الأربعاء، 20 يناير 2010

تقبل النفس والاعضاء الجنسية


طبعا قبل ما ابدأ كلام باعتذر عن التاخير فى البوستات
والله غصب عني
على ما فضيت وكتبت الموضوع

وبعته للدكتور عباس يراجعه كان مشغول مش عايزه اقولكم على السرعه بقى اسبوعين على ما رجعلي الموضوع
الف شكر يا دوك احنا نقدر نقول حاجه يا باشا
(هانضرب كده صح؟ )
نيجى لموضوعنا النهارده الى هو
تقبل النفس والاعضاء الجنسية


يعنى ايه؟؟ ايه العنوان الغريب ده يا بعبعه عماله تخترعى لنا مش كفايه البوست الى فات ما فهمناش فيه ولا كلمه

طيب ماهو انا باحاول اخليكم تفهموا

بس تقريبا سعد زغلول عنده حق

مافيش فايده

المهم

دلوقتي انا من خلال كلامي مع الناس وخصوصا الستات لاحظت ان نظرة الست لنفسها ولاعضائها الجنسيه مختلفه عن الرجل ونظرته لنفسه واعضاؤه الجنسيه

ازاي

احنا بنربي الاثنين عكس بعض خالص فى حاجات كتير والاخر بنطلب منهم يعيشوا مع بعض طب ازاااااااي ؟؟

بداية من دور الام الى هو اهم دور فى تشكيل الطفل .

الام ما بتبصش للولد واعضاؤه الجنسيه بقرف وخزي وعار وعيب لا بالعكس ده بتبقى فخوره به اوي ولو حصله انتصاب تفرق شربات على المنطقه
الولد حتى لو صغير ممكن يلاحظ ده فى نظره عنيها
بالتالي هو من الوهله الاولى شايف اعضاؤه الجنسيه حاجه مفخره يعنى مش بس متقبلها وبعد كده بقى يبدا المجتمع ككل يرسخ الفكره عنده ويربط الفحوله والرجوله بالعمليه الجنسيه ويربط العمليه الجنسيه بالاعضاء الجنسيه

وهنا تيجى بقى المشكله

لانه بيحمل العضو الجنسي اكتر مما يحتمل والاهتمام به بيكون زياده من الولد وممكن تتربى عنده مشاكل تانيه بقى متعلقه بحجم القضيب وقوة الانتصاب مثلا وممكن يكون هو طبيعى جدا بس متوهم مثلا ان حجم القضيب عنده صغير فيبدأ يحس بالخزي والعار بقى من نفسه

عشان كده لازم نكون عارفين ايه هي المعدلات الطبيعيه عموما عشان ما تعملش عقده عند الرجال وما يبقاش المقياس ابدا الافلام الاباحيه الى شافها وهو مراهق


بالنسبه للبنات بقى موالهم ملخبط اوي

البنت من اول يوم فى حياتها بتتعامل مع نفسها ومع اعضائها الجنسيه بخوف ورعب مصدره الاهل طبعا

الام بتورثها القلق من الاعضاء الجنسيه ممكن اوي يبان على الام علامات القرف وهى بتكلمها عن الفرج مثلا لاي سبب

او تلاقي الام امتعضت وقلبت وشها وخلاص هاترجع فى وشنا عشان لقت البنت حطت ايدها على اعضائها مثلا .
وفى امهات بتاخد القرف ده وسيله لانها تبعد تفكير البنت عن العبث بالمنطقه عشان تحافظ على الغشاء وعشان فى هاجس مش عارفه ايه مصدره ان البنت لو اتنبهت لاعضائها الجنسيه هاتبدأ تحس واحتمال تنحرف وتجيب العار بقى لاهلها وهنادي خدها الوبا وكده يعنى

فالحل بقى اننا نقرفها من نفسها او نخوفها خوف فظيع زي مثلا عارفه لو اتخبطي بس البوسي هاتتعوري وتخري دم وتموتي ... ودي قسما بالله انا شوفت البنت كانت روحها بتطلع من الرعب عشان كانت مامتها قايلالها كده وبعدين وهى بتعلب اتخبط فعلا . الخبطه بسيطه جدا وما وجعتهاش اوي لكن الخوف بقى

