الأحد، 6 سبتمبر 2009

يادبلة الخطوبة عقبالنا كلنا

السلام عليكم ورحمة الله وبركاته

بدانا بالسلام حلو وفل اوووووووووي ازيك يابعبه ياقمر ازيك يااستاذ عمرو

طبعا بعد الاتهام الفظيع المريع اللي اتهمتهولي بعبه وهو اني مستخبيه تحت الكرسي

قلتلها لا مش مستخبيه بس في حاجه اسمها حياء والحياء دا بقي انا شيفاه كل الجمال مش نصه بس

والرسول عليه افضل صلاة واذكى سلام قال اذا لم تستحي فافعل ماشئت حلووووووووووووووو اوي


وطبعا انا متاكده ان المعلومات اللي قلتوها وفتحتو النقاش فيها افاد ناس كتير جدا لكن في نفس الوقت ظهر مؤشرات ترررررررررررررعب اوي

او بمعني ادق فتح عيني علي مفاهيم بجد بجد ربنا يستر امة محمد ولا يفضحها ويهديهم ياااااااااااارب

انا رغايه كدا ليه تعالي ندخل في المفيد

طبعا انا لا هعمل بوست مضخم ومفلطح وعريض المنكبين ولا الحاجات دي انا عاوزه ابعبع

معاكم الله هي مش بعبه بلوجارية ومن حقنا نبعبع كلنا

من عنوان البوست اسمه يادبلة الخطوبة

كل شاب كل بنت مهما عدا العمر عليه او عليها نفسه في اليوم اللي يخطب بنت وبعد كدا يتجوزها

والبنت نفسها ترتبط وتتجوز وتعيش سعيده

لان اللي برا موضوع الجواز فاكر انه لما هيتجوز الحياه هتكون وردي ومش في مسئولية بالعكس بقي انا خايفة

وشايلة هم الجوزا دا من مسئوليته وبدعي ربنا انه لما يرزقني بزوج صالح انه يدرني علي تحمل مسئولية الجواز


نرجع لمرجوعنا وطبعا للحاله المادية المترديه في الفتره دي الخطوبة بتقعد سنه واتنين وتلاته


بس عادي مش مشكله الحياه صعبه اه لكن مع الحب والود بتبقي خفيفه وهينه

مش مهم كل الكلام اللي قلته فوق دا

الاول عاوزه اقول يعني ايه خطوبة الخطوبة وعـــــــــــــد بالزواج فقط

تعالو بقي افرضي انتي مخطوبة لواحد دلوقت وبعد كام شهر كدا جه باباكي وجاله واحد دخل مزاجه مش يقدر

بسهوله يجوزك له حتي من غير مايبلغ اللي خاطبك بدا وساعتها يبقي ادا صابونه للاولاني

انا مش بتكلم في نقطه نداله ولا اي حاجه انا بتكلم في امثال

باباكي يقدر ولا ميقدرش لكن لو انتي مكتوب كتابك وجه باباكي جاله واحد احسن يقدر يكتب كتابك علي

واحد تاني دا يروح السجن لييييييييييييييه لانك متجوزه واحد بالفعل

يبقي كدا الخطوبة مش فيها اي حاجه تثبت انكم متجوزين وانكم اجانب علي بعض

عارفين ياعني ايه اجانب يعني لما تتقابلو لازم اخوكي او باباكي او عمك او اي محرم يقعد معاكم

وعارفين بقي ان لو في كلام حب اتقال بينكم او الكلام اوفر شويه دا بيقلل من البركة لما بتتجوزو وبيكون في مشاكل

ياربي انا كل دا بقول في كلام

امال البوس والحضن والمعاشرة اللي من غير فض غشاء بكارة دي تبقي ايه ملهاش غير مسمي واحد

زنا والزنا درجات

انا بنت زيكم ومن سنكم علي فكرا وارتبط بس قسم احلف بيه ان عمره ماقعدت انا وهو لوحدينا وعمره مافكر

يلمس ايدي مش لاني انا رفضت او كدا لا لانه كان بيحترمني وشايفني غاليه

طيب تعالي نحلل الموضوع شويه واحده مثلا بتحب واحد وهو بيحبها واتخطبوا وخرج معاها ومثلا لمس ايدها

وهي وافقت وشويه يحط ايده علي كتفها وشويه وفي لحظه تجلي ياعبدالمتجلي اخد بوسه وهي هتتمنع

