الأحد، 20 سبتمبر 2009

عيد سعيد عليكم


كل سنه وانتم طيبين
.

الاسبوع ده اجااااااازه مافيش شغل بقى عشان العيد
..
بس انا قلت اجي اعيد عليكم


يارب يكون عيد سعيد عليكم وكله خير وبركه


ويارب ينعاد عليكم بالخير السنه الجايه ان شاء الله


وكل واحد يسيب العديه وهو مااااااااااااشي

السبت، 12 سبتمبر 2009

سن اليأس اٍسم غير دقيق

أيه هو سن اليأس عند المرأه ؟؟
ما هو مدلول و تداعيات هذا المصطلح اللى قد يراه البعض و أنا منهم به قسوه و غلظه عندما تخبر المرأه أنها قد صارت عضوه فى نادى سن اليأس اللى لا مفر منه ؟؟
و كيف نتعامل معه و هو أصلا موضوع شائك بل و ربما يكون مؤلما و موجعا لدى الكثيرات من النساء ناهيكم عن كونه مرحله جديده تماما فى حياة كل اٍمرأه ..
أشعر بالاٍطمئنان للتعربف العلمى القائل تحديدا بأن سن اليأس ما هو سوى اٍنقطاع الدوره الشهريه عند الأنثى لفتره زمنيه بتزيد عن 6 أشهر متواصله و أنه ظاهره طبيعيه بتحدث لكل نساء العالمين لما بتوصل المرأه لسن النضج الكامل لما بيكون عمرها من 45 ل 55 سنه .. مع الأخذ طبعا فى الاٍعتبار الفروقات الفرديه بين سيده و أخرى ..
سن اليأس ( و لا أوافق تماما على هذا الاٍسم ) بيبقى مرحلة بتنتقل فيه المرأه من سن الخصوبه لمرحلة عدم القدره على الاٍنجاب بكل ما يمثل هذا من صور قاتمه فى مخيلة الذكور عموما و الذكور الشرقيين خاصة و الذكور الصعايده على الأخص ..
السبب الأساسى فى فقدان المرأه لقدرتها على الاٍنجاب غالبا بيكون نفاد ( صحتها لغويا بالدال و ليس بالذال و هو خطأ شائع ) أعداد البويضات لديها و بالتالى بيتعطل المبيض و بيرفض اٍنتاج هرمون الاٍستروجين .. و بالتالى بتحدث للمرأه أعراض كتيره بتختلف قوتها و عنفها من سيده لأخرى تبعا للظروف النفسيه و الصحيه لها ..
يقال اٍن الأنثى لا تصل لسن اليأس مره واحده بشكل فجائى و لكن بشكل تدريجى .. يعنى فى الأول بتحصل لخبطه فى الدوره الشهريه فى السنه اللى بتسبق سن اليأس .. من أهم شواهد هذه اللخبطه أن تتباعد كل دوره شهريه عن اللى قبلها و اللى بعدها و غالبا بتحصل كل شهرين أو تلاته ..
الكثير من الأطباء بيعترضوا على مقولة عدم فجائية اٍنقطاع الطمث و بيقولوا أنه من الممكن جدا أن ينقطع الطمث بشكل فجائى بدون تدرج و بيكون أصلا منتظم لفترات طويله فى حياة الأنثى ..
السن مش هو لوحده السبب لحدوث ما يسمى بسن اليأس .. فيه أسباب تانيه كتيره نذكر منها على سبيل المثال :
- اٍستئصال المبيضين عن طريق التدخل الجراحى و غالبا بيكون السبب وجود أورام سرطانيه .. - توقف المبيض فى سن مبكر يعنى فى عمر أقل من 45 سنه عن اٍنتاج هرمون الاٍستروجين رغم وجود العدد الطبيعى من البويضات و السبب فى ده غالبا بيكون وجود مشاكل أحيانا معقده فى جهاز المناعه لما جسم المرأه بيكون أجسام مضاده بتهاجم المبيض و تقضى على وظائفه الطبيعيه ..
- العلاج بالمواد الكيميائيه اللى بتستعمل فى علاج السرطانات بتؤدى لتقليص نشاط المبيض شويه بشويه اٍلى أن يتوقف تماما عن العمل ..
سن اليأس له أعراض كثيره جسميه و نفسيه .. أحيانا قد تكون هذه الأعراض قاسيه على بعض النساء .. و أحيانا تمر بسهوله و سلاسه و لا تترك أى أثر نفسانى على صاحبتها ..
و أوجز أهم الأعراض فى الآتى :
- نسبه كبيره من النساء بيشعروا بسخونه و اٍرتفاع فى درجات حرارة الوجه و الرأس بصفه عامه .. و بيعرقوا بشكل مبالغ فيه و فى بعض الأحيان قد تستمر هذه الأعراض لفتره زمنيه قد تمتد ل 10 سنوات !!
- اٍختلال ملحوظ فى منظومة النوم الطبيعيه مصحوب بأعراض اٍكتئابيه و قلق مستمر و تعكر فى المزاج لأسباب قد تبدو صغيره و لا تستدعى حتى أن يلتفت لها ..
- ألم قد يكون غير محتمل عند الممارسه الجنسيه بسبب نقص هرمون الاٍستروجين و ده بيؤدى لقلة و ربما اٍنعدام الاٍفرازات المهبليه الطبيعيه اللى بتسهل حدوث العمليه الجنسيه و اللى نقصها بيسبب جفاف و ضمور فى الجدار المهبلى و ده بدوره بيؤدى لألم مضاعف ..
- بعض الاٍناث بيكون من ضمن أعراض الوصول لسن اليأس عندهم صعوبة التحكم فى البول بالذات وقت السعال .. و ده غالبا بيكون بسبب الضمور اللى بيصيب جدار المثانه و الاٍلتهابات المتكرره فى مجرى البول ..
- هشاشه العظام من أوسع الأعراض اٍنتشارا بين النساء اللى بيوصلوا لهذه المرحله من العمر بسبب قلة كثافة العظام و بتبقى عملية الهدم ضعف عملية البناء ..
و وجد أن النساء أصحاب البشره البيضاء أكثر عرضه للاٍصابه بالهشاشه عن النساء ذوات البشره السمراء .. و أن المرأه النحيله الرشيقه برضو أكثر عرضه للهشاشه من المرأه الممتلئه الجسم .. أمراض القلب و الشرايين بتزيد لما بتصل المرأه لسن اليأس لأن هرمون الاٍستروجين بيدخل فى عملية التمثيل الغذائى للدهون و بكده بيساعد على الوقايه من تصلب الشرايين و أمراض القلب فيجب الحرص و لزم التنويه ..
العرض النفسى الكامن فى أعماق المرأه لما بتوصل لهذا السن اللى فى رأيى لا يجوز أبدا أن يطلق عليه هذا الاٍسم الغير منصف هو اٍحساس المرأه بأن أولادها اللى أفنت عمرها فى خدمتهم و رعايتهم قد بدأوا فى الاٍنفصال عنها وجدانيا .. قد يكون هذا الشعور به شىء من الصحه و ده طبيعى بشكل ما لأنه من المؤكد فى هذه المرحله العمريه سيكون الأبناء و خاصة البنات قد وصلوا هم كمان لمرحله عمريه بيدأ فيها دخولهم لمرحلة الشباب بكل ما فيها من أسرار و غموض و اٍتفاقيات و تفتح على الأخر و قد لا يناسب كل هذا شعور الأم و أحاسيسها خاصة لو حطينا فى الاٍعتبار أنها أصلا بتمر بمرحله اٍنتقاليه صعبه بعض الشىء و يكفى أنه متعارف عليها باٍسم سن اليأس ..
الأم لما بينتابها هذا الشعور بيضخم لديها فكرة أنها صارت على هامش الحياه على مختلف الأصعده .. و بترى أن دور الأب قد تعاظم حتى طغى على دورها هى .. لأن الأب يظل ممسكا بمفاتيح الخزانه اللى بيظل الأولاد محتاجينها فى صغرهم و كبرهم و بالتالى بيظلوا محتاجين له .. على عكس دور الأم معاهم ..
وصول الأنثى لهذه المرحله السنيه و عدم قدرتها على الاٍنجاب لا يعنى أبدا عدم قدرتها على ممارسة الجنس و الاٍستمتاع به و اٍمتاع زوجها أيضا و اٍضفاء البهجه على كل المحيطين بها .. و ده تصحيح للفكره السائده لدى أغلب الرجال بل و النساء أيضا .. فلا يوجد ترابط مادى ملموس بين توقف الدوره و الممارسه الجنسيه ..
و المرأه بشكل طبيعى فى حاجه دائمه لاٍحساس الأمان و الطمأنينه و الموده و بيتضاعف لديها الاٍحتياج لكل ده أثناء مرورها اللى أرجو أن يكون عابرا بهذه المرحله الاٍنتقاليه المهمه فى حياتها و قد تكون العلاقه الحميمه عامل مادى مساعد و مفيد فى حصول المرأه على أحاسيس الأمان و الطمأنينه اللى هم بمثابة الماء و الهواء لأى اٍمرأه ..
ده بيستلزم تفهم كامل للموقف و طبيعته الحساسه من كل المحيطين بها و خاصة زوجها اللى لابد أن يكون متحليا بالصبر و طولة البال حتى يجتاز الجميع هذه المرحله بسلام ..
و تقبلوا تحياتى ..

