السبت، 22 أغسطس 2009

جسدي مشكلتى ... من بارقة نور


احبائي المدونين وزوار المدونه كلهم


كل سنه وانتم طيبين ورمضان كريم وربنا يتقبل منا ومنكم ان شاء الله صيامنا وصالح اعمالنا


الحقيقه الاستاذ عمرو بيعتذر عن البوست بتاعه النهارده لانه مشغول شويه ومنفضلنا


فانا قلت نعرض مشكله من المشاكل الى جاتلي على الاميل بعد ما اخدت اذن صاحبتها طبعا


تعالوا نشوف مشكلة صديقتنا الى هى سمت نفسها بارقة نور



السلام عليكم ورحمة الله وبركاته

عزيزتي بعبعة
أحييكي على مدونتك الرائعة
قرائتي لمدونتك شجعتني على أن أحكي لك مشكلتي عسى أن أجد عندك حلا لها


منذ صغري أعاني من سخرية قريباتي وتعليقاتهن السخيفة على جسدي
جسدي نحيف مثل عائلة أبي
ولم أرث شيئا من عائلة أمي لا شكلا ولا مضمونا
وعائلة أمي كانت مصدر السخرية الدائم
لأنني لست ممتلئة ولا أملك "مظاهر أنثوية" وأظنك تفهمين ما أعنيه بالمظاهر الأنثوية
لم أكن أعرف ماهي المشكلة في أن اكون نحيفة خاصة وأنا أرى الجميع يسعون للتخسيس وليس العكس
وكيف أتصرف وهذه هي طبيعة جسدي وليست شيئا بيدي

بدأت أكره نفسي
خالاتي وبناتهن كن يقلن لي أنني لن أعجب زوجي
وأن ركبتاي نحيفتان ويذكرن دائما اسودادهما واسوداد المنطقة تحت عيني
جربت أخذ ملعقة عسل يوميا لمدة شهور
وجربت مغذي حول العين كيميائي وآخر طبيعي
ولم يختف السواد
صديقتي كانت تحكي لي عن أخيها الذي تزوج فتاة نحيفة وقالت لي إنها لا تملأ عينيه

كل ذلك ساهم في خوفي الشديد الواصل مرحلة الرعب من الزواج
وعدم قدرتي على تحمل مجرد احتمال ألا أعجب من سيشاركني حياتي
وألا "أملأ عينيه" وقلبه

تحمليني قليلا لأكمل لك وسوستي الشديدة في موضوع النظافة
لدرجة استخدامي الكلور والديتول باستمرار حتى مع حساسيتي من المنظفات
لكني بقرف جدااااااااا
مما يصيبني بهستيريا
تجعلني أرفض كل من تقدموا لي لأسباب غير حقيقية
لا أعرف هل تعرضي للتحرش في صغري سبب كرهي للذكور
أم ما أراه وأسمع عنه ممن حولي عمن هم ذكور وليسوا رجالا
أم هو خوفي من أن يراني رجل بجسدي الذي أخجل منه

هل أبقى كما أنا حتى لا أظلم أحدا معي ؟

تحياتي

بارقة نور



ده كان نص رسالتها


والحقيقه انا رديت عليها فى اميل هاقول ردي باختصار


هو انها ما تسألش عن الناس دي لانهم حتى بينقدوها بطريقه سخيفه وطبعا مش كل الناس زي بعضها


ودايما انا باقول جايز يكون الجمال عموما مهم لكن مش اهم حاجه لا فى الحياه ولا فى الجواز والحب


ياما الواحد شاف واحد متجوز واحده وبيحبها وبيموت فيها والواحد يقول فى سره سبحانه مقسم الارزاااااااق


والعكس ياما رجاله ستاتهم ملكات جمال والحقيقه بيبقوا مش طايقيين يبصوا فى خلقتهم


وكل فوله ولها كيال زي ما بيقولوا فى الامثال


لكن طبعا انتى ممكن تروحي لدكتور لعلاج النحافه وبرضه حكاية السمار تحت العنين
وكمان الوسواس
وحتى لو كان التحرش القديم الى ما نعرفش تفاصيله فما نعرفش ممكن يكون اثر عليكى ازاي
برضه له علاج لو كان اثر عليكى


هانستنى نسمع راي الدكتور عباس الاول بقى تابعي التعليقات


والحقيقه بارقة نور كانت ردت عليا فى رساله تانيه والى فهمته منها يا جماعه ان الموضوع مش نحافه فقط موضوع انها شايفه ان المناطق الانثويه عندها هى الى اقل من الطبيعى .