في اول بس مره علي مره هتتعود والبوسه هتجر حاجات تانيه

تفتكري انها لما قبلت التنازلات دي بينه وبين نفسه هيكون مطمنلها بلاش هو هيبقي شايف انها بتحبه

وبلاش رجعيه زي مابسمع تفتكري ربنا هيكون راضي عنهم وهما بيغضبوه

طيب لو رفضت وقالها انتي مبتحبنيش انتي وانتي وانتي وهوووووووووب مشي

في ستين الف داهيه عارفه ليه لانه لو كان صالح حياتك الزوجيه هتمر من المطبات بفضل ربنا وقربكم

ورغبتكم انكم ترضوه وتقربوه منه

اما بقي لو فعلا جواه خير ولما لاقاها رفضت وفاق ان دا غلط هيحترمك وهتزيدي غلاوه في نظره

ومفيش بت تقولي انا خايفه ان لو عملت كدا يبعد وانا مقدرش علي بعده وانا اتخرت في الجواز

ولا مين هيجيني تاني او انا عندي رغبه مكبوته اللي مع ربها عمر ما الهم هيقربلها

والجواز رزق من ربنا زي المال زي البنون زي اي حاجه وكل شي مكتوب ومقدر معروف من وانتي في بطن امك

هتيجي امتي واسمك وهتموتي امتي وفين وحياتك ازاي وكل شي يبقي ليه تخافي واللي جاب دا يجيب احسن منه

وانا ماشيه في المترو سمعت الكلمة دي باللفظ واحد بيكلم واحد بصوت علي وبيقوله احمد خطب التاني يقوله

المجنون في رمضان امال هيبوس ويحضن ازاي

انا صعقت كان نفسي اقول ايه ليه هو قال احمد اتجوز دا قال خطب يعني مش من حقه اي شي

غير انه اخد وعد من والد خطبته ان لو في نصيب بينهم هتكون ليه

نيجي بقي اللي وصلوها لمعاشرة لكن بيحافظو علي لبكارة لا والله يعني هو دا دليل العفه

لا حول ولا قوة الا بالله

اتقوا الله في اللي بتعملوه مش خايف لما تخطب واحده وتعمل معاها كدا وتيجي تتجوز بنتك خطبها

يعمل معاها كدا هتقبل دا

صونوا نفسكم دا اللي هقدر اقوله

وكفايه بعبه بقي لاني اتغميت من البوست دا ربنا يهدينا كلنا ويسترنا جميعا






هناك 30 تعليقًا:

عمرو يقول...

عودا محمودا يا اعترافات هانم :)
و هى عوده قويه بالتأكيد لأنك بتناقشى موضوع شائك و حساس و له تداعيات قويه فى المجتمع اللى هو متلصم أصلا و ملىء بما يوجع القلب أساسا ..
أرجو من كل شاب و بنت أن يحكموا ضميرهم و عقلهم و يفهموا كويس على قولك أنه كما تدين تدان ..
و برضو أوصى الأهل أنهم يتمسكوا بالصح و لا يحيدوا عنه بحجة أن الزمن بيتغير و لازم يبقى فيه شىء من البحبحه و الحقيقه الزمن أيوه بيتغير لكن لا الشيطان بيتغير و لا أساساسيات الفضيله بتتغير ..
ربنا يهدى و تقبلى تحياتى و تقديرى ..

غير معرف يقول...

الشيخ الشعراوي قال اية بئا

أن حتى كتب الكتاب لا يرتب اي حقوق

,وان اللي يرتب الحقوق الزفاف

يعني اعلان دخول الزوج بالزوجة

واي حاجة تاني
يبئوا اجانب عن بعض

نفسى اكون يقول...

بصراحة انا متابع المدونة من فترة لكن اول مرة مع احترامى الشديد الاقى نفسى حابب اعلق

اولا البوست رائع لسبب واحد ان الى كتباة اتربت كويس وتعرف معنى الحلال والحرام

ثانيا توجيهة من بنت فى نفس سن الى بيكتبوا بمعنى انها مش نصايح ولا محاضرات من هم اكبر سنا وبالتالى الشباب بيعتبروها ولاية عليهم واننا مش حسين بيهم ولا بمشاكلهم

ثالثا فعلا المدونة فتحت مواضيع خطيرة جدا والتعليقات كانت بتنم ان فى شىء اصبح عادى جدا وهو عدم الحياء
الى هو من اسس الاخلاق

