الجمعة، 2 أكتوبر 2009

سرعة القذف مشكلة و حلها ممكن ..

صباح الخير ..
النهارده عاوز أتكلم عن موضوع مهم فى حياة الرجل الجنسيه ..
موضوع شائك حبتين لكن له مردود و تداعيات ليس فقط على الرجل و زوجته و لكن و ربما لا أكون مخطئا لو قلت اٍن آثاره و تداعياته بتمتد خارج نطاق البيت كله ..
عاوز أتكلم عن سرعة القذف عند الرجال .. و ده عنصر واحد من عناصر الخلل فى آلية القذف و بيكمل منظومة الخلل اللى هى بتتكون عناصرها من وجهة نظرى فى سرعة القذف أو بطء القذف أو عدم القدره على القذف أصلا بشكل طبيعى ..
طيب تعالوا الأول نعرف بسرعه كده أيه هو القذف و بيتم اٍزاى ؟؟
القذف عند الذكور كتعريف مجرد هو خروج السائل المنوى عقب شعور الذكر بالاٍشباع الجنسى بغض النظر عن كون هذا الاٍشباع يتم بشكل طبيعى أثناء الممارسه الجنسيه أو بشكل غير مكتمل بواسطة ممارسة العاده السريه أو حتى بشكل لااٍرادى أثناء النوم و هو ما يعرف بالاٍحتلام .. و فى أحيان نادره عقب مشاهدة أو سماع ما يثير بدون ملامسه حسيه من الذكر نفسه ..
طيب .. ده تعريف موجز للقذف لكن اٍزاى بيحصل ؟؟
أثناء الممارسه الجنسيه و عند بلوغ الذكر لقمة النشوه بتحدث تقلصات فى العضلات الخاصه بالخصيتين بسبب تأثيرات من الجهاز العصبى الاٍرادى اللى هو بيقفل عنق المثانه بشكل تلقائى علشان السائل المنوى مايرتدش تانى و بالتالى بيُحجز ما بين عنق المثانه و الاٍحليل القاصى المقفولين .. فى اللحظه دى الذكر بيحس بقرب حدوث القذف و بتبقى دى نقطة اللاعوده و بتبقى فيه تقلصات قويه ورا بعضها فى العضلات اللى حوالين الجهاز التناسلى عبر العصب الفرجى و أيضا بعض الكيماويات زى أكسيد النيتريك و أول أكسيد الكربون ..
طيب أيه بقى أسباب سرعة القذف لدى الذكور ؟؟
فى رأيى الشخصى أنها فى الأغلب الأعم بتكون أسباب نفسيه بحته .. أكيد فيه كمان أسباب عضويه لكنها لا تشكل نسبه كبيره من أسباب المشكله بين الذكور المصابين ..
الاٍنفعال العصبى فى رأيى المتواضع هو من أهم الأسباب لحدوث سرعة القذف ..
القلق النفسى و قلة الثقه أو عدم الاٍتزان و التوتر و قلة الخبره و الخوف من الفشل أو من العقاب الاٍلهى و المجتمعى كل هذه الأسباب مجتمعه أو منفرده كفيله بسقوط الذكر فى مستنقع سرعة القذف ..
علشان كده دايما بأقول و بأنصح الرجال لما ريقى نشف أن عليهم أن يثقوا فى نفسهم ..
يثقوا فى قدراتهم العقليه و الجنسيه .. يبعدوا عن بالهم الأفكار و المخاوف اللى ليس لها مبرر .. و أيضا الذكريات المخجله و المؤلمه المتصله بهذا الشأن ..
الزوجه كمان لابد هنا أن تلعب دور مهم فى اٍكتساب الرجل للثبات النفسى من خلال لطفها و ظرفها و بلاش البوز و العصبه على القوره و النكد الأنثوى المسوجر على الصغيره قبل الكبيره .. على الزوجه أن تشعر الزوج أبو سرعة قذف أنها بتحبه هو لذاته و لشخصه مش حاجه تانيه لأن ده حيديله ثقه فى نفسه و فى فحولته و فى قدرته على اٍسعادها و القيام بواجباته الزوجيه على أكمل وجه ..
فيه سبب كمان لهذه المشكله و هى الاٍنتصاب الناقص أو غير المكتمل للعضو الذكرى .. و ده له سببين : اٍما عضوى و اٍما نفسى ..
الأسباب العضويه كثيره من أهمها طبعا بعض الأمراض المزمنه زى السكر و الضغط و الأدويه المسببه لضعف الاٍنتصاب .. و أسباب عضويه تانيه كتيره أو بسبب التشوهات الخلقيه ..
برضو فى رأيى المتواضع اٍن من أهم الأسباب الحقيقيه لضعف الاٍنتصاب العوامل النفسيه اللى بتكون الزوجه سبب فيها ( غالبا يعنى ) لأن الزوجه اللى لا تستجيب لاٍثارة زوجها لها لسبب أو لآخر كفيل بالقضاء على اٍنتصاب عضو زوجها أو على اٍضعافه ..
نقص الترطيب فى المهبل أيضا من أسباب سرعة القذف عند الذكور .. و ده بيحصل لما الزوجه بتقل أو بتنعدم عندها الاٍفرازات المهبليه اللى بتسهل عملية الاٍيلاج و اللى بيكون صعب شويه فى هذه الحاله و بالتالى بيزيد الضغط على العضو الذكرى و بيكون الاٍحتكاك الداخلى أشد و الاٍثاره بتكون أكبر فبيحصل قذف سريع لمن لا يقدر على عمل سيطره على نفسه ..
يعنى المداعبات اللى قبل الاٍيلاج بين الزوجين بتكون مهمه لحدوث اٍفرازات مهبليه للتغلب على المشكله .. و لو منفعتش المداعبات لعمل كميه كافيه من الاٍفرازات المهبليه فيمكن اللجوء لمرطبات مهبليه طبيه طبيعيه و ليست كيميائيه و موجوده لدى الصيدليات ..
ممكن نقول اٍن الزوج ذات نفسه فى أحيان كثيره هو المتسبب فى حدوث سرعة القذف لديه !!
لأن ممكن الاٍستعجال و رغبته فى الاٍنتهاء سريعا من أداء العمليه الجنسيه يكون مسئول عن سرعة قذفه ..
