السبت، 26 سبتمبر، 2009

نصائح للستات


عدنا بعد اجازه العيد

احترت بصراحه اتكلم عن ايه خصوصا ان الدكتور عباس منفضلنا وفى اجازه برضه ومافيش فرصه نتناقش فى حاجه جديده

فأنا بناءا على طلب ناس كتير اوي كانوا بعتولي اميلات وقالولي نعمل ايه

بمعنى ايه الى ممكن نعمله عشان نوصل لتناغم معقول فى العلاقه الجنسيه بين الزوجين

طيب انا هاقدح زناد فكري واقول بعض حاجات كده وهانبدأ بالستات

اه فى اعتراض ولا ايه ؟؟

وهاوجه كلامي للستات النهارده

اولا : لازم تكوني حاسه انك جميله من فضلك لو حسيتى انك وحشه هو هايحس انك زفته زفته وثقي بنفسك تماما (اقصد من ناحية كونك مرغوبه ولا لا )

بس ده طبعا وانتى مهتمه بنفسك مش وانتى ريحتك توم ولابسه جلابية مامتك القديمه

ثانيا : اهتمي بنفسك دايما وانتى فى البيت وانتى بره البيت (مش باقولك حطي ميك اب وانتى بتنضفي الشقه )
لكن اعملي وقت للشغل ووقت للراحه
ووقت الراحه على الاقل تكوني لابسه هدوم نضيفه ومسرحه شعرك على الاقل يعنى وده اضعف الايمان

ثالثا: ودي مهمه اوي خلي بالك

لو جوزك جه قالك انا جعااان هاتيلى اكل دلوقتي حالا انشاله لقمه بجبنه

انتى بقى : لاااااا يونكن ابدا جبنه ؟؟؟ استنى انا عندي فرختين فى التلاجه هاطلعهم وافككهم واشويهملك حاجه ايه بقى تاكل صوابعك وراها

ممكن يستناكي لحد ما تعملي كل ده بس كمان ممكن ينام بجوعه وممكن على ما تخلصي يكون ازاز شوية لب ولا ترمس وخلاص بقى مش عايز ياكل ( اه ازاز انشاله كلبين من على ميلودي )

احيانا تكون اللقمه بجبنه الى هو نفسه راحتلها فى وقتها احلى من أي كل تاني ما تتفزلكيش يا اختي

طبعا انا اكيد مش قصدي اتكلم على الاكل يارب يكونوا بيفهموا

وده على فكره فى حديث عن رسول الله بيقول

إذا دعا الرجل زوجته لحاجته فلتأته وإن كانت على التنور

التنور ده زي الفرن كده تقريبا



رابعا : لو انتي ليكى واحده صاحبتك وبتحبوا بعض والحكايه ماشيه فل جدا وبعدين جه عليكى وقت كل ما تقابليها تاخديها بالحضن وهى بترد عليكى ببرود بالعافيه تطلع ايدها تسلم عليكى

انتى بتحبيها بتصبري عليها وتقولي جايز مضايقه من حاجه ومره والتانيه والثالثه انتى كمان هاتقابليها ببرود وجايز ما عنتيش تكلميها اصلا صح ؟

وجايز تضطري تكلميها وتعصري على نفسك لمونه عشان الشغل يمشي

نفس الحكايه برضه قيسى كده على العلاقه بينك وبين جوزك لازم يكون فى تفاعل ما تبقيش رخمه من فضلك

الواحد لما حد يسلم عليه بيرد السلام
مش عايزه واحده تقولي اصلي مش باحس بحاجه يا ستى حبيه بس مش مطلوب منك اكتر من انه يحس انك بتحبيه اقولك على حاجه تانيه مثلي ايوه مثلي انك حاسه وانك متفاعله ايه الغتاته دي ؟؟!!!