مفيش حد مبيغلطش كلنا خطائون لكن صعب قوى الجهر بالمعصية لان عقوبتها كبيرة واسال مجرب او جرب بنفسك وشوف لوحابب تخوض بنفسك

فى بقة نصيحة عن تجربة للشباب اذا سمحتوا لية

عامل خطبيتك على انها اختك وحافظ عليها زى اختك وخاف عليها اذا كنت فعلا بتحبها ولو داخل تتسلى اعرف ان ربنا مش هيبارك لك ولا هتوفق خاف من ربك ومتخفش من اى حاجة تانية واتذكر قدرة ربنا عليك

عاشقه وغلبانه يقول...

ربنا يهدي بنات المسلمين ويستر عليهم
اهم حاجه الستر
ماحدش هايحس قيمه كلامك ده غير اللي داق مرار الفضيحه
ربنا يستر علينا جميعا دنيا واخره
ويارب كلنا نعامل ربنا علي اساس انه شايفنا وماننساش دي

بنوته مجروحه يقول...

للاسف يااعترافات انتى بتتكلمى عنى
وعن غيرى من بنات جيلى كتير

وحكايتى هاقولها لعل وعسى
اى بنت تقراها تفوق وتفهم

انا حبيت انسان بعد ما أتخطبت له
وكان دايما يسمعنى كلام اى بنت تتمنى تسمعه وخصوصا انى مش صغيره
انا عمرى قارب على ال30 ولم يسبق لى ان ارتبطت باى انسان
وطبعا زى ما انتى قلتى لمسه فى بوسه فى حضن فى بلاوى زرقا
ولو هالومه مره فانا هالوم نفسى مليون مره
لان مفيش راجل يقدر ياخد من ست اكتر من اللى هى عايزه تديهوله

وكان بياخد كل شئ منى وكانه له حق الزوج بالضبط مع الحفاظ على غشاء البكاره طبعا
وان كانت برأه روحى انتهكت على ايده من زمان

"ومفيش بت تقولي انا خايفه ان لو عملت كدا يبعد وانا مقدرش علي بعده وانا اتخرت في الجواز"

ومش هكدب عليكى لو قلت انى كنت بقول كده فعلا فى البدايه وبعد فتره قصيره قوى
حسيت بانى باعمل ذنب كبير وان ده غلط ومن كتر ما انا حاسه بالذنب اصبحت باتعامل معاه بفتور وتغيرت معاملتى معاه لا اراديا غصب عنى
وفجاه كل شئ انتهى ازاى مااعرفش
حصلت مشكله بينه وبين بابا واتفكت الخطوبه
وكل اللى باقى معايا احساسى بالذب اللى باستغفر ربنا عليه كل ساعه لعله يغفر لى
وقلب موجوع من حب مش حقيقى
وانسان مخادع وكداب شاااطر قوى
حسبى الله ونعم الوكيل

كلمه فى اذن كل بنت
اوعى تصدقى اى كلمه حب من انسان كل همه شهوته وبس
لو لقيتى خطيبك كده يبقى افضل واكرم لك انك تسيبيه لان علاقتكم مش فيها طاعه لله
فما كان لله دام واتصل
وما كان لغير الله انقع وانفصل
*كلمه حق فعلا

انا مش واعظه ولا انا داعيه
وبرضه انا مش واحده غرقانه فى الرذيله
انا انسانه غلطت وعرفت غلطتى وفقت منها ومش هكررها تانى
والذكى اللى يتعلم من اخطائه
والانسان ده لو فعلا كان حبنى عمره ما كان هيرضى لى بده معاه ولا عمره كان هيبعد عنى مهما كانت الظروف
بس للاسف هى دى النتيجه
لازم يبعد لانه اخد كل شئ
هو ده عقل الرجل الشرقى

اختى بعبعه
مش عايزه اى اهانه من اى حد من زوارك بعد اذنك لانى جلدت روحى بكرباك من نار وعذبت نفسى كتير
وتبت الى الله
والله غفور رحيم

صبرني يارب يقول...

