السبت، 17 أكتوبر 2009

ضعف الاٍنتصاب و الليالى السوداء

صباح الخير ..
تكلمت فى البوست قبل السابق عن موضوع يؤرق الكثير من الرجال و هو سرعة القذف اللى فى رأيى بيشكل أحد أضلاع المثلث الجهنمى الشيطانى اللى بيؤرق فكر الرجل و بينغص عليه عيشته و بيشترك مع الضلعين الآخرين اللى هم حجم العضو الذكرى و مشاكل الاٍنتصاب فى جعل حياة الرجل أسود من قرن الخروب نظرا لما تمثله هذه الهواجس من أهميه فى دماغ الذكور عموما و دماغ ذكور الشرق على الخصوص ..
طيب النهارده خلونا نتكلم باٍستفاضه شويه عن الهاجس المريع الفظيع اللى هو مشاكل الاٍنتصاب و يدفعنى لهذا ما وجدته من أسئله كثيره تدور بخواطر قراء المدونه من الجنسين متمثله فى تعليقاتهم و تساؤلاتهم و أيضا ما أتلقاه من ميلات أغلبها من شباب و بنات بل و سيدات متزوجات أيضا تدور أغلبها حول هذا الموضوع ..
و طبعا حتبقى فرصه جيده للغايه أننا سنستفيد من أراء صديقنا الفاضل الدكتور عباس الأول اللى بغير شك سيثرى الموضوع و يزيده قيمه بأرائه العلميه القيمه و باٍضافاته التى أتوقعها فشكرا لسعة صدره و لوقته الثمين ..
ضعف الاٍنتصاب فى رأيى المتواضع لدى الذكور هو ببساطه شديده الفشل المتكرر فى جعل العضو الذكرى منتصب بما فيه الكفايه لاٍيلاجه بداخل المهبل الأنثوى و اٍختراقه .. أو عدم القدره على الاٍحتفاظ بهذا الاٍنتصاب فتره كافيه من الوقت لاٍتمام العمليه الجنسيه ..خدوا بالكم أنا هنا بأتكلم عن ضعف الاٍنتصاب و ليس العجز التام عن الاٍنتصاب لأن ده موضوع تانى خالص على الرغم من كونه مرتبطا بشكل ما بموضوعنا الأساسى ..
الأبحاث بتقول اٍن هذه الحاله من الضعف هى حاله عالميه لا ترتبط بموقع جغرافى و لا بظروف بيئيه محدده و أنه يوجد فى العالم ما يقرب من 150 مليون رجل يعانون من هذا الضعف و هذا الرقم مرشح للزياده ليصل عام 2020 ل 300 مليون رجل !! (يحيينا و يحييكم ربنا )
طيب ما هى أسباب ضعف الاٍنتصاب ؟؟
بداية أحب أفرق ما بين الضعف المؤقت اللى بيحدث بشكل عرضى و الضعف المستمر اللى بيصيب الرجل و بيفضل ملازمه و بيدمر نفسيته و بيشعره بالنقص و الدونيه و يخليه يطلع مشاكله و عقده على كل المحيطين به و أولهم زوجته و المتعاملين معه ..
- ضعف الاٍنتصاب المؤقت ممكن يحدث نتيجة زيادة الضغوط النفسيه و المشاكل اليوميه اللى بنصادفها فى الحياه .. ممكن الاٍكتئاب كمان يتسبب فى مثل هذه الحاله و أنصح من يعانى منها أن يتوجه فورا لطبيب مختص ليرشده للطريق الصحيح للتخلص من هذه الحاله ..
- ضعف الاٍنتصاب المستمر و المتكرر قال الأطباء عنه أنه بيرجع فى الأساس لاٍستعداد الشخص نفسه للاٍصابه به .. و هو أمر غامض الحقيقه بالنسبه لى لكن أستدلوا على صحة كلامهم بربط هذا الموضع بعامل الوراثه نظرا لوجود حالات متشابهه داخل الأسره الواحده ..
الحقيقه أنا حأعرض من وجهة نظرى العوامل النفسيه المسببه لضعف الاٍنتصاب و سأترك الجانب الطبى لصديقنا الدكتور عباس الأول للحديث عنه فهو أقدر منى على ذلك ..
من الجائز جدا أن يكون الاٍحساس بالذنب نتيجة ممارسة العاده السريه و ما يثار حولها من أقاويل أغلبها غير صحيح بالمره بيعطى اٍحساس أولى للعريس مثلا أنه سيفشل فى القيام بالميشن اٍمبوسيبول اللى المفروض يقوم بها ..
بأضيف على ده عوامل الخجل و الجهل بالأمور الجنسيه و الضغوط النفسيه اللى بتسبق ليلة الزفاف و أثناء الفرح و تجربة الفشل فى القيام بالعمليه الجنسيه قبل الزواج و الخوف من تكرارها و قلة النوم و الأرق ..
و من أكثر ما أستغرب له حقيقة هو موضوع الربط و السحر اللى بيكون شماعه مناسبه يعلق عليها فشل العريس !!
يعنى ما كل الناس بره بتتجوز و بتدخل لا عمرنا سمعنا عن عريس دانمركى مثلا أتربط و لا عروسه هولنديه لفوا على وسطها حزام التبن ليلة دخلتها علشان عريسها ما يتسحرش و لا كلام فارغ من ده !!
اٍشمعنى أحنا اللى عرسانا على طول مربوطين و مسحورين و الناس شاغله نفسهم بيهم ؟؟!!
بتحضرنى فى هذا المقام حكاية شاب قريبى ما شاء الله يجر ساقيه و هو مرتاح و عروسته تبارك الخلاق جميله و رقيقه و بينهم قصة حب رائعه ..