الأحد، 6 سبتمبر 2009

يادبلة الخطوبة عقبالنا كلنا

السلام عليكم ورحمة الله وبركاته

بدانا بالسلام حلو وفل اوووووووووي ازيك يابعبه ياقمر ازيك يااستاذ عمرو

طبعا بعد الاتهام الفظيع المريع اللي اتهمتهولي بعبه وهو اني مستخبيه تحت الكرسي

قلتلها لا مش مستخبيه بس في حاجه اسمها حياء والحياء دا بقي انا شيفاه كل الجمال مش نصه بس

والرسول عليه افضل صلاة واذكى سلام قال اذا لم تستحي فافعل ماشئت حلووووووووووووووو اوي


وطبعا انا متاكده ان المعلومات اللي قلتوها وفتحتو النقاش فيها افاد ناس كتير جدا لكن في نفس الوقت ظهر مؤشرات ترررررررررررررعب اوي

او بمعني ادق فتح عيني علي مفاهيم بجد بجد ربنا يستر امة محمد ولا يفضحها ويهديهم ياااااااااااارب

انا رغايه كدا ليه تعالي ندخل في المفيد

طبعا انا لا هعمل بوست مضخم ومفلطح وعريض المنكبين ولا الحاجات دي انا عاوزه ابعبع

معاكم الله هي مش بعبه بلوجارية ومن حقنا نبعبع كلنا

من عنوان البوست اسمه يادبلة الخطوبة

كل شاب كل بنت مهما عدا العمر عليه او عليها نفسه في اليوم اللي يخطب بنت وبعد كدا يتجوزها

والبنت نفسها ترتبط وتتجوز وتعيش سعيده

لان اللي برا موضوع الجواز فاكر انه لما هيتجوز الحياه هتكون وردي ومش في مسئولية بالعكس بقي انا خايفة

وشايلة هم الجوزا دا من مسئوليته وبدعي ربنا انه لما يرزقني بزوج صالح انه يدرني علي تحمل مسئولية الجواز


نرجع لمرجوعنا وطبعا للحاله المادية المترديه في الفتره دي الخطوبة بتقعد سنه واتنين وتلاته


بس عادي مش مشكله الحياه صعبه اه لكن مع الحب والود بتبقي خفيفه وهينه

مش مهم كل الكلام اللي قلته فوق دا

الاول عاوزه اقول يعني ايه خطوبة الخطوبة وعـــــــــــــد بالزواج فقط

تعالو بقي افرضي انتي مخطوبة لواحد دلوقت وبعد كام شهر كدا جه باباكي وجاله واحد دخل مزاجه مش يقدر

بسهوله يجوزك له حتي من غير مايبلغ اللي خاطبك بدا وساعتها يبقي ادا صابونه للاولاني

انا مش بتكلم في نقطه نداله ولا اي حاجه انا بتكلم في امثال

باباكي يقدر ولا ميقدرش لكن لو انتي مكتوب كتابك وجه باباكي جاله واحد احسن يقدر يكتب كتابك علي

واحد تاني دا يروح السجن لييييييييييييييه لانك متجوزه واحد بالفعل

يبقي كدا الخطوبة مش فيها اي حاجه تثبت انكم متجوزين وانكم اجانب علي بعض

عارفين ياعني ايه اجانب يعني لما تتقابلو لازم اخوكي او باباكي او عمك او اي محرم يقعد معاكم

وعارفين بقي ان لو في كلام حب اتقال بينكم او الكلام اوفر شويه دا بيقلل من البركة لما بتتجوزو وبيكون في مشاكل

ياربي انا كل دا بقول في كلام

امال البوس والحضن والمعاشرة اللي من غير فض غشاء بكارة دي تبقي ايه ملهاش غير مسمي واحد

زنا والزنا درجات

انا بنت زيكم ومن سنكم علي فكرا وارتبط بس قسم احلف بيه ان عمره ماقعدت انا وهو لوحدينا وعمره مافكر