وانا كنت قلتلها حاجه عشان تريح نفسها من الهاجس ده خلاصة الامر يعنى :


سيبك منهم وما تخليش كلام ناس هبل يزعزعوا ثقتك بنفسك

ولما يجيلك واحد يتقى ربنا وشافك ورضى بيكى
خلاص هو عاجبه الجثه بقى انتى مااااالك

كل واحد بياكل اللقمه الى على هواه


عايزه اسمع رايكم بقى فى الموضوع


وان شاء الله يومين كده وهانزل برضه رساله من الصديق (m) هو حابب انكم تقروها وتقولوا رايكم ان شاء الله



هناك 24 تعليقًا:

mimi يقول...

السلام عليكم ورحمة الله وبركاته

أولا أهنيكي علي المدونة

ثانيا بحلول الشهر الفضيل

ثالثا علي ردك المقنع لصاحبة المشكلة

شكراااااااا

تقبلي مروري

mimi يقول...

وبما إنك متعرفينيش كويس

وبما إني علقت أول تعلق

وأصحابي بيقولولي " ميمي احتلال"

اسمحيلي احتل التعليق التاني وأهديه لباقة نور ،، وأقوللها توجهي الي أطباء متخصصين في النحافة والسمنة

معي عنوان وتليفون طبيب ماهر جدا

برجاء التكرم بإرسال ايميل وستجدينه في بروفايل مدونتي

شكرااااا

ستيتة يقول...

كل سنة وانت طيبة يا بعبعتي العزيزة
وحشتيني وخلاص فاضل لك تكة وندفعك غرامة من قلة رؤيتك إلكترونيا

وسعي شوية يا بعبعة انا عاوزة اكلم بارقة نور
يابنتي وسعي احنا الأتنين ملو العين وملظلظين كده

عزيزتي بارقة نور أيه؟ فيه إيه بقى؟
اولا انا بأحيي عائلة ماما على رؤيتهم المتواضعة لذاتهم
ثانيا بأحيي ماما شخصيا اللي ما وقفتش هجوم التتار ضدك
ثالثا ها أقول لك اللي عمر ما حد قاله قبل كده "قربي ودنك" لو قريبة لك عمة أو خالة لها بنت قدك وبتديكي نصيحة او بتنتقدك -في الغالب الأعم- تاخدي اللي هي قالته ده وتروحي ترميه على اقرب سلة مهملات .. ببساطة اللي عنده بنت قدك دايما يحب يشوف بنته "اللي ليه والعين الجوانية" وكل ما عداها "ركش" ولذلك لم أخذ نصيحة من إمرأه يابنتي عمر بحاله فيما عدا جدتي وأمي فقط لا غير ولا سمحت لحد يديني رأيه في شكلي أو فكري أو مضمون شخصيتي والحمد لله لما كبرت وابتديت اقيم ليه فلانه كانت بتقول كذا وعلانة كانت بتتكلم عن كذا لقيت ان ربنا ألهمني بدون اسباب اعلمها علم اليقين وانا صغنونة

تعالي هنا .. ايوه هنا .. فين السيلف إستيم يا ماما؟ ده انت خدتي كلامهم ورحتي ع المراية وشفتي نفسك بنضارتهم .. وطبعا لقيتي نفسك ملكيش ميزة .. ألم تعلمي ان ربنا صورنا واحسن صورنا .. يعني انت على احسن صورة يا عيوني بس عينك مش شايفة حاجة من كتر السخرية
وبعدين انا مستعدة ابادلك تاخدي الظاليظ واخد انا السمباتيك اللي انزل في الديسكونت اشتري من اي محل غالي ببلاش
عااااااااااااااااااااااااااا
حد يشيل الأنثى دي قبل ما أكتعها