ليلة الدخله فشل هذا العريس فشلا ذريعا و معرفش رغم محاولاته المتكرره لعدة أيام فأصابه الهم و أسودت الدنيا فى عينيه .. و لما أشتكى لأخوه الكبير راح جره على ما يطلق عليه شيخ هبلا و اٍعتباطا ليفك له الربط كما قرر الجميع .. و بعد شوية هبالات الشيخ المزعوم أكد أن هذا الشاب مربوط و اللى ربطاه سيده مش طويله و مش قصيره و مش تخينه و مش رفيعه و مش بيضا و مش سمرا !! و أعطاه كميه ضئيله من مسحوق لونه يميل للاٍصفرار ملفوف فى ورقه صغنونه كده و طلب منه أن يسفه على ريق النوم و لا ياكل و لا يشرب للعصر حتى لا يضيع تأثير السفوف المسحور و باٍذن الله العمل حينفك .. و لطش 600 جنيه فى حوالى 10 دقايق !!
تانى يوم قام العريس بالمهمه على الوجه الأكمل و صار يمدح فى الشيخ المزعوم اللى فك له الربط و لما وصف لى فيما بعد بماذا شعر لما تناول المسحوق السحرى أيقنت أن ما شعر به هو أعراض تناول الفياجرا و لا حول و لا قوة اٍلا بالله ..
من المهم جدا لعلاج حالات ضعف الاٍنتصاب نتيجة عوامل نفسيه أن يحاول الرجل من دول ما أستطاع أن يبتعد عن مسببات الهم و التوتر .. و المكان اللى فيه نكد يغادره فورا .. أيضا التدخين و تعاطى المخدرات بلا شك من أهم الأسباب التى ينتج عنها ضعف الاٍنتصاب خاصة لو فى سن مبكر .. و أخيرا يجب مراجعة الطبيب لو كان الرجل بيتعاطى عقاقير و أدويه على المدى الطويل باٍنتظام ..
الثقه فى النفس و القدرات العقليه و الجسديه و اٍبعاد شبح التوتر و الفشل أثناء اللقاء الجنسى هى العوامل الأساسيه لعلاج حالة الضعف النفسى بشكل عام .. أرى أنه على الرجل كى يحصل على اٍنتصاب تام و سليم أن يعطى جهازه التناسلى فرصه للاٍستجابه للمثيرات الجنسيه و المداعبات قبل الاٍيلاج بشكل كافى و ده دور الزوجه اللى لابد لها أن تشارك فى علاج زوجها بوعى و فهم كاملين لحقيقة الموقف لأن ده بيزيح كثير من المسئوليه الملقاه على عاتق الزوج للقيام بالأداء الجنسى الكامل لوحده مما يسبب له برضو الكثير من القلق و التوتر .. و يجب أن يفهم الأثنين أن جهاز الزوج تناسلى سليم و قادر على أداء وظيفته و لكن المشكله تكمن فى طريقة الأداء ليس اٍلا ..
العصبيه من أحد الطرفين أثناء العلاقه الحميميه و كثرة الطلبات و تغيير الأوضاع و تعود الزوج على الشخط و النطر و الأمر و النهى حتى فى الفراش بيخلق جو من التوتر بيضيع الرغبه و الشهوه لدى المرأه فبالتالى بيضعف أدائها الجنسى و ده بينعكس على الزوج بالسلب خاصة لما بيشعر بضيق أنثاه منه و بيجف بالتالى مهبلها و بتصبح العمليه عباره عن تعذيب للطرفين فمن أين و كيف و لماذا لا يصاب الزوج بضعف الاٍنتصاب ؟؟
اٍعلم عزيزى الزوج أن الهدف من العلاقه الجنسيه بجانب خلفة العيال هى المتعه و الاٍستمتاع بجسد الزوجه و بما وضعه فيه المولى من مثيرات كثيره .. يعنى الهدف مش بس تفريغ طاقه ثم النوم العميق .. عود نفسك أن تأتى العلاقه الجنسيه عفوا و بطريق الصدفه بغير تخطيط منك و لا تجهيز و كأنك داخل حرب مع عدو لازم تطحنه و تجيب أجله لا بالعكس أنت يا عزيزى بتتعامل مع أنثى يعنى مع كم مهول من المشاعر و الأحاسيس و العواطف الجياشه و على قد ما حتكون لطيف معاها ستكون مستجيبه لك و حتوصلك لقمة أدائك الجنسى المطلوب ..
عزيزى الزوج بطل تقيم موقف أدائك الجنسى فى محاوله منك للوصول لأداء أبطال الأفلام الاٍباحيه اللى بتتفرج عليها و اللى بتقارن بين أدائك و بين أدائهم و اللى حيجيبولك عقده بشنيطه أنت و رجولتك .. كمان يا أخى بطل تقارن بين زوجتك الرقيقه الحبوبه بنت الناس الخجوله و بين ممثلات هذه الأفلام الاٍباحيه و ماتطلبش منها أبدا و لا حتى بينك وبين نفسك أنها تكون زيهم و ماترميش عليها عقدة فشلك و ضعفك لأنها لا تستحق منك هذا ..
عزيزى الزوج ضعيف الاٍنتصاب لأسباب نفسيه حاول تركز دايما فى المشاعر أثناء العلاقه الحميميه و أبتعد قدر ما أستطعت عن الاٍثاره الفكريه بينك و بين نفسك .. يعنى ركز فيما هو بين يديك و لا تتعداه لما هو غير جائز لك ..
اٍمتنع عن تناول الطعام الدسم قدر ما أستطعت و ده على عكس ما هو شائع أن الأكل الدسم بيعطى قوه جنسيه للرجل .. لا بالعكس .. و معروف طبعا نوعية المأكولات و المشروبات الصحيه اللى بتقوى الاٍنتصاب لدى الرجال ..
و أمتنع لفترة أسبوع كده عن اٍقامة علاقه جنسيه و أكتفى فى هذا الأسبوع باٍستكشاف جسد زوجتك مع بعض المداعبات الخفيفه منها و التى لا تصل لحد القذف و حتلاقى نتيجه جيده للغايه باٍذن الله ..
متشكر لحضراتكم و أعذرونى للتطويل .. و لكم تحياتى ..