يلمس ايدي مش لاني انا رفضت او كدا لا لانه كان بيحترمني وشايفني غاليه

طيب تعالي نحلل الموضوع شويه واحده مثلا بتحب واحد وهو بيحبها واتخطبوا وخرج معاها ومثلا لمس ايدها

وهي وافقت وشويه يحط ايده علي كتفها وشويه وفي لحظه تجلي ياعبدالمتجلي اخد بوسه وهي هتتمنع

في اول بس مره علي مره هتتعود والبوسه هتجر حاجات تانيه

تفتكري انها لما قبلت التنازلات دي بينه وبين نفسه هيكون مطمنلها بلاش هو هيبقي شايف انها بتحبه

وبلاش رجعيه زي مابسمع تفتكري ربنا هيكون راضي عنهم وهما بيغضبوه

طيب لو رفضت وقالها انتي مبتحبنيش انتي وانتي وانتي وهوووووووووب مشي

في ستين الف داهيه عارفه ليه لانه لو كان صالح حياتك الزوجيه هتمر من المطبات بفضل ربنا وقربكم

ورغبتكم انكم ترضوه وتقربوه منه

اما بقي لو فعلا جواه خير ولما لاقاها رفضت وفاق ان دا غلط هيحترمك وهتزيدي غلاوه في نظره

ومفيش بت تقولي انا خايفه ان لو عملت كدا يبعد وانا مقدرش علي بعده وانا اتخرت في الجواز

ولا مين هيجيني تاني او انا عندي رغبه مكبوته اللي مع ربها عمر ما الهم هيقربلها

والجواز رزق من ربنا زي المال زي البنون زي اي حاجه وكل شي مكتوب ومقدر معروف من وانتي في بطن امك

هتيجي امتي واسمك وهتموتي امتي وفين وحياتك ازاي وكل شي يبقي ليه تخافي واللي جاب دا يجيب احسن منه

وانا ماشيه في المترو سمعت الكلمة دي باللفظ واحد بيكلم واحد بصوت علي وبيقوله احمد خطب التاني يقوله

المجنون في رمضان امال هيبوس ويحضن ازاي

انا صعقت كان نفسي اقول ايه ليه هو قال احمد اتجوز دا قال خطب يعني مش من حقه اي شي

غير انه اخد وعد من والد خطبته ان لو في نصيب بينهم هتكون ليه

نيجي بقي اللي وصلوها لمعاشرة لكن بيحافظو علي لبكارة لا والله يعني هو دا دليل العفه

لا حول ولا قوة الا بالله

اتقوا الله في اللي بتعملوه مش خايف لما تخطب واحده وتعمل معاها كدا وتيجي تتجوز بنتك خطبها

يعمل معاها كدا هتقبل دا

صونوا نفسكم دا اللي هقدر اقوله

وكفايه بعبه بقي لاني اتغميت من البوست دا ربنا يهدينا كلنا ويسترنا جميعا






الأحد، 30 أغسطس 2009

رساله من m


طبعا اليومين بتوعي طولوا شويه معلش بقى رمضان كل سنه وانتم طيبين


جاتلي الرساله دي يا جماعه من الاخ m من فتره طويله بس احنا كنا مستغرقين فى مناقشات ورا بعضها ما كانش فى فرصه انى انشرها


و m هو شاب عنده 18 سنه واتفضلوا نشوف قايل ايه فى رسالته نصا


السلام عليكم


ازى حضرتك يا استاذة بعبعة؟وازى استاذ عمرو واستاذة اعترافات ؟


انا بتابعكم من زمان من ساعة مافتحتم بس من بعيد لبعيد


شفت مدونتكم بعبعة بالصدفةالحقيقة مدونة جميلة وربنا يكرمكم بجد ويمكن الناس يتصلح حالها على ايديكم


انا ممكن احكيلكم تجربتى مع المراهقة وكل حاجة عنها لو حبيتم


وممكن اكلمكم عن احاسيس الذنب والنشوة والاكتئاب والتوهان والحوارات دى كلها اللى بتحكو عنها


بس انا هأجل الموضوع شوية


كنت عايز اقول حاجة صغيرة بس انتم كنتم بتقولوا ان المراهق ممكن يكون عارف حاجات الكبار نفسهم ميتخيلوش ان يعرفها


عايز اقولكم انكم متعرفوش حاجة خالص من اللى احنا نعرفها ولو قلتلكم حاجات انا عرفتها وانا عندى 13 و 15 سنة ممكن تموتوا فيها

اقولك على حاجات على سبيل المثال لا الحصر ؟


بداية من الرعشة بتاع الستات وبتحصل ازاىوايه المناطق اللى بتثير المرأة وايه المناطق اللى توصلها لقمة الاثارة والاورجازم

وطبعا ممكن اكلمك على جسم المرأة احسن ماهى تتكلم عنه

وعن صوت القضيب وهو بيدخل فى المهبل كزا مرة ورا بعض وانه بيبقى عامل زى صوت السقفة وعن ايه اللى يخلي المرأة ترقع بالصوت الحيانى زى فى الافلام السكس


وانه كل الستات مش زى بعضها فى مناطق الاثارة


واننا لازم نكون بالراحة ليلة الدخلة مع الزوجة علشان متتخضش وتبقى كويسة وميحصلش تشنجات مهبلية واننا لازم نبدأ ابالحوار والمداعبة والملامسة وفى الاخر ندخل عالجماع

تعرفى اننا بقينا نتكلم بالعلم والطب فى الحوارات دى مش مجرد بنثير بعض .. لابنتناقش ونتحاور ونعرف المعلومات الجديدة والقديمة عن المواضيع دى؟

يعنى بقينا عارفين الامراض التناسلية واعراضها وعلاجها ودورتها وايه اللى يقلل منها وازاى نقى نفسنا منها وحاجات كتير وكتير

بمعنى اصح احنا ممكن نشتغل دكاترة وعلى فكرة كل ده معرفناهوش من افلام السكس ابدا


كلنا عارفين ان الافلام دى كلها فبركة والسلام وتهييس وحاجات غبية ولا حتى عمرنا نمنا مع ستات ولا عملنا حاجة حرام

كل ده من حكاوى الناس اللى جربت من حوالينا

فى ناس متجوزين بيحكولنا الحوارات دى تصورى !

