الأحد، 21 يونيو 2009

مرحلة ما بعد البلوغ للبنات (تحديث)



المره الى فاتت يا جماعه اتكلمنا عن ايه الى ممكن نقوله للبنت قبل ما توصل للبلوغ فعلا وزي ما قلتلكم ده كان مجرد تصور واكيد اكيد المسارات هاتتغير تبعا لسير الموقف واسألة البنت


ونعتبر الكلام الى فات ما هو الا فتح كلام بس وجسر تواصل بين البنت وامها

النهارده بقى نتكلم عن ايه الي المفروض البنت تعرفه لما تبلغ فعلا وايه الى ممكن نتكلم عنه فى اقرب فرصه ممكنه
طبعا بعد الى قلناه المره الى فاتت لازم برضه ننتهز اي فرصه ونتكلم عن الاحكام الشرعيه للحيض يعنى نفهمها انها لما تحيض فى ايام الحيض مش هاتصلي ومش هاتصوم

وهاتقضي الصوم الفرض ومش هاتقضي الصلاه .ومن فضلكم افتحوا كتاب فقه واقروا احكام الحيض والايات المتعلقه به وافهموها عشان تعرفوا تجاوبوا صح على البنت

والحجاب ... تكلميها عن الحجاب من قبل ما تحيض عشان تكون مستعده له ولو حسيتى ان حيضها قرب خليها تبدأ تلبس
الايشارب فى الشتاء فى البرد عشان ما تكرهوش على ما يجى الصيف تكون هى خدت عليه خلاص

اولا طبعا المفروض كل ام طبعا بمجرد ما تحيض البنت تطمنها وتفهمها ازاي تهتم بنفسها وتحاول تخفف عنها الالم ان وجد عشان البنت ما تخافش

وطبعا اكيد كل واحده عارفه هاتعمل كده ازاي

فى اول حيض نفضل متابعين البنت كويس ونكون قربين منها ونعلمها ازاي تعرف ان الحيض انتهى بانها تحط قماشه بيضاء على بداية فتحة المهبل بس اذا طلعت نضيفه تبقى هى كده خلاص طهرت والى لا يبقى لسه
ونعلمها الاغتسال يبقى ازاي وايه اركانه

وارجوكم كلفوا خاطركم شويه واقروا فى الموضوع قبل ما بناتكم يوصلوا للسن ده
وليه لبناتكم لنفسكم انتم لازم تكونوا فاهمين وعارفين الكلام ده كويس


المهم بعد كده بقى خليكى معاها على طول الخط هاتسألك كتير وهاتقولك كلام كتير جاوبي على كل اسألتها تقريبا بشكل مبسط وهادي

فى السن ده البنت بتبقى عايزه تحس بنفسها وبتبدأ تختبر شعور جديد فعلا ان الولاد بيتقربوا منها وجايز بيعاكسوها في الشارع

تكوني انتى بقى معاها فى الوقت ده وتفهميها الصح والغلط
اعرف ستات مخهم تعبان تقولك ما تمدحيش جمال البنت عشان ما تاخدش بالها من نفسها (تخلف عقلي رسمي )
لا طبعا خلي الموضوع عادي لا تبالغي اوي فى مدحها ولا تتجاهليها .

الاعتدال كويس

اهتمي بلبسها من فضلك وحسسيها انك مهتمه بها وحاولي تخليها تحس انها كبيره ومسؤله عن لبسها
وتلاقي بقى يا ستى البت بتبربش كتير وبتتفرج على افلام رومانسيه واغاني شغاله ليل نهار وبتهتم بنفسها اكتر

وما تقلقيش من حالة البربرشه اطلاقا ده عادي جدا اه يعنى ما يجلكيش هس هس وتقولي اخخخخخخخ يبقى المجرررررمه بتحب ان الجيران
لا لا مش شرط جايز معجبه به . وجايز لا
ولما تيجى فرصه كلميها عن الحب .
اه فيها حاجه دي ؟؟

بلاش تحسسيها انه جريمه ولا كمان انه مباح على طول الخط
ولا انه كائن هلامي مالوش معالم ومالوش ضوابط
لا لا كل ده غلط

