الأحد، 14 يونيو 2009

مراهقة الصبيان و اللحظات الحرجه ..

مساء الخير أعزائى المدونات و المدونين ..
البوست اللى فات أتكلمت فيه عن جلسة ما قبل البلوغ للصبيان .. و على فكره الجلسات اللى بأتكلم عنها لتوعية الشاب الصغير و تفهيمه ما هو مقبل عليه مش شرط أبدا تكون كلها فى جلسه واحده و لكن ممكن هذه المعلومات توصله على مدى عدد من الجلسات و ممكن أيضا أن تأتى بشكل طبيعى أو تظهر له أنها جلسات عفويه غير مخطط لها من قبل و ده حيفيد كتير فى مدى اٍستيعاب المراهق لها ..
النهارده بقى عاوز أتكلم عن مرحلة ما بعد بلوغ المراهق .. يعنى خلاص تأكدنا اٍن الولد قد بلغ و أصبح رجلا بحق و حقيقى .. قادر على الاٍنجاب و ده شرط أساسى ليحصل على لقب رجل من الناحيه البيولوجيه ..
هنا بقى حنلاحظ تغيرات شكليه و نفسيه على المراهق تضاف للتغيرات اللى لاحظناها عليه و اللى أتكلمت عنها فى البوست اللى قبل ده ..
حنلاحظ عند بعض المراهقين بداية ظهور حب الشباب .. و هى علامه قد تكون مزعجه جدا للبعض و يشترك فيها الصبيان و البنات على السواء و تزول بعد فتره حين تنتظم الهرمونات داخل الجسد و لا تترك أثرا لو تعاملنا معها بالشكل الصحى السليم تحت اٍشراف طبى لأن لكل حاله علاجها الخاص على حده .. و للأسف قد يستمر اٍزعاج حب الشباب مدى الحياه لو تعاملنا معه بالفهلوه و الحداقه و تفقيع الحبايه و النكش فيها بالأظافر الملوثه لتترك فى النهايه أثرا واضحا و حفر تظل علامات على الوجه و الجسد مدى الحياه ..
أنصح الآباء و الأمهات بالتوجه فورا مع صغارهم لطبيب أمراض جلديه متخصص و مباشرة العلاج فور ظهور حب الشباب على عيالهم و اٍشعارهم بمدى اٍهتمامهم بمظهرهم و خوفهم و قلقهم عليهم ..
لييييييييه ؟؟؟
و ليه أنا بأتكلم فى النقطه دى بالذات باٍستفاضه شويه ؟؟
لأن ده حيكون مدخل مناسب و عفوى للثقه المطلوب أن تنشأ بين المراهق و بين الكبار .. و ده حيكون ربما أول تطبيق عملى لمدى الثقه بينهم .. بخلاف طبعا أهمية الحفاظ على صحة الأبناء ..
مرحلة المراهقه عند الصبيان ..
و يالها من مرحله ..
و يا طول عذاب البابا و الماما و الجيران و المدرسين و المجتمع و الناس و جميع الأهل و الأحباب يبلغونكم السلام لو ماعرفناش نسيطر على الولد و ناخد بأيده صح و نعدى به تلك المرحله المليئه بالألغام و الشراك الخداعيه التى بيتبادل نصبها المراهق مره و الكبار مره ..
بادىء ذى بدء اٍعلم عزيزى الأب و عزيزتى الأم أنكم بتتعاملوا فى هذه المرحله مع اٍنسان من لحم و دم يملك قلبا شديد الحساسيه و عقلا يتأرجح فى حيره ما بين الأفكار الطفوليه و الأفكار الرجوليه التى تحارب جاهده لتزيح الأولى و تستقر مكانها .. و فى نفس ذات الوقت يوجد بداخل جسده وحش .. وحش بمعنى كلمة وحش .. وحش خرافى رهيب يتمثل فى رغبته و غريزته الجنسيه الجديده عليه و الغير مهذبه و لا مستأنسه بكل قوتها و عنفوانها و اللى هو أصلا مش عارف و لا قادر يسيطر عليها ..
طيب .. واحده واحده كده تعالوا الأول نبص من بره على خريطة حياة المراهق و نحاول نفهمها ..
فى المرحله دى حنلاقى المراهق قد بدأ فى الاٍنفصال وجدانيا نوعا ما عن الأبوين و يمكن عن اٍخوته كمان .. حيبتدى يبقى له العالم الخاص به اللى غالبا مش بيختاره و لكن بيفرض عليه من المدرسه أو النادى أو حتى الشارع ..
حنلاقى المراهق بيبدأ فى أن يكون ولاءه للجماعه .. للشله يعنى بمعنى أصح .. حيغضب و يثور لو ذكرنا قدامه أحد أعضاء شلته بسوء .. حنستغرب من عصبيته الشديده لما الزمالك يتغلب كالعاده مع أن الوله أصلا ماكنش له فى الكوره !! لكن اٍحتياجه الوجدانى للشعور بأنه بينتمى لجماعة ما خلته زملكاوى فجأه و ياللعجب !!
أصبح للمراهق عالمه الخاص .. ربما عالم سرى لا يطلع عليه أحد من الكبار و ربما عالم معلن يتمثل فى ميول و اٍهتمامات مفاجئه قد ظهرت عليه زى الرسم و الموسيقى و الرياضه و الصيد و النجاره و تربية الحيوانات الأليفه و حاجات كتير كتير بيتنقل بينها بسرعه شديده و بعدم تركيز فى أى واحده منهم .. و أيضا حنلاحظ سرعة ملله من كل الحاجات اللى بيعملها ..
المراهق بيحاول لا اٍراديا يثبت رجولته المبكره .. يثبتها بشتى الطرق .. ممكن عن طريق القيام بحركات اٍستعراضيه متهوره .. و ممكن عن طريق الملابطه مع الكبير و الصغير .. و حتى ممكن تصل الحكايه لاٍقامة علاقات مشبوهه مع المنحرفين و الخطرين ..
باٍختصار .. المراهق يا جماعه بيكون فى حالة تخبط وجدانى عاطفى نفسى يشعر بأن كل المحيطين به من الكبار مش فاهمينه و مش قادرين و لا عارفين يتعاملوا معاه .. و هنا تكمن الخطوره كلها ..
طبعا تنشئة الطفل من صغره على التدين و معرفة الحلال و الحرام من أهم الأسلحه اللى حيواجه بيها هو شخصيا بنفسه فترة مراهقته .. يعنى على الأقل حيكون عنده الأساس السليم و المتين اللى حيحميه من الوقوع فى الخطأ نوعا ما .. و لكن ناخد فى الاٍعتبار أنه رغم تدين المراهق فأنه لايزال لسه عرضه لمخاطر جمه ..
المطلوب من الآباء فى هذه المرحله التعامل مع نفسية المراهق اللى بتتغير و بتتطور خصائصها يوم بعد يوم .. و فى نفس الوقت مع جسده الرجولى اللى بينمو و بتزداد مطالبه الغريزيه ساعه بعد ساعه ..