وغصب عنك بتسمعى الفضول قتل القط ..مش كده ؟


وطبعا غير ان حاجة بتقرأ تقع تحت ايدينا وبتتكلم عن المواضيع دى كنا بناكلها من كتر القراية


وعايز اقولك ان صعب الواحد يحكى لأهله حاجات زى ده

لأن الواحد بيبقى فضولى وعايز يعرف تانى وتالت ومليوون


انا مش عارف ايه اللى خلانى اكتب الرسالة دى من اساسه انا بس اتخنقت من كتر ماالناس مش حاسة بينا وفاكرينا حيوانات وماشيين ورا اعضائنا التناسلية


مش قصدى على نفسى لوحدى انا بكتب الرسالة دى بإسمى وبأسم كتير من الشباب اللى ملقاش حد ينصحه الا متأخرالمراهق


غلبان وربنا وغصب عنه

تعرفى ان اما بنمارس العادة مش بنمارسها كمجرد تفريغ طاقة جنسية لأ لو متضايقين ممكن نمارسها لو مخنوقين


ممكن برده لو غضبانين بنمارسها

حاجة بتخرج اللى جوانا والسلام


زى اللى مخنوق وبيشرب سجاير مع كل نفخة دخان بيخرج الزهق اللى فيه


عارفين بنوقفها امتة ؟


اما بنكون فرحانين او حد مشجعنا او عملنا حاجة ترفع من معنوياتنا وحماسنا


وده طبعا بيحصل كل سنة مرة لأن على طول احنا متكدرين ودايما الكبار يعلقو علينا وخد تعالى وروح


غير ظروف البلد والواحد نفسه يحقق حاجات كتير واحلام وده بيشيل الواحد هم وهو صغيرطبعا هتقولو ايه الكلام الاهبل ده على كده كل المراهقين شعراء وفلاسفة؟


هقولكم لأ طبعا متبوصوش للعيال اللى بتسقط البناطيل وتحط جل على الشعر وتبين البوكسر وماسكين موبايلات اخر موديل لمجرد التباهىدول حالات شاذه

او بيحاولو يكونوا


اللى انا بتكلم عليهم دول وانا منهم ناس ليها طموح والبلد والدنيا مش مساعدة


على فكرة احنا مش فقراء او كده الحمدلله محدش بينام جعان


بس صوابعك مش زى بعضها ولا المراهقين زى بعضهم

هتقولو فين الأهل من كل ده؟

هقولك من كل عشر مراهقين بتلاقى واحد ولا اتنين بالعافية اهلهم ممكن يحكولهم كده ويثقفوهم ومش بيحكو كل حاجة طبعا والباقى فس !

طبعا العيب مش على الأهل ابدا بس هم اتربو فى زمن كان كويس ومكنش فيه الفجور ده

بالتالى صعب عليهم نوعا ما انهم يواجهو مواقف زى دى

وطبعا انتو واهلنا غلابة مجربتوش ولا هتجربو اللى احنا فيه اللى انتو جربتوه ميجيش واحد على مليون من اللى احنا جربناه والباقى عرفتوه اما تزوجتم

انما احنا بقى لو اتجوزنا هنبقى خبرة اوى اوى اوى وهنعرف نتعامل صح هههههه


عارفين زى مابيقولو ايه هى فايدة الفشل والضياع؟

الخبرة

انك تقدر تساعد اى حد بيمر باللى فشلت فيه

وتاخد بإيده وتخرجه

انا الأخ الأكبر وعندى 18 سنة وليا اخ صغير 15 سنة

وطبعا لازم يمر بالمراحل اللى مريت بيها

وبما انى فضلت انى اجرب عن انى اسمع واتعظ من ابويا

فأنا الحمدلله على قد ما اقدر بأنصحه وبيلاقى كلامى صح ويجي يشكرنى

ابويا نفسه بقى مش خايف على اخويا من الناحية دى لأنه عارف انى ماسكه كويس وفاهمه وبنظرة واحدة اعرف هو بيفكر في ايه

ومش بشد عليه لو مارس العادة مرة ولا حاجة لأنى عارف انه وحش جواه وعايز يخرج


لأ بنصحه واقوله اخطارها وخليته ينزل يلعب رياضة ويحفظ قرآن ويشيل حديد ويشغل نفسه بمليون حاجةعلشان ميفكرش كتير فى العادة

طبعا مدمن العادة احسن واحد يكلمك عن اضرارها وبالتفصيل وبالكلام االعلمى والطبى والدينى لدرجة ان ابويا واخويا بيبقو قاعدين حسين نفسهم مع دكتور

انا دلوقتى فى كل صلاة بدعى ربنا يحمى اخويا واللى زيه ويبعدهم عن الحرام وميخلهموش يمشى فى طريقى ومش يخليهم يبقو زيى

ولا زى الناس اللى بحكى عنها

تفتكرى لو انا مكنتش مارست العادة وعرفت كل الحاجات دى كنت هقدر اساعد اخويا؟؟او اوعيه ؟

اهلنا لم يمرو باللى احنا بنمر بيه

علشان كده معذورين ومش عارفين يلاقو منين ولا منين شغل ولا مصاريف ولا ايه بالظبط ربنا يكرمهم يارب ويساعدهم ويدخلهم الجنة

الواحد بجد يبقى حيوان لو قال انه اهله السبب

انا السبب المراهق السبب المراهق قط والفضول قتل القط


واسف عالتطويل واسف ان الرسالة ملخبطة اوى كده وفى كذا اتجاه وده لأنها نقطة فى بحر من اللى انا عاوز اقوله


ربنا معانا جميعا

=================================


دى كانت نص رسالته وانا طبعا رديت عليه من خلال الاميل لكن هارد عليه هنا عشان كمان تشوفوا الرد وتقولوا رايكم



يا m انت جدع ما شا ء الله بس انا ليا شوية اعتراضات على كلامك



أولا عايزاك تعرف وتتاكد برضه ان المعلومات الى عندك دي مش لازم تكون صح ميه فى الميه امثلتك الى انت قلتها فى كلام مش حقيقى بس مش مجال لمناقشته دلوقتي


مين قال ان احنا نكره انكم تعرفوا وتتعلموا وانتم فى السن ده ؟؟ بالعكس طبعا


المهم تعرفوا وتتعلموا منين ومن مين مش اي واحد متجوز هايقولك كلام صح


ليه ؟ اولا لان فى فروق فرديه وخبرات شخصيه مختلفه تخلي دماغك غير دماغ اي احد وجسمك غير جسم اي حد وبالتالي حياتك وتجربتك غير اي حد


وكمان لان نص الرجاله ولله الحمد فى الموضوع ده بالذاااااات فشارين حلو اوي وبيحبوا يعملوا نفسهم خبره اوي اوي اوي


فمش عايزاك تعتمد على معلوماتك الى واخدها من بؤ اي حد كده


ثانيا : مش عاجبنى نغمة احنا بنمارس العاده السريه عشان ضغط الاهل عليكم وحال البلد والكلام ده مش عايزه شماعات عايزاك تكون انت والشباب كلهم تحاسبوا نفسكم قبل ما تحاسبوا اي حد .

