السبت، 12 سبتمبر، 2009

سن اليأس اٍسم غير دقيق

أيه هو سن اليأس عند المرأه ؟؟
ما هو مدلول و تداعيات هذا المصطلح اللى قد يراه البعض و أنا منهم به قسوه و غلظه عندما تخبر المرأه أنها قد صارت عضوه فى نادى سن اليأس اللى لا مفر منه ؟؟
و كيف نتعامل معه و هو أصلا موضوع شائك بل و ربما يكون مؤلما و موجعا لدى الكثيرات من النساء ناهيكم عن كونه مرحله جديده تماما فى حياة كل اٍمرأه ..
أشعر بالاٍطمئنان للتعربف العلمى القائل تحديدا بأن سن اليأس ما هو سوى اٍنقطاع الدوره الشهريه عند الأنثى لفتره زمنيه بتزيد عن 6 أشهر متواصله و أنه ظاهره طبيعيه بتحدث لكل نساء العالمين لما بتوصل المرأه لسن النضج الكامل لما بيكون عمرها من 45 ل 55 سنه .. مع الأخذ طبعا فى الاٍعتبار الفروقات الفرديه بين سيده و أخرى ..
سن اليأس ( و لا أوافق تماما على هذا الاٍسم ) بيبقى مرحلة بتنتقل فيه المرأه من سن الخصوبه لمرحلة عدم القدره على الاٍنجاب بكل ما يمثل هذا من صور قاتمه فى مخيلة الذكور عموما و الذكور الشرقيين خاصة و الذكور الصعايده على الأخص ..
السبب الأساسى فى فقدان المرأه لقدرتها على الاٍنجاب غالبا بيكون نفاد ( صحتها لغويا بالدال و ليس بالذال و هو خطأ شائع ) أعداد البويضات لديها و بالتالى بيتعطل المبيض و بيرفض اٍنتاج هرمون الاٍستروجين .. و بالتالى بتحدث للمرأه أعراض كتيره بتختلف قوتها و عنفها من سيده لأخرى تبعا للظروف النفسيه و الصحيه لها ..
يقال اٍن الأنثى لا تصل لسن اليأس مره واحده بشكل فجائى و لكن بشكل تدريجى .. يعنى فى الأول بتحصل لخبطه فى الدوره الشهريه فى السنه اللى بتسبق سن اليأس .. من أهم شواهد هذه اللخبطه أن تتباعد كل دوره شهريه عن اللى قبلها و اللى بعدها و غالبا بتحصل كل شهرين أو تلاته ..
الكثير من الأطباء بيعترضوا على مقولة عدم فجائية اٍنقطاع الطمث و بيقولوا أنه من الممكن جدا أن ينقطع الطمث بشكل فجائى بدون تدرج و بيكون أصلا منتظم لفترات طويله فى حياة الأنثى ..
السن مش هو لوحده السبب لحدوث ما يسمى بسن اليأس .. فيه أسباب تانيه كتيره نذكر منها على سبيل المثال :
- اٍستئصال المبيضين عن طريق التدخل الجراحى و غالبا بيكون السبب وجود أورام سرطانيه .. - توقف المبيض فى سن مبكر يعنى فى عمر أقل من 45 سنه عن اٍنتاج هرمون الاٍستروجين رغم وجود العدد الطبيعى من البويضات و السبب فى ده غالبا بيكون وجود مشاكل أحيانا معقده فى جهاز المناعه لما جسم المرأه بيكون أجسام مضاده بتهاجم المبيض و تقضى على وظائفه الطبيعيه ..
- العلاج بالمواد الكيميائيه اللى بتستعمل فى علاج السرطانات بتؤدى لتقليص نشاط المبيض شويه بشويه اٍلى أن يتوقف تماما عن العمل ..
سن اليأس له أعراض كثيره جسميه و نفسيه .. أحيانا قد تكون هذه الأعراض قاسيه على بعض النساء .. و أحيانا تمر بسهوله و سلاسه و لا تترك أى أثر نفسانى على صاحبتها ..
و أوجز أهم الأعراض فى الآتى :
- نسبه كبيره من النساء بيشعروا بسخونه و اٍرتفاع فى درجات حرارة الوجه و الرأس بصفه عامه .. و بيعرقوا بشكل مبالغ فيه و فى بعض الأحيان قد تستمر هذه الأعراض لفتره زمنيه قد تمتد ل 10 سنوات !!
- اٍختلال ملحوظ فى منظومة النوم الطبيعيه مصحوب بأعراض اٍكتئابيه و قلق مستمر و تعكر فى المزاج لأسباب قد تبدو صغيره و لا تستدعى حتى أن يلتفت لها ..