المراهق فى هذه المرحله بيحتاج قدوه رجوليه .. يعنى رجل فى حياته بيتخذه قدوه و مثال يحتذى به فى سلوكه و تصرفاته .. و هل أفضل من الأب قدوه ؟؟ لا طبعا لكن لو كان فعلا الأب قدوه حسنه ..
مثال بسيط جدا : ماينفعش يكون فيه أب مدخن و ينصح أبنه بعدم التدخين بل و يغضب و يثور عليه و يعاقبه لما يقفشه بيشرب سيجاره فى الخفاء ..
و قيسوا على كده .. ده أبسط مثال يعنى ..
كمان ما ينفعش مهما حاولنا أنه نقنع المراهق بأن أمه هى قدوته بسبب غياب الأب لأمر ما .. لأن مهما كانت الأم قدوه جيده للبنات لكن من الأصلح و الأصح أن يكون فى حياة الشاب الصغير قدوه رجوليه .. أكيد مش شرط يكون الأب اللى تغيب عن الساحه لأى سبب لكن ممكن يكون زوج الأم مثلا أو الأخ الأكبر أو العم أو الخال .. كده يعنى .. لكن من البديهى أن يكون القدوه رجلا يستحق أن يكون قدوه و قادر و فاهم و على درجه من الوعى و النضج تؤهله للتعامل مع الشاب الصغير ليأخذ بيده لبر الأمان ..
المراهق تتنازعه فى هذه المرحله الكثير من التغيرات الوجدانيه اللى هو نفسه لا يجد لها تفسير .. و اٍن وجد فبتكون هذه التفسيرات مغلوطه و مخلوطه بتفسيرات أقرانه اللى هم أصلا أشد جهلا منه .. و علشان كده فمن واجبنا أن ننقى فكره و نهيئه قبل أن تترسخ فى ذهنه مفاهيم قد تؤدى به للوقوع فى مستنقع الهباله المحكم اللى سيظل ملازم له مدى حياته .. و مثال على ذلك ما سوف يسمعه من أصدقائه عن فحولتهم و حجم أعضائهم الذكوريه المخيف و المرعب !! و لعلمكم أبصم بالعشره أن هذه النقطه الكوميديه بالذات تسيطر على فكر المراهقين ليلا و نهارا و أزعم أنها من أوائل المواضيع اللى بيلتوا و يعجنوا فيها كل ما يشوفوا خلق بعض ..
نيجى اٍحنا بقى كآباء واعيين نفهم المراهق و نقوله : يا وله ماتديش ودنك للعيال الهبله دى و ما تصدقش لو حد قالك أن بيتمتع بحجم عضو ذكرى قد اللى عندك عشرميت مره لأن ده مش حقيقى .. و العضو الذكرى الطبيعى للى فى سنكم كده بيبقى حوالى من 9 ل 11 سم و بيفضل ينمو و يزداد طولا و غلظه كل ما تكبر لحد ما أقصاه بيوصل لحوالى 15 سم و ده بيختلف من راجل للتانى .. و خد بالك يا أبنى من حاجتين مهمين أوى تحطهم حلقه فى ودنك : الرجوله مالهاش دعوه خالص بحجم العضو و ماتحاولش أبدا تعمل مقارنه بين اللى عندك و بين ما يمكن أن تقع عليه عيناك صدفه فى أفلام اٍباحيه ضاره بكل المقاييس .. لأن يا وله الرجاله اللى بيمثلوا فى الأفلام دى مش طبيعيين لا فى حجم أعضائهم الضخمه و ده السبب فى اٍختيارهم للعمل بمثل هذه الأفلام و مش طبيعيين برضو فى أخلاقهم بدليل موافقتهم على الظهور عرايا على الشاشه .. فيعنى ماتعملش مقارنه أبدا بينك و بين ما تراه صدفه ..
النقطه دى مهمه و الله يا جماعه رغم ما قد يبدو للبعض أنها سخيفه و مالهاش لازمه .. بس بجد مهمه .. لأننا لو بثينا روح الثقه فى المراهق من صغره تجاه هذه النقطه حيفضل عمره يتمتع بهذه الثقه حتى فى علاقته المستقبليه مع بنت الحلال اللى حتتجوزه .. و كمان أدينا نبهناه بالمره لمدى كذب و خطورة هذه الأفلام الاٍباحيه و ننبهه طبعا أن مشاهداتها أصلا حرام و عيب لأنه بيطلع على عورات الغير ..
المراهق البائس فى المرحله دى كمان بيجد نفسه منساق لااٍراديا للوقوع فى هوة ممارسة العاده السريه .. زى ما قلت فى البوست اللى قبل ده مش حنرعبه منها زياده عن اللزوم .. و مش حنقوله حاجات غير حقيقيه .. لكن حنستعمل أقصى درجات الصدق و الواقعيه معه .. حنفهمه مدى أضرارها على صحته الجنسيه فى المستقبل لو أفرط فيها .. و حنوعيه من اٍمكانية أن يحدث له برود جنسى بسببها و مش غلط أننا نشرح له معنى البرود و الضعف الجنسى لدى الرجل .. و أيضا سرعة القذف اللى ممكن فعلا تحدث للرجل بسبب مداومته على ممارسة العاده السريه منذ صغره .. و نأخذ فى الاٍعتبار أنه سوف يمارسها شئنا أم أبينا و لو من باب الفضول و التقليد بل و الرغبه المستعره بداخله خاصة مع كل المغريات اللى بتحيط به من جميع الجهات ..
الأخطر من وقوعه فى اٍدمان العاده السريه هو وقوعه فى براثن الزنا و العياذ بالله خاصة مع تسارع رتم التدهور الأخلاقى فى هذا العصر .. حنفهم الوله أيه هو الزنا .. و حنفهمه أن حدوث العلاقه الجنسيه بغير اٍطار شرعى اللى هو الزواج من الكبائر اللى لا يرضى عنها الله .. و مانسيبوش كده و خلاص .. لأ .. نفهمه أيه الحكمه فى حرمانية الزنا .. و أيه الفرق بين هذه العلاقه المحرمه و بين العلاقه الحلال بين الرجل و زوجته علشان ما يتعقدش من الجنس أصلا كموضوع ..
اٍعلموا يا جماعه اٍن المراهق حين تنهشه الرغبه الجنسيه بأسنانها المتوحشه بيبقى زى المجنون و بيفقد العقل تماما فى لحظه .. و لسه النهارد الصبح قرأت خبرا مؤلما بجد و هو أن صبى مراهق عنده 15 سنه كان بصحبة زوجة عمه و أبنها الطفل اللى عنده 9 سنوات فالأم تركتهم فى السياره فى شارع قصر النيل بوسط القاهره و هو من أشد شوارع القاهره اٍزدحاما و ذهبت تشترى حاجه و لما رجعت رقعت بالصوت لما لاقيت المراهق ماسك اٍبنها الصغير فى السياره و بيعتدى عليه جنسيا !!!
