الأربعاء، 13 مايو 2009

اسرار البنات



ايه رايكم فى العنوان

مش الفيلم بتاع اسرار البنات لا لا ده هايبقى كذا فيلم فى بعض


بصراحه يا جماعه انا لاحظت ان فى هوه واسعه جدا بين افكار البنات والشباب فى حاجات كتير

واعتقد ان احنا محتاجين ان كل فريق محتاج يعرف الية الفريق التاني والتفكيره عشان فى النهايه هما بيعيشوا مع بعض ويكونوا لبنة فى بناء المجتمع الى هى الاسره

عشان كده انا قلت اعمل كلم بوستين ان شاء الله


واحد بعنوان اسرار البنات والتاني ان شاء الله بعنوان اسرار الشباب


اه وقبل ما انسى البوست ده برضه للكبار فقط فوق امممممممم 18 برضه

ماشي كده ؟؟


الى شايف نفسه صغنن يطلع بره


على راي واحده مش فاكره كانت مين فى فيلم ايه بتقوله ايييييييه انا بت بطاله

المهم هاقولكم مجموعة مواقف بعضها انا كنت طرف فيها وبعضها اتحاكتلي من ثقات


طبعا مش محتاجه اقولكم على كمية الخزعبلات الى موجوده فى عقل البنات عن الجواز والجنس والرجاله كمان


عشان كده تقريبا كل الكلام على اسرار من النوع ده

ايه مش انا مش باتكلم الا فى الجنس يا ولاد اللذذذذذذذذين


نمبر وان


واحده مره ودي عمرها كان وقتها 19 سنه تقريبا وكان ده تاني يوم كتب كتابي قالتلى مبرووووك يا مدام قلتلها الله يحرقك هاتجبيلى تهمه يا بت مدام ايه ؟؟


قالتلي ايه هو مش المفروض انك انتى كده اتجوزتي ؟؟


قلتلها لا ياناصحه لما تكبري هايقلولك انهم بيقولوا مدام للي بتجوز مش يتكتب كتابها


ففتحت بؤها فتحه تنم عن غباء متقع


طب وهو ايه الفرق ؟؟ انا فعلا من زمان باستغرب هما الى بيكتبوا كتابهم دول بيبقى موقفهم ايه يعنى وليه ما بيخلفوش الا لما يعملوا فرح


قلتلها كده اصل العيال دول بيصروفهالهم مع الزفه كده حلواني


نمبر توووو


واحده مره قالتلي هو الا في سؤال محيرنى بس دي كانت كتكوته صغيره كده بتاع 13 سنه


امي قالتلي ان الدوره الشهريه دي بيبقى دم فاسد والجسم بيتخلص منه طيب هما الرجاله بيتخلصوا من الدم الفاسد الى فى جسمهم ازاي ؟؟


قلتلها لا هما بيحطوه فى التلاجه عشان ما يبوظش وبين قوسين داتك داهيه فى امك


نمبر ثريييييي


خفيفه اخرى قالتلى انا اكتشفت وانا عمري 13 سنه ان الرجاله عندهم جهاز بولي وتناسلي مختلف عننا وده طبعا من كتاب المدرسه فى الباب الى ما حدش بيشرحه ده ما فهمتش اوي بس اهو نص العمى


نمبر فور


اه اه ما الهبل كتير


قالتلى تعرفي انا اول ما كتبت كتابي جوزي جه يبوسني استغرررررربت جدا ايه ده هو بيعمل كده ليه ؟؟؟(بيطلع لسانه) يععع اوي


يكون مريض نفسيا ؟؟؟ طب يكون هو ده الشذوذ الى بيقولوا عليه ؟؟؟


وفضلت فى ازمه نفسيه كام شهر لحد ما سألت واحده صاحبتى وضحكت عليا لما قالت بس .