مافيش داعى للسرعه فى الاٍيلاج .. و مافيش داعى للحركات العنيفه بعد الاٍيلاج مباشرة لأن الحكايه مش عركه فى سوق الخضار الجدع فيها اللى يطحن اللى قدامه .. الموضوع محتاج تأنى و مداعبات خارجيه و تفهم لنفسية الزوجه و معرفة زراير اٍثارتها .. و بعد الاٍيلاج على الزوج أبو سرعة قذف أنه يستنى شويه من غير ما يحرك عضوه و حيلاقى أن رغبته فى القذف قد قلت كثيرا بالذات لو قدر يتحكم فى عقله و أفكاره و قدر يصرف ذهنه لأمور تانيه بعيده عن الجنس .. و بالتدريج و بالتعود حيقدر الزوج يتحكم فى الزمن المناسب لحدوث القذف ..
الزوجه كمان لازم تكون فاهمه أيه اللى بيحصل .. و تكون حركاتها متناسبه و متناغمه اٍيقاعيا مع حركات زوجها فى التوقف للحظات أو فى اٍبطاء رتم الحركه .. و لا أجد غضاضه و لا عيب فى أن يقوم الزوج بتفهيم زوجته سياسة الاٍبطاء و التوقف للحظات أثناء الممارسه الحميمه و ده فى زعمى حيساعد كتير ..
أنصح أولا بمعرفة الأسباب النفسيه أو العضويه لسرعة القذف .. و ده محدش يقدر يحدده غير طبيب متخصص فى أمراض الذكوره و يكون ثقه كمان لأنى ملاحظ اليومين دول أنه أنتشرت الكثير من مراكز علاج أمراض الذكوره و بعضها القائمين علي هذه المراكز غير متخصصين فى هذا المجال و آخر هذه المراكز اللى تم اٍكتشافها كان صاحبها سوابق و مطلوب القبض عليه فى كام قضية نصب كده ..
كمان تغيير وضعية الجماع ممكن برضو يساعد جدا فى تأخير القذف لدى الذكر و خاصة تغييره لوضعية الفارسه ..
و مش بأنصح باٍستعمال الكريمات أو البخاخات ذات خاصية التخدير الموضعى على القضيب لأن أكيد لها تأثيرات جانبيه غير مستحبه ربما من أهمها تأخير القذف أحيانا للدرجه اللى بتتعب فيها الزوجه و بتتألم و بتزهق و بتكره الجواز و سنينه ..
أيضا بيلجأ بعض الرجال لتعاطى أصناف معينه من مضادات الاٍكتئاب لا داعى لذكر اٍسمها هنا و هو خطأ كبير صحيا و نفسيا تماما كتعاطى المخدرات لنفس الغرض و أيضا نوع معين من المقويات الخاصه بالرياضيين و هى بالفعل تساعد على تأخير القذف و لكن تداعيتها سيئه للغايه ..
ممكن اٍستعمال طريقه بدائيه غريبه شويه لكنها مفيده جدا للتغلب على هذه المشكله و ذلك بالعد التنازلى 100 99 98 97 ... اٍلخ أثناء الممارسه الجنسيه .. و ممكن كمان اٍستعمال حاجه كده من عند العطار اٍسمها شرش الزلوع بس برضو ياريت قبل اٍستعمالها نسأل طبيب متخصص و نستشيره عن مدى مناسبتها للحاله الصحيه للشخص ..
و لو الكلام ده بقى معجبناش ييبقى طريقة ماسترز و جونسون هى الحل الأكيد و الناجح رغم كونها تحتاج للكثير من الصبر و الوقت من الزوجين ..
أيه بقى طريقة ماسترز و جونسون الشهيره ؟؟
فى هذه الطريقه العلاجيه بيطلب من الزوجه أن تساعد زوجها على حدوث الاٍنتصاب باٍستعمال يدها .. و أول ما بيشعر الزوج بقرب حدوث القذف بتتوقف الزوجه عن المداعبه اليدويه أو الفميه و بتقوم بالضغط على القضيب تحت أسفل الحشفه لمدة 4 ثوانى و دى مده كافيه جدا لمنع القذف .. و يفضلوا يكرروا الطريقه دى بدون اٍيلاج و بعدها بالاٍيلاج حسب جدول معروف و منتظم حتى يصل الزوجان للتحكم الكامل فى عملية القذف بعد مده بتتراوح من ربع لتلت ساعه تقريبا ..
مع الأخذ فى الاٍعتبار أن اٍخراج القضيب و حث الزوجه على الاٍمساك به بشده و الضغط عليه بيتكرر 5 مرات أثناء الممارسه الحميميه لمدة أسبوعين و بتتضاعف كل أسبوعين حتى الوصول للنتيجه المطلوبه ..
بالتدريج و بالصبر الزوج سريع القذف حيلاقى نفسه قادر يتحكم فى توقيت قذفه و فى اٍطالة مدة الجماع على حسب ما تقتضيه الظروف المرتبطه فعليا بوصول الزوجه لذروة النشوه .. و مش مهم لو فشل مره و أتنين و تلاته لكن المهم أنه يحاول تانى بدون أن يتسرب اليأس لنفسه ..
و ممكن يجرب تانى فى نفس الليله اللى شهدت فشله بعد حمام لطيف كده و عشاويه دسمه تكبس على مراوحه حيلاقى نشاطه الجنسى قل كثيرا و توهجه قد خمد نوعا ما و لا بأس من اٍعادة المحاوله ..
و فى النهايه بأنصح كل زوج مايديش أبدا ودانه لأصحابه الفشارين اللى بيفضلوا يطحنوا فى زوجاتهم من بعد العشا حتى مطلع الفجر لأن الكلام ده مش صحيح و جيجيب له اٍحباط و حيخليه يشعر أنه مش فحل زيهم و ممكن يلجأ لتعاطى المخدرات اللى يا اٍما حتجيب أجله أو حتجيب أجل رجولته و يبقى بعد ما كان سريع القذف حيبقى كمان معدوم الاٍنتصاب ..
الموضوع نسبى و بأكررها تانى أنه مرتبط فى الاٍساس بوصول الزوجه لقمة نشوتها حتى لو كان بعد وقت قصير من الاٍيلاج يعنى ماينفعش الزوج يمسك ستوب ووتش و يشوف حقق كام النهارده ؟؟
لأ .. الستوب ووتش الحقيقيه هى الوصول لاٍمتاع الزوجه المتعه الكامله ..
أشكركم .. و لكم كل التحيه ..