هناك 57 تعليقًا:

بعبعه يقول...

برافوا يا عمرو


فعلا هو موضوع مهم جدا جدا

وحضرتك اتكلمت عن الجانب الانساني والنفسي منه حلو اوي ما شاء الله

وفعلا انا جالي اميلات كتيره بتدور حوالين الموضوع ده

وشكرا لك على مجهودك

وربنا يجازيك خير ان شاء الله

معجبة يقول...

الله عليك
اصلى يعنى اصلى
خببر بجد و كانك عايش مع الناس و بتشوف مشكلاتهم
بحييك من كل قلبى و متابعة كل كلامك

غير معرف يقول...

يقولى اعمل اية الانى بحب وحدة وخايف اقول انى بحبة وانا منفعش للزواج اظلمها معايا وانا مهما كان راجل مينفعش اودى اهلى فى دوشة واحراج انا خايف والرب هوا الستار ولطبيب والرحيم بعبادة والحمد الله والله اكبــــــــــر

Remas يقول...

الموضوع مهم جدا جدا

وحضرتك قلت نقطة مهمة جدا ان الزوجة لازم تتفهم كويس جدا هذا الموقف وتتعامل معاه بمنتهى الهدوء

انا يمكن كتبت الكومنت مخصوص علشان اقول لحضرتك ان اسلوبك بيعجبنى جدا
حضرتك بتتكلم بمنتهى الرقي والبساطة حتى في اكثر الموضوعات حرجا .

ياسمين يقول...

من خلال التجربة فان المرأة تحب أن ترى القضيب وهو في حالة الانتصاب ، ولاتحب أبدا أن تراه في وضع الخمول ، لان الانتصاب في وجدان المرأة هو عنوان الفحولة والرجولة والجنس الازلي ،، ثم ان مص القضيب أو الفرج غير مجحبب ، القضيب خلق لادخاله في الفرج وسكب ماء الحياة فيه ،، هذه قصة الجماع والجنس الازلية وسلام

MADO يقول...

Very good MR AMR ,some studies say every man got that at least once at life time (USA) so it's not big deal if it happen once or so BUT the point that MANY men will take it as a woman fault and then will start to think if he try with another woman it will be better.so thanks to let them know it's just
happen

صيدلانية شطورة يقول...

ضعف الانتصاب يحدث نتيجة لتاثير انزيم
فوسفودايستريزرقم 5 علي ماده جوتنوزين احادي الفوسفات الحلقي(طبعا اسم علمي صعب علي الكثير استيعابة)
وهي المادة المسئولة عن زيادة تدفق الدم
للعضو الذكري
ولذلك يفضل استخدام مادة سيلدينافيل سترات ويبدء تاثير المادة في خلال 30دقيقة
ويمكن الاستفادة من فاعلية المادة في خلال 6-4 ساعات
ولكن هناك موانع للمادة يجب اخذ الحيطة فيها مثل
مرضي ضمور العصب المغذي للشبكية او اي امراض تتعلق بالابصار
في حالة الانتصاب المؤلم من تاثير المادة يجب التوقف عن استخدامة
مرضي القلب يجب ان ياخذو اقل تاثير
مثلهم مثل مرضي الكبد والسكر
ارجو ان اكون وفقت
معلومة اخيرة
يتوفر في اشكال كثيرة ومتنوعة منها
فياجرا
فايركتا
اريك
التراماكس
فيجوراما
سيلاجرا
سنافي

و شكرا لحضرتك يا استاذ عمرو على ثقافتك الجنسية الممتازة

محمد يقول...

صباح الخير يا استاذ عمرو يا جميل يا ابو دماغ عاليه سايب حبشتكنات لية من مدة؟
اناعمري 22سنة
دقنى ناعمة للان والشعر في عموم جسمي خفيف وكذلك الصفات الذكرية عملت تحليل تسترون وجدت انه عندي قليل جدا" فهل يوجد علاج لزيادة نسبة التسترون أو نظام غذائي مثلا"
مع جزيل الشكر

محمد يقول...

صباح الخير يا استاذ عمرو يا جميل يا ابو دماغ عاليه سايب حبشتكنات لية من مدة؟
اناعمري 22سنة
دقنى ناعمة للان والشعر في عموم جسمي خفيف وكذلك الصفات الذكرية عملت تحليل تسترون وجدت انه عندي قليل جدا" فهل يوجد علاج لزيادة نسبة التسترون أو نظام غذائي مثلا"
مع جزيل الشكر

سندريلا خالص يقول...