نمبر فايف


كان عمرها حوالي 20 سنه ومكتوب كتابها . فجأتنى وانا باكلمها كلام علمي بحت بحت يعني فى محاوله لشرح الجهاز التناسلي بتاعها الى ما تعرفش هو جاي مع مين


فجأتنى بسؤال خلاني عايزه احدفها من الشباك لما قولتها التلقيح قالتلى ااااااااااه ازاي بقى بيجوا عند بعض


قلتلها نعم ؟؟؟


قالتلى يعنى ازاي الحيوان المنوي بيجى عند البويييييييييضه ؟؟؟


قلتلها انتى هبله يا بت ؟؟


قالتلى لا انا عارفه ان فى حاجه بتحصل اكيد يعنى بس هى اييييييييييييييه بقىىىىىىىىى؟؟؟!!!!!!


نوووووووره اوي

نمبر سته (بلاش سكس اصل انتم نيتكم وحشه )


واحده قالتلى انها كانت حماره كبيره (وما زالت والله ) ويوم الدخله لقت جوزها حافظ مش فاهم وبيقولها ما تعرفيش الطريق منين يا اختي


فاحتاروا بقى ومش عارفين يطبقوا الى قروه فى الكتب العلميه على الواقع وقعدوا يبحثوا بقى في ارض الوادي


اه وربنا


نمبر سفن


قالتلى انا لحد الان باعتبر اول اسبوع فى جوازي ده اسوووووود اسبوع فى حياتي حتى جوزي بيقول كده برضه اصل كنت فاكره انه مجنون وبيعمل حاجات غريبه وعيب يعنى .

نمبر اييييييت

سألتنى بكل رعب هو البنت الى ما بتعملش ختان بيحصلها ايه ؟؟


قلتلها ولا حاجه لما توصل لعمر 20 سنه الى هو عمرها بيدفنوها بالحيا


والله العظيم برقت وكانت هاتصدق لولا انى انفجرت فى الضحك

قلتلها فى ايه يا بت

قالتلى اصل انا سمعت ان ا لى مش بتتختن بتبقى قليلة الادب ومسيرها الانحراف

وبعدين بيقولوا ما ينفعلهاش صلاه


وقالت كام بؤ حامضين كده

سمعتهم من واحده كانت بتقنع امها انها تختن البت وكان عمرها يوم ما سمعت الكلام ده 12 سنه

شوفوا قعدت كام سنه بتتعذب بالكلام ده ؟؟

وطبعا ما كانتش بتصلي تقريبا الله مش قالولها مش هاينفع لها صلاه ؟؟؟!!!


بس الحمد لله كانت لسه ما انحرفتش

تتوجعوا فى لسانكم يا حريمات ما تتكلموش قدام العيال



نمبر ناااااااين

مره واحده كلمتنى عايزاكي فى موضوع مهممممم . ده بعد مناقشه كده دارت بينى وبينها حول حادثة اغتصاب لقوا البنت بكر وفى نفس ذات الوقت البنت طلعت حامل طبعا البت جالها حول فى معلوماتها الهبله اصلا .

المهم بعد المناقشه بقى بيوم كلمتنى عايزاكي ولما اتقابلنا قوليلي هو الحيوانات المنويه دي بتمشي ؟؟؟

قلتلها بترمح رمح

ايه بتمشي دي يا بنتى انتى عبيطه ؟؟

هى بتتحرك اه بش مش بتمشي امتار يعنى دي لا ترى بالعين المجرده هى دوده يا هبله

المهم لقيت البت مرعوبه من كونها فى المحاضرات وفى الدروس بتقعد مكان ما بيقعدوا الولاد وجايز جنبهم