حبيت أسوق لكم هذا الخبر العجيب للدلاله على ما يمكن أن يصل اٍليه جنون المراهق الجنسى بغض النظر عن كونه منحرفا أو لا .. بنكون حريصين جدا فى تعاملنا معه بدون أن نشعره .. بنكون حريصين على عدم اٍعطاءه الفرصه ليخلو بالبنات أو الأولاد الصغار مهما كانت درجة ثقتنا فى أخلاقه لكن مش بنصارحه بده .. أيضا بنحرص على أن لا ينام فى غرفه واحده مع اٍخواته البنات أو مع أشقاءه الصبيان الصغار .. بنحاول على قد ما نقدر نوفر له غرفه لوحده لأن ده كمان حيديله اٍستقلاليه فى شخصيته ..
بننبه على كل الاٍناث فى البيت - بمعنى كل الاٍناث - عدم اٍظهار ما يمكن أن يثير المراهق جنسيا لا بالنظر و لا بالسمع و لا بالشم و لا غيره .. و لا تستغربوا من هذه النقطه لأن المراهق فى هذا السن لا يكون قادرا على التمييز تماما بين ما هو صح و بين ما هو محرم و بيكون طبق الاٍستقبال الجنسى لديه شديد الحساسيه و التأثر و من المرفوض طبعا أن يرتبط فى ذهنه فعل الاٍثاره الجنسيه بأى أنثى من محارمه ..
بنفهمه أن مشاعره تجاه البنوتات من العائله اللى كان بيلعب معاهم سوف تتغير و تتحول لمشاعر تانيه فيها اٍنجذاب عاطفى لم يشعر به من قبل .. ماتخفش يا وله و برضو ما تتخضش لأن ده طبيعى حيث أنك بقيت راجل و أصبحت عندك مشاعر رجوليه فمش مطلوب أن تشعر بالذنب لو حسيت بمثل هذه المشاعر تجاه بنات عمك و لا خالك لكن اٍفهم كيف تسيطر و توجه المشاعر دى وجهتها الصح مع الأخذ فى الاٍعتبار اٍنهم من دمك يعنى عرضك .. و مثل هذه الملحوظه ستبث فى نفس الصبى قيما عليا تتصل مباشرة بقيم الشهامه و الرجوله ..
من المفيد جدا .. أنا طولت عليكم ؟؟ معلش هانت خلاص قربنا أهو ..
كنت بأقول أنه من المفيد جدا أننا نلاحظ ميول المراهق الجنسيه و نسجلها فى عقلنا و نتابع تطورها .. ناخد بالنا الواد ده بيميل لأيه ؟؟ أيه هى مثلا شكل الاٍناث اللى بيبدى اٍعجابه بيهم عفويا من غير ما يقصد ؟؟ أيه هى الحاجات اللى بتجذب عينيه فى الأنثى ؟؟ و أى المناطق ؟؟ ليه بقى ؟؟
لأنه أحيانا الولد يكون بداخله اٍنجذاب لشىء ما غير طبيعى شويه اٍما بسبب جينات الوراثه اللى أخدها من أبوه أو جدوده و اٍما بسبب ميول شخصيه تولدت عنده نتيجة تجارب مرت عليه و أرتبطت فى ذهنه بالفعل الجنسى ..
مثلا ..
لو لاحظنا اٍن اٍهتمام المراهق بأصابع أو قدم الأنثى اٍهتماما زائدا عن المعقول يبقى ده اٍتجاه فى شخصيته مش صح فبنعمل جاهدين على ترجيع اٍهتمامه للاٍتجاه الصحيح و لعلمكم دى مهمه مش سهله أبدا و فى غاية الصعوبه لأن تقويم الميول لدى الذكور فى الكبر تقريبا مهمه شبه مستحيله و فاشله فالأصح تقويمها فى الصغر .. ده مثال لما يمكن أن يكون عليه الاٍهتمام غير الطبيعى بأجزاء معينه من جسد الأنثى لدى الذكر و قد يتطور هذا الاٍهتمام ليكون هو فى النهايه هدف الموضوع الجنسى بالكامل ..
خليكوا حريصين أن عيالكم المراهقين ما يلبسوش بنطلونات ضيقه و خاصة الجينز حفاظا على صحة الخصيتين و اٍفرازاتهم المنويه و لترك الفرصه للقضيب لينمو و يتمدد بغير ضغط عليه .. أيضا بننصح العيال صبيان و بنات بعدم اٍرتداء ملابس داخليه مصنوعه من ألياف صناعيه تسبب اٍلتهابات جلديه خاصة مع قدوم فصل الصيف بحره و عرقه ..
بلاش تخنقوا المراهقين بالأوامر و النواهى الكتيره .. و بالمحظورات العديده .. و بالسماح و المنع على حسب حالتكم المزاجيه .. لو هددتوا المراهق مره بعقاب معين لو أتى فعل ممنوع منه يبقى لازم تنفذوا هذا التهديد مافيش هزار لأنكم لو تراجعتم مره واحده عن تنفيذ تهديد ما يبقى خلاص فلتت منكم كده ..
و لو وعدتوه بشىء فيبقى لازم و حتما توفوا وعدكم له و لو على رقبتكم لأنكم لو خلفتم وعدكم له فى حاجه عمره ما حيثق فيكم تانى أبدا فالمطلوب التروى و الحكمه الشديده فى التهديد و الوعد ..
ساعدوا أبنائكم بكل ما أوتيتم من اٍمكانيات على ممارسة هوايه معينه .. و طبعا الرياضه تأتى فى مقدمة الهوايات و يا حبذا لو رياضه جماعيه .. لأنها من ناحيه ستحافظ على صحة الصغير و تحميه من العادات السيئه كالتدخين و من ناحيه تانيه ستحافظ على شكله و هيئته الرجوليه و تنمى له عضلات سليمه و فى أماكن صحيحه ..
سيبوا المراهق يستكشف العالم من حواليه بنفسه بعد ما نوعيه و نفهمه كويس أوى الصح و الغلط .. سيبوه يجرب ينزل للحياه لوحده و لكن يفضل تحت عنينا الخبيره الأروبه من غير ما يشعر علشان نلحقه فى الوقت المناسب و مش لازم برضو نسيبه يتلسع من النار علشان يعرف أنها بتلسع ..
حذارى ثم حذارى من هنا لبكره من ضرب المراهق على وشه .. حذارى .. القلم اللى حينزل على وش المراهق حيقتل جواه حاجات كتيره أوى .. بل حذارى أصلا من العقاب الجسدى للمراهق لا لما يكون لوحده و لا قدام حد .. كمان بأحذر من التريقه عليه أو على عيب شكلى موجود فيه كأن يكون سمين مثلا أو أن يستخف برأيه لأنه شويه شويه سيشعر بالاٍحباط و سينزوى بداخل نفسه و بعدين يترمى فى أحضان أقرانه بعد ما أبتعد عنك يا حلو على الأقل هم لو أتريقوا عليه هو كمان حيقدر يتريق عليهم بدون قهر ..
متهيألى كده كفايه و أنى غطيت جوانب أساسيه فى التعامل مع المراهق و لو اٍن الأفكار مش مرتبه أوى لكنها مفهومه .. و لو فيه جوانب أو نقاط تانيه ممكن بقى نتناقش فيها فى التعليقات ..
تقبلوا تحياتى و أدعو المولى أن يحفظ عيالنا من كل الشرور و يجعلهم لنا خير راع فى كبرنا و عجزنا خاصة لما نقوم فى نص الليل نطلب قلقاس و رز بلبن :))