السبت، 26 سبتمبر 2009

نصائح للستات


عدنا بعد اجازه العيد

احترت بصراحه اتكلم عن ايه خصوصا ان الدكتور عباس منفضلنا وفى اجازه برضه ومافيش فرصه نتناقش فى حاجه جديده

فأنا بناءا على طلب ناس كتير اوي كانوا بعتولي اميلات وقالولي نعمل ايه

بمعنى ايه الى ممكن نعمله عشان نوصل لتناغم معقول فى العلاقه الجنسيه بين الزوجين

طيب انا هاقدح زناد فكري واقول بعض حاجات كده وهانبدأ بالستات

اه فى اعتراض ولا ايه ؟؟

وهاوجه كلامي للستات النهارده

اولا : لازم تكوني حاسه انك جميله من فضلك لو حسيتى انك وحشه هو هايحس انك زفته زفته وثقي بنفسك تماما (اقصد من ناحية كونك مرغوبه ولا لا )

بس ده طبعا وانتى مهتمه بنفسك مش وانتى ريحتك توم ولابسه جلابية مامتك القديمه

ثانيا : اهتمي بنفسك دايما وانتى فى البيت وانتى بره البيت (مش باقولك حطي ميك اب وانتى بتنضفي الشقه )
لكن اعملي وقت للشغل ووقت للراحه
ووقت الراحه على الاقل تكوني لابسه هدوم نضيفه ومسرحه شعرك على الاقل يعنى وده اضعف الايمان

ثالثا: ودي مهمه اوي خلي بالك

لو جوزك جه قالك انا جعااان هاتيلى اكل دلوقتي حالا انشاله لقمه بجبنه

انتى بقى : لاااااا يونكن ابدا جبنه ؟؟؟ استنى انا عندي فرختين فى التلاجه هاطلعهم وافككهم واشويهملك حاجه ايه بقى تاكل صوابعك وراها

ممكن يستناكي لحد ما تعملي كل ده بس كمان ممكن ينام بجوعه وممكن على ما تخلصي يكون ازاز شوية لب ولا ترمس وخلاص بقى مش عايز ياكل ( اه ازاز انشاله كلبين من على ميلودي )

احيانا تكون اللقمه بجبنه الى هو نفسه راحتلها فى وقتها احلى من أي كل تاني ما تتفزلكيش يا اختي

طبعا انا اكيد مش قصدي اتكلم على الاكل يارب يكونوا بيفهموا

وده على فكره فى حديث عن رسول الله بيقول

إذا دعا الرجل زوجته لحاجته فلتأته وإن كانت على التنور

التنور ده زي الفرن كده تقريبا



رابعا : لو انتي ليكى واحده صاحبتك وبتحبوا بعض والحكايه ماشيه فل جدا وبعدين جه عليكى وقت كل ما تقابليها تاخديها بالحضن وهى بترد عليكى ببرود بالعافيه تطلع ايدها تسلم عليكى

انتى بتحبيها بتصبري عليها وتقولي جايز مضايقه من حاجه ومره والتانيه والثالثه انتى كمان هاتقابليها ببرود وجايز ما عنتيش تكلميها اصلا صح ؟

وجايز تضطري تكلميها وتعصري على نفسك لمونه عشان الشغل يمشي

نفس الحكايه برضه قيسى كده على العلاقه بينك وبين جوزك لازم يكون فى تفاعل ما تبقيش رخمه من فضلك

الواحد لما حد يسلم عليه بيرد السلام
مش عايزه واحده تقولي اصلي مش باحس بحاجه يا ستى حبيه بس مش مطلوب منك اكتر من انه يحس انك بتحبيه اقولك على حاجه تانيه مثلي ايوه مثلي انك حاسه وانك متفاعله ايه الغتاته دي ؟؟!!!


خامسا: الخجل الخجل الخجل خماشر الف خط تحت الكلمه دي من فضلكم

انا فى رايي المتواضع الى بيختلف معايا فيه الدكتور عباس دايما ( فى النسبه بس )ان الخجل بين الزوجين بيكون سبب فى تسعين فى الميه من المشاكل المتعلقه بالعلاقه الجنسيه بينهم

فى حاجه كمان الست او حتى الراجل على فكره بينكروا وجوده احيانا وتقولك ابدا مش باتكسف وللاسف الى بيحصل انها بتكون فعلا مكسوفه ومن كتر كسوفها ومحاولتها انها تخفيه تترجم ده لتصرفات غبيه جدا

اه والله غبيه جدا

يعنى مثلا تحاول تقنع نفسها انها بتنفر من العلاقه وبتحتقرها ومش بتستمتع بها ( دي حاجات لا شعوريه على فكره ) وسائل دفاعيه
وتبدا بقى مشاكل مترتبه على الغباوه الى هو شافها منها ورد فعله الى برضه بيبقى غبي وهى تستغبى زياده وهكذا

مش باقولك ابقى بجحه من اول يوم تتجوزي وتقولي لجوزك يوم الفرح قدامي ياض نعمل سيكو سيكو
لا طبعا
انا عارفه ومتاكده ان الاعم الاشمل فى البنات مهما كانت عامله نفسها فتكه بتتحرج برضه خصوصا مجتمعنا الى مشوه فكرها ومحسسها ان العلاقه الجنسيه دي عموما قلة ادب ولازم تبقى دايما مكسوفه عشان تبقى بنت مؤدبه
فلو سمحتي حاولي واحده واحده وتعالى على نفسك مره واثنين وثلاثه وحاولي تكسري الحاجز الى بينك وبين جوزك
واعرفي حاجه ان هو اصلا ممكن يكون برضه محرج ويستجمع قواه مثلا عشان يكسر الحاجز ما بينكم وانتى تقومي كابساه الكبسه المتينه يتكعور على جنب

سادسا : الراجل ده بنى ادم عادي زيه زيك (اه والله مش كائن هلامي ) محتاج هو كمان يحس انك محتجاه وراغبه فيه فعلا
جايز تكوني انتى كست محتاجه تحسي انه بيحبك وراغب فيكى ومحتاجلك

لا هو بقى محتاج يحس انك محتاجاله وراغبه فيه وبتحبيه بنفس الترتيب ده

اكتر من واحده بعد حديث طويل اكتشف ان جوزها سابها شهر واكتر من غير ما يقرب منها مثلا وهى لا سألته ولا عبرته ولا حاولت تحسسه باي حاجه بل بالعكس حاولت تظهر له انه مش هاممها ومش عايزه اصلا ( ايه انتم عايزينه يقول عليها قليلة الادب ؟)


وتستغرب بقى بعدها حسيت انه اتغير من ناحيتى كده وساعات احس انه مش عايزنى وبيعمل كده تقضيه واجب ؟؟!!
الرجاله بقى : يقولي انا حاسس انها مش فارق معاهااااااااا هاتجنني . ده انا سبتها مره شهر ما قربتلهاش ولا عبرت ولا حاولت حتى تسألنى انا مالي . طب يعنى مش جااااايز تعبان ؟؟ مش جايز اتجوزت عليها ؟؟؟
تبقى مش بتحبنى اكيد او جايز عندها برود جنسي بقى ومش عايزه اصلااااا .


سابعا : ارجوكي حاولي تعملي الى هو نفسه فيه ما دام مش حرام ما تتفزلكيش وتقولي لا وخلاص لمجرد الرفض وجربي مش هاتخسري حاجه
حتى لو كانت حاجه بتضايقك جايز مع الوقت مش تضايقي وجايز لا
ممكن تستحمليها بعض مره عشان ترضيه
وممكن هو نفسه بعد ما يجربها ما تعجبوش
وممكن تعجبه بس يزهق منها .
بس سبيه يجرب وجربي انتى كمان جايز تعرفي حاجه ما كنتيش عارفاها وجايز تغيري رايك .