الحقيقه يا اعترافات انتى جيتى فى موضوع مهم اوي بجد

وبصراحه انا عايزه اخد كل الناس دي بوكس وانا مخنوقه منهم خلقه النهارده

ونفسي اعرف حقيقى بيحط عينه فى عين مراته ازاي بعد مايعمل معاها كده قبل الجواز

وهى ازاي بتهون عليها نفسها كده ؟؟

ازاي تتوقع انها لما تتهاون فى نفسها وتهين نفسها كده هايحبها ولا يحترمها

احنا هانستهبل

اظن كل واحده بتعمل كده عارفه كويس هى بتعمل غلط

وبتقنع نفسها انها مضطره لكده و و و

وتسعين فى الميه من الى ممكن توصل للوضع ده

اعتقد ان ده ما بيكونش اول خطا لها واتمنى يكون ده اخر خطأ ليها

ماشي يا مجروحه ؟

ربنا يتوب علينا كلنا يارب

غير معرف يقول...

اي بنت بتسلم نفسها في اطار غير شرعي
او حتي شرعي بس في الظلام
بتكون كده كتبت اول حرف في كلمة الفراق
واول كلمه في سطر تعذيب نفسها
للأسف الشديد
الرجل يفضل يزن يزن لحد ما ياخد اللي هو عايزه وبعد كده خلاص........
وبلاش نكمل علشان الكماله مؤلمه حتي للي بيقروا!!!!!!!!

*البت المشمشية *حلوة بس شقية * يقول...

بنوتة مجروحة
ان الله غفور رحيم
يمكن اللى حصل ده
يبقا طريق هدايتك لربنا
صدقينى
ربنا بيسامح اوى
بس لو التوبة بجد
من قلبك
لو كان بيحبك
كان اتمسك بيكى لاخ ردرجة
متخافيش
ربنا هيرزقك بواحد كويس اوى
وانا عارفه ان ساعتها
هتاخدى بالك من نفسك اوى
الراجل من دول بيحب البنت تقولو لاء

بعبعه مدونتك حلوة ان شاء الله نبقا اصحاب

mimi يقول...

ربنا يكرمك يا بنتي أهو ده كلام يتعلق عليه ونحترمه

عندك حق في كل حرف

mimi يقول...

بعبع

أهنيكي علي مدونتك أنتي وكل الفريق

فشكووول يقول...

انا بقى بالرغم من التعليق الاولانى باسم عمرو مش عارف دى مدونة عمرو بك ولا مدونة حد شريك لعمر بك ... بس الموضوع فعلا بيحصل وبييجى من وراه كوارث وربنا هو اللى بيستر فى اغلب الحالات بس يا ريت حد ياخد الكلام ده ويجطه فى دماغه

تحياتى

mahasen saber يقول...

والله مواضيعكوا مفيده وبتفيد ناسكتير

ربنا يوفقكوا ويكتبها فى ميزان حسناتكوا

بعبعه يقول...

تصفيق حاد للجميع

اعترفات حبيبتى الى كانت مستخبيه تحت الكرسي

وعمرو الى منورنا دايما

وكل الناس الافاضل الى علقوا على الموضوع والى قالوا وردوا باحلى كلام

بعبعه يقول...

بالنسبه للمجروحه

اقولها انها تستحق تنجرح وجامد اوي

ولو ما فاقتش لنفسها هاتفضل كده طول عمرها الدنيا معلمه عليها

وما تلبيش الوش البريء وتقولي غرر بيا وكنت باعمل كده عشان ارضيه

انتى عملتي ده بمزاجك لومي نفسك قدر لومك له

كلامي صعب ؟

اوك بس لمصلحتك

بعبعه يقول...

مصري جدا

مع احترامي لحضرتك وللشيخ الشعراوي طبعا الى جايز حضرتك فهمت قصده كويس


حكم كتب الكتاب غير حكم الخطبه خالص

ومش مجال شرح دلوقتي

الخطوبه لها احكام

القران له احكام

الزواج الفعلي بمعنى الدخول بها له احكام

كل حاجه متحدده عندنا مش سايبه

نورت

بعبعه يقول...

فشكول

معقوله النوره الى هل علينا فى المدونه ده

المدونه دي يا سيدى الفاضل انا المؤسسه لها

عمرو واعترفات اتفضلوا شرفوني واشتركوا معايا فيها

منور يا باشا

بعبعه يقول...

