الأحد، 8 نوفمبر 2009

Frigidity البرود الجنسي

طبعا زي ما احنا دايما متعودين بنحاول نختار الموضوعات الى بيوصلنى اميلات عنها او حتى في الردود

وكان فى اكتر من موضوع واخترنا نتكم النهارده عن البرود الجنسي للمراه عن الرجل اسمه حاجه تانيه نبقى نتكلم فيه بعدين

نعرف الاول ما هو البرود الجنسي للمرأه

هو عدم اقبال المرأه على الجنس ولا احساسها به والتمتع به .

والموضوع مش بالبساطه الى تخلي كل واحد يقول لمراته انتى بارده جنسيا لا طبعا

الوحيد الى ممكن يقرر الموضوع هو طبيب مختص لان مش كل واحده عندها مشكله باظهار تمتعها بالجنس تبقى بارده .

المفروض ان فى اسباب عضويه للبرود الجنسي فى حالات قليله ونسيب علاجها للاطباء طبعا المختصين

خلينا نتكلم عن الاسباب النفسيه والى هى فى رايي شائعه اكتر خصوصا فى مجتمعنا العربي والمصري على وجه الخصوص

مع تسجيل ايماني الشديد بان احنا عندنا المرأه مشوهه العقل جنسيا ( يعنى دماغها بايظه من ناحية الجنس )

وبدون أي ذنب منها سوى انها من مجتمع بيفكر غلط



تعالوا الاول نحدد ايه الى يخلي المرأه ما عندهاش رغبه فى الجنس ؟؟

اولا : تعرض البنت فى الطفوله مثلا لتحرشات او اغتصاب او حاجه تسبب لها عقده من الرجال مثلا او من الجنس او من الحياه كلها اصلا .

ثانيا : احنا كمجتمع بنربي فى البنت خزعبلات فى الدماغ عن الجنس (بنكرهها فيه ونخوفها منه) اه امال تجيب لنا العار ولا ايه ؟؟
بيكون عندها رفض داخلي للعلاقه الجنسيه وبالتالي

يا اما تحتقر العلاقه الجنسيه وتحسها مهانه للمرأه وحيوانيه من الرجل والى اخره من كلام الناس الى عاملين نفسهم مثقفين وبالتالي ده بيمنعها من الاستمتاع بالجنس

يا اما لا شعوريا تقرر انها مش عايزه جنس مش بتحتاجه ما عندهاش رغبه ( الله انا مؤدبه بزياده ياعالم ) وبرضه فى الحاله دي لا شعوريا بتمنع نفسها وجسمها من الاستمتاع بالجنس

والنقطه دي معاناها ان المرأه عندها مشكله اصلا مع العلاقه الجنسيه نفسها (ودي كتير اوي اوي اكتر مما تتخيلوا )


ثالثا : ان احنا برضه كمجتمع مستنيل على عينه برضه امعانا فى تخريب دماغ البنات بنكرههم فى نفسهم .

ونحسسهم ان الاعضاء الجنسيه دي حاجه وحشه ويع ومقرفه ومافيش مانع جالبه للعار . وبالتالي البنت بتكره الفرج وبتعتبره مصدر للقرف والعار وقلة الادب وكل حاجه زفته فى الدنيا

وطبعا بما ان العلاقه الجنسيه بتتم من خلال العضو ده يبقى العلاقه الجنسيه هى كمان زيه بالظبط .

النقطه دي بقى معناها ايه ؟ معناها ان المرأه دي عندها مشكله ناحية جسمها .مش متقبلاه اصلا .

رابعا : الختان . بصوا هو الختان ممكن يكون مؤثر لكن فى حالات الختان الجائر

يعنى لو كان الختان عباره عن خفض فقط ( ازاله جزء صغير من البظر ) ده مش ممكن يكون هو المتهم الاول فى البرود الجنسي خصوصا لو ما كانش معاه خبرات سيئه بالم وخوف وما الى ذلك

لكن طبعا فى انواع ختان جائر زي الى موجوده فى وسط افريقيا مثلا الي اصلا بيشيلوا كل حاجه ( البظر بالكامل والاشفار الداخليه والكل كليله . فى الحاله دي طبعا نقدر نقول الختان متهم اول


قبل ما نقول ايه الى ممكن نعمله

فى نقطه احب اوضحها هو ان فى فرق بين

واحده بيحصلها متعه اثناء العلاقه الجنسيه مصحوبة بإحتقان للمنطقة التناسلية لكن لا تستطبع الوصول للرعشة الجنسية