ومش فاكره حاجه تانيه دلوقتي ياريت اسمع منكم اضافات وكل الى عنده افكار يقولها


وياريت يا ريت مش عايزه كلام نظري


عايزه كل واحد يقول من خلال تجربته الشخصيه واحساسه هو عشان يكون الكلام افيد للجميع


وطولت عليكم معلش استحملوني

الأحد، 20 سبتمبر 2009

عيد سعيد عليكم


كل سنه وانتم طيبين
.

الاسبوع ده اجااااااازه مافيش شغل بقى عشان العيد
..
بس انا قلت اجي اعيد عليكم


يارب يكون عيد سعيد عليكم وكله خير وبركه


ويارب ينعاد عليكم بالخير السنه الجايه ان شاء الله


وكل واحد يسيب العديه وهو مااااااااااااشي

السبت، 12 سبتمبر 2009

سن اليأس اٍسم غير دقيق

أيه هو سن اليأس عند المرأه ؟؟
ما هو مدلول و تداعيات هذا المصطلح اللى قد يراه البعض و أنا منهم به قسوه و غلظه عندما تخبر المرأه أنها قد صارت عضوه فى نادى سن اليأس اللى لا مفر منه ؟؟
و كيف نتعامل معه و هو أصلا موضوع شائك بل و ربما يكون مؤلما و موجعا لدى الكثيرات من النساء ناهيكم عن كونه مرحله جديده تماما فى حياة كل اٍمرأه ..
أشعر بالاٍطمئنان للتعربف العلمى القائل تحديدا بأن سن اليأس ما هو سوى اٍنقطاع الدوره الشهريه عند الأنثى لفتره زمنيه بتزيد عن 6 أشهر متواصله و أنه ظاهره طبيعيه بتحدث لكل نساء العالمين لما بتوصل المرأه لسن النضج الكامل لما بيكون عمرها من 45 ل 55 سنه .. مع الأخذ طبعا فى الاٍعتبار الفروقات الفرديه بين سيده و أخرى ..
سن اليأس ( و لا أوافق تماما على هذا الاٍسم ) بيبقى مرحلة بتنتقل فيه المرأه من سن الخصوبه لمرحلة عدم القدره على الاٍنجاب بكل ما يمثل هذا من صور قاتمه فى مخيلة الذكور عموما و الذكور الشرقيين خاصة و الذكور الصعايده على الأخص ..
السبب الأساسى فى فقدان المرأه لقدرتها على الاٍنجاب غالبا بيكون نفاد ( صحتها لغويا بالدال و ليس بالذال و هو خطأ شائع ) أعداد البويضات لديها و بالتالى بيتعطل المبيض و بيرفض اٍنتاج هرمون الاٍستروجين .. و بالتالى بتحدث للمرأه أعراض كتيره بتختلف قوتها و عنفها من سيده لأخرى تبعا للظروف النفسيه و الصحيه لها ..
يقال اٍن الأنثى لا تصل لسن اليأس مره واحده بشكل فجائى و لكن بشكل تدريجى .. يعنى فى الأول بتحصل لخبطه فى الدوره الشهريه فى السنه اللى بتسبق سن اليأس .. من أهم شواهد هذه اللخبطه أن تتباعد كل دوره شهريه عن اللى قبلها و اللى بعدها و غالبا بتحصل كل شهرين أو تلاته ..
الكثير من الأطباء بيعترضوا على مقولة عدم فجائية اٍنقطاع الطمث و بيقولوا أنه من الممكن جدا أن ينقطع الطمث بشكل فجائى بدون تدرج و بيكون أصلا منتظم لفترات طويله فى حياة الأنثى ..
السن مش هو لوحده السبب لحدوث ما يسمى بسن اليأس .. فيه أسباب تانيه كتيره نذكر منها على سبيل المثال :
- اٍستئصال المبيضين عن طريق التدخل الجراحى و غالبا بيكون السبب وجود أورام سرطانيه .. - توقف المبيض فى سن مبكر يعنى فى عمر أقل من 45 سنه عن اٍنتاج هرمون الاٍستروجين رغم وجود العدد الطبيعى من البويضات و السبب فى ده غالبا بيكون وجود مشاكل أحيانا معقده فى جهاز المناعه لما جسم المرأه بيكون أجسام مضاده بتهاجم المبيض و تقضى على وظائفه الطبيعيه ..
- العلاج بالمواد الكيميائيه اللى بتستعمل فى علاج السرطانات بتؤدى لتقليص نشاط المبيض شويه بشويه اٍلى أن يتوقف تماما عن العمل ..
سن اليأس له أعراض كثيره جسميه و نفسيه .. أحيانا قد تكون هذه الأعراض قاسيه على بعض النساء .. و أحيانا تمر بسهوله و سلاسه و لا تترك أى أثر نفسانى على صاحبتها ..
و أوجز أهم الأعراض فى الآتى :
- نسبه كبيره من النساء بيشعروا بسخونه و اٍرتفاع فى درجات حرارة الوجه و الرأس بصفه عامه .. و بيعرقوا بشكل مبالغ فيه و فى بعض الأحيان قد تستمر هذه الأعراض لفتره زمنيه قد تمتد ل 10 سنوات !!
- اٍختلال ملحوظ فى منظومة النوم الطبيعيه مصحوب بأعراض اٍكتئابيه و قلق مستمر و تعكر فى المزاج لأسباب قد تبدو صغيره و لا تستدعى حتى أن يلتفت لها ..
- ألم قد يكون غير محتمل عند الممارسه الجنسيه بسبب نقص هرمون الاٍستروجين و ده بيؤدى لقلة و ربما اٍنعدام الاٍفرازات المهبليه الطبيعيه اللى بتسهل حدوث العمليه الجنسيه و اللى نقصها بيسبب جفاف و ضمور فى الجدار المهبلى و ده بدوره بيؤدى لألم مضاعف ..
- بعض الاٍناث بيكون من ضمن أعراض الوصول لسن اليأس عندهم صعوبة التحكم فى البول بالذات وقت السعال .. و ده غالبا بيكون بسبب الضمور اللى بيصيب جدار المثانه و الاٍلتهابات المتكرره فى مجرى البول ..
- هشاشه العظام من أوسع الأعراض اٍنتشارا بين النساء اللى بيوصلوا لهذه المرحله من العمر بسبب قلة كثافة العظام و بتبقى عملية الهدم ضعف عملية البناء ..
و وجد أن النساء أصحاب البشره البيضاء أكثر عرضه للاٍصابه بالهشاشه عن النساء ذوات البشره السمراء .. و أن المرأه النحيله الرشيقه برضو أكثر عرضه للهشاشه من المرأه الممتلئه الجسم .. أمراض القلب و الشرايين بتزيد لما بتصل المرأه لسن اليأس لأن هرمون الاٍستروجين بيدخل فى عملية التمثيل الغذائى للدهون و بكده بيساعد على الوقايه من تصلب الشرايين و أمراض القلب فيجب الحرص و لزم التنويه ..
العرض النفسى الكامن فى أعماق المرأه لما بتوصل لهذا السن اللى فى رأيى لا يجوز أبدا أن يطلق عليه هذا الاٍسم الغير منصف هو اٍحساس المرأه بأن أولادها اللى أفنت عمرها فى خدمتهم و رعايتهم قد بدأوا فى الاٍنفصال عنها وجدانيا .. قد يكون هذا الشعور به شىء من الصحه و ده طبيعى بشكل ما لأنه من المؤكد فى هذه المرحله العمريه سيكون الأبناء و خاصة البنات قد وصلوا هم كمان لمرحله عمريه بيدأ فيها دخولهم لمرحلة الشباب بكل ما فيها من أسرار و غموض و اٍتفاقيات و تفتح على الأخر و قد لا يناسب كل هذا شعور الأم و أحاسيسها خاصة لو حطينا فى الاٍعتبار أنها أصلا بتمر بمرحله اٍنتقاليه صعبه بعض الشىء و يكفى أنه متعارف عليها باٍسم سن اليأس ..
الأم لما بينتابها هذا الشعور بيضخم لديها فكرة أنها صارت على هامش الحياه على مختلف الأصعده .. و بترى أن دور الأب قد تعاظم حتى طغى على دورها هى .. لأن الأب يظل ممسكا بمفاتيح الخزانه اللى بيظل الأولاد محتاجينها فى صغرهم و كبرهم و بالتالى بيظلوا محتاجين له .. على عكس دور الأم معاهم ..
وصول الأنثى لهذه المرحله السنيه و عدم قدرتها على الاٍنجاب لا يعنى أبدا عدم قدرتها على ممارسة الجنس و الاٍستمتاع به و اٍمتاع زوجها أيضا و اٍضفاء البهجه على كل المحيطين بها .. و ده تصحيح للفكره السائده لدى أغلب الرجال بل و النساء أيضا .. فلا يوجد ترابط مادى ملموس بين توقف الدوره و الممارسه الجنسيه ..
و المرأه بشكل طبيعى فى حاجه دائمه لاٍحساس الأمان و الطمأنينه و الموده و بيتضاعف لديها الاٍحتياج لكل ده أثناء مرورها اللى أرجو أن يكون عابرا بهذه المرحله الاٍنتقاليه المهمه فى حياتها و قد تكون العلاقه الحميمه عامل مادى مساعد و مفيد فى حصول المرأه على أحاسيس الأمان و الطمأنينه اللى هم بمثابة الماء و الهواء لأى اٍمرأه ..
ده بيستلزم تفهم كامل للموقف و طبيعته الحساسه من كل المحيطين بها و خاصة زوجها اللى لابد أن يكون متحليا بالصبر و طولة البال حتى يجتاز الجميع هذه المرحله بسلام ..
و تقبلوا تحياتى ..

