الثلاثاء، 2 يونيو 2009

جلسة ما قبل البلوغ للبنات(تحديث)



كل واحد يجيب كراسته وقلمه وورايا


احنا وقفنا المره الى فاتت لحد عمر التسع سنين ويارب تكونوا فهمتوا
ياااااارب


المهم النهارده بقى هانتكلم عن موضوع مهم جدا جدا جدا


وهو جلسة ما قبل البلوغ


اسمها ايه ؟؟ ما قبل البلوغ


يعنى حضراتكم ما ينفعش تستنوا لما يحصل البلوغ اصلا عشان تكلموا ولادكم عنه
لا ده بيعمل صدمه نفسيه خصوصا عن البنات


فارجوكم لازم الجلسه دي تكون قبل البلوغ



طبعا البلوغ ده ممكن يحصل عن الولاد من سن 12 سنين لحد 14 سنه
وعند البنات من سن 11 سنه لحد 16 سنه

ودى حاجه تقريبيه جدا وفرديه وبتتاثر بحاجات كتير زي البنيه الجسديه للشخص مثلا

او الطبيعه المناخيه للمكان الى عايش فيه الطفل
فمثلا فى المناطق الحاره ممكن يبدأ البلوغ مبكر عن كده اعتقد فى حالات بلوغ سجلت عند 7 سنين للبنات وتسع سنين للولاد
فعلى كل واحد بقى انه يراعي الظروف المحيطه به وبابنه او بنته محل النقاش .



طبعا انا النهارده عشان ما اطولش عليكم هانعم الجلسه الخاص بالبنات


جايبالكم معايا رسمه مبسطه جدا للجهاز التناسلي الانثوي من فضلكم تطبعوها او تحفظوها عندكم عشان تشرحوا عليها للبنت


وهى مبسطه جدا للاجزاء الداخليه ومش هانحتاج اكتر منها عشان نفهم البنت الموضوع ايه وازاي وفين وامته


طبعا مش محتاجه اقولكم انكم زي الشطار كده تكونوا قاريين عن الموضوع ياريت علميا كويس قبل ماتتكلموا فيه عشان تقدروا تجاوبوا على اي سؤال يدور فى خاطر البنت


ويفضل طبعا ان الى تقوم بالجلسه دي هى الام لكن لو الام مش موجوده ومافيش غير الاب نو برووبليم

هاعمل محاكاه بقى عشان فى ناس فكيكه شويه وتقولي يعنى نقول ايه يعنى



من اول السطر وعداكي العيب يا بت يا بعبعه



تعالى يا سوسو انا عاوزاكي فى موضوع مهم هانتكلم شويه


وفى اوضه لواحدكم تقعدوا كده فى هدوء مش فى الفسحه قدام الشعب المصري كله لا طبعا


وتخلي الموضوع ودي كده وظريف ونضحك ونهزر عشان البنت ما تتكسفش


بصي يا سوسو انتى ما شاء الله كبرتي وفى حاجه مهمه عايزه اشرحهالك
بصي يا جميل البنت لما بتكبر وتبقى حلوه كده زي القمر ويبقى عمرها مثلا 11 سنه وجايز اكتر وجاي اقل بيحصلها حاجه اسمها الدوره الشهريه