اما عن النضافة المبالغ فيها فهي فعلا شيء هستيري ولكن غير مؤثر ع الحياة الزوجية
بالعكس اي راجل وأي انسان بيسعد لما يكون شريك حياته نضيف ده اولا
ثانيا عندي من ستات هستيريا النضافة كتير وناجحات وكل شيء مظبوط عندهن

خلاصة الرغي اللي فوق
1- لن يستطيع مخلوق رجل كان ام امرأه ان يرى مميزاتك التي لا تريها انت مبدأيا
2- الراجل مش بيتجوز مزة بس - الا السطحين ودول قلة جوازهم احسن والرقصات ارخص- الراجل بيتجوز عقل وقلب بجانب الجسد
3- مين قال لك ان البخت بالحلاوة والا الوحاشة .. يا ما بنات شبه البدر يوم تمامه وربنا مخليهن من اهل الإبتلاءات بزيجات فاشلة او غير مكتملة بموت زوج او مرض .. وياما بنات الناس تبص لهم وتقول لم يؤتوا حظا من الجمال واللي يسبب عجب الناس اكتر ان ازواجهم آيات تمشي على الأرض

تحياتي وخالص دعواتي بالفرحة والزوج الصالح ورضا ربنا سبحانه وتعالى

غير معرف يقول...

بالعكس بقى الراجل اللى بيفهم يفضل الست الرفيعة علشان حتبقى ممتعة فى الأوضاع الجنسية
اما بقى النضافه المبالغ فيها فدى حاجه تخنق ساعات
سيبك يا انسه من الوساوس ديه و عيشى حياتك و حبى و اتحبى و كلو حيبقى 100 فل و عشرة

غير معرف يقول...

البنت هنا وقعت فريسة للناس اللي ماعندهاش ضمير اطلاقا
بيتريقوا عليها واكيد همه فيهم العبر

استاذ عمرو
----------
كنت سألتني عن اللي مش عاجبني في جوزي تفتكر اني ممكن اقول لك كده علي الملأ
مش بحب حد يتكلم في الموضوع ده مع حد احب اتكلم بس علي الجانب الحلو فقط

وبعتذر اني مارديتش قبل كده علشان ماكنتش شفت السؤال الا دلوقتي وشوفت تعليقات في البوست السابق

شكرا

غير معرف يقول...

ياريت الاستاذ عمرو يعمل لنا بوست عن التغيرات اللي بتحصل مع تقدم السن عند السيدات وقرب رحيل الدوره
والتوترات المتغيرات المصاحبه
علشان انت بتكتب بطريقه علميه جيده

غير معرف يقول...

شوفى يا بارقة نور
لاجل بختك لسه انهارده كنت بتكلم انا وجوزى مع واحد هو و مراته اصدقاء لينا و للعلم هو عنده حوالى 48 سنه وهى 44 المهم الست مش كانت موجوده وجت سيرة الجواز وسنينه و الرجاله والراجل ده قال مقوله بمنتهى الصدق فى عينيه
"انا شايف مراتى اجمل ست فى الدنيا من يوم ما اتجوزتها لحد انهارده"
الراجل ما شاء الله وسيم جدا والست عاديه جدا الجمال فى عين من يرى و ليس له مقاييس فروحى قولى لأهل والدتك ينقطوكى بسكاتهم لأن زمن الستات اللى بالكيلو خلص القرن اللى فات و مش راجع تانى
صدقينى انتى عمرك ما هتكونى جميله غير لما تشوفى نفسك كده

بعبعه يقول...

ميمى

احتل يا قمر براحتك الصفحه كلها ولا يهمك

متشكره ليكى اوي وكل سنه وانتى طيبه

بعبعه يقول...

ستيته

وانتى طيبه يا جميل ربنا يكرمك

انتى يا جميل تلاقي عندك خمسه كيلوا زياده ياعم خلينا فى حالنا احنا
هههههههههههههه

كلامك ميه ميه طبعا نختم ونبصم يا باشا

بعبعه يقول...