هناك 40 تعليقًا:

غير معرف يقول...

ماشاء الله علي حضرتك هو انت طبيب نفساني او متخصص في الاجتماع
هو تخصص حضرتك ايه عشان واضح انك خبير حتي في اسلوب الكتابه

بجد عجبني ملحوظة حضرتك ان الجلاسات دي ماتكنش زي المحضرات تكون بمناسبه وببساطه
وبرضه مش بتجاوز يعني برضه نحفظ المقامات

وموضوع حب الشباب ده من اخطر المواضيع وخصوصا للبنات حيث الوصفات اللي اغلبها غلط
وكمان دكتور الجلديه بيحاول هو كمان يوعي المراهق لبعض الامور وده في حد ذاته مهم وخصوصا ان المراهق دايما بيثق في كلام الغريب والدكتور بالخصوص

وانا بأفضل ان الشله بتاعت المراهق او المراهقه تكون من اصدقاء الاب والام ويتم دعوتهم في المنزل والجلوس والتبسط معهم والضحك وعمل بعض الحوارات اللطيفه معاهم

اما موضوع الافلام كمان السيدات اللي بيظهروا لازم نعرفه انهم مش طبيعين ودول موديل واللي بيعملوه ده تمثيل في تمثيل
عشان فيما بعد مايدورش في شريكة عمره علي الموديل اللي شافها زمان

اما موضوع اصابع واقدام النساء مافهمتوش ممكن حضرتك تقول فيها ايه

بجد الموضوع مكتوب بعنايه شديده وبعين خبيره جدا

ربنا يحفظ اولادنا ويعدوا سن الطفوله والمراهقه علي خير
شكرا علي مجهودك الطيب

بعبعه يقول...

القلقاس جاهز واللللللللله

قول بس انت

ههههههههههههههههههههههه

انا خفت يا عمرو من اول البوست وحسيت انى داخله على حرب على فكره

بس بجد انا خايفه كده من تربية الولاد

استرها يارب
اجيب جوزي يبات هنا فى المدونه يومين بقى

الى نفسي نبطله كمان

اعتبار مشاهدة الافلام الجنسيه من المسلمات
وكلمة ماهو حتى لو قلنا هايشوف
ماااااااشي ياعم بس برضه الوضع بيختلف

بيختلف انه يكون بيعمل حاجه انت مسلم بها وموافق عليها ضمنيا
وحاجه غلط وانت مش موافق عليها

زي بالظبط الى بيدى سجاره لابنه ويقول يشربها قدامي بدل ما يشربها من ورايا

المهم حقيقى بوست رائع جدا

كالعاده فى الجون يا عمرو

وشكرا لك

غير معرف يقول...

بوست كبير كالعاده من استاذ الجيل
بس و النبى افهم حكايه الرجلين و الصوابع ديه عاوزه افهمها
شكرا لتعبك معنا

صبرني يارب يقول...

بوست هايل جدا جدا يا استاذ عمرو مبدع كالعاده

وربنا يكرمكم وفى انتظار الباقي

MADO يقول...

Al salaam to all

Very good post Mr. AMR, it’s very clear you give advice after you tried it by yourself with son, and it’s very clear too you love your son and you are kind father try to teach them in kindly and good way by using science and all of that under good understanding of Islam.

About the women Tues and the strange parts of females I understand exactly what you meant hahhahahah it seem you and your son so close friend or you keep very very close attention on him to can notice that point very very very very good father.

Thank you

Salaam

MaNoOoSh يقول...

انا علشان منمتش من امبارح بس مش قادره اقرا كويس

والبوست مهم جدا وواضح ان فيه نقط فى منتهى الخطورة


ليا عودة بالليل ان شاء الله للقراءة بتمعن.

هبه يقول...

بابا عمرو دوختنا وراك من المدونه دى للمدونه دى و من موضوعات مهمه و مفيده للجنسين.........
ليه سؤال هو ممكن يعنى المراهق يحصل عنده اثاره جنسيه من اللبس الداخلى بتاع مامته ولا اخته لو لقاه قدامه؟
صباحك زى الفل يا بابا.......

ستيتة يقول...

انا قرأت البوست امبارح
ورجعت قرأته تاني دلوقت
ومنبهرة مش بالمعلومة ولا بكيفية معالجتك لها
ولكن انبهاري من بساطة الطرح وقيمته العالية

كانت بعبعة طلبت مني بوست عن ازاي كلمت بنتي عن العلاقة الزوجية
واجد ان البوست بتاع حضرتك طرح وشرح كل اللي كنت ها اقوله

والحقيقة لم اقل لها نصف ما وصفته انت فشكرا لك

بس انت شرحت بأسلوب احسن واكثر نضجا ووعيا
وعليه انا باعتذر عن كتابة بوست لأني اعجز تماما عن التحدث بهذا الشكل الرائع والراقي

تحياتي لشخصك الكريم وكامل تقديري للجهد اللي بذلته ونفعنا كلنا

بعبعه يقول...