عادي الحب ده حاجه جميله اوي اوي لكن فى وقته وللشخص المناسب وفى الوقت المناسب
الحب ده لازم يكون حاجه كبيره اوي ومحترمه اوي ومهيبه اوي مش عبيط واهبل وعيل
خليها تتعلم تكون ازاي رومانسيه عاقله

خليها تشاركك احلى لحظات حياتها وتبقى صاحبتك عشان تعرفي تنصحيها وتكوني واقفه جمبها وما تلجأش لصاحبتها
او تاخد قرارا من نفسها قد تكون مؤذيه لها على جميع الاصعده
ما تخوفيهاش من الاولاد زمايلها في المدرسه لا ابدا

لكن برضه حذريها منهم خصوصا لو كان معاها فى المدرسه اولاد فى اعمار اكبر منها
كانوا زمان يقلقوا اوي لو يلاقوا حد من ولادهم عموما بنات وصبيان مصاحب حد اكبر منه
ويمنعوا الصداقه دي . وانا شايفه انه تصرف له حكمته برضه فى السن الصغير

علميها تحافظ على نفسها من غير رعب . اتكلمي معاها كتير وانتهزي دايما الفرص انك تشرحي لها حاجه او تكلميها عن حاجه
خلي فى لنك قوي بينكم دايما

لما تغلط وتقول اكيد لازم تبينى انك مضايقه عنها غلطت
لكنننننن اكدي على انك مبسوطه انها قالتلك

واكدي على ان كل الناس بتغلط مش حاجه مريعه يعنى انما المريع هو ان الشخص يغلط وما يتعلمش من خطأه ده ويكرره او يكرر اخطاء شبهه. وطبعا مش كل خطأ ممكن يمر بسلام .

والتريقه ابوس اديكم والسخريه من احساس البنت فى الوقت ده حاجه فظيعه جدا . وكلمة بلاش لعب عيال . بالراحه يا جماعه
وارجوووووكم ما تقولوش واحنا ادها كنا بنعمل ونسوي . الشخص غير الشخص والزمن غير الزمن والظروف كلها مختلفه.

لكن ده ما يمنعش اننا نعلمهم المسؤليه.

والمفروض اننا الاولاد كلهم صبيان وبنات على ما يوصلوا لسن المراهقه اصلاااا يكونوا بيلعبوا رياضه فعلا ومتعودين عليها . واستقروا على لعبه معينه او اثنين .

ما نقولهاش خلاص بقى انتى كبرتي بلاش رياضه . لا ارجوكم غيروا نوع الرياضه لكن ما تمنعوهاش . دوروا على نوادي للبنات بس لو كان الموضوع تاعبكم اوي يعنى . المهم ماتحرموهاش من حاجه هاتبنى جسمها وعقلها كمان .
لو سمحتي علمي بنتك شغل البيت حتى لو كان عندك شغاله فى البيت علمي بنتك يعنى تتحمل مسؤلية بيت حتى وهى صغيره .

علميها واستحملي عدم اجادتها للشغل .

وشجعيها تشتغل فى البيت بداية من عمر خمس سنين قولي لها رتبي غرفتك وسريرك . وعلميها بعد كده تغسل كوبايتها وطبقها
وبعد شويه تغسل كوباية ماما وبابا حتى لو اضطريتى بعد كده تعيدى عليهم
البنت لو ما اتعودتش تتحمل مسؤلية البيت حتى في وجود شغاله بتفضل كده طول عمرها اعملي حسابك تأهليها تطلع ام .زي ما بتاهليها للمذاكره والله .

ده كمان بياثر على نفسية البنت فى فترة المراهقه وبيخليها تحس انها مهمه فى البيت وانها قريبه ليكى وبتعمل الى انتى بتعمليه فى البيت تقريبا وتحس انها كبرت فعلا .

وانا طولت عليكم اسفه بس مش مشكله ما انتم معذبينى من اول البلوج
واي حد عنده اي اضافه للموضوع يتفضل يقولها فى التعليقات .