وشايفه انك بتتكلم على انك ضايع وكلام كبير اوي كده هل كل ده عشان ممارسه العاده السريه فقط ولا فى بلاوي تانيه؟


طيب هاقووول تاني العاده السريه فيها اختلاف فى الراي فى درجة حرمانيتها وفيها كلام كتير اتكلمنا عنه قبل كده

لكن الى مافيش عليه خلاف هو ان الافلام والصور وكل السكه دي هى الى حراااااااام فبطلوا الاول الى مافيش عليه خلاف وبعدين نتفاهم فى الباقي


لكن برضه ابص بعينى التانيه للاهل واقولهم خلوا بالكم من عيالكم ارجوكم


ثالثا : مين بقى ضحك عليك وقالك ان فايدة الضياع الخبره ؟؟


طبعا الى غلط غلطه لو كان عنده مخ هايتعلم منها عشان كده مش شرط طبعا انى الى يغلط غلطه يتعلم منها


وكان ممكن انت تنصح اخوك وتقف جمبه لو كنت سمعت النصح وقريت واتعلمت وفهمت قبل ما تكون انت نفسك صاحب المشكله .


رابعا :خلي بالك الرياضه والقرآن والانشغال ده يكون كويس معاك برضه ما تفتكرش انك عديت المرحله دي


ولو كنت مؤمن فعلا بالكلام الى بتقوله لاخوك اولى انك تطبقه على نفسك مش تقول خلاص بقى انا وقعت والى كان كان


خامسا : الاهل معذورين عندهم مشاكل كتير وعليهم ضغط كبير اوك معاك لكن مسؤليتهم انهم يقروا ويتعلموا ويتكلموا معاكم ويفهموكم لا هما مش معفيين من المسؤليه زي ما بيروحوا يسألوا من احسن مدرس كمياء فى البلد وينحتوا فى الصخر عشان يدوكوا ثمن الدروس عشان تجيبوا مجموع ولا تنازل ولا استسلام لازم كلية القمه


كمان نقدر نعمل كده فى التربيه من جميع النواحى ونعتبرها من اولويتنا والى ما نعرفوش نسأله فيه ونتعلم عشان نعرف نربي عيالنا .


وربنا معاك يارب انت وكل الى الشباب ويصلح حالكم ويهديكم للصواب دايما



يلا سمعوني رايكم يا جماعة الخير

السبت، 22 أغسطس 2009

جسدي مشكلتى ... من بارقة نور


احبائي المدونين وزوار المدونه كلهم


كل سنه وانتم طيبين ورمضان كريم وربنا يتقبل منا ومنكم ان شاء الله صيامنا وصالح اعمالنا


الحقيقه الاستاذ عمرو بيعتذر عن البوست بتاعه النهارده لانه مشغول شويه ومنفضلنا


فانا قلت نعرض مشكله من المشاكل الى جاتلي على الاميل بعد ما اخدت اذن صاحبتها طبعا


تعالوا نشوف مشكلة صديقتنا الى هى سمت نفسها بارقة نور



السلام عليكم ورحمة الله وبركاته

عزيزتي بعبعة
أحييكي على مدونتك الرائعة
قرائتي لمدونتك شجعتني على أن أحكي لك مشكلتي عسى أن أجد عندك حلا لها


منذ صغري أعاني من سخرية قريباتي وتعليقاتهن السخيفة على جسدي
جسدي نحيف مثل عائلة أبي
ولم أرث شيئا من عائلة أمي لا شكلا ولا مضمونا
وعائلة أمي كانت مصدر السخرية الدائم
لأنني لست ممتلئة ولا أملك "مظاهر أنثوية" وأظنك تفهمين ما أعنيه بالمظاهر الأنثوية
لم أكن أعرف ماهي المشكلة في أن اكون نحيفة خاصة وأنا أرى الجميع يسعون للتخسيس وليس العكس
وكيف أتصرف وهذه هي طبيعة جسدي وليست شيئا بيدي

بدأت أكره نفسي
خالاتي وبناتهن كن يقلن لي أنني لن أعجب زوجي
وأن ركبتاي نحيفتان ويذكرن دائما اسودادهما واسوداد المنطقة تحت عيني
جربت أخذ ملعقة عسل يوميا لمدة شهور
وجربت مغذي حول العين كيميائي وآخر طبيعي
ولم يختف السواد
صديقتي كانت تحكي لي عن أخيها الذي تزوج فتاة نحيفة وقالت لي إنها لا تملأ عينيه

كل ذلك ساهم في خوفي الشديد الواصل مرحلة الرعب من الزواج
وعدم قدرتي على تحمل مجرد احتمال ألا أعجب من سيشاركني حياتي
وألا "أملأ عينيه" وقلبه

تحمليني قليلا لأكمل لك وسوستي الشديدة في موضوع النظافة
لدرجة استخدامي الكلور والديتول باستمرار حتى مع حساسيتي من المنظفات
لكني بقرف جدااااااااا
مما يصيبني بهستيريا
تجعلني أرفض كل من تقدموا لي لأسباب غير حقيقية
لا أعرف هل تعرضي للتحرش في صغري سبب كرهي للذكور
أم ما أراه وأسمع عنه ممن حولي عمن هم ذكور وليسوا رجالا
أم هو خوفي من أن يراني رجل بجسدي الذي أخجل منه

هل أبقى كما أنا حتى لا أظلم أحدا معي ؟

تحياتي

بارقة نور



ده كان نص رسالتها


والحقيقه انا رديت عليها فى اميل هاقول ردي باختصار


هو انها ما تسألش عن الناس دي لانهم حتى بينقدوها بطريقه سخيفه وطبعا مش كل الناس زي بعضها


ودايما انا باقول جايز يكون الجمال عموما مهم لكن مش اهم حاجه لا فى الحياه ولا فى الجواز والحب


ياما الواحد شاف واحد متجوز واحده وبيحبها وبيموت فيها والواحد يقول فى سره سبحانه مقسم الارزاااااااق


والعكس ياما رجاله ستاتهم ملكات جمال والحقيقه بيبقوا مش طايقيين يبصوا فى خلقتهم


وكل فوله ولها كيال زي ما بيقولوا فى الامثال


لكن طبعا انتى ممكن تروحي لدكتور لعلاج النحافه وبرضه حكاية السمار تحت العنين
وكمان الوسواس
وحتى لو كان التحرش القديم الى ما نعرفش تفاصيله فما نعرفش ممكن يكون اثر عليكى ازاي
برضه له علاج لو كان اثر عليكى


هانستنى نسمع راي الدكتور عباس الاول بقى تابعي التعليقات


والحقيقه بارقة نور كانت ردت عليا فى رساله تانيه والى فهمته منها يا جماعه ان الموضوع مش نحافه فقط موضوع انها شايفه ان المناطق الانثويه عندها هى الى اقل من الطبيعى .