انا شايفه فى ناس بتهرررررررررب

كلا البته يا ستيته هاتكبي يعنى هاتكبتي
هههههههههههههه

اااااااااه مش تبدسوني وتخلعوا

عمرو بجد بيكتب اعاجيب وكانى قاعده باتفرج على الحاوي


لكن هو بيتكلم مع ولد وانتى هاتتكلمي مع بنت

ماليش دعوه بقى


هاتكتبي يا استااااااااذه بلاش الحركات دي
ههههههههههه

واحدة يقول...

تسلم ايدك
الكلام سهل وجميل
لكن بقى ساعة التنفيذ
بيبقى فى منتهى الصعوبة !
الخجل اللى قاتلنا ده هو السبب:(

♥نبع الغرام♥♪≈ يقول...

السلام عليكم

عمرو ايه ياعمرو ده كله

عملين وراك من هنا لهنا

بس بجد جميله قووى

بسم الله ماشاء الله هو صحيح الكلام كبير بس مفيد جدآ احيك عليه من كل قلبى

سلمت يدك

عمرو يقول...

غير معرف 1
متشكر لك جدا اٍن البوست عجبك .. و على فكره أنا تخصصى العلمى أشياء بعيده خالص عن علن النفس و هى تتصل باللغويات و الفنون فأرجو أن لا يؤخذ كلامى على أنه من اٍخصائى فى علم النفس لكنه فقط خلاصة شوية تجارب قد مرت بى شخصيا أثناء فترة مراهقتى و صقلتها بتجاربى مع اٍبنى الكبير غير طبعا ما نسمعه و نقرأ عنه من واقع الحياه ..
فكرة اٍن الشله تكون من أصدقاء الأب و الأم فكره جيده للغايه و برضو كنت بأنفذها مع أولادى و كانت فرصه جيده لمراقبة الأصدقاء و فحص تصرفاتهم و سلوكياتهم عن قرب و بأؤيدك فيها تماما ..
بالنسبه للبنات الموديلز فى الأفلام الاٍباحيه فهم أكيد طبعا بيتنقوا نقاوه مش أى كلام يعنى بس ما ينفعش أوى نقول للمراهق كده و اٍلا بنبقى بنثير فضوله و شغفه للاٍطلاع عليهن كالما اٍنهم مختلفات عما يراه أمامه من أشكال .. و لا أيه الرأى ؟؟
متشكر ليك و أهلا و سهلا بيك ..

عمرو يقول...

بعبعه
يا أختنا الفاضله دايما عامر و الله ربنا يخليكى ..
ما هى حرب فعلا ..
أيوه حرب ..
أمال حنحافظ على عيالنا نفسيا و صحيا و بدنيا و عقليا و سلوكيا اٍزاى ؟؟
كده من غير حروب مش حرب واحده ؟؟
و خدى بالك اٍن كل اللى أتكلمت عنه ده مجرد فقط بداية أساسات لما المراهق يبقى مستجد فى البلوغ يعنى لسه الفرش و الحصيره بلغة مقاولين الخرسانه و الكمر و العمدان و الأرضيات و الأسقف و الطوب و الحلوق الزفره و بعدها البجق و المحاره ثم التشطيبات لحد ما يوصل بيت عروسته بالسلامه و يبقى كده اٍنفطم مننا خلاص .. و برضو نوعا ما ..
أوافقك على رأيك بالنسبه لمشاهدة الأفلام الجنسيه و أنه لازم نشعر المراهق بأن هذه النوعيه من الأفلام لا تحتوى اٍلا على ما يفسد العقل و القلب و الروح و الجسد يعنى ننفره منها و لا نظهر له أبدا قناعتنا أنه حيتفرج عليها شئنا أم أبينا .. صح كده ..
متشكر جدا ليكى و بارك الله فيكى ..

عمرو يقول...

غير معرف 2
متشكر ليكى اٍن البوست عجبك بس كبيره عليا أوى حكاية أستاذ الجيل دى :)
حكاية الرجلين و الصوابع : هى مش حكايه و لكنه مثل ضربته على ما يسمى بالاٍنجليزيه Sexual fetishism و هو مرض نفسجنسى معروف و مشهور و يصيب الذكور أكثر من الاٍناث .. و أعراضه أن يتم الاٍشباع الجنسى بالاٍنجذاب بغير عقل واعى لأجزاء أو أشياء غير ذات صله أصلا بالرغبه الجنسيه .. كالقدم التى غالبا ما يصر المصاب بهذا المرض النفسى على تقبيلها و لعقها و لعق ما بين أصابع القدم لشريكه فى العمليه الجنسيه و غالبا برضو يصل لنقطة النشوه مكتفيا بهذه الممارسات الشاذه بغير أن يكمل اللقاء الجنسى بشكل طبيعى ..
و قد ينجذب المريض أيضا لأشياء أخرى فى جسد شريكه كالشعر أو الأذن أو شعر العانه و يكتفى بذلك عن المناطق الطبيعيه الأخرى فى الجسد ..
و ربما يتطور المريض ليصل فى النهايه الاٍشباع الجنسى لديه عن طريق أشياء غريبه مثل الجوارب أو الملابس الداخليه و حتى الأحذيه ..
و ربما يكتفى المريض بنفسه دون الحاجه لأى أشياء أو مؤثرات خارجيه بأن يمارس العاده السريه و هو ينظر فى مرآه حتى الوصول للقذف ..
و هناك نوع آخر من أعراض هذا المرض و هو أن يطلب الذكر أن ترتدى أنثاه ملابس معينه أثناء اللقاء الجنسى لا تمت للاٍثاره بصله كيونيفورم الجيش أو ملابس خادمه أو ما شابه ..
الحقيقه أنه مرض نفسجنسى خطير و تترتب عليه مشاكل لا حصر لها و يبدأ من الطفوله حتى يصبح مزمنا صعب الشفاء منه اٍلا بجلسات نفسيه اٍستبصاريه ..
شرفتى و أهلا بيكى ..

عمرو يقول...

صبرنى يا رب
أهلا يا أم خالد اٍزيك ؟؟
متشكر ليكى جدا ربنا يكرمنا و يكرم عيالنا ..

عمرو يقول...

Emad
متشكر لك جدا يا عزيزى على الاٍطراء و على أن البوست عجبك ..
الحقيقه فعلا أنا و اٍبنى كنا و لازلنا أصدقاء حميمين و هى صداقه قويه بدأت منذ طفولته المبكره .. و على فكره هو كان منجذب لحاجه تانيه و هذا الاٍنجذاب ورثه منى بالتأكيد و سبحان الله فى هندسته الوراثيه :)
أشكرك جدا و أهلا و سهلا بيك ..