ودي ما بيكونش عندها برود ولكن بيكون عندها فشل فى الوصول للذروه او الرعشه الجنسيه

اما لاسباب نفسيه عندها زي الى احنا قلناها فوق او ختان او غيره او لسبب متعلق بزوجها عضويا (زي سرعة القذف او ضعف الانتصاب )

والتانيه الى ما بيحصلهاش اى احساس بالرغبة او اللذة الجنسية هى دي بقى الى احنا بنتكلم عنها الى ما بتعرفش اصلا تبدأ العلاقه الجنسيه ولا بتتاثر بها ودي الى بنقول عليها عندها برود



ايه بقى الى ممكن نعمله

اولا: ارجوووووووكم يا ناس عملوا بناتكم صح ادرسوا تربيه جنسيه صح وبطلوا تبوظوا دماغ البنات ارجوكم
فى النهايه بيتجوزوا برضه من رجاله انتم الى ربتوهم على احترام الشهوه وحب الاعضاء الجنسيه والتفاخر بها . ازاي يعيشوا مع بعض كده ؟؟!!!

احنا حتى عندنا فى دينا احترام للشهوه والعلاقه الجنسيه والقرآن نفسه اتكلم عن العلاقه الجنسيه والسنه النبويه بتحض عليها فى الحلال طبعا

ثانيا : كل بنت او ست قرت كلامنا ده النهارده تحاول تعرف مشكلتها ايه فيهم وتحلها مع نفسها ومع جوزها ولو ما قدرتش ما تترددش ابدا تروح لدكتور وان شاء الله ربنا بايده الشفا

ثالثا : الازواج : خماشر خط هنا يا رجاله تحت كلمة الازواج
ارجوكم بلاش اول ما تتجوز تلاقي البنت مش متجاوبه معاك يقوم يخطر على بالك على طول البرود من الكلام الى سمعته من اصحابك الى مالهمش لازمه هنا خالص
وتلزقها الكلمه فى وشها وتقنعها انها انسان انوي احادي وغريبه وبارده وكده يعنى

اقرا كده كمية العقد الى فوق الى هى اتساقتها من المجتمع ده واشفق عليها وحاول انك تخليها تعدي المشاكل دي
ولو ما قدرتوش ارجوكم تروحوا لدكتور هو الى يقرر هى عندها ايه ويعالجها ما تصدرش عليها الاحكام من قبل ما تروح للدكتور

وارجوكم ده يكون من الاول كل ما الحكايه بتقدم بتكبر المشكله

التراكمااااااات

اها هى كارهه العلاقه وانت بتصر على العلاقه ومش مدياك الى انت عايزه ماهو مش على مزاجها بالتالي بالتالي بتبدأ سلسلة من التصرفات الغبيه المتلاحقه والمتلاطمه بين الزوجين ويقرفوا فى بعض على جميع الاصعده وتبوظ الليله كلها

ارجوكم الى عنده مشكله يحاول يحلها

الوضع الطبيعى هو ان العلاقه الجنسيه دي متعه مشتركه بين الزوجين الاثنين بيرغبوها ويستمتعوا بها من غير الم يذكر ولا استنكار منهم
فى حال اختلال الوضع ده لازم يجروا يحلوا المشكله لو ما قدروش لواحدهم يبقى الاطباء المتخصصين موجودين
ارجو ما اكونش طولت عليكم
ونداء عاجل لسنترال اكتوبر والنبى صلحوا النت لعمرو اصل انا لوحدي هنا محتاسه وباخر البوستات
والف شكر لدكتور عباس على مساعده فى البوست ده
و الى هو كمااااااان مش فاضي وهايسبنى احتاس لوحدي بوستين على الاقل

هناك 11 تعليقًا:

B L U E يقول...

خماشر خط بس !!!!!!!!!!!!!!!!!!

قولى عشرتاشر ميه وتناشر

قولي دشليون الف مليون خط

الحل كله كله كله ف ايد الرجل

الاب و الاخ و الزوج.

كل واحد من دول له يد فى استواء النفسية الانثوية أو إعوجاجها

بالاضافه لان احنا فى مجتمع ذكوري اصلا.

فالمسئولية حتبقى مضاعفة

طبعا مش القوة و السيطرة و التحكم مضاعف و واخد حقه تالت و متلت يبقى من حقة يشيل شوية من المسئولية

إحنا فى مجتمع زوقه منتكس فاسد و منحرف
و عاداته و تقاليده الكثير منها مخالف للشريعة السمحة للإسلام.

عندى كلام كتيييير بس خليه دلوقت

البوست جميل و مش طويل ابدا

ضحكيتى و صعبتى عليا فى اخر البوست
ربنا يكون فى عونك.