السلام عليكم

زوجى يستعمل جهاز تكبير القضيب من 3 ايام مبتدئ لكن عنده قرحه بالمعده

هل هناك مخاطر من استعمال الجهاز بوجود القرحه وعندي اسأله كثيره متعلقه بالجهاز لكن استاذ عمرو مطنش الرد

افيدونا جزاكم الله خير

غير معرف يقول...

الموضوع حلو جداٌ يسلم قلمك يا عمرو

لو زوج لا ينتصب سوى لما زوجته تتكلم كلام قبيح جداٌ
ده مش طبيعى طبعاٌ بس أية الحل فى رأيك؟
و الزوجة بتحبة و مش ترضى تزعلة تعمل أية؟

و شكراٌ

غير معرف يقول...
أزال أحد مشرفي المدونة هذا التعليق.
عمرو يقول...

بعبعه
متشكر ليكى جدا يا أختنا الفاضله و أرجو أن يكون الموضوع قد أفاد الكثيرين ..
أرى اٍن الجانب النفسى له اليد الطولى فى المشكله اللى بنتكلم عنها ..
الصحه النفسيه لها اٍنعكاسات كبيره و خطيره على الجسد ..
هذا ما أصدقه تماما ..
متشكر ليكى و تقبلى تحياتى ..

عمرو يقول...

معجبة
متشكر لمتابعتك و لاٍطرائك و أهلا بيكى ..

عمرو يقول...

غير معرف الأول
أيوه صح طبعا الحمد لله و الله أكبر و ربنا قادر على كل شىء ..
هو أنت أيه مشكلتك ؟؟
مش فاهم !!

عمرو يقول...

reem
متشكر ليكى جدا ..
و فعلا الزوجه لابد تتعامل مع الموقف بهدوء و عقلانيه و تفهم و اٍلا اٍزدادت الأمور سوءا و ده اللى بنحاول نوصله للأذهان ..
شرفتى و أهلا بيكى ..

غير معرف يقول...

الله ينور يا استاذنا
الرجال اصبحت حالهم يكسف بصراحه

عمرو يقول...

ياسمين
شكرا يا ياسمين للاٍضافه ..

عمرو يقول...

MADO
متشكر ليك ..
فعلا بتحصل و على الزوج أن لا يلقى بتبعات كل ما يحدث له من أمور تسوءه على الزوجه فقط و اٍلا فلن يصل لحل لمشاكله أبدا ..
و أؤيدك اٍن بعض الرجال بيحاولوا يخوضوا تجارب خارج نطاق الزوجيه و غالبا بيكون لده تبعات سيئه للغايه بتزيد الأمور تعقيدا ..
أشكرك و أهلا و سهلا بك ..

عمرو يقول...

صيدلانية شطورة
نشكرك يا دكتوره على الاٍضافه و المعلومات ..
و بعد اٍذنك لا يفوتنى أنى أنوه كل هذه المنشطات اللى ذكرتيها لا يجوز أن يتعاطاها الرجل كده من نفسه و لكن يجب أولا اٍستشارة الطبيب المختص للتأكد من ملائمتها لحالته الصحيه ..
شكرا ليكى ..

عمرو يقول...

محمد
متشكر و أهلا و سهلا بيك ..
لا أنا مش بعيد عن حبشتكانات بس فى حالة اٍنشغال شويه ..
مشكلتك أتركها للدكتور عباس الأول فهو القادر على توجيهك للوجهه الصحيحه اٍن شاء الله ..
بالتوفيق و تحياتى ..

عمرو يقول...

سندريلا خالص
من فتره أرسلت لك ميل رد على الميل اللى أرسلتيه بخصوص جهاز تكبير القضيب و أخبرتك أن من الأفيد أن تستشيروا طبيب مختص يعنى لم أهمل فى رسالتك .. و بأكررها تانى لحضرتك أنه من الأفيد لكم أن تستشيروا طبيب مختص و عموما ربما يكون لدى الدكتور عباس الأول ما يفيدكم بهذا الخصوص ..

عمرو يقول...

غير معرف اللى زوجها بيحب يسمع كلام مش كويس
لا أنصح بالتمادى و لا أنصح بالمنع ..
الأصح يا سيدتى أن تحاول الزوجه أن تقنع زوجها بالتوجه للطبيب النفسى لأن بالتأكيد الموضوع له جذور نفسيه عميقه لدى الزوج و مش من السهل البت فى الأمر كده ..
شرفتى و أهلا و سهلا ..

غير معرف يقول...

عايزه اعرف يعنى هو لو القضيب مش منتصب مش ينفع تتم العلاقة الجنسية و لا ايه مش فاهمة
و منتصب دى يعنى يبقى ناشف و لا ايه برضة مش فاهمة حاجة

بعبعه يقول...

البت الهبله العبيطه الى عماله تدخل تسيب تعليقات سخيفه ووقحه زيها

بلاش وقاحه وقلة ادب

مش قاعدين احنا هنا نهزر

مش انا الى شلت تعليقك الاولاني

بس كل ما تتساخفي هاشيل ام التعليق

بلاش هبل والنبى مش ناااااااااااااقصه

غير معرف يقول...

ربنا يجازيكم الخير على مجهودكم الكبير
و لو سمح الدكتور هل ممارسة الجنس الفمي بقصد القذف و الإنزال في الفم فيه شيء من التحريم القاطع،انا أحب ممارسة الجنس الفمي أمارس له ويمارس علي.
هل فيه ضرر صحي

و شكرى و دعاءى بالتوفيق

سامبا يقول...