وانا كنت قلتلها حاجه عشان تريح نفسها من الهاجس ده خلاصة الامر يعنى :


سيبك منهم وما تخليش كلام ناس هبل يزعزعوا ثقتك بنفسك

ولما يجيلك واحد يتقى ربنا وشافك ورضى بيكى
خلاص هو عاجبه الجثه بقى انتى مااااالك

كل واحد بياكل اللقمه الى على هواه


عايزه اسمع رايكم بقى فى الموضوع


وان شاء الله يومين كده وهانزل برضه رساله من الصديق (m) هو حابب انكم تقروها وتقولوا رايكم ان شاء الله



السبت، 15 أغسطس 2009

الجماع فى الدبر



الجماع فى الدبر او فى فتحة الشرج


موضوع ما كنتش متخيله ابدا انه فيه لغط فيه كتير ومحتاج نتكلم عنه حيث ان حرام فعلا ومش محتاج نناقشه وحتى مضاره الصحيه الناس عارفينها


لكن الحقيقه من خلال الاميلات والردود على المدونه هنا والاساله الى اتوجهت لنا لقيت ان فى نقط ما زالت محتاجه اننا نتكلم فيها

انا هاتكلم فيها الاول من الناحيه الشرعيه

طبعا انا هنا مش دار فتوى ولا حاجه ولا اقدر اكون

لكن انا عشان بس امانة الرأي انا دورت فى الموضوع وسألت ناس وقريت راي علماء كتير
والراي الى توصلتله ان الجماع فى الدبر حرام فعلا وفى احاديث صحيحه وارده فى الموضوع ده

ده واحد اهو

قال رسول الله صلى الله عليه وسلم

لا ينظر الله إلى رجل أتى رجلا أو امرأة في الدبر
حديث حسن (يعنى فى حكم الصحيح ) بروايه عبدالله بن عباس
صحيح الترمذي


فى كمان واحد

روى خزامه بن ثابت
أنه صلى الله تعالى عليه وسلم سئل عن الوطء في الدبر ؟ فقال : في أي الخربتين ؟ أمن دبرها في قبلها فنعم ، أم من قبلها في دبرها فلا ، إن الله لا يستحي من الحق لا تأتوا النساء في أدبارهن
حديث اسناده صحيح
المصدر : خلاصة البدر المنير

وانا شايفه ان اكبر دليل فى الموضوع كله الايه الكريمه الى نزلت فى الجماع والى انا باعتبرها مدرسه لواحده فى الجماع

نسائكم حرث لكم فاتوا حرثكم أنى شئتم

حرثكم : هى موضع الحرث . يعنى الجماع باي شكل كان المهم يكون فى موضع الحرث ( الفتحه التناسليه )

للامانه فيه اراء فقهيه بتبيح الجماع فى الدبر لكن الحقيقه انا قريتها لقيتها ضعيفه جدا وشاذه

وحتى ان فى بعض الاراء بيلزقوها فى عبد الله بن عمر والى لما دورت فيها قابلنى ده الى هو
راي عبد الله ابن عمر فى الجماع فى الدبر

عن ابي الحباب سعيد بن يسار :
قلت لابن عمر ما تقول في الجواري أنحمض لهن قال وما التحميض فذكر الدبر فقال وهل يفعل ذلك أحد من المسلمين
المحدث ابن كثير فى كتاب تفسير القرأن باسناد صحيح

خلاصه الامر ان انا فعلا فعلا ما لقيتش اي اراء قويه ولا مقنعه ابدا تقول ان فى حتى شبهه ان الجماع من الخلف حلال
بالعكس كل الاراء بتؤكد انه حرام فعلا

خلاص خلصنا كده من الحكم الشرعي

ثانيا
من الناحيه الصحيه :
اولا بالنسبه للزوج
المكان نفسه الى هو بيجامع فيه بيكون مش نضيف لان مكان خروج البراز الى مليان مليون حاجه ممكن تجيبله امراض حتى لو استعمل الواقيات الذكريه فده برضه شيء مش مضمون لانها ممكن تنقطع وده وارد وشائع جدا
غير انه بيتعود فعلا على حاجه مش طبيعيه ممكن تخليه يفقد استمتاعه بالجماع الطبيعى فى الفرج

بالنسبه للزوجه بقى عد معايا
اولا فتحة الشرج عندها بتتبهدل ولو استمر الجماع فى الدبر فتره طويله ومع عدم حرص وارده فى لحظات الاثاره القصوى عضلة الشرج بيحصل لها ارتخاء لدرجة ان فى ناس بتوصل معاهم انهم ما بيتحكموش فى عملية الاخراج
ثانيا : لو حضرته اتنقل من الجماع فى الدبر للجماع فى الفرج ده ينقلها بلاوي سوده طبعا
ثالثا : هى كمان هاتتعود على نوع جماع مخالف للطبيعه زي ما قلنا بالنسبه للرجل

نيجى بقى للحلول

دلوقتي انا قابلنى مشاكل من الطرفين

يعنى الزوجه الى عايزه جماع من الدبر وزوجها مش راضي
والزوج الى عايز جماع من الدبر وزوجته مش راضيه
والى عايزين وخايفين من الحرمانيه
والى بيتهببوا بيعملوا كده اصلا وبرضه محتارين

طيب خلينا الاول نقول ونوضح للجميع ان منطقة الشرج دي متصله بشكل ما باللذه الجنسيه عند الجنسين على فكره ست وراجل
وفعلا هى عند بعض الناس منطقة اثاره قويه جدا برضه للجنسين
فمش مشكله اننا نستخدمها للاثاره والوصول للذه المطلوبه لكن من غير ايلاج
ازاي ؟
ممكن اوي هنا نكتفي بالمداعبات للمنطقه دي دون الايلاج في الشرج فعلا .

المداعبات زي تدليك فتحة الشرج للست مثلا بالايد او بالقضيب من الخارج مثلا
او حتى مداعبه بالاصبع من الداخل قليلا

وزي كمان الايلاج بين الاليتين وده بيدى لذه قريبه جدا من الايلاج فى الشرج بالنسبه للطرفين

واحب هنا اوضح ان الشرج كمان منطقه قد تكون مثيره جدا بالنسبه للرجل مش للست بس (برضه مداعبات خارجيه بس مش حاجه تانيه ).