الأحد، 6 سبتمبر 2009

يادبلة الخطوبة عقبالنا كلنا

السلام عليكم ورحمة الله وبركاته

بدانا بالسلام حلو وفل اوووووووووي ازيك يابعبه ياقمر ازيك يااستاذ عمرو

طبعا بعد الاتهام الفظيع المريع اللي اتهمتهولي بعبه وهو اني مستخبيه تحت الكرسي

قلتلها لا مش مستخبيه بس في حاجه اسمها حياء والحياء دا بقي انا شيفاه كل الجمال مش نصه بس

والرسول عليه افضل صلاة واذكى سلام قال اذا لم تستحي فافعل ماشئت حلووووووووووووووو اوي


وطبعا انا متاكده ان المعلومات اللي قلتوها وفتحتو النقاش فيها افاد ناس كتير جدا لكن في نفس الوقت ظهر مؤشرات ترررررررررررررعب اوي

او بمعني ادق فتح عيني علي مفاهيم بجد بجد ربنا يستر امة محمد ولا يفضحها ويهديهم ياااااااااااارب

انا رغايه كدا ليه تعالي ندخل في المفيد

طبعا انا لا هعمل بوست مضخم ومفلطح وعريض المنكبين ولا الحاجات دي انا عاوزه ابعبع

معاكم الله هي مش بعبه بلوجارية ومن حقنا نبعبع كلنا

من عنوان البوست اسمه يادبلة الخطوبة

كل شاب كل بنت مهما عدا العمر عليه او عليها نفسه في اليوم اللي يخطب بنت وبعد كدا يتجوزها

والبنت نفسها ترتبط وتتجوز وتعيش سعيده

لان اللي برا موضوع الجواز فاكر انه لما هيتجوز الحياه هتكون وردي ومش في مسئولية بالعكس بقي انا خايفة

وشايلة هم الجوزا دا من مسئوليته وبدعي ربنا انه لما يرزقني بزوج صالح انه يدرني علي تحمل مسئولية الجواز


نرجع لمرجوعنا وطبعا للحاله المادية المترديه في الفتره دي الخطوبة بتقعد سنه واتنين وتلاته


بس عادي مش مشكله الحياه صعبه اه لكن مع الحب والود بتبقي خفيفه وهينه

مش مهم كل الكلام اللي قلته فوق دا

الاول عاوزه اقول يعني ايه خطوبة الخطوبة وعـــــــــــــد بالزواج فقط

تعالو بقي افرضي انتي مخطوبة لواحد دلوقت وبعد كام شهر كدا جه باباكي وجاله واحد دخل مزاجه مش يقدر

بسهوله يجوزك له حتي من غير مايبلغ اللي خاطبك بدا وساعتها يبقي ادا صابونه للاولاني

انا مش بتكلم في نقطه نداله ولا اي حاجه انا بتكلم في امثال

باباكي يقدر ولا ميقدرش لكن لو انتي مكتوب كتابك وجه باباكي جاله واحد احسن يقدر يكتب كتابك علي

واحد تاني دا يروح السجن لييييييييييييييه لانك متجوزه واحد بالفعل

يبقي كدا الخطوبة مش فيها اي حاجه تثبت انكم متجوزين وانكم اجانب علي بعض

عارفين ياعني ايه اجانب يعني لما تتقابلو لازم اخوكي او باباكي او عمك او اي محرم يقعد معاكم

وعارفين بقي ان لو في كلام حب اتقال بينكم او الكلام اوفر شويه دا بيقلل من البركة لما بتتجوزو وبيكون في مشاكل

ياربي انا كل دا بقول في كلام

امال البوس والحضن والمعاشرة اللي من غير فض غشاء بكارة دي تبقي ايه ملهاش غير مسمي واحد

زنا والزنا درجات

انا بنت زيكم ومن سنكم علي فكرا وارتبط بس قسم احلف بيه ان عمره ماقعدت انا وهو لوحدينا وعمره مافكر

يلمس ايدي مش لاني انا رفضت او كدا لا لانه كان بيحترمني وشايفني غاليه

طيب تعالي نحلل الموضوع شويه واحده مثلا بتحب واحد وهو بيحبها واتخطبوا وخرج معاها ومثلا لمس ايدها