شور هى هاتسأل يعنى ايه ماما


بصي يا جميل شايفه الصوره دي . دي صوره للجهاز التناسلي وده موجود فى بطن كل بنت وكل ست وهو ده الى بيعيش
جواه البيبى الصغير فى بطن مامته
وده بيبقى موجود هنا كده وتشاوري على بطن البنت نفسها من تحت الى هو مكان وجود الجهاز فعلا
فاكره البيضه الصغيره الى اد بيضة السمكه اهى بتكون هنا
شوفي يا ستى ده الرحم والرحم وده الى الجزء الى بيعيش جواه البيبى طب منين بتيجى البيضه الصغيره ؟؟
شايفه ده ؟ ده حاجه اسمها المبيض بيبقى فيه بيض صغير اوي اوي وكتييييييير فى اول كل شهر كل ما بيضه فيهم تكبر وتكون جاهزه
تطلع من الكيس الى متشاله فيه وبعدين تنزل من المبيض هنا كده والحته دي الى زي الزماره دي اسمها قناة فالوب
البيضه الصغيره بتنزل فى القناه دي والقناه دي بتنقلها لحد ما توصلها للرحم عشان تعيش فيه
فاكره الحاجه الصغيره الى قلتلك لازم تيجى من عند الرجل عشان تدخل جوه البويضه ويبدأ يتكون البيبى
اهى الحاجه دي اسمها الحيوان المنوي وبتكون صغييييييييره جدا مش بنشوفها الا بالمكرسكوب
لو الحيوان المنوي ده جه ودخل جوه البويضه بيتكون البيبى

(اذا سألت البنت واكيد هاتسال هو ازاي الحيوان المنوي بيجى عن البيضه ؟)


ان شاء الله مره تانيه هابقى اقولك ازاي عشان ده موضوع طويل .


عادي جدا ما دام فى صدق فى الكلام هى هاترضى بتاجيل بعض المعلومات نو بروبليم


اما لو ما جاش البويضه دي بتنفجر ومش بيحصل الحمل ولا بيكون فى بيبى


بس البويضه دي بتقعد فى قناة فالوب وفى الرحم شويه ايام كده خلال الايام دي الرحم بيكون بيستعد
عارفه ازاي ؟
فى الرحم فى حاجه اسمها شعيرات دمويه الرحم بيحوش الدم فى الشعيرات دي عشان لو بقى في بيبى البيبى يتغذى ويكبر من دم ماماته
مش بياكل الدم لا يا عبيطه
بيبقى فيه حبل بينه وبين مامته هى بتديله الاكل من خلال الدم
مش احنا قبل كده قلنا ان الجسم بيهضم الاكل وياخد الحاجات المفيده الى فيه يديها للدم والدم ينقله للجسم ؟


(على اعتبار انك تكوني شرحتي لها قبل كده عملية الهضم بتتم ازاي )


اهو كمان مامته بتديله دم فيه كل الحاجات المفيده عشان يكبر جوه بطنها .


فلما البويضه بتنفجر كمان الشعيرات الدمويه الى جوه الرحم الى محوشه دم دي هى كمان بعضها بينفجر والدم ده هايروح فين بقى ؟؟؟؟
بينزل من الرحم ده (واحنا بنشاور على الصوره ) للقناه دي عارفه القناه دي بتنتهي فين ؟؟
اخرها جنب الفتحه الى بينزل منها البيبيه

(وطبعا نلفت نظرها لانها ما تحاولش تستكشفها بايدها لان ده يعملها جرح ومشكله ) بس بدون رعععععب ما تعربيش البنت اتكلمي ببساطه من فضلك .


فاكره مش انا قلتلك ان البيبى بينزل من الفتحه دي


الصغيره دي يا ماما ؟؟!!!


ايوه يا حبيبتى سبحان الله ساعة الولاده بتكبر شويه عشان البيبى يعرف ينزل منها
الدم بقى الى احنا اتكلمنا عنه بينزل من الفتحه دي للبنت
والموضوع ده بيتكرر كل شهر
فالبنت كل شهر بيجيلها الدوره الشهريه الى هى شوية دم صغيرين كده البنت بتقعد 3 ايام مثلا ينزل كل يوم شوية دم صغيرين كده


وبتوجع يا ماما ؟؟؟


يعنى ساعات تعمل مغص كده حبه صغيرين


وطبعا تردي على استفسارتها كلها ببساطه وصدددددددددددق


زي مثلا طب هى هاتعمل ايه مع الدم ده وهاتمشي ازاي ما هى هيبوظ الدنيا كده
وزي طب هما الرجاله مش بيحصلهم كده ؟


واي سؤال يخطر على بالها حاولي تلاقيه له اجابه مبسطه


انا مش فاكره حاجه تانيه
ياريت الى عنده حاجه يقولها


وان شاء الله المره الجايه البوست هايكون خاص بجلسه ما قبل البلوغ للولاد


وجاااااايز استعين بصديق يكتبها
اعتقد هايكون اقدر مني
ولو ما رضيش ليا ربنا بقى


يا مفترييييييييين
طب ادعولي طيب ولا ايه حاجه
الى يجى منكم فايده

هناك 25 تعليقًا:

سبهللة يقول...