سامعه واحد بيقول وليييييه كل ده ما الجماع العادي حلو وميت فول وسبعتاشر اهو

معلش يا جماعه احنا بشر وفى فروق فرديه وخصوصا فى موضوع الجماع واللذه الجنسيه

غير ان فى حالات زي الاخت الى كانت فى الردود الى قالت انها كانت بتمارس الجنس من الدبر لكن بطلته بس هى لسه راغبه فى وبتطلبه من زوجها

ولما سألت دكتورنا العزيز عباس الاول قالي ان فتحة الشرج حواليها خلايا حسيه مرتبطه باللذه الجنسيه فعلا وهى بممارستها السابقه نشطط الخلايا دي وعليه هى مرتبطه معاها بحاجه جنسيه هى متحتاجه تشبعها
فى الحاله دي يبقى الحل الى احنا مقترحينه ده حل كويس اوي ان شاء الله ويحل المشكله دي عندها

انا بالبوست ده باوضح بس بعض النقط فى الموضوع ده عشان حقيقى اتسألنا فيها اكتر مما كنا نتخيل
اتمنى اكون افدتكم وما اكونش طولت وتقلت عليكم
وايه اصلا لما اتقل عليكم تستاهلوا حتى
وخالص شكري وامتناني لعباس الاول المستشار الطبي بتاعنا عشان هو ساعدنى كتير فى البوست ده

الجمعة، 7 أغسطس 2009

لحظات لذيذه يعقبها الندم !!