وهي وافقت وشويه يحط ايده علي كتفها وشويه وفي لحظه تجلي ياعبدالمتجلي اخد بوسه وهي هتتمنع

في اول بس مره علي مره هتتعود والبوسه هتجر حاجات تانيه

تفتكري انها لما قبلت التنازلات دي بينه وبين نفسه هيكون مطمنلها بلاش هو هيبقي شايف انها بتحبه

وبلاش رجعيه زي مابسمع تفتكري ربنا هيكون راضي عنهم وهما بيغضبوه

طيب لو رفضت وقالها انتي مبتحبنيش انتي وانتي وانتي وهوووووووووب مشي

في ستين الف داهيه عارفه ليه لانه لو كان صالح حياتك الزوجيه هتمر من المطبات بفضل ربنا وقربكم

ورغبتكم انكم ترضوه وتقربوه منه

اما بقي لو فعلا جواه خير ولما لاقاها رفضت وفاق ان دا غلط هيحترمك وهتزيدي غلاوه في نظره

ومفيش بت تقولي انا خايفه ان لو عملت كدا يبعد وانا مقدرش علي بعده وانا اتخرت في الجواز

ولا مين هيجيني تاني او انا عندي رغبه مكبوته اللي مع ربها عمر ما الهم هيقربلها

والجواز رزق من ربنا زي المال زي البنون زي اي حاجه وكل شي مكتوب ومقدر معروف من وانتي في بطن امك

هتيجي امتي واسمك وهتموتي امتي وفين وحياتك ازاي وكل شي يبقي ليه تخافي واللي جاب دا يجيب احسن منه

وانا ماشيه في المترو سمعت الكلمة دي باللفظ واحد بيكلم واحد بصوت علي وبيقوله احمد خطب التاني يقوله

المجنون في رمضان امال هيبوس ويحضن ازاي

انا صعقت كان نفسي اقول ايه ليه هو قال احمد اتجوز دا قال خطب يعني مش من حقه اي شي

غير انه اخد وعد من والد خطبته ان لو في نصيب بينهم هتكون ليه

نيجي بقي اللي وصلوها لمعاشرة لكن بيحافظو علي لبكارة لا والله يعني هو دا دليل العفه

لا حول ولا قوة الا بالله

اتقوا الله في اللي بتعملوه مش خايف لما تخطب واحده وتعمل معاها كدا وتيجي تتجوز بنتك خطبها

يعمل معاها كدا هتقبل دا

صونوا نفسكم دا اللي هقدر اقوله

وكفايه بعبه بقي لاني اتغميت من البوست دا ربنا يهدينا كلنا ويسترنا جميعا






الأحد، 30 أغسطس 2009

رساله من m


طبعا اليومين بتوعي طولوا شويه معلش بقى رمضان كل سنه وانتم طيبين


جاتلي الرساله دي يا جماعه من الاخ m من فتره طويله بس احنا كنا مستغرقين فى مناقشات ورا بعضها ما كانش فى فرصه انى انشرها


و m هو شاب عنده 18 سنه واتفضلوا نشوف قايل ايه فى رسالته نصا


السلام عليكم


ازى حضرتك يا استاذة بعبعة؟وازى استاذ عمرو واستاذة اعترافات ؟


انا بتابعكم من زمان من ساعة مافتحتم بس من بعيد لبعيد


شفت مدونتكم بعبعة بالصدفةالحقيقة مدونة جميلة وربنا يكرمكم بجد ويمكن الناس يتصلح حالها على ايديكم


انا ممكن احكيلكم تجربتى مع المراهقة وكل حاجة عنها لو حبيتم


وممكن اكلمكم عن احاسيس الذنب والنشوة والاكتئاب والتوهان والحوارات دى كلها اللى بتحكو عنها


بس انا هأجل الموضوع شوية


كنت عايز اقول حاجة صغيرة بس انتم كنتم بتقولوا ان المراهق ممكن يكون عارف حاجات الكبار نفسهم ميتخيلوش ان يعرفها


عايز اقولكم انكم متعرفوش حاجة خالص من اللى احنا نعرفها ولو قلتلكم حاجات انا عرفتها وانا عندى 13 و 15 سنة ممكن تموتوا فيها

اقولك على حاجات على سبيل المثال لا الحصر ؟


بداية من الرعشة بتاع الستات وبتحصل ازاىوايه المناطق اللى بتثير المرأة وايه المناطق اللى توصلها لقمة الاثارة والاورجازم

وطبعا ممكن اكلمك على جسم المرأة احسن ماهى تتكلم عنه

وعن صوت القضيب وهو بيدخل فى المهبل كزا مرة ورا بعض وانه بيبقى عامل زى صوت السقفة وعن ايه اللى يخلي المرأة ترقع بالصوت الحيانى زى فى الافلام السكس


وانه كل الستات مش زى بعضها فى مناطق الاثارة


واننا لازم نكون بالراحة ليلة الدخلة مع الزوجة علشان متتخضش وتبقى كويسة وميحصلش تشنجات مهبلية واننا لازم نبدأ ابالحوار والمداعبة والملامسة وفى الاخر ندخل عالجماع

تعرفى اننا بقينا نتكلم بالعلم والطب فى الحوارات دى مش مجرد بنثير بعض .. لابنتناقش ونتحاور ونعرف المعلومات الجديدة والقديمة عن المواضيع دى؟

يعنى بقينا عارفين الامراض التناسلية واعراضها وعلاجها ودورتها وايه اللى يقلل منها وازاى نقى نفسنا منها وحاجات كتير وكتير

بمعنى اصح احنا ممكن نشتغل دكاترة وعلى فكرة كل ده معرفناهوش من افلام السكس ابدا


كلنا عارفين ان الافلام دى كلها فبركة والسلام وتهييس وحاجات غبية ولا حتى عمرنا نمنا مع ستات ولا عملنا حاجة حرام

كل ده من حكاوى الناس اللى جربت من حوالينا

فى ناس متجوزين بيحكولنا الحوارات دى تصورى !