الرعب الى ربته امها جواها من الموت لو اتخبطت بس رعب فظيع كان على وش البنت وسألت امها فى ايه هى مالها فقالتلى اصل انا قلت لها كذا وكذا

بتهيئلي ده وضع كفيل جدا ان البنات تكون مشاعرها تجاه اعضائها الجنسيه سيئه جدا ما بين خوف وقرف واحتقار كمان

بالتبعيه بقى بما ان العضو الجنسي ده مرعب كده ومقرف وحقير يبقى العلاقه الجنسيه كذلك زيه تمام وممكن كمان نعتبر ان الرجل نفسه اعضاؤه مقرفه وحقيره ماهو بيروح هناك بقى ناحية القرف وبالتالي ممكن تقرف من الزوج نفسه ومن العلاقه ومن نفسها والكل كليله


وبرضه طبعا الى بيقرفوا من الاعضاء الجنسيه مبررهم الظاهر ان الاعضاء الجنسيه مرتبطه بالبول فى الطرفين وبالنسبه كمان للستات فى بقى افرازات وحاجات يع وكده

حتى الستات الى بيتكلموا بالقرف برضه عن العضو الذكري قالوا الله مش فيه بيبيه وحاجات بتنزل اثناء العلاقه (مذي ومني ) دول كمان اعتبروهم قرف برضه

معلش يا رجاله على جنب عشان عايزه اقول كلمتين للستات

دلوقتي بالنسبه للبول حضرتك هو مش في عندكم مايه ولا ايه ؟؟
هو لو ايدك جه عليها بول ولو مش منك ولا من ابنك حتى هاتعملي ايه فى ايدك ؟؟
هاتقطعيها ؟؟ لا اكيد هاتنضفيها
طيب يبقى فين المشكله بقى ما الاعضاء الجنسيه ممكن تبقى نضيفه عادي سواء للرجل او للست

الافرازات المهبليه : ماشي مالها ؟ مين خلاها مقرفه وهاترجعي فى وش وانتى بتتكلمي عنها ؟؟ عادي اعتبريها زي اللعاب فى الفم كده حاجه طبيعيه جدا يعنى

لو الست ما عندهاش مشاكل صحيه ولا عدوى ولا حاجه يبقى المكان عادي والله
نعرف منين انها ما عندهاش

ان الافرازات تفضل شفافه وما لهاش ريحه وحشه

لو ا لافرازات المهبليه لها لون او ريحه وحشه يبقى كده فى مشكله نعالجها بقى


بالنسبه للمذي والمني برضه

مش قادره افهم والله ليه قرفانه منه القرف ده كله ؟؟

عشان خارج من الاعضاء الجنسيه ؟

هما فى حد ذاتهم لا مقرفين ولا فيهم سم قاتل ولا حاجه تستاهل الترجيع الى طالع على وشكم ده


ها ااااااااااااااا

عايزه اسمعكم بجد

فكوا الجبس من فضلكم وسمعوني رايكم

واقنعوني حتى ليه قرفانين لو قرفانين

بس اتكلموا

هناك 29 تعليقًا:

غير معرف يقول...

صباح الخير ... انا الراجل ( المتغاظ ) واللى كان لى شرف الحديث مع حضرتك على الميل لطرح مشكلتى دون حرج ياريت ماتكونى نسيتينى.... المهم أنا فعلا أحيى حضرتك على الموضوع اللى كتبتيه ده لكن عاوز أقولك حاجه ودى وجهة نظر شخصيه وعايشتها خلال حياتى كل كلمه اتكلمتيها فعلا موجوده فى حايتنا وخصوصا عند الستات مش تحيز والله لكن تلاقى الست ممكن جدااا تقرف من اى نوع من الافرازات الخاصه بالرحل بعكس الرجل تماما تقريبا ... اما خوفها على البنت وفرحتها بالولد ده ممكن يكون موجود عند الطرفين فعلا .. ياريت الثقافه دى يدرسها اولادنا ولو بجرعات بسيطه جداااا فى المدرسه وممكن يخلوا البنات وحدهم والاولاد وحده لو المدرسه مشتركه وياريت تكون فى المرحله الثانويه ...... تحياتى .
( المتغاظ )

كلام عيب يقول...

كنت لسه بتكلم انا و شريكتى فى المدونه فى الموضوع ده من كام يوم و كنا ناويين نتكلم فى حاجه شبه كده بس انتوا سبقتونا
المهم الافاده مش مشكله مين يسبق مين
انا اتفق معاكى فى اننا ليه منعملش كل حاجه مدام حتسبب متعه و لذه للانسان
حكايه القرف ة الاشمئذاذ دى سمعتها من صديقات كتير سواء هيا اللى بتقرف من موضوع تقبيل الاعضاء الجنسيه لجوزها او هو اللى بيقرف
انا رأيى ان فيه اختراع اسمه منظفات و مطهرات مخصوصه للمناطق الحميميه
بتطهرها و تنظفها و تخلى الرائحه معطره و جميله و بتحتوى على نسبه من lubricantsاللى هيا المواد الملطفه اللى بتخلى الوسط لذج و سائل مش زى المنظفات العاديه
و بكده يبقى مفيش حجه فعلا

الموضوع ده لذيذ فعلا و بيبسط الطرفين
و بيحسسهم بقرب و حميميه اكتر
يبقى ليه لأ

كلام عيب يقول...

بالنسبه للاهل و تربيتهم لاولادهم ففعلا كلامكم صح الاهل بيبقوا فخورين بالولد اكتر من البنت فى كل
حاجه يعملها حتى لو طلع صايع و بايظ بيبقوا فرحانين بيه اكتر
ههههههههههههههههه
لكن البنت من و هى طفله ممنوع اللعب مع الاطفال الاولاد و كل شويه تحذيرات اوعى حد يقولك تعالى و تروحى معاه
اوعى حد يقولك ورينى هدومك اتفرج عليها و توريهاله
و كلام عبيط من ده كتير و يعينى الطفله تبقى مرعوبه لو حد قربلها حتى لو كان اقتراب برىء
و اما تكبر شويه قائمه الممنوعات بتذيد و تكبر و العقد عند البنت تكبر اكتر

يبقى عايزين ايه منها غير انها تكره جسمها و تحتقره

معظم البنات فى سن البلوغ بتمشى تانيه ظهرها عشان مكسوفه تفرده و بالتالى صدرها حيبان و مع ذلك متلاقيش ام تقول لبنتها افردى ظهرك و انتى ماشيه
لانها مبسوطه بيها كده و هى مكسوفه و مكسوره
قمه العقد و التخلف فعلا

بعبعه يقول...

المتغاظ

الشرف لنا والله العفو

طبعا فاكراك كويس وشكرا لك

والتدريس فى المدارس ده موضوع كبير اوي محتاج مدارس اصلا

احنا حاليا ما عندناش لا مدارس ولا نظام تعليم

يبقى مافيش قدامنا غير اننا نعلم ونربي احنا عيالنا

نورت يا متغاظ

بعبعه يقول...

كلام عيب

بصي انا باتكلم تحديد على تقبل ا لنفس

مش تقبل الطرف ا لاخر

انتى شكلك تقصدي ا لاورال سكس ودى هايبقى لها بوست مستقل


وبالنسبه للكلام عن تربية ا لاطفال

فى بوست خاص فى التربيه الجنسيه لتربية الاطفال

ياريت تشوفيه

ومش غلط اننا نحذر البنت لكن ما نرعبهاش
واصلا المفروض كمان نحذر الولد


وياريت تتكلمي برضه فى مدونتك عادي
المهم الفايده
انتى قرائك اكيد غير قرائي

نورتي

V يقول...

انا فى الاول افتكرت الحوار عالاورال سكس
ههههههه
حصل خير بقى

عموما
كلامك صحيح فعلا
كتير بيقرفو مع انها حاجة يعنى نازلة منهم
هو فيه ايه
ده حتى كله بيروح فى الغسيل :)


تحياتى ليكو نفرر نفرررر

اميره يقول...

بعبعه
انا معاكى ان فى تفرقه للولد عن البنت
فى كل حاجه فى البلد دى
بس انا عايزه اسألك ازاى نقول للبنت
انها تحافظ على المكان ده من غير ما تخاف

على فكره انا محدش قاللى على حاجه زى دى من الكبار قبل كده ولا حتى ماما
يعنى انا عرفت من اصحابى وكنت بحكى معاهم كتييير
كمان كنت عايزه اسأل
انا عندى المنطقه دى بيكون فيها ريحه وحشه ومش عارفه اعملها ايه
خايفه تعمل مشكله فى الجواز بعدين
خصوصا ان الفرح قرب
وبشكرك على معلوماتك القيمه دى

Cute Kitty **sookra يقول...

اول زياره هنا
مبسوطه انى عرفت مدونتك
حاجات كتير عاوزه اعرفها بشكل صحيح وموش غلط
واعتقد انى هلاقى اللى بدور عليه
هاجى تانى لانى بحاول اقرا الموضوعات السابقه

بعبعه يقول...

V
لا مش اورال مش المره دي لكن ناويه ان شاء ا لله

بعبعه يقول...

اميره


بالنسبه لازاي نقول للبنت

هاتلاقي كل حاجه فى البوست ده

http://b3b3a.blogspot.com/2009/05/9.html

وبالنسبه للتربيه الجنسيه عموما لحد عمر البلوغ هاتلاقي هنا مجموعة بوستات حلوه
http://b3b3a.blogspot.com/search/label/%D8%A7%D9%84%D8%AA%D8%B1%D8%A8%D9%8A%D9%87%20%D8%A7%D9%84%D8%AC%D9%86%D8%B3%D9%8A%D9%87


اما بالنسبه لسؤالك
انا مش عارفه موضوع الريحه ده مقلقه منه

يعنى ممكن يكون عندك التهابات او اي حاجه تانيه عشان فى حاجات بتكون فعلا بتسبب روائح وحشه جدا

انتى راجعي دكتور احسن
وهانشوف الدكتور عباس برضه لو راي تاني هايقولهولك


وده طبعا غير المواظبه على النضافه

واي سؤال انا تحت امرك

والاميل عندك على اليمين فى صفحة المدونه

بعبعه يقول...

سكره

اي خدمه ياجميل

مستنياكي بعد ما تقري واي حاجه عايزه تسألي فيها الاميل بتاع المدونه على اليمين اهو

صدعينى كيفما تشائي

د.عباس الاول يقول...
أزال المؤلف هذا التعليق.
د.عباس الاول يقول...

الاخت العزيزة أميرة

هو الحقيقة ان المنطقة التناسلية الأنثوية احتمالات انه يحصلها التهابات اعلى من القضيب لأن القضيب مغطى بالجلد وخارجى والمهبل عضو داخلى رطب

الرائحة ممكن من الاتهاب فى الجلد بين الفخدين او من الفرج

التهاب بين الفخدين يبقى لازم يبان حاجة فى الجلد احمرار هرش

لو إسمرار بس بيبقى نتيجة الاحتكاك

الفرج الانثوى طبيعى فيه افرازات شفافة وبدون رائحة

التهابات الفرج التقسيمةالشهيرة

لو افراز ابيض وفيه زى شرش الجبنة ده كانديا (فطريات )

اصفر والرائحة مش حلوة يبقى تريكومونس

رمادى على اصفر مع رائحة سيئة مع رغاوى يبقى التهاب بكتيرى لا هوائى

كل واحد من دول ليه علاج

متهيالى غلط نكتب اسم العلاج بشكل علنى

بس محتاجين نكشف عند طبيبة متخصصة العلاج بيحتاج فى حدود اسبوعين

اهم حاجة بعد كده المتابعه لأن هناك فرصة لأنتكاسة بعد العلاج

العناية بالفرج تعتمد على التشطيفات المناسبة و التجفيف

ارتداء الملابس الداخلية القطنية مهم جدا

وفى حالة زيادة الافراز الانثوى الطبيعى هناك فوظ صحية مخصصة لما بين الدورة

للمحافظة على جفاف المنطقة التناسلية لأن الرطوبة الذائدة تشجع حدوث الالتهابات فى حالة وجود المسبب

ملحوظة جيمع هذه الالتهابات لا تحتاج إلى اتصال جنسى كى تحدث

ليست امراض تناسلية

تخياتى

أميره يقول...

اشكرك يا بعبعه على اهتمامك بأسئلتى
وردك عليها
بجد انتى الشخص الوحيد اللى بيعرف برد عليا ويفيدنى
وبشكر الدكتور عباس على معلوماته القيمه ورده على السؤال
اما من ناحية الرائحه الكريهه
فأناساعات بيكون عندى هرش فى الجلد بس مش كتير
وبيكون فى افرازات جافه لونها على اصفر شويه ومعاها الرائحه برضه
كمان بطلب منك يا بعبعه معلش لو بتتقل عليكى يعنى
كيفية الاهتمام بالمنطقه دى لعدم ظهور رائحه وعند الزفاف وبعده ولو قدرتى
تقوليلى على اسم منتج يزيل الريحه
حاجه شبه مزيل العرق يعنى ممكن تقوليلى عليها
عايزه اقولك كمان ان بنت تروح لدكتور علشان تعرف سبب شكوتها بيبقى امر محرج جدا بالنسبه لها خاصة ان احنا فى الصعيد ولانها بتتكسف جدا
وشكرا ليكى وللدكتور عباس لانكم بصراحه بتستحملونى

MaNoOoSh يقول...

امممممممممممممممممم

حقيقي جدا الكلام
معظم البنات اللي اتكلمت معاهم في الحوارات دي قبل كده بيبقى عندهم حالة قرف واشمئزاز من أعضائهم

والحكاية دي مبتروحش غير لما البنت تبتدي تحس بثقة في نفسها وتحس انها مرغوبة من حد بتحبه
وكمان من الاهل لما بيدو لبنتهم ثقة في نفسها وفي انها انسانة كويسة وجميلة مش مجرد جسم عايش في الدنيا

بس هنقول ايه بقى في جهل الأهالي وخوفهم الكبير

بعبعه يقول...

اميره

ليه يا بنتى هو ايه المشكله لما واحده تروح لدكتور

يا ستى خليها دكتوره عادي كل الناس بتتعب يعنى !!!!

ولا يعنى دكتورة امراض النساء دي بتاعة الولاده بس ؟؟؟!!!!


وعموما بالنسبه للنصائح مش هاينفع هنا

تعاليلى على الاميل بقى

ضروري هاستنى منك اميل عشان عايزه اقولك على حاجه مهمه

بعبعه يقول...

مانوش

هلت الانوار يا جميل


بس هنقول ايه بقى في جهل الأهالي وخوفهم الكبير


نقول ارحمنا يارب

وادينى باقول على الله نفهم

اميره يقول...

بعبعه

انا على الايميل
منتظره

قرفانة :) يقول...

أيوة
نعم في حد بينادي
هو أنا الشخصية الأمورة اللي انتي بتتكلمي عنها دي يا بعبعة
يعني عمري ما لمست أعضائي دي حتى للتشطيف لأني بقرف منها جدا
ليه ؟
عشان ماما طول عمري وهي بتقرف جدا من أي حاجة تخص المنطقة دي
ولو حد فينا دخل الحمام تبص له بقرف كده من فوق لتحت وممكن تسأله 77 مرة غسلت ايدك ولا لأ بدون حتى ما تسأل إذا كنا بنستخدم ايدينا في التشطيف ولا لأ
والأدهى من كده بقى إن لو حد خارج من الحمام ايده مبلولة تقرف منه جدا وماتاخدش من ايده حاجة مع إن دا معناه إنه غاسل ايده
لما كانت بتعلم أختي الصغيرة تدخل الحمام كانت بتلسعها بالشمعة وهي عندها سنة ونص تقريباعشان تتعلم
دا أنا من نفسي وبقرف كده من المكان ده جدا فما بالك لو راجل بقى دا انا بقرف بالتخيل بس

زاد الموضوع بقى جدا امتى
أقولك أنا
من حوالي سنتين كده جالي هرش مستمر
كنت بهرش لغاية ما أجيب دم
في الأول كنت مش قادرة أتخيل إن دكتورة تشوفني وكل ما أحجز اتكسف ومقدرش أروح
لما زاد الموضوع أوي رحت لدكتورة وادتني علاج وارتحت أسبوعين وبعدين رجع الموضوع أشد من الأول ورحت لدكتورة تانية وتالتة وهكذا لغاية ما رحت لأكتر من 7
وكل حد يديني علاج شكل منهم واحدة ادتني علاج في حقن عضل بهدلني ومنهم واحدة ادتني كريم زود الالتهاب أكتر
فطبعا دلوقتي المكان ده مش بيمثل عندي غير الألم والألم الشديد كمان
وصلت لمرحلة إني بهرش وأنا بعيط وأقوله يارب ارحمني بقى مش قادرة أستحمل
جربت الحلول الطبيعية والأدوية وكل التعليمات للعناية الصحية ومفيش فايدة
أنا عارفة إن دي مش حالة عامة
بس أنا النموذج المبالغ فيه لكل حاجة يعني عندي افرازات عمرها ما كانت شفافة ولا كان ليها ارتباط بقرب الحيض كل ده لازم يخليني أقرف وأقرف جدا من من نفسي لأني مش عارفة أوقف الافرازات دي ولا أتحملها

آسفة لو خرجت عن الموضوع بس يمكن هي فرصة أبعبع بقى

د.عباس الاول يقول...

الاخت العزيزة صاحبة المشكلة الأخيرة

واضح انك كنتى ضحية لتربية متشددة جنسيا وخلط مابين الحلال والحرام وما خلقنا الله عليه بما يشمل الاعضاء التناسلية التى فيها من معجزات الخلق الكثير

ومنها ان هناك نظام ذاتى لتنظيف المهبل يعتمد على الافرازات الانثوية الطبيعية

التى تحتوى على كائنات دقيقة تقوم بالتخلص من البكتيريا المرضية

المشلكة اننا عندما لا نتعامل بشكل صحى مع اعضائنا التناسلية نساهم فى تلف هذا النظام الطبيعى

سواء بالنضافة الزائدة عن الحد واستخدام مطهرات قوية تتلف الافرازات الطبيعية

او باهمال النضافة تماما كما حدث فى حالتك

كما رددت على الاخت اميرة

هناك 3 احتمالات اكثر شيوعا للافرازات المرضية

والعلاج لس صعب لكن يحتاج إلى التزام ومتابعه

فى بعض الاحيان يتواجد اكثر من مسبب مرضى فى نفس الوقت

كفطر الكانديا مع التريكومونس

بعض الاحيان تتردد الطبيبات فى الكشف على الفتيات العذراوات وقد تكتب علاج بدون مناظرة و تشخيص جيد للحالة

ادعوا الله ان يوفقك لطبيبة تتحرى التشخيص السليم وان تساعديها انتى بحكاية القصة منذ البداية مع عرض الروشتات السابقة المختلفة لمساعدتها فى الوصول للتشخيص السليم

هناك دائما حل نهائى ودقيق هو عمل مسحة من الافراز المهبلى وتحليلها فى معمل متخصص

فلا داعى لتيأسى من الشفاء

إذا كانت هناك تفاصيل اكثر تريدى توضيحها يمكنك ان تكتبى للاخت الفاضلة بعبعه على ميل المدونة

مع خالص التمنيات يالشفاء

تحياتى

القدر و انا يقول...

بعبعة
اول زيارة
مدونة دسمة ومفيدة
اهنئك عليها
تقبلى مرورى

غير معرف يقول...

أختى العزيزة..عندى مشكلة تافهة وسخيفة بس مضايقانى جدا..ياريت تقدروا تساعدونى..أنا متجوزة من أكتر من 15 سنة و سعيدة مع جوزى و الحمد لله ..بس مش متقبلة أعضائى..لسبب غريب شوية...أنا مش مختتنة بس عندى الشفرين مش نفس الحجم..ناحية أكبر من ناحية...ما كنتش واخدة بالى من الموضوع لحد ما جوزى مرة زمان سألنى ليه الشفرين مش قد بعض...إستغربت و أخدت الموضوع بهزار وقلت له ممكن أعمل ختان فى ناحية واحدة ..بس هو قاللى إنه مش فارق معاه..و من ساعتها و أنا بتضايق لما جوزى بيعمللى أورال و بأبقى مش مستريحة...حد عنده حل؟

جزاكم الله خير عن الجميع

ذو الوجه المبتسم يقول...

السلام عليكم

طبعا الموضوع مهم وضرورى
واسلوبك فى طرح الموضوع كالعادة شيق وممتع ومفيد
انتى شرحتى الموضوع بالتفصيل
وكمان التعليقات والاسئلة واجوبة الدكتور عباش مفيدة جدا

تحياتى

بعبعه يقول...

القدر وانا

يا مرحبا

اهلا يا جميله وشرفتينا والله

بعبعه يقول...

الغير معرفه الاخيره

هى مشكلتك مش هايفه ولا حاجه

بس انتى كده مش قرفانه انتى كده بتحسي بحرج بس انك عندك حاجه غير طبيعيه مع ان انا شايفه انه مش مضايق جوزك خالص فعلا ومش فارق معاه بجد بدليل انه بيعمل الاورال

وما تقلقيش ابدا

تاني حاجه هو يا انا فهمت كلامك غلط يا انتى فاهمه الختان غلط

وعموما انتظرينى بس اخد راي الدكتور عباس فى رايك وارد عليكى

او الدكتور عباس بنفسه يرد عليكى

اهلا بكى ونورتي

بعبعه يقول...

ذو الوجه المبتسم

اهلا وسهلا فينك من زمان واخدينك غياب

ومتشكره اوي على الكلام الجميل عننا

BLUE يقول...

ايه يا بعبوعه...
انتى فين ؟

يارب يكون المانع خير ؟

بعبعه يقول...

فيك الخير يا بلو والله

الا يا غجر ما حدش فيكم سأل عليا

ماشي ماشي خليكم فاكرين
هههههههههههههههه

انا اهو يا بلو بس كنت مشغوله شويه

خلاص كتبت موضوع جديد


وان شاء الله بس بعته لدكتور عباس يراجعه وبمجرد ما يجى انشره ان شاء الله


اصلح حالك يا بلو يا رافع معنوياتي

غير معرف يقول...

كلامك سليم فعلا

كنتي فين من زمان يابنتي :]

مش هتكلم كتير بس تصوري اني كنت لما اسمع كلمة عن الاعضاء او اسم العضو مجرد اني اسمع اسمه باي مكان استغفر ربنا علطول

وكانه حاجة حرام

اذا العضو بالنسبالنا حرام يبقى الباقي ايه كله حرام في حرام

حرام تعلمي حرام البوس الي في الافلام حرام معرفش ايه

وفجاة البت تلاقي حالها مع راجل غريب ليلة الدخلة و امها تقولها سيبه على راحته عالاخر :]

ياسلام تربية سليمة مفيش احسن من كدا

والله حاجة تفرس الجهل وحش اوي ياختي

ربنا يفرجها علينا

دمتي بود