وحتى فى البيت يا نهار اسود اخواتي

على اعتبار ان الرجاله ماشيين يوقعوا حيوانات منويه

اكيد جاوبتها وطمنتها قبل ما يجيلها هسس الحيوانات ا لى بتمشي


نمبر تن والاخيره بقىىىىىىى


دى بقى الزغلوله الكبيره

شخصه فى الثلاثينيات من عمرها اي والله كده بس لسه انسه

اكتشفت انها تعتقد ان الولاده بتكون من فتحة الشرج

اي والله العظيم ان ده حصل

وتقولي وانا اعرف منين اللللللللللله

اصل انا سمعت بابا مره بيقول لاخويا الى متجوز هى يعنى الولاده ايه ما كأن الواحد عنده امساك


وجامعيه اه اه جامعيه


اقولها طب يعنى ازاي دخلتي الجهاز الهضمي على التناسلي تقولي مش عاااااااارفه الله بقى مش كله فى البطن

زنقتها فى جنب وورقه وقلم وقعدت اشرح وهى مش عارفه تودي وشها فين ومكسوفه وانا باشرح لها الجهاز التناسلي الانثوي

ااااااااه ياني

عارفه انى طولت عليكم بس انا حره بقى

عارفه كمان ان فى ناس هاتقول يا سلااااااااام ده البنات بقوا يندب فى عنيهم رصاصه وعارفين كل حاجه وربنا يخلي الدش والنت والموبايل


او باين بعبعه دي عندها خمسين سنه وبتحكي على زمان

او البنات دول شكلهم بيستهبلوا على بعبعه

اؤكد لكم انى قلتلكم نص المواقف الى عندي بس

واؤكد لكم كمان ان الدنيا مليانه هبل والله

والتلفزيون والنت والموبايل ما بيعلموش

بيبوظوا بس

حاجه اخيره بقى
طب منكم يا رجال البلوج المحترمين

انا طبعا عملت بوست اسرار البنات

وانا الحمد لله عندي اسرار بنات مصر والوطن العربي

المشكله بقى فى اسرار الشباب

الى عندي ما يعملوش نص البوست ده

عايزه مساعده يا ولاد الحلال

اميل المدونه اهو



طبعا ما حدش يقولي هو مين ولا مين الي بتكلم عنه

وغيروا فى الروايه بس ما تبوظوهاش

المهم يوصلني الموقف

بس خلاص اقعدوا بالعافيه امووه

ممنوع قلة الادب فى التعليقات والاميلات

هناك 31 تعليقًا:

اعترافات هانم يقول...

حاضر هظبطلك التعليقات تكون تحت

عشان الناس بس

اعترافات هانم يقول...

ايه البوست دا يابعبه انا اتكسفت خالص

كمان ومن غير ضرب انا ميكس بين اربع او خمس بنات من اللي زكرتيهم

شكليي هتضرب

اي اي

بعبعه يقول...

فالحه يا اختشي

ههههههههههههههههههههه

افضحينا بقى يوقولا بعبعه مش عارفه تعلم شريكتها

ههههههههههههههههه

اعترافات هانم يقول...

عملت التعليقات تحت اهي

اي خادوعه

بعبعه يقول...

شاطره يا اعترافات


بس التمبلت الى انتى كنتى حاطاه الصراحه انا لقيته غامق شويه

ما بقيتش شايفه اقرا

ايه رايك فى العصافير دي ؟؟

لو مش عاجباكي غيري عادي احنا ورانا ايه
مس احنا عاملين البلوج ده عشان نلعب فيه

عمرو يقول...