يا استاذ عمرو سالت حضرتك سوال ورغم كده سوالي متجاوبش بعد...
انا بسال الدكتور عباس هل تمرين ستارت اب تكنيك وهو حبس المني قبل الانزال اثناء ممارسه العاده السريه ليه اضرار علما بان احد الدكاتره المتخصصين قال انه بيعالج سرعه القذف ودكتور تاني قاللي مينفعش اعمل تحاليل لو كنت عامل احتباس لان ده بيضر وبياثر
وعايز اعرف هل للعاده السريه تاثير علي القدره الجنسيه ام التاثير مقتصر علي الاسباب اللي استاذ عمرو ذكرها في البوست و فى اجوبه سابقه ارجوا الافاده.. وشكرا

أبــــو ضـــيــاء يقول...

ربنا يكرمكم يا استاذ عمرو

غير معرف يقول...

انا عندى العضو الذكرى كبير جدا ويؤلم زوجتى ..ما الحل؟

د.عباس الاول يقول...

الاخ الفاضل إلى خائف من الزواج

لا يوجد مبرر للقلق

عليك ان تقوم بالكشف عند طبيب مختص بأمراض الذكورة لتقيم هل هناك اى مشكلة عضوية فى الانتصاب او ان كل ما تعانى هو مجموعة من الهواجس والتوتر الزائد وهو الاكثر انتشارا

تحياتى

د.عباس الاول يقول...

عزيزى صاحب مشكلة قلة الشعر

نقص هرمون الذكورةإذا كان اقل من المعدل الطبيعى

يفضل إعادة التحليل مرة اخرى

هناك اكثر من احتمال ان يكون هناك كسل فى الخصية الغدة المسئولة عن انتاج هرمون التيستيرون او كسل فى الغدة المايسترو (الغدة النخامية) وهى الغدة المسئولة عن تنشيط الخصية

ولذلك تحتاج إلى الكشف عند طبيب مختص لمعرفة السبب وفى الغالب ستحتاج إلى هرمون تعويضى لفترة

تحياتى

د.عباس الاول يقول...

العزيزة الزوجة التى تسأل عن جهاز تكبير القضيب

لا يوجد اى جهاز طبى علمى لتكبير القضيب وكذلك لا تفيداى تمرينات او ادوية لذلك

وجميع الاعلانات على هذه الاجهزة هى عبارة عن عملية نصب منظمة

يوجد علاجات دوائية لتكبير القضيب إذا اكتشف الحالة فى مرحلة البلوغ وليس بعد ذلك

بعد البلوغ الحل الوحيد لتكبير القضيب هو عن طريق العمليات الجراحية

التى يختار إليها المريض بعناية و لا تعتمد على رغبات المريض فقط

اغلب المرضى الذين يشتكون من صغر حجم القضيب بعد الفحص الطبى تكتشف ان طول القضيب الخاص بهم طبيعى وهو اكبر من 8 سم فى حالة الانتصاب ويقاس من عظمة الحوض حتى راس القضيب

علما بأن طول المهبل عند الزوجة فى حدود 10 سم

تحياتى

د.عباس الاول يقول...

الاخت الفاضلة صاحبة مشكلة الجنس بالفم

طبيا فى حال سلامة الاعضاء التناسلية من الامراض الجنسية لا توجد اى مشكلة طبية من ممارسة الجنس بالفم او حتى القذف داخل الفم فى حالة تقبل الطرفين

دينيا يوجه السؤال لأحد المختصين فى الدين

معلوماتى الشخصية المحدودة انه حلال وإن كان الشيخ القرضاوى يفضل انه لا يكون الوسيلة الرئيسية للإمتاع الجنسى

تحياتى

د.عباس الاول يقول...

الاخ الفاضل سامبا

طريقة استارت اند ستوب تكنيك هى احد علاجات سرعة القذف

هذه الطريقة للمتزوجين لأنها تحتاج إلى تعاون الزوجين

وتعتمد على التوقف عن حركة الجماع فى حالة الاحساس بقرب الوصول للحظة القذف (وليس حبس السائل المنوى قبل خروجه)

وبعد فترة من استعمال هذه الطريقة يستطيع المريض التحكم فى توقيت القذف

حبس السائل المنوى يمكن ان يؤدى إلى احتقانات والتهابات فى المنطقة التناسلية والخصية والبروستاتا

لا توجد اى اضرار طبية مثبته علميا للعادة السرية

وهى تعتبر كالجماع من الناحية الفسيولجية

لكن الاكثار منها ومحاولة إُثتثارة الشهوة المستمر قد يسبب نوع من التوتر والتشتيت الذهنى للمراهق

تحياتى

د.عباس الاول يقول...

الأخ الفاضل الذى يشتكى من كبر حجم القضيب

الاصل ان اى حجم القضيب لا يسبب مشكلة لأن المهبل قناة عضلية تستطيع التمدد بحيث انها فى وقت الولادة مثلا تستوعب نزول طفل

هل الافرازات الملينة الخاصة بالزوجة موجودة ؟

فى حال عدم وجودها يمكن استعمال الجيل الخاص بالعملية الجنسية مثل الكاى واى جيل

لا ننصح بالادخال العميق للقضيب لأنه فى بعض الاحيان يكون عنق الرحم حساس عند الزوجة مما قد يزيد من احساسها بالالم

مهم ايضا الاكثار من المداعبات لتجهيز الزوجة للعملية الجنسية وعدم القيام باى حركات عنيفة اثناء اللقاء الزوجى

فى حال استمرار الحالة برجاء الكشف للزوجة عند طبيب نساء لمعرفة هل هناك اى مشكلة صحية تسبب زيادة الالم

تحياتى

غير معرف يقول...