الغير معرفين الى مش كاتبين اسامي برضه

متشكرين يا قوم

وعمرو ان شاء الله يشوف التعليقات دي

بعبعه يقول...

حسونه

امين يارب العالمين

كل سنه وانت طيب ونورت يا حسونه

غير معرف يقول...

عزيزتى الاخت باقة نور

رينا يجعلك من اسمك لكى نصيب

ملخص ماقولتيه انك متوترة من جسدك ومن نضافتك ومن الرجال

اعتقد ان كم التوتر يفوق قدرتك على الاحتمال

ليست هناك مشكلة فى جسدك ولا فى النضافة او الرجال (فى اغلب الحالات)

المشكلة الأصلية فى التوتر بحد ذاته واعتقد انك تحتاجى إلى طبيب نفسى لعلاح التوتر

وستجدين بإذن الله تعالى ان علاقاتك بجسدك وبالاخرين ستتحسن كثيرا

التوتر مشكلة شائعة ونخطأ كثيرا إذا تركناها تحتل تفكيرنا

نستطيع ان نحاول ان نتغلب عليها بأنفسنا لكن إذا فشلنا فلا ميرر لترك انفسنا للمعاناه فعلاجها سهل

وياريت تطمنينا عليكى

تحياتى

عباس الاول

بعبعه يقول...

اخيرا الدكتور عباس ظهر يا رجااااااله


من يوم ما رمضان بدأ تقريبا اخد اجازه وقاعد ياكل كنافه

نورت يا دوك وربنا يكرمك

ذو الوجه المبتسم يقول...

السلام عليكم

كل سنة والجميع بخير

شايف التعليقات على رسالة الاخت مستوفية حاجات كتير

ربنا يهدي نفسك ورأيي المتواضع ان الحل بايدك انتى

فيه كلمة دايما باقولها
( كبرى الجمجمة )

ربنا يرزقك بالزوج الصالح وبالسعادة فى الدنيا والاخرة

تحياتى

بارقة نور يقول...

أولا بشكر بعبعة على اهتمامها وردها السريع اللي ما توقعتوش
تاني حاجة بجد بشكركم جدا جدا جدا
كلامكم ساعدني كتير
وآسفة النت كان مقطوع عندي واتصلح النهاردة بس
معلش يا بعبعة هي مدونتك اه بس دا موضوعي بقى :) عايزة أرد على كل الناس الجميلة دي

ميمي : بشكرك وهبعت لك ايميل عشان آخد رقم الدكتور

ستيتة حسب الله الحمش: ايه الاسم ده :)
أمي مش بس ما وقفتش هجوم التتار دي كانت قائد الكتيبة
مش عارفة إن كنت فعلا شفت نفسي بنضارتهم زي ما بتقولي بس هو أكيد أثر في من كتر ما اتقال وأنا ما اتجزتش قبل كده وخايفة دا يكون سبب في فشل لأنه مهم عند الراجل عشان كده ذكرت حكاية أخو صاحبتي وكلامي هنا مش عن الجمال كلامي عن حاجة ترسخ في ذهني إن العلاقة الزوجية محتاجاها وهي مش موجودة عندي

غير معرف : يارب أقدر

غير معرف بتاع 48 و44 سنة : يارب يوعدنا

الدكتور عباس : حضرتك ورتني المشكلة من فوق وأنا دايما كنت بشوفها وأنا جواها بس دكتور نفسي ؟ أهو دا اللي مش ممكن أبدا أهلي رافضين الموضوع دا تماما وخروجي من البيت بأوامر عسكرية مقدرش أروح من وراهم
أنا بحاول أتكلم مع نفسي ساعات وأقول لنفسي ما تحبكيهاش بس مش عارفة دا مرض ولا طبع ولا ايه بالظبط

ذو الوجه المبتسم : حاضر أوعدك أحاول أكبرها

بارقة نور

غير معرف يقول...