طب انا مش متجوزبس همووووووت واتجوز ياجدعاااااااااااااااااااااااااااان تشنج مش تشنج هاتوها بس وانا هعالجها الواحد تعبان بجد ولولا انه ماسك نفسه كان زنا
07 أغسطس, 2009 05:34 ص
ده كان تعليق على البوست اللى قبل ده الخاص بالتشنج المهبلى المرسل من أختنا الفاضله بعبعه و قد وصل من شاب يبدو أنه زيه زى الملايين غيره من الشباب يكاد ينفجر من الكبت و الشوق لرائحة أنثى .. و ده كان رد بعبعه عليه :
غير معرف الاخير
ما تستسهلش الكلمه الى لسانك يا ابنى وقول ربنا يرزقك زوجه صالحه تكون زادك فى الدنيا وطريقك للجنه ان شاء الله ادعي ربنا وبطلوا تتفرجوا على زفت وبعدين تعيطوا من الوجع امشوا زي ما ربنا قال غضوا البصر واتقوا الله كده وصوموا وصلوا وكمان اجتهدوا عشان تتجوزوا بما يرضى الله
07 أغسطس, 2009 12:36 م
طيب و الله كويس ..
تعليق الشاب ده و رد أختنا بعبعه حيفتح باب للكلام فى موضوع كان بيراودنى من فتره و هو خاص بما يمكن أن يصيب الشاب أو البنت جراء الممارسات الجنسيه غير الشرعيه و اللى للأسف أصبحت متاحه و متوفره بأشكال متعدده فى المجتمع لأسباب ليس هنا مجال مناقشتها ..
المولى سبحانه و تعالى لما وصف الزنا من فوق سبع سماوات بأنه فاحشة و ساء سبيلا ماكنش معروف بالتأكيد فى الوقت ده الأضرار الصحيه الجسديه و النفسيه اللى بتصيب الشخص جراء هذه الفاحشه اللى كانت سائده فى العصر الجاهلى المقيت و لما تطورت العلوم و أساليب التحاليل تبين بوضوح مدى صدق و اٍعجاز هذه المقوله الربانيه اللى لم يرد بها سوى الخير للاٍنسان ..
مش حأتكلم النهارده عن الزنا من وجهة النظر الدينيه لأن ده أمر مفروغ منه .. و هناك من هم أقدر منى على التحدث عنه من هذا المنظور .. لكن حأتكلم عن بعض الحقائق اللى ممكن تكون مفيده للتذكير بأضراره الصحيه و الاٍجتماعيه و النفسيه اللى بتصيب من يقترفه ..
أنا عن نفسى شخصيا عايشت حالتين أصيبتا بكارثة الاٍصابه بالمرض بسبب الزنا .. واحده فى صغرى و واحده لسه السنه اللى فاتت ..
و أما اللى كانت فى صغرى فلشاب مهذب و رقيق من جيراننا أصيب بالزهرى .. أينعم نجا منه بفضل الله و لكن هو نفسه يقول كنت أتمنى أموت و لا أعيش فى الحاله دى .. بعد أن فقد السمع و تشوه وجهه الوسيم حتى صار النظر اٍليه من الأمور المفزعه ..
و الحاله الثانيه هى مأساه بكل معنى الكلمه لصديق لى يملك معرض كبير فى شرم الشيخ متزوج من سيده تبارك الخلاق فى تدينها و جمالها و أدبها و عنده 3 منها أطفال .. كان عايش فى شرم الشيخ حياته بالطول و العرض مع السائحات الأجنبيات اللى كانوا بياخدوا ما يشاؤوا من البضاعه اللى أتلفها الهوا و يدفعوا الحساب فى الغرفه الملحقه بالمعرض .. و كثيرا جدا ما حذرناه جميعا ولكنه كان بيضحك و هو اللى يتريق علينا .. لحد ما وقعت الفاس فى الراس و أصيب بالاٍيدز السنه اللى فاتت .. و للأسف نقله لزوجته البريئه اللى ليس لها أى ذنب سوى أنها تزوجت من رجل لا يتقى الله ..
مين ضميره يقبل أنه ينقل لزوجته الطيبه بنت الناس الطيبين أمراض جنسيه و هى قاعده فى بيته بتراعيه و بتأكله و بتنضفه و بتربى له عياله و محافظه على شرفه و سمعته و ماله ؟؟
مين يقبل على نفسه أن ينقل الأمراض الجنسيه لأطفاله أو لأهل بيته لو ماكنش متزوج لأن بعض هذه الأمراض بتنتقل بالمعايشه يعنى مش شرط بالاٍتصال الجنسى زى مثلا الأمراض اللى بتنتقل عن طريق قاعدة التواليت بسبب اٍفرازات المريض عليها اللى بتنتقل للى بيستعملها بعده بدون ما ينظفها .. أو ممكن باٍستعمال الملابس الداخليه للشخص المريض أو أدواته .. و دى فرصه برضو للتحذير من اٍستعمال التواليت بالأماكن العامه بدون أخذ الاٍحتياطات الواجبه ..
و أيه أصلا اللى يجبرك تمارس الجنس مع واحده عك فيها عشرميت راجل قبلك بكل ما يحملوا من أمراض و تقرحات و بكل ما تحمل هى من اٍلتهابات و صديد و اٍفرازات مهبليه رغويه لها رائحة السمك المتعفن ؟؟
بعض الشباب الأهطل اللى فاكر نفسه شباب فتك يقولك بنستعمل الواقى الذكرى !!
الواقى الذكرى يا عم الشباب لا يحمى دائما من كل الأمراض .. هل يحمى الواقى الذكرى من اٍنتقال القمل من عانة البت ريرى لعانتك ؟؟ أبدا ..
هل يحميك الواقى الذكرى من الاٍلتهابات و الدمامل الصديديه اللى عادة بتبقى موجوده بين أفخاذ البنات دى ؟؟ برضو أبدا ..
ده غير أنه ممكن طبعا الواقى الذكرى يتمزق أثناء الممارسه زى ما بيحصل كتير و تلاقى نفسك بتمارس الجنس مع بنت مريضه بمرض خطير من غير لا واقى و لا يحزنون ..
و فيه شباب هطل تانيين بياخدوا كبسولتين مضاد حيوى قبل الممارسه مباشرة آل كده يبقوا فى الأمان .. طبعا كلام طبيا مشكوك فيه ..
و شباب تانيين برضو غير الشباب الأولانيين بتخلفهم العقلى آل أيه يكشفوا على البنت بنفسهم قبل ما يناموا معاها بأن يضغطوا بشده على المنطقه الواقعه ما بين سرتها و ما بين عضوها التناسلى و يشوفوا لو فيه اٍفرازات صفراء اللون و ثقيله بتنزل منها تبقى عيانه .. بنات الليل المرضى عارفين التكه دى و بيدخلوا الحمام الأول يفضوا نفسهم من الاٍفرازات المرضيه المتعفنه و يغتسلوا و يطلعوا لكم زى القشطه و هم جواهم السم القاتل ..
اٍعلم عزيزى الشاب الهلاس أن الجنس الفموى التيك أواى اللى أنتشر فى السيارات على الطرق السريعه و فى الأماكن المنعزله ممكن برضو ينقل لك مرض يدوخك و يلففك السبع لفات حوالين نفسك و ترجع تقول من غيظك : لو شفت البت دى تانى واقفه على الطريق أنا حأخبطها بالعربيه !!
تشوف مين يا عم و تخبط مين ؟؟
دول بنات محترفات و كل يوم فى مكان شكل .. هى خطفت منك العشرين جنيه و قالت يا فكيك و أشوفك أمس ..
الجنس الفموى ممكن ينقل أمراض خطيره و من ضمنها الاٍيدز لو أحد الطرفين مريض عن طريق الخدوش المدممه اللى على الشفايف أو اللسان أو اللثه أو عن طريق اللعاب و السائل المنوى ..
عندى كلمه عاوز أقولها للبنات ..
لاحظت من خلال اٍيميلاتكم و تعليقاتكم أنه فيه تجاوزات كثيره بتحصل بين بعض المخطوبين .. تجاوزات فيها الكثير من الأفعال اللى بتحصل بين الأزواج و ده خطأ كبير .. دينيا و اٍجتماعيا و عرفيا و كمان صحيا ..
أيوه صحيا ..
ما أدراكى عزيزتى البنت المخطوبه أن خطيبك ده مش حامل لمرض ما بسبب لفه و دورانه مع البنات اللى مش كويسين طالما أنه ليس عنده لا الوازع و لا المانع للى يمنعوه من اٍتيان مثل هذه الأفعال معاكى أنتى شخصيا و أنتى حتبقى زوجة المستقبل بل و أم أولاده ؟؟
أصلا لا تقبلى عريس اٍلا من ترضين دينه و أخلاقه عن جد و ليس عن مظاهر تخدع العين فقط حتى لا تقعى فى مشاكل أنتى فى غنى عنها ..
صونى نفسك و صونى جسمك و لا تسمحى له بأى تجاوزات لا يرضى عنها الله حتى تحصل لكم البركه و تتلموا فى بيت واحد و تريحوا بعبعه بقى من تعليقاتكم اللى تغيظ بجد ..
أحب برضو بالمره أعرض عليكم قائمه بالأمراض اللى ممكن تصيب الاٍنسان من جراء الممارسات الجنسيه غير الشرعيه اللى هى الزنا و اللى برضو أحب أنوه أنها مش شرط تنتقل من شخص لآخر بواسطة القيام بعمليه جنسيه كامله و لكن ممكن عن طريق ملامسة الأعضاء من الخارج أو بالجنس الفموى أو اليدوى أو الشرجى أو حتى باٍستعمال أشياء ملوثه باٍفرازات المريض .. و طبعا حأسيب لأصدقائنا الأطباء فى تعليقاتهم شرح أعراضها و نتائجها فهم أقدر منى على ذلك .. علما أن مش كل الأمراض اللى فى القائمه دى بتنتقل بالضروره بواسطة الممارسات الجنسيه أتفضلوا :
- السيلان
- سيلان الأطفال
- الزهرى
- زهرى السيدات الحوامل
- الهربس
- اٍلتهاب الكبد الفيروسى
- الاٍيدز
- دمامل الجهاز التناسلى
-المرض الرخوى المعدى
- القرحة الآكلة
- الترايكومونس
- الجرب
- قمل العانه
- المرض الحبيبى الاٍربى المتقرح
- المرض الحبيبى الليمفاوى التناسلى
- الفطريات العنقوديه
- مرض الخوف من الأمراض التناسليه
- مرض رايتر
- مرض بهجت و هو بالأساس مرض مناعى بيصيب أجزاء الجسم المختلفه و منها الجهاز التناسلى
- اٍلتهاب البروستاتا الحاد
- اٍحتقان البروستاتا
- اٍلتهاب الحويصله المنويه
اٍلتهاب الخصيه و البربخ
- العقم
- الضعف الجنسى
- سرعة القذف
- عدم القذف
- نزول الدم مع المنى
و بخلاف القائمه المفتخره دى توجد قائمه أخرى تصيب الشواذ جنسيا و لا بلاش تعبير الشواذ جنسيا لحسن بتزعلهم خليها المثليين زى ما هم بيطلقوا على أنفسهم .. هذه القائمه من الأمراض الجنسيه اللى بتصيبهم بتشمل :
- الاٍيدز
- اٍلتهاب الكبد الفيروسى
- الزهرى
- السيلان
- الهربس
- اٍلتهابات الشرج الجرثوميه
- التيفود
- الأميبيا
- الديدان المعويه
- دمامل و تقرحات الشرج
- الجرب
- قمل العانه
- فيروس السايتوميجالك اللى ممكن يؤدى لسرطان الشرج
- المرض الحبيبى الليمفاوى التناسلى
ربنا يعمى عينينا و أفئدتنا و حواسنا عن الحرام و يجعلنا من العاملين بقوله سبحانه و تعالى (( وَمَنْ يَتَّقِ اللَّهَ يَجْعَلْ لَهُ مَخْرَجًا (2) وَيَرْزُقْهُ مِنْ حَيْثُ لَا يَحْتَسِبُ (3) ))
( سورة الطلاق )
مع تحياتى و ربنا يبعد عيالنا عن كل سوء ..