B L U E يقول...

بالمناسبة ... أنا رجل

وعندي إقتناع كاااااااامل تاااااام

بدور الرجل القيادى فى المجتمع

من نص الحديث النبوي الشريف
" كلكم راع و كلكم مسئول عن رعيته "

و الحديث الآخر
" كفى بالمرء إثما أن يضيع من يعول "

الحديثين دول لهم إرتباط كبير جدا جدا بكل المشاكل التي نواجهها الوقت الحالى علي كل المستويات.

يتبع

بعبعه يقول...

بلو

اختلف معاك فى النقطه دي


إحنا فى مجتمع زوقه منتكس فاسد و منحرف


اينعم انا باخد على المجتمع حاجات كتير غلط لكن المجتمع مش فاسد ولا من حرف حتى الان


ثانيا
باتفق معاك تماما فى ان الرجل له المسؤليه الاولى
بس مش المطلقه
لان باعتبر دايما الرجل هو القبطان

ثالثا

ضحكت على ايه

وصعبت عليك ليه مش فاهمه ؟؟


واهلا بك شرفت

B L U E يقول...

القصد .. فى كل كلامى مش للعموم و الشمول
نسبة و شريحة
بس نسبة مرتفعه و شريحة كبيرة
و الدليل على فساد الذوق للنسبة المرتفعه.

الصعود و الشعبية الجارفة للباطل بكل صوره و المغالاه فى التفاهات

ولكى ف احداث الأعياد من تحرشات خير مثال
تقدري تنكري إن احنا فى السنوات الخداعات التي نبئنا بها النبي صلى الله عليه و سلم ؟؟؟

النقظة التانيه
إستدركتها بالتعليق الثاني لي.
و برضه هو عليه العامل الاعظم بالتربيه و التوعية و التوجيه و الاحتواء .. مش مبرر ابدا ابدا ابدا عشان ااكل العيا اسيب البيت يضرب يقلب
و انى مشفش ابنى و بنتى على سبيل المثال لا الحصر
بيعملوا ايه؟
ماشيين ازاى؟
بيفكروا ف ايه ؟
بيلبسوا ايه ؟؟

النقظة الثالثة
بضحك على الاسلوب
ندائاتك للسنترال بلطف و ادب
و صعبتى عليا عشان بتقولي لوحدك هنا
يعنى من باب التعاطف معاكى و الشد من أزرك.
و لو محتاجه مساعده .. انا ممكن اساعد باى حاجه.

تحياتى

فشكووول يقول...

هو ايه الموضوع يا عمرو

هى المدونه دى بتاعتك ولا بتاعة بعبعه .. وبعدين فيه حد اسمه بعبعه والا انت مسمى المدونه كدا.. انا تهت خلاص

من الناحيه اللى بتتكلم عنها حدث ولا حرج .. احنا مجتمع خلى كل حاجه حرام وعيب لحد ما اتنيلنا على عنينا وبقينا لا نعرف حتى الحلال نعمل فيه ايه وبقينا نحرم الحلال وبقى عيب ..

بقينا لا نستمتع باى شيئ حتى المباح والحلال

تحياتى

بعبعه يقول...

بلو

اه والنبى انا غلبانه والله صحيح
ههههههههههه

اصل بجد مضغوطه وباحاول التزم بمواعيد النشر بس صعب اوي

متشكره اوي

بعبعه يقول...

فشكولنا العزيز

يا اخواتي كام مره اجاوبه بس لو ما كانش غالي عليا بس
هههههههههههههه

المدونه اسمعها بعبعه وانا اسمي بعبعه برضه
وانا المؤسسه

وعمرو بدر اتفضل وشرفني المشاركه فيها

عنيه لك يا باشا بس على الله ترجع تقرا الرد

Dr. Kafy يقول...

مفيد قوى البوست ده
و فعلا ما ذكرتيه صحيح.

المشكلة الحديثة هى أنهم بعد ما كرهوا الجيل القديم فى الجنس ، فاليوم يشوهوا مفهوم المتعة عند البنات و يقومون بتوجيههم لمتعة وهمية مما سيزيد الطينة بلة و العقد النفسية تكتر و المجتمع يخرب.

بعبعه يقول...

د. كافي

والله احنا فعلا عندنا مشكله كبيره فى الجانب ده وما حدش عارف يحلها بسبب ان المجتمع نفسه رافض الحل

شكرا لك ونورت

غير معرف يقول...

Your blog keeps getting better and better! Your older articles are not as good as newer ones you have a lot more creativity and originality now keep it up!

بعبعه يقول...

الغير معرف الاخير

شكرااااا لك