خامسا: الخجل الخجل الخجل خماشر الف خط تحت الكلمه دي من فضلكم

انا فى رايي المتواضع الى بيختلف معايا فيه الدكتور عباس دايما ( فى النسبه بس )ان الخجل بين الزوجين بيكون سبب فى تسعين فى الميه من المشاكل المتعلقه بالعلاقه الجنسيه بينهم

فى حاجه كمان الست او حتى الراجل على فكره بينكروا وجوده احيانا وتقولك ابدا مش باتكسف وللاسف الى بيحصل انها بتكون فعلا مكسوفه ومن كتر كسوفها ومحاولتها انها تخفيه تترجم ده لتصرفات غبيه جدا

اه والله غبيه جدا

يعنى مثلا تحاول تقنع نفسها انها بتنفر من العلاقه وبتحتقرها ومش بتستمتع بها ( دي حاجات لا شعوريه على فكره ) وسائل دفاعيه
وتبدا بقى مشاكل مترتبه على الغباوه الى هو شافها منها ورد فعله الى برضه بيبقى غبي وهى تستغبى زياده وهكذا

مش باقولك ابقى بجحه من اول يوم تتجوزي وتقولي لجوزك يوم الفرح قدامي ياض نعمل سيكو سيكو
لا طبعا
انا عارفه ومتاكده ان الاعم الاشمل فى البنات مهما كانت عامله نفسها فتكه بتتحرج برضه خصوصا مجتمعنا الى مشوه فكرها ومحسسها ان العلاقه الجنسيه دي عموما قلة ادب ولازم تبقى دايما مكسوفه عشان تبقى بنت مؤدبه
فلو سمحتي حاولي واحده واحده وتعالى على نفسك مره واثنين وثلاثه وحاولي تكسري الحاجز الى بينك وبين جوزك
واعرفي حاجه ان هو اصلا ممكن يكون برضه محرج ويستجمع قواه مثلا عشان يكسر الحاجز ما بينكم وانتى تقومي كابساه الكبسه المتينه يتكعور على جنب

سادسا : الراجل ده بنى ادم عادي زيه زيك (اه والله مش كائن هلامي ) محتاج هو كمان يحس انك محتجاه وراغبه فيه فعلا
جايز تكوني انتى كست محتاجه تحسي انه بيحبك وراغب فيكى ومحتاجلك

لا هو بقى محتاج يحس انك محتاجاله وراغبه فيه وبتحبيه بنفس الترتيب ده

اكتر من واحده بعد حديث طويل اكتشف ان جوزها سابها شهر واكتر من غير ما يقرب منها مثلا وهى لا سألته ولا عبرته ولا حاولت تحسسه باي حاجه بل بالعكس حاولت تظهر له انه مش هاممها ومش عايزه اصلا ( ايه انتم عايزينه يقول عليها قليلة الادب ؟)


وتستغرب بقى بعدها حسيت انه اتغير من ناحيتى كده وساعات احس انه مش عايزنى وبيعمل كده تقضيه واجب ؟؟!!
الرجاله بقى : يقولي انا حاسس انها مش فارق معاهااااااااا هاتجنني . ده انا سبتها مره شهر ما قربتلهاش ولا عبرت ولا حاولت حتى تسألنى انا مالي . طب يعنى مش جااااايز تعبان ؟؟ مش جايز اتجوزت عليها ؟؟؟
تبقى مش بتحبنى اكيد او جايز عندها برود جنسي بقى ومش عايزه اصلااااا .


سابعا : ارجوكي حاولي تعملي الى هو نفسه فيه ما دام مش حرام ما تتفزلكيش وتقولي لا وخلاص لمجرد الرفض وجربي مش هاتخسري حاجه
حتى لو كانت حاجه بتضايقك جايز مع الوقت مش تضايقي وجايز لا
ممكن تستحمليها بعض مره عشان ترضيه
وممكن هو نفسه بعد ما يجربها ما تعجبوش
وممكن تعجبه بس يزهق منها .
بس سبيه يجرب وجربي انتى كمان جايز تعرفي حاجه ما كنتيش عارفاها وجايز تغيري رايك .


ومش فاكره حاجه تانيه دلوقتي ياريت اسمع منكم اضافات وكل الى عنده افكار يقولها


وياريت يا ريت مش عايزه كلام نظري


عايزه كل واحد يقول من خلال تجربته الشخصيه واحساسه هو عشان يكون الكلام افيد للجميع


وطولت عليكم معلش استحملوني

هناك 28 تعليقًا:

غير معرف يقول...