اعترافات جابت معاها ناس كتير تقريبا كانوا مسخبيين تحت الكرسي برضه

على فكره حاجه بس عايزه اوضحها

احنا بنعمل كده مش عشان نحافظ على الخطوبه الميمونه

لا انا اصلا ما يهمنيش الحفاظ على النوع ده من الارتباط لانه قايم على الخطا اساسا

انما هى لما بتمتنع عن الخطا ده لاسباب تانيه كتير منها

اولا مخافة معصية ربنا
ثانيا تحافظ على نفسها وكرامتها


انما اقولها ما تسلميش نفسك لخطيبك اصل هايسيبك ؟؟!!!
مش دي هى المشكله بس

ممكن يتجوزها برضه بس يا ترى هو كده اصلا كويس

كويس انها تفرط فى نفسها لواحد استحل حرمات الغير وتتجوزه كمان

الا طبعا لو تابوا هما الاثنين وانابوا الى الله تعالى ده موضوع تاااااني

شكرا للجميع


يلا يا عمرو فين جديدك

اعترافات هانم يقول...

استاذ عمرو
~~~~~~~~~

ميرسي جدا لحضرتك وسعيده انها عوده قوية بس انا لما كتبتها بجد كان عندي حاله من اللخبطه من كتر اللي بنشوفها وظهرت في التعليقات كان امر الخطوبة عندهم زيه زي الزواج ولما بيسالو بيسالو عادي جداااا

انا شايفه ان اولا لازم تنشئة صح لان ولو نفرض انهم اتقابلوا برا صدفة هنا الاهل مش موجوده لكن تشئتهم هي اللي موجوده

وفي الا ول والاخر بنا يهدي المسلمين اجمعين

اعترافات هانم يقول...

مصري جدا

************

كتب الكتاب ممكن ياخدها بعدها ويتجوزو

لانهم اتجوزو قدام كل الناس مش ممكن يكونوا اجانب بس طبعا مش نديهم الكارت انهم يعملوا اي حاجه بس من حقهم يقعدوا سوا انا مش شايفه فيها مشكله وبصراحه اكتر انا هسال في الموضوع دا

اعترافات هانم يقول...

نفسي اكون

************

ميرسي جدا لكلام حضرتك ودي شهادة بعتز بيها
وياريت النصيحه دي كل الشباب يسمعها وتكون في قلبه وعقله لانه دايت تدان

اعترافات هانم يقول...

عاشقه وغلبانه

**************
اللهم امين بصراحه ايوه لانهم بيتعبوا لما بيسبوا بعض وبيحسوا بالذنب ربنا يحمي المسلمين ويسترهم فوق الارض وتحت الارض ويوم العرض عليه

اعترافات هانم يقول...

بنوته مجروحه

*************

رغم كم الكلام اللي مكتوب مش هقولك غير اننا دلوقت في رمضان وقربي من ربنا واستغفري من قلبك وان شاء الله ربنا غفور رحيم

"إن الله لا يغفر أن يشرك به و يغفر ما دون ذلك لمن يشاء".
"قل يا عبادي الذين أسرفوا على أنفسهم لا تقنطوا من رحمة الله".
وَإِذَا سَأَلَكَ عِبَادِي عَنِّي فَإِنِّي قَرِيبٌ أُجِيبُ دَعْوَةَ الدَّاعِ إِذَا دَعَانِ فَلْيَسْتَجِيبُوا لِي وَلْيُؤْمِنُوا بِي لَعَلَّهُمْ يَرْشُدُونَ

طبعا انا مش كتبت دول موعظه لكن ربنا العالم اني دمعت وانا بكتبهم لان فيهم شوق من الله لعباده بجد ربنا كبير وانا متاكده انك عاوزه ترجعيله توبي له واستغفريه وهو هيقربلك ليه وباذن الله هيغفرلك ذنوبك

وربنا يرزقك زوج صالح باذن الله

وربنا يسترك يااااارب فوق الارض وتحت الارض عليك

انا كان ممكن اهاجم لكن ليكي فرصه كبيرة اوي من ربنا وهي العشر الاوخر منه

اللهم انك عفو تحب العفو فاعفو عنا

اعترافات هانم يقول...

غير معروف اول

***********

انا معااااااااااك جدا في الكلام دا لان خلاص البركة راحت دي حاجه وحاجه تانيه الثقه بينهم انتهت

ربنا يستر المسلمين كلهم

اعترافات هانم يقول...

البنت المشمشيه

***********
اللي بيحب يابنوته بيحافظ علي حبيبته وبيخاف عليها مش بياذيها