- ألم قد يكون غير محتمل عند الممارسه الجنسيه بسبب نقص هرمون الاٍستروجين و ده بيؤدى لقلة و ربما اٍنعدام الاٍفرازات المهبليه الطبيعيه اللى بتسهل حدوث العمليه الجنسيه و اللى نقصها بيسبب جفاف و ضمور فى الجدار المهبلى و ده بدوره بيؤدى لألم مضاعف ..
- بعض الاٍناث بيكون من ضمن أعراض الوصول لسن اليأس عندهم صعوبة التحكم فى البول بالذات وقت السعال .. و ده غالبا بيكون بسبب الضمور اللى بيصيب جدار المثانه و الاٍلتهابات المتكرره فى مجرى البول ..
- هشاشه العظام من أوسع الأعراض اٍنتشارا بين النساء اللى بيوصلوا لهذه المرحله من العمر بسبب قلة كثافة العظام و بتبقى عملية الهدم ضعف عملية البناء ..
و وجد أن النساء أصحاب البشره البيضاء أكثر عرضه للاٍصابه بالهشاشه عن النساء ذوات البشره السمراء .. و أن المرأه النحيله الرشيقه برضو أكثر عرضه للهشاشه من المرأه الممتلئه الجسم .. أمراض القلب و الشرايين بتزيد لما بتصل المرأه لسن اليأس لأن هرمون الاٍستروجين بيدخل فى عملية التمثيل الغذائى للدهون و بكده بيساعد على الوقايه من تصلب الشرايين و أمراض القلب فيجب الحرص و لزم التنويه ..
العرض النفسى الكامن فى أعماق المرأه لما بتوصل لهذا السن اللى فى رأيى لا يجوز أبدا أن يطلق عليه هذا الاٍسم الغير منصف هو اٍحساس المرأه بأن أولادها اللى أفنت عمرها فى خدمتهم و رعايتهم قد بدأوا فى الاٍنفصال عنها وجدانيا .. قد يكون هذا الشعور به شىء من الصحه و ده طبيعى بشكل ما لأنه من المؤكد فى هذه المرحله العمريه سيكون الأبناء و خاصة البنات قد وصلوا هم كمان لمرحله عمريه بيدأ فيها دخولهم لمرحلة الشباب بكل ما فيها من أسرار و غموض و اٍتفاقيات و تفتح على الأخر و قد لا يناسب كل هذا شعور الأم و أحاسيسها خاصة لو حطينا فى الاٍعتبار أنها أصلا بتمر بمرحله اٍنتقاليه صعبه بعض الشىء و يكفى أنه متعارف عليها باٍسم سن اليأس ..
الأم لما بينتابها هذا الشعور بيضخم لديها فكرة أنها صارت على هامش الحياه على مختلف الأصعده .. و بترى أن دور الأب قد تعاظم حتى طغى على دورها هى .. لأن الأب يظل ممسكا بمفاتيح الخزانه اللى بيظل الأولاد محتاجينها فى صغرهم و كبرهم و بالتالى بيظلوا محتاجين له .. على عكس دور الأم معاهم ..
وصول الأنثى لهذه المرحله السنيه و عدم قدرتها على الاٍنجاب لا يعنى أبدا عدم قدرتها على ممارسة الجنس و الاٍستمتاع به و اٍمتاع زوجها أيضا و اٍضفاء البهجه على كل المحيطين بها .. و ده تصحيح للفكره السائده لدى أغلب الرجال بل و النساء أيضا .. فلا يوجد ترابط مادى ملموس بين توقف الدوره و الممارسه الجنسيه ..
و المرأه بشكل طبيعى فى حاجه دائمه لاٍحساس الأمان و الطمأنينه و الموده و بيتضاعف لديها الاٍحتياج لكل ده أثناء مرورها اللى أرجو أن يكون عابرا بهذه المرحله الاٍنتقاليه المهمه فى حياتها و قد تكون العلاقه الحميمه عامل مادى مساعد و مفيد فى حصول المرأه على أحاسيس الأمان و الطمأنينه اللى هم بمثابة الماء و الهواء لأى اٍمرأه ..
ده بيستلزم تفهم كامل للموقف و طبيعته الحساسه من كل المحيطين بها و خاصة زوجها اللى لابد أن يكون متحليا بالصبر و طولة البال حتى يجتاز الجميع هذه المرحله بسلام ..
و تقبلوا تحياتى ..