بجد بوست اكثر من رائع

ممكن تعتبره

وصية بعبعه إلى بنات جنسها (قياسا على وصية الإعرابية إلى بنتها)

ده طبعا مش معناه ان الست هى السبب فى كل المشاكل الجنسية

بس زى ما ان الست هى رمانة ميزان البيت

هى ايضا رمانة ميزان العلاقة الجنسية

المراة تقدر تحول اغلب فسيخ العلاقة إلى شربات

بقليل من الارادة و الكثير من الحب

تحياتى

عباس الاول

بعبعه يقول...

متشكره اوي يا دوك على المدح والله

ده اقل حاجه عندي
ههههههههههههههههههههه

لا طبعا مش الست المسؤله الوحيده ولا حتى الاولى

لسه اصبر عليا لما امسك فى خناق الرجاله ان شاء الله
ههههههههههههه

نورت يا دوك

عاشقه وغلبانه يقول...

اعتقد ان اغلب الستات المصرين والعرب عموما يفقدوا القدره علي ممارسه دور العشيقه مع الزوج
مع انه مهم جدا
زي ماجوزك عايزك ست بيت وام واخت عايزك صديقه وعشيقه
واحنا ماشاء الله علينا نفقد الجزئيتين
وده اكبر سبب في الخلافات الزوجيه

ضيفي عليهم جين النكد الوراثي
ههههههههه

تحياتي

ستيته حسب الله الحمش يقول...
أزال المؤلف هذا التعليق.
ستيته حسب الله الحمش يقول...

ماذا اقول بعد كل ما قيل
وما أكثر من قول قيل من قولي او لم يقال

عظمة يا بعبعة
القصة المهمة
جوزك عاوز جبنة تبقى خلقة ربنا فيه كده وده غالبا راجل مريح
لكن لو كان بتاع فراخ وانتي تخصص جبنة ها يطفش او يدخل مستشفى جمال ماضي ابو العزائم

وعليه لو هو تخصص فراخ حاولي جاهدة تحولي نفسك من نباتية لآكلة لحوم فراخية حتى لو تمثيلية

مش يمكن تلاقي نفسك كنتي بتحبي الفراخ بس مستخبية؟

عمرو يقول...

أيوه و الله كلام مفيد و نصائح قيمه ..
بس أسمحى لى أختلف معاكى فى نقطه و أضيف نقطه ..
حركة أن الزوج يستعمل زوجته لتفريغ طاقته بشكل عاجل و مستعجل و طارىء بدون تهيئه نفسيه و جسديه للزوجه ده ممكن يجرح نفسيتها و كرامتها كمان لاٍحساسها أناه مجرد وسيله و ليست غايه ..
يعنى موضوع الجبنه و الفراخ لا أنا لا أوافق عليه أبدا ..
لأن العلاقه الحميمه بتمر بمراحل بين الزوجين و لابد أن تتوافق هذه المراحل مع بعضها لدى الطرفين .. أما أن يشعر الزوج لوحده بمرحله منها أو مرحلتين و عاوز يفرغ طاقته تيك أوى كده بسرعه فده مش صح ..
و لا أنا فهمت غلط و لا أيه ..
الاٍضافه بقى بعد اٍذنك اللى عاوز أضيفها أنى أنصح الزوجات مايدوش ودانهم لبعض خاصة فيما يخص العلاقه الحميمه و تفاصيلها و بالذات تفاصيل الأشياء الجديده اللى ماجربتهاش الزوجه من قبل لأن الميول بتختلف من زوجه لأخرى و كذلك من زوج لآخر ..
و مش شرط أبدا أن تمر على الزوجه نفس أعراض الغثيان اللى أصابت صاحبتها لما جربت مع زوجها اللى عاوزه ترضيه شىء جديد مثلا يعنى ..
فلأ ماتديش ودنك عزيزتى الزوجه لصاحبتك و مش لازم بالضروره تطبقى تجربتها على نفسك ..
مشكوره يا أختنا بعبعه و تقبلى تحياتى و تقديرى ..

غير معرف يقول...