ماشاء الله عليكى
تسلم ايدك
انا قريت بتمعن
عشان بنتى كلها ست سنين واعقد معاها القعدة دى
بس الحيقينى بموضوع البلوغ عند الولد
لان ابنى عنده سبع سنين
وعايزة الحق افهمه
جزاكى الله خيرا وجعله فى ميزان حسناتك
====
انا فاكرة وانا ضغيرة وقبل البلوغ ماكنتش فاهمة ايه الفوط الصحية دى
لو عندك طريقة اشرح بيها الموضوع دة لابنى يبقى جزاكى الله خيرا
لان طبعا اعلانات اولويز مغرقة الدنيا والواد عايز يفهم

MaNoOoSh يقول...

طريقة الشرح فعلا سهلة ومفيهاش أى عقد ولا كلاكيع.. وبردو لو ينفع ان الام تحكي لبتها عن عمليه بلوغ الولد علشان البنت فى الوقت دة بيجيلها عقدة اضطهاد واشمعنى البنات بتتعذب والولاد مش بيتعذبوا زيينا وكمان بيبقى عندها فضول تعرف طب الولاد بيبلغوا ازاي.


وكمان الولاد كتير جدا بيبقى عندهم فهم خاطىء جدا عن الدورة الشهرية.. تخيلى سمعت من ولد فى العشرينات ان شيخ قالله ان الدورة دة الدم الفاسد اللى بيتجمع من الجسم ولذلك الستات عمرها أطول ودمها أصفى وبشرتها أنعم وأكثر هدوءا من الولد.. قلت فى نفسي يا نهار اسود
دة الشيخ اللى مش بيفهم دة قاعد يفتي ومش فاهم حاجة.. واستجمعت شجاعتي بقى وقلتله ان كل المعلومات دي غلط وان الدم دة بييجي من الرحم فقط وبيخلى البنت عصبية شويتين وساعات بيخلى البشرة تصاب بالحبوب.. يعني عكس كل الكلام اللي هو قعد سنين عارفة.

مهم بردو اننا نشرح مرحلة بلوغ الجنس الأخر علشان نيبقاش فيه فضول وعلامات استفهام تؤدي انهم ياخدوا معلومات غلط من حد جاهل.

ربنا يوفقك يا بعبعة ومعاكي يا قمر كملي.

ذو الوجه المبتسم يقول...

السلام عليكم

ممكن تسمحى لى احييكى بجد
على اسلوبك البارع فى الالقاء
والله مش مجاملة
بس بجد تنفعى دكتورة او مدرسة كبيرة

المهم بقي ياستى
فيه ملحوظة عاوز اتاكد منها
البلوغ عند الولد بتقولى انه من 11 - 16
والبنت من 9 - 12
هو صحيح اللى انا باقوله ده ولا ايه رايك

فيه حاجة كمان
يمكن تكونى انتى ماجلها شوية لوقتها برده
وهو شرح عملية البلوغ نفسها للولد والبنت .... اعتقد كده .. صح ؟

معلش بقي حاجة اخيرة
بس مش عارف ايه رايك فيها
لو فكرتى تسجلي المحاضرة او الشرح ده بالصوت وباسلوبك الجميل ده

ينفع ولا صعب ..... بيتهيئ لى صعب

فكرى .. يمكن تلاقى لها حل
لان الفكرة من تسجيل الصوت ان الام تتعلم كيفية الالقاء واسلوب التحاور ومتقوليش ماهو مكتوب قدامك اهو
ده مجرد اقتراح

تقبلى تحياتى

واحده جاهله يقول...