هناك 7 تعليقات:

ستيته حسب الله الحمش يقول...

بونجور مسيو عمرو
جوتين تاج فراو بعبعة

موضوع كميل خالص
ومش بيسبب اي اكتئاب خالص يا بشر
ماشي
ندخل على الحقائق الحياتية والعلمية


بكل ما يمثل هذا من صور قاتمه فى مخيلة الذكور عموما و الذكور الشرقيين خاصة و الذكور الصعايده على الأخص ..
-----------------------------------
فيه ست في السعودية دخلت العيادة على طبيبة صديقة لي وقالت لها انا حامل وتبين بعد الكشف ان الست دخلت المينابوز اللي هي توقف الطمث اللي هي سن اليأس .. الست يا عيني حسب قول الشاهدة كان حالها يصعب على الكافر ووقفت بهستيرية تقول لها ما تقوليش كده جوزي يطلقني
سألتها الصديقة انتي عندك كام طفل يا حاجة
ردت 8 بس ولو الراجل يطلقني
قطيعة تقطعك انتي والراجل وصاروخ امريكي يخلص على امثالكم
الراجل العربي بصراحة عقليته مفرحة


سيبك من الأحاديث المساطبية دي "نسبة الى المسطبى رضي الله عنكما" وتعالوا بقى نعرف ليه بيجي للست سن انقطاع الطمث في الخمسينات بينما الراجل بتضعف اه قدرته الجنسية بس بيبقى لسه شغال
وده ببساطة لأن الأنثى تبدأ أول انقسامات بويضية لها وهي جنين في بطن امها
يعني أول انقسام اختزالي لتكوين البيويضات بيكون وهي جنين وطبعا على ما تلاقي سبع البربمة في زمنا تكون خلصت نص البويضات سداء بدون عيال ولا جواز ويادوب على ما يجيب كوشة تكون ها تخلع سنانها بينما الذكر يبدأ أول انقسام اختزالي لتكوين الحيوانات المنوية في سن البلوغ "يعني بعدها ب 13 او 14 سنة كاملين مش ناقصين فتفوتة" ولكن
وخدوا بالكم من لكن دي
الست الحقيقية تعيش كل سن بجماله وبسعادته وتبطل تدور على النكد او تمشي ورا الآراء المتخلفة
والست عديمة الشخصية "وما اكثرهن" دي اللي بتدور على النكد بمنكاش ومش فاهمة يعني ايه تعيش بسعادة لأن المصطلح ده عندها اصلا ملوش معنى

صباحكم فل وكل سنة وانتم طيبين

بعبعه يقول...

شوف عمرو بقى لما يقعد يفسر فى وشنا

ههههههههههههه

الحقيقه موضوع مهم جدا وحضرتك اتكلمت عن جوانب مهمه فيه

لكن احنا فعلا محتاجين توعيه للناس اكتر من كده كمان

للست ازاي تتعامل مع المرحله دي

وللزوج كمان ازاي يتعامل مع المرحله دي

لان جزء كبير يا جماعه من الاعراض بيكون خارج عن الاراده بسبب خلل الهرمونات

العصبيه والارق ورفض العلاقه احيانا وكل ده خارج ان ارادتها فى اغلب الاحيان ان لم يكن كلها

وفى الغالب الزوج ما بيقدرش ده

ويسأل نفسه بكل بساطه

طب خلاص ما دام هى عجزت وانا لا يا اخويا انا شباب على طول ما انا اسيبها واتجوز عليها

ويبدأ يضغط عليا لا شعوريا من جانبه فى محاوله لاثبات استحالة العيشه معاها وتكتر المشاكل وهي تتكلكع زياده وتبعد زياده
وتتوالى بقى الحلقات

توعيه توعيه توعيه

نعمل ايه يا جماعه عشان نوصلها هي دي المشكله فعلا

شكرا يا لورد على الموضوع الجميل المهم جدا

بعبعه يقول...

ستيته حسب الله الحمش

جوتين تاج فراو حسب الله الحمش

ايه الحلاوه دي يا ولاد

انا باتكلم لغات يا بوي

غير معرف يقول...

بوست في الجون
بس عايزه اضيف انها بتشعر بالسخونه والبروده ورا بعض في اقل من ربع ساعه
يعني ساعه سخنه وساعه بردانه وفي عز الحر كمان

لو الزوج والزوجه تفهموا هذه الفتره من حياتهم هتكون احلي فتره في علاقتهم الحميميه
علشان الزوجه هنا لاتتناول اي موانع للحمل
وبتتم العمليه من غير خوف من الحمل

واي وسيله للحمل ليها اعراض جانبيه وبتكون الزوجه اتخلصت من الاعراض دي
ويبقي علي الزوج ان يشاركها المرحله بلطف وحب وليس بغباوه
يعني يحاول يدور عليها هي وعلي نفسيتها
ومش هيندم علشان لو عدوها بسلام هيكملوا عمرهم بسلام
ومش هنشوف شكوي الزوج ان زوجته كبرت ومش عيزاه

الموضوع ده عند الست نفسيه اكتر من اي حاجه تانيه

المفروض انها تحس انه عايزها علشان هي زوجته وحبيبته ويرغبها
مش علشان شئ هو حاسه وضاغط عليه عايز يفرغ طاقته وخلاص وقت ماهو عايز بغض النظر عنها وعن نفسيتها او هي عايزه ايه

في المرحله دي هي محتاجه حنيه زياده شويه

محتاجه تحس بالامان والحب وانها مرغوبه علشان حبيبه مش حاجه تانيه

البوست راقي وعلمي تسلم ايدك يااستاذ عمرو

بجد هو انت فعلا بتفهم في كل حاجه كده
ربنا يكرمك

Dr.safy يقول...