بيكون شايفها اميرة مش مجرد شي بيمتعه ..

والمساله مش مساله الراجل بيحب والراجل مش بيحب المساله ربنا بيقول وربنا حرم وربنا حلل

نحط قدامنا ربنا مش الراجل ولا ايه ياقمر

اعترافات هانم يقول...

ميمي

*********

ميرسي ليكي ياقمر وربنا يهدي المسلمين يارب

اعترافات هانم يقول...

فشكول

*********

دي مدونة بعبه واحنا معاها وفعلا الموضوع دا نتائجه دمار للبنت ويارب يكون عظه للمسلمين

اعترافات هانم يقول...

محاسن

********

ربنا يخليكي ياقمر

ربي بيرو كويس عشان لما يخطب يحافظ علي بنات الناس وانا متاكده انك هتربيه كويس لانك اجدع ام شفتها

اعترافات هانم يقول...

بعبعه حبيبتي

**********
اهو طلعنا من تحت الكرسي وميرسي ياقمر علي كلامك وكومنتاتك

احبك اكثر من نفسى يقول...

فعلا الموضوع مهم جدا
لان الاغلبيه بيحصل ليهم كده
بس فى شئ حابه اوضحو ان فى بنات مش مخطوبين حتى يعنى مجرد واحده بتحب واحد بدون اى ارتباط ولا خطوبه ولا عقد قران وبيعملو الاكثر من كده
هحكى مثال لصديقه لى كانت معى فى الاكادمى تخيلو ولد واقف على عربيه فول ضحك على بنت من عائله مستواها المادى عالى جدا طبعا ده مش عيب ان واحد مش لاقى ياكل يحب بنت عايشه عيشه مختلفه عنه بكتير بس هو حبها لاهداف معينه بالاول ضحك عليها بكلام الحب وخصوصا انو شاب وسيم وبعدها بدأ يطلب منها فلوس ولانها كانت قريبه منى كانت تحكى لى بحكم انى متزوجه ويعنى تقدرو تقولو ان الزواج بيخلى عقليه البنت تكبر شويه وانها تقدر تفيد اكتر اول ماحكت لى عن الموضوع عارضتها بشده قالت لى علشان هو فقير يعنى وايه يعنى الفلوس ممكن تضيع فى ثانيه قولتلها ماشى نشوف النهايه بس ياريت بلاش يحصل جواز من ورا علم اهلك لانهم هيرفضوووووووووووه كل مره كانت تيجى تحكيلى فيها عن لقائهم كنت اطلب منها انها تنهى علاقتها مع هذا الشاب بعدها لم تعد تحكى لى شئ وقالت لى انها تركته وتحدث المفاجأه تأتى لى صديقتى الى منزلى وهى منهاره تخيلو ايه السبب لانهيارها
الهانم حااااااااااامل وهى مازالت تحتفظ بغشاء بكارتها طلبت منها تخبر اهلها ولكنها خافت جدا واقالت لى اريدك ان تتحدثى مع الشاب وتطلبى منه ان يتزوجنى لانها رفض ان يتزوجنى عندما اخبرته وقالى وانا اضمن منين انو منى شفتو بقا الشاب الواطى جدا وطبعا مكنش فى حل قدامها غير انها نزلت الطفل وفقدت غشاء بكارتها
فتخيلو معايا يابنات ان فى كتير منكم بيمارس الجنس بدون ان يكون جنس كامل ينفض به الغشاء ويحصل انك بقيتى حامل ساعتها هتعملى ايه وساعتها هو هيجى فى دماغو ان زى ماعملتى معاه عملتى مع غيرو نصيحه يابنات حتى لو مكتوب كتب كتابك عليه مالوش الحق انو يلمس اى جزء فى جسمك لان فى كتير جدا بينفصلو قبل الزفاف حتى لو كاتبين كتب كتاب
ياريت اللى بيعمل حاجه زى دى يفكر فى المستقبل لو اتجوزت وخلفت بنت وبنتها عملت كده ايه هيكون شعورك وقتها ومتنسيش احنا فى مجتمع شرقى يربطنا عقائد ودين واصول وعادات وتقاليد
وبالنسبه للاخت مجروحه ربنا بإذن الله هيرزق خير وهيعوض صبرك وتوبتك اكيد وان شاء الله ربك هيرزق بزوج يحبك فى الله ويعاملك معامله حسنه

اعترافات هانم يقول...

لا حول ولا قوة الا بالله

بجد كلامك صدمة كبيرة

حسبي الله ونعم الوكيل في اي حد يستهين بشرف الناس ويحاول يدنثه

ربنا يهدي الناس كلها ويصلح حالهم