الأخت العزيزة بارقة امل

انا عارف ان لحد دلوقتى الذهاب لطبيب نفسى يعتبر حتى الان خط احمر

و اكيد ان نتخلص بأنفسنا من التوتر فهذا شئ جبد

بس المشكلة ان التوتر مش دايما بسبب الظروف المحبطة بالانسان لكن فى بعض الاحيان بيبقى فيه زيادة فى بعض المواد الكيميائية فى المخ

دور الطبيب النفسى بيبقى اعطاء بعض الادوية لإعادة التوازن الكيميائى للمخ علشان يدى فرصة بعد ذلك لعمليه التاهيل النفسى

لو الوالدة او لكى اخت كبيرة تعتبر صديقة لكى ممكن تشرحلها المشكلة وتوضحلها ان من قراءاتك ان احتمال الطبيب النفسى يبقى له فرصة للمساعدة احتمال معارضتهم تقل شوية

إذا كان مفيش فايدة انا مش من انصار الذهاب للطبيب من وراء الاهل

حاولى تركزى مع تفسك شوية فى عمليه تحليل اسباب التوتر و البحث داخل نفسك و على افضل الطرق للسيطرة عليه مع اهمية ان لا تستسلمي للتوتر وعتدما تجدي نفسك فى اى وقت فى حالة توتر غير منطقية ان تعيدي حساباتك

مع خالص تمنياتى بإن تستعيدى نفسك
فى اقرب وقت

عباس الاول

dreem يقول...

السلامو عليكم ورحمة الله وبركاته
كل سنة وانتم جميعا طيبين وربنا يعيد الشهر الكريم عليكم بألف خير.
بارقة نور يا اوختشى انتى تتصلى بصيدلية على وعلى واسأليهم على الكريم اللى بيكبر ال...
واللى هما عاملينه من نباتات طبيعية
وفعلا واحدة صاحبتى استعملته وجاب معاها نتيجة تجنن ولو انى اعتقد ان
القصة كلها راجعة لثقتك فى نفسك واللى محتاجة توجديها او تقويها لو كانت موجودة
تحياتى ودعواتى

بارقة نور يقول...

د. عباس حضرتك حطيت ايدك على النقطة الصح
"اعتقد ان كم التوتر يفوق قدرتك على الاحتمال"
أيوة دا صحيح جدا
أنا فعلا مش قادرة أتحمل ومش لاقية حل
ممكن يكون فعلا عندي خلل في افراز مواد معينة
بعيط كتير جدا وساعات من أقل حاجة وأحيانا مش ببقى مستحملة حد يقولي ازيك أروح فاتحة في العياط على طول
نفسي أبطل موضوع العياط ده حتى عشان عيني وتنفسي لأني بفضل أعيط لغاية ما أرجع من العياط

بالنسبة لوالدتي هي ربنا يسامحها جزء كبير من مشكلتي إن مكانتش هي المشكلة كلها
وماليش اخت كبيرة ولا حد ممكن يقنعها ولا يقنع والدي بالموضوع ده لأنهم شايفينه دلع وتضييع فلوس

أنا على فكرة سألت قبل كده ناس بيروحوا لأطباء نفسيين وقالوا لي بناخد فيلوزاك وكالميبام
أخدت فيلوزاك و موتيفال بس للأسف مأثروش معايا

Unknown يقول...

انا بس عايزة اقولها ان النحافة دى بتتعالج وعلاجها مش مستحيل

وعايزة اقولها كمان انه بالعكس الجسم الحلو الرفيع مطلوب ومرغوب جدا من الرجال بدليل حملات التخسيس واسعة النطاق دى كلها

وكمان عايزة اطمنك انك ان شاء الله لما تتجوزى جسمك حيبقى زى ماانتى عايزة ويمكن أحلى ... الموضوع كله عبارة عن هرمونات ... والنماذج دى انا شوفتها كتير جدا حواليا وبعد ما اتجوزوا وانجبوا جسمهم بقا جميييييييل جدا وثقتهم فى نفسهم زادت وبقوا زى الفل

وكمان عايزة اقولك حاجة مش معنى ان حد اتقدملك يبقى لما حيتجوزك حيتضايق من جسمك أولا لان دى نظرية سطحية وشكلية جدا فى الزواج وثانيا لأن جسمك ده انتى مش حاطاه فى قمقم فمحدش عارف انتى رفيعة ولا تخينة ... اكيد واضح انك رفيعة واكيد هو اتقدملك وحبك وانتى بالشكل ده .. وموافق وراضى عليكى كدة