و بيحصل أكتر من كده و حياتك :))
فقدان الثقافه الجنسيه بأعتبره أزمه خطيره فى المجتمع لأن بيبقى له تبعات مؤسفه و مؤلمه بتأثر على شكل الحياه بين الأزواج فيما بعد ..
بس نمبر سته دى اللى ضحكتنى بجد :)) بس عادى يعنى بتحصل فى أحسن الوديان ..
و بعدين اٍذا كانوا الأمهات و الآباء ذات نفسهم مغتقدين للوعى الجنسى يبقى اٍزاى حيقدروا يفيدوا بناتهم و ولادهم فى هذا المجال ؟؟ طبعا مش ممكن ..
فالبنت أو الولد بيتساب كده منه لاٍستقاء المعلومه الخطأ أو المغلوطه اٍما من الأصحاب اللى هم جهله برضو أو من النت بكل ما يحمل من غرابه و شذوذ أو من كليبات الموبايل اللى أنتشرت بشكل جنونى بين الصغار و الكبار كمان ..
المنظومه كلها فى حاجه للصنفره و اٍعادة الطلاء لأن الوضع لو اٍستمر على ما هو عليه يبقى علينا تقبل وجود أجيال مريضه نفسيا و جنسيا بترتكب أشنع الجرائم فى حق نفسها و فى حق المجتمع ..
أسرار الرجاله أتوقع أن تكون فيها غرائب أكتر بكثير من أسرار البنات و حنشوف ..
تقبلى تقديرى و تحياتى ..

عاشقه وغلبانه يقول...

يخرب بيت كده
هو لسه في ناس بالتفكير ده...؟؟؟؟
كله كوم ورقم سته دي كوم تاني
بطني وجعتني من الضحك
طيب البنت ونقول مش مشكله احنا في مجتمع مابيحبش البنات تكلم في الحاجات دي واللي تحاول تنطق او تتعلم تبقي قليله الادب اما جوزها ده ايه نظامه
يانهار الوان
هههههههههههههههههههههههه

عاشقه وغلبانه يقول...

عايزه اقولك اني قريت المدونه كلها كلها
انتي بجد انسانه ناضجه
يمكن البعض يشوف ان الكلام في الحاجات دي عيب وحرام وكلام من ده بس انتي بجد محافظه علي خطوط حمرا

بعبعه يقول...

عمرو


حلو الاكسبرشن ده

المنظومه كلها فى حاجه للصنفره و اٍعادة الطلاء

فعلا الاهالي نفسهم مفتقدين للوعي والثقافه الجنسيه الصحيحه ازاي هايعلموا ولادهم ؟؟

شرفتنا

بعبعه يقول...

عاشقه وغلبانه

هاقولك سبب الى حصل ده ايه والى لاحظته من مشكله تانيه حكتها ليا صديقه

ولما دورت لقيت ده حقيقى فعلا

فى الكتب العلميه هاتلاقي الجهاز التناسلي الانثوي
له وجهين

الاجزاء الداخليه والاجزاء الخارجيه

الرسمه بتاعة الاجزاء الخارجيه روحي كده بصي عليها

الرسم الكروكي مش صوره

هالتلاي الى راسم راصص 3 فتحات تحت بعض
بالترتيب ده

الفتحه البوليه
الفتحه التناسليه
فتحة الشرج

وطبعا بعبر عنهم بدواير متفاوتة الحجم


اولا فى الطبيعه هما مش واضحين كده دول قنوات لحميه وعضليه مش مواسير مايه يعنى


ثانيا هو بقى او هي عقلهم الى ربنا ابتلاهم به

ما خلاهمش فطنوا ان الفتحه البلوليه لاااااايمكن هايغلط ويروح هنا لانها صغيره جدا زي الشليموه الرفيع كده

وفتحه الشرج لحكمة ربنا العظيمه محكمة الغلق وبعدين يعنى معروف مكانها بلاش الذكاء ده

يتبقى فتحه واحده الى هى الفتحه التناسليه

بس حضرتك فى ناس مخها بيبقى مليس عليه تخلف ولاايه ما تعرفيش

المهم حصل خير

خلفوا عيلين ما تقلقوش بعد جهد جهيد وربنا
ههههههههههههههههههههه

ده انا ما كتبتش الحوار الى دار بينهم كمان

انا كنت خلاص وهى بتحكيلي بارفص فى الارض واطالع في الروح من الضحك

متشكرة على اطرائك وشرفتينى

Remas يقول...