وغصب عنك بتسمعى الفضول قتل القط ..مش كده ؟


وطبعا غير ان حاجة بتقرأ تقع تحت ايدينا وبتتكلم عن المواضيع دى كنا بناكلها من كتر القراية


وعايز اقولك ان صعب الواحد يحكى لأهله حاجات زى ده

لأن الواحد بيبقى فضولى وعايز يعرف تانى وتالت ومليوون


انا مش عارف ايه اللى خلانى اكتب الرسالة دى من اساسه انا بس اتخنقت من كتر ماالناس مش حاسة بينا وفاكرينا حيوانات وماشيين ورا اعضائنا التناسلية


مش قصدى على نفسى لوحدى انا بكتب الرسالة دى بإسمى وبأسم كتير من الشباب اللى ملقاش حد ينصحه الا متأخرالمراهق


غلبان وربنا وغصب عنه

تعرفى ان اما بنمارس العادة مش بنمارسها كمجرد تفريغ طاقة جنسية لأ لو متضايقين ممكن نمارسها لو مخنوقين


ممكن برده لو غضبانين بنمارسها

حاجة بتخرج اللى جوانا والسلام


زى اللى مخنوق وبيشرب سجاير مع كل نفخة دخان بيخرج الزهق اللى فيه


عارفين بنوقفها امتة ؟


اما بنكون فرحانين او حد مشجعنا او عملنا حاجة ترفع من معنوياتنا وحماسنا


وده طبعا بيحصل كل سنة مرة لأن على طول احنا متكدرين ودايما الكبار يعلقو علينا وخد تعالى وروح


غير ظروف البلد والواحد نفسه يحقق حاجات كتير واحلام وده بيشيل الواحد هم وهو صغيرطبعا هتقولو ايه الكلام الاهبل ده على كده كل المراهقين شعراء وفلاسفة؟


هقولكم لأ طبعا متبوصوش للعيال اللى بتسقط البناطيل وتحط جل على الشعر وتبين البوكسر وماسكين موبايلات اخر موديل لمجرد التباهىدول حالات شاذه

او بيحاولو يكونوا


اللى انا بتكلم عليهم دول وانا منهم ناس ليها طموح والبلد والدنيا مش مساعدة


على فكرة احنا مش فقراء او كده الحمدلله محدش بينام جعان


بس صوابعك مش زى بعضها ولا المراهقين زى بعضهم

هتقولو فين الأهل من كل ده؟

هقولك من كل عشر مراهقين بتلاقى واحد ولا اتنين بالعافية اهلهم ممكن يحكولهم كده ويثقفوهم ومش بيحكو كل حاجة طبعا والباقى فس !

طبعا العيب مش على الأهل ابدا بس هم اتربو فى زمن كان كويس ومكنش فيه الفجور ده

بالتالى صعب عليهم نوعا ما انهم يواجهو مواقف زى دى

وطبعا انتو واهلنا غلابة مجربتوش ولا هتجربو اللى احنا فيه اللى انتو جربتوه ميجيش واحد على مليون من اللى احنا جربناه والباقى عرفتوه اما تزوجتم

انما احنا بقى لو اتجوزنا هنبقى خبرة اوى اوى اوى وهنعرف نتعامل صح هههههه


عارفين زى مابيقولو ايه هى فايدة الفشل والضياع؟

الخبرة

انك تقدر تساعد اى حد بيمر باللى فشلت فيه

وتاخد بإيده وتخرجه

انا الأخ الأكبر وعندى 18 سنة وليا اخ صغير 15 سنة

وطبعا لازم يمر بالمراحل اللى مريت بيها

وبما انى فضلت انى اجرب عن انى اسمع واتعظ من ابويا

فأنا الحمدلله على قد ما اقدر بأنصحه وبيلاقى كلامى صح ويجي يشكرنى

ابويا نفسه بقى مش خايف على اخويا من الناحية دى لأنه عارف انى ماسكه كويس وفاهمه وبنظرة واحدة اعرف هو بيفكر في ايه

ومش بشد عليه لو مارس العادة مرة ولا حاجة لأنى عارف انه وحش جواه وعايز يخرج


لأ بنصحه واقوله اخطارها وخليته ينزل يلعب رياضة ويحفظ قرآن ويشيل حديد ويشغل نفسه بمليون حاجةعلشان ميفكرش كتير فى العادة

طبعا مدمن العادة احسن واحد يكلمك عن اضرارها وبالتفصيل وبالكلام االعلمى والطبى والدينى لدرجة ان ابويا واخويا بيبقو قاعدين حسين نفسهم مع دكتور

انا دلوقتى فى كل صلاة بدعى ربنا يحمى اخويا واللى زيه ويبعدهم عن الحرام وميخلهموش يمشى فى طريقى ومش يخليهم يبقو زيى

ولا زى الناس اللى بحكى عنها

تفتكرى لو انا مكنتش مارست العادة وعرفت كل الحاجات دى كنت هقدر اساعد اخويا؟؟او اوعيه ؟

اهلنا لم يمرو باللى احنا بنمر بيه

علشان كده معذورين ومش عارفين يلاقو منين ولا منين شغل ولا مصاريف ولا ايه بالظبط ربنا يكرمهم يارب ويساعدهم ويدخلهم الجنة

الواحد بجد يبقى حيوان لو قال انه اهله السبب

انا السبب المراهق السبب المراهق قط والفضول قتل القط


واسف عالتطويل واسف ان الرسالة ملخبطة اوى كده وفى كذا اتجاه وده لأنها نقطة فى بحر من اللى انا عاوز اقوله


ربنا معانا جميعا

=================================


دى كانت نص رسالته وانا طبعا رديت عليه من خلال الاميل لكن هارد عليه هنا عشان كمان تشوفوا الرد وتقولوا رايكم



يا m انت جدع ما شا ء الله بس انا ليا شوية اعتراضات على كلامك



أولا عايزاك تعرف وتتاكد برضه ان المعلومات الى عندك دي مش لازم تكون صح ميه فى الميه امثلتك الى انت قلتها فى كلام مش حقيقى بس مش مجال لمناقشته دلوقتي


مين قال ان احنا نكره انكم تعرفوا وتتعلموا وانتم فى السن ده ؟؟ بالعكس طبعا


المهم تعرفوا وتتعلموا منين ومن مين مش اي واحد متجوز هايقولك كلام صح


ليه ؟ اولا لان فى فروق فرديه وخبرات شخصيه مختلفه تخلي دماغك غير دماغ اي احد وجسمك غير جسم اي حد وبالتالي حياتك وتجربتك غير اي حد


وكمان لان نص الرجاله ولله الحمد فى الموضوع ده بالذاااااات فشارين حلو اوي وبيحبوا يعملوا نفسهم خبره اوي اوي اوي


فمش عايزاك تعتمد على معلوماتك الى واخدها من بؤ اي حد كده


ثانيا : مش عاجبنى نغمة احنا بنمارس العاده السريه عشان ضغط الاهل عليكم وحال البلد والكلام ده مش عايزه شماعات عايزاك تكون انت والشباب كلهم تحاسبوا نفسكم قبل ما تحاسبوا اي حد .

وشايفه انك بتتكلم على انك ضايع وكلام كبير اوي كده هل كل ده عشان ممارسه العاده السريه فقط ولا فى بلاوي تانيه؟


طيب هاقووول تاني العاده السريه فيها اختلاف فى الراي فى درجة حرمانيتها وفيها كلام كتير اتكلمنا عنه قبل كده

لكن الى مافيش عليه خلاف هو ان الافلام والصور وكل السكه دي هى الى حراااااااام فبطلوا الاول الى مافيش عليه خلاف وبعدين نتفاهم فى الباقي


لكن برضه ابص بعينى التانيه للاهل واقولهم خلوا بالكم من عيالكم ارجوكم


ثالثا : مين بقى ضحك عليك وقالك ان فايدة الضياع الخبره ؟؟


طبعا الى غلط غلطه لو كان عنده مخ هايتعلم منها عشان كده مش شرط طبعا انى الى يغلط غلطه يتعلم منها


وكان ممكن انت تنصح اخوك وتقف جمبه لو كنت سمعت النصح وقريت واتعلمت وفهمت قبل ما تكون انت نفسك صاحب المشكله .