تحديث مهم
نقطه اشار لها عمرو فى التعليقات وفعلا كنت عايزه اتكلم فيها لكن سقطت مني متوهنى اعمل فيكم ايه
النقطه هى مساعده البنت على تقبل التغيرات الجسديه الى هاتحصل لها فى فترة البلوغ
واهم واكبر تغير بيكون في حجم الثدي
اولا قبل ماتوصل للبلوغ والحيض لاول مره بتقعد فتره كبيره جدا عندها الم فى الثديين والمفروض انها تقولك
لو ما قالتش انتى هاتخدي بالك لو اتخبطت فيها مثلا هاتصرخ
وكمان قبل كل دوره فى الغالب هايحصل لها نفس الالم لازم تطمنيها ان ده عادي جدا ومن علامات البلوغ
وبالنسبه لحجم الثديين خدي بالك اوي انهم بمجرد ما يبدأوا يظهروا ويوجعوها تجيبلها برا (حمالة صدر) وتحسسيها ان ده عادي ومش حاجه تتكسف منها
بس البرا دي لازم تكون قطن ومش ضيقه
طبعا الملابس الداخليه عموما لازم تكون قطن ومش ضيقه عشان ما تضايقش البنت وكمان عشان متاثرش فى عملية النمو
وفايدها فى الوقت ده انها بتحمي الثدي شويه وبتقلل من الاحساس بالام فيه وكمان ما بتخليش البنت دايما طاويه كتافها عشان تداري صدرها وده طبعا غلطا جدا على عمودها الفقري بيشووه تماما
وعودي البنت تفضل لابسه البرا طول ما هى صاحيه عشان الثديين ما يسقطوش لو حبت تقلعها وهى نايمه اوك ويبقى احسن
انما تتعود تلبسها على طول
ويستحسن دايما للبنات تعوديهم يدهنوا الثديين من قبل البلوغ كمان بزيت زيتون ده مفيد اوي
وكفايه كده على النقطه دي
وشكرا ياعمرو

هناك 11 تعليقًا:

غير معرف يقول...

ماينفعش البنت تحط اي حاجه علي بداية الفاتحه خالص هي فس سنه الصغير مش هتدرك الموضوع
وكمان عشان ماتتعودش علي كده والنار من الشراره الصغيره

كده كده ستنا عائشه قالت انتظري الكدره
يعني الافرازات المائله للصفار بكده تكون الدوره انتهت

بعبعه يقول...

يا ست الكل ما قلت تحط حاجه تدخلها

ده بس من بره ونار ايه وشراره ايه

ايوه نستنى الكدره وفى ناس مش بتنزلهم القصه البيضا

وخصوصا البنات الصغيرين دول

لكن لو حبيتى تاجلي الجمله دي

وتقولي لها مثلا لو انقطع الدم عنك خلاص صلي

لكن انا عن نفسي مش شايفه فيها حاجه

وبرضه اسمع رايكم ياافاضل

ستيتة يقول...

بوست جميل تسلم ايدك فعلا رائع

طيب ولو البت بتتفرج على افلام رعب اكتر من الرومانسي ساعتها اعرف إنها من أفراد جمعية المرأة المتوحشة؟
هههههههههههههههههههههههه

النقطة اللي تسمحي لي اضيفها
ان البنت بتكون عندها ثقة مهزوزة في النفس
هي مش حالة عامة ولكن غالبية البنات بيكونوا كده

هنا يأتي دور الأهل لزيادة جرعة الصداقة والكلام والصحوبية ولازم دايما الأم تشكر في بنتها وهم لوحدهم وهم مع الناس دون كذب

ثبت ببحث علمي أن نظر الأم لعين أبناءها اثناء حديثها معهم يزيد من معدلات ذكاء الطفل .. وخاصة في سنوات العمر الأولى
ولذلك أحرصي الا تحدثيهم وانتي تعملي في البيت
افصلي لحظة عن العمل وانظري اليهم مش بس علشان قصة الذكاء
نو ابسلوتلي
علشان ده مظهر من مظاهر الإحترام والإهتمام بيطلع عيال نفسيا سوية

عندك زهرة صغيرة بتفتح
ارعيها صح علشان تفرحي بيها لما تفتح وتبقى زي القمر وعبيرها يملى عليكم الجو

سلام يا جومر

عمرو يقول...