الاول مبروك على النيو لوك والعصفورات العسولات

ايه يا بنتى البنات دى دا انا جالى

اكتئاب منهم .

بس قعلا عندك حق في كتير عندهم معلومات غلط

بس بجد بتاعة التلاتين سنة دى اللى استغربتها اوي

في المقابل بقا في بنات زى ما بيقولو تندب في عينهم رصاصة وعارفين اكتر من اللى المفروض يعرفوه

لازم الام تفهم بنتها بطريقة علمية ومهذبة عشان بدل البنت ما تكون عرضة لمعلومات غلط من اى حد او تكون زى النماذج دى ( تفرس يعنى )

بحييكى يا بعبعة على شجاعتك واصرارك انا قلت بعد البوستات اللى فاتت والهجوم هاتقولى ابعد عن الشر وغنى له بس طلعتى جدعة اوي زى ما انا كنت متوقعة

الفراشة الصغيرة يقول...

ههههههههههههههه

بجد بجد مت من الضحك

طب انا ليا واحده صحبتى كانت متصورة العيال بيجوا من البوسة

لحد ما اتخرجت من الكليه
وبجد وبجد كنت بضحك عليها ضحك

واهى متخطوبه وهتتجوز ولسه متعرفش اى حاجة فى حاجة
للاسف امهات كتير مش بتصاحب اولادها
وبتتكسف منهم اتمنى نكون غير كده

أنترنتاوي يقول...

بالتوفيق

بعبعه يقول...

ريم

الله يبارك فيكى

انا واعترافات غيرناه كام مره وحياتك

وايه مفكراني هخاف لااااا ده جامدين اوي اوي لعلمك
ولاااااااا يهمنى
ههههههههههههههههههه

بعبعه يقول...

الفراشه الصغيره

اكسبي فيها ثواب يا بنتى

وقوليلها اي حاجه اهو نص العمى ولا العمى كله


ده بنات هم

بعبعه يقول...

انترنتاوي

شكرااااااااااااا

جنّي يقول...

السلام عليكم

بالطبع الحالات التي ذكرتيها لا تعني الاغلبية بل هي اقلية واقلية كبيرة كمان والسبب الام اولا والمدرسة ثانيا .. ومن لم تتعلم او تجهل في بداية حياتها الزواجية ستعلمه الفطرة والغريزة ..

والامور التي ذكرتيها والخاصة بالزواج تسمى علميا بالخبرات الفطرية او الغريزية يكتسبها الانسان بالفطرة اى تولد معه مثل المخلوقات الحية كلها ..

ومن شذ عن الفطرة عليه بالذهاب الى طبيب او طبيبة متخصصة لا ان تكون برامج على الهواء وبكلام كبير يثير الغرائز ..

والمعلومات التي تشوه الفطرة سببها الاستماع والنظر لسلوكيات مكتسبة بشكل غير سوي ..

عاشقه وغلبانه يقول...

لا اصبري انا هاموت من الفضول واعرف باقي الموقف بتاعها
ههههههههههههههههههههههه



وبالنسبه للرسمه بتاه كتاب الاعدادي اللي ماكنتش بتتشرح لان المدرس او المدرسه بيتكسف فانا نسيتها من كتر اللي شوفته بعدها

عاشقه وغلبانه يقول...

اه بالمناسبه انا كان ليا واحده صاحبتي زي صديقه الفراشه الصغيره اللي بتقول عليها دي
كانت مفكره كل العلاقه بوسه وحضن
بعد مافطست علي روحي من الضحك بتقولي ماهو ده اللي بيجي في التيفزيون وبعدها بيقفلوا النور ويناموا
ههههههههههههههههههههه
واهي مهندسه قد لدنيا
هههههههههههههههههههههههه

صبرني يارب يقول...