واى حد بيحاول يهز ثقتك بنفسك بيكون ده كلام بيقوله عشان هو نفسه يبقى رفيع زيك ومش عارف وبيحاول يقنع نفسه انه وهو تخين كويس ومش محتاج يرفع مع انه فى عقله الباطن نفسه فى كدة جدا

حاجة كمان ... الراجل اللى تبقى بالنسباله مجرد " جسم " اسمحيلى مايستحقكيش ... وانتى فعلا مش مجرد جسم .. حاولى تنمى نفسك فى مجالات تانية كتير ، وزى مانتى بتشوفى فى عباقرة وناس متميزين فى حاجات كتيرة جدا وهما شكلهم مش حلو او مش بنفس تميزهم ده شكليا


حبيبتى ... الوجه مهما كان جميل او قبيح بيتم التعود عليه بعد الزواج ... الشكل مش مشكلة قد الروح ... ممكن واحدة منيكان بس دمها تقيل ولسانها فالت ... وواحدة مش جميلة اوى بس مؤمنة وبتحب شريكها ... الراجل اهم حاجة عنده واحدة تحبه .. اهم من شكلها


حبى نفسك وارضي بيها .. ووالله كلامى ده كله بناءا عن تجربة انا نفسى عشتها ولسة بعيش فيها ... بس انا مش التخن والرفع قده ماهو السمار وطول عمرى وانا صغيرة يقولولى انتى سودة ومين ده اللى حيبصلك ... كنت اضحك على كلامهم واغيظهم واقولهم بكرة كلكم تستغربوا وتتعجبوا من اللى حيجيلى ... كنت اغيظهم واقولهم ده حيبقى ابيضانى وزى القمر وبيموت فيا لدرجة انتوا نفسكم حتستغربوا


تصدقى ان كل كلمة قولتها لما كبرت حصلت؟؟؟ .. حصل عشان حسن الظن بالله أولا والعند مع الناس اللى بيحسبونى على حاجة انا ماليش ذنب فيها .. عايزة اقولك ان جوزى مش بس أبيض ده أشقر وكنت رافضاه عشان السبب ده بس تمسكه بيا خلانى وكل اللى حواليا نوافق ... هو واهله شقر كلهم وانا الوحيدة السمرة

طبعا الامر مش بيسلم من استغرااااااب عاااااارم من كل الناس ... الجيران واللى فى الشارع والقرايب والمحلات والسنيمات والمواصلات وكل حتة

بس الحمد لله رب العالمين ... لما بشوف كدة فى الاول كنت بتضايق وتصعب عليا نفسى وابقى عايزة اعيط وبعدين بقيت اقول لنفسى انتى زعلانة ليه هو انتى اللى خلقتى نفسك؟ .. وبقيت اخد الموضوع بهزار وبروح حلوة الحمد لله


إرضى بنفسك وحبيها أوى وثقى بنفسك عشان الدنيا كلها تحبك وتثق فيكى


أختك ياسمين
:)

بعبعه يقول...

ايه الحلاوه دي يا ولاد

تمام يا قوم هو ده الشغل

كملوا كملوا

بارقة نوم عيشى حياتك وردي على الناس

ربنا يكرمكم

غير معرف يقول...

عزيزتى بارقة امل

هو الدواء الاول إلى كتباه ده مضاد للإكتئاب والتوتر والتانى مضاد للتوتر

بس فكرة انى اخد ادوية بشكل عشوائى غلط ومش حتوصلنا لشئ

لأن الطبيب بيحدد ادويته على اساس جلسة مطولة مع المريض لأن كل دواء ليه اثار ايجابية واثار سلبية

وفيه ادوية نفسيه ممكن تدهور حالة لو اعطت لتشخيص خاطئ

ده غير اهمية المتابعة ودى نقطة مهمة ودى تعنى انك لو متابعة مع طبيب وبعد فترة حسيت بعدم استجابة للعلاج لازم اقول للطبيب علشان يعيد تنظيم الدواء الحاص بى

تحياتى

عباس الاول

احبك اكثر من نفسى يقول...