طريقتك جميله وعرضك للموضوع اجمل
تخيلى انى اول مره اعرف المعلومات دى؟
رغم انى مش صغيره يعنى
وتخيلى انى اول مره اشوف شكل الجهاز التناسلى للانثى كان وانا فى 3 ثانوى
مش دراسه كان فى مجله
تخيلى؟
فعلا الجهل وحشششش
لما جاتنى البيريوت لاول مره كنت مرعوبه ومش فاهمه هو فيه ايه وبطنى وجعانى ليه كده

بعبعه يقول...

سبهلله

عينى حاضر ده انا محتاسه حوسه يا سالي فى بوست الولاد يااوختشي

ربنا يسهل هاستعين بصديق على الله يعبرني
ههههههههههههههههه

بالنسبه لموضوع الفوط الصحيه انتى بتقولي ابنك عنده 7 سنين

اعتقد من الافضل ارجاء المناقشه دي دلوقتي
وتقولي له دى حاجه كده بتاعة الستات يا حبيبى هابقى اقولك عليها بعدين

طول ما في لينك بينك وبينه وبتتكلمي من غير ماتكوني مكسوفه
الموضوع هايكون عادي وهايقبل التاجيل


نورتينى

بعبعه يقول...

مانوش

طبيعى ده هايحصل

بس احنا اتفقنا ان الكلام يجى واحده واحده

وصدقينى الطفل فى السن ده هاينشغل بنفسه جدا وبالكلام الكتير الىخده مره واحده

خلينا دايما نديله حته وناجل حته

والشيخ الى بتتكلمي عنده ده المفروض نعدمه فى ميدان عام

عادي كلهم بقوا كده

تحياتي ليكى مانوش

بعبعه يقول...

ذو الوجه المبتسم

متشكره اوي على الكلام الجميل ده يا رافع من معنوياتي

وبالنسبه لملحوظة حضرتك

فى الحقيقه انا كنت محتاره فيها شويه

وكل ما اقرا فى موقع الاقي كاتب اعمار مختلفه

وعموما ان بعد بحث تان اجريته على نطاق تاني

انا غيرت الاعمار فى الموضوع

لما نشوف اخرتها ايه هههههههههههههههههههه


وبالنسبه لموضوع التسجيل بالصوت

كلا البت
لا يونكن ابدااااااااااا
ههههههههههههههههه

بعبعه يقول...

واحده جاهله

طيب لما انتى مش صغيره ما سعتيش تعرفي ليه الكلام ده هبل هو ولا بتنجان
هههههههههههههههه

وكلامك يؤكد طبعا اننا محتاجين نفهم

تحياتي لكى يا جاهله هانم
نيهاااااهاهاهاها

mahasen saber يقول...

انا معاكى اهه يا قمر

بوستاتك كلها مفيده
ربنا يوفقك

بعبعه يقول...

محاسن

معاكي الهنا يارب

منوره

ستيتة يقول...

ها اتكلم عن خبرة وليس دراسة المرة دي

اولا اي كلام في الموضوع قبل سن 10 سنين بيبقى مجرد هبل في الجبل لأن العيل يادوب عاوز اجابات بسيطة

بعد سن عشر سنوات بيكون الأطفال درسوا بالتفصيل الملل الجهاز الهضمي والجهاز التنفسي بشكل بيفهمهم يعني ايه بيولوجي

ساعتها - وده عن خبرة - متعامليش "سوسو" على إنها طفلة وتتكلمي معاها كده كأنها حدوتة
لأ احترمي عقلها وحسسيها أنها شخصية مجتمعية كبيرة وابدأي شرح علمي وبشكل جاد