ههههههههههههههههههههههه


ايوه انا اشهد ان الناس دول موجودين فى الدنيا وقابلتهم فعلا واكتر من كده كمان

ومش نسبه قليله

وحتى لو البنت عامله نفسها بتفهم لكن هى حافظه كلمتين كده اي كلام بتهزر بيهم ان فى الاساس هى حماره مش فاهمه حاجه

تحياتي على البوست

بعبعه يقول...

جني

يا جني هى فين الفطره ؟؟

الفطره بقت مشهوهه الىحصل حصل والى كان كان ما نقرش نغير الىحصل

واي كانت ما يستمتع به الشخص ما دام مش حرام لا ضير فيه

مش مهم عرفه منين هو حر بقى مع ربه يتوب يستغفر جايز مش من حاجه غلط ما حدش يعرف

المهم ان احنا اساسا عندنا فطره حاليا مشوهه ما حدش بقى على الفطره

ومافيش حاجه اسمها خبرات مكتسبه

حضرتك انا باتكلم عن اشخاص مش عارفين التركيب التشريحى لجزء من جسمهم انت متخيل الجهل ده شكله ايه ؟؟؟

واعتقد ان بعض الحالات الى انا ذكرتها فى كمان جزء تاني فى جسمهم مش عارفين بيشتغل ازاي
هو عقلهم

الفطره والكلام ده عشان يخلفوا
عادي ما الحيوانات بتخلف فى الغابه

لكن احنا مختلفين
مش الهدف من العلاقه التكاثر فقط

تحياتي لك وشرفت

بعبعه يقول...

عاشقه وغلبانه

ايوه عشان انتى دراستك خلتك اتعلمتي ولعلمك ده ما يمنعش برضه ان فى دكاتره مش بيفهموا بس من نواحي تانيه

ماهو الموضوع مش تشريحى فقط


والبت بتاعة النور يقطع ويناموا

ابقى وحي جوزها لما تيجى تتجوز يتجوزها فى عز الظهر وهو فاتح الشباك ما ما يكونش لهم جيران بقى
ههههههههههههههههههه

قال بيطفوا النور ويناموا قااااال

شرفتينا يا جميل

بعبعه يقول...

صبرني يارب

تمام عندك حق اكم من حمير فى الدنيا بيفكروا نفسهم بيفهموا او بيحلوا يحسسوا الى قدامهم بكده

شرفتي

mahasen saber يقول...

سؤال بئه يا بعبعه يا لمضه

لو انا عندى وعى جنسى افيد بيه ابنى ازاى

ردى كده ههههههههههههههه

mahasen saber يقول...

لا بجد جاوبينى وفيدينى بجد

ذو الوجه المبتسم يقول...
أزال المؤلف هذا التعليق.
ذو الوجه المبتسم يقول...

السلام عليكم

اولا اشكرك على البوست الجميل ده والكوميدى باسلوبك الحلو

ثانيا عاوز اقول لك حاجة بجد
كل اللى قلتيه ده بيحصل وفيه اكتر منه كمان

بس على فكرة عندى تعليق مهم
اهم من انك تحكى الحالة او المشكلة حسب رؤيتك هو انك تضعى الحلول لها

فيه مدونة جميلة بتتكلم عن المشكلات دى ( الحياة الزوجية والجنسية )
http://xnouarax.blogspot.com
مدونة مفيدة وممكن تقتبسي منها بعض الحلول والمعلومات الجنسية

لو افتكرت لك موقف او حكاية شبابية هاحكى لك علشان تحطيه بالبوست القادم
تقبلى تحياتى

بعبعه يقول...

محاسن صابر

ده موال كبير اوي اوي يامحاسن

محتاجين نتكلم كده عن قواعد واصول التربيه الجنسيه

ايه رايك نخليه ده على جنب مره تانيه نتكلم فيه

انا كنت قريت بوست كويس مره عن التربيه الجنسيه هابقى ادورلك عليه

نورتي يا جميل

بعبعه يقول...