عمرو يقول...

مانوش
طيب مستنى تعليقك و أكيد حيكون فيه نقاط هامه تثير المناقشات كالعاده ..
أهلا بيكى

عمرو يقول...

هبه
معلش على التعب بس المدونات قريبه من بعض يعنى ..
أيوه طبعا ممكن تحصل للمراهق اٍثاره جنسيه عند رؤية مثيرات و لو كانت ملابس داخليه لمحارمه ..
زى ما قلت فى البوست المراهق له ظروفه النفسيه و الوجدانيه الخاصه جدا فى هذه المرحله الحرجه يعنى لا يجوز القياس عليها لأنها غير ذات منطق ..
أنصح الأمهات و الأخوات مراعاة هذه النقطه و عدم أخذها باٍستخفاف فما نسمعه من المراهقين قد يعجز العقل أحيانا عن فهمه و تصديقه و لكنها أمور تقع فعلا ..
تقبلى تحياتى و تقديرى ..

عمرو يقول...

ستيته حسب الله الحمش
يا دكتوره و الله متشكر ألف شكر دى شهاده أعتز بها و الله ..
لكن هذا لا يمنع بأى حال من الأحوال أن تحرمينا و القراء من تجربة حضرتك خاصة أنك على درجه علميه مرموقه فأكيد ستكون تجربه ثريه بكل المقاييس ..
سيبك من أسلوب الطرح يعنى أتركيه جانبا لأن ما يهمنا هنا جميعا أن نستفيد من تجاربنا و تجارب الآخرين و نتبادل المنفعه المحموده لصالح الجميع ..
أرجوكى لا تعتذرى عن كتابة البوست و أنا شخصيا فى اٍنتظاره ..
تحياتى و تقديرى لك و أهلا و سهلا بيكى ..

عمرو يقول...

واحده
الله يسلمك ربنا يخليكى ..
أيوه الخجل فعلا حيقتلنا و ليه مش عارف ؟؟!!
يعنى اٍحنا نخجل من أننا نكلم ولادنا بصراحه و نفهمهم مجريات الحياه اللى أصلا ربنا خالقها كده و مش بنخجل من دفن رؤوسنا فى الرمال تاركين العيال لأنواء الحياه بغلظتها و قسوتها و سخافتها من غير درع واقى يحميهم و يحافظ عليهم !!
غريبه دى بجد ..
ربنا يهدى الجميع و يرفع عنهم غشاء الخجل مع أولادهم و غشاء الغباوه مع الآخرين ..
تقبلى تحياتى و شكرا ليكى ..

عمرو يقول...

عاشقة الأحزان
و عليكم السلام و رحمة الله
معلش على التعب يا اٍيناس بس زى ما قلت لهبه هى كل المدونات قريبه من بعض يعنى :)
أنا كمان بأحييكى على الاٍطراء و بأشكرك طبعا و على الزياره و التعليق و أهلا و سهلا بيكى ..

MaNoOoSh يقول...

بجد بجد يا استاذ عمرو انا مش عارفة اقول ايه

انت عارف كويس جدا نفسية المراهق
وعلشان كده بتوصل لنقط مهمة جدا فى حياته

انا هتكلم على اول نقطة شدتني.. وهي "التروى و الحكمه الشديده فى التهديد و الوعد"
هي دى الحاجة اللي فعلا بتأثر علي ثقة الطفل الصغير كمان اللي لسة مبقاش مراهق فى امه وابوه
وناس كتير قوي بتستهين بيها وتتحجج بالظروف والكلام الفارغ ده


وموضوع حب الشباب ده مش قادره اوصفلك قد ايه الاهل اساسا بيستهتروا بيه مع انه بيزعج الشباب جداااااااا وبيسبب لهم فعلا ازمه نفسيه فى ثقتهم بمظهرهم
كمان من موضوع الثقة فى المظهر افتكرت نقطة التريقة على المراهق
ياااااااااا الله.. ما اكتر ما بيعملها الاهل فى الشباب.. يهروه تريقة.. وانا شفتها بعيني كتييييييييير.. وللا موضوع الضرب.. على قد ما بيجرح البنت ويقتل احساسها وثقتها فى الناس.. على قد ما اكيد بيطعن الولد فى كرامته.


اجي بقى لاهم نقطة بتأرقني انا شخصيا نفسيا جداااااااااااا
ازاي انصح المراهق بخطورة الافلام الاباحية بشكل كويس ومستفيض؟ دة سؤال مهم ومحتاجه ليه اجابة تفصيلية طوييييييييلة

طب لما انصحه.. ازاي اقنعه انها غلط وهو بيلاقى اساسا ابوه او الرجالة الكبار بيتفرجوا عليها ويستمتعوا بيها؟

دي النقط اللي على بالي الوقتي.. ومعاكم فى متابعة المناقشة فى التعليقات.. وياريت البوست ده ياخد وقته ويفضل فتره طويله شويه لانه مهم جدااااااااا ومهم اكتر المناقشة فى تفاصيله

عمرو يقول...

غير معرف 1
أعتذر بشده عن عدم الرد على اٍستفسارك بخصوص موضوع التعلق بالأصابع و القدم و ده سهو منى غير مقصود ..
الاٍجابه حتلاقيها فى ردى على غير معرف 2
تقبل تحياتى و شكرى ..

MaNoOoSh يقول...

اه
وحاجة كمان مهمة نسيتها يا استاذ عمرو

انا محتاجة اقرأ بوست طوييييييييييل يخاطب المراهق عن العادة السرية وتأثيرها فى المستقبل.. بشكل بسيط باسلوب حضرتك.. بحيث يفهم من غير لا يخاف ولا يزود الامور عن حدها

ده طبعا بالاضافة للحوار التاني المهم عن الافلام الاباحية وازاى نفهم المراهق انها خطر بشكل يدخل عقله ويأثر عليه

فشكووول يقول...

يا عمروبك
اول مره اعرف واجى للمدونه دى
لا واللى يفقعك ان الواد يقول لك كل شويه هو انا صغير انا بقيت راجل وهو لا راجل ولا حاجه
تحياتى

شمس النهار يقول...

بجد انت كاتب مشوره بجد مفيده جدا
بس مش كل الناس بتعرف تنفذ الكلام ده
للأسف

ياريت كل حد يدخل هنا يحاول ينشر الفكر الجميل البسيط والمحترم في نفس الوقت
بجد انت اتكلمت في موضوع حساس وخطير وفي نفس الوقت بأحتشام وادب وبطريقه علميه بسيطه جدا سهلة الفهم
تسلم ايدك

غير معرف يقول...

