهزري وانتى بتتكلمى فى الموضوع ده ولكن بجديه
عشان الولد او البنت ما تتكسفش منك
يعنى خلي الموضوع يبدو عادي وهاديء ودمه خفيف


حاسه ان الموضوع طول مني لكن ماليش دعوه انتم الى عملتم كده فى نفسكم

عايزه بقى التعليقات من فضلكم تكون مش شكرا وكتر خيرك
عايزه تعليقات تضيف للموضوع وتشاركونا خبرتكم ومعلوماتكم الخاصه بالمرحله دي من التربيه الجنسيه

هناك 17 تعليقًا:

ستيته حسب الله الحمش يقول...

مكونات الجنس في الإنسان

1- الجنس الوارثى: وهو الذى يتحدد إما بتلقيح بويضة الأنثى (التى تحتوى على الكروموسوم "X") بحيوان ذكرى يحتوى على الكروموسوم "Y"، فينتج عنه جنين ذكر تركيبه الكروموسومى الجنسى "XY"، أو بتلقيح البويضة بحيوان ذكرى يحتوى على الكروموسوم "X"، فينتج عنه جنين أنثى تركيبه الكروموسومى الجنسى "XX".

2- الجنس الغددى: وهو الذى يتحدد بوجود الكروموسوم "Y"، وعليه الجين "SRY"، فيتجه نمو الغدة الجنسية إلى أن يصبح خصية. وإذا لم يوجد هذا الجين طبيعياً يتجه نمو الغدة الجنسية إلى أن يصبح مبيضا.
وإذا توفر اثنان من الكروموسوم"X" فقط ، يتم نمو الغدة الجنسية كمبيض طبيعي. وإذا لم يتوفر هذان الكروموسومان كليا او جزئيا يكـون المبيض مشوها ولا ينتج بويضات ، ولا تحدث باقى تطورات النمو الجنسى للأنثى عند البلوغ ، فلا يحدث طمث ولا ينمو الثدى.

3- الجنس المظهرى: وهو الذى يؤدى عند الولادة لتسمية المولـود ذكرا أو أنثى. وإذا كان التكوين الوراثى وتكوين الغدد الجنسية والهرمونات التي تفرزها ومستقبلات هذه الهرمونات فى الأنسجة طبيعيا ، فإن التكوين يكون متجانسا. ولكن إذا حدثت أى اختلالات كما تم شرحه ، فإن التكوين يكون غير طبيعى (تخنث كاذب أو حقيقى).

4- الجنس النفسى وجنس "المخ": يعتمد على طريقة تربية الطفل منذ ولادته وحتى سن عامين ، وهى الفترة التى يتحدد خلالها تكوين الجنس النفسى للطفل ، بالتعرف على نفسه كذكر او أنثى طبقا لمعاملة أهله والمجتمع له. وتوجد بعد سن البلوغ مقاييس نفسية متعددة لتحديد الجنس النفسى للفرد ، حيث توجد حالات مصابة باختلال فى تكوين الجنس النفسى أى فى تعرف الفرد على جنسه. وتظهر نتيجة لذلك اضطرابات فى التصرف الجنسى مثل حالات الشذوذ الجنسى والاستجناس. ومن هنا كانت الأهمية القصوى للتعرف على الجنس الذى يجب تربية الطفل عليه قبل بلوغ سن سنتين ، وذلك باستكمال إجراء التشخيص الصحيح لحالات التخنث، وتوجيه العلاج الجراحى والهورمونى فى الاتجاه الوظيفى الملائم.
وهناك نظريات تفسر بعض هذه الظواهر النفسية بأن لها علاقة " بجنس المخ". إذ أن لبعض الهرمونات الذكرية التى يفرزها الجنين ، تأثير على الاتجاه الذكرى النفسى فى المستقبل. كما ثار حديثا الجدل حول اكتشاف بعض العلماء لاحتمال وجود (جين) على الكروموسوم Xيسبب الشذوذ الجنسى.


وعليه لما نلاقي واحدة غبية بتحط لأبنها مانكير علشان عاوز يعمل زيها ولا بتحط له روج وفرحانة بنفسها

نقول لها مبروك ياأم توتو الواد ها يبقى سيسي محترم ههههههههههههههههه

معلش اسفة على التطويل بس قلت اجيب للناس الرأي العلمي في مكونات الجنس عند الإنسان وان الذكورة ليست مجرد جينات ومظاهر اساسية وثانوية
الموقف اكبر من كده وله عوامل تانية

تحياتي يا قمر

بعبعه يقول...