السلام عليكم........
معلهش سؤال برة موضوع البوست هو الصدر بيكبر بعد الزواج؟؟؟؟
لو ايون ازاى يفضل بحجمة بعد الزواج؟؟؟؟؟

ع س يقول...

افتقدت مواضيعك المميزة جدا فى حبشتكنات يا استاذ عمرو
متغيبش علينا كدا

غير معرف يقول...

الزوج الذى يألم زوجتة""""
الألم ممكن يكون فى الأول بس لازم تحبه زوجتك لأن هذا الحب هو اللى هيخليها تستحمل الألم اللى هيتحول لمتعة لأنك وصلتها لمتعتها وصدقنى بعد كده مش هتلاقى أى ألم وانصحك باستخدام بودرة لعلاج الإلتهابات فيها لأن الألتهابات تسبب الألم

بعبعه يقول...

الغير معرف

الاخير

حضرتك كلامك ده مش صح خالص وياريت يا جماعه معلش نتحرى الدقه فى كلامنا دي حياة ناس

يعنى ايه الالم عادي وتستحمله عشان بتحبه ده

وبعد كده تستمتع بالالم كل ده مش صح خالص يا جماعه

من الطبيعى فى اول الجواز ممكن يكون فى الم خفيف

انما الم تستمتع به وتعتاد عليه

لا طبعا

الطبيعى ان العلاقه تتم بدون الم اي حاجه غير كده يبقى وضع غير طبيعى

وما تستعملوش حاجه من غير طبيب لان واضح هى ما عندهاش خبره كفايه عشان تعرف ايه مشكلتها تحديدا


وقد يكون مش السبب الالتهابات اصلا قلة الترطيب لواحدها تعمل الم

شكرا على محاولتك المسعاده

بس سوري كلامك هامس صحة وحياة ناس

غير معرف يقول...

عندى سوال ملوش علاقه بالموضوع
انا شاب عندى 23 سنه
اعتدت على ممارسع العاده السريه منذ الصغر بسبب الصحبه السيئه
وتسببت فى عدم احتلامى الى هذه اللحظه اعرف بان ذلك طبيعى لما يكون الانسان دائم على العاده السريه
حاولت كتير جدا جدا بانى اتوقف
ولم انجح الى الان فى التوقف عنها مع العلم بان اقل شى ممكن يثرنى ويدخلنى فى دايره الاحتياج اللى زى الزفت دى
سوالى بقه انا لو توقفت عن ممارسه العاده السريه لفتره طويله ولم احتلم طبيعيا واعرف انى لن احتلم
ما مدى خطوره ذلك
يعنى انا لو توقفت ولم احتلم هل هذا فيه خطوره ولا لابد من انى امارس العاده لتعويض النقص عندى بعدم احتلامى

ارجو الرد سريعا

ميدوو

د.عباس الاول يقول...

عزيزى غير المعرف صاحب مشكلة عدم الاحتلام

وجود الاحتلام ليس ضرورة فى حد ذاته وقد يتعلق بعوامل خارجية عن الشخص كحجم المثيرات التى يتعرض لها يوميا


قد تكون هناك علامة استفهام إذا جاء إلى العيادة شخص لم يحتلم ولو يمارس العادة لأنه فى هذه الحالة لم تختبر الية القذف عنده

لكن بما انك مارست العادة من قبل وحدث قذف طبيعى فلا يوجد اى تساؤل عن سلامة اليه القذف الخاصة بك

أرجو ان اكون اجبت عن سؤالك

تحياتى

غير معرف يقول...

شكرا على اهتمامك يادكتر
لكن انا اريد انا اتوقف عن العاده ياسيدى
انا اعرف بان عدم الاحتلام ليس بمشكله طالما اختبرت قدره القذف عندى كما تفضلت حضرتك وزكرت

ولكن انا قصدى مختلف

انا اريد انا اتوقف عن ممارسه العاده السريه لانها تسبب لى مشاكل نفسيه
هل التوقف عن ممارستها سيودى بمشاكل مثلا
ولا لازم امارسها كل فتره كبيره
وان كنت اريد ان امتنع عنها تماما
ينفع انى اتوقف عنها تماما دون اللجوء اليها مطلقا؟
وهل هذا فيه مشاكل على البروستاتا من احتقان
والدوالى لعدم تفريغ الطاقه الجنسيه عندى


متشكر جدا على ردك
بس محتاج فعلا اعرف
نفسى اتوقف نهائيا عم ممارسه العاده السريه

ميدوو

غير معرف يقول...

موضوع جميل تسلم ايدك يااستاذ عمرو

انا ليا بعض الاستفسارات لانى مقبل على الزواج وعايز افهم بعض النقاط الشائكه عندى

اولا هل فيه فرق فى المتعه الجنسيه
للرجل مع امراءه سمينه او امراءه نحيفه؟وكذلك للمراءه هل يختلف ادائها بهذا؟

ثانيا لو زوجتى مختونه هل دا هياثر على ادائها الجنسى؟

ثالثا هل هيكون منى مطلوب شى معين اعمله مع زوجتى لو مختونه؟على سبيل المثال انى اطول فتره المداعبه التى تسبق الجماع الفعلى لانى سمعت ان لو الست مختونه بيتاخر الاورجازم عندها واحيانا بتكون بارده جنسيا

ولو دا صحيح اعمل انا ايه مع زوجتى لانى مش عايز اكون انانى لانى من متعتى ان اجد زوجتى مستمتعه هى الاخرى؟

وازاى اعرف ان زوجتى وصلت للاورجازم؟هل هلاحظ حاجه معينه؟

سوال اخير اول ليله لى مع زوجتى اطفى النور ولا اسيبه؟ايه الافضل..