عندي كام سؤال محيرني...

1- قرأت في كثير من الكتب أن العادة السرية ممكن توسع غشاء البكارة عند البنت، وبالتالي مش بينزل دم عند اللقاء الجنسي الأول مع الزوج، هل الكلام ده صحيح فعلاً؟

2- وهل ممكن أن يكتشف الطبيب إن البنت كانت تمارس العادة السرية قبل الزواج؟

3- وهل السبب الرئيسي للإفرازات المهبلية والالتهابات هو العادة السرية، علماً بأن عمري 23 سنة و أمارس العادة السرية من 7 سنوات، وباعاني من التهابات مهبلية...

أرجو الاهتمام برسالتي والرد عليها، و حقيقى المدونة رائعة وأتمنى إنك تفيدني في تساؤلي وشكرا لك، وبالتوفيق دائماً...

عمرو يقول...

مانوش
طبعا النقاط اللى تفضلتى و تكلمتى فيها نقاط هامه جدا و حيويه و المفروض كمان أنها بديهيات لدى الأهل و لكن الكثير منهم مش فى الصوره خالص ..
بالنسبه لموضوع مشاهدة الأفلام الاٍباحيه :
فى رأيى الشخصى و أرجو أن يكون صحيحا أن علاج هذه المشكله يكمن أصلا فى أن تقوم الزوجه بتربية زوجها قبل أن تربى اٍبنها !!
لييييييه ؟؟
لأن الزوج اللى هو الأب المفترض فيه شرعا و قانونا و عرفا أنه القدوه الطبيعيه لأبنه المراهق .. يعنى رجعنا تانى لموضوع القدوه اللى تكلمت عنها فى البوست و مش حنعيد بقى الكلام اللى هو أن المفروض الزوجه تكون أصلا أحسنت اٍختيار شريك حياتها اللى حيبقى أبو عيالها ..
خلاص يعنى أخترته و رضيت بيه و تزوجته و أنجبت و لاقيته قدوه غير حسنه لأبنهم ..
أزعم أن الأم عليها أن تقوم و تربى زوجها و تنصحه عشرميت ألف مره أنه يقلع عن مشاهدة هذه الأفلام الاٍباحيه علشان خاطر أبنهم اللى حيقلده فى مشاهدتها و فى التدخين لو بيدخن و فى الشرب لو بيشرب و فى لعب القمار لو بيلعب !!
أيوه ما تستغربيش ما هو ده قدوته .. و مادام قدوتى بتعمل كده يبقى أنا لأ ليه ؟؟ و مادام المعلم الكبير بيتفرج على أفلام ثقافيه يبقى هو صح أكيد و لازم أعمل زيه ..
طيب لو الزوج ما أقتنعش بنصائح زوجته له و أصر على ما هو عليه تعمل أيه الأم ؟؟
تبدأ تشد الولد للاٍتجاه الدينى المعتدل .. تبدأ تكلمه هى شخصيا عن الحلال و الحرام و العيب و الغلط و كده يعنى .. تبدأ هى تتحمل نتيجة اٍنصراف الزوج عن دوره كقدوه و تتحمل هى هذا الدور و لها الأجر و الثواب ..
أيضا تعامل مع الولد بمنتهى الصراحه و تفهمه أن ليس كل ما يعمله الكبار صح .. و مش كل تصرفات الأب بالضروره لازم تكون سليمه .. بدون الذم فى الأب مع المحافظه قدر الاٍمكان على صورة الأب اللى أكيد ستهتز فى نظر الأبن .. لكن حنعمل أيه ما باليد حيله ..
على الأم أن توجه المراهق لضرر هذه الأفلام و على الأب بقى أن نجنبه القيام بهذا الدور لأن الولد مش حيصدقه و مش حتتوفر للأب المصداقيه فى كلامه طالما اٍن المراهق على ثقه من أن أبوه بيتفرج على مثل هذه الأفلام ..
الأم بتفهم أبنها و بصراحه شديده أن مشاهدة هذه الأفلام حرام من الناحيه الدينيه اللى هى أساسا مأصلاها فى الولد .. الاٍطلاع على عوزرات الناس عيب و حرام و ربنا نهى عن هذا الفعل كما أنه نهى عن الفحشاء و المنكر .. و ما يتم من أفعال قبيحه فى تلك الأفلام هى من صميم الفواحش و المنكرات ..
و كمان الأفلام دى حتضرك نفسيا و جسديا لأنها حتعمل لك حاله من البرود الجنسى بمداومة مشاهدتها رغم أنك فى الأول حتحس بالاٍثاره و لكن بعد كده بتقلب بالعكس ( و ده حقيقى ) غير أنه أكيد ستدفعك لممارسة العاده السريه اللى هى أضرارها كذا و كذا ..
و لا نخجل من شرح معنى البرود الجنسى لدى الرجل و أيضا سرعة القذف و المصطلحات الرجاليه اللى قد تبدو صعبه و مخجله و لكنها ضروريه جدا ليفهما المراهق و يتجنبها ..
معلش طولت فى الرد و لكنه بجد موضوع مهم أثرتيه ..
تقبلى تحياتى و تفضلى بأى اٍستفسار اٍن شاء الله حنلاقى له اٍجابه ..

عمرو يقول...

مانوش
حاضر حأكتب بوست فى القريب اٍن شاء الله عن أضرار العاده السريه للشباب و البنات كمان ..

عمرو يقول...

فشكووول
أهلا بيك و سهلا يا أستاذنا الفاضل :)
أخيرا تفضلت علينا بشرف زيارتك للمدونه البعبعاويه جزاك الله خيرا ..
أيوه ما هو المراهق بيقتنع تمام الاٍقتناع أنه أصبح رجلا بمعنى الكلمه و علينا بقى تفهيمه أن الرجوله مش صوت تخين و خلاص .. لأ .. الرجوله مسئوليه و حسن تصرف و أخلاق عاليه ..
ما هم برضو معذورين يا أستاذنا يعنى حيعرفوا منين لو ماكناش حنفهمهم ؟؟
شرفتنا و أهلا بحضرتك و تقبل تحياتى ..

عمرو يقول...

شمس النهار
صباح الخير يا برنسيس :)
أهلا و سهلا بيكى ..
أشكرك و الله على اٍطرائك و يا ريت برضو تفيدينا بخبرتك فى تربية 3 بنات أثق فى حسن تنشئتهم كما أثق فى عقلك الواعى و أفقك المتسع ..
متشكر ليكى على الزياره و تقبلى كل التحيه و الاٍحترام ..

عمرو يقول...