ذو الوجه المبتسم

عندك حق تمام

بس انا قلت اعرض الاول الكلام عايزه الطرفين يسمعوا بعض

وبعد كده ممكن نقدم حلول

والى انا عرضته حله انهم يتعلموا ما يبقوش بقر كده


وبالنسبه لنواره دي حبيبتى جزاها الله كل خير بجد انسانه محترمه اوي

وانا متبعاها طبعاااااااااا

حضرتك نورت

Bola 7elmi يقول...

تصدقي خليتيني ابص لنفسي بصة غريبه واقول
دنا جاااااااااااااااهله أووووي

طب والنعمه .. والله الجهل وحش << بس اصل انا هجيب معلومات منين :|

ربنا يكرمك :)

بس بجد انا مقتنعه انو لازم البنت تفهم هو فيه ايه ... وايه اللي بيحصل

دا تالت تعليق ليا ف مدونتك وعماله اتعلم واعرف حاجات عجيبه :0
شويه اضحك .... وشويه ازبهل
فـ كلا الحالتين .... الموضوع كبير
وعيب اووووي الجهل اللي احنا فيه

غير معرف يقول...

بصراحه انا ممكن اكون مش اتذكرت فى ال10 حالات دى
بس انا حالتى كانت شئ ثانى انى تزوجت صغيره ومحدش قالى حاجه ولا كنت عارفه حاجه غير ان عيب ان الولد يعمل قله ادب مع بنت ولما اتعمل فرحى ودخلت بيت الزوجيه اول لما لقيتو بيغير ملابسو قدامى كده وال ايه عاوز يساعدنى فى تغير الفستان انا قولتلو انت قليل الادب على فكره وانا هاروح اقعد مع بابا وماما طبعا هو اخد الموضوع كأنو احراج بحاول اداريه بالهزار مع انى كنت بتكلم بجد وقتها وسابنى اغير لوحدى وخرج هو بره جينا بقا للى بعدها لما لقانى لابسه بجامه بيت قالى انتى عبيطه يابنتى ماردتش عليه طبعا هو قال بردو مش مشكله مكسوفه ال ايه بقا مسك ايدى وهيعملى فيها عمرو الشريف ويبربش ويقرب لطشتو بالقلم يومها وقلتلو انا هتصل بمامتك اقولها انك قليل الادب وبتعمل حجات قلت ادب المهم يومها قعد يفهم فيا لحد تانى يوم الصبح وانا لا بردو ومنشفه دماغى وقعدت اعيط واقوله انا عاوزه اروح بيتنا يقولى ده بيتك يابنتى اقولو لا انت مش محترم يقولى انا جوزك اقولو منا عارفه انك جوزى بس انا عارفه ان انت اخرك تنام جمبى على السرير عادى لكن تعمل قلت ادب لا ماما قالتلى كده عيب وطبعا كان هيطق منى ونام عادى ولا حصل شئ جه تانى يوم والدتى جت بقا معرفش ليه بردو المهم حكالها والدتى خدتنى على جمب وقعدت تفهم فيا قولتلها لا انتى قولتيلى كده عيب قالتلى انتى كبيرتى واللى بيتجوزو بيعملو كده عادى اللى مش متجوزين بس هما اللى عيب وطبعا سمعت الكلام وربنا يصر الحال والحمد لله اصبحت عارفه كل شئ ومش ببخل على اى حد من اصدقائى انى افهمهم اى شئ
مثال صغير لصديقه لى جت بتقولى انتى اتجوزتى ازاى قولتلها ازاى مش فاهمه قالتلى انا سمعت انهم بيعورو العروسه يوم الفرح
قولتلها يعوروها ازاى قالتلى بيجيبو حته قماشه بيضه والزوج بيدخلها داخل الزوجه لحد ماتتعور منها وبعد كده يطلعها فيها دم طبعا انا كنت هموت وقتها من الضحك بجد وفهمتها ان الموضوع غير كده خالص