ارجو الرد سريعا
لانى هستزوج باذن الله قريبا؟

ميدوو

غير معرف يقول...

معلش يادكتر سوال اخير انا بطول عليك انا اسف

هل من الافضل انى ااجل اللقاء الحميمى مع زوجتى لتانى يوم بعد ليله الزفاف؟

ولا استغل الفرحه والنشوه بهذا اليوم لاتقرب اليها اكتر؟

جزاكم الله خيرا
وشكرا لك يادكتور عباس
معلش اسالتى كتير بس مليش غيرك استفسر منه واكون واثق من كلامه؟

جزاك الله كل خير

غير معرف يقول...

انا كل ما اقوم افتكر حاجه اسال عنها انا اسف مره تانيه

سوال هيكون الاخير
الافضل ان يتم التجرد من الملابس نهائيا ولا ايه؟
انا عارف انه مش المفروض اسال حضرتك السوال دا..بس بجد عايز اعرف كل شى قبل ما اتلخم فى تجهيزات الفرح وخلافه

شكرا لك يادكتور

ميرفت يقول...

استاذ عمرو احييك على خبرتك اللى لا شك فيها و الدكتور عباس على ردودة الطبية المفيدة
و طبعا احيى بعبعة قبلكم :)
استاذ عمرو عايزة اوجة لحضرتك سؤالين لو سمحت
هل حضرتك تسمح لاولادك بالثقافة الجنسية؟
السؤال الثانى خاص شوية زوجى لا يحب ان يقذف داخلى لكن ينهى اللقاء الجنسى بالقذف خارج المهبل و هذا يضايقنى
هل هناك ارتباط بين السائل المنوى و شبع الزوجة الجنسى ام انى واهمة؟
حضرتك حد محترم و هتفهم سؤالى صح
و شكرا

غير معرف يقول...

بعد صباح الخير....
خطيبى يشتكى من البواسير و أخاف هيكون عنده ضعف انتصاب ذى مسمعت
أنصحونى ربنا يكرمكم

بعبعه يقول...

اتوجعتي فى لسانك يا مايا

د.عباس الاول يقول...

عزيزى ذو الاسئلة المتعددة

السؤال الاول :

إذا امتنعت عن العادة السرية وفى نفس الوقت امتنعت عن التعرض للمثيرات الجنسية لن تكون هناك ادنى مشكلة

لكن إذا امتنعت عن العادة واستمر تعرضك للمثيرات قد يؤدى ذلك لحدوث احتقان والام فى الخصية والبروستاتا نتيجه امتلائها المتكرر بالافرازات الجنسية


السؤال الثانى :

يمكن تاجيل اللقاء الزوجى الاول إذا كانت الظروف غير مواتيه (إرهاق توتر عدم تعود بين الزوجين)

السؤال الثالث :

هل يخلع الزجين ملابسهم بشكل كامل او يتم الجماع الاول بملابس السهرة اعتقد ان سؤال لا يحتاج إلى إجابة طبية

دعنا نتفق على الاقل انه لا يصح ان يجامع الرجل الزوجة عن طريق اخراج القضيب من فتحة بنطال البيجامة

فى النهاية اللقاء الزوجى فطرة لا يحتاج إلى كل كل هذه الاسئلة استفتى عقلك

تحياتى

د.عباس الاول يقول...

عزيزتى غير المعرفة

البواسير ليس لها اى تاثير سلبى على القدرة الجنسية للرجل


تحياتى

عمرو يقول...

ع س
أشكرك و أعتذر عن التأخير فعلا فى الكتابه فى حبشتكنات و اٍن شاء غيه بوست جديد حأنشره قريبا جدا باٍذن الله ..
أهلا و سهلا

عمرو يقول...

ميرفت
متشكر ليكى جدا ..
بالنسبه لسؤالك الأول :
أيوه طبعا أسمح بالتثقيف الجنسى لأولادى كل على حسب مرحلته السنيه يعنى كل واحد على قد سنه و عقله و مدى اٍستيعابه ..
يعنى مصارد اٍستقاء الثقافه الجنسيه الصحيحه لشاب غير المصادر لصبى على مشارف المراهقه ..
و فى كل الأحوال بأراعى وجود رقابه منى على هذه المصادر حتى لا يختلط فيها الغث بالثمين ..
بالنسبه لسؤالك التانى :
طبيا و علميا مش حأقدر أبت فى الموضوع و أترك ده لصديقنا الفاضل الدكتور عباس ..
لكن لاحظت أن القذف داخل المهبل بيعمل نوع من البهجه لدى المرأه قد تكون بهجه نفسيه تشعرها بأنوثتها الححقيقيه و بأن العمليه الجنسيه قد اٍكتملت ..
و ربما يكون ده السبب من شكوى الزوجات اللى أزواجهم بيستعملوا العازل الطبى و عدم تفضيلهم لهذه الوسيله لمنع الحمل ..
و الرجل الطبيعى حقيقة لا تكتمل نشوته اٍلا بالقذف الطبيعى داخل المهبل هو كمان ..
اٍن لم يكن هناك مانع قهرى لدى زوجك فحاولى أن تفهميه بصراحه و بغير خجل أن ما يفعله يضايقك و لا يكمل سعادتك ..
و شكرا ليكى ..