بارك الله فيكى يا أختنا بعبعه بوست حلو أوى ..
عجبتنى بجد نقطة الثقه بين البنت و أمها فى موضوع الحب لأن النقطه دى بالذات بتشغل مساحه كبيره فى ذهن المراهقه ..
أحب أضيف بعد اٍذنك أنه من أكثر الأشياء اللى بتصيب البنوته المراهقه بالخجل و الاٍنطواء و ربما الاٍكتئاب هو التغير اللى بيحدث لها فى شكل و حجم الصدر و ما يصاحبه من ملاحظات و تلميحات الأهل و الأصدقاء .. أغلب البنات بيشعروا بالخجل و بيشعروا اٍن فيهم شىء مختلف حتى اٍن بعضهم بيمشوا مهدلين أكتافهم حتى يداروا بروز الصدر و بعضهم بيستمروا يمشوا بهذا الشكل حتى بعد تجاوز فترة المراهقه ..
فيجب التعامل معاهم بشكل يتناسب مع هذه المستجدات ..
تقبلى تحياتى و تقديرى ..

بعبعه يقول...

ستيته

تمام عندك حق فعلا

تعرفي يا ستيته عندي ابنى الصغير لو كان بيكلمنى واحنا بره ولابسه نظاره شمس

لازم يقولي ماما بصيليى شيلي النضاره وبوصيلي

عايز يشوف عنيه وهو بيكلمني وباسمع كلامه

وفعلا حكاية الثقه دي وكلام الام الكويس عن بنتها بياثر فيها جداااااا

شرفتينا يا احلى من الجومر

بعبعه يقول...

عمرو

فعلااااااااااا النقطه دي فاتتنى لانى شوفتها رؤى العين

والبنت فعلا فضلت طبيعتها كده لحد الان

وافكتر ان البنت كان لها ظروف خاصه من بلوغ مبكر وفعلا فعلا الموضوع ده كان مسبب لها ازمه لانها بالفعل كانت فعلا مختلفه عن قريناتها

وفى الحقيقه الموضوع ده لازم ينضاف على الموضوع متشكره لك يا عمرو

هاضيفه كتحديث حالا

مش عارفه من غيرك نروح فين يا باشا
ههههههههههههه

hasona يقول...

السلام عليكم

معلومات جميلة ومفيدة

وان شاء الله الجميع يستفيد منها

بس تعتقدي لو أن الام لم تقوم بدورها في هذه الفترة
هل الاب يستطيع أن يحل محلها حتي لو بنسبة بسيطة
**ما هو دور الاب في هذه الفترة ؟؟؟

لأن لو أن البنت اتجهت للخارج ممكن تضر نفسها - بجهل أو بنصيحة خاطئة

تقبلي تحياتي

MaNoOoSh يقول...

كلام جميل يا بعبعة

وفعلا النقطة اللي اشار ليها عمرو مهمة جداااااااا وبنات كتير بتعاني منها


بالاضافة كمان لان البنت تعرف ان التغييرات النفسية اللي بتمر بيها قبل وبعد فترة الحيض حاجة طبيعية.. وهى متجننتش ولا حاجة
وكمان النقطة دي بالذات الكفروض الولاد يعرفوها عن موضوع الحيض.. علشان يفهموا طبيعة الانثى شوية كافادة ليهم فى المستقبل يعني

بعبعه يقول...

وعليكم السلام حسونه

الاب ممكن طبعا ياخد الدور لكن هايكون صعب عليه وعلى البنت فى رايي

ويفضل طبعا وجود ام او ست بديله للدور ده زي اختها جدتها خالتها عمتها كده يعنى وده يكون افضل

بعبعه يقول...

مانوش

انا فعلا معاكي فى ان كل جنس لازم يعلم عن الجنس الاخر

غير معرف يقول...

انا مش فهمة جران اهة هههههههههههههههههههههههههههههههههههههههههههههههههههههههههههههههههههههههههههههههههههههههههههههه