شوفوا يا ولاد اد ايه العلم نووووورن


تمام يا ستيته الكلام الله يكرم ايوه ياعم ملعبك انا عارفه

بجد اضفتي للموضوع حاجه مهمه جدا ربنا يكرمك

وخليكى شاهده على البلوجريه السيس دول
بعد هذه المجهودات الخارقه بتاعتي وتمقيق عنيا قرايه عشان اكتب البوست ده

عشرين مشاهده ما حدش جبر خاطري بتعليق الا انتى

ولا حد قالي شكرا ولا جو اون

عااااااااااااااااا

يلا معلش مازال هذا المجتمع متخلف
هههههههههههههه

MaNoOoSh يقول...

كلام تمام يا بعبعة.. بس أعتقد نعلم الطفل مش بس حد غريب لا دة احنا نقوله لا قريب ولا غريب غير ماما وبابا.. علشان انتى عارفة يعني لا قدر الله ممكن يبقى فيه قرايب مخها تعبان شوية.


وكمان نقطة مهمة جدا اننا نربي الطفل ازاي بإحساس انه ذكر أو انثى.. يعني فعلا خطر جدا الست اللى ترب لابنها شعره مثلا وفرحانه بيه قوي وتقعد تحطله توك وتسريحات ولا نانصي عجرم.. لان ده بيعمل خلل فى نفسيه الطفل وبيبدا يستحلى نفسه زي ما اتعود ان مامته تستحلاه.

انتى قلتي كلمة صح المفروض الأم تعلم الولد يخشوشن والبنت تسترق (من الرقة يعني).. لان يظهر الوقتى جيل بحالة من الذكور اتربي على الدلع والمياصة ولذلك مش عارفين يعني ايه رجولة أساسا.. لأن الرجولة بتبدأ تتعلم من السن الصغير.


جميل يا بعبعة ومهم جدا.. كملي يا قمر واحنا متابعينك أكيييييييد.. بس انا اجيب العيال لما اتجوز بس ووالله لأقطع عنهم المصروف
هههههههههههههه

ذو الوجه المبتسم يقول...

السلام عليكم

انا جيت علشان اسلم
بصراحة البوست المرة دى رائع ولذيذ جدا
والاجمل كماااان وبدون مجاملة
اسلوبك الهايل فى التبسيط والشرح
برافووووووو عليكى

لكن عاوز الفت النظر لشئ مهم جدا
ان بعض الاولاد الصغيرة
برده بتتكلم مع بعض فى موضوع الاعضاء التناسلية وبيعملوا حاجات غلط
وده طبعا بيرجع لتربيته التى قد تكون سيئة او مهملة من الاب والام

ربنا يبارك فيكى
ودايما تبدعى فى التبسيط والشرح
تقبلى تحياتى

بعبعه يقول...

مانوش

ايوه حبيبتى احنا ما انا قلت ماما وبابا

لكن كمان فيه تيته وجدو مثلا

وكمان فى المدرسه لازم تكوني واثقه مثلا فى الداده والا لو بتوديه حضانه يعمل ايه بقى ؟؟


كل واحده تحذر ابنها بالشكل الى تشوفه مناسب لطبيعة حياتها

بس من غير ما ترعبه من الموقف وتحسسه انها مشكله

مع المتابعه الدايمه منها له وللمناطق الحساسه فى جسمه لو فيها اي حاجه غريبه تتحرك سريعا

بعبعه يقول...

ذو الوجه المبتسم

الله يكرمك ومتشكره على الكلام الجميل


بالنسبه للنقطه الى حضرتك ذكرتها

ماهو ده من ضمن الحاجات الى عايزين نتلافاها انه يكون عنده مصدر معلومات هو يثق فيه عشان ما يحاولش يلجأ لمصادر اخرى مش مضمونه سلامتها


لو كذبت عليه هايعرف يوما وهايبطل يعتبرك مركز موثوق فيه للمعلومات

تحياتي لحضرتك وشرفتنا

عاشقه الرومانسيه يقول...

شوف يا حبيبى انت عارف بيضة السمكه شوف صغننه ازاي اهو الست بيكون عندها فى بطنها بيضه صغنونه كده زي بيضة السمكه وبعدين عند الراجل فى كمان حاجه صغيره كده لازم الحاجه دي تيجى تدخل جوه البيضه الى عند الست

**********************
اثناء مناقشتى مع احد الصديقات عن موضوعك اللى باحيكى على مجهودك اللى بذلتيه فيه
قالت لى الاتى
وايه اللى هيجيب اللى عند الراجل عند الست الجيل ده مبيفوتش
وبصراحه عندها حق
يعنى لو طفل سئل ايه اللى عند الراجل ده يامامى وجه عند الست ازاى هيكون الرد ايه؟

تحيــــــــاتـى

بعبعه يقول...

عاشقه الرومانسيه


ايوه ماهو لازم تقوليله جزء من الحقيقه بس يكون حقيقى

والباقي تاجليه

يعنى ممكن تقوليله ده موضوع طويل هانشرحه بعدين

عادي هاتقبل الفكره المهم يكون الكلام الى قولتيه صحيح

شرفتينا يا ست عاشقه

عاشقه وغلبانه يقول...