على فكره يا بعبعه انا متبعاكى من فتره واول مره اعلق يمكن عشان شفت بالفعل جوازات بتتحول لروتين بسبب الموضوع ده فالموضوع بالنسبه لى مهم و بصراحه من اللى شوفته و بدون اجحاف او ظلم الست هى القادره الوحيده على جعل هذه العلاقه مميزه جدا او تخليها واجب روتينى
و الراجل الشرقى بالذات عباره عن رد فعل لتصرفات الزوجه فى الموضوع ده
يمكن عشان المجتمع بيغفر له لو عرف غيرها او حتى اتجوز غيرها بدعوى انها مش واخده بالها منه فبالتالى هو مش مضطر يعمل مجهود
اللود على الست كبير بس هو مجتمعنا كده الخجل لو هيتسبب فى نفور الزوج يبقى ملهوش لازمه و الحياء الجميل بتاع الست ممكن جدا يتوظف فى صوره دلع
و الله اعرف واحد طلق مراته لأنها بتنام معاه زى الصنم من غير اى رد فعل
اسفه طولت بس يا ريت الستات تعرف ان جوزك حلالك طالما بعيد عن اى شىء حرام اتمتعى بيه و سيبيه يتمتع بيكى

أبــــو ضـــيــاء يقول...

عندك حق والله
:)

بعبعه يقول...

عاشقه وغلبانه

حلوه جين النكد الوراثي ده

بس على فكره ده جين على الجنسين وحياتك

بعبعه يقول...

ستيته

والنبى انا الى اخرتي هاروح ابو العزائم من الناس

كلامك حكم يا سوتيته يا اختي

بعبعه يقول...

عمرو

ايوه حضرتك ما فهمتش قصدي

انا مش قصدي التفريغ بالشكل الي فى رايي انا بيكون مهين احيانا للزوجه ولانوثتها وده هاتكلم فيه ان شاء الله فى بوست مستقل وهاخد راي الستات فيه

وانا قصدي لو هو طلب علاقه فى وقت غير اعتيادي بالنسبه لك وانتى مش مجهزه نفسك اوي مافيش مانع طاوعيه

المفجأه نفسها بيكون لها وقع خاص على الاثنين احيانا

وانا باقول ده لو كانت تحصل مره حتى مش كل مره

انما العلاقه نفسها بخطواتها ومراحلها ده موضوع تاني


وبما ان الاساس فى العلاقه دي ايثار الطرف الاخر فمعلش لو كان بيضايقها شويه
ياريت تحاول تستحمل لو كده هايسعد جوزها

بمعنى مره عليها ومره عليه عشان تمشي

وضح قصدي كده ولا ايه ؟


بالنسبه لاضافة حضرتك

والله انا بيبقى نفسي اقطم رقبة اي واحده بتتكلم اصلا بالشكل ده

التخصيص وفضح تفاصيل العلاقه بالشكل ده وتعميم التجربه الشخصيه
دى سخافه وجهل وقلة ادب

والهبله بقى الى بتسمع كمان وتطبق فى نفسها بدون خوض التجربه بنفسها

احنا ممكن نتكلم مع بعض ونتبادل الخبرات بس بشكل راقي ومحترم ومفيد مش مؤذي

لكن احنا ما زلنا مستوانا الثقافي اقل من ذلك للاسف

شكراااااااا على الاضافه والمناقشه المثريه للموضوع دايما يا لورد

بعبعه يقول...

الغير معرفه
شكرا لمتابعتك وردك يا ريت كلهم يعرفوا كده فعلا

بعبعه يقول...

أبو ضياء

نشنت انا يعنى
هههههههه

نورت يا ابو ضياء

غير معرف يقول...