اولا البنت بتنبسط جدا انك معتبراها كبيرة وبتكلميها زي الكبار

ثانيا كوني من الجراءة وبلا اي خوف من شرح كل شيء

ثالثا مانوسة انا شارحة ليها في سن عشرة حداشر سنة كل شيء عن تركيب الاجهزة التناسلية للذكر والأنثى
عن الحيض وفوائده وان اللي يكسفها تبص في عينه وتقول له على اساس ان مامتك مش كده؟ انتي عارفة السفالة اللي ممكن تحصل في المدارس والصبيان بيكونوا أكثر جراءة ولو مفيش بنت عارفة ان ده علم يخلوها تتكسف كأنها مخلوق معيوب

رابعا في سن 12 سنة شرحت لها entercource او العملية الجنسية بين الذكر والأنثى بدون دخول في تفاصيل عويصة وبدون استخفاف في الموقف وبدون خدش حيائها برضه

وبصراحة ومش دي تجربتي لوحدي ولكن تجربة صديقات كتير معايا
ان البنات لما بتفهم سلوكها "عكس المتخلفين ما فاكرين" بيكون أرقى وأكثر ثقة في النفس وكمان الموقف ملوش علاقة خالص بالحياء لأنها عارفة تماما ان ده علم

بيتشرح على انه علم وبيتفصل على انه علم مش جلسة فضفضة نسائية

وعليه فاللي هي عاوزة تسأله في أي مرحلة بتسأله لي وبسهولة

خدي بالك من نقطتين

اني زيي زي كل ام مصرية بكون بشرح وانا مكسوفة بس مخبية لكن مؤمنة اني انا اللي صح

النقطة التانية بقى عفريت العلبة اللي وصل لسن لازم نتكلم فيه معاه هو اللي صعب لأن الأفندي من دلوقت عمال يسرح لي في شعره ويقول لي كل البنات بيقولوا علي استايلش وشيك
هههههههههههههههههههههههه
فاربنا يعينا ونشرح له كل شيء برضه وبنفس المنطق وبنفس الجدية بدل ما يعرف من عفاريت العلبة صحابه

تسلم ايدك وارجو الا اكون مملة

تحياتي

شرين يقول...

صباح الخير يا قمر

على فكرة كلامك جميل والبوست حلو اوى بس فى شئ لو البنوتة الحلوة راحت تدور على فتحة المهبل وحطت صوبعها الحل اية

على فكرة بجد والله طريقة شرحك حلوة بس انا مش عارفة فى شئ وانا بقرا مش مخلينى مقتنعة بالشرح اصل انا عندى بنتين وولد هما الا جم وسالونى ، انا مختش حد واتكلمت معاة لوحدنا ، وكل ما يحبوا يسالوا بيكون الكلام عادى وحوار عادى


فى شئ مش مستوعباة قريت الموضوع تلات مرات والله


معلش دمى تقيل لكن تقبلى كلامى ربنا يوفقك

غير معرف يقول...

شكوت الي وكيع سوء حفظي
فأرشدني الي ترك المعاصي
وأخبرني بأن العلم نور
ونور الله لا يؤتاه عاصي

وإذا لم تستح فاصنع ماشئت
مادام ليس تخصصك لم تتكلمين في الاباحة الجنسية ده حتي لو تخصصك يكون للنساء بس حسبي الله ونعم الوكيل ربنا يخرب مدونتك ويبوظها ..قلة أدب

بعبعه يقول...

ستيته

هو انا يا ستيته قلت ايه

مش قلت كل طفل بيبقى غير التاني

مش عارفه انا كنت فعلا هاقول عشر سنين مش تسع سنين
لكن عشان انا حضرت بصفه شخصية مأساة بنت جاتلهاا لبريود عمر تسع سنين وما كانتش عارفه اي حاجه عن الموضوع

وقعدت 3 شهور كل ما يجيلها البيريود تقفل عليها باب الحمام وتعيط لما تقول بس
طبعا لا تتخيلوا المراره الى كانت بتتكلم بها البنت