انتي عارفه لو كل ام اتكلمت كد\ه مع اولادها مش هاتيجي بعد مايكبروا تشتكي ان ولادها مش قريبين منها
وان البنت مش بتحكيلها عند خصوصيتها
لان هي حطت الاساس الصريح وبنت قواعد للعلاقه بينها وبين اولادها هايخلي في ثقه متبادله وتخلي البنت او الولد يفضل قريب جدا من مامته وبيشركها في خصوصياته وياخد رأيها ويتعلم منها احسن مايشتري من بره
المشكله بقي لو الام نفسها جاهله واقصد جاهله في اسس التربيه دي
ده هايسبب مشكله اكبر
لانها يا اما هاتوصل المعلوه غلط يابطريقه غلط يامش هاتوصل خالص
وده منتشر لان اغلب امهات الجيل الحالي اتربوا علي ان كلمه الجنس حاجه قبيحه ولسه بيوصلوا ده لاولادهم ويتحفونا بجيل جديد
تصوري في ظل التكنولوجيا والتطور اللي حوالينا في امخاخ بتفكر ازاي وتصوري النتيجه الطبيعيه لده...!!

Emad_Harrisburg يقول...

Salam to all
Thank you ba3b3a it’s very good start.

I want to take chance here and say that when we will talk free with kids about sex we have to know the main point is to talk free with no taboo about everything with our kids.
Here are 10 tips for how to talk free with your kids about anything in general
1. Start early.
2. Initiate conversations with your child.
3. ...Even about sex and sexuality.
4. Create an open environment.
5. Communicate your own values.
6. Listen to your child.
7. Try to be honest.
8. Be patient.
9. Use everyday opportunities to Talk.
10. Talk about it again. And, again.
Salam to all

بعبعه يقول...

انا ترجمتلكم كلام عماد على اد فهمي كده يا جماحه



هناك عشر نقاط لازم نرعيها عشان نوصل لحديث حر مع الاطفال بشكل عام مش فى الحديث عن الجنس فقط
وهي

1- البدء مبكرا

2- المبادره بالحديث مع الاولاد (يعنى تبدأوا انتم ما تستنوش لما هما يحتاسوا)

3- حتى عن الجنس والعلاقه الجنسيه

4- خلق جو مفتوح (للحديث يعنى )

5- التواصل مع القيم الخاصه بك (الدين والاعراف )

6- الاستماع لطفلك

7- حاول تكون صادق فى كلامك

8- خليك صبور

9-خلي كل يوم فى فرصه للكلام

10- تكرار الكلام



==========================

شكرا لك يا عماد وكلام تمام ميه الميه

تحياتي وشرفتنا

بعبعه يقول...

عاشقه وغلبانه

فعلاااااا اثرتي نقطه مهمه جداااااا

ان الكلام ده هاخلي مساحة التواصل دايما موجوده بين الام وبنتها وبين الاب وابنه
والعكس كمان

لكن المشكله ان الامهات نفسهم عايزين حد يعلمهم

اها ماهو مش عشان خلفوا يبقوا متعلمين
اطلاقا القطط بتخلف فى الشوارع

وادينا يا عاشقه وغلبانه بنعلم فى المتبلم على ما يصبحش ناااااااااسي
تعبوووووني يا اختي

شرفتي يا قمر

mahasen saber يقول...

الله ينور عليكى يجد

افادتينى فعلا فى نقطه معينه مع ابنى

ربنا يكرمك ان شاء الله

بعبعه يقول...

محاسن صابر


والله يا جميل فكرت فيكى وانا باكتب البوست لانك طلبتيه مني

بس كملي معانا بقى

صبرني يارب يقول...

تمام الله يفتح عليكى

فى حاجه بس احب اضيفها

ان مع كل التوصيات والكلام ده

لازم يكون فى مراقبه جيده من ام فاهمه كويس

مراقبه للطفل وسلوكه الفردي ومراقبه له لو كان خارج البيت

بوست جيد وسلسله ممتازه

mahasen saber يقول...

ربنا يكرمك يا حبيبتى

واكيد مكمله معاكى ان شاء الله

Bola 7elmi يقول...

- البدء مبكرا

2- المبادره بالحديث مع الاولاد (يعنى تبدأوا انتم ما تستنوش لما هما يحتاسوا)




هو دا اساس الحوارات دي كلها ..... عشان نقدر نفهم اطفالنا ونحافظ عليهم نصاحبهم و نحميهم من المعلومات الخطأ و السلوكيات الغلط ومن اي حاجه

بجد مدونتك دي واااااااااو بجد بتساعد كتير امهات تفهم يعني ايه تتواصل مع ابنها ف موضوعات كتير اووووي ناس بتتهرب منها ... وبتتكسف منها ..
والضخيه بيكون الاطفال


شكرا ليكي بجد <<