عمرو يقول...

أبو ضياء
متشكر لك جدا و أهلا و سهلا بيك

عمرو يقول...

غير معرف المقبل على الزواج
تسلم يا عزيزى و شكرا لك ..
مبدئيا كده فى رأيى أن المتعه الجنسيه سواء كانت مع اٍمرأه ممتلئة القوام أو نحيله بتبدأ أصلا و تنتهى عند مدى الحب و التفاهم و الوئام و التناسق الكيميائى بين الاٍثنين .. يعنى مش كل الموضوع حسى لكن فيه جنب كبير معنوى ..
ممتلئه أو نحيله ده بيرجع لذوق الرجل أصلا و ميوله لكن بغير شك و خلينا نكون صريحين فالمرأه الرشيقه خفيفة الحركه أكيد أدائها الجنسى بيختلف عن زميلتها ثقيلة الوزن و الحركه ..
و لا أغفل أيضا كون الزوج ممتلىء هو الآخر و له بطن كبيره أم لا و ده أيضا له دور فى الأداء الجنسى ..
سؤالك ده ينكتب فيه أبحاث و الله !!
بالنسبه لسؤالك الثانى : مبدئيا أنا ضد الختان .. ضد ختان البنات تماما اٍلا لما البنت تكبر و تظهر مشاكل طبيه أو صحيه لا يقررها سوى الطبيب المختص الأمين عندها يجوز العمل برأى الطبيب ..
لا شك أن ختان البنت يؤثر عليها بشكل ما جنسيا و كيف لا و البظر و هو الجزء الرئيسى الذى تتم اٍزالته هو العضو المتصل مباشرة بلذة البنات جنسيا و ليس له وظيفه أخرى معلومه حتى الآن ..
لكن الواقع أنه كما قلت لك سابقا فالمتعه تبدأ و تنتهى عند هوجة الأحاسيس و المشاعر يعنى البرود الجنسى لا دخل له تقريبا بكون الزوجه مختونه أم لا .. و لا ننسى أن وجود الجى سبوت يساعد كثيرا جدا على وصول الزوجه للأورجازم ..
طبعا المداعبات الجنسيه التى تسبق العمليه الجنسيه مطلوبه على كل الأحوال و هى أمر اٍلهى لا شك فيه .. و قلته أو كثرته بتختلف من اٍمرأه لأخرى و لكن يجب شوية حرص حتى لا تكون هذه المداعبات هى الهدف الأساسى من العمليه الجنسيه كما أجد فى الميلات التى تصلنى و اللى بتكتفى بها بعض الزوجات ..
شويه بشويه ستكتشف ما يسعد زوجتك و ما يضايقها فالفروقات الفرديه بين النساء يجب أن تؤخذ فى الاٍعتبار يعنى ليس كل النساء سواء ..
علائم وصول المرأه للأورجازم كثيره و متعدده و بتختلف من سيده لأخرى .. لكن فى رأيى أهم علامه هى حدوث تقلصات بالجزء السفلى من الجسد خاصة فى عضو التناسل الأنثوى .. و قد تمتد هذه التقلصات لباقى الجسم .. و قد تتشبث الزوجه بزوجها بقوه .. و قد و قد ... يعنى فيه دلائل كثيره ..
بصراحه شايف أنك تطفى النور توفيرا لفاتورة الكهرباء و تكتفى بشمعتين كده معطرين برائحة الفانيليا و متستعجلش و كل حاجه حتيجى لوحدها ..
أتمنى لك يا عزيزى السعاده فى حياتك الزوجيه اللى أنت مقبل عليها :)

غير معرف يقول...

يعنى اللى مش متجوزين يعملو ايه بعد الكلام دا؟
بس معلم يا عمرو و الله

غير معرف يقول...

شكراً كتيييييير على هيدا المستوى من الحوار
بس المشكل اني ما بعرف امور الزواج لو امكن مساعدتي ويلي يساعدني له الشكر

غير معرف يقول...

بسم الله والحمد لله والصلاة والسلام على رسول الله اما بعد
اخى د/ عباس لى سؤال اتمنى انك تجاوبمى عليهاناكنت فسن ال18 وحصلت لى حاجة غريبة واحد صاحبى كنا بنهزر وضربنى تحت سرتى ب10سم ناحية اليسار فى بداية اعلى الفخد خلاص بعد كام شهر حصلى التهاب ف الخصية الشمال وورمت وكبرت جدا جدا وكانت ناشفة ومتحجرة وطبعا روحت للدكتور اللى قالى دة خراج فى الخصية وادانى علاجات ومضادات ولم يحدث تقدم وواحد تانى قالى دة مرض البروشيا والتالت اللى قالى دة زيادة فى السائل المنوى والرابع دة كان استشارى عملى كورس علاج بالمضادات الحيوية وكانت حقن قوية جدا وكانت غالية المهم تدريجيا نزل حجم الخصية وظلت متحجرة وبعد فترة بدأت تصغر تصغر الى ان وصلت لحجم الحمصةاما الثانية فزادات واصبحت تقريبا ضعف حجمها وطبعا روحت لاستاذ متخصص ولكن لم يفدنى كثيرا وقالى ربنا ادانا اتنين علشان لو واحدة عطلت التانية تبقى موجودة انا دلوقت عندى 26 سنة وداخل على زواج هل كل الظروف السابقة لها تأثير ع الانجاب باى شكل او توصف الحالة عموما باية والافضل انى اعمل اية افدنى جزاك الله خيرا