منورين ياجماعه كلكم على بعضكم
بصى يابارقه نور
اللى حصلك ده حصلى الاسوء منه انا جسمى مليان شويه بس مش اللى هو طخينه او بكبوزه لا الحمد لله فى جسم نرمين الفقى كده وكان لى خاله بنتها من سنى كانت دايما تقولى انتى طخينه روحى خسى مش هتتجوزى مش مش مش وكلام كتير لدرجه انى اتمنيت ابقا فى جسمك كده علشان اسمعها بتقولى اطخنى شويه ولما اتخطبت قبل بنتها طلبت منى انى اجى انا وخطيبى نزورها قعدت تقولو قدامى ياخويا انت مش بتشوف دى تقعد عليك تفطسك دى دى وكلام كتير يجرح مشاعرى ويوم ماعزمتنى انا وخطيبى خلت بنتها راحت للكوافير واتمكيجت مكياج كامل تؤليش عروسه وجابتلها بجاااااامه اخر الاجا ال يعنى علشان تزغلل عينو وتحسسو انو غلط لما اختارنى حتى يوم الفرح جاتلى عند الكوافير وقعدت تقول الفستان شكلو وحش عليكى انتى طخينه قوى انتى انتى واحنا فى الكوشه بقا راحتلو وقالتلو ربنا معاك خد بالك تقوم من النوم تلاقى عندك دراع ناقص واحنا بنركب العربيه وخلاص ريحين شقتنا بتقولو انت هتعرف تقعد جمبها وبنتها تضحك وتقول يالهوى دى اخده الكنبه كلها لحسابها بقولك يابنى خدها من قاصرها وسيبك من الجوازه دى لدرجه انى حسيت انى بكبوزه مع ان زميلى البنات كانو دايما يقولو ان جسمى حلو جدا وان نفسهم يبقو فى جسمى واخت جوزى كانت دايما تقولى ماشاء الله انتى جسمك حلو جدا عرفتى بقا ليه خلاتك وبنات خلاتك بيقولولك كده شيفين فيكى حاجه حلوه مهيش عند بناتهم فاحبين يعقدوكى فى نفسك
كل ده مجرد حققققققققققققد ولعلمك اغلب الرجاله بتحب الستات الرفيعه صدقينى ومتخليش شئ يعقدك نهائى وكون انك موسوسه فاحسنلك لو اتجوزتى مش تجيبى شغاله لانك بجد هتقرفيها فى عشتها ومافيش شغاله هتقعد معاكى شهر على بعضه حاولى تكون نفسك حلوه والنضافه زياده عن اللزوم دى ممكن تضايق بعض الناس منك واولهم زوجك فى المستقبل يعنى تخيلى كده لو دخل البيت وقالك انا هدخل انام صحينى الساعه كذه هتقوليلو ايه ده اوعا تطلع على السرير غير لما تستحما وتغسل رجليك حلو فهمانى ياحبيبتى اهلينا زمان كانو بياكلو الخضار والفاكهه بدون غسيل والحمد لله ربنا مديهم الصحه لازم تكون نضفتك فى المعقول مش زياده عن اللزوم

غير معرف يقول...

s 3 ..., elblog de gamela gdn gdn gdn rbna ybarkloko feha kman we kman ,, elo5t bareqat noor a7b a2olk en gmal elbent leeh million shakl elrofai3a gmalha leh t3m we elmaliana leha t3m tane .., elsamra gmalha leh t3m we elbeda leha t3m we ana 3n nfse b7b elbent elsympathic elrofai3a aktr mn elt5ena kter gdn , , , 2raibek we 5alatk dol by7qdo 3leke bgd we nfoshom mosh safia abdn olelhom en elbnat ele bye3lfoha we ywznoha be elkilo endacpt el3ed ele fat we klam a7bk aktr mn nafse sa7bt el comment el a5er mzbot milion fe elmeya sorry 3lshan elfranko bs ana da5l net mobile msro2 mn etisalat bs elbrnamg mosh byektb 3rbi :) Ali Baba

بعبعه يقول...

شكرا يا علي بابا ونورتنا