كل سنه وانت طيب يااستاذ عمرو
بصراحه موضوع جميل انك اشرت اليه وتناولته بهذا العرض الراقى والدقيق
هى مشكلتنا فى المجتمع المصرى ان فيه امور ممنوع نتكلم فيها ونقول عيب بس دى ياجماعه مواضيع حيويه لازم نتكلم عنها ونقول ازاى نتعامل مع بعض اثناءها لاحياة لمن تنادى ايه المانع نتناقش بشكل علمى وانسانى وبكل احترام ويبقى فيه تثقيف مجتمعى بالشكل اللى حضرتك بتقوم بيه ده . اما بالنسبه للموضوع محل النقاش فانا اتفق تماما مع ما جئت به سواء المعلومات الطبيه باعتبارى طبيبه او بالراى وكيفية التعامل مع هذه المرحله واشكرك جدا

hasona يقول...

كل سنة وأنتم بخير
ها انتهي رمضان وقد فاز من اتقي وعمل صالحا
والعيد لمن أدي الفريضة بخشوع وأيقن من القبول
إن شاء الله يكون عيد جميل
ويكون فرصة نتذكر أين كنا ومع من كنا في رمضان في الأعوام السابقة
ومن فقدنا منهم ومن سبقنا إلي الحياة البرزخية وتوفاه الله وسلم إلينا راية جهاد النفس
ولنتخذ من رمضان شحنة إيمانية لما بعدهم لعلنا نبلغ بها رمضان القادم
وندعوا أن يعيده الله علينا أعواماً كثيرة وسنين مديدة

احبك اكثر من نفسى يقول...

بصراحه ياجماعه انا شايفه ان السبب فى الاعراض والكئابه اللى بتحصل للست بعد انقطاع الطمث هو سبب رئيسى هذا الاسم تخيلو ان اسمو سن اليأس الست مننا هتقول اوبا انا دخلت سن اليأس لازم بقا ابقا يأسه من الحياه المفروض يكون ليه اسم تانى علمى يعنى مثلا سن الدلع الشقاوه كده حاجه تفتح النفس مش تسدها
نيجى بقا لرجلتنا اللى نصهم مش نصهم بس اغلبيتهم مش عارفين معنى سن اليأس غير ان الست تكون عجزت خلاص ولا تقدر على ممارسه الجنس وده طبعا من ايه ياجماعه من عدم معرفتنا لاى شئ فى الحياه زى كده مابيحصل عندنا العروسه المفروض داخله بيت جوزها يعنى هتمارس الجنس لاول مره فى حياتها ولا حد يفهمها يعنى ايه جنس تدخل بقا وتبقا تتعرف مع نفسها وكذلك الولد يقعد يسمع من اصحابو اللى هما اصلا لسه مش اتجوزو وده يقولو اعمل كذا وده يقولو اعمل كذه واللى يقولو اصبر اجبلك نموذج عملى ده لان مجتمعنا مجتمع متخلف ولا اقصد اننا نكون مثل الغرب لا طبعا لان احنا مسلمين ولازم نتبع ديننا فى كل شئ ولكن فيها ايه لما الكبير يفهم الصغير اللى جرب يفهم اللى مجربش علشان مش نمشى حياتنا كده سلق بيض ونبقا نكتشف احنا مع نفسنا
ثالثا وده الاهم الزوج اللى تكلمنا عنو انو بيدور على عروسه جديده لما زوجته توصل لسن اليأس اعتقد انها نسبه بسيطه جدا لان فى مجتمعنا نسبه قليله جدا من الفتيات التى تتزوج من رجل فى نفس عمرها او اقل من عمرها يعنى دايما تلاقى ان البنت لما تتزوج بتتزوج اكبر منها بحوالى 6 سنوات واحنا طالعين يعنى على ماهى توصل لسن اليأس يكون هو وصل لسن الاكتئاب قولو امين يابنات
نصيحه اخويه لكل البنات اللى توصل فيكم لسن اليأس وجوزها يفكر يتجوز عليها مافيش غير حل واحد يابنات دسته اكياس سمرا وشنطه سكاكين وطبعا لازم تشترو الشنطه دى من اول يوم جوازكم وتسنيه وتنضفيها كل اسبوع علشان وقت الطوارئ يكون كل تمام
شعارى
احنا وانتم يارجاله والزمن طويل هع هوع هيع