انا هاتكلم بصراحة جدا ومش لازم اتكلم بالاكونت بتاعى عشان ما ش عايزة حد يعرف انا مين لانها مش مهمة بالنسبة اللى هايقرا
اولا
انا اول ماتجوزت طبعا كنت مكسوفة ومش فاهمة اى حاجة خالص
لكن كنت دايما بحسسه انى مستمتعه جدا جدا وانى بحبه جداجدا
لان بصراحة انا بحبه جدا جدا حتى لو مفيش موضوع الجماع دة
لكن دايما كنت بحسسه انى فى افضل حالاتى
او انى وصلت لمرحلة النشوة ولو ان دة ماكنش بيحصل لانى ماكنتش فاهمة يعنى احساس النشوة او الذروة
لكن لما قريت وفهمت اتناقشت معاه
وهو بصراحه كان واعى ومثقف جدا جدا
وبدأنا نغير فى اوضاع الجماع لحد ما وصلنا لوضع او وضعين يرضونا احنا الاتنين
وبدأ يحصل جماع اكتر من مرة فى الليله الواحدة وعليه فإن كل مرة القذف بيتأخر كنت انا بحس بمعته اكبر
الى ان وصلنا مرة لنقطة الجى سبوت عندى انا وساعتها فهمت يعنى ايه نشوة
وبدأت من بعدها احاول اوصل للنقطة دى
اللى بعدها بكون خلاص مش عايزة حاجة تانية
شعبت خلاص
والحمد لله ان مشكلتى اتحلت بعد ثلاث سنوات فقط من زواجى
بس بصراحة الفضل يرجع بعد ربنا سبحانه وتعالى للقراءة الطبية المتخصصة وتفهم زوجى جزاه الله خيرا
والحمد لله حمدا كثيرا دائما ابدا كما ينبغى لجلال وجهك وعظيم سلطانك

Rino

غير معرف يقول...

فى حاجة تانية مهمة جدا انتى قلتيها وانا مجرباها
يمكن عشان انا برج الجوزاء فدايما متغيرة الحمد لله
لدرجة ان زوجى بيقولى انا متجوز اتنين مش واحدة
دايما والحمد لله محسساه انى فى حالة عشق دائم له
وهى دى الحقيقة لكن دايما بقول واعمل ما يدل على ذلك
وكنت طول اليوم اخلص شغل البيت والطبيخ ومذاكرة ابنى قبل ما هو يجيى
وقبل ميعاده بنص ساعة انيم ابنى التانى اللى كان عمره وقتها ست شهور
واهدى البيت جدا واولع عود بخور وادخل اخد شاور والبس اجمل ما يكون واحط ميكب واعمل شعرى تسريحة مخلتفة كل يوم من غير ما اروح للكوافير
مجرد تغيير فى شكل التسريحة وتغيير فى شكل اللبس وتغيير فى شكل الماكياج وتغيير فى نوع البرفان
كل دة بيشعر الزوج انه مازال عريس وان عروسته مستنياه على احر من الجمر وفى ابهى صورة
حتى لو ى الليله دى ماحصلش جماع مش لازم الزوجة تكتئب لانها لازم تكون كدة كل يوم وكل ليلة وطول الوقت ما تحسس زوجها بأى هم على قد ما تقدر
زى ما هو كمان بيستحمل مشاكل شغله من غير ما يشيلها الهم

Rino

غير معرف يقول...

يا شيخه

يا سلام على حته الجبنه و لقمه

تشبيهاتك قويه اوى يا بعبوعه هانم

مفيش احلى من الحاجات السريعه الاللى على حين غره دى
خطفه على السريع كده

كلامك جميل يا بعبعه هانم
ا

بعبعه يقول...