عشان كده انا قلت كل واحد يراعي الظروف المحيطه بولاده ويحدد معاد جلسة البلوغ بقى على اد ما يشوف

البنت بالذات بيبان عليها قبل ما البيريود تيجى مش عارفه كلامي وصل ولا لا

اما بالنسبه لطريقة الشرح المبسطه فلو لاحظتي هاتلاقينى مثلا فى كلمة بويضه اتدرجت فيها فى الاول قلت بيضه ربطا بالحديث السابق وبعد كده قلت بويضه

انا يمكن اجفلت حقائق علميه كتير بس انا اعتبرينى عملت بانورما للحديث من فوق اكيد كل طفله هاتسأل عن حاجات مختلفه عن التانيه الى حد ما

كمان انا عايزه اقولك ان وحياة ولادي لو الامهات نفسهم فهموا الى انا قلته ده يبقى من الله
تقوليلى كلام علمي

انت فاكراهم كلهم مدرس مساعد علم النبات ده بيفكوا الخط بالعافيه

ووجود الشكل التوضيحى البسيط ده والقلم والشرح هايحسسها انها فى جلسه علميه عادي

على فكره انا عملت الجلسه دي مع بنات كبار وكنت باشرح كده برضه على اده مخهم بقى تقووووووووووولي ايه

وطبعا انا ما احبش اعلم البنت تكون محرجه من نفسها ابدا ليه يعنى هو احنا حاجه عيب يا اختي ولا ايه

وبعدين يا ستيته حسب الله الحمش جبتييييه لنفسك

عليكى بقى بوست entercource لان انا لسه ما كتبتوش طبعااااا وبصراحه ما اتكلمتش فيه قبل كده غير مع بنات كبار 18 وانتى ماشيه وطبعا هنا يختلف الامر

ما كنتش لسه فكرت فيه
عليكى بقى يا قمرررررر على الله تقولي لا ساعدوني ربنا يساعدكم يا اختي

مستعديين نستناكي لما تخلص امتحانات


اما بالنسبه لعفريت العلبه فربنا يسهل هانقول اهو
عااااااااااا

عمرو بدر منفضلي يا اختي وانا كنت ناويه ادبسه يكتب هو البوست ده

ومين ديى الى ممله؟؟؟
بتهرجي ولا اييييييييييه

هاتي بوسه بقى

بعبعه يقول...

شيرين

منوره

يا ست الكل مش انا نبهت فى الكلام اننا ننبه على البنت ان ما تحاولش تستكشفها وعشان ممكن تنجرح وحركات من دي


وعلى فكره انا كمان شايفه انى افهمها موضوع الغشاء ده كمان عشان تفهم اكتر

لكن فى ناس اعترضوا عليا قبل كده قلت اسيبها اختياري

ولا دمك تقيل ولا حاجه

وبرضه لو حضرتك شايفه انى مااشرحش كده للبنت امال اشرح ازاي ؟؟

ادينى اقتراحاتك يا فندم

نورتي

بعبعه يقول...

غير معرف

والنبى انا هاسيبك كده مش هاشيل تعليقك

عبره لمن يعتبر

قال اباحه جنسيه قال

اتوكس ولا اتوكسي

MADO يقول...

Salam to all
Very good post as always, here is just one point I want to add that is never under estimate your kid so if your kid is 7 years old and ask you don’t say wait your are too young to know because simply he will find another way to get information from and that why we have problem, b3b3a thank you to leave the anonymous comment it is funny after reading your post s/he decide its aba7a hahahahah .
Salam

سبهللة يقول...

بعبه
دة الميل بتاعى
raniarachad@yahoo.com
ابعت لى الميل بتاعك وقولى فيه انك بعبه عشان ابعت لك دعوة لقراءة مدونتى لانها اتقفلت للعامة وبقت مفتوحة للى عندهم دعوات بس
سلام عليكم

بعبعه يقول...