رابعا :خلي بالك الرياضه والقرآن والانشغال ده يكون كويس معاك برضه ما تفتكرش انك عديت المرحله دي


ولو كنت مؤمن فعلا بالكلام الى بتقوله لاخوك اولى انك تطبقه على نفسك مش تقول خلاص بقى انا وقعت والى كان كان


خامسا : الاهل معذورين عندهم مشاكل كتير وعليهم ضغط كبير اوك معاك لكن مسؤليتهم انهم يقروا ويتعلموا ويتكلموا معاكم ويفهموكم لا هما مش معفيين من المسؤليه زي ما بيروحوا يسألوا من احسن مدرس كمياء فى البلد وينحتوا فى الصخر عشان يدوكوا ثمن الدروس عشان تجيبوا مجموع ولا تنازل ولا استسلام لازم كلية القمه


كمان نقدر نعمل كده فى التربيه من جميع النواحى ونعتبرها من اولويتنا والى ما نعرفوش نسأله فيه ونتعلم عشان نعرف نربي عيالنا .


وربنا معاك يارب انت وكل الى الشباب ويصلح حالكم ويهديكم للصواب دايما



يلا سمعوني رايكم يا جماعة الخير

السبت، 22 أغسطس 2009

جسدي مشكلتى ... من بارقة نور


احبائي المدونين وزوار المدونه كلهم


كل سنه وانتم طيبين ورمضان كريم وربنا يتقبل منا ومنكم ان شاء الله صيامنا وصالح اعمالنا


الحقيقه الاستاذ عمرو بيعتذر عن البوست بتاعه النهارده لانه مشغول شويه ومنفضلنا


فانا قلت نعرض مشكله من المشاكل الى جاتلي على الاميل بعد ما اخدت اذن صاحبتها طبعا


تعالوا نشوف مشكلة صديقتنا الى هى سمت نفسها بارقة نور



السلام عليكم ورحمة الله وبركاته

عزيزتي بعبعة
أحييكي على مدونتك الرائعة
قرائتي لمدونتك شجعتني على أن أحكي لك مشكلتي عسى أن أجد عندك حلا لها


منذ صغري أعاني من سخرية قريباتي وتعليقاتهن السخيفة على جسدي
جسدي نحيف مثل عائلة أبي
ولم أرث شيئا من عائلة أمي لا شكلا ولا مضمونا
وعائلة أمي كانت مصدر السخرية الدائم
لأنني لست ممتلئة ولا أملك "مظاهر أنثوية" وأظنك تفهمين ما أعنيه بالمظاهر الأنثوية
لم أكن أعرف ماهي المشكلة في أن اكون نحيفة خاصة وأنا أرى الجميع يسعون للتخسيس وليس العكس
وكيف أتصرف وهذه هي طبيعة جسدي وليست شيئا بيدي

بدأت أكره نفسي
خالاتي وبناتهن كن يقلن لي أنني لن أعجب زوجي
وأن ركبتاي نحيفتان ويذكرن دائما اسودادهما واسوداد المنطقة تحت عيني
جربت أخذ ملعقة عسل يوميا لمدة شهور
وجربت مغذي حول العين كيميائي وآخر طبيعي
ولم يختف السواد
صديقتي كانت تحكي لي عن أخيها الذي تزوج فتاة نحيفة وقالت لي إنها لا تملأ عينيه

كل ذلك ساهم في خوفي الشديد الواصل مرحلة الرعب من الزواج
وعدم قدرتي على تحمل مجرد احتمال ألا أعجب من سيشاركني حياتي
وألا "أملأ عينيه" وقلبه

تحمليني قليلا لأكمل لك وسوستي الشديدة في موضوع النظافة
لدرجة استخدامي الكلور والديتول باستمرار حتى مع حساسيتي من المنظفات
لكني بقرف جدااااااااا
مما يصيبني بهستيريا
تجعلني أرفض كل من تقدموا لي لأسباب غير حقيقية
لا أعرف هل تعرضي للتحرش في صغري سبب كرهي للذكور
أم ما أراه وأسمع عنه ممن حولي عمن هم ذكور وليسوا رجالا
أم هو خوفي من أن يراني رجل بجسدي الذي أخجل منه

هل أبقى كما أنا حتى لا أظلم أحدا معي ؟

تحياتي

بارقة نور



ده كان نص رسالتها


والحقيقه انا رديت عليها فى اميل هاقول ردي باختصار


هو انها ما تسألش عن الناس دي لانهم حتى بينقدوها بطريقه سخيفه وطبعا مش كل الناس زي بعضها


ودايما انا باقول جايز يكون الجمال عموما مهم لكن مش اهم حاجه لا فى الحياه ولا فى الجواز والحب


ياما الواحد شاف واحد متجوز واحده وبيحبها وبيموت فيها والواحد يقول فى سره سبحانه مقسم الارزاااااااق


والعكس ياما رجاله ستاتهم ملكات جمال والحقيقه بيبقوا مش طايقيين يبصوا فى خلقتهم


وكل فوله ولها كيال زي ما بيقولوا فى الامثال


لكن طبعا انتى ممكن تروحي لدكتور لعلاج النحافه وبرضه حكاية السمار تحت العنين
وكمان الوسواس
وحتى لو كان التحرش القديم الى ما نعرفش تفاصيله فما نعرفش ممكن يكون اثر عليكى ازاي
برضه له علاج لو كان اثر عليكى


هانستنى نسمع راي الدكتور عباس الاول بقى تابعي التعليقات


والحقيقه بارقة نور كانت ردت عليا فى رساله تانيه والى فهمته منها يا جماعه ان الموضوع مش نحافه فقط موضوع انها شايفه ان المناطق الانثويه عندها هى الى اقل من الطبيعى .


وانا كنت قلتلها حاجه عشان تريح نفسها من الهاجس ده خلاصة الامر يعنى :


سيبك منهم وما تخليش كلام ناس هبل يزعزعوا ثقتك بنفسك

ولما يجيلك واحد يتقى ربنا وشافك ورضى بيكى
خلاص هو عاجبه الجثه بقى انتى مااااالك

كل واحد بياكل اللقمه الى على هواه


عايزه اسمع رايكم بقى فى الموضوع


وان شاء الله يومين كده وهانزل برضه رساله من الصديق (m) هو حابب انكم تقروها وتقولوا رايكم ان شاء الله