غير معرف 3
أسئلتك تحتاج فى اٍجابتها لطبيب أو طبيبه متخصصه لأخذ الرأى الفصل ..
و ردى على أسئلتك هو مجرد اٍعطاء مشوره من واقع خبرتى ليس أكثر لأنى مش طبيب متخصص ..
- مافيش حاجه اٍسمها توسيع غشاء البكاره على حد علمى .. غشاء البكاره اٍما أنه سليم و موجود و اٍما أنه ممزق و غير موجود .. مع الأخذ بعين الاٍعتبار وجود نوع من الغشاء لدى بعض البنات بيكون غشاء مطاطى بيظل موجود حتى بعد ليلة الزفاف و بيسبب آلام عند اللقاء الجنسى و بيقوم طبيب متخصص بفضه ..
لكن مافيش حاجه اٍسمها توسيع غشاء البكاره لأنه موجود على مسافة 2.5 سم داخل المهبل يعنى بعيد عن أماكن ممارسة العاده السريه عند البنات اللى هى الأماكن الظاهره فى الجهاز التناسلى يعنى بيظل فى أمان اٍلا فى حالة اٍدخال البنت أشياء صلبه داخل المهبل أثناء ممارسة العاده السريه ..
- صعب جدا أن الطبيب يكتشف أن البنت كانت تمارس العاده السريه اٍلا فى وجود دلائل زى جروح أو خدوش أو اٍلتهابات سطحيه على الجلد متكرره و بغير سبب مقنع .. أو اٍن البنت نفسها تقول له ..
- أسباب الاٍلتهابات المهبليه كثيره جدا جدا و لا يجوز تشخيصها اٍلا على يد متخصص موثوق فيه .. علما بأن ممارسة العاده السريه باٍسراف لدى البنات بيسبب اٍحتقان فى منطقة الحوض يؤدى فى النهايه لاٍلتهابات مهبليه لو لم يتم علاجه العلاج الصحيح ..
دى اٍجاباتى على حسب علمى و بأكرر أنها مش فتاوى طبيه و لكن من واقع الخبره فقط ..
شرفتى و أهلا بيكى دايما ..

هبه يقول...

بابا عمرو شكرا لردك على سؤالى........
بس ليا سؤال تانى حبعثه على الاميل.......ممكن؟

غير معرف يقول...

انا عندى سؤال محيرنى جوهرى للشباب
يا ترى توافق انك تتجوز بنت نمت معاها قبل الجواز
البنت وهى بتحب بتتنازل وتعرف تاخد منها كل حاجه يا ترى لو نمت مع البنت اللى بتحبها ترضى تجوزها وله لاا

عمرو يقول...

هبه
الميل وصلنى و الرد حييجى لك من أختنا بعبعه لأنك أرسلتى منه نسخه على اٍيميل المدونه ظنا منك أنه اٍيميلى قبل ما تبعتيه على الأكاونت الخاص بى ..

عمرو يقول...

غير معرف
عفوا السؤال لا يمت بصله لموضوع البوست لكنن مكن اٍرساله على اٍميل المدونه للتصرف فيه ..
تقبل تحياتى ..

الجواز و سنينه يقول...

انا عجبنى فى المدنه بوستات كتير يعنى لفيت فيها
نييجى بقى ان اهم حاجه عرفتها هيه فتره البلوغ عند الولد و ملامحها
لانى كأنثى بفهم مشاعر البنت
بس اكيد مش هافهم مشاعر الولد و طريقه تفكيره
بجد تحياتى ليك من الاعماق

غير معرف يقول...

انا اخو جوزى فى سن المراهقه
و كتير بيمسك بنتى و يقعد يبوسها
ادامى عادى مش من ورايه بس هيه اصلها دلوعه و الكل بيحبها
انا ببقى داخليا متضايقه مش عارفه ليه
مش عايزه اقول انه منحرف و لا حاجه لانى عمرى ما شوفت منه حاجه تضايقنى غير ده
آخر مره قلتله بلاش علشان ماحدش يبوسها فى الحضانه كده
مش عارفه انا صح و لا لاء
ياريت الرد

بعبعه يقول...

الى الغير معرفه الاخيره


بعد اذنك يا عمرو

لا لا يا ماما انتى مبالغه طبعا وخوفك على البنت والكلام الى بتسمعيه هو الى مخليكى كده

انا فعلا جه على بالي النقطه دي كنت هاطلب مع عمرو يتكلم فيها

اننا ما نعتبرش المراهق بقى آله تدميريه بتفكر في الجنس بقى

ونحرمه من ممارست ادواره كاخ وخال وعم

لا طبعا ده يبقى افترا وهانعقد الولد اكتر

ومؤكد هو فهم قصدك وجايز يكون اتخنق منك ومن بنتك والعيشه والكل كليله
ههههههههههههههه

ولو كان راح قال لحماتك زمانها عملتلك قضيه وهاتبعتلك على يد محضر رسمي يا قشطه

الاعتدال حلو

انتى بتقولي عمرك ما شوفتي منه حاجه وحشه

انتى ما بتسبيش البنت معاه لواحدهم فترات طويله

ومتبعاها دايما والولد كويس وعمهااااااا

يعنى ريلاكس شويه يا حبيبتى لكن خليكى برضه حريصه على بنتك مافيش فيها حاجه

نورتي

عمرو يقول...

غير معرفه الأخيره
كلام بعبعه صح و سليم و لا غبار عليه ..
لكن ..
لا أنصح كمان بالمبالغه فى التقبيل من مراهق لطفله دلوعه زى ما بتقولى خاصة لو كانت هذه القبلات مقترنه بجلوسها على حجره ..
العضو الذكرى للمراهق شديد الحساسيه و الرهافه للمؤثرات الخارجيه أيا كانت نوعها و بالضغط عليه و لو كان سبب هذا الضغط جلوس طفله على حجره بشكل برىء لأن الاٍنتصاب فى هذا السن يكاد يكون بشكل دائم و مستمر .. يعنى غير الكبار .. فمش عاوزين المراهق يرتبط فى ذهنه النشوه و الاٍنتصاب بتقبيل الطفله درءا لما يمكن أن يحدث فيما بعد ..
كمان مش عاوزين الطفله نفسها تعتاد على فعل التقبيل من كل من هب و دب علشان الفعل ده مايبقاش عادى عندها بل و ربما تستسيغه هى شخصيا رغم كونها لسه مش فاهمه ماذا يحدث لها ..
و الله يا مدام من كتر ما بنسمع و بنشوف و بنقرا من رسائل دائما بأقول ندرء الشبهات و نكون حريصين و حذرين جدا جدا ..
تقبلى تحياتى و تقديرى ..