رينو

انا مش عايزه حد يكتب باسمه اصلا ياااااااريت كله يدخل من غير الاكونت

بس يدينى اسم اكلمه به عشان ما يحصلش لخبطه


زي ما انتى عملتي يعنى يا رينو


بالنسبه للكلام الى انتى قولتيه تمام الله يفتح عليكى انتى كده تمام

وايه يعنى لما نقعد 3 سنين على ما نوصل لتناغم ؟

هما كتير ؟؟

مش احسن ما نعيش عمرنا كله نغنى ظلموه ؟

ما بيقعدوا يحبوا بعض فى الجامعه خمس سنين على ما يتقندلوا ويتخطبوا بس

ما علينا

الله يديم عليكى السعاده انتى وجوزك

بس فى نقطه عايزه اقولها برضه

جميل اوي انك تكوني دايما فى كامل هيئتك لما جوزك يجى

بس عشان نكون واقعيين وما حدش يجي يعورنا

وحيث ان ولادك لسه صغيرين كمان

ومش هايفضلوا كده

يعنى خلينا نقول على اد ما تقدر واغلب الايام تكون على الاقل غيرت هدوم الشغل

ولو عندها اولاد كبار اكبر من عشر سنين مثلا او حتى اصغر من كده

مش هاتقدر تعمل زي ما انتى بتقولي كده اوي لاسباب كتيره بعدين تعرفيها

لكن ده ما يمنعش انها تنتهز الفرص دايما انها تكون جميله


ونقطه مهمه اوي اوي انتى قلتيها

حتى انا نسيت اشير لها فى الموضوع

يا ستات ما تتزينوش عشان الجماع
لا اتزينوا عشان تبقوا جمال

يعنى مش لازم كل ما تلبسي الحته الى على الحبل يتم جماع

الاثاره اصلها فى العقل
والعقل ده فى ذاكره
يعنى ممكن اوي جوزك يشوفك النهارده مثيره جدا لاي سبب
لبس كلمه ضحكه اي حاجه وما يقدرش فى التو واللحظه يجامعها لكن ممكن تفضل فى ذاكرته لبكره مثلا

حاولي تبقى جميله على اد ما تقدري
وما تحمليش نفسك اكتر من طاقتها

ما يحصلش حاجه لما جوزك يلاقيكى واقفه فى المطبخ وبتشتغلي وريحتك توم وبصل اللهم احفظنا

اكيد ماتروحيش تاخديه بالحضن

بس اقل واجب انه بدل ما يتذمر انه يقولك تسلم اديكى وربنا يعينك يا حبيبتى

لكن ارجوكي بعد التوم والبصر خدي حمام وغيري هدومك وحطي برفان

بسسسسسسسسسس

شكرا ليكى يا رينو

بعبعه يقول...

الغير معرف

اه هى على حين غيره دي الى انا اقصدها

فعلا

شكرا لك

Beram ElMasry يقول...

أخي العزيز عمرو
وأنت في صحة وسلامة راضيا مرضيا لنعمه عليك وفضله وتمام ستره وعظيم عافيته مع خالص تحياتي والسلام ولا سلام مع قتلة الأنبياء والأطفال بني إسرائيل .

غير معرف يقول...

جميل النصائح دى اوى على الرغم انى لسه شاب ولسه ما دخلتش دنيا زى ما بيقولوا

بس بجد استفدت كتير اوى من موضوعات حضرتك

حسيت كما لو كانت امى هى اللى بتنصحنى وخايفه عليا

انا متشكر ليكى اوى ياافندم
انت ليكى الفضل بعد ربنا سبحانه وتعالى فى مشكله كانت بتواجهنى لكن الحمد لله اتغلبت عليها
الحمد لله


top

غير معرف يقول...

طبعا ان اقصد امى من ناحيه خوفك واهتمامك

لكن لم اقصد ان اكبرك فى السن ياافندم

جزاكى الله خيرا

top

غير معرف يقول...

الموضوع اسهل منه مافيش

بس اللي صعب الدنيا الاباحيه اللي بنعشها دلوقتي والمناظر والمعلومات اللي بقت في متناول الجميع

لكن الموضوع بكل بساطه بيتوقف علي الحب ثم الحب

وصبر الزوج علي زوجته وتعلمها ومساعدتها علشان يوصلوا للقاء اللي يرضيهم الاتنين

بس

بعبعه يقول...

بيرم

نورت يا بيرم وان شاء الله عمرو هايشوف تحيتك

بعبعه يقول...

توب

انت ما تعرفش الرد بتاعك اسعدنى اد ايه

كبرني ياعم براحتك بس استفيد من الكلام فعلا وطبقه

انت رفعت من معنوياتي على فكره وانا الى متشكره لك

وبعدين انتم كلكم على البلوج اولااااااادي يا ابنى
هههههههههههههههه

نورت وفعلا انا الى متشكره ليك

وعايزاك دايما هنا تعلق وتراسلنى وربنا يكرمك ان شاء الله

بعبعه يقول...

غير معرف الاخير

تمام صبر الزوج مهم اوي وعلمه وتفهمه للموقف

والاباحيه الموجوده الى من غيرعلم خلت السلوك دخلت على بعضها

باحييك ونورت

mahasen saber يقول...

نصايح مفيده كعادة كل بوستاتك

بعبعه يقول...

شكرا يا محاسن

يا ذوق زي عادتك دايما

غير معرف يقول...

ليو
كلامك جميل قوى انا فرحى كمان كام شهر واستفدت كتير من المدونة ... لكن بجد الواحدة تعمل ايه فى الكسوف ؟؟؟