عماد

شوف انا رايي ان دايما نجاوب على الاساله لكن مش كلها

يعنى الى يسال نجاوبه فى جزء مسموح به حاليا وناجل الى بعد كده وبعدين احنا لو اتفقنا اننا بادئين مع الطفل من اول كلمه هاتلاقي الطفل عنده ثقه فى الام او الاب وفى مصدر معلوماتهم ومش هايدور على غيرهم

ولو حصل وخد معلومات تلاقيه يرجع للتحقق منها من الام وده بيحصل معايا فعلا من ولادي

بالنوسبه للاخ ولا الاخت بتاع الاباحه تقريبا ما عندوش جهاز تناسلي فشايف ان دي اباحه
ههههههههههههههههههه

نورت يا عماد

بعبعه يقول...

سبهلله

ليه طيب قفلتيها يا جميل

طيب عموما انا اميلى بره على صفحة المدونه وعموما حاضر هابعتلك اميل

متشكره ليكى ياقمر

Jannah يقول...

عفوا يعني فمصر المدارس ما يعطون الدروس هاذي؟
انا ما قول انه الام ما لازم تعمل الي انت قلتيه هذا واجب و مفروغ منه بس أستغرب انه المدارس ما يعطون دروس في مادة البيولوجيا بدايو من سن 10 سنين
شي مؤسف صراحة!!!
مشكورة على المدونة فعلا
:)
موفقة

بعبعه يقول...

جنه

يا حبيبتى فى مصر الوضع التعليمى سيء جدا

واليكى الاتي

الجهاز التناسلي ده متقلب يتنقل كده فى سنوات المرحله الاعداديه الى هى من 11 سنه

وكمان المدرسين ساعات بيتكسفوا يشرحوا ويكروتوا الفصل ده تماما

وبعدين هما العيال اساسا مش فاهمين حاجه خالص

المدارس الحكوميه الى هى الاغلب والاشمل على مستوى الجمهوريه بقت مافيش فيها دراسه اصلاااا

ومدرس الدرس الخصوصيه كلهم من بتوع خد يا ابنى ذاكر الورقتين دول هاجيلك منهم الامتحان

وخلصت

وبعدين انا شايفه كمان الحديث الى انا ذكرته ده هايقوي العلاقه والصله بين الابن والاهل ان كانت ام او اب

تحياتي ليكى ونورتي

سيف الدين اليزل يقول...

الي غير معرف
الكلام لازم يكون بادب ولو الموضوع كلة
ميهمكش المفروض تقول رائيك بادب علشان عيب تغلط فالناس بس انا عزرك
الظاهر عليك سيكو سيكو واسال نفسك هل انت اتكلمت مع ابنك وفهمتوا كل حاجة او اسال مراتك هل هي اتكلمت مع بنتك في كل حاجة اكيد لا عارف ليةعلشان انت سيكو سيكو
والسلام علي من اتبع الهدي

بعبعه يقول...

سيف الدين اليزل

يااخ سيف ربنا يكرمك ما تزعلش نفسك يعنى عادي

هو واضح انه حد ما قريش الموضوع اصلااااا ولا يعرف هو بيتكلم عن ايه

هو شاف او شافت تعليقى عند د. شيرين وجه هنا هلفط بالكلمتين دول

وانا بجد سبته عشان الناس تعرف هذا المجتمع بيفكر ازاي

متشكره لك

Bola 7elmi يقول...

عارفه دي اول زياره ليا هنا
وعجبني اوووي الارشادات اللي انتي عملاها للامهات عشان تفهّم بناتها

عارفه .. انا ونا صغيره كنت فاهمه
يتغذى ويكبر من دم ماماته
مش بياكل الدم لا يا عبيطه

اها بجد كنت عبيطه ... فهمت لما كبرت ..
بس فعلا لازم البنات تفهم ايه اللي بيحصل معاهم لانهم بجد بينصدمو لما بتحصلهم حاجات غريبه وقت البلوغ

مدونتك حلوه اووووي
